المعجم الأوسط

سیدنا قیس بن عاصم رضی اللہ عنہ سے روایت ہے کہ وہ اسلام لائے اور نبی اکرم ﷺ کی خدمت میں حاضر ہوئے ”تو آپ ﷺ نے انہیں پانی اور بیری کے پتوں سے غسل کرنے کا حکم دیا۔“
اس حدیث کو زافر رحمہ اللہ سے صرف عبداللہ بن ابی غسان رحمہ اللہ نے روایت کیا ہے۔

سیدنا عبد اللہ بن الارقم الزہری رضی اللہ عنہ سے روایت ہے کہ نبی کریم ﷺ نے فرمایا: ”جب نماز کا وقت ہو جائے اور تم میں سے کسی کو رفعِ حاجت کی ضرورت ہو، تو اسے چاہیے کہ پہلے رفعِ حاجت سے ہی آغاز کرے۔“
اس حدیث کو زافر رحمہ اللہ سے صرف ابن ابی غسان رحمہ اللہ نے روایت کیا ہے۔

سیدنا عبداللہ بن عمرو بن عاص رضی اللہ عنہما سے روایت ہے کہ نبی اکرم ﷺ نے فرمایا: ”کوئی بندہ اس وقت تک مومن نہیں ہو سکتا جب تک کہ وہ تقدیر پر، اس کی بھلائی اور اس کی برائی پر ایمان نہ لے آئے۔“
اس حدیث کو ابویونس رحمہ اللہ سے صرف زافر رحمہ اللہ نے روایت کیا ہے اور ان سے اس کی روایت میں ابن ابی غسان رحمہ اللہ منفرد ہیں۔

الجراح، جو ام المومنین سیدہ ام حبیبہ رضی اللہ عنہا کے مولیٰ ہیں، سیدہ ام حبیبہ رضی اللہ عنہا سے روایت کرتے ہیں کہ نبی کریم ﷺ نے فرمایا: ”فرشتے اس قافلے کے ساتھ نہیں رہتے جس میں گھنٹی ہو۔“
ابن جریج رحمہ اللہ سے یہ حدیث صرف عبد المجید رحمہ اللہ نے روایت کی ہے، اور ان سے اسے بیان کرنے میں حریز بن مسلم رحمہ اللہ منفرد ہیں۔

ام المومنین سیدہ عائشہ رضی اللہ عنہا سے روایت ہے کہ ”نبی ﷺ نماز ادا فرماتے تھے اور وہ آپ ﷺ کے سامنے اس طرح آڑی لیٹی ہوتی تھیں جیسے جنازہ رکھا جاتا ہے۔“

ام المومنین سیدہ عائشہ رضی اللہ عنہا سے روایت ہے کہ نبی ﷺ نے فرمایا: ”ولاء (وراثت کا حق) اسی کے لیے ہے جس نے آزاد کیا۔“

ام المومنین سیدہ عائشہ رضی اللہ عنہا سے روایت ہے کہ انہوں نے فرمایا: رسول اللہ ﷺ نے ارشاد فرمایا: ”جب رات کا کھانا حاضر ہو جائے اور نماز کی اقامت کہہ دی جائے، تو پہلے کھانے سے آغاز کرو۔“

ام المومنین سیدہ عائشہ رضی اللہ عنہا سے روایت ہے کہ ”نبی ﷺ روزے کی حالت میں بوسہ دے لیا کرتے تھے۔“

سیدنا سعد رضی اللہ عنہ سے روایت ہے کہ رسول اللہ ﷺ نے انہیں فرمایا: ”تیر چلاؤ، «فِدَاكَ أَبِي وَأُمِّي» میرے ماں باپ تم پر فدا ہوں۔“

سیدنا عمر بن خطاب رضی اللہ عنہ سے روایت ہے کہ انہوں نے فرمایا: رسول اللہ ﷺ نے ارشاد فرمایا: ”اعمال کا انحصار محض نیتوں پر ہے اور ہر شخص کے لیے وہی کچھ ہے جس کی اس نے نیت کی۔ چنانچہ جس کی ہجرت اللہ اور اس کے رسول ﷺ کی خاطر ہو، تو اس کی ہجرت (مقبول اور) اللہ اور اس کے رسول ﷺ ہی کی طرف ہے، اور جس کی ہجرت دنیا حاصل کرنے کے لیے ہو یا کسی عورت سے نکاح کی غرض سے، تو اس کی ہجرت اسی مقصد کے لیے ہے جس کے لیے اس نے ہجرت کی۔“

سیدنا انس بن مالک رضی اللہ عنہ سے روایت ہے کہ: ”نبی ﷺ نے مہاجرین اور انصار کے درمیان سیدنا انس رضی اللہ عنہ کے گھر میں باہمی معاہدہ (بھائی چارہ) قائم فرمایا تھا۔“
امام طبرانی رحمہ اللہ فرماتے ہیں: ”ان احادیث کو قاسم بن معن رحمہ اللہ سے صرف عبدالملک الذماری رحمہ اللہ نے ہی روایت کیا ہے، اور اسحاق بن ابراہیم بن جوتی رحمہ اللہ اس کی روایت میں منفرد ہیں۔“

سیدنا انس بن مالک رضی اللہ عنہ سے روایت ہے کہ انہوں نے فرمایا: ”رسول اللہ ﷺ گھر کے دروازے سے باہر نکلے اور آپ ﷺ حجرہ مبارک کی طرف جانے کا ارادہ رکھتے تھے، تو آپ ﷺ نے کچھ لوگوں کو سنا جو تقدیر کے معاملے میں بحث و تکرار کر رہے تھے؛ ان میں سے ایک کہہ رہا تھا: ”کیا اللہ تعالیٰ نے فلاں فلاں آیت میں یہ نہیں فرمایا؟“ اور دوسرا کہہ رہا تھا: ”کیا اللہ تعالیٰ نے فلاں فلاں آیت میں یہ نہیں فرمایا؟“ پھر رسول اللہ ﷺ حجرہ مبارک کے دروازے سے باہر تشریف لائے تو (غصے کی شدت سے) آپ ﷺ کا چہرہ مبارک ایسا سرخ ہو رہا تھا گویا اس پر انار کے دانے نچوڑ دیے گئے ہوں، آپ ﷺ نے فرمایا: ”کیا تمہیں اسی بات کا حکم دیا گیا ہے؟ - یا (یہ الفاظ) فرمائے: - کیا تم اسی لیے مبعوث کیے گئے ہو؟ تم سے پہلے کے لوگ محض اسی جیسی باتوں کی وجہ سے ہلاک ہوئے کہ انہوں نے اللہ کی کتاب کے ایک حصے کو دوسرے کے ساتھ ٹکرایا؛ اللہ نے تمہیں جس بات کا حکم دیا ہے اسے قبول کر لو اور جس سے منع فرمایا ہے اس سے رک جاؤ۔“ اس کے بعد لوگوں نے کسی کو تقدیر کے بارے میں کلام کرتے نہیں سنا یہاں تک کہ حجاج کے ایام آ گئے، تو سب سے پہلے جس نے تقدیر کے بارے میں کلام کیا وہ معبد جہنی تھا، جسے حجاج نے قتل کر دیا۔“
امام طبرانی رحمہ اللہ فرماتے ہیں: ”اس حدیث کو عبداللہ داناج، مطر اور قتادہ سے، انہوں نے سیدنا انس رضی اللہ عنہ سے، صرف یوسف بن عطیہ نے ہی روایت کیا ہے۔“

سالم بن عبد اللہ بن عمر رحمہ اللہ اپنے والد سیدنا عبد اللہ بن عمر رضی اللہ عنہما سے اور وہ اپنے دادا سیدنا عمر بن خطاب رضی اللہ عنہ سے روایت کرتے ہیں کہ نبی کریم ﷺ ”جب دعا میں اپنے دونوں ہاتھ پھیلاتے—یا (راوی کو شک ہے کہ) اٹھاتے—تو انہیں اس وقت تک واپس نہ لاتے جب تک ان سے اپنے چہرے کا مسح نہ فرما لیتے۔“
یہ حدیث سیدنا عمر رضی اللہ عنہ سے صرف اسی سند کے ساتھ مروی ہے، اور اس کی روایت میں حماد بن عیسیٰ الجہنی رحمہ اللہ منفرد ہیں۔

سیدنا ابوہریرہ رضی اللہ عنہ سے روایت ہے کہ رسول اللہ ﷺ نے فرمایا: ”کون ہے جو مجھ سے یہ کلمات حاصل کرے گا، پھر ان پر عمل کرے گا یا کسی ایسے کو سکھائے گا جو ان پر عمل کرے؟“
سیدنا ابوہریرہ رضی اللہ عنہ نے بیان کیا کہ میں نے عرض کیا: ”اے اللہ کے رسول ﷺ! میں (تیار ہوں)۔“ تب نبی ﷺ نے میرا ہاتھ پکڑا اور اس میں پانچ باتیں شمار کیں اور فرمایا: ”حرام کاموں سے بچو، تم سب سے بڑے عبادت گزار بن جاؤ گے؛ اللہ نے تمہارے لیے جو تقسیم فرما دیا ہے اس پر راضی رہو، تم سب سے زیادہ غنی بن جاؤ گے؛ اپنے پڑوسی کے ساتھ حسنِ سلوک کرو، تم (کامل) مومن بن جاؤ گے؛ لوگوں کے لیے وہی پسند کرو جو اپنے لیے پسند کرتے ہو، تم (سچے) مسلمان بن جاؤ گے؛ اور زیادہ نہ ہنسا کرو، کیونکہ زیادہ ہنسنا دل کو مردہ کر دیتا ہے۔“
اس حدیث کو حسن رحمہ اللہ سے صرف ابوطارق رحمہ اللہ نے روایت کیا ہے، اور اسے روایت کرنے میں جعفر بن سلیمان رحمہ اللہ منفرد ہیں۔

سیدنا جابر بن عبداللہ رضی اللہ عنہما سے روایت ہے کہ انہوں نے فرمایا: ”نبی ﷺ نے ایک زخم (لگنے کے واقعے) کی طرف (تحقیق کے لیے کسی کو) بھیجا، پس آپ ﷺ نے اس کے بارے میں حکم دیا کہ اس کا علاج کیا جائے اور (صحت یابی کے بعد) اس کا قصاص لیا جائے، اور آپ ﷺ نے (زخم کے حتمی نتیجے کے لیے) ایک سال کی مدت مقرر فرمائی۔“
ابو الملیح رحمہ اللہ سے اس حدیث کو عبداللہ بن ابی حمید رحمہ اللہ کے علاوہ کسی نے روایت نہیں کیا۔

سیدنا ابن عباس رضی اللہ عنہما سے روایت ہے کہ رسول اللہ ﷺ نے سیدنا بدیل خزاعی رضی اللہ عنہ کو حکم دیا کہ وہ ایامِ تشریق میں یہ اعلان کریں: ”ان دنوں میں روزہ نہ رکھو، کیونکہ یہ کھانے پینے کے دن ہیں۔“
امام طبرانی رحمہ اللہ فرماتے ہیں: ”اس حدیث کو عمرو بن دینار رحمہ اللہ سے صرف مفضل بن صالح رحمہ اللہ نے ہی روایت کیا ہے۔“

ام المومنین سیدہ عائشہ رضی اللہ عنہا سے روایت ہے کہ انہوں نے فرمایا: ”رسول اللہ ﷺ کی روح مبارک قبض کی گئی تو آپ ﷺ نے کسی کو خلیفہ نامزد نہیں فرمایا تھا، اور اگر آپ ﷺ کسی کو خلیفہ مقرر کرنے والے ہوتے تو سیدنا ابوبکر رضی اللہ عنہ کو خلیفہ مقرر فرماتے۔“
ابن ابی ملیکہ رحمہ اللہ سے اس حدیث کو صرف ابو العمیس رحمہ اللہ نے روایت کیا ہے۔

سیدنا ابوہریرہ رضی اللہ عنہ سے روایت ہے کہ ایک شخص نے عرض کی: ”اے اللہ کے رسول ﷺ! کیا کوئی شخص ایک ہی کپڑے میں نماز پڑھ سکتا ہے؟“ تو آپ ﷺ نے فرمایا: ”کیا تم میں سے ہر ایک کے پاس دو کپڑے میسر ہیں؟“
اس حدیث کو عمران القطان رحمہ اللہ سے صرف یحییٰ بن السکن رحمہ اللہ نے روایت کیا ہے، اور اس کی روایت میں یزید بن حکیم رحمہ اللہ منفرد ہیں۔

سیدنا ابوسعید رضی اللہ عنہ سے روایت ہے کہ رسول اللہ ﷺ نے فرمایا: ”عنقریب تمہارے پاس ایسے لوگ آئیں گے جو علم (دین) تلاش کر رہے ہوں گے، پس جب وہ تمہارے پاس آئیں تو ان کے متعلق میری خیر و بھلائی کی وصیت قبول کرنا (یعنی ان سے حسنِ سلوک کرنا)۔“
اس حدیث کو عمران القطان رحمہ اللہ سے صرف یحییٰ بن سکن رحمہ اللہ نے روایت کیا ہے، اور اسے بیان کرنے میں یزید بن حکیم رحمہ اللہ منفرد ہیں۔
دار الحرمین کے نسخے میں اسی طرح ہے، اور غالباً درست نام (ابن ابی حکیم) ہے۔

سیدنا ابن عمر رضی اللہ عنہما اللہ عزوجل کے ارشاد: ﴿الْحَجُّ أَشْهُرٌ مَعْلُومَاتٌ﴾ کے متعلق روایت کرتے ہیں کہ رسول اللہ ﷺ نے فرمایا: ”وہ «ذُو الْقَعْدَةِ ، وَذُو الْحِجَّةِ» (ذی القعدہ اور ذی الحجہ) ہیں۔“
اور ﴿فَمَنْ فَرَضَ فِيهِنَّ الْحَجَّ﴾ کے متعلق سیدنا ابن عمر رضی اللہ عنہما نے فرمایا: ”اس سے مراد «التَّلْبِيَةُ وَالْإِحْرَامُ» (تلبیہ پکارنا اور احرام باندھنا) ہے۔ پس «فَلا رَفَثَ» سے مراد عورتوں سے ہم بستری کرنا، «وَلا فُسُوقَ» سے گالی گلوچ اور «وَلا جِدَالَ» سے مراد بحث و تکرار اور جھگڑا کرنا ہے۔“
ابراہیم بن مہاجر سے اس حدیث کو سوائے شریک (رحمہ اللہ) کے کسی نے مرفوعاً بیان نہیں کیا۔

سیدنا انس بن مالک رضی اللہ عنہ سے روایت ہے کہ رسول اللہ ﷺ نے گھر کے دروازے پر (کپڑا یا قالین وغیرہ) بچھانے سے منع فرمایا، اور فرمایا: ”اسے اس (دروازے) سے ذرا ہٹا دو۔“
یہ حدیث رسول اللہ ﷺ سے صرف اسی سند کے ساتھ مروی ہے، اور عقبہ بن خالد رحمہ اللہ اسے بیان کرنے میں منفرد ہیں۔

سیدنا ابن عمر رضی اللہ عنہما سے روایت ہے کہ عمر بن نافع رحمہ اللہ کہتے ہیں: ”میں اسے نبی ﷺ ہی سے مروی جانتا ہوں کہ آپ ﷺ نے فرمایا: ”جب تم میں سے کوئی نماز پڑھے تو اسے دو کپڑوں میں نماز پڑھنی چاہیے، پھر اگر اس کے پاس صرف ایک ہی کپڑا ہو تو اسے بطور تہبند باندھ لے، پھر نماز پڑھے، اور تم یہودیوں کی طرح (بدن پر کپڑا) نہ لپیٹو، کیونکہ اللہ تعالیٰ اس بات کا زیادہ حقدار ہے کہ اس کے لیے زینت اختیار کی جائے۔““
اس حدیث کو عمر بن نافع رحمہ اللہ سے صرف عبداللہ بن جعفر رحمہ اللہ نے روایت کیا ہے، اور اس کی روایت میں سہل بن عثمان رحمہ اللہ منفرد ہیں۔

سیدنا علی رضی اللہ عنہ سے روایت ہے کہ نبی کریم ﷺ نے ”سود کھانے والے، اسے کھلانے والے، اس کے دونوں گواہوں، اس کے لکھنے والے، حلالہ کرنے والے، جس کے لیے حلالہ کیا جائے، جسم گودنے والی، گودوانے والی اور زکوٰۃ روکنے والے پر لعنت فرمائی ہے۔“
امام طبرانی رحمہ اللہ فرماتے ہیں: ”اس حدیث کو لیث رحمہ اللہ سے صرف علی بن مسہر رحمہ اللہ نے روایت کیا ہے۔“

سیدنا علی رضی اللہ عنہ سے روایت ہے کہ سیدہ فاطمہ رضی اللہ عنہا نے ان سے کہا: ”اے میرے چچا زاد! گھریلو کام کاج اور چکی پیسنے کی مشقت مجھ پر بہت گراں گزرتی ہے، لہٰذا آپ اللہ کے نبی ﷺ سے (خادم کے لیے) بات کریں۔“ انہوں نے فرمایا: ”جی بہتر۔“ چنانچہ اگلے روز اللہ کے نبی ﷺ ان دونوں کے پاس تشریف لائے جبکہ وہ ایک ہی لحاف میں آرام فرما تھے، آپ ﷺ نے اپنا قدمِ مبارک ان کے درمیان رکھا تو سیدہ فاطمہ رضی اللہ عنہا نے عرض کیا: ”اے اللہ کے نبی! کام کی مشقت مجھ پر بہت شاق گزرتی ہے، کاش کہ آپ اللہ کے عطا کردہ مالِ فئے میں سے میرے لیے کسی خادم کا حکم فرما دیتے؟“ آپ ﷺ نے فرمایا: ”کیا میں تمہیں وہ چیز نہ سکھاؤں جو تمہارے لیے اس سے بہتر ہے؟ تم تینتیس مرتبہ سبحان اللہ، تینتیس مرتبہ الحمد للہ اور چونتیس مرتبہ اللہ اکبر پڑھا کرو؛ یہ زبان پر تو سو کلمات ہیں لیکن میزانِ عمل میں ایک ہزار نیکیاں ہیں، اور یہ اس لیے کہ اللہ تعالیٰ فرماتا ہے: ﴿مَنْ جَاءَ بِالْحَسَنَةِ فَلَهُ عَشْرُ أَمْثَالِهَا﴾ ”جو شخص ایک نیکی لائے گا اسے اس جیسی دس نیکیوں کا ثواب ملے گا“ (اور یہ اجر) ایک لاکھ تک (پہنچ جاتا ہے)۔“
امام طبرانی رحمہ اللہ فرماتے ہیں: ”اس حدیث کو ابو اسحاق سے صرف حبیب بن حبیب نے روایت کیا ہے، جو حمزہ زیات کے بھائی ہیں۔“

سیدنا علی رضی اللہ عنہ سے روایت ہے کہ رسول اللہ ﷺ نے فرمایا: ”بے شک میں اپنی امت کے حق میں نہ کسی مومن سے اندیشہ رکھتا ہوں اور نہ کسی مشرک سے؛ رہا مومن، تو اسے اس کا ایمان (غلط روی سے) روک لیتا ہے، اور رہا مشرک، تو اسے اس کا کفر ہی دبا دیتا ہے، لیکن میں ان کے متعلق اس منافق سے ڈرتا ہوں جو زبان کا عالم ہو، وہ ایسی باتیں کہتا ہے جنہیں وہ (لوگ بطورِ معروف) پہچانتے ہیں اور ایسے کام کرتا ہے جن کا وہ (بطورِ منکر) انکار کرتے ہیں۔“
امام طبرانی رحمہ اللہ فرماتے ہیں: ”اس حدیث کو ابواسحاق رحمہ اللہ سے صرف عباد بن بشر رحمہ اللہ نے روایت کیا ہے۔“

سیدنا انس بن مالک رضی اللہ عنہ سے روایت ہے کہ رسول اللہ ﷺ نے فرمایا: ”بنی آدم کی شرمگاہوں اور جنات کے درمیان پردہ یہ ہے کہ جب ان میں سے کوئی اپنے کپڑے اتارے تو کہے: «بِسْمِ اللهِ» ”اللہ کے نام کے ساتھ“۔“
اس حدیث کو اعمش رحمہ اللہ سے صرف سعید بن مسلمہ رحمہ اللہ اور سعید بن صلت رحمہ اللہ نے روایت کیا ہے۔

سیدنا انس بن مالک رضی اللہ عنہ بیان فرماتے ہیں: ”میں حجۃ الوداع کے موقع پر احرام کے وقت رسول اللہ ﷺ کی اونٹنی کے پاس موجود تھا، چنانچہ جب آپ ﷺ کی سواری آپ کو لے کر روانہ ہوئی تو آپ ﷺ نے فرمایا: «لَبَّيْكَ بِحَجَّةٍ وَعُمْرَةٍ مَعًا» ”میں حج اور عمرہ دونوں کے ساتھ حاضر ہوں۔“ “
امام طبرانی رحمہ اللہ فرماتے ہیں: ”اس حدیث کو اسامہ بن زید سے صرف ابو خالد البیسری نے روایت کیا ہے، اور اس میں ابو کامل منفرد ہیں۔“

ابن بریدہ رحمہ اللہ اپنے والد سیدنا بریدہ رضی اللہ عنہ سے روایت کرتے ہیں کہ رسول اللہ ﷺ نے فرمایا: ”میں نے تمہیں کھجوریں (ایک ساتھ) ملا کر کھانے سے منع کیا تھا، اب یقیناً اللہ تعالیٰ نے تمہیں وسعت عطا فرما دی ہے، لہٰذا اب تم (انہیں) ملا کر کھا سکتے ہو۔“
عطاء خراسانی رحمہ اللہ سے اس حدیث کو صرف یزید بن بزیع رحمہ اللہ نے ہی روایت کیا ہے۔

سیدنا ابن عباس رضی اللہ عنہما سے روایت ہے کہ ایک خاتون نبی کریم ﷺ کی خدمت میں حاضر ہوئی اور شکایت کی کہ اس کا نکاح اس کی ناپسندیدگی کے باوجود کر دیا گیا ہے، تو آپ ﷺ نے اسے اس کے شوہر سے جدا کر دیا (نکاح ختم کر دیا)، وہ ثیبہ (پہلے سے شادی شدہ) تھی، پھر اس نے اس کے بعد سیدنا ابولبابہ رضی اللہ عنہ سے نکاح کر لیا۔
اس حدیث کو ابن جریج رحمہ اللہ سے صرف ابو سعد صاغانی رحمہ اللہ نے روایت کیا ہے، اور ان سے اس کی روایت کرنے میں سہل رحمہ اللہ منفرد ہیں۔

سیدنا عبداللہ بن عباس رضی اللہ عنہما سے روایت ہے کہ ایک شخص رسول اللہ ﷺ کی خدمت میں ایک سیاہ فام لونڈی لے کر حاضر ہوا اور عرض کیا: ”اے اللہ کے رسول! مجھ پر ایک مومن غلام آزاد کرنا واجب ہے، تو کیا یہ میری طرف سے کفایت کرے گی؟“ رسول اللہ ﷺ نے اس (لونڈی) سے دریافت فرمایا: ”کیا تو گواہی دیتی ہے کہ اللہ کے سوا کوئی معبودِ برحق نہیں؟“ اس نے عرض کیا: ”جی ہاں۔“ آپ ﷺ نے پوچھا: ”کیا تو گواہی دیتی ہے کہ میں اللہ کا رسول ہوں؟“ اس نے عرض کیا: ”جی ہاں۔“ تب آپ ﷺ نے (اس کے مالک سے) فرمایا: ”اسے آزاد کر دو، کیونکہ یہ (تمہاری طرف سے) کافی ہے۔“
امام طبرانی رحمہ اللہ فرماتے ہیں: ”حبیب سے اس حدیث کو صرف قیس نے روایت کیا ہے؛ اور حنین، سیدنا عباس بن عبدالمطلب رضی اللہ عنہ کے آزاد کردہ غلام اور ابراہیم بن عبداللہ بن حنین کے دادا ہیں۔“
دار الحرمین کے مطبوعہ نسخے میں اسی طرح ہے، اور شاید درست نام «بن ابی حکیم» ہے۔

سیدنا جابر رضی اللہ عنہما سے روایت ہے کہ رسول اللہ ﷺ نے فرمایا: ”میرا یہ بیٹا سردار ہے، اور یقیناً اللہ تعالیٰ اس کے ذریعے مسلمانوں کی دو جماعتوں کے درمیان صلح کروا دے گا۔“ یعنی آپ ﷺ کی مراد سیدنا حسن بن علی رضی اللہ عنہما تھے
اس حدیث کو اعمش رحمہ اللہ سے ابوزہیر اور یحییٰ بن سعید اموی رحمہما اللہ کے علاوہ کسی نے روایت نہیں کیا۔

زر بن حبیش رحمہ اللہ بیان کرتے ہیں کہ ابن جرموز سیدنا علی رضی اللہ عنہ کے پاس اندر آنے کی اجازت طلب کرنے آیا، تو انہوں نے فرمایا: ”سیدنا زبیر رضی اللہ عنہ کے قاتل کو جہنم کی آگ کی بشارت دے دو؛ میں نے نبی ﷺ کو یہ فرماتے ہوئے سنا ہے: «إِنَّ لِكُلِّ نَبِيٍّ حَوَارِيًّا ، وَإِنَّ الزُّبَيْرَ حَوَارِيِّي» ”بے شک ہر نبی کا ایک حواری (خاص مخلص ساتھی) ہوتا ہے اور یقیناً زبیر میرا حواری ہے۔“ “
اس حدیث کو حسین بن واقد رحمہ اللہ سے صرف ابو تمیلہ رحمہ اللہ نے روایت کیا ہے۔

سیدنا ابوہریرہ رضی اللہ عنہ سے روایت ہے کہ انہوں نے فرمایا: ”سیدنا جعفر بن ابی طالب رضی اللہ عنہ جیسا (باکمال) نہ تو کسی شخص نے جوتا پہنا اور نہ ہی کوئی کجاوے پر سوار ہوا۔“
خارجہ رحمہ اللہ سے اس حدیث کو صرف ابو تمیلہ رحمہ اللہ نے ہی روایت کیا ہے۔

سیدنا ابوہریرہ رضی اللہ عنہ سے روایت ہے کہ رسول اللہ ﷺ نے فرمایا: ”جب تمہارے پاس کوئی ایسا شخص آئے جس کے دین اور اخلاق سے تم مطمئن ہو تو اس کا نکاح کر دو، اگر تم ایسا نہیں کرو گے تو زمین میں فتنہ اور وسیع فساد برپا ہو جائے گا۔“
امام طبرانی رحمہ اللہ فرماتے ہیں: ”اس حدیث کو ابنِ عجلان رحمہ اللہ سے، انہوں نے امام مقبری رحمہ اللہ کے واسطے سے، صرف نوح بن ذکوان رحمہ اللہ نے روایت کیا ہے اور اس کی روایت میں عمرو بن عاصم رحمہ اللہ منفرد ہیں؛ نیز اسے عبد الحمید بن سلیمان رحمہ اللہ نے محمد بن عجلان رحمہ اللہ سے، انہوں نے ابنِ وثیمہ نصری رحمہ اللہ کے واسطے سے روایت کیا ہے۔“

سیدنا عمران بن حصین رضی اللہ عنہ سے روایت ہے کہ رسول اللہ ﷺ نے فرمایا: ”میری امت میں سے ستر ہزار افراد بغیر حساب کتاب کے جنت میں داخل ہوں گے، یہ وہ لوگ ہیں جو (علاج کے لیے جسم کو) داغتے نہیں، نہ دم کرواتے ہیں اور نہ ہی بدشگونی لیتے ہیں۔“
سیدنا عمران بن حصین رضی اللہ عنہ نے فرمایا: ”پس ہم نے داغ لگوایا، تو ہمیں نہ تو کامیابی ملی اور نہ ہی فلاح نصیب ہوئی۔“
اس حدیث کو ابو حرہ سے عبید اللہ بن عبد المجید کے سوا کسی نے روایت نہیں کیا، اور ان سے اس کی روایت کرنے میں ابو الجوزاء رحمہ اللہ منفرد ہیں۔

سیدنا ابوہریرہ رضی اللہ عنہ سے روایت ہے کہ انہوں نے فرمایا: ”بدترین کھانا وہ ہے جس میں مالداروں کو مدعو کیا جائے اور فقراء کو محروم رکھا جائے، اور جسے (ولیمہ کی) دعوت دی جائے اور وہ اسے قبول نہ کرے تو یقیناً اس نے اللہ اور اس کے رسول ﷺ کی نافرمانی کی۔“
پھر انہوں نے فرمایا: ”آگاہ رہو! اللہ کی قسم، یہ بات میں (اپنی طرف سے) نہیں کہہ رہا ہوں۔“
اور دیگر راویوں نے اسے امام زہری رحمہ اللہ سے، انہوں نے اعرج رحمہ اللہ سے روایت کیا ہے۔

سیدنا انس بن مالک رضی اللہ عنہ سے روایت ہے کہ ایک شخص نے عرض کی: ”اے اللہ کے رسول! میں نے (گناہوں کی) کوئی بھی چھوٹی بڑی حاجت اور خواہش نہیں چھوڑی مگر اس کا ارتکاب کیا ہے۔“ آپ ﷺ نے دریافت فرمایا: ”کیا تم اس بات کی گواہی دیتے ہو کہ «لَا إِلَهَ إِلَّا اللهُ» اور یہ کہ «مُحَمَّدًا رَسُولُ اللهِ»؟“ اس نے عرض کی: ”جی ہاں۔“ آپ ﷺ نے فرمایا: ”تو بے شک یہ (کلمہ شہادت) ان تمام (گناہوں) پر محیط ہو جاتا ہے (یعنی انہیں مٹا دیتا ہے)۔“
امام طبرانی رحمہ اللہ فرماتے ہیں: ”ثابت بنانی رحمہ اللہ سے اس حدیث کو صرف مستور بن عباد رحمہ اللہ نے ہی روایت کیا ہے۔“

سیدنا علی رضی اللہ عنہ سے روایت ہے کہ رسول اللہ ﷺ نے فرمایا: ”جس شخص نے خوشحالی اور ضرورت نہ ہونے کے باوجود (مال کا) سوال کیا، وہ اس کے ذریعے جہنم کے تپتے ہوئے پتھروں کو سمیٹ رہا ہے۔“ صحابہ نے عرض کیا: ”اور غنا (خوشحالی) سے کیا مراد ہے؟“ آپ ﷺ نے فرمایا: ”ایک رات کا کھانا۔“
اس حدیث کو حبیب بن ابی ثابت سے صرف حسن بن ذکوان رحمہ اللہ نے روایت کیا ہے، اور اس کی روایت میں عبد الوارث رحمہ اللہ منفرد ہیں۔

سیدنا عبداللہ رضی اللہ عنہ سے روایت ہے کہ انہوں نے فرمایا: ”نبی کریم ﷺ نے نماز پڑھائی، (راوی کہتے ہیں کہ) مجھے معلوم نہیں کہ آپ ﷺ نے (نماز میں) اضافہ کیا یا کمی، پھر جب آپ ﷺ (نماز سے) فارغ ہوئے تو آپ ﷺ سے (اس بارے میں) کہا گیا، چنانچہ آپ ﷺ نے (سہو کے) دو سجدے کیے۔“
اس حدیث کو سلیمان بن معاذ رحمہ اللہ سے صرف ابو داؤد رحمہ اللہ نے روایت کیا ہے اور اسے نقل کرنے میں عبداللہ بن عمران رحمہ اللہ منفرد ہیں۔

سیدنا مطلب بن ربیعہ رضی اللہ عنہ سے روایت ہے کہ انہوں نے فرمایا: ”رسول اللہ ﷺ اپنے کسی سفر میں رات کے کسی پہر چل رہے تھے کہ آپ ﷺ نے گانے کی آواز سنی، تو دریافت فرمایا: ”یہ کیا ہے؟“ آپ ﷺ نے دیکھا تو ایک شخص دوسرے شخص کے ساتھ مل کر اشعار گا رہا تھا:
«لَا يَزَالُ حَوَارِيَّ تَلُوحُ عِظَامُهُ زَوَى الْحَرْبَ عَنْهُ أَنْ يُجَنَّ فَيُقْبَرَا»
تو آپ ﷺ نے فرمایا: «اللَّهُمَّ أَرْكِسْهُمَا فِي الْفِتْنَةِ رَكْسًا ، وَدُعَّهُمَا فِي نَارِ جَهَنَّمَ دَعًّا» ”اے اللہ! ان دونوں کو فتنے میں اوندھا گرا دے اور انہیں جہنم کی آگ میں سختی سے دھکیل دے۔“ “
امام طبرانی رحمہ اللہ فرماتے ہیں: ”اس حدیث کو نصیر بن ابی الاشعث سے صرف عمرو بن عبد الغفار نے روایت کیا ہے۔“