مجمع الزوائد ومنبع الفوائد

سیدنا ابودرداء رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” ( والدین کا ) نافرمان شخص باقاعدگی سے شراب پینے والا شخص اور تقدیر کو جھٹلانے والا شخص جنت میں داخل نہیں ہوں گے ۔ “
یہ روایت امام أحمد امام بزار اور امام طبرانی نے نقل کی ہے اور انہوں نے یہ الفاظ زائد نقل کئے ہیں : ” اور نہ ہی احسان جتلانے والا شخص ۔ ۔ ۔ ۔ ۔ ۔ ۔ ۔ “ ۔ اس روایت کی سند میں ایک راوی سلیمان بن عتبہ دمشقی ہے ، جسے ابوحاتم اور دیگر حضرات نے ثقہ قرار دیا ہے یحیی بن معین اور دیگر حضرات نے اسے ضعیف کہا: ہے ۔

سیدنا عبداللہ بن عمر رضی اللہ عنہما بیان کرتے ہیں : میں نے نبی اکرم صلی اللہ علیہ وسلم کو یہ ارشاد فرماتے ہوئے سنا : ” عنقریب اس امت میں مسخ ( کئے جانے کا عذاب ) نازل ہو گا ، خبردار ! وہ تقدیر کو جھٹلانے والوں اور زندیقوں کے لئے ہو گا ۔ “
یہ روایت امام أحمد نے نقل کی ہے ، اس کی سند میں ایک راوی رشدین بن سعد ہے جس پر ضعیف ہونا غالب ہے ۔

نافع بیان کرتے ہیں : ایک مرتبہ ہم سیدنا عبداللہ بن عمر رضی اللہ عنہما کے پاس بیٹھے ہوئے تھے اسی دوران ایک شخص ان کے پاس آیا اور بولا: فلاں شخص نے آپ کو سلام بھیجا ہے ، اس نے اہل شام سے تعلق رکھنے والے ایک شخص کے بارے میں یہ بات بتائی ، تو سیدنا عبداللہ بن عمر رضی اللہ عنہما نے فرمایا : مجھے یہ بات پتہ چلی ہے کہ اس نے نیا مؤقف اختیار کر لیا ہے ، اگر یہ بات ٹھیک ہے ، تو پھر تم اُسے میری طرف سے سلام نہ کہنا ، میں نے نبی اکرم صلی اللہ علیہ وسلم کو یہ ارشاد فرماتے ہوئے سنا ہے : ” عنقریب میری امت میں مسخ کئے جانے اور پتھر مارے جانے ( کا عذاب نازل ہو گا ) اور وہ ( عذاب ) زندیقوں میں ہو گا ۔ “
یہ روایت امام أحمد نے نقل کی ہے اور اس کے رجال صحیح کے رجال ہیں ۔

سیدنا سہل بن سعد ساعدی رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” جب بھی زندیقیت ہو ، اُس سے پہلے تقدیر کو جھٹلانا ہوتا ہے ۔ “
یہ روایت امام طبرانی نے نقل کی ہے ، اس کی سند میں ایک راوی ابراہیم بن اعین ہے اور وہ ضعیف ہے ۔

سیدنا جابر بن سمرہ رضی اللہ عنہ بیان کرتے ہیں میں نے نبی اکرم صلی اللہ علیہ وسلم کو یہ ارشاد فرماتے ہوئے سنا ہے : ” مجھے اپنی امت کے بارے تین چیزوں کے حوالے سے اندیشہ ہے ، ستاروں کی وجہ سے بارش کے نزول کا خواہش مند ہونا ، سلطان ( یعنی حکمرانوں ) کا ظلم ، اور تقدیر کو جھٹلانا ۔ “
یہ روایت امام أحمد ، امام ابویعلیٰ اور امام بزار نے نقل کی ہے اور امام طبرانی نے تینوں کتابوں میں نقل کی ہے ، اس کی سند میں ایک راوی محمد بن قاسم اسدی ہے ، جسے یحیی بن معین نے ثقہ قرار دیا ہے اور امام أحمد نے اسے جھوٹا کہا: ہے ، باقی ائمہ نے اسے ضعیف قرار دیا ہے ۔

سیدنا انس بن مالک رضی اللہ عنہ روایت کرتے ہیں نبی اکرم صلی اللہ علیہ وسلم نے ارشاد فرمایا : ” مجھے اپنی امت کے بارے میں پانچ چیزوں کے حوالے سے اندیشہ ہے ، تقدیر کو جھٹلانا ، ستاروں کی تصدیق کرنا ۔ ۔ ۔ ۔ ۔ ۔ ۔ “ ۔
یہ روایت امام ابویعلیٰ نے اسی طرح نقل کی ہے کہ اس میں پانچ چیزوں میں سے دو چیزوں کے ذکر پر اکتفاء کیا ہے ، اس روایت کی سند میں ایک راوی یزید رقاشی ہے اور وہ ضعیف ہے ، ابن عدی نے اسے ثقہ قرار دیا ہے ۔

سیدنا ابوامامہ رضی اللہ عنہ روایت کرتے ہیں نبی اکرم صلی اللہ علیہ وسلم نے یہ ارشاد فرمایا : ” مجھے اپنی امت کے بارے میں سب سے زیادہ اندیشہ یہ ہے کہ آخری زمانے میں ستاروں ( کے اثر انداز ہونے ) تقدیر کو جھٹلانے اور حکمران کا ظلم ( اُن میں ہو گا ) ۔ “
یہ روایت امام طبرانی نے نقل کی ہے اس کی سند میں ایک راوی لیث بن ابوسلیم ہے اور وہ کمزور ہے اس روایت کے بقیہ رجال کی توثیق کی گئی ہے ۔

سیدنا عبداللہ بن عباس رضی اللہ عنہما روایت کرتے ہیں نبی اکرم صلی اللہ علیہ وسلم نے ارشاد فرمایا : ” میری امت کی ہلاکت تین چیزوں کی وجہ سے ہو گی ، عصبیت ، تقدیر کا انکار کرنا اور غیر مستند لوگوں سے روایت کرنا ۔ “
یہ روایت امام طبرانی نے نقل کی ہے اس کی سند میں ایک راوی ہارون بن بارون ہے اور وہ ضعیف ہے ۔

سیدنا ابودرداء رضی اللہ عنہ روایت کرتے ہیں نبی اکرم صلی اللہ علیہ وسلم نے ارشاد فرمایا : ” مجھے اپنی امت کے بارے میں تین چیزوں کا اندیشہ ہے ، عالم کی لغزش ، منافق کا قرآن کی بنیاد پر بحث کرنا اور تقدیر کا انکار کیا جانا ۔ “
یہ روایت امام طبرانی نے نقل کی ہے اس کی سند میں ایک راوی معاویہ بن یحیی صدفی ہے اور وہ ضعیف ہے ۔

سیدنا ابوموسیٰ اشعری رضی اللہ عنہ بیان کرتے ہیں : نبی اکرم صلی اللہ علیہ وسلم کے سامنے تقدیر کا ذکر کیا گیا ، تو آپ صلی اللہ علیہ وسلم نے ارشاد فرمایا : ” میری امت مسلسل دین کو مضبوطی سے تھامے رکھے گی ، جب تک وہ لوگ تقدیر کو نہیں جھٹلائیں گے ، جب وہ تقدیر کو جھٹلا دیں گے ، تو ایسے وقت میں اُن کی ہلاکت ہو گی ۔ “
یہ روایت امام طبرانی نے نقل کی ہے ابوبکرات نامی راوی تابعی ہے ، میں اُس سے واقف نہیں ہوں اس روایت کے بقیہ رجال ثقہ ہیں ۔

سیدنا ابوامامہ رضی اللہ عنہ روایت کرتے ہیں نبی اکرم صلی اللہ علیہ وسلم نے ارشاد فرمایا : ” جب سے اللہ تعالیٰ نے سیدنا آدم علیہ السلام کو آسمان سے زمین کی طرف نازل کیا ہے ، اس کے بعد شرک صرف اس وقت ہوا ، جب اس سے پہلے تقدیر انکار کیا گیا ، اور کسی بھی امت نے تقدیر کی تکذیب کے ذریعے ہی شرک کیا ، اے امت ! تم لوگ بھی اس کے حوالے سے آزمائش میں مبتلا ہو گے ، جب تم ایسے لوگوں سے ملو ، تو تم سوال کرنے والے ہونا ، تم انہیں سوالات اُٹھانے کا موقع نہ دینا ، ورنہ وہ تم پر شبہات وارد کر دیں گے ۔ “
یہ روایت امام طبرانی نے معجم اوسط میں نقل کی ہے اس کی سند میں ایک راوی سلم بن سالم ہے ، جسے جمہور ائمہ نے ضعیف قرار دیا ہے جیسے امام أحمد ، امام ابن مبارک اور ان کے بعد والے ائمہ ، ابن عدی کہتے ہیں : مجھے یہ امید ہے کہ اس میں کوئی حرج نہیں ہو گا ۔

سیدنا عبداللہ بن عمرو رضی اللہ عنہ روایت کرتے ہیں نبی اکرم صلی اللہ علیہ وسلم نے ارشاد فرمایا : ” کوئی بھی امت ستاروں پر یقین رکھنے کی وجہ سے ہی ہلاکت کا شکار ہوئی اور اس کے شرک میں مبتلا ہونے کا آغاز ، ہمیشہ تقدیر کو جھٹلانے کے ذریعے ہوا ۔ “
یہ روایت امام طبرانی نے معجم صغیر اور معجم کبیر میں نقل کی ہے ، تاہم اس میں انہوں نے یہ الفاظ نقل کئے ہیں : ” کوئی بھی امت اس وقت تک ہلاکت کا شکار نہیں ہوئی ، جب تک اس نے اللہ کا شریک نہیں ٹھہرایا ، اور کسی بھی اُمت نے اللہ کا شریک اُس وقت تک نہیں ٹھہرایا ، جب تک ان کے شرک کے آغاز میں تقدیر کو جھٹلانا نہیں آیا ۔ “ اس روایت کی سند میں ایک راوی عمر بن یزید نصری ہے ، جس کا تعلق بن بنو نصر سے ہے ، جسے ابن حبان نے ضعیف قرار دیا ہے ، وہ کہتے ہیں : اس پر اعتبار کیا جائے گا ۔

سیدنا معاذ بن جبل رضی اللہ عنہ روایت کرتے ہیں نبی اکرم صلی اللہ علیہ وسلم نے ارشاد فرمایا : ” اللہ تعالیٰ نے جس بھی نبی کو مبعوث کیا تو اس کی امت میں قدریہ فرقے کے لوگ مرجئہ فرقے کے لوگ ہوتے ہیں ، جو اس کی امت کے معاملے کو تشویش کا شکار کرتے ہیں ، اور اللہ تعالیٰ نے ستر انبیاء کرام کی زبانی قدریہ لوگوں اور مرجئہ لوگوں ( کے فرقے ) پر لعنت کی ہے ۔ “
یہ روایت امام طبرانی نے نقل کی ہے اس کی سند میں ایک راوی بقیہ بن ولید ہے اور وہ کمزور ہے اور ایک راوی یزید بن حصین ہے اور میں اس سے واقف نہیں ہوں ۔

محمد بن عبید ، سیدنا عبداللہ بن عباس رضی اللہ عنہما کے بارے میں یہ بات نقل کرتے ہیں : ” سیدنا عبداللہ بن عباس رضی اللہ عنہما سے یہ کہا: گیا : ایک شخص ہمارے پاس آیا ہے ، جو تقدیر کو جھٹلاتا ہے ، تو سیدنا عبداللہ بن عباس رضی اللہ عنہما نے فرمایا : مجھے اس شخص کے پاس لے کر جاؤ ! راوی بیان کرتے ہیں : وہ اس وقت نابینا ہو چکے تھے ، ایک شخص نے دریافت کیا : اے ابن عباس ! آپ اس کے ساتھ کیا کریں گے ؟ انہوں نے فرمایا : اس ذات کی قسم ! جس کے دست قدرت میں میری جان ہے ، اگر میں نے اس پر ق ابوپا لیا ، تو میں اس کی ناک کو کاٹ دوں گا اور اگر اس کی گردن تک میرا ہاتھ پہنچ گیا ، تو میں اس کی گردن کو توڑ دوں گا ، کیونکہ میں نے نبی اکرم صلی اللہ علیہ وسلم کو یہ ارشاد فرماتے ہوئے سنا ہے : ” مجھے نظر آ رہا ہے کہ بنوفہر کی خواتین ، خزرج کا طواف کریں گی ، اور ان کے جسم شرک کرتے ہوئے حرکت کریں گے ، یہ اس امت میں پہلا شرک ہو گا اور اس ذات کی قسم ! جس کے دست قدرت میں میری جان ہے ، ان لوگوں کی رائے کی خرابی انہیں روک دے گی ، یہاں تک کہ وہ لوگ اللہ تعالیٰ کو اس چیز سے نکال دیں گے کہ اس نے بھلائی کو پیدا کیا ہے ، جس طرح انہوں نے پہلے اللہ تعالیٰ کو اس چیز سے نکال دیا ہو گا کہ اس نے برائی کو مقدر کیا ہے ۔ “
یہ روایت امام أحمد نے دو حوالوں کے ساتھ نقل کی ہے ، اس کی سند میں ایک راوی محمد بن عبید مکی ہے ، جسے ابن حبان نے ثقہ قرار دیا ہے اور ابوحاتم نے اسے ضعیف قرار دیا ہے ان دونوں روایات میں سے ایک کی سند میں ایک راوی ایسا ہے جس کا نام بیان نہیں کیا گیا ہے ، دوسری سند میں انہوں نے اس کا نام علاء بن حجاج بیان کیا ہے جسے ازدی نے ضعیف قرار دیا ہے ” مسند “ میں انہوں نے یہ بات بیان کی ہے : محمد بن عبید نے سیدنا عبداللہ بن عباس رضی اللہ عنہما سے سماع کیا ہے ۔

سعید بن جبیر بیان کرتے ہیں : میں ایک حلقے میں موجود تھا ، جس میں سیدنا عبداللہ بن عباس رضی اللہ عنہما بھی موجود تھے ، ہم نے تقدیر کا ذکر کیا ، تو سیدنا عبداللہ بن عباس رضی اللہ عنہما شدید غصے میں آ گئے اور بولے : اگر مجھے پتہ چل جائے کہ لوگوں میں ، اُن میں سے کوئی ایک فرد ہے ( جو تقدیر کا انکار کرتے ہیں ) تو میں اُسے پکڑ لوں گا ، میں نے نبی اکرم صلی اللہ علیہ وسلم کو یہ ارشاد فرماتے ہوئے سنا ہے : ” جب بھی اللہ تعالیٰ نے کسی نبی کو مبعوث کیا اور پھر اسے اُٹھا لیا ، تو اللہ تعالیٰ نے اس نبی کے بعد ایک زمانہ ایسا رکھا ، جس میں کوئی نبی نہیں آیا ، اور اس زمانے کے لوگ جہنم میں جائیں گے ۔ “
یہ روایت امام طبرانی نے دو اسناد کے ساتھ نقل کی ہے ، جن میں سے ایک کے رجال صحیح کے رجال ہیں ، صرف صدقہ بن سابق کا معاملہ مختلف ہے اور وہ ثقہ ہے ۔
یہ روایت امام بزار نے نقل کی ہے اور انہوں نے یہ الفاظ زائد نقل کئے ہیں : ” اور وہ لوگ قدریہ ہیں ۔ “

سیدنا عبداللہ بن عباس رضی اللہ عنہما بیان کرتے ہیں : جب بھی اللہ تعالیٰ نے کسی نبی کو مبعوث کیا ، تو اس نبی کے بعد ایک وقفہ آیا اور یہ وہ لوگ ہیں ، جن کے ذریعے جہنم کو بھرا جائے گا ۔
یہ روایت امام طبرانی نے نقل کی ہے ، اس کی سند میں ایک راوی ابوداؤد اعمیٰ ہے اور وہ انتہائی ضعیف ہے ۔

سیدنا عبداللہ بن عباس رضی اللہ عنہما بیان کرتے ہیں : نبی اکرم صلی اللہ علیہ وسلم نے مجھ سے ارشاد فرمایا : ” ہو سکتا ہے کہ تم میرے بعد زندہ رہو ، یہاں تک کہ تم ایک ایسی قوم کے زمانے تک پہنچ جاؤ ، جو اللہ تعالیٰ کی مقرر کردہ تقدیر کو جھٹلاتے ہوں گے ، کہ گناہوں کی نسبت وہ بندوں کی طرف کرتے ہوں گے ، انہوں نے یہ کلام عیسائیوں سے لیا ہو گا ، جب اس طرح کی صورت حال ہو ، تو تم اللہ تعالیٰ کے سامنے اُن لوگوں سے لاتعلق ہونے کا اظہار کرنا ۔ “ راوی بیان کرتے ہیں : سیدنا عبداللہ بن عباس رضی اللہ عنہما دونوں ہاتھ بلند کر کے یہ کہتے تھے : ” اے اللہ ! میں ان لوگوں سے لاتعلق ہونے کا اظہار کرتا ہوں ، جس طرح تیرے نبی صلی اللہ علیہ وسلم نے حکم دیا تھا ۔ “
یہ روایت امام طبرانی نے نقل کی ہے ، اس کی سند میں ایک راوی عبداللہ بن زیاد بن سمعان ہے اور وہ متروک ہے ۔

سیدنا انس بن مالک رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” قدریہ فرقے کے لوگ اور مرجئہ فرقے کے لوگ ، اس امت کے مجوسی ہیں ، اگر وہ بیمار ہو جائیں ، تو تم ان کی عیادت نہ کرو ، اگر وہ مر جائیں ، تو تم اُن کے جنازے میں شریک نہ ہو ۔ “
یہ روایت امام طبرانی نے معجم اوسط میں نقل کی ہے اور اس کے رجال صحیح کے رجال ہیں ، صرف ہارون بن موسیٰ فروی کا معاملہ مختلف ہے اور وہ ثقہ ہے ۔

سیدنا عبداللہ بن عمر رضی اللہ عنہما روایت کرتے ہیں نبی اکرم صلی اللہ علیہ وسلم نے ارشاد فرمایا : ” قدریہ فرقے کے لوگ اس امت کے مجوسی ہیں ، اگر وہ بیمار ہو جائیں ، تو تم ان کی عیادت نہ کرو اور اگر وہ مر جائیں ، تو تم ان کے جنازے میں شریک نہ ہو ۔ “
یہ روایت امام طبرانی نے معجم اوسط میں نقل کی ہے ، اس کی سند میں ایک راوی زکریا بن منظور ہے ، جسے أحمد بن صالح اور دیگر حضرات نے صالح قرار دیا ہے ، اور ایک جماعت نے اسے ضعیف کہا: ہے ۔

سیدنا ابوہریرہ رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” اللہ تعالیٰ نے قدریہ فرقے کے لوگوں پر لعنت کی ہے ، جو تقدیر ( کے کچھ حصے ) کو جھٹلاتے ہیں اور تقدیر ( کے کچھ حصے ) کی تصدیق کرتے ہیں ۔ “
یہ روایت امام طبرانی نے معجم اوسط میں نقل کی ہے ، اس کی سند میں ایک راوی ابن لہیعہ ہے اور وہ حدیث میں کمزور ہے ۔

سیدہ عائشہ صدیقہ رضی اللہ عنہا بیان کرتی ہیں : نبی اکرم صلی اللہ علیہ وسلم نے ارشاد فرمایا : ” چھ لوگ ہیں ، جن پر میں نے اور ہر ” مستجاب الدعوات نبی “ نے لعنت کی ہے ، اللہ کی کتاب میں اضافہ کرنے والا شخص ، اللہ کی تقدیر کو جھٹلانے والا شخص ، اللہ تعالیٰ کی حرام قرار دی جانے والی چیزوں کو حلال قرار دینے والا شخص ، اور میری عترت کے حوالے سے اُس چیز کو حلال قرار دینے والا شخص ، جسے اللہ تعالیٰ نے حرام قرار دیا ہو ، اور سنت کو ترک کرنے والا شخص ۔ “
یہ روایت امام طبرانی نے معجم اوسط میں نقل کی ہے اور اس کے رجال ثقہ ہیں ، ابن حبان نے اس حدیث کو صحیح قرار دیا ہے ۔

سیدنا عبداللہ بن عمر رضی اللہ عنہما بیان کرتے ہیں : نبی اکرم صلی اللہ علیہ وسلم نے ارشاد فرمایا : ” جو شخص تقدیر کو جھٹلاتا ہے ، وہ اس چیز کو جھٹلاتا ہے جو سیدنا محمد صلی اللہ علیہ وسلم پر نازل ہوئی ہے ۔ “
یہ روایت امام طبرانی نے معجم اوسط میں نقل کی ہے ، اس کی سند میں ایک راوی محمد بن حسین قصاص ہے اور میں اس سے واقف نہیں ہوں ، اس روایت کے بقیہ رجال ثقہ ہیں ۔

محمد بن کعب قرظی بیان کرتے ہیں : سیدنا عبداللہ بن عمر رضی اللہ عنہما کے سامنے قدریہ فرقے کا ذکر کیا گیا ، تو سیدنا عبداللہ بن عمر رضی اللہ عنہما نے ارشاد فرمایا : ” ستر انبیاء کرام علیہم السلام اور ہمارے نبی سیدنا محمد صلی اللہ علیہ وسلم کی زبانی قدریہ فرقے کے لوگوں پر لعنت کی گئی ہے ، جب قیامت کا دن ہو گا ، تو اللہ تعالیٰ لوگوں کو ایک میدان میں اکٹھا کرے گا اور پھر ایک منادی یہ اعلان کرے گا ، جسے سب پہلے والے اور بعد والے لوگ سنیں گے ، وہ کہے گا : اللہ تعالیٰ کے مقابل لوگ کہاں ہیں ؟ تو قدریہ فرقے کے لوگ اُٹھ جائیں گے ۔ “
یہ روایت امام طبرانی نے معجم اوسط میں نقل کی ہے ، اس کی سند میں ایک راوی محمد بن فضل بن عطیہ ہے اور وہ متروک ہے ۔
یہ روایت امام ابویعلیٰ نے کبیر میں اختصار کے ساتھ نقل کی ہے ، جو بقیہ بن ولید نے حبیب بن عمرو سے روایت نقل کی ہے بقیہ نامی راوی مدلس ہے اور حبیب نامی راوی مجہول ہے ۔

سیدنا عمر بن خطاب رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” جب قیامت کا دن ہو گا ، تو منادی یہ کہے گا : خبردار ! اللہ تعالیٰ کے مقابل فریق کے لوگ کھڑے ہو جائیں ، اور وہ قدریہ فرقے کے لوگ ہوں گے ۔ “
یہ روایت امام طبرانی نے معجم اوسط میں بقیہ کی نقل کردہ روایت کے طور پر نقل کی ہے اور وہ مدلس ہے اور اس میں ایک راوی حبیب بن عمرو ہے ، جو مجہول ہے ۔

سیدنا ابوسعید خدری رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” آخری زمانے میں کوئی عورت آئے گی اور اپنے شوہر کو پائے گی کہ اسے مسخ کر کے بندر بنا دیا گیا ہو گا ، اس کی وجہ یہ ہو گی کہ وہ شخص تقدیر پر ایمان نہیں رکھتا ہو گا ۔ “
یہ روایت امام طبرانی نے معجم اوسط میں نقل کی ہے ، اس کی سند میں ایک راوی بشار بن قیراط ہے اور وہ ضعیف ہے ۔

سیدنا ابوہریرہ رضی اللہ عنہ روایت کرتے ہیں نبی اکرم صلی اللہ علیہ وسلم نے ارشاد فرمایا : ” جو شخص اچھی اور بری ( ہر قسم کی ) تقدیر پر ایمان نہیں رکھتا ، میں اُس سے لاتعلق ہوں“ ۔
یہ روایت امام ابویعلیٰ نے نقل کی ہے اس کی سند میں ایک راوی صالح بن سرج ہے اور وہ خارجی تھا ۔

سیدنا سہل بن سعد رضی اللہ عنہ روایت کرتے ہیں نبی اکرم صلی اللہ علیہ وسلم نے ارشاد فرمایا : ” بندہ اس وقت تک مومن نہیں ہوتا ، جب تک وہ تقدیر پر ایمان نہ رکھے ۔ “
یہ روایت امام طبرانی نے نقل کی ہے اس کی سند میں ایک راوی اسماعیل بن ابوحکم ثقفی ہے اور میں اس سے واقف نہیں ہوں اس روایت کے بقیہ رجال ثقہ ہیں ۔

سیدنا ابوامامہ رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” چار قسم کے لوگ ہیں کہ قیامت کے دن اللہ تعالیٰ ان کی طرف نظر رحمت نہیں کرے گا ( والدین کا ) نافرمان ، احسان جتانے والا شخص ، باقاعدگی سے شراب پینے والا شخص ، اور تقدیر کو جھٹلانے والا شخص ۔ “

ایک روایت میں یہ الفاظ ہیں : ” تین قسم کے لوگ ایسے ہیں کہ اللہ تعالیٰ اُن کی کوئی فرض یا نفل عبادت قبول نہیں کرے گا ۔ ۔ ۔ ۔ ۔ ۔ ۔ “ ۔ اس کے بعد راوی نے حسب سابق حدیث ذکر کی ہے ۔
یہ روایت امام طبرانی نے دو اسناد کے ساتھ نقل کی ہے ، جن میں سے ایک کی سند میں ایک راوی بشر بن نمیر ہے اور وہ متروک ہے اور دوسری روایت کی سند میں ایک راوی عمر بن یزید ہے اور وہ ضعیف ہے ۔

سیدنا واثلہ بن اسقع رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” اس اُمت کے دو گروہوں کو میری شفاعت نصیب نہیں ہو گی ، مرجئہ اور قدریہ ۔ “
یہ روایت امام طبرانی نے معجم اوسط میں نقل کی ہے ، اس کی سند میں ایک راوی محمد بن محصن ہے اور وہ متروک ہے ۔

سیدنا جابر رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” میری اُمت کے دو قسم کے گروہوں کو میری شفاعت نصیب نہیں ہو گی ، مرجئہ اور قدریہ ۔ “
یہ روایت امام طبرانی نے معجم اوسط میں نقل کی ہے ، اس کی سند میں ایک راوی بحر بن کنیز سقاء ہے اور وہ متروک ہے ۔

سیدنا جابر رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” میری امت کے دو قسم کے گروہوں کا اسلام میں کوئی حصہ نہیں ہے ، مرجئہ اور قدریہ ۔ “
یہ روایت امام طبرانی نے معجم اوسط میں نقل کی ہے ، اس کی سند میں ایک راوی قریر بن سہل ہے اور وہ کذاب ہے ۔

سیدنا ابوسعید خدری رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” میری امت کے دو قسم کے گروہوں کا اسلام میں کوئی حصہ نہیں ہے ، مرجئہ اور قدریہ ۔ “
یہ روایت امام طبرانی نے معجم اوسط میں نقل کی ہے ، اس کی سند میں ایک راوی عمرو بن قاسم بن حبیب تمار ہے اور وہ ضعیف ہے عطیہ عوفی کی حالت بھی اسی طرح ہے ۔

سیدنا انس بن مالک رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” میری امت کے دو قسم کے لوگ حوض پر میرے پاس نہیں آ سکیں گے ، اور جنت میں داخل نہیں ہوں گے ، مرجئہ اور قدريہ ۔ “
یہ روایت امام طبرانی نے معجم اوسط میں نقل کی ہے اور اس کے رجال صحیح کے رجال ہیں ، صرف ہارون بن موسیٰ فروی کا معاملہ مختلف ہے اور وہ ثقہ ہے ۔

سیدنا سہل بن سعد ساعدی رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” ہر امت کے مجوسی ہوتے ہیں اور ہر امت کے نصاریٰ ہوتے ہیں اور ہر اُمت کے یہودی ہوتے ہیں ، میری اُمت کے مجوسی قدریہ ہیں ، اُن کے عیسائی حشییہ ہیں اور ان کے یہودی مرجئہ ہیں ۔ “
یہ روایت امام طبرانی نے معجم اوسط میں نقل کی ہے ، اس کی سند میں ایک راوی یحیی بن سابق ہے اور وہ ضعیف ہے ۔

سیدنا انس بن مالک رضی اللہ عنہ روایت کرتے ہیں نبی اکرم صلی اللہ علیہ وسلم نے ارشاد فرمایا : ” جو شخص اللہ تعالیٰ کے مقرر کردہ فیصلے سے راضی نہیں ہوتا اور اس کی مقرر کردہ تقدیر پر ایمان نہیں رکھتا اسے اللہ تعالیٰ کے علاوہ کوئی اور معبود تلاش کر لینا چاہیے ۔ “
یہ روایت امام طبرانی نے معجم صغیر اور مجحم اوسط میں نقل کی ہے ، اس کی سند میں ایک راوی سہل بن ابوحزم ہے جسے یحیی بن معین نے ثقہ قرار دیا ہے اور ایک جماعت نے اسے ضعیف کہا: ہے ، اس روایت کے بقیہ رجال ثقہ ہیں ۔

سیدنا ابوہند داری رضی اللہ عنہ بیان کرتے ہیں : میں نے نبی اکرم صلی اللہ علیہ وسلم کو یہ ارشاد فرماتے ہوئے سنا ہے : ” اللہ تعالیٰ فرماتا ہے : جو شخص میری قضا سے راضی نہیں ہوتا اور میری ( دی ہوئی ) آزمائش پر صبر نہیں کرتا اسے میرے علاوہ کوئی اور پروردگار تلاش کر لینا چاہیے ۔ “
یہ روایت امام طبرانی نے نقل کی ہے اس کی سند میں ایک راوی سعید بن زیاد بن ہند ہے اور وہ متروک ہے ۔

سیدنا عبداللہ بن عباس رضی اللہ عنہما بیان کرتے ہیں : سیدنا عمر بن خطاب رضی اللہ عنہ نے خطبہ دیتے ہوئے اللہ تعالیٰ کی حمد و ثناء بیان کی اور یہ ارشاد فرمایا : ” تم لوگوں کے بعد عنقریب ایسے لوگ آئیں گے جو سنگسار ( کرنے کی سزا حق ہونے ) دجال ، شفاعت اور قبر کے عذاب کو جھٹلائیں گے اور ( اس بات کو جھٹلائیں گے ) کہ کچھ لوگوں کو جہنم سے اُن کے کوئلہ ہو جانے کے بعد نکال دیا جائے گا ۔ “
یہ روایت امام أحمد نے ایک طویل حدیث میں نقل کی ہے اور امام ابویعلیٰ نے کبیر میں نقل کی ہے اور یہ الفاظ زائد نقل کئے ہیں : ” وہ لوگ سورج کے مغرب کی طرف سے طلوع ہونے کو جھٹلائیں گے ۔ “ اس روایت کی سند میں ایک راوی علی بن زید ہے اور وہ خراب حافظے کا مالک ہے اس روایت کے بقیہ رجال ثقہ ہیں ۔

ابن عون بیان کرتے ہیں : میں نے غیلان قدری کو دیکھا کہ اسے باب دمشق کے پاس مصلوب کر دیا گیا تھا ۔
یہ روایت امام أحمد نے نقل کی ہے اور اس کے رجال ثقہ ہیں ۔

حماد بن زید کے بارے میں یہ بات منقول ہے : انہوں نے جہمیہ کا ذکر کرتے ہوئے یہ کہا: وہ لوگ اس بات کے درپے ہیں کہ آسمان میں کوئی ( یعنی خدا ) نہیں ہے ۔
یہ روایت امام أحمد نے نقل کی ہے اور اس کے رجال صحیح کے رجال ہیں ۔