مجمع الزوائد ومنبع الفوائد

سیدنا رافع بن خدیج رضی اللہ عنہ بیان کرتے ہیں : وہ غزوہ اُحد کے موقع پر نکلے ، نبی اکرم صلی اللہ علیہ وسلم نے انہیں واپس کرنے کا ارادہ کیا اور انہیں کمسن قرار دیا ، راوی کہتے ہیں : تو میرے چچا نے آپ کی خدمت میں عرض کی : یا رسول اللہ ! یہ تیر انداز ہے ، تو نبی اکرم صلی اللہ علیہ وسلم نے انہیں جانے کی اجازت دیدی ، تو ان کے سینے میں یا گردن پر ایک تیر لگا ، اُن کے چچا نبی اکرم صلی اللہ علیہ وسلم کے پاس آئے اور عرض کی : میرے بھتیجے کو تیر لگا ہے ، نبی اکرم صلی اللہ علیہ وسلم نے ارشاد فرمایا : اگر تم اُسے ایسی حالت میں چھوڑ دو اور یہ مر جائے ، تو یہ شہید ہونے کے طور پر مرے گا ۔ عبداللہ بن حسین نامی راوی بیان کرتے ہیں : ان کی اہلیہ نے مجھے یہ بات بیان کی ہے کہ وہ خاتون اس تیر کو دیکھا کرتی تھیں کہ جب وہ صاحب غسل کر رہے ہوتے تھے ، تو ان کے سینے میں وہ تیر حرکت کرتا تھا ۔
یہ روایت امام طبرانی نے نقل کی ہے ، اس کی سند میں ایسا راوی ہے ، جس سے میں واقف نہیں ہوں ، اس روایت کا ایک اور طریق بھی ہے ، جو اس سے زیادہ مکمل ہے اور وہ اس صحابی کے مناقب سے متعلق باب میں آئے گا ۔

سیدنا اُسید بن ظہیر رضی اللہ عنہ بیان کرتے ہیں : غزوہ اُحد کے موقع پر نبی اکرم صلی اللہ علیہ وسلم نے سیدنا رافع بن خدیج رضی اللہ عنہ کو کمسن قرار دیا ، تو ان کے چچا سیدنا اسید بن ظہیر رضی اللہ عنہ نے آپ کی خدمت میں عرض کی : یا رسول اللہ ! یہ شخص تیر انداز ہے ، تو نبی اکرم صلی اللہ علیہ وسلم نے انہیں اجازت دے دی ، ایک تیر ان کے گلے پر لگا ان کے چچا انہیں لے کر نبی اکرم صلی اللہ علیہ وسلم کے پاس آئے اور عرض کی : میرے بھتیجے کو تیر لگ گیا ہے ، نبی اکرم صلی اللہ علیہ وسلم نے ارشاد فرمایا : اگر تم یہ پسند کرو کہ اس کو نکلوا دو ، تو ہم اسے نکال دیتے ہیں اور اگر تم پسند کرو تو اسے ایسے ہی رہنے دو ، کیونکہ ایسی صورت میں یہ جب بھی مرے گا ، اور اُس وقت یہ تیر اس کے اندر ہو گا ، تو یہ شہید ہونے کے طور پر مرے گا ۔
یہ روایت امام طبرانی نے نقل کی ہے ، اس کی سند میں ایک ایسا راوی ہے ، جس سے میں واقف نہیں ہوں ۔

سیدنا زید بن جاریہ رضی اللہ عنہ بیان کرتے ہیں : غزوۂ احد کے موقع پر ، نبی اکرم صلی اللہ علیہ وسلم نے کچھ افراد کو کمسن قرار دیا ، ان میں ایک سیدنا زید بن جاریہ رضی اللہ عنہ یعنی راوی خود تھے ، سیدنا براء بن عازب رضی اللہ عنہ تھے ، سیدنا سعد بن خیثمہ رضی اللہ عنہ تھے ، سیدنا ابوسعید خدری رضی اللہ عنہ تھے ، سیدنا عبداللہ بن عمر رضی اللہ عنہما تھے ، اور سیدنا جابر بن عبداللہ رضی اللہ عنہ تھے ۔
یہ روایت امام طبرانی نے نقل کی ہے ، اس کی سند میں ایک راوی عثمان بن یعقوب عثمانی ہے ، میں اس سے واقف نہیں ہوں ، اس روایت کے بقیہ رجال ثقہ ہیں ۔

سیدنا زید بن جاریہ رضی اللہ عنہ بیان کرتے ہیں : غزوہ اُحد کے موقع پر ، نبی اکرم صلی اللہ علیہ وسلم نے کچھ افراد کو محسن قرار دیا تھا ، ان میں سے ایک سیدنا زید بن ارقم رضی اللہ عنہ تھے ۔
یہ روایت امام طبرانی نے نقل کی ہے ، اس کی سند میں ایسا راوی ہے ، جس سے میں واقف نہیں ہوں ۔

سیدنا براء رضی اللہ عنہ بیان کرتے ہیں : غزوہ بدر کے موقع پر ، مجھے اور عبداللہ بن عمر کو نبی اکرم صلی اللہ علیہ وسلم کے سامنے پیش کیا گیا ، تو آپ نے ہمیں کمسن قرار دیا ، پھر ہم غزوہ احد میں شریک ہوئے تھے ۔ ( علامہ ہیثمی فرماتے ہیں : ) میں یہ کہتا ہوں :
یہ روایت ” صحیح “ میں بھی مذکور ہے ، تا ہم اس میں یہ الفاظ نہیں ہیں : ” پھر ہم غزوہ اُحد میں شریک ہوئے تھے “ ۔
یہ روایت امام طبرانی نے نقل کی ہے اور اس کے رجال صحیح کے رجال ہیں ۔