مجمع الزوائد ومنبع الفوائد

امام طبرانی بیان کرتے ہیں : سیدنا عثمان رضی اللہ عنہ بن کعب بن سعد بن تیم بن مرہ بن کعب بن لؤی بن غالب بن فہر بن مالک ( یعنی ) سیدنا ابوقحافہ رضی اللہ عنہ ۔ یہ فتح مکہ کے دن مسلمان ہوئے تھے اور ان کا انتقال 14 ہجری میں ، سیدنا ابوبکر رضی اللہ عنہ کے انتقال کے ایک سال بعد ہوا تھا ، انتقال کے وقت ان کی عمر 94 سال تھی ، یہ سیدنا ابوبکر رضی اللہ عنہ کے وارث بنے تھے ، ان کی والدہ سلمہ بنت صخر بن عامر بن عمرو بن کعب بن سعد بن تیم بن مرہ ہیں ۔

ابومسہر بیان کرتے ہیں : سیدنا عرباض بن ساریہ رضی اللہ عنہ کا انتقال شام میں ، عبدالملک بن مروان کے عہد خلافت میں 75 ہجری میں ہوا تھا ۔
یہ روایت امام طبرانی نے نقل کی ہے ۔

اسی سند کے ساتھ انہوں نے یہ بات بیان کی ہے : سیدنا ابوعبیدہ بن قیس رضی اللہ عنہ سلمی ، جن کا تعلق مراد قبیلے سے ہے ، ان کا انتقال 72 ہجری میں ہوا تھا اور انہوں نے نبی اکرم صلی اللہ علیہ وسلم کے وصال سے ، دو سال پہلے اسلام قبول کیا تھا ۔

یحیی بن بکیر بیان کرتے ہیں : سیدنا ابوعبس بن جبر رضی اللہ عنہ کا انتقال مدینہ منورہ میں 34 ہجری میں ہوا تھا ، اس وقت ان کی عمر 70 سال تھی ، سیدنا عثمان غنی رضی اللہ عنہ نے ان کی نماز جنازہ پڑھائی تھی ، سیدنا ابوبردہ بن نیار رضی اللہ عنہ اور سیدنا محمد بن مسلمہ رضی اللہ عنہ اور سیدنا سلمہ بن وقش رضی اللہ عنہ ان کی قبر میں اترے تھے ، سیدنا ابوعبس رضی اللہ عنہ کا نام ” عبدالرحمن بن جبر “ رضی اللہ عنہ ہے ۔

یحیی بن بکیر بیان کرتے ہیں : سیدنا عبدالرحمن بن ابوبکر رضی اللہ عنہ کا انتقال ہو گیا ، انہیں مکہ سے ایک برید کے فاصلے پر موجود ” حبشی “ نامی جگہ پر دفن کیا گیا ، یہ 55 ہجری یا 56 ہجری کی بات ہے ۔
یہ روایت امام طبرانی نے نقل کی ہے ۔

محمد بن اسحاق بیان کرتے ہیں : سیدنا عمرو بن حزم انصاری رضی اللہ عنہ کا انتقال 54 ہجری میں ہوا تھا ۔
یہ روایت امام طبرانی نے نقل کی ہے اور اس کے رجال ثقہ ہیں ۔

امام شعبی بیان کرتے ہیں : سیدنا عمر بن خطاب رضی اللہ عنہ نے کوفہ کی طرف جب پہلی مہم روانہ کی تھی ، اس میں سیدنا عبیداللہ ثقفی ابومختار رضی اللہ عنہ کو بھیجا تھا ، وہ شہید ہو گئے ، پھر انہوں نے سیدنا سعد بن ابی وقاص رضی اللہ عنہ کو بھیجا ، وہ وہاں پانچ سال ٹھہرے رہے ، پھر سیدنا عمر رضی اللہ عنہ نے انہیں ان کے عہدے سے ہٹا دیا ، پھر سیدنا عمار بن یاسر رضی اللہ عنہ کو بھیجا ، وہ ایک سال ٹھہرے رہے ، پھر انہیں ان کے عہدے سے ہٹا دیا ، پھر سیدنا مغیرہ بن شعبہ رضی اللہ عنہ کو بھیجا ، وہ ایک سال وہاں ٹھہرے رہے ، پھر سیدنا عمر رضی اللہ عنہ شہید ہو گئے ، جب سیدنا عثمان رضی اللہ عنہ خلیفہ بنے تو انہوں نے سیدنا سعد بن ابی وقاص رضی اللہ عنہ کو کوفہ بھیجا ، وہ ایک سال وہاں رہے ، پھر سیدنا عثمان رضی اللہ عنہ نے انہیں ان کے عہدے سے ہٹا دیا ، پھر سیدنا عثمان رضی اللہ عنہ نے سیدنا ولید بن عقبہ رضی اللہ عنہ کو بھیجا ، وہ پانچ سال وہاں گورنر رہے ، پھر انہیں ان کے عہدے سے ہٹا دیا ، پھر سیدنا عثمان رضی اللہ عنہ نے سیدنا سعید بن العاص رضی اللہ عنہ کو بھیجا ، وہ پانچ سال وہاں گورنر رہے ، پھر انہوں نے ان کو اس عہدے سے ہٹا دیا ، پھر انہوں نے وہاں سیدنا ابوموسیٰ اشعری رضی اللہ عنہ کو بھیجا ، وہ ایک سال وہاں گورنر رہے ، پھر انہیں ان کے عہدے سے ہٹا دیا ، پھر سیدنا عثمان رضی اللہ عنہ شہید ہو گئے اور پھر فتنہ شروع ہو گیا ۔
جب سیدنا معاویہ رضی اللہ عنہ کے عہد خلافت کا آغاز ہوا ، تو انہوں نے سیدنا مغیرہ بن شعبہ رضی اللہ عنہ کو کوفہ گورنر مقرر کیا ، وہ نو سال تک اس عہدے پر فائز رہے ، پھر ان کا انتقال ہو گیا ، پھر سیدنا معاویہ رضی اللہ عنہ نے زیاد کو کوفہ کا گورنر مقرر کیا ، وہ چار سال رہا پھر وہ مر گیا ، پھر انہوں نے سیدنا ضحاک بن قیس رضی اللہ عنہ کو بھیجا ، وہ تین سال تک گورنر رہے ، پھر انہیں ان کے عہدے سے ہٹا دیا ، پھر انہوں نے سیدنا نعمان بن بشیر رضی اللہ عنہ کو بھیجا ، وہ چار ماہ تک گورنر رہے ، پھر سیدنا معاویہ رضی اللہ عنہ کا انتقال ہو گیا ، اور فتنہ آ گیا ، پھر سیدنا مسلم بن عقیل رضی اللہ عنہ اور اُن کے ساتھیوں کا واقعہ پیش آیا ۔
یہ روایت امام طبرانی نے نقل کی ہے اس کی سند میں ایک سے زیادہ ایسے ضعیف راوی ہیں ، جن کی توثیق کی گئی ہے ۔

محمد بن عبداللہ بن نمیر بیان کرتے ہیں : سیدنا سعد بن عبید رضی اللہ عنہ سن 16 ہجری میں جنگ قادسیہ میں شہید ہوئے تھے ۔
یہ روایت امام طبرانی نے نقل کی ہے ۔

یحیی بن بکیر بیان کرتے ہیں : سیدنا سہل بن سعد رضی اللہ عنہ جن کی کنیت ” ابوعباس “ تھی ، ان کا انتقال مدینہ منورہ میں 91 میں ہجری میں ہوا اس وقت ان کی عمر 99 برس تھی ۔
یہ روایت امام طبرانی نے نقل کی ہے ۔

انہوں نے ابن نمیر کے حوالے سے اس کی مانند روایت نقل کی ہے ۔

زہری بیان کرتے ہیں : سیدنا سہل بن سعد رضی اللہ عنہ فرماتے ہیں : انہوں نے نبی اکرم صلی اللہ علیہ وسلم کی زیارت بھی کی ہے اور نبی اکرم صلی اللہ علیہ وسلم سے سماع بھی کیا ہے ، انہوں نے یہ بات بیان کی ہے : نبی اکرم صلی اللہ علیہ وسلم کے وصال کے وقت ان کی عمر پندرہ سال تھی ۔
( علامہ ہیثمی فرماتے ہیں : ) میں یہ کہتا ہوں : ” صحیح “ میں یہ بات مذکور ہے کہ وہ لعان کرنے والے میاں بیوی کے واقعہ کے وقت موجود تھے اور اس وقت ان کی عمر پندرہ سال تھی ۔
یہ روایت امام طبرانی نے نقل کی ہے ۔

یحیی بن بکیر بیان کرتے ہیں : سیدنا شرحبیل بن حسنہ رضی اللہ عنہ جن کی کنیت ابوعبداللہ ہے ان کا انتقال 18 ہجری میں یا شاید 17 ہجری میں ہوا تھا اس وقت ان کی عمر 57 سال تھی اور وہ سیدنا عمر بن خطاب رضی اللہ عنہ کے مقرر کردہ گورنر تھے ۔

حارث بن عمیرہ بیان کرتے ہیں : سیدنا ابوعبیدہ رضی اللہ عنہ سیدنا شرحبیل بن حسنہ رضی اللہ عنہ اور سیدنا ابومالک رضی اللہ عنہ ۔ یہ سب حضرات ایک ہی دن ، طاعون کی لپیٹ میں آئے تھے ۔
یہ روایت امام طبرانی نے نقل کی ہے اور اس کی سند حسن ہے ۔

ہیثم بن عدی بیان کرتے ہیں : سیدنا ابوسفیان بن حرب رضی اللہ عنہ کا انتقال سیدنا عثمان رضی اللہ عنہ کی خلافت کے 9 سال گزرنے کے بعد ہوا تھا اور سیدنا ابوسفیان بن حرب رضی اللہ عنہ کی بینائی رخصت ہو گئی تھی ۔
یہ روایت امام طبرانی نے نقل کی ہے اور ہیثم نامی راوی متروک ہے ۔

واقدی بیان کرتے ہیں : اسی سال سیدنا ابوسفیان صخر بن حرب رضی اللہ عنہ کا انتقال ہوا ، اس وقت ان کی عمر 88 سال تھی ، راوی کہتے ہیں یعنی یہ 31 ہجری کا واقعہ ہے ۔
یہ روایت امام طبرانی نے نقل کی ہے اور واقدی تک اس کے رجال ثقہ ہیں ۔

یحیی بن بکیر بیان کرتے ہیں : سیدنا صہیب بن سنان رضی اللہ عنہ جن کی کنیت ابویحیی ہے ان کا انتقال مدینہ منورہ میں شوال کے مہینے میں 38 ہجری میں ہوا تھا یہ موصل میں قیدی رہے تھے ، انہیں رومیوں نے قید کر لیا تھا ۔
یہ روایت امام طبرانی نے نقل کی ہے ۔

امام طبرانی بیان کرتے ہیں : سیدنا صفوان رضی اللہ عنہ بن امیہ بن خلف بن وہب بن جمح ، ان کی والدہ کا نام انیسہ بنت معمر بن حبیب بن وہب بن حذافہ بن جمح ہے ، ان صحابی کی کنیت ابووہب ہے ، یہ فتح مکہ کے دن نبی اکرم صلی اللہ علیہ وسلم کی خدمت میں حاضر ہوئے تھے نبی اکرم صلی اللہ علیہ وسلم نے انہیں چار ماہ کی مہلت دی تھی ، انہوں نے غزوہ حنین میں شرکت کی تھی ، اس وقت یہ مشرک تھے ، پھر اس کے بعد یہ مسلمان ہو گئے ، سیدنا عثمان رضی اللہ عنہ کی شہادت کے آس پاس ان کا انتقال ہوا تھا ۔

یحیی بن بکیر بیان کرتے ہیں : سیدنا ابوامامہ باہلی رضی اللہ عنہ ، جن کا نام سیدنا صدی بن عجلان رضی اللہ عنہ ہے ، ان کا انتقال 86 ہجری میں ہوا تھا اس وقت ان کی عمر 91 سال تھی ۔

ابونعیم بیان کرتے ہیں : سیدنا عبداللہ بن عباس رضی اللہ عنہما کا انتقال 68 ہجری میں ہوا تھا ۔
یہ روایت امام طبرانی نے نقل کی ہے ۔

داؤد بن رشید بیان کرتے ہیں سیدنا عبداللہ بن عباس رضی اللہ عنہما کا انتقال 68 ہجری میں ہوا تھا ۔
یہ روایت امام طبرانی نے نقل کی ہے ۔

امام طبرانی بیان کرتے ہیں : سیدنا عبدالله رضی اللہ عنہ بن زمعہ بن اسود بن مطلب بن عبدالعزیٰ بن قصی ، ان کی والدہ قریبہ بنت ابوامیہ بن مغیرہ بن عمرو بن مخزوم ہیں ، اور اُس خاتون کی والدہ عاتکہ بنت عبدالمطلب ہیں ۔

نافع بن عمر بن جمح بیان کرتے ہیں : سیدنا عبداللہ بن سائب رضی اللہ عنہ کا انتقال ، سیدنا عبداللہ بن زبیر رضی اللہ عنہ کے زمانے میں ہوا تھا ۔
یہ روایت امام طبرانی نے نقل کی ہے اور اس کے رجال صحیح کے رجال ہیں ۔

یحیی بن بکیر بیان کرتے ہیں : سیدنا عبداللہ بن حارث بن جزء رضی اللہ عنہ کا انتقال 86 ہجری میں ہوا تھا ۔
یہ روایت امام طبرانی نے نقل کی ہے ۔

اسی سند کے ساتھ انہوں نے یہ بات بیان کی ہے : سیدنا عبدالله بن بسر رضی اللہ عنہ کا انتقال 88 ہجری میں ہوا تھا اور یہ شام میں انتقال کرنے والے آخری صحابی ہیں اس وقت ان کی عمر 94 سال تھی ۔

ہیثم بن عدی بیان کرتے ہیں : سیدنا عبداللہ رضی اللہ عنہ بن عامر بن ربیعہ کا انتقال ، ولید بن عبدالملک کے زمانے میں 87 ہجری میں ہوا تھا ، سیدنا عبداللہ بن عامر بن ربیعہ رضی اللہ عنہ نبی اکرم صلی اللہ علیہ وسلم کی حیات مبارکہ میں پیدا ہوئے تھے ، جب نبی اکرم صلی اللہ علیہ وسلم کا وصال ہوا تھا ، تو اس وقت ان کی عمر چار یا شاید پانچ سال تھی ۔
یہ روایت امام طبرانی نے نقل کی ہے اور ہیثم نامی راوی متروک ہے ۔

امام طبرانی بیان کرتے ہیں : سیدنا عبداللہ بن ابواوفیٰ رضی اللہ عنہ نے کوفہ میں رہائش اختیار کی تھی اور وہیں ان کا انتقال ہوا ۔

انہوں نے کئی بن بکیر کا یہ بیان نقل کیا ہے : سیدنا عبداللہ بن ابواوفیٰ رضی اللہ عنہ کا انتقال 86 ہجری میں ہوا تھا ۔

انہوں نے واقدی کا یہ بیان روایت کیا ہے : سیدنا عبداللہ بن حارث بن عبدالمطلب رضی اللہ عنہ کا انتقال 84 ہجری میں ہوا تھا ۔ واقدی تک اس کے رجال ثقہ ہیں ۔

ابوعبداللہ اشعری بیان کرتے ہیں : سیدنا ابودرداء رضی اللہ عنہ کا انتقال 33 ہجری میں شام میں ہوا تھا ۔
یہ روایت امام طبرانی نے نقل کی ہے اور اس کے رجال صحیح کے رجال ہیں ، صرف ابوعبداللہ اشعری کا معاملہ مختلف ہے اور وہ راوی ثقہ ہے ۔

یحیی بن بکیر بیان کرتے ہیں : سیدنا کعب بن عجرہ کا انتقال 52 ہجری میں ہوا تھا اس وقت ان کی عمر 77 برس تھی ۔
یہ روایت امام طبرانی نے نقل کی ہے ۔

محمد بن عبداللہ بن نمیر بیان کرتے ہیں : سیدنا کعب بن عجرہ رضی اللہ عنہ کا انتقال 52 ہجری میں ہوا تھا اس وقت ان کی عمر 75 برس تھی ۔
یہ روایت امام طبرانی نے نقل کی ہے ۔

انہوں نے یحیی بن بکیر کا یہ بیان نقل کیا ہے : سیدنا مخرمہ بن نوفل رضی اللہ عنہ جن کی کنیت ابومسور ہے ، ان کا انتقال 54 ہجری میں ہوا تھا اور اس وقت ان کی عمر 70 برس تھی ایک قول کے مطابق ان کی عمر 115 برس تھی ، انہوں نے فتح مکہ کے دن اسلام قبول کیا تھا اور وہ ” مؤلفۃ القلوب “ میں تھے ۔
یہ روایت امام طبرانی نے نقل کی ہے ۔

اسی سند کے ساتھ انہوں نے یہ بات بیان کی ہے : سیدنا مسور بن مخرمہ رضی اللہ عنہ کا انتقال اس دن ہوا تھا ، جب یزید بن معاویہ کے انتقال کی اطلاع سیدنا عبداللہ بن زبیر رضی اللہ عنہ کے پاس آئی تھی ، اور یہ سن 64 ہجری کی بات ہے ، سیدنا عبداللہ بن زبیر رضی اللہ عنہ نے سیدنا مسور بن مخرمہ رضی اللہ عنہ کی نماز جنازہ ” حجون “ کے مقام پر پڑھائی تھی انہیں منجنیق کا پتھر لگا تھا یہ اس وقت حطیم میں نماز ادا کر رہے تھے ، یہ پانچ دن زندہ رہے تھے اور پھر ربیع الاول کے مہینے میں ان کا انتقال ہو گیا تھا یہ سن 64 ہجری کی بات ہے یہ ہجرت کے دو سال بعد پیدا ہوئے تھے اور سن 8 ہجری میں ذوالج میں انہیں مدینہ منورہ لایا گیا تھا ، یہ فتح مکہ میں شریک ہوئے تھے ، اس وقت ان کی عمر 6 سال تھی ، جب نبی اکرم صلی اللہ علیہ وسلم کا وصال ہو تو اس وقت ان کی عمر 8 سال تھی ، راوی کہتے ہیں : یعنی سیدنا مسور بن مخرمہ رضی اللہ عنہ کے بارے میں ایسا ہے ۔

اسی سند کے ساتھ یہ بات منقول ہے ، وہ بیان کرتے ہیں : سیدنا واثلہ بن اسقع رضی اللہ عنہ کا انتقال 85 ہجری میں ہوا تھا ، اس وقت ان کی عمر 98 برس تھی ۔

سعید بن خالد بیان کرتے ہیں : سیدنا واثلہ بن اسقع رضی اللہ عنہ کا انتقال 83 ہجری میں ہوا تھا ، اس وقت ان کی عمر 105 سال تھی ۔
یہ روایت امام طبرانی نے نقل کی ہے سعید نامی راوی کو جمہور نے ضعیف قرار دیا ہے ابن حبان نے اسے ثقہ کہا: ہے اس روایت کے بقیہ رجال ثقہ ہیں ۔

واقدی بیان کرتے ہیں : اسی سال میں سیدنا ابوعمرہ مازنی رضی اللہ عنہ کا انتقال ہوا ، راوی کہتے ہیں : یعنی سن 37 ہجری میں ۔
یہ روایت امام طبرانی نے نقل کی ہے ۔