السنن الكبرى للبيهقي

سیدنا ابوذر رضی اللہ عنہ فرماتے ہیں کہ رسول اللہ ﷺ نے مجھے فرمایا: ”اے ابوذر! میں تیرے لیے وہی پسند کرتا ہوں جو اپنے لیے۔ میں تجھے کمزور محسوس کرتا ہوں، دو کا امیر نہ بننا اور یتیم کے مال کا والی بھی نہ بننا۔“

سیدنا ابوذر رضی اللہ عنہ فرماتے ہیں کہ میں نے عرض کیا: اے اللہ کے رسول! مجھے عامل مقرر کر دیں۔ آپ ﷺ نے میرے کندھے پر ہاتھ مارا، پھر فرمایا: ”اے ابوذر! آپ کمزور ہیں، یہ امانت ہے؛ کیونکہ یہ قیامت کے دن ندامت اور رسوائی کا باعث ہو گی لیکن جس نے اس کا حق ادا کیا۔“

سیدنا ابوہریرہ رضی اللہ عنہ فرماتے ہیں کہ نبی ﷺ نے فرمایا: ”تم امارت پر حرص کرو گے، حالانکہ یہ قیامت کے دن ندامت اور حسرت کا باعث ہوگی۔ دودھ پلانے والی اچھی ہے اور چھڑوانے والی بری ہے۔ (حکومت کا ملنا اچھا لگتا ہے جب ختم ہو اچھی نہیں لگتی)۔“

سیدنا ابوہریرہ رضی اللہ عنہ فرماتے ہیں کہ رسول اللہ ﷺ نے فرمایا: ”جو دس آدمیوں کا امیر بنا وہ قیامت کے دن اس حال میں لایا جائے گا کہ اس کے ہاتھ گردن سے بندھے ہوئے ہوں گے۔“

سیدنا ابوہریرہ رضی اللہ عنہ فرماتے ہیں کہ نبی ﷺ نے فرمایا: ”جو دس آدمیوں کا امیر ہوا، وہ قیامت کے دن بندھا ہوا آئے گا، اس کا عدل چھٹکارا دلائے گا یا ظلم ہلاک کر دے گا۔“

محمد بن منکدر رحمہ اللہ فرماتے ہیں کہ عباس بن عبدالمطلب رضی اللہ عنہ نے نبی ﷺ سے کہا: مجھے بھی اس کی امارت عطا کر دیں جس کا اللہ نے آپ کو والی بنایا ہے۔ آپ ﷺ نے فرمایا: ”اے نبی ﷺ کے چچا عباس رضی اللہ عنہ! ایک جان جسے آپ نجات دلا دیں، اس امارت سے بہتر ہے جس کا آپ حق ادا نہ کر سکیں۔“
(ب) محمد بن منکدر رحمہ اللہ، جابر بن عبداللہ رضی اللہ عنہما سے نقل فرماتے ہیں کہ عباس بن عبدالمطلب رضی اللہ عنہ نے کہا کہ اے اللہ کے رسول! کیا آپ مجھے امارت نہ دیں گے۔
مرسل روایت ہی محفوظ ہے اور پہلی روایت زیادہ صحیح ہے، (اسے موصول بیان کرنے میں) یہ سلمی بصری راوی منفرد ہے۔

زیاد بن نعیم حضرمی کہتے ہیں: زیاد بن حارث صدائی رضی اللہ عنہ جو رسول اللہ ﷺ کے صحابی ہیں، فرماتے ہیں کہ میں رسول اللہ ﷺ کے پاس آیا، اسلام پر بیعت کی۔ ہمیں حدیث ذکر کی، اس میں ہے کہ آپ ﷺ نے ایک جگہ پڑاؤ ڈالا وہاں کے لوگ اپنے عامل کی شکایت کر رہے تھے۔ وہ کہہ رہے تھے: اس نے ہم سے ایسی چیزیں بھی لی ہیں جو ہمارے اور اس کی قوم کے درمیان جاہلیت میں معاہدہ میں تھیں تو نبی ﷺ نے پوچھا: ”کیا اس نے ایسا کیا ہے؟“ انہوں نے کہا: جی ہاں۔ نبی ﷺ نے اپنے صحابہ کی طرف دیکھا، میں بھی ان میں شامل تھا۔ آپ ﷺ نے فرمایا: ”مومن آدمی کے لیے امارت میں بھلائی نہیں ہے۔“

سیدنا ابوہریرہ رضی اللہ عنہ فرماتے ہیں کہ رسول اللہ ﷺ نے فرمایا: ”جس کو عہدہ قضا سونپ دیا گیا وہ بغیر چھری ذبح کر دیا گیا۔“

سیدنا ابوہریرہ رضی اللہ عنہ فرماتے ہیں کہ رسول اللہ ﷺ نے فرمایا: ”جو مسلمانوں کا قاضی بن کر بیٹھا وہ بغیر چھری کے ذبح کر دیا گیا۔“

سیدنا ابوہریرہ رضی اللہ عنہ فرماتے ہیں کہ نبی ﷺ نے فرمایا: ”جو قاضی بنا دیا گیا وہ بغیر چھری کے ذبح کر دیا گیا۔“

عمران بن حطان فرماتے ہیں کہ میں نے سیدہ عائشہ رضی اللہ عنہا سے سنا، ان کے پاس قاضی کے عہدہ کا تذکرہ کیا گیا، فرماتی ہیں کہ میں نے رسول اللہ ﷺ سے سنا آپ ﷺ فرما رہے تھے: ”قیامت کے دن عادل قاضی کو لایا جائے گا وہ شدتِ حساب کی وجہ سے تمنا کرے گا کہ وہ ایک کھجور کا بھی فیصلہ دو کے درمیان نہ کرتا۔“

عمران بن حطان حضرت عائشہ رضی اللہ عنہا سے نقل فرماتے ہیں کہ رسول اللہ ﷺ نے فرمایا: ”عادل قاضی کو لایا جائے گا۔“ اس کی مثل ذکر کیا ہے۔

مسروق رحمہ اللہ، عبداللہ رضی اللہ عنہ سے نقل فرماتے ہیں، کبھی نبی ﷺ سے بھی نقل فرماتے ہیں کہ آپ ﷺ نے فرمایا: ”جو کوئی لوگوں کے درمیان فیصلہ کرتا ہے اس کے ساتھ ایک فرشتہ مقرر ہوتا ہے، جو اس کی گدی سے پکڑے رکھتا ہے اور جہنم کے کنارے کھڑا رکھتا ہے اور اپنا سر اللہ کی طرف اٹھاتا ہے۔ اگر اللہ حکم دے تو جہنم کی چالیس سالہ گہرائی میں پھینک دیتا ہے۔“

سیدنا ابوہریرہ رضی اللہ عنہ نبی ﷺ سے روایت کرتے ہیں کہ آپ ﷺ نے فرمایا: ”امراء، چوہدریوں اور امینوں کے لیے ہلاکت ہے۔ قیامت کے دن لوگ تمنا کریں گے کہ کاش! ان کی پیشانیاں ثریا ستارے سے باندھ دی جائیں، وہ آسمان و زمین کے درمیان لٹکتے رہیں لیکن وہ کسی کام پر والی نہ بنتے۔“

ہشام اپنی سند سے اس طرح نقل فرماتے ہیں کہ آپ ﷺ نے فرمایا: ”ان کی پیشانی کے بال ثریا ستارے کے ساتھ باندھے ہوئے تھے وہ درمیان میں جھول رہے تھے۔“

حضرت ابوہریرہ رضی اللہ عنہ فرماتے ہیں کہ ”چوہدراہٹ ابتدائی طور پر ملامت کا باعث ہے، آخر میں ندامت اور قیامت کے دن عذاب کا باعث ہے۔“ ابوحازم رحمہ اللہ فرماتے ہیں کہ میں نے حضرت ابوہریرہ رضی اللہ عنہ سے کہا: ان میں سے جو اللہ سے ڈرتا رہا؟ فرمایا: میں ویسے ہی بیان کروں گا جیسے میں نے سنا ہے۔

سیدنا عمرو بن میمون رحمہ اللہ نے سیدنا عمر بن خطاب رضی اللہ عنہ کے قتل کے قصے کے بارے میں بیان کیا کہ ہم ان کے پاس آئے تو لوگ ان کی تعریف کر رہے تھے۔ ایک نوجوان آدمی آیا، اس نے کہا: اے امیر المومنین! آپ کو اللہ کی طرف سے خوشخبری ہو، آپ کو رسول اللہ ﷺ کی صحبت حاصل ہوئی اور اسلام میں آپ کو وہ سبقت حاصل ہے جو آپ جانتے ہیں، پھر آپ امیر بنائے گئے تو آپ نے انصاف کیا، پھر (آپ کو) شہادت (نصیب ہوئی)۔ سیدنا عمر رضی اللہ عنہ نے فرمایا: اے بھتیجے! یہ برابر ہی ہو جائے، نہ ثواب ہو اور نہ عذاب، اتنا ہی کافی ہے۔ جب وہ واپس مڑا تو اس کی چادر زمین کو چھو رہی تھی، سیدنا عمر رضی اللہ عنہ نے فرمایا: اس نوجوان کو واپس لاؤ۔ اے بھتیجے! اپنا کپڑا اوپر اٹھاؤ، یہ تمہارے کپڑے کی صفائی کے لیے زیادہ مناسب ہے اور تمہارے رب کی رضا کا باعث بھی ہے۔

سماک فرماتے ہیں کہ میں نے ابن عباس رضی اللہ عنہما سے سنا، وہ کہہ رہے تھے کہ جب عمر بن خطاب رضی اللہ عنہ زخمی کیے گئے، میں ان کے پاس گیا اور میں نے کہا: اے امیر المومنین! خوش ہو جائیں، اللہ تعالیٰ نے آپ کے ذریعے شہر تعمیر یا آباد کروائے، نفاق کو دور کیا اور رزق کو عام کیا، تو حضرت عمر رضی اللہ عنہ فرمانے لگے: اے ابن عباس رضی اللہ عنہما! کیا میری امارت کی تعریف کرنا چاہتے ہو؟ انہوں نے کہا: جی ہاں، اس کے علاوہ بھی۔ حضرت عمر رضی اللہ عنہ نے فرمایا: اللہ کی قسم! میری یہ چاہت ہے کہ جیسے میں (اس میں) داخل ہوا تھا ویسے ہی اس سے نکل جاؤں، نہ ثواب ہو اور نہ ہی گناہ ہو۔

امام مالک رحمہ اللہ فرماتے ہیں کہ سعید بن مسیب رحمہ اللہ روزہ رکھتے تھے، ان کے پاس ایک آدمی آیا جو روٹی اور چقندر کے پتے کھا رہا تھا، اس نے کہا: آؤ کھاؤ۔ کہتے ہیں: آدمی نے کسی چیز کا سوال کیا، میرا خیال ہے قضاۃ کے امور میں سے کسی کا سوال کیا تو سعید رحمہ اللہ نے فرمایا: بیوقوف! قاضی کے پاس جاؤ جو اس کام کے لیے بٹھائے گئے ہیں، کیا میں اپنے آپ کو اس کام میں مصروف کر دوں یا تجھے بھی۔

ایوب رحمہ اللہ فرماتے ہیں کہ سب سے زیادہ قاضی کے عہدے سے وہی بھاگتا ہے جو اسے لوگوں سے زیادہ جانتا ہے اور ابو قلابہ رحمہ اللہ سے بڑھ کر اس کو کوئی نہیں جانتا۔ محمد بن سیرین رحمہ اللہ کو قاضی بنانے کا ارادہ کیا گیا تو وہ ایک مرتبہ شام کی طرف اور دوسری دفعہ یمامہ بھاگ گئے اور جب بصرہ آئے تو چھپ کر رہتے، یہاں تک کہ وہاں سے نکل جاتے۔

ایوب، ابو قلابہ رحمہ اللہ سے نقل فرماتے ہیں کہ قاضی کی مثال ایسے آدمی کی طرح ہے جو سمندر میں تیرتا ہے، وہ کتنی دیر تیرتا رہے گا یہاں تک کہ غرق ہو جائے۔ ابو قلابہ رحمہ اللہ کو قاضی کے عہدے کے لیے طلب کیا گیا تو وہ بھاگ گئے۔

ابن ابی صہبا تیمی رحمہ اللہ فرماتے ہیں کہ میں محارب بن دثار رحمہ اللہ کے پاس آیا، وہ کھڑے نماز پڑھ رہے تھے، جب انہوں نے مجھے دیکھا تو نماز کو ہلکا کر دیا۔ پھر وہ قضاۃ کی مجلس میں آکر بیٹھ گئے۔ پھر میری طرف کسی کو روانہ کیا اور پوچھا: کیا جھگڑا لے کر آئے ہو، سلام کرنے والے ہو یا کوئی اور ضرورت ہے؟ میں نے کہا: صرف سلام کی غرض سے حاضر ہوا ہوں۔ قاصد نے جا کر خبر دی، پھر میرے پاس آیا اور کہا: کھڑے ہو جاؤ۔ کہتے ہیں: میں نے سلام کیا، انہوں نے اللہ کی حمد و ثنا بیان کی، پھر کہا: «اللهُمَّ إِنَّكَ تَعْلَمُ أَنِّي لَمْ أَجْلِسْ لِهَذَا الْمَجْلِسِ الَّذِي ابْتَلَيْتَنِي بِهِ وَقَدَّرْتَهُ عَلَيَّ إِلَّا وَأَنَا أَكْرَهُهُ وَأُبْغِضُهُ، فَاكْفِنِي شَرَّ عَوَاقِبِهِ» ”اے اللہ! تو جانتا ہے کہ میں اس مجلس میں، جس کے ذریعے تو نے میری آزمائش کی اور جسے تو نے میرے مقدر میں لکھا، اسے ناپسند کرتے اور اس سے نفرت کرتے ہوئے ہی بیٹھا ہوں، پس مجھے اس کے برے انجام سے کافی ہو جا۔“ پھر انہوں نے کپڑے کا ایک صاف ٹکڑا نکالا، اسے چہرے پر رکھ کر روتے رہے یہاں تک کہ میں کھڑا ہو گیا۔ راوی فرماتے ہیں: جتنی دیر اللہ نے چاہا وہ رہے۔ پھر ابن شبرمہ رحمہ اللہ قاضی بنے، پھر میں ان کے پاس آیا، اچانک وہ بھی نماز ادا کر رہے تھے۔ جب انہوں نے مجھے دیکھا تو نماز کو ہلکا کر دیا۔ پھر میری طرف قاصد آیا اور کہنے لگا: کیا جھگڑا لے کر آئے ہو یا سلام کی غرض سے یا کوئی اور ضرورت ہے؟ میں نے کہا: صرف سلام کی غرض سے آیا ہوں۔ قاصد نے جا کر خبر دی، پھر میرے پاس آکر کہا: اٹھو۔ میں نے جا کر سلام کیا اور ان کے پہلو میں بیٹھ گیا۔ انہوں نے کہا: میرے بھائی محارب بن دثار کی بات بیان کرو۔ میں نے انہیں وہ بات بیان کر دی، تو انہوں نے کہا: «اللهُمَّ إِنَّكَ تَعْلَمُ إِنِّي لَمْ أَجْلِسْ هَذَا الْمَجْلِسَ الَّذِي ابْتَلَيْتَنِي بِهِ إِلَّا وَأَنَا أُحِبُّهُ وَأَشْتَهِيهِ، فَاكْفِنِي شَرَّ عَوَاقِبِهِ» ”اے اللہ! تو جانتا ہے کہ میں اس مجلس میں، جس کے ذریعے تو نے میری آزمائش کی، اسے پسند کرتے اور اس کی چاہت رکھتے ہوئے ہی بیٹھا ہوں، پس مجھے اس کے برے انجام سے کافی ہو جا۔“ پھر ایک کپڑے کا صاف ٹکڑا نکالا، چہرے پر رکھ کر روتے رہے یہاں تک کہ میں کھڑا ہو گیا۔

ابو جعفر طحاوی رحمہ اللہ فرماتے ہیں کہ میں نے ابو جعفر محمد بن عباس رحمہ اللہ سے سنا، وہ کہہ رہے تھے: جب محارب بن دثار رحمہ اللہ قاضی بنے تو حکم بن عتیبہ رحمہ اللہ سے کہا گیا: آپ ان کے پاس کیوں نہیں جاتے؟ کہنے لگے: اللہ کی قسم! میرے نزدیک اس نے مال تو حاصل نہیں کیا کہ میں اس کو مبارک باد دوں اور نہ کوئی مصیبت آئی کہ میں اس پر تعزیت کروں۔ اس سے پہلے میں ان کی زیارت نہ کرتا تھا کہ آج زیارت کے لیے جاؤں۔

ابونعیم رحمہ اللہ فرماتے ہیں کہ قاضی شریح رحمہ اللہ زیاد کے پاس سے نکلے، انہیں ایک آدمی ملا جو کہنے لگا: آپ کی عمر بڑھ گئی، ہڈیاں کمزور ہو گئیں اور آپ کے بیٹے نے رشوت لی ہے۔ وہ زیاد کے پاس واپس گئے اور انہیں اس کی خبر دی۔ اس نے کہا: آپ سے یہ کس نے کہا؟ انہوں نے کہا: میں اس کو پہچانتا نہیں، پس مجھے (اس عہدے سے) معاف رکھیں۔ زیاد نے کہا: میں آپ کو اس وقت تک معاف نہیں کروں گا جب تک آپ کسی آدمی کی طرف میری رہنمائی نہ کریں، تو انہوں نے ابوبردہ رحمہ اللہ کی طرف اشارہ کیا، چنانچہ اس نے ان کو قاضی بنا دیا۔

سفیان رحمہ اللہ فرماتے ہیں کہ قعنب تیمی رحمہ اللہ کو والی نے بلایا اور ان کو عہدۂ قضا دینے لگے تو انہوں نے انکار کر دیا۔ بار بار اصرار کے بعد عہدہ دے دیا گیا۔ جب وہ ان کے پاس سے نکلے تو عہدہ چھوڑ دیا اور چھپ گئے، تو امیر نے ان کی تلاش میں آدمی روانہ کیے۔ وہ تلاش کر رہے تھے کہ اس گھر کی چھت گر پڑی جس کے اندر وہ چھپے ہوئے تھے، ان کو پتا بھی نہ تھا۔ اس وقت پتا چلا جب ان کا جنازہ لایا گیا۔

لیث رحمہ اللہ فرماتے ہیں کہ ابوجعفر رحمہ اللہ نے مجھے کہا: میری جانب سے مصر کے والی بن جاؤ۔ میں نے کہا: اے امیر المؤمنین! میں کمزور آدمی ہوں۔ میں غلام ہوں۔ کہنے لگے: آپ کمزور نہیں، صرف آپ کی نیت میرے ساتھ کام کرنے میں کمزور ہے۔ کیا آپ مجھ سے زیادہ قوت چاہتے ہیں اور میرے کام سے بڑا کام چاہتے ہیں؟ کہنے لگے: اگر آپ انکاری ہیں تو میری رہنمائی ایسے آدمی کی طرف کرو کہ میں مصر کی امارت اس کو سونپ دوں۔ میں نے کہا: عثمان بن حکم جذامی رحمہ اللہ نیک آدمی ہے، اس کا قبیلہ بھی ہے۔ جب اس کو یہ بات پہنچی تو اس نے اللہ کی قسم اٹھائی کہ وہ لیث بن سعد رحمہ اللہ سے کلام نہ کرے گا۔

ابویوسف رحمہ اللہ فرماتے ہیں: بصرہ کے قاضی سوار فوت ہو گئے تو ابوجعفر منصور نے ابوحنیفہ رحمہ اللہ کو بلایا اور کہا: بصرہ کے قاضی سوار فوت ہو گئے، اس شہر کے لیے قاضی کی ضرورت ہے، میں آپ کو عہدہ قضا سونپ دیتا ہوں، اسے قبول کیجیے۔ ابوحنیفہ رحمہ اللہ کہنے لگے: اللہ کی قسم! میں عہدہ قضا کے لائق نہیں ہوں، اے امیر المؤمنین! اگر میں سچ بولتا ہوں تو پھر ایسے آدمی کو قضا کا عہدہ دینا مناسب نہیں جو اس کا لائق نہیں ہے، اور اگر میں جھوٹا ہوں تو کذاب آدمی کو عہدہ قضا نہ دیں۔ کسی عرب آدمی کے لیے یہ عہدہ مناسب ہے، میں آپ کی مخالفت کروں گا۔ راوی کہتے ہیں کہ منصور نے کہا: تو نے سچ کہا کہ اس عہدہ کے مناسب ابوبکر و عمر رضی اللہ عنہما کی طرح کے لوگ تھے۔ ﴿أُمَّةٌ قَدْ خَلَتْ لَهَا مَا كَسَبَتْ﴾ [سورة البقرة: 134] ”یہ ایک امت تھی جو گزر گئی، ان کے لیے وہ ہے جو انہوں نے کمایا۔“ آپ کا یہ کہنا کہ عرب کے لوگ اس کے لائق ہیں، حالانکہ اللہ تعالیٰ فرماتے ہیں: ﴿إِنَّ أَكْرَمَكُمْ عِنْدَ اللَّهِ أَتْقَاكُمْ﴾ [سورة الحجرات: 13] ”اللہ کے ہاں تم میں سب سے زیادہ معزز وہ ہے جو تم میں سب سے زیادہ متقی ہے۔“ اپنے زمانے میں کوشش کرنا ہے اور آپ کا یہ کہنا کہ تو نے میری مخالفت مول لی، رائے تو ایک دوسرے کے مخالف ہو سکتی ہے، اس امر کو قبول کیجیے۔ ابوحنیفہ رحمہ اللہ فرماتے ہیں کہ اے امیر المؤمنین! میرا راستہ چھوڑ دیں، وگرنہ میں اپنی اسی جگہ سے ابھی اسی وقت تلبیہ کہنا شروع کر دوں گا، پھر آپ کے لیے تلبیہ کہنے والے کو قید کرنا جائز نہ ہوگا۔ راوی کہتے ہیں: اس نے راستہ چھوڑ دیا۔

امام شافعی رحمہ اللہ فرماتے ہیں کہ سفیان ثوری امیر المؤمنین کے پاس گئے۔ اپنے آپ کو پاگل ظاہر کر رہے تھے اور چٹائی کو چھو رہے تھے اور کہہ رہے تھے: یہ کتنی خوبصورت ہے، یہ کتنی خوبصورت ہے! تم نے یہ کتنے میں لی ہے؟ پھر کہنے لگے: پیشاب، پیشاب۔ یہاں تک کہ نکل گئے تاکہ ان کے معاملے سے دور اور محفوظ رہیں۔

عبید بن یعیش رحمہ اللہ فرماتے ہیں کہ ایک آدمی سفیان رحمہ اللہ کی مدح کر رہا تھا، سفیان رحمہ اللہ نے بچاؤ اختیار کیا اور اپنے دین کو لے کر نکلے اور شریک رحمہ اللہ نے اس کے دراہم پر گھات لگائی۔

یونس بن عبدالاعلیٰ رحمہ اللہ فرماتے ہیں کہ خلیفہ نے عبداللہ بن وہب رحمہ اللہ کو مصر کے عہدۂ قضا کے لیے لکھا تو انہوں نے اپنے آپ کو دیوانہ ظاہر کیا اور اپنے گھر کو لازم پکڑ لیا۔ ایک دن گھر کے درمیان وضو کرنے لگے تو چھت سے رشدین بن سعد رحمہ اللہ نے دیکھ لیا اور کہا: ”اے ابومحمد! کیا لوگوں کی طرف نکل کر اس کے مطابق فیصلہ نہ کرو گے جس کا اللہ اور اس کے رسول نے حکم دیا ہے؟ آپ نے اپنے آپ کو دیوانہ ظاہر کیا ہے اور اپنے گھر کو لازم پکڑ لیا ہے۔“ انہوں نے اپنا سر اٹھایا اور فرمایا: ”تیرے علم کی انتہا یہی ہے۔ کیا تو جانتا نہیں ہے کہ قاضی کا حشر قیامت کے دن بادشاہوں کے ساتھ ہوگا اور علماء کا حشر انبیاء اور رسولوں کے ساتھ ہوگا۔“

یحییٰ بن یحییٰ رحمہ اللہ، حسین بن منصور کو عدالت (گواہوں کی تعدیل کے عہدے) میں داخل ہونے کی وجہ سے ڈانٹ رہے تھے، پھر فرمایا: کیا تو نے خود سفیان بن عیینہ رحمہ اللہ سے یہ بیان نہیں کیا کہ انہوں نے فرمایا: نہ تو تعدیل کرنے والا بن اور نہ ہی ایسا شخص بن جسے تعدیل کرنے والا جانتا ہو۔ پھر یحییٰ بن یحییٰ رحمہ اللہ نے فرمایا: عدالت تو بس ایک چھوٹی سی طشتری ہے جو ان میں سے کسی کی طرف بھیجی جاتی ہے۔

حسین بن منصور رحمہ اللہ فرماتے ہیں کہ میں یحییٰ بن یحییٰ رحمہ اللہ کے پاس گیا، میں نے سلام کہا، انہوں نے میری طرف دیکھا ہی نہیں۔ میں ایک کونے میں بیٹھ گیا، یہاں تک کہ لوگ بکھر گئے۔ میں نے قریب ہو کر ان کے سر کا بوسہ لیا اور کہا: اے استاد! مجھ سے کون سا گناہ سرزد ہو گیا ہے؟ انہوں نے کہا: ہاں، تو نے بہت بڑا جرم و گناہ کیا ہے۔ میں نے کہا: وہ کیا ہے؟ وہ کہنے لگے: تیرا کیا خیال ہے جب قیامت کے دن آواز دی جائے گی کہ عبداللہ بن طاہر کے ساتھی کہاں ہیں؟ کیا تو ان لوگوں میں سے نہیں جنہیں عدالت (کے عہدے) میں لیا گیا ہے؟ وہ کہتے ہیں: میں نے کہا: میں اللہ سے استغفار کرتا ہوں اور رجوع کرتا ہوں۔ وہ کہتے ہیں: وہ میرے قریب ہوئے اور معانقہ کیا اور فرمایا: اب تو میرا بھائی ہے۔

حسین بن منصور رحمہ اللہ پر نیساپور میں قضا کا عہدہ پیش کیا گیا، وہ تین دن تک چھپے رہے، انہوں نے اللہ تعالیٰ سے دعا کی اور تیسرے دن فوت ہو گئے۔

احمد بن سعید رباطی رحمہ اللہ فرماتے ہیں کہ میں امام احمد بن حنبل رحمہ اللہ کے پاس آیا، وہ میری طرف سر بھی نہیں اٹھاتے تھے۔ میں نے کہا: اے ابوعبداللہ! خراسان میں مجھ سے (احادیث) لکھی گئی ہیں، اگر آپ نے میرے ساتھ یہ معاملہ کیا تو لوگ میری احادیث کو چھوڑ دیں گے۔ انہوں نے مجھ سے فرمایا: اے احمد! کیا یہ ضروری ہے کہ قیامت کے دن پکارا جائے کہ عبداللہ بن طاہر اور اس کے ساتھی کہاں ہیں؟ تو دیکھو کہ تم ان میں کہاں ہو؟ میں نے کہا: اے ابوعبداللہ! انہوں نے مجھے رباط کے معاملات کا والی بنا دیا ہے، پھر میں ان میں داخل ہو گیا۔ راوی فرماتے ہیں کہ وہ بار بار میرے اوپر یہی بات دہرا رہے تھے: اے احمد! قیامت کے دن یہ ضروری ہے کہ پوچھا جائے کہ عبداللہ بن طاہر کے ساتھی کہاں ہیں؟ دیکھ لو کہ تم ان میں کہاں ہو گے!

علی بن عباس بن ولید بجلی رحمہ اللہ فرماتے ہیں: ہم شام کے وقت نصر بن علی جہضمی رحمہ اللہ کے پاس تھے، ہمارے پاس بادشاہ کا خط آیا کہ بصرہ کے قاضی کی تقلید کرو (یعنی قاضی کا عہدہ قبول کرو)۔ انہوں نے کہا: آج رات میں اپنے دل سے مشاورت کر لوں، کل بتاؤں گا۔ کل صبح ہم ان کی طرف گئے، دروازے پر ان کی لاش تھی۔ ہم نے کہا: یہ کیا ہے؟ انہوں نے کہا: نصر فوت ہو گئے۔ ہم نے ان کے گھر والوں سے پوچھا، انہوں نے کہا: وہ رات کو نماز پڑھتے رہے، جب سحری کا وقت ہوا تو انہوں نے لمبا سجدہ کیا، ہم نے حرکت دی تو انہیں مردہ حالت میں پایا۔