مجمع الزوائد ومنبع الفوائد

بنوتیم سے تعلق رکھنے والے ایک صاحب ، جن کا نام سیدنا معاذ رضی اللہ عنہ ہے ، وہ بیان کرتے ہیں : غزوہ احد کے دن نبی اکرم صلی اللہ علیہ وسلم دو ، زرہیں پہن کر تشریف لائے ۔
یہ روایت امام ابویعلیٰ نے نقل کی ہے اور اس کے رجال صحیح کے رجال ہیں ۔

سیدنا طلحہ بن عبیداللہ رضی اللہ عنہ بیان کرتے ہیں : نبی اکرم صلی اللہ علیہ وسلم غزوہ اُحد کے دن دو زرہیں پہن کر تشریف لائے ۔
یہ روایت امام ابویعلیٰ نے نقل کی ہے ، اس کی سند میں ایک راوی ایسا ہے ، جس کا نام بیان نہیں کیا گیا ہے ، اس روایت کے بقیہ رجال صحیح کے رجال ہیں ۔

سیدنا سعد بن ابی وقاص رضی اللہ عنہ بیان کرتے ہیں : غزوۂ احد کے دن نبی اکرم صلی اللہ علیہ وسلم دو زرہیں پہن کر تشریف لائے ۔
یہ روایت امام بزار نے نقل کی ہے ، اس کی سند میں ایک راوی اسحاق بن ابوفروہ ہے اور وہ ضعیف ہے ۔

ایوب بن نعمان ، اپنے والد کے حوالے سے ، اپنے دادا کا یہ بیان نقل کرتے ہیں : میں نے غزوہ اُحد کے دن نبی اکرم صلی اللہ علیہ وسلم کے جسم پر دو زرہیں دیکھیں ۔
یہ روایت امام طبرانی نے نقل کی ہے ، اس کی سند میں ایک راوی واقدی ہے اور وہ ضعیف ہے ۔

سیدنا زبیر بن عوام رضی اللہ عنہ بیان کرتے ہیں : نبی اکرم صلی اللہ علیہ وسلم نے غزوہ اُحد کے دن تلوار آگے کی ، اور ارشاد فرمایا : کون اس تلوار کو اس کے حق کے ہمراہ حاصل کرے گا ؟ تو سیدنا ابودجانہ سماک بن خرشہ رضی اللہ عنہ کھڑے ہوئے ، انہوں نے عرض کی : یا رسول اللہ ! میں اس کے حق کے ہمراہ اسے لوں گا ، اس کا حق کیا ہے ؟ راوی بیان کرتے ہیں : نبی اکرم صلی اللہ علیہ وسلم نے وہ تلوار انہیں دیدی ، وہ اسے لے کر روانہ ہوئے میں ان کے پیچھے گیا ، وہ جس بھی چیز کے پاس سے گزرتے تھے ، اسے چیر دیتے تھے اور پھاڑ دیتے تھے ، یہاں تک کہ وہ پہاڑ کے دامن میں موجود کچھ خواتین کے پاس آئے ، ان خواتین کے ساتھ ” ہند “ بھی موجود تھی ، جو یہ اشعار پڑھ رہی تھی : ” ہم طارق ( نامی ستارے ) کی بیٹیاں ہیں ( یعنی بلند مرتبہ کی مالک ہیں ) اور ہم قالینوں پر چلتی ہیں ، ہماری مانگ میں مشک لگی ہوتی ہے ، اگر تم پیش قدمی کرو گے تو ہم گلے لگائیں گی ، اور اگر تم پیٹھ پھیر لو گے تو ہم جدا ہوائیں گی ، ایسی جدائی جو کسی شک کے بغیر ہو ، ( یا ایسی جدائی جس کے بعد محبت نہ ہو سکے ) “ ۔ راوی بیان کرتے ہیں : ان صاحب نے اس خاتون پر تلوار سونتی ، تو اس نے صحراء میں بلند آواز میں پکارا ، لیکن کسی نے اسے جواب نہیں دیا ، تو پھر ان صاحب نے وہ تلوار اس خاتون کو نہیں ماری ، میں نے ان سے کہا: آپ نے جو کچھ بھی کیا ، وہ مجھے اچھا لگا لیکن مجھے یہ بات اچھی نہیں لگی کہ آپ نے اس عورت کو قتل نہیں کیا ، انہوں نے فرمایا : اس عورت نے پکارا تھا ، لیکن کسی نے اسے جواب نہیں دیا ، تو مجھے یہ اچھا نہیں لگا کہ میں اللہ کے رسول کی تلوار کے ذریعے کسی ایسی عورت پر ضرب لگاؤں ، جس کا کوئی مددگار نہ ہو ۔

سیدنا قتاده بن نعمان رضی اللہ عنہ بیان کرتے ہیں : غزوہ اُحد کے دن نبی اکرم صلی اللہ علیہ وسلم نے ارشاد فرمایا : ” کون اس تلوار کو اس کے حق کے ہمراہ لے گا ، تو سیدنا علی رضی اللہ عنہ کھڑے ہوئے ، انہوں نے عرض کی : یا رسول اللہ ! میں نبی اکرم صلی اللہ علیہ وسلم نے فرمایا : تم بیٹھ جاؤ وہ بیٹھ گئے ، پھر نبی اکرم صلی اللہ علیہ وسلم نے دوسری مرتبہ دریافت کیا : کون اس تلوار کو اس کے حق کے ہمراہ لے گا ، تو سیدنا ابودجانہ رضی اللہ عنہ کھڑے ہوئے ، نبی اکرم صلی اللہ علیہ وسلم نے اپنی تلوار زوالفقار انہیں دی ، سیدنا ابودجانہ رضی اللہ عنہ اٹھے ، انہوں نے اپنی آنکھوں کے اوپری حصے پر سرخ پٹی باندھی تاکہ وہ کبر سنی کی وجہ سے آنکھوں پر آنے والی بھنووں کو روک سکے ، پھر وہ اس تلوار کے ہمراہ نبی اکرم صلی اللہ علیہ وسلم کے آگے چلتے ہوئے گئے “ ۔
یہ روایت امام طبرانی نے نقل کی ہے ، اس کی سند میں ایسے راوی ہیں ، جن سے میں واقف نہیں ہوں ۔

خالد بن سلیمان بن عبدالله بن خالد بن سماک بن خرشہ ، اپنے والد کے حوالے سے ، اپنے دادا کا یہ بیان نقل کرتے ہیں : سیدنا ابودجانہ رضی اللہ عنہ نے غزوہ اُحد کے دن سرخ پٹی کا نشان بنایا ، نبی اکرم صلی اللہ علیہ وسلم نے ان کی طرف دیکھا ، وہ دو صفوں کے درمیان اترا کر چل رہے تھے ، نبی اکرم صلی اللہ علیہ وسلم نے ارشاد فرمایا : ” اس قسم کی چال کو اللہ تعالیٰ ناپسند کرتا ہے ، لیکن اس طرح کی صورت حال کا معاملہ مختلف ہے “ ۔
یہ روایت امام طبرانی نے نقل کی ہے ، اس کی سند میں ایسا راوی ہے ، جس سے میں واقف نہیں ہوں ۔

سیدنا عبداللہ بن مسعود رضی اللہ عنہ بیان کرتے ہیں : غزوہ اُحد کے موقع پر خواتین مسلمانوں کے پیچھے تھیں ، وہ مشرکین کے مقتولین کا سامان اکٹھا کرتی تھیں ، اگر میں اس دن کے بارے میں یہ حلف اٹھاؤں ، تو مجھے یہ امید ہے کہ میں سچا ہوؤں گا کہ ہم میں سے کسی ایک کو بھی دنیا کی طلب نہیں تھی ، یہاں تک کہ اللہ تعالیٰ نے یہ آیت نازل کر دی : ” تم میں سے کچھ لوگ وہ ہیں ، جو دنیا کا ارادہ رکھتے ہیں اور تم میں سے کچھ وہ ہیں ، جو آخرت کا ارادہ رکھتے ہیں ، پھر اس نے تم کو ان لوگوں سے پھیر دیا ، تاکہ وہ تمہیں آزمائش کا شکار کرے “ ۔ جب نبی اکرم صلی اللہ علیہ وسلم کے کچھ اصحاب نے آپ کے حکم برخلاف کیا اور جو حکم انہیں دیا گیا تھا ، اس کی نافرمانی کی اور نبی اکرم صلی اللہ علیہ وسلم نو افراد کے درمیان تنہا رہ گئے ، جن میں سے سات کا تعلق انصار سے تھا ، اور دو کا تعلق قریش سے تھا ، اور دسویں خود نبی اکرم صلی اللہ علیہ وسلم تھے ، جب دشمن نے نبی اکرم صلی اللہ علیہ وسلم کے گرد گھیرا ڈال دیا ، تو نبی اکرم صلی اللہ علیہ وسلم نے ارشاد فرمایا : اللہ تعالیٰ اس شخص پر رحم کرے ، جو دشمن کو ہم سے پرے تو انصار سے تعلق رکھنے والا ایک شخص اُٹھا ، اس نے گھڑی بھر کے لئے لڑائی کی اور شہید ہو گیا ، پھر جب ان لوگوں نے نبی اکرم صلی اللہ علیہ وسلم کے گرد گھیرا ڈال دیا ، تو نبی اکرم صلی اللہ علیہ وسلم نے ارشاد فرمایا : اللہ تعالیٰ اس شخص پر رحم کرے ، جو انہیں ہم سے پرے کرے ، آپ یہ مسلسل ارشاد فرماتے رہے ، یہاں تک کہ سات افراد شہید ہو گئے ، پھر نبی اکرم صلی اللہ علیہ وسلم نے اپنے دونوں ساتھیوں سے فرمایا : ہمارے ساتھیوں نے ہمارا بھرپور ساتھ دیا ہے ، پھر ابوسفیان آیا اور بولاہبل برتر ہوا ، نبی اکرم صلی اللہ علیہ وسلم نے فرمایا : تم لوگ یہ کہو : اللہ تعالیٰ بلند و برتر اور جلیل القدر ہے ، لوگوں نے کہا: اللہ تعالیٰ بلند و برتر اور جلیل القدر ہے ، ابوسفیان ( جو کفار کا سردار تھا ) اس نے کہا: ہمارے پاس عزی ہے ، تمہارے پاس عزیٰ نہیں ہے ، نبی اکرم صلی اللہ علیہ وسلم نے فرمایا : تم لوگ یہ کہو : اللہ تعالیٰ ہمارا مولی ہے اور کافروں کا کوئی مولی ( مددگار ) نہیں ہے پھر ابوسفیان نے کہا: آج کا دن بدر کے دن کا بدلہ ہے ، ایک دن ہمارے حق میں ہوا ، اور ایک دن ہمارے خلاف ہوا ، ایک دن ہمیں اچھا نہیں لگا تھا ، اور ایک دن ہم خوش ہوئے ہیں ، حنظلہ کا بدلہ حنظلہ ہے ، فلاں کا بدلہ فلاں ہے ، نبی اکرم صلی اللہ علیہ وسلم نے ارشاد فرمایا : دونوں برابر نہیں ہیں ، ہمارے مقتولین زندہ ہیں اور انہیں رزق دیا جاتا ہے ، اور تمہارے مقتولین جہنم میں ہیں اور انہیں عذاب دیا جاتا ہے ابوسفیان نے کہا: کچھ لوگوں نے ( آپ کے افراد ) کا مثلہ کیا ہے ، اگرچہ یہ ہمارے بڑوں کے مشورے سے نہیں ہوا ، میں نے اس کا حکم بھی نہیں دیا ، اور اس سے منع بھی نہیں کیا ، میں اس کو پسند بھی نہیں کرتا اور مجھے یہ ناگوار بھی نہیں گزرا ، اور مجھے یہ برا بھی نہیں لگا ، اور اس نے مجھے خوش بھی نہیں کیا ۔ راوی کہتے ہیں : لوگوں نے اس بات کا جائزہ لیا ، تو سیدنا حمزہ رضی اللہ عنہ کا پیٹ چیر دیا گیا تھا ، اور ہند نے ان کا کلیجہ نکال کر اسے چبایا تھا ، وہ اسے کھا نہیں سکی تھی ، نبی اکرم صلی اللہ علیہ وسلم نے دریافت کیا : کیا اس نے اس میں سے کچھ کھایا تھا ، لوگوں نے عرض کی : جی نہیں ! نبی اکرم صلی اللہ علیہ وسلم نے فرمایا : اللہ تعالیٰ نے حمزہ کے کسی حصے کو ، آگ میں داخل نہیں کرنا تھا ، پھر نبی اکرم صلی اللہ علیہ وسلم نے سیدنا حمزہ رضی اللہ عنہ کی میت کو رکھا اور ان کی نماز جنازہ ادا کی ، پھر انصار سے تعلق رکھنے والے ایک شخص کو لایا گیا اور انہیں سیدنا حمزہ رضی اللہ عنہ کے پہلو میں رکھا گیا ، اور نبی اکرم صلی اللہ علیہ وسلم نے ان کی نماز جنازہ ادا کی ، پھر انصاری کی میت کو اٹھا لیا گیا ، اور سیدنا حمزہ رضی اللہ عنہ کی میت کو رہنے دیا گیا ، پھر ایک اور شخص کو لایا گیا اور اسے سیدنا حمزہ رضی اللہ عنہ کے پہلو میں رکھا گیا ، تو نبی اکرم صلی اللہ علیہ وسلم نے اُن کی نماز جنازہ ادا کی ، پھر اس ( دوسرے ) شخص کی میت کو اٹھا لیا گیا اور سیدنا حمزہ رضی اللہ عنہ کی میت کو رہنے دیا گیا ، یہاں تک کہ نبی اکرم صلی اللہ علیہ وسلم نے اُس دن ستر مرتبہ سیدنا حمزہ رضی اللہ عنہ کی نماز جنازہ ادا کی ۔
یہ روایت امام أحمد نے نقل کی ہے ، اس کی سند میں ایک راوی عطاء بن سائب ہے ، جو اختلاط کا شکار ہو گیا تھا ۔

سیدنا عبداللہ بن عباس رضی اللہ عنہما بیان کرتے ہیں : اللہ تعالیٰ نے کسی بھی صورت حال میں اس طرح کی صورت حال نازل نہیں کی جس طرح کی مدد غزوہ احد کے موقع پر کی تھی ۔ راوی کہتے ہیں : ہم نے اس بات پر اعتراض کیا ، تو سیدنا عبداللہ بن عباس رضی اللہ عنہما نے فرمایا : میں جو کہہ رہا ہوں اور جو شخص اس کا انکار کر رہا ہے ان دونوں کے بارے میں اللہ کی کتاب فیصلہ کرے گی ، غزوہ اُحد کے بارے میں اللہ تعالیٰ نے یہ ارشاد فرمایا ہے : ” اور اللہ تعالیٰ نے تمہارے سامنے اپنے وعدے کو سچ کر دکھایا جب تم نے اس کے اذن کے تحت ان لوگوں کو قتل کیا “ ۔ سیدنا عبداللہ بن عباس رضی اللہ عنہما فرماتے ہیں : یہاں ” حس “ سے مراد قتل ہے ۔ ارشاد باری تعالیٰ ہے : ” یہاں تک کہ جب تم نے بزدلی کی ۔ ۔ ۔ ۔ ۔ ۔ ۔ ۔ “ اس سے مراد تیر انداز لوگ ہیں ، اس کی وجہ یہ ہے کہ نبی اکرم صلی اللہ علیہ وسلم نے ان لوگوں کو ایک مخصوص مقام پر کھڑا کیا تھا ، اور پھر یہ ارشاد فرمایا تھا : تم لوگوں نے پیچھے سے ہماری حفاظت کرنی ہے ، اگر تم ہمیں دیکھو کہ ہمیں قتل کیا جا رہا ہے ، تو تم نے ہماری مدد نہیں کرنی اور اگر تم ہمیں دیکھو کہ ہم غنیمت حاصل کر رہے ہیں ، تو تم نے ہمارے ساتھ شریک نہیں ہونا ، پھر جب نبی اکرم صلی اللہ علیہ وسلم کو مال غنیمت حاصل ہوا اور لوگوں نے مشرکین کے لشکر کو مباح قرار دیا ، تو وہ تیر انداز سب آئے اور لشکر میں سے چیزیں اکٹھے کرنے لگے ، جب مختلف صفیں مل گئیں اور نبی اکرم صلی اللہ علیہ وسلم کے اصحاب یوں ہو گئے ، راوی نے اپنی انگلیاں ایک دوسرے میں داخل کر کے یہ بات بیان کی اور وہ گھل مل گئے ، تو جب تیر اندازوں نے وہ جگہ خالی کر دی ، جہاں پر تیر انداز تھے ، تو اس مقام سے دشمن کے کچھ گھڑ سوار آئے اور وہ نبی اکرم صلی اللہ علیہ وسلم کے اصحاب پر حملہ آور ہوئے ، اس دن بہت سے مسلمان شہید ہوئے ۔ نبی اکرم صلی اللہ علیہ وسلم اور آپ کے اصحاب دن کے ابتدائی حصے میں اس حال میں تھے کہ مشرکین کے جھنڈا برداروں میں سے سات یا شاید نو افراد قتل ہوئے تھے اور مسلمانوں کے کچھ افراد نبی اکرم صلی اللہ علیہ وسلم کے اردگرد موجود تھے ، یہ لوگ وہاں تک نہیں پہنچے تھے ، جس کے بارے میں لوگ کہتے ہیں : غار ہے ، بلکہ یہ پانی کے چشمے کے پاس پہنچے تھے اسی دوران شیطان نے چیخ کر کہا: سیدنا محمد صلی اللہ علیہ وسلم شہید ہو گئے ہیں ، تو اس بارے میں کوئی شک نہیں ہوا کہ یہ بات درست ہو گی ، ہم اسی حالت میں رہے ، ہمیں اس بارے میں کوئی شک نہیں تھا کہ نبی اکرم صلی اللہ علیہ وسلم شہید ہو چکے ہوں گے ، یہاں تک کہ نبی اکرم صلی اللہ علیہ وسلم سعد نام کے دو افراد کے درمیان چلتے ہوئے سامنے آئے ، ہم نے چلنے کے دوران آپ کے مخصوص انداز سے آپ کو پہچان لیا ، راوی کہتے ہیں : ہمیں اس بات سے اتنی خوشی ہوئی کہ جیسے ہمیں کوئی نقصان ہوا ہی نہیں ہے نبی اکرم صلی اللہ علیہ وسلم چڑھ کر ہماری طرف آئے ، آپ یہ فرما رہے تھے : اللہ تعالیٰ کا غضب اس قوم پر شدید ہو گا ، جس نے اللہ کے رسول کے چہرے کو خون آلود کیا ہے ، ایک مرتبہ آپ نے یہ ارشاد فرمایا : اے اللہ ! انہیں یہ حق نہیں ہے کہ وہ ہم پر غالب آئیں ، یہاں تک کہ نبی اکرم صلی اللہ علیہ وسلم ہمارے پاس تشریف لے آئے ، آپ گھڑی بھر کے لئے ٹھہرے رہے ، پھر ابوسفیان نے پہاڑ کے نیچے والے حصے سے بلند آواز میں دو مرتبہ یہ کہا: ہبل سر بلند ہوا ، یعنی اس نے اپنے معبود کے بارے میں کہا: ، پھر پوچھا: ابن ابوکبشہ کہاں ہے ؟ ابن ابوقحافہ کہاں ہے ؟ ابن خطاب کہاں ہے ؟ تو سیدنا عمر رضی اللہ عنہ نے عرض کی : یا رسول اللہ ! کیا میں اسے جواب نہ دوں ؟ نبی اکرم صلی اللہ علیہ وسلم نے فرمایا : ٹھیک ہے ، جب اس نے کہا: ہبل سر بلند ہوا ، تو سیدنا عمر رضی اللہ عنہ نے کہا: اللہ تعالیٰ بلند و برتر اور جلیل القدر ہے ، ابوسفیان نے کہا: اے خطاب کے صاحبزادے ! کیا اس کی ( یعنی ہبل کی ) آنکھ نے اجازت دی تو اب تم اسے برا نہ کہنا ، پھر اس نے دریافت کیا : ابن ابوکبشہ کہاں ہیں ؟ ابن ابوقحافہ کہاں ہیں ؟ ابن خطاب کہاں ہیں ؟ تو سیدنا عمر رضی اللہ عنہ نے فرمایا : یہ اللہ کے رسول موجود ہیں ، یہ سیدنا ابوبکر رضی اللہ عنہ بھی موجود ہیں اور میں ، عمر بھی موجود ہوں ، تو ابوسفیان نے کہا: آج کا دن ، بدر کے دن کا بدلہ ہے ، اور دنوں میں الٹ پھیر ہوتا رہتا ہے اور جنگ ڈول کی طرح ہوتی ہے ( یعنی اس میں اونچ نیچ ہوتی رہتی ہے ) راوی کہتے ہیں : تو سیدنا عمر رضی اللہ عنہ نے فرمایا : نہیں برابر نہیں ہے ، ہمارے مقتولین جنت میں ہیں اور تمہارے مقتولین جہنم میں ہیں ، ابوسفیان نے کہا: تم لوگ یہ گمان کرتے ہو ، ایسی صورت میں ، تو ہم رسوا ہو جائیں گے اور خسارے کا شکار ہو جائیں گے ، پھر ابوسفیان نے کہا: تم لوگ اپنے مقتولین میں کچھ لوگوں کو پاؤ گے کہ ان کی لاشوں کی بے حرمتی کی گئی ہے ، یہ ہمارے سرداروں کی رائے سے نہیں ہوا ۔ راوی کہتے ہیں : پھر اسے زمانہ جاہلیت کی حمیت نے اپنی لپیٹ میں لے لیا ، تو اس نے کہا: ایسا ہوا ہے اور ہم اسے ناپسند بھی نہیں کرتے ۔
یہ روایت امام أحمد نے نقل کی ہے ۔ اس کی سند میں ایک راوی عبدالرحمن بن ابوزناد ہے ، جس کے ضعیف ہونے کے باوجود اس کی توثیق کی گئی ہے ۔

سیدنا مسور بن مخرمہ رضی اللہ عنہ بیان کرتے ہیں : میں نے سیدنا عبدالرحمن بن عوف رضی اللہ عنہ سے کہا: اے ماموں جان ! آپ غزوہ بدر کے موقعہ پر اپنی صورتحال کے بارے میں بتائیں ، انہوں نے فرمایا : تم سورہ آل عمران کی ایک سو بیس کے بعد والی آیات پڑھ لو تمہیں ہماری صورتحال کا ذکر مل جائے گا ( ارشاد باری تعالیٰ ہے : ) ” اور جب تم صبح کے وقت اپنے گھر سے نکلے تاکہ تم اہل ایمان کو جنگ کے لیے ان کے مخصوص مقام پر تعینات کرو “ یہ آیت یہاں تک ہے : ” جب تم میں سے دو گروہوں نے یہ ارادہ کیا کہ وہ بزدلی کا مظاہرہ کریں ۔ ۔ ۔ ۔ ۔ ۔ ۔ ۔ ۔ ۔ “ ( سیدنا عبدالرحمن بن عوف رضی اللہ عنہ نے بتایا : ) ( ان لوگوں نے مشرکین سے امان مانگی تھی ، ( ارشاد باری تعالیٰ ہے : ) ” حالانکہ اس ( دشمن ) کا سامنا کرنے سے ، پہلے تم موت ( یعنی شہادت ) کی آرزو کیا کرتے تھے ، تو تم نے اس کو ( یعنی موت یا شہادت کے سبب جنگ کو ) دیکھ لیا ، اور تم ( جنگ کی صورتحال کو ) دیکھ رہے تھے “ ۔ تو وہ ( دشمن ) اہل ایمان کا سامنا کرنے کی آرزو رکھتا تھا ، یہ آیت یہاں تک ہے : ( ارشاد باری تعالیٰ ہے : ) ” جب تم اس ( یعنی پروردگار ) کے اذن کے تحت ان ( یعنی کفار ) کو قتل کر رہے تھے “ ۔
یہ روایت امام ابویعلیٰ نے نقل کی ہے ، اس کی سند میں ایک راوی یحیی بن عبدالحمید حمانی ہے ، اور وہ ضعیف ہے ۔

سیدنا علی رضی اللہ عنہ بیان کرتے ہیں : غزوۂ احد کے دن ، جب لوگ نبی اکرم صلی اللہ علیہ وسلم سے بکھر گئے ، تو میں نے مقتولین کو دیکھا مجھے نبی اکرم صلی اللہ علیہ وسلم نظر نہیں آئے ، میں نے سوچا ، اللہ کی قسم ! نہ تو آپ فرار ہوئے ہوں گے ، اور نہ ہی آپ مجھے مقتولین میں نظر آ رہے ہیں ، لیکن ہم نے جو کچھ کیا ہے ، مجھے لگتا ہے اللہ تعالیٰ اس کے حوالے سے ہم پر غضب نازل کرے گا ، مجھے لگتا ہے اس کی وجہ سے اللہ تعالیٰ نے ہم پر غضب نازل کیا ہے اور اپنے نبی کو اٹھا لیا ہے ، تو میرے لئے اس سے زیادہ بہتر کوئی چیز نہیں ہے کہ میں لڑائی کرتا رہوں ، یہاں تک کہ قتل ہو جاؤں ، میں نے اپنی تلوار کی میان کو توڑ دیا ، پھر میں لوگوں پر حملہ آور ہوا ، وہ لوگ ادھر ادھر بکھرے ، تو نبی اکرم صلی اللہ علیہ وسلم ان کے درمیان موجود تھے ۔
یہ روایت امام ابویعلیٰ نے نقل کی ہے ۔ اس کی سند میں ایک راوی محمد بن مروان عقیلی ہے ، جسے ابوداؤد اور ابن حبان نے ثقہ قرار دیا ہے ، جبکہ ابوزرعہ اور دیگر حضرات نے اسے ضعیف کہا: ہے ۔ اس روایت کے بقیہ رجال صحیح کے رجال ہیں ۔

سیدہ عائشہ صدیقہ رضی اللہ عنہا بیان کرتی ہیں : مجھے میرے والد نے یہ بات بیان کی ہے : ” جب لوگ نبی اکرم صلی اللہ علیہ وسلم کے پاس سے ادھر ادھر ہو گئے ، تو میں نبی اکرم صلی اللہ علیہ وسلم کی طرف واپس آنے والا سب سے پہلا فرد تھا ، میں نے ایک شخص کو دیکھا ، جو نبی اکرم صلی اللہ علیہ وسلم کے سامنے لڑائی کر رہا تھا ، میں نے سوچا ، اللہ کرے یہ طلحہ ہو ، جب میں نے دیکھا تو ایک انسان میرے پیچھے بھی تھا ، وہ پرندے کی مانند تھا ، مجھے اندازہ نہیں ہوا اور وہ مجھ تک پہنچ گیا ، تو وہ ابوعبیدہ بن جراح تھے ، طلحہ ، نبی اکرم صلی اللہ علیہ وسلم کے آگے زخمی ہو چکے تھے ، نبی اکرم صلی اللہ علیہ وسلم نے ارشاد فرمایا : تم اپنے بھائی کو سنبھالو ! کیونکہ اس نے ( جنت ) واجب کر لی ہے ، ہم نے انہیں چھوڑا اور نبی اکرم صلی اللہ علیہ وسلم کی طرف آئے ، تو نبی اکرم صلی اللہ علیہ وسلم کے چہرے پر دو تیر لگے تھے ، میں نے انہیں الگ کرنے کا ارادہ کیا ، تو ابوعبیدہ نے مجھ سے یہی کہا: اور یہی مطالبہ کیا ( کہ میں انہیں یہ موقع دوں ) یہاں تک کہ میں نے انہیں موقع دیا کہ وہ دو میں سے ایک تیر نکال دیں ، انہوں نے اپنے دانتوں کے ذریعے اسے پکڑا اور اسے نکالا ، جس کے نتیجے میں ان کے سامنے کے دو دانتوں میں سے ایک ٹوٹ گیا ، پھر انہوں نے مجھ سے یہی درخواست کی اور یہی مطالبہ کیا کہ میں انہیں دوسرا تیر بھی نکالنے کا موقع دوں ، پھر انہوں نے اپنے سامنے کے دانت تیر پر رکھے اور انہیں دبایا ، اس بات کو ناگوار سمجھتے ہوئے کہ وہ نبی اکرم صلی اللہ علیہ وسلم کو اذیت پہنچائیں اور پھر اسے بھی نکال لیا ، تو ان کے سامنے کے دونوں دانت ( راوی کو شک ہے ، شاید یہ الفاظ ہیں : ) دو میں سے ایک دانت گر گیا ، راوی کہتے ہیں : تو سیدنا ابوعبیدہ رضی اللہ عنہ کے سامنے کے دانت نہیں تھے ۔
یہ روایت امام بزار نے نقل کی ہے ، اس کی سند میں ایک راوی سعد بن یحییٰ بن طلحہ ہے اور وہ متروک ہے ۔

سیدنا کعب بن مالک رضی اللہ عنہ بیان کرتے ہیں : غزوہ اُحد کے دن ہم گھاٹی کی طرف آئے ، میں آپ کو پہچاننے والا پہلا فرد تھا ، میں نے کہا: یہ اللہ کے رسول ہیں ، نبی اکرم صلی اللہ علیہ وسلم نے اپنے دست مبارک کے ذریعے میری طرف اشارہ کیا کہ تم خاموش رہو ، پھر آپ نے اپنے ہتھیار مجھے پہنا دیے اور میرے ہتھیار خود پہن لئے ، میں نے لڑائی کی ، یہاں تک کہ مجھے بیس زخم راوی کو شک ہے ، شاید یہ الفاظ ہیں : ) بیس سے کچھ زیادہ زخم لگے اور وہ سب زخم اسی وجہ سے لگے تھے کہ لوگ مجھے اللہ کا رسول سمجھ رہے تھے ۔
یہ روایت امام طبرانی نے معجم اوسط میں نقل کی ہے اور معجم کبیر میں اختصار کے ساتھ نقل کی ہے ، معجم اوسط کے رجال ثقہ ہیں ۔

سیدنا سعد رضی اللہ عنہ بیان کرتے ہیں : غزوۂ احد کے موقع پر ، جب لوگ نبی اکرم صلی اللہ علیہ وسلم کے پاس سے ادھر ادھر ہو گئے ، تو میں نے کہا: میں ایسے ہی رہوں گا ، یا تو میں جام شہادت نوش کر لوں گا ، یا نجات پا جاؤں گا ، یہاں تک کہ اللہ کے رسول سے جا ملوں ، ابھی میں اسی صورت حال میں تھا کہ ایک صاحب نظر آئے ، جن کا چہرہ ڈھانپا ہوا تھا ، مجھے نہیں معلوم کہ وہ کون تھے ؟ مشرکین آئے اور ان کی طرف بڑھے ، جب میرا یہ اندازہ تھا کہ مشرکین اُن پر حملہ آور ہو جائیں گے ، تو انہوں نے ہاتھ میں کنکریاں پکڑیں اور مشرکین کی طرف پھینکیں ، تو وہ الٹے قدم واپس چلے گئے ، یہاں تک کہ وہ پہاڑ کے مد مقابل آ گئے ، ایسا چند مرتبہ ہوا ، مجھے نہیں معلوم وہ صاحب کون تھے ؟ میرے اور اُن کے درمیان ، مقداد موجود تھے ، میں نے یہ ارادہ کیا کہ میں مقداد سے ان کے بارے میں دریافت کروں کہ اسی دوران سیدنا مقداد رضی اللہ عنہ نے خود ہی مجھ سے کہا: اے سعد ! اللہ کے رسول تمہیں بلا رہے ہیں ، میں نے دریافت کیا : اب وہ کہاں ہیں ؟ تو مقداد نے مجھے اشارہ کر کے بتایا کہ وہ ہیں ، میں اُٹھا اور یوں محسوس ہو رہا تھا ، جیسے مجھے کوئی اذیت لاحق نہیں ہوئی ، نبی اکرم صلی اللہ علیہ وسلم نے فرمایا : اے سعد ! آج سارا دن تم کہاں رہے ؟ پھر نبی اکرم صلی اللہ علیہ وسلم نے مجھے اپنے سامنے بٹھا لیا ، میں نے تیراندازی شروع کی اور میں یہ کہہ رہا تھا : اے اللہ ! یہ وہ تیر ہے ، جو میں تیرے دشمن پر پھینک رہا ہوں ، نبی اکرم صلی اللہ علیہ وسلم یہ کہہ رہے تھے : اے اللہ ! تو سعد کی دعا کو قبول فرما ! اے اللہ ! تو سعد کے نشانے کو ٹھیک رکھنا ، اے سعد ! تم تیر اندازی جاری رکھو ! میرے ماں باپ تم پر قربان ہوں ۔ سیدنا سعد رضی اللہ عنہ کہتے ہیں : تو میں نے جو بھی تیر پھینکا ، اُس کے ساتھ نبی اکرم صلی اللہ علیہ وسلم نے یہی کہا: اے اللہ ! تو اس کے نشانے کو ٹھیک رکھنا اور اس کی دعا کو قبول کرنا ، اے سعد ! جاری رکھو ! یہاں تک کہ میرا ترکش خالی ہو گیا ، تو نبی اکرم صلی اللہ علیہ وسلم نے اپنا ترکش میرے آگے کر دیا آپ نے مجھے ایک تیر پکڑایا ، جس میں پر نہیں تھا ، تو اس کو چلانا ، دوسروں کی بہ نسبت زیادہ دشوار تھا ۔ زہری بیان کرتے ہیں : سیدنا سعد رضی اللہ عنہ نے اس دن جتنے تیر پھینکے تھے ، ان کی تعداد ایک ہزار تھی ۔
یہ روایت امام بزار نے نقل کی ہے ، اس کی سند میں ایک راوی عثمان بن عبدالرحمن وقاصی ہے اور وہ متروک ہے ۔

سیدنا قتادہ بن نعمان رضی اللہ عنہ بیان کرتے ہیں : نبی اکرم صلی اللہ علیہ وسلم کو ایک کمان تحفے کے طور پر دی گئی ، وہ نبی اکرم صلی اللہ علیہ وسلم نے غزوہ اُحد کے دن مجھے دیدی ، میں نے نبی اکرم صلی اللہ علیہ وسلم کے سامنے اس کے ذریعے تیر اندازی کی ، یہاں تک کہ اس کا تار ٹوٹ گیا ، میں اپنی جگہ پر کھڑا رہا اور نبی اکرم صلی اللہ علیہ وسلم کے سامنے موجود رہا ، تاکہ اپنے چہرے کے ذریعے نبی اکرم صلی اللہ علیہ وسلم کو تیروں سے بچا سکوں ، جب بھی کوئی تیر ایک طرف سے ہو کر نبی اکرم صلی اللہ علیہ وسلم کے چہرے کی طرف جاتا تھا ، تو میں اپنے سر کو اس طرف مائل کر دیتا تھا ، تاکہ تیراندازی کیے بغیر میں نبی اکرم صلی اللہ علیہ وسلم کے چہرے کو بچا سکوں ، ان میں سے جو آخری تیر تھا ، وہ میری آنکھ پر لگا ، میں نے اپنی ہتھیلی کے ذریعے اس کو بچانے کی کوشش کی تھی ، میں اس کو ہتھیلی پر رکھ کر نبی اکرم صلی اللہ علیہ وسلم کی طرف بھاگا ، جب نبی اکرم صلی اللہ علیہ وسلم نے اسے میری ہتھیلی پر ملاحظہ فرمایا ، تو آپ کی آنکھوں سے آنسو جاری ہو گئے ، آپ نے فرمایا : اے اللہ ! قتادہ نے اپنی ذات کے ذریعے تیرے نبی کو بچایا ہے ، تو اس کی آنکھوں کو سب سے زیادہ خوبصورت اور اس کی نظر کو سب سے زیادہ تیز کر دے “ ۔ راوی بیان کرتے ہیں : تو اُن کی آنکھیں سب سے زیادہ خوبصورت تھیں اور ان کی نظر سب سے زیادہ تیز تھی ۔
یہ روایت امام طبرانی نے نقل کی ہے ، اس کی سند میں ایسا راوی ہے ، جس سے میں واقف نہیں ہوں ۔

سیدنا قتادہ بن نعمان رضی اللہ عنہ بیان کرتے ہیں : غزوہ اُحد کے موقع پر ، میں نبی اکرم صلی اللہ علیہ وسلم کے سامنے موجود رہا ، میں اپنی ذات کے ذریعے نبی اکرم صلی اللہ علیہ وسلم کا بچاؤ کر رہا تھا ، سیدنا ابودجانہ سماک بن خرشہ رضی اللہ عنہ نبی اکرم صلی اللہ علیہ وسلم کی پشت کے ساتھ پشت ملائے ہوئے تھے ، یہاں تک کہ ان کی پشت تیروں سے بھر گئی تھی ، یہ غزوہ اُحد کے موقع کی بات ہے ۔
یہ روایت امام طبرانی نے نقل کی ہے ، اس کی سند میں ایسا راوی ہے ، جس سے میں واقف نہیں ہوں ۔

سیدنا عبداللہ بن عباس رضی اللہ عنہما بیان کرتے ہیں : غزوہ احد کے دن نبی اکرم صلی اللہ علیہ وسلم کے ساتھ صرف چار افراد باقی رہ گئے تھے ، ان میں سے ایک سیدنا عبداللہ بن مسعود رضی اللہ عنہ تھے ، راوی کہتے ہیں : میں نے اپنے والد سے دریافت کیا : سیدنا علی رضی اللہ عنہ اس وقت کہاں تھے ؟ انہوں نے بتایا : ان کے ہاتھ میں مہاجرین کا جھنڈا تھا ۔
یہ روایت امام بزار اور امام طبرانی نے نقل کی ہے ، اس کی سند میں ایک راوی یحیی بن عبدالحمید حمانی ہے اور وہ ضعیف ہے ۔

سیدنا محمود بن لبید رضی اللہ عنہ بیان کرتے ہیں : سیدنا حارث بن سلمہ رضی اللہ عنہ نے یہ بات بیان کی ہے : ” غزوۂ احد کے دن ، نبی اکرم صلی اللہ علیہ وسلم جب گھاٹی میں موجود تھے ، تو آپ نے مجھ سے دریافت کیا : کیا تم نے عبدالرحمن بن عوف کو دیکھا ہے ؟ میں نے عرض کی : جی ہاں ! یا رسول اللہ ! میں نے انہیں پہاڑ کے زیریں حصے میں دیکھا ہے ، مشرکین نے انہیں گھیرا ہوا تھا ، میں پہلے ان کی طرف بڑھنے لگا تھا ، پھر میں نے آپ کو دیکھ لیا ، تو میں آپ کی طرف آ گیا ۔ نبی اکرم صلی اللہ علیہ وسلم نے ارشاد فرمایا : فرشتے اس کے ساتھ لڑائی کر رہے ہیں ، سیدنا حارث رضی اللہ عنہ بیان کرتے ہیں : میں ، پھر واپس سیدنا عبدالرحمن رضی اللہ عنہ کے پاس گیا میں نے انہیں پایا کہ وہ سات دشمنوں کے درمیان موجود تھے ، جو پچھاڑے جا چکے تھے ، میں نے ان سے کہا: آپ کامیاب ہو گئے ہیں ، کیا ان سب کو آپ نے قتل کیا ہے ؟ انہوں نے فرمایا : جہاں تک ارطاۃ بن شرحبیل اور اس شخص کا تعلق ہے ، تو ان دونوں کو میں نے قتل کیا ہے ، لیکن جہاں تک باقی افراد کا تعلق ہے ، تو انہیں جس نے قتل کیا ہے ، میں نے اس کو نہیں دیکھا ، راوی کہتے ہیں : تو میں نے کہا: اللہ اور اس کے رسول نے سچ فرمایا ہے ۔
یہ روایت امام طبرانی اور امام بزار نے نقل کی ہے ، اس کی سند میں ایک راوی عبدالعزیز بن عمران ہے اور وہ ضعیف ہے ۔

سیدنا ابوسعید خدری رضی اللہ عنہ فرماتے ہیں : غزوہ اُحد کے دن نبی اکرم صلی اللہ علیہ وسلم کا چہرہ زخمی ہو گیا ، سیدنا مالک بن سنان رضی اللہ عنہ آپ کے پاس آئے اور انہوں نے نبی اکرم صلی اللہ علیہ وسلم کے زخم کو چوس لیا اور پھر اسے نگل لیا ، تو نبی اکرم صلی اللہ علیہ وسلم نے ارشاد فرمایا : ” جو شخص یہ پسند کرتا ہو کہ وہ کسی ایسے شخص کو دیکھے کہ میرا خون اس کے خون کے ساتھ مل چکا ہو ، تو وہ مالک بن سنان کو دیکھ لے “ ۔
یہ روایت امام طبرانی نے نقل کی ہے ۔

سیدنا زبیر بن عوام رضی اللہ عنہ بیان کرتے ہیں : غزوۂ احد کے دن ، میں نے ہند بنت عتبہ کو دیکھا کہ اس نے اپنی پنڈلیوں سے کپڑا ہٹایا ہوا تھا ، اور اس کی پنڈلی میں موجود جذام کے نشان کا منظر گویا آج بھی میری نگاہ میں ہے ، وہ لوگوں کو ترغیب دیتی پھر رہی تھی ۔
یہ روایت امام طبرانی نے نقل کی ہے ، اس کی سند میں ایک راوی ضرار بن صرد ہے اور وہ ضعیف ہے ۔

سیدنا ابورافع رضی اللہ عنہ بیان کرتے ہیں : جب سیدنا علی رضی اللہ عنہ نے علم برداروں کو قتل کر دیا ، تو سیدنا جبرائیل علیہ السلام نے عرض کی : اے اللہ کے رسول ! یہ بھائی چارہ ہے ، نبی اکرم صلی اللہ علیہ وسلم نے فرمایا : وہ مجھ سے ہے اور میں اس سے ہوں ، سیدنا جبرائیل نے عرض کی : یا رسول اللہ ! میں آپ دونوں سے ہوں ۔
یہ روایت امام طبرانی نے نقل کی ہے ، اس کی سند میں ایک راوی حبان بن علی ہے اور وہ ضعیف ہے ، ایک روایت کے مطابق یحیی بن معین نے اسے ثقہ قرار دیا ہے ، محمد بن عبیداللہ بن ابورافع ، جمہور کے نزدیک ضعیف ہے ، ابن حبان نے اسے ثقہ کہا: ہے ۔

سیدہ صفیہ بنت عبدالمطلب رضی اللہ عنہا بیان کرتی ہیں : جب نبی اکرم صلی اللہ علیہ وسلم اُحد کی طرف نکلے ، تو آپ نے خواتین کو ایک بلند عمارت میں ٹھہرا دیا ، جس کا نام ” فارغ “ تھا ، ان خواتین کے ساتھ سیدنا حسان بن ثابت رضی اللہ عنہ کو مقرر کیا ، سیدنا حسان رضی اللہ عنہ نبی اکرم صلی اللہ علیہ وسلم کا جائزہ لیتے رہتے تھے ، جب نبی اکرم صلی اللہ علیہ وسلم مشرکین کی طرف بڑھتے تو وہ بھی قلعے میں آگے ہو جاتے ، اور جب آپ پیچھے آتے تو وہ بھی پیچھے ہو جاتے ، سیدہ صفیہ رضی اللہ عنہا بیان کرتی ہیں : یہودیوں سے تعلق رکھنے والے کچھ لوگ آئے اور ان میں سے ایک شخص چڑھ کر قلعے کی طرف آ گیا ، یہاں تک کہ وہ ہمارے پاس پہنچ گیا ، میں نے حسان سے کہا: تم اُٹھ کر اس کے پاس جاؤ ، اور اسے قتل کر دو ، انہوں نے کہا: میں یہ نہیں کر سکتا اگر میں کچھ کر سکتا ہوتا ، تو میں اللہ کے رسول کے ساتھ چلا جاتا ، سیدہ صفیہ رضی اللہ عنہا نے اس ( یہودی ) کے سر پر ضرب لگا کر اس کا سر کاٹ دیا ، جب انہوں نے اس کا سر کاٹ دیا ، تو سیدہ صفیہ رضی اللہ عنہا نے کہا: تم اس کا سر اٹھاؤ اور اسے ان لوگوں کی طرف پھینک دو ، وہ لوگ جو قلعے کے نیچے موجود ہیں ، تو انہوں نے کہا: اللہ کی قسم ! میں یہ بھی نہیں کر سکتا ، سیدہ صفیہ رضی اللہ عنہا کہتی ہیں : میں نے اُس شخص کا سر پکڑا اور اسے ان لوگوں کی طرف پھینک دیا ، تو انہوں نے کہا: اللہ کی قسم ! ہمیں یہ بات پتہ چل گئی ہے کہ سیدنا محمد ( صلی اللہ علیہ وسلم ) نے اپنے اہل خانہ کو ایسے حال میں نہیں چھوڑا کہ ان کے ساتھ کوئی نہ ہو ، تو وہ لوگ ادھر ادھر بکھر گئے ، اور چلے گئے ۔ سیدہ صفیہ رضی اللہ عنہا بیان کرتی ہیں : ایک مرتبہ نبی اکرم صلی اللہ علیہ وسلم کا گزر سیدنا سعد بن معاذ رضی اللہ عنہ کے پاس سے ہوا ، ان پر زرد رنگ کا نشان موجود تھا ، یوں لگتا تھا جیسے ان کی کچھ عرصہ پہلے شادی ہوئی ہے اور وہ یہ شعر پڑھ رہے تھے : ” تھوڑی سی دیر میں اونٹ ، جنگ تک پہنچ جائے گا ، جب وقت آ جائے تو موت میں کوئی حرج نہیں ہے “ ۔
یہ روایت امام طبرانی نے معجم کبیر اور مجحم اوسط میں نقل کی ہے ، انہوں نے اسے اُم جعفر بنت زبیر کے حوالے سے ان کے والد سے نقل کیا ہے اور میں ان دونوں سے واقف نہیں ہوں ، اس روایت کے بقیہ رجال ثقہ ہیں ۔

سیدنا انس بن مالک رضی اللہ عنہ بیان کرتے ہیں : غزوہ اُحد کے موقع پر اہل مدینہ پریشانی کا شکار ہو گئے انہوں نے کہا: سیدنا محمد صلی اللہ علیہ وسلم کو قتل کر دیا گیا ہے ، یہاں تک کہ مدینہ منورہ کے ایک کنارے میں چیخنے والوں کی آوازیں زیادہ ہو گئیں ، انصار سے تعلق رکھنے والی ایک خاتون نکلی ، اس نے اپنے والد کو دیکھا ، اپنے بیٹے کو دیکھا ، اپنے شوہر کو دیکھا ، اپنے بھائی کو دیکھا ، یہ مجھے یاد نہیں ہے کہ ان میں سے کون اُس کے سامنے پہلے آیا تھا ؟ لیکن وہ خاتون جب بھی ان میں سے کسی ایک کے پاس سے گزری ، تو اس نے یہی دریافت کیا : یہ کون ہے ، تو لوگوں نے بتایا : یہ تمہارا والد ہے ، یہ تمہارا بھائی ہے ، یہ تمہارا شوہر ہے ، یہ تمہارا بیٹا ہے ، لیکن وہ عورت یہی دریافت کرتی رہی کہ اللہ کے رسول کا کیا حال ہے ؟ تو لوگوں نے بتایا : وہ آ رہے ہیں ، یہاں تک کہ جب وہ نبی اکرم صلی اللہ علیہ وسلم کے پاس پہنچی ، تو اس نے نبی اکرم صلی اللہ علیہ وسلم کے کپڑے کا کنارہ پکڑا اور پھر عرض کی : یا رسول اللہ ! میرے ماں باپ آپ قربان ہوں ، جب آپ سلامت ہیں تو پھر مجھے کسی چیز کی پرواہ نہیں ہے ۔
یہ روایت امام طبرانی نے معجم اوسط میں ، اپنے استاد محمد بن شعیب کے حوالے سے نقل کی ہے اور میں اُس سے واقف نہیں ہوں اس روایت کے بقیہ رجال ثقہ ہیں ۔

سیدنا زبیر رضی اللہ عنہ بیان کرتے ہیں : غزوہ اُحد کے موقع پر ، مدینہ منورہ میں ، میں نبی اکرم صلی اللہ علیہ وسلم کے پاس آیا ، نبی اکرم صلی اللہ علیہ وسلم کے اصحاب میں سے کوئی بھی مدینہ میں باقی نہیں رہا تھا ، مقتولین کی تعداد زیادہ ہو گئی ، تو کسی نے چیخ کر کہا: سیدنا محمد صلی اللہ علیہ وسلم قتل ہو گئے ہیں ، خواتین رونے لگیں ، ایک عورت نے کہا: تم رونے میں جلدی نہ کرو ! جب تک میں پہلے جائزہ نہیں لے لیتی ، وہ خاتون چلتی ہوئی نکلیں ، اُسے اللہ کے رسول اور آپ کے بارے میں دریافت کرنے کے علاوہ اور کوئی پریشانی نہیں تھی ۔
یہ روایت امام بزار نے نقل کی ہے ، اس کی سند میں ایک راوی عمر بن صفوان ہے اور وہ مجہول ہے ۔

سیدنا جبر بن عتیک رضی اللہ عنہ کے غلام عقبہ بیان کرتے ہیں : میں ، کچھ غلاموں کے ہمراہ غزوہ احد میں شریک ہوا ، میں نے مشرکین سے تعلق رکھنے والے ایک شخص پر ضرب لگائی ، جب میں نے اسے قتل کر دیا ، تو میں نے کہا: لو میری طرف سے اسے سنبھالو ! میں ایک فارسی شخص ہوں ، جب اس بات کی اطلاع نبی اکرم صلی اللہ علیہ وسلم کو ملی ، تو آپ نے ارشاد فرمایا : تم نے یہ کیوں نہیں کہا ؟ لو اسے سنبھالو ! میں ایک انصاری نوجوان ہوں ، کیونکہ قوم کا غلام اُن کا حصہ ہوتا ہے “ ۔
یہ روایت امام ابویعلیٰ نے نقل کی ہے اور اس کے رجال ثقہ ہیں ۔

سیدنا عمر بن خطاب رضی اللہ عنہ بیان کرتے ہیں : جب اگلے سال غزوہ اُحد کا موقع آیا ، تو انہوں نے غزوہ بدر میں فدیہ وصول کرنے کے حوالے سے جو کچھ کیا تھا ، اس کی انہیں سزا دی گئی ، ان میں سے ستر افراد قتل ہو گئے ، نبی اکرم صلی اللہ علیہ وسلم کے اصحاب آپ کو چھوڑ کر ادھر اُدھر ہو گئے ۔ نبی اکرم صلی اللہ علیہ وسلم کے دانت مبارک زخمی ہو گئے ، آپ کا خود سر میں کھب گیا آپ کا خون بہتا ہوا منہ پر آ گیا ، اس بارے میں اللہ تعالیٰ نے یہ آیت نازل کی : ” کیا جب تمہیں ایک مصیبت لاحق ہوئی ، جبکہ تم ( اس سے پہلے دشمن کو ) دُگنا نقصان پہنچا چکے تھے ، تو تم نے کہا: یہ کہاں سے آ گئی ؟ ( اے رسول ! ) تم فرما دو ! یہ تمہاری اپنی طرف ( یعنی تمہاری اپنی وجہ ) سے ہے ، بیشک اللہ تعالیٰ ہر چیز پر قدرت رکھتا ہے “ یعنی تم لوگوں نے جو فدیہ وصول کیا تھا ، یہ اُس کی وجہ سے ہے ۔
یہ روایت امام طبرانی نے سیدنا عمر رضی اللہ عنہ سے منقول آخری حدیث کے طور پر نقل کی ہے ، جو ان کی بڑی ” مسند “ میں ” صحیح “ میں ہے ۔

سیدنا سہل بن سعد رضی اللہ عنہ بیان کرتے ہیں : غزوہ اُحد کے دن انہوں نے عرض کی : یا رسول اللہ ! ہم نے فلاں شخص کی طرح لڑنے والا کوئی شخص نہیں دیکھا ، وہ شخص ان کے پاس آیا اور لوگ اس کی وجہ سے بھاگ کھڑے ہوئے ، اس نے مشرکین میں سے کسی بھی الگ ہونے والے شخص کو نہیں چھوڑا ، ہر شخص کے پیچھے گیا اور اس پر تلوار کے ذریعے حملہ کیا ، نبی اکرم صلی اللہ علیہ وسلم نے دریافت کیا : وہ کون شخص ہے ؟ نبی اکرم صلی اللہ علیہ وسلم کے سامنے اس کا نسب بیان کیا گیا تو آپ اسے پہچان نہیں پائے ، پھر آپ کے سامنے اس کا حلیہ بیان کیا گیا ، تو آپ اسے پہچان نہیں پائے ، اسی دوران وہ شخص نبی اکرم صلی اللہ علیہ وسلم کے سامنے آ گیا ، تو سیدنا سہل رضی اللہ عنہ نے عرض کی : یا رسول اللہ ! یہ وہ شخص ہے ، جس کے بارے میں ہم آپ کو بتا رہے تھے ، نبی اکرم صلی اللہ علیہ وسلم نے فرمایا : یہ ہے ؟ لوگوں نے عرض کی : جی ہاں ! نبی اکرم صلی اللہ علیہ وسلم نے فرمایا : یہ اہل جہنم میں سے ہے ، یہ بات مسلمانوں کو گراں گزری انہوں نے کہا: ہم میں سے پھر اہل جنت کون ہو گا کہ اگر فلاں شخص جہنمی ہے ؟ حاضرین میں سے ایک صاحب بولے : اے لوگو ! تم مجھے موقع دو ، اس ذات کی قسم ! جس کے دست قدرت میں میری جان ہے ، یہ شخص اس حالت میں نہیں مرے گا ، جس پر یہ ہے ، اور تم لوگوں میں سے ، اب اُس کے ساتھ میں رہوں گا ، پھر وہ شخص دشمن کی طرف چل پڑا اور دوسرا شخص اس کے پیچھے پیچھے چلنے لگا ، جب وہ شخص چلتا تھا ، تو یہ بھی چلتا تھا ، اور جب وہ شخص پلٹتا تھا ، تو یہ بھی پلٹتا تھا ، دوسرا شخص اس بات کا جائزہ لینا چاہتا تھا کہ اس کا انجام کیا ہوتا ہے ؟ یہاں تک کہ پہلے شخص کو زخم لاحق ہوئے ان زخموں نے اسے کمزور کر دیا اس نے مرنے میں جلدی کی ، اس نے اپنی تلوار کا دستہ زمین پر رکھا اور پھر اس کی نوک پر اپنا سینہ رکھ کر اس پر اپنا وزن ڈالا اور وہ تلوار اس کی پشت کے پار ہو گئی ، تو دوسرا شخص دوڑتا ہوا آیا اور بولا: میں اس بات کی گواہی دیتا ہوں کہ اللہ تعالیٰ کے علاوہ اور کوئی معبود نہیں ہے اور میں اس بات کی بھی گواہی دیتا ہوں کہ آپ اللہ کے رسول ہیں ، یہاں تک کہ وہ نبی اکرم صلی اللہ علیہ وسلم کے سامنے آ کر ٹھہر گیا ۔ نبی اکرم صلی اللہ علیہ وسلم نے دریافت کیا : کیا ہوا ہے ؟ اس نے عرض کی : یا رسول اللہ ! وہ شخص جس کا ذکر آپ کے سامنے کیا گیا ، تو آپ نے یہ فرمایا تھا کہ وہ جہنمی ہے ، تو یہ بات مسلمانوں پر گراں گزری تھی ، تو انہوں نے کہا: تھا کہ ہم میں سے کون جنتی ہو گا کہ اگر فلاں شخص جہنمی ہے ، تو میں نے کہا: اے لوگو ! تم مجھے موقع دو ، اس ذات کی قسم ! جس کے دست قدرت میں میری جان ہے یہ اس حالت میں نہیں مرے گا ، جس پر پہلے تھا ، میں تم میں سے اس کے ساتھ رہوں گا ، تو میں اس کے ساتھ چلتا رہا ، جب وہ چلتا تھا ، اور میں اس کے ساتھ پلٹ جاتا تھا ، جب وہ پلٹ جاتا تھا ، میں اس بات کا جائزہ لینا چاہتا تھا ، کہ اس کے معاملے کا انجام کیا ہوتا ہے ؟ یہاں تک کہ اسے زخم لاحق ہوا ، جس نے اسے کمزور کر دیا ، اس نے مرنے میں جلدی کی ، اس نے اپنی تلوار کا دستہ زمین پر رکھا اور پھر اس کا سرا اپنے سینے پر رکھا اور پھر اپنی تلوار پر وزن ڈالا ، یہاں تک کہ وہ تلوار اس کی پشت کے پار ہو گئی ، تو یا رسول اللہ ! وہ شخص اب جہنم میں لوٹتا پھر رہا ہو گا نبی اکرم صلی اللہ علیہ وسلم نے ارشاد فرمایا : ” ایک شخص ، اہل جنت کے سے عمل کرتا ہے ، جب وہ بظاہر لوگوں کے سامنے ہوتا ہے ، حالانکہ وہ جہنمی ہوتا ہے ، اور ( کوئی ) ایک شخص لوگوں کے سامنے بظاہر اہل جہنم کے سے عمل کر رہا ہوتا ہے ، حالانکہ وہ جنتی ہوتا ہے “ ۔ ( علامہ ہیثمی فرماتے ہیں : ) میں یہ کہتا ہوں : یہ روایت ” صحیح “ میں اختصار کے ساتھ منقول ہے ۔
یہ روایت امام ابویعلیٰ نے نقل کی ہے اور اس کے رجال صحیح کے رجال ہیں ۔

سیدنا عبداللہ بن عمرو بن العاص رضی اللہ عنہ بیان کرتے ہیں : سیدنا ابوبکر صدیق رضی اللہ عنہ نے سیدنا عمرو بن العاص رضی اللہ عنہ کو خط لکھا : ” تم پر سلام ہو ! اما بعد ! تمہارا مکتوب میرے پاس آیا ، جس میں تم نے یہ ذکر کیا ہے کہ رومیوں نے اپنے لشکر جمع کر لئے ہیں اللہ تعالیٰ نے اپنے نبی کے ہمراہ ہم لوگوں کی مدد ، تعداد کی کثرت کے ذریعے ، یا لشکروں کی کثرت کے ذریعے نہیں کی تھی ، ہم لوگ نبی اکرم صلی اللہ علیہ وسلم کے ساتھ جنگ میں حصہ لیتے تھے ، تو ہمارے ساتھ چند ایک گھوڑے ہوتے تھے اور اونٹوں پر بھی ہم باری ، باری سوار ہوا کرتے تھے ، غزوہ اُحد کے دن ہم نبی اکرم صلی اللہ علیہ وسلم کے ساتھ تھے ، ہمارے ساتھ صرف ایک گھوڑا تھا ، نبی اکرم صلی اللہ علیہ وسلم اس پر سوار تھے ، لیکن اس کے باوجود اللہ تعالیٰ نے ہمارے مخالفین پر ہمیں غالب کیا اور ہماری مدد کی ۔ اے عمرو ! تم یہ بات جان لو ! اللہ تعالیٰ کا سب سے زیادہ فرمانبردار وہ شخص ہے ، جو گناہوں سے سب سے زیادہ بغض رکھتا ہو ، تو تم اللہ تعالیٰ کی اطاعت کرو ، اور اپنے ساتھیوں کو بھی اس کی اطاعت کا حکم دو “ ۔
یہ روایت امام طبرانی نے نقل کی ہے ، اس کی سند میں ایک راوی شاذ کونی ہے اور ایک راوی واقدی ہے ، اور یہ دونوں راوی ضعیف ہیں ۔

سیدنا عبدالرحمن بن عوف رضی اللہ عنہ ، اللہ تعالیٰ کے اس فرمان کے بارے میں نقل کرتے ہیں : ( ارشاد باری تعالیٰ ہے : ) ” پھر اس نے ، غم ( یا پریشانی ) کے بعد ، اونگھ کی شکل میں ، تم پر امان ( یا اطمینان ) نازل کیا “ ۔ سیدنا عبدالرحمن بن عوف رضی اللہ عنہ بیان کرتے ہیں : غزوۂ احد کے موقع پر ، اس نے ہم پر نیند طاری کر دی تھی ۔
یہ روایت امام طبرانی نے معجم اوسط میں نقل کی ہے ، اس کی سند میں ایک راوی ضرار بن صرد ہے اور وہ ضعیف ہے ۔

سیدنا سبرہ بن معبد رضی اللہ عنہ کے بارے میں منقول ہے : وہ غزوہ اُحد میں ، نبی اکرم صلی اللہ علیہ وسلم کے ساتھ شریک ہوئے تھے ، انہیں ٹانگ میں ایک تیر آ کے لگا تھا ، جو ان کے مرنے تک ان کی پسلیوں میں رہا ۔
یہ روایت امام طبرانی نے معجم اوسط میں نقل کی ہے ، اس کی سند میں راویوں کی ایک جماعت ایسی ہے ، جن سے میں واقف نہیں ہوں ۔

سیدنا انس بن مالک رضی اللہ عنہ بیان کرتے ہیں : جب نبی اکرم صلی اللہ علیہ وسلم کا چہرہ مبارک زخمی ہوا تھا ، اس دن ہم نبی اکرم صلی اللہ علیہ وسلم کے لئے اونٹ کے چمڑے میں پانی منتقل کر کے لاتے رہے ۔
یہ روایت امام طبرانی نے معجم اوسط میں نقل کی ہے ، اس کی سند میں ایک راوی ابوالحواری ہے اور وہ ضعیف ہے ، ویسے اس کی توثیق کی گئی ہے ۔

سیدنا ابوامامہ رضی اللہ عنہ بیان کرتے ہیں : غزوہ اُحد کے دن ، عبداللہ بن قمئہ نے نبی اکرم صلی اللہ علیہ وسلم کو پتھر مارا ، جس سے آپ کے سامنے کے دانت ٹوٹ گئے ، اس نے کہا: اسے سنبھالو ! میں ابن قمئہ ہوں ، نبی اکرم صلی اللہ علیہ وسلم نے اپنے چہرے سے خون صاف کرتے ہوئے اس سے فرمایا : تمہارا کیا بنے گا ؟ اللہ تعالیٰ تمہارے ٹکڑے ، ٹکڑے کر دے گا ( راوی بیان کرتے ہیں : ) تو اللہ تعالیٰ نے اُس پر پہاڑی بکرے کو مسلط کیا ، جو مسلسل اُسے سینگ مارتا رہا ، یہاں تک کہ اس ( بکرے ) نے اس کے ٹکڑے ، ٹکڑے کر دیا ۔
یہ روایت امام طبرانی نے نقل کی ہے ، اس کی سند میں ایک راوی حفص بن عمر عدنی ہے اور وہ ضعیف ہے ۔

سیدنا سہل بن سعد ساعدی رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” اے اللہ ! میری قوم کی مغفرت کر دے ، کیونکہ وہ علم نہیں رکھتے ہیں “ ۔
یہ روایت امام طبرانی نے نقل کی ہے اور اس کے رجال صحیح کے رجال ہیں ۔

سیدنا ابوہریرہ رضی اللہ عنہ بیان کرتے ہیں : نبی اکرم صلی اللہ علیہ وسلم نے ارشاد فرمایا : ” اللہ تعالیٰ کا غضب اُس قوم پر شدید ہو گا ، جنہوں نے اپنے نبی کے سر میں خود کو پیوست کروا دیا ، جبکہ وہ نبی اُن لوگوں کو اللہ تعالیٰ کی طرف بلاتا تھا “ ۔
یہ روایت امام بزار نے نقل کی ہے اور اس کی سند حسن ہے ۔