مجمع الزوائد ومنبع الفوائد

سیدنا جابر رضی اللہ عنہ بیان کرتے ہیں : نبی اکرم صلی اللہ علیہ وسلم نے فتنے کا ذکر کیا ، تو سیدنا ابوبکر رضی اللہ عنہ نے دریافت کیا : کیا میں اس کا زمانہ پاؤں گا ؟ نبی اکرم صلی اللہ علیہ وسلم نے ارشاد فرمایا : جی نہیں ! سیدنا عمر رضی اللہ عنہ نے عرض کی : کیا میں اس کو پاؤں گا ؟ نبی اکرم صلی اللہ علیہ وسلم نے ارشاد فرمایا : جی نہیں ! سیدنا عثمان رضی اللہ عنہ نے عرض کی : یا رسول اللہ ! کیا میں اس کو پاؤں گا ؟ نبی اکرم صلی اللہ علیہ وسلم نے فرمایا : تمہارے حوالے سے وہ لوگ آزمائش میں مبتلا ہوں گے ۔
یہ روایت امام بزار نے نقل کی ہے ، اس کی سند میں ایک راوی ماعز تمیمی ہے ، جس کا ذکر ابن ابوحاتم نے کیا ہے ، کسی نے اس پر جرح نہیں کی ہے ، اس روایت کے بقیہ رجال ثقہ ہیں ۔

سیدنا عثمان غنی رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” میرے بعد تمہیں آزمائش میں مبتلا کیا جائے گا ، تو تم قتال ہرگز نہ کرنا ۔ “
یہ روایت امام ابویعلیٰ نے معجم کبیر میں ، اپنے استاد کے حوالے سے نقل کی ہے ، جن کا اسم منسوب بیان نہیں کیا گیا ہے ، اور میں اُن سے واقف بھی نہیں ہوں ، اس روایت کے بقیہ رجال ثقہ ہیں ۔

سیدنا عبداللہ بن حوالہ رضی اللہ عنہ بیان کرتے ہیں : میں نبی اکرم صلی اللہ علیہ وسلم کی خدمت میں حاضر ہوا ، آپ صلی اللہ علیہ وسلم اس وقت ” دومہ “ ( نامی درخت ) کے سائے میں تشریف فرما تھے اور آپ کے پاس ایک تحریر کرنے والا شخص موجود تھا ، جسے آپ املاء کروا رہے تھے ، آپ نے دریافت کیا : اے ابن حوالہ ! کیا میں تمہارے لئے کچھ تحریر نہ کروا دوں ؟ میں نے عرض کی : مجھے نہیں معلوم ، اللہ اور اس کا رسول میرے لئے جو اختیار کریں ( وہی ٹھیک ہو گا ) تو نبی اکرم صلی اللہ علیہ وسلم نے مجھ سے منہ موڑ لیا ، یہاں پر اسماعیل نامی راوی نے ایک مرتبہ یہ الفاظ نقل کئے ہیں : پہلی مرتبہ آپ صلی اللہ علیہ وسلم نے ارشاد فرمایا : اے ابن حوالہ ! کیا ہم تمہیں ( یعنی تمہارے لئے ) کچھ لکھوائیں ؟ میں نے عرض کی : مجھے نہیں معلوم یا رسول اللہ ! کہ کیا ہونا چاہیے ؟ پھر نبی اکرم صلی اللہ علیہ وسلم نے مجھ سے منہ پھیر لیا ، پھر آپ صلی اللہ علیہ وسلم اپنے کاتب کی طرف متوجہ ہو کر اسے املاء کروانے لگے ، پھر آپ صلی اللہ علیہ وسلم نے دریافت کیا : اے ابن حوالہ ! کیا ہم تمہارے لئے نہ لکھوائیں ؟ میں نے عرض کی : مجھے نہیں معلوم ، جو اللہ تعالیٰ اور اس کا رسول میرے لئے اختیار کریں ( وہی مناسب ہو گا ) نبی اکرم صلی اللہ علیہ وسلم نے مجھ سے منہ پھیر لیا ، پھر آپ صلی اللہ علیہ وسلم کاتب کی طرف متوجہ ہوئے اور اسے املاء کرواتے رہے ، راوی کہتے ہیں : میں نے جائزہ لیا ، تو اس تحریر میں سیدنا عمر رضی اللہ عنہ کا ذکر بھی تھا ، تو اس سے مجھے اندازہ ہو گیا کہ سیدنا عمر رضی اللہ عنہ کا ذکر تو بھلائی کے حوالے سے ہی ہو سکتا ہے ، پھر نبی اکرم صلی اللہ علیہ وسلم نے ارشاد فرمایا : اے ابن حوالہ ! کیا ہم تمہارے لئے تحریر نہ کروا دیں ؟ میں نے عرض کی : جی ہاں ! پھر نبی اکرم صلی اللہ علیہ وسلم نے فرمایا : ” اے ابن حوالہ ! فتنوں کے زمانے میں تم کیا کرو گے ؟ جب وہ فتنے زمین کے اطراف سے یوں نکلیں گے ، جس طرح گائے کے سینگ ہوتے ہیں ، میں نے عرض کی : مجھے نہیں معلوم ، اللہ اور اس کا رسول میرے لئے جو اختیار کریں گے ( وہی ٹھیک ہو گا ) نبی اکرم صلی اللہ علیہ وسلم نے ارشاد فرمایا : پھر اس وقت تم کیا کرو گے ؟ جب پہلے فتنے کے بعد دوسرا فتنہ آئے گا اور اس کے مقابلے میں پہلے والا فتنہ جیسے خرگوش اچھلتا ہے ، میں نے عرض کی : مجھے نہیں معلوم ، جو اللہ اور اس کا رسول میرے لئے اختیار کریں گے ( وہی ٹھیک ہو گا ) نبی اکرم صلی اللہ علیہ وسلم نے فرمایا : تم اُس کی پیروی کرنا ! ( راوی بیان کرتے ہیں : ) اُس وقت وہاں سے ایک صاحب چہرہ ڈھانپ کے گزر رہے تھے ، میں گیا ، میں دوڑتا ہوا گیا ، میں نے اُن کے کندھے پر ہاتھ رکھا اور ان کا رخ نبی اکرم صلی اللہ علیہ وسلم کی طرف کر کے دریافت کیا : ان کے ؟ نبی اکرم صلی اللہ علیہ وسلم نے ارشاد فرمایا : جی ہاں ! ( راوی بیان کرتے ہیں : ) تو وہ سیدنا عثمان غنی رضی اللہ عنہ تھے ۔

اُن کے حوالے سے منقول ایک روایت میں یہ الفاظ ہیں : ” ہم نبی اکرم صلی اللہ علیہ وسلم کے ساتھ ایک سفر کر رہے تھے ، لوگوں نے ایک جگہ پڑاؤ کیا ، نبی اکرم صلی اللہ علیہ وسلم نے دومہ ( نامی درخت ) کے سائے میں پڑاؤ کیا ، آپ نے مجھے آتے ہوئے ملاحظہ فرمایا ، میں اپنے کام کے سلسلے میں جا رہا تھا ، اُس وقت وہاں نبی اکرم صلی اللہ علیہ وسلم کے علاوہ اور آپ کے کاتب کے علاوہ اور کوئی نہیں تھا ۔ ۔ ۔ ۔ ۔ ۔ ۔ “ ۔ اس روایت میں انہوں نے یہ بات بھی بیان کی ہے کہ تحریر کے آغاز میں سیدنا ابوبکر رضی اللہ عنہ اور سیدنا عمر رضی اللہ عنہ کا نام تھا ۔ اس روایت میں انہوں نے یہ بات بھی بیان کی ہے : میں نے عرض کی : یا رسول اللہ ! میں کیا کروں ؟ نبی اکرم صلی اللہ علیہ وسلم نے فرمایا : تم پر شام جانا لازم ہے ۔ اس روایت میں انہوں نے یہ بات بھی بیان کی ہے : مجھے نہیں معلوم کہ آپ نے دوسرے والے کے بارے میں کیا ارشاد فرمایا تھا کہ اگر مجھے یہ پتہ ہوتا کہ آپ نے دوسرے والے کے بارے میں کیا ارشاد فرمایا تھا ، تو یہ میرے نزدیک اس اس چیز سے زیادہ محبوب ہوتا ۔
یہ روایت امام أحمد نے نقل کی ہے اور امام طبرانی نے اس کی مانند نقل کی ہے اور ان دونوں کے رجال صحیح کے رجال ہیں ۔

شقیق بیان کرتے ہیں : سیدنا عبدالرحمن بن عوف رضی اللہ عنہ کی ملاقات ولید بن عقبہ سے ہوئی ، تو ولید نے اُن سے کہا: کیا وجہ ہے کہ میں نے آپ کو دیکھا کہ آپ نے امیرالمؤمنین سیدنا عثمان غنی رضی اللہ عنہ کے ساتھ زیادتی کی ہے ، سیدنا عبدالرحمن بن عوف رضی اللہ عنہ نے فرمایا : تم انہیں میری طرف سے یہ پیغام پہنچا دو ! کہ یوم عینین کے دن میں فرار نہیں ہوا تھا ، عاصم نامی راوی کہتے ہیں : اس سے مراد غزوہ اُحد کا دن ہے ( انہوں نے یہ بھی فرمایا : ) اور میں غزوہ بدر میں شرکت سے پیچھے نہیں رہا تھا اور میں نے سیدنا عمر رضی اللہ عنہ کی سنت کو ترک بھی نہیں کیا ہے ، راوی کہتے ہیں : ولید گئے اور انہوں نے اس بارے میں سیدنا عثمان رضی اللہ عنہ کو بتایا ، تو سیدنا عثمان رضی اللہ عنہ نے فرمایا : جہاں تک اس کے یہ کہنے کا تعلق ہے کہ میں یوم عینین کو فرار نہیں ہوا تھا ، تو وہ مجھے ایک ایسے گناہ کے حوالے سے کیسے عار دلا سکتا ہے ؟ جس سے اللہ تعالیٰ نے درگزر کیا ہے اور یہ ارشاد فرمایا ہے : ” بیشک وہ لوگ جو تم میں سے پیٹھ پھیر گئے تھے ، اس دن جب دو لشکر ایک دوسرے کے مدمقابل آئے تھے ، تو ( دراصل ) ان کے کیے ہوئے کسی عمل کی وجہ سے شیطان نے انہیں پھسلا دیا تھا ، تحقیق اللہ تعالیٰ نے انہیں معاف کر دیا ۔ “ جہاں تک اُس کی اس بات کا تعلق ہے کہ میں غزوہ بدر کے دن پیچھے رہ گیا تھا ، تو میں نبی اکرم صلی اللہ علیہ وسلم کی صاحبزادی سیدہ رقیہ رضی اللہ عنہا کی تیمارداری کر رہا تھا ، یہاں تک کہ اُن کا انتقال ہو گیا تھا ، یہی وجہ ہے کہ نبی اکرم صلی اللہ علیہ وسلم نے میرے لئے حصہ مقرر کیا تھا اور جس شخص کے لئے نبی اکرم صلی اللہ علیہ وسلم نے حصہ مقرر کیا ہو ، وہ گویا ( اس جنگ میں ) شریک ہوا تھا ۔ جہاں تک اُن کی اس بات کا تعلق ہے کہ میں نے سیدنا عمر رضی اللہ عنہ کے طریقے کو ترک نہیں کیا ، تو اس بات کی طاقت نہ میں رکھتا ہوں اور نہ وہ رکھتے ہیں ، تم اُن کے پاس جاؤ اور انہیں یہ بات بتا دو !
یہ روایت امام أحمد اور ابویعلیٰ نے نقل کی ہے ، امام طبرانی نے اختصار کے ساتھ نقل کی ہے ، امام بزار نے اسے اس کی مانند طویل روایت کے طور پر نقل کیا ہے ، اس کی سند میں ایک راوی عاصم بن ابونجود ہے اور وہ حسن الحدیث ہے ، اس روایت کے بقیہ رجال ثقہ ہیں ۔

سعید بن مسیب بیان کرتے ہیں : سیدنا عثمان رضی اللہ عنہ کا ایک اطلاع دینے والا مخصوص تھا ، وہ ان کے آ گے آگے نماز کے لئے نکلا کرتا تھا ، ایک دن وہ نماز ادا کرنے کے لئے نکلے ، اطلاع دینے والا شخص ان کے آگے آگے تھا ، پھر وہ تشریف لائے ، تو اطلاع دینے والا شخص ایک کونے میں بیٹھ گیا ، انہوں نے چادر لپیٹی ، اُسے اپنے سر کے نیچے رکھا اور لیٹ گئے ، انہوں نے اپنا درّہ اپنے آگے رکھا ، اسی دوران سیدنا علی رضی اللہ عنہ آئے ، انہوں نے تہبند باندھا ہوا تھا ، چادر اوڑھی ہوئی تھی اور ان کے ہاتھ میں عصا تھا ، جب اطلاع دینے والے نے انہیں دور سے دیکھا تو بولا: وہ سیدنا علی رضی اللہ عنہ آ رہے ہیں ، سیدنا عثمان رضی اللہ عنہ بیٹھ گئے ، انہوں نے اپنی چادر اوڑھ لی ، اسی دوران سیدنا علی رضی اللہ عنہ آئے اور ان کے سرہانے کھڑے ہو گئے ، انہوں نے کہا: آپ نے آل فلاں کی زمین خریدی ہے ؟ جبکہ وہاں کے پانی میں اللہ کے رسول کے وقف کا حق ہے ، مجھے یہ بات پتہ ہے کہ اُسے آپ کے علاوہ اور کوئی نہیں خرید سکتا ، سیدنا عثمان رضی اللہ عنہ کھڑے ہو گئے ، ان دونوں کے درمیان ایسی بات چیت ہوئی کہ میں اُسے روایت نہیں کروں گا ، یہاں تک کہ میں اللہ تعالیٰ کی بارگاہ میں حاضر ہو جاؤں ، اسی دوران سیدنا عباس رضی اللہ عنہ تشریف لائے اور انہوں نے ان دونوں کے درمیان دخل دیا ، سیدنا عثمان رضی اللہ عنہ نے سیدنا علی رضی اللہ عنہ پر درہ اٹھا لیا تھا اور سیدنا علی رضی اللہ عنہ نے سیدنا عثمان رضی اللہ عنہ پر عصا اٹھا لیا تھا ، سیدنا عباس رضی اللہ عنہ ان دونوں کو پرسکون کروانے کی کوشش کرتے رہے ، وہ سیدنا علی رضی اللہ عنہ سے یہ کہہ رہے تھے : یہ امیرالمؤمنین ہیں ، اور سیدنا عثمان رضی اللہ عنہ سے یہ کہہ رہے تھے : یہ آپ کے چچازاد ہیں ، وہ مسلسل ایسا کرتے رہے ، یہاں تک کہ وہ دونوں حضرات خاموش ہو گئے ۔ راوی بیان کرتے ہیں : ) اگلے دن میں نے ان دونوں حضرات کو دیکھا کہ ان میں سے ہر ایک نے دوسرے کا ہاتھ پکڑا ہوا تھا اور وہ دونوں آپس میں بات چیت کر رہے تھے ۔
یہ روایت امام طبرانی نے معجم اوسط میں نقل کی ہے ، اس روایت کی سند میں راویوں کی ایک جماعت ایسی ہے ، جن سے میں واقف نہیں ہوں ۔

ابوعون انصاری بیان کرتے ہیں : سیدنا عثمان غنی رضی اللہ عنہ نے سیدنا عبداللہ بن مسعود رضی اللہ عنہ سے فرمایا : تمہارے بارے میں مجھ تک جو اطلاع پہنچی ہے ، کیا تم اُس کام سے باز آنے والے نہیں ہو ؟ سیدنا عبداللہ بن مسعود رضی اللہ عنہ نے اُن کے سامنے کوئی عذر پیش کیا تو سیدنا عثمان رضی اللہ عنہ نے فرمایا : تمہارا ستیا ناس ہو ! مجھے بھی ( نبی اکرم صلی اللہ علیہ وسلم کا فرمان ) یاد ہے اور میں نے سنا بھی ہوا ہے اور وہ ویسا نہیں ہے ، جس طرح تم نے سنا ہوا ہے ، نبی اکرم صلی اللہ علیہ وسلم نے ارشاد فرمایا ہے : ” عنقریب ایک امیر کو قتل کر دیا جائے گا اور برائی کی طرف تیزی سے جانے والے ، برائی کی طرف جائیں گے ۔ “ وہ مقتول شخص میں ہوؤں گا ، سیدنا عمر رضی اللہ عنہ مراد نہیں ہیں ، کیونکہ سیدنا عمر رضی اللہ عنہ کو تو ایک ہی شخص نے قتل کیا تھا اور میرے خلاف اجتماع اکٹھا ہو گا ۔
یہ روایت امام أحمد نے نقل کی ہے اور اس کے رجال ثقہ ہیں ۔

سالم بن ابوالجعد بیان کرتے ہیں : سیدنا عثمان غنی رضی اللہ عنہ نے ، نبی اکرم صلی اللہ علیہ وسلم کے اصحاب سے تعلق رکھنے والے کچھ افراد کو بلوایا ، جن میں سیدنا عمار بن یاسر رضی اللہ عنہ بھی تھے ، سیدنا عثمان رضی اللہ عنہ نے فرمایا : میں تم سے یہ پوچھنے لگا ہوں اور میری یہ خواہش ہے کہ تم میری تصدیق کرو ، میں تمہیں اللہ کا واسطہ دے کر دریافت کرتا ہوں : کیا تم لوگ یہ بات جانتے ہو کہ نبی اکرم صلی اللہ علیہ وسلم دیگر تمام لوگوں پر قریش کو ترجیح دیتے تھے ؟ اور تمام قریش پر بنو ہاشم کو ترجیح دیتے تھے ؟ لوگ خاموش رہے ، سیدنا عثمان غنی رضی اللہ عنہ نے فرمایا : اگر جنت کی چابیاں میرے ہاتھ میں ہوتیں ، تو میں وہ بنو امیہ کو دیدیتا ، یہاں تک کہ اُن کا ہر ایک فرد جنت میں داخل ہو جاتا ۔ پھر سیدنا عثمان رضی اللہ عنہ نے سیدنا طلحہ رضی اللہ عنہ اور سیدنا زبیر رضی اللہ عنہ کو بلوایا ، پھر سیدنا عثمان رضی اللہ عنہ نے فرمایا : کیا میں تم دونوں کو اس کے حوالے سے حدیث بیان کروں ؟ سیدنا عثمان رضی اللہ عنہ کی مراد ، سیدنا عمار بن یاسر رضی اللہ عنہ تھے ، ایک مرتبہ میں نبی اکرم صلی اللہ علیہ وسلم کے ساتھ آ رہا تھا ، نبی اکرم صلی اللہ علیہ وسلم نے میرا ہاتھ پکڑا ہوا تھا ، ہم کھلے میدان میں چلتے ہوئے اس کے والد ، اس کی والدہ اور اس کے پاس آئے ، جنہیں تکلیف پہنچائی جا رہی تھی ، عمار کے والد نے کہا: یا رسول اللہ ! کیا ہمیشہ ایسا ہی ہوتا رہے گا ؟ نبی اکرم صلی اللہ علیہ وسلم نے اُن سے فرمایا : تم صبر سے کام لو ! پھر آپ صلی اللہ علیہ وسلم نے ارشاد فرمایا : اے اللہ ! آل یاسر کی مغفرت فرما دے ! اور تو نے ایسا کر دیا ہے ۔ ( یا یہ مطلب ہو گا کہ اللہ تعالیٰ نے فرمایا : میں نے ایسا کر دیا ہے ) ۔
یہ روایت امام أحمد نے نقل کی ہے اور اس کے رجال صحیح کے رجال ہیں ، تاہم یہ روایت منقطع ہے ۔

ابراہیم بن عبدالرحمن بن عوف بیان کرتے ہیں : سیدنا عثمان رضی اللہ عنہ نے فرمایا : ” اگر تم لوگ اللہ تعالیٰ کی کتاب میں یہ بات پاتے ہو کہ میرے پاؤں میں بیڑیاں ڈال دی جائیں ، تو تم ایسا کر لو ۔ “
یہ روایت عبداللہ بن أحمد نے نقل کی ہے اور اس کے رجال صحیح کے رجال ہیں ۔

سیدنا عمر رضی اللہ عنہ کے غلام اسلم بیان کرتے ہیں : میں سیدنا عثمان رضی اللہ عنہ کے پاس موجود تھا ، جب جنازگاہ میں ان کا محاصرہ کیا گیا تھا اور وہاں اتنے لوگ تھے کہ اگر کوئی پتھر پھینکا جاتا ، تو وہ کسی نہ کسی شخص کے سر پر جا کے لگتا ، میں نے سیدنا عثمان غنی رضی اللہ عنہ کو دیکھا کہ انہوں نے مقام جبرائیل کے ساتھ والی کھڑکی کی طرف سے جھانک کر باہر دیکھا اور فرمایا : اے لوگو ! کیا تمہارے درمیان طلحہ موجود ہیں ؟ لوگوں خاموش رہے ، پھر انہوں نے فرمایا : اے لوگو ! کیا تمہارے درمیان طلحہ موجود ہیں ؟ تو سیدنا طلحہ بن عبیداللہ رضی اللہ عنہ اٹھ کھڑے ہوئے ، سیدنا عثمان رضی اللہ عنہ نے ان سے فرمایا : کیا میں تمہیں یہاں نہیں دیکھ رہا ہوں ؟ میری یہ رائے نہیں تھی کہ تم ایسی قوم کی جماعت میں ہو گے جو میری پکار کو سن رہے ہوں گے اور پھر بھی تم نے مجھے جواب نہیں دیا ؟ اے طلحہ ! میں تمہیں اللہ کا واسطہ دے کر دریافت کرتا ہوں ، کیا تمہیں وہ دن یاد ہے ؟ جب میں اور تم اللہ کے رسول صلی اللہ علیہ وسلم کے ساتھ فلاں مقام پر موجود تھے ، آپ صلی اللہ علیہ وسلم کے ساتھ آپ کے اصحاب میں سے میرے اور تمہارے علاوہ اور کوئی نہیں تھا ، سیدنا طلحہ رضی اللہ عنہ نے جواب دیا : جی ہاں ! سیدنا عثمان رضی اللہ عنہ نے بتایا : نبی اکرم صلی اللہ علیہ وسلم نے تم سے یہ فرمایا تھا : ” اے طلحہ ! ہر ایک نبی کے ساتھ اُس کے اصحاب میں سے ایک رفیق ہوتا ہے ، جس کا تعلق اُس ( نبی ) کی امت سے ہوتا ہے اور وہ رفیق اُس کے ساتھ جنت میں ہو گا اور عثمان بن عفان جنت میں میرا رفیق ہو گا “ تو سیدنا طلحہ رضی اللہ عنہ نے جواب دیا : اللہ جانتا ہے ، جی ہاں ! پھر سیدنا عثمان رضی اللہ عنہ واپس چلے گئے ۔ ( علامہ ہیثمی فرماتے ہیں ) میں یہ کہتا ہوں : امام نسائی رحمہ اللہ نے اس کا ایک حصہ ” منقطع “ سند کے ساتھ نقل کیا ہے ۔
یہ روایت عبداللہ نے نقل کی ہے ، اس کی سند میں ایک راوی ابوعبادہ زرقی ہے اور وہ متروک ہے ، یہ روایت امام ابویعلیٰ نے معجم کبیر میں نقل کی ہے اور انہوں نے سند میں ابوعبادہ کا نام ساقط کر دیا ہے ۔

عبادہ بن ازہر ابورواع بیان کرتے ہیں : میں نے سیدنا عثمان رضی اللہ عنہ کو خطبہ دیتے ہوئے سنا ، آپ رضی اللہ عنہ نے ارشاد فرمایا : ” اللہ کی قسم ! ہم لوگ اللہ کے رسول صلی اللہ علیہ وسلم کے ساتھ سفر اور حضر میں ساتھ رہے ہیں ، اور آپ صلی اللہ علیہ وسلم ہمارے بیماروں کی عیادت کرتے تھے اور آپ صلی اللہ علیہ وسلم ہمارے جنازوں میں شریک ہوتے تھے ، ہمارے ساتھ جنگ میں حصہ لیتے تھے ، تھوڑے اور زیادہ ہر معاملے میں ہمارے ساتھ اچھا سلوک کرتے تھے ، اور کچھ لوگ مجھے آپ صلی اللہ علیہ وسلم کے بارے میں بتا رہے ہیں ، حالانکہ انہوں نے تو کبھی آپ صلی اللہ علیہ وسلم کی زیارت بھی نہیں کی ہو گی ۔ “
یہ روایت امام أحمد نے نقل کی ہے ، امام ابویعلیٰ نے کبیر میں نقل کی ہے ، انہوں نے یہ الفاظ زائد نقل کئے ہیں : ” فرزدق کی بیوی کے بیٹے اعین نے : اُن سے کہا: اے نعثل ! تم نے تبدیلی کر دی ہے ، انہوں نے دریافت کیا : یہ کون ہے ؟ انہوں نے کہا: یہ اعین ہے ، اس نے کہا: بلکہ تم غلام ہو ، راوی کہتے ہیں : تو لوگ اچھل کر اعین کی طرف گئے ، راوی بیان کرتے ہیں : بنو لیث سے تعلق رکھنے والے ایک شخص نے لوگوں کو پیچھے کرنا شروع کیا ، یہاں تک کہ اعین کو اُس کے گھر میں داخل کیا ۔ ان دونوں کے رجال صحیح کے رجال ہیں ، صرف عباد بن ظاہر کا معاملہ مختلف ہے اور وہ ثقہ ہے ۔

ابوسعید ، جو سیدنا ابواسید رضی اللہ عنہ کے غلام ہیں : وہ بیان کرتے ہیں : ” سیدنا عثمان رضی اللہ عنہ کو اس بات کی اطلاع ملی کہ اہل مصر کا ایک وفد آیا ہے ، سیدنا عثمان رضی اللہ عنہ مدینہ منورہ کے باہر ایک بستی میں ان لوگوں سے ملے ، انہیں یہ بات ناپسند تھی کہ لوگ ان کے پاس آئیں ، یا جس طرح بھی انہوں نے بیان کیا ، جب ان لوگوں کو سیدنا عثمان رضی اللہ عنہ کے بارے میں پتہ چلا ، تو وہ لوگ سیدنا عثمان رضی اللہ عنہ کے پاس آئے اور انہوں نے کہا: آپ ہمارے لئے مصحف منگوائیں ، سیدنا عثمان رضی اللہ عنہ نے وہ منگوایا ، انہوں نے کہا: آپ اسے کھولیں ، انہوں نے اسے پڑھنا شروع کیا ، یہاں تک کہ آپ اس مقام پر پہنچے : ” تم فرما دو ! تم لوگ اس بارے میں کیا رائے رکھتے ہو ؟ کہ جو رزق اللہ تعالیٰ نے تمہارے لیے نازل کیا ہے اس میں سے کچھ کو تم نے ( اپنی طرف سے ) حرام یا حلال بنا لیا ہے ، تم فرما دو ! کیا اللہ تعالیٰ نے تمہیں ( ایسا کرنے کی ) اجازت دی ؟ یا پھر تم لوگ اللہ تعالیٰ کی طرف جھوٹی بات منسوب کرتے ہو ؟ “ ۔ اُن لوگوں نے کہا: کیا اللہ تعالیٰ کی چراگاہ کے بارے میں آپ کو اجازت دی گئی ہے ؟ یا آپ اللہ تعالیٰ کی طرف جھوٹی بات منسوب کر رہے ہیں ؟ انہوں نے فرمایا : تم جاری رکھو ! یہ فلاں فلاں صورت حال کے بارے میں نازل ہوئی تھی ، جہاں تک چراگاہ کا تعلق ہے تو سیدنا عمر رضی اللہ عنہ نے اسے چراگاہ مقرر کیا ہے ، جو صدقہ کے اونٹوں کے لئے مخصوص ہے ، جب میں نگران بنا تو میں نے بھی وہی کام کیا ، جو انہوں نے کیا تھا ، اور انہوں نے جو کیا تھا ، میں نے اس پر کوئی اضافہ نہیں کیا ، راوی کہتے ہیں : ان کے بارے میں میرا یہ خیال ہے کہ انہوں نے یہ فرمایا تھا : میں اس وقت اتنے اتنے سال کا ہوں ۔ راوی کہتے ہیں : پھر ان لوگوں نے سیدنا عثمان رضی اللہ عنہ سے کچھ چیزوں کے بارے میں دریافت کیا ، جن کے بارے میں وہ یہ کہتے رہے : تم اس کو جاری رکھو ! یہ فلاں فلاں چیز کے بارے میں نازل ہوئی تھی ۔ پھر ان لوگوں نے سیدنا عثمان رضی اللہ عنہ سے کچھ چیزوں کے بارے میں دریافت کیا ، جن سے وہ واقف تھے ، اور ان کے پاس اس کا کوئی جواب نہیں تھا ، تو انہوں نے کہا: میں اللہ تعالیٰ سے مغفرت طلب کرتا ہوں ، پھر انہوں نے فرمایا : تم لوگ کیا چاہتے ہو ؟ ان لوگوں نے کہا: ہم یہ چاہتے ہیں کہ اہل مدینہ سرکاری عطیات وصول نہ کریں ، کیونکہ یہ مال اس شخص کو ملنا چاہیے ، جس نے جنگ میں حصہ لیا ہو اور نبی اکرم صلی اللہ علیہ وسلم کے اصحاب میں سے ان بزرگوں کو ملنا چاہیے ، راوی کہتے ہیں : تو سیدنا عثمان رضی اللہ عنہ بھی اس بات پر راضی ہو گئے اور وہ لوگ بھی اس بات پر راضی ہو گئے ، راوی کہتے ہیں : ان لوگوں نے اس پر عہد لے لیا اور اس بارے میں تحریر لے لی اور اس بات پر بھی عہد لیا کہ وہ لوگ عصا کو نہیں توڑیں گے اور جماعت سے الگ نہیں ہوں گے ، راوی کہتے ہیں : تو سیدنا عثمان رضی اللہ عنہ بھی اس بات پر راضی ہو گئے اور وہ لوگ بھی راضی ہو گئے ۔ راوی بیان کرتے ہیں : پھر وہ لوگ سیدنا عثمان رضی اللہ عنہ کے ساتھ مدینہ منورہ آئے ، سیدنا عثمان رضی اللہ عنہ نے اللہ تعالیٰ کی حمد و ثناء بیان کرنے کے بعد ارشاد فرمایا : اللہ کی قسم ! میں نے ایسا کوئی وفد نہیں دیکھا ، جو اس وفد سے زیادہ بہتر ہو ، جس شخص کی کھیتی باڑی ہو ، وہ اپنی کھیتی باڑی میں مشغول ہو جائے ، جس شخص کے پاس جانور ہوں ، وہ اُن کا دودھ دوہنے لگے ، کیونکہ اب تم لوگوں کو دینے کے لئے ہمارے پاس مال نہیں ہے ، یہ مال اب اُس شخص کو ملے گا ، جس نے جنگ میں حصہ لیا ہو ، اور یہ سیدنا محمد صلی اللہ علیہ وسلم کے اصحاب میں سے بزرگوں کو ملے گا ، راوی کہتے ہیں : تو لوگ غصے میں آ گئے اور انہوں نے کہا: یہ بنو امیہ کی طرف سے آنے والا فریب ہے ، وفد کے لوگ راضی ہو کر واپس چلے گئے ، جب وہ لوگ راستے میں کسی مقام پر پہنچے ، تو اسی دوران ایک سوار ان کے سامنے آیا ، پھر وہ سوار ان سے جدا ہو گیا ، پھر وہ ان کے پاس آیا اور انہیں برا کہنے لگا ، ان لوگوں نے اسے پکڑ لیا ، ان لوگوں نے دریافت کیا : تمہارا کیا معاملہ ہے ؟ تمہارا کوئی خاص معاملہ لگتا ہے ، اس نے کہا: میں امیرالمؤمنین کا قاصد ہوں ، جو مصر میں ان کے گورنر کے پاس جا رہا ہے ، ان لوگوں نے اس کی تلاشی لی تو اس کے پاس ایک تحریر موجود تھی ، جو سیدنا عثمان رضی اللہ عنہ کی طرف سے تھی اور اُس پر ان کی مہر بھی لگی ہوئی تھی ، کہ ان لوگوں کو مصلوب کر دیا جائے ، یا ان کی گردنیں اڑا دی جائیں ، یا ان کے ہاتھ اور پاؤں کاٹ دیے جائیں ۔ راوی کہتے ہیں : وہ لوگ واپس آ گئے اور انہوں نے کہا: انہوں نے عہد توڑ دیا ہے ، تو اللہ تعالیٰ نے ان کے خون کو حلال قرار دیا ہے ، وہ لوگ مدینہ منورہ آئے ، وہ لوگ سیدنا علی رضی اللہ عنہ کے پاس آئے اور ان لوگوں نے کہا: کیا آپ نے اللہ کے دشمن کو نہیں دیکھا ؟ انہوں نے ہمارے بارے میں اس اس طرح کی تحریر لکھوائی ہے ، آپ اُٹھ کر ہمارے ساتھ ان کی طرف جائیں ، تو سیدنا علی رضی اللہ عنہ نے فرمایا : اللہ کی قسم ! میں تمہارے ساتھ اٹھ کر نہیں جاؤں گا ، ان لوگوں نے کہا: پھر انہوں نے کیوں ہماری طرف خط لکھا ؟ سیدنا علی رضی اللہ عنہ نے کہا: اللہ کی قسم ! انہوں نے تمہاری طرف کبھی کوئی خط نہیں لکھا ، پھر وہ لوگ ایک دوسرے کی طرف دیکھنے لگے ، پھر ان میں سے کسی نے کہا: کیا ان کی خاطر تم لوگ جنگ کرنا چاہ رہے ہو ؟ کیا ان کی خاطر تم غصہ کر رہے ہو ؟ پھر سیدنا علی رضی اللہ عنہ وہاں سے نکلے اور مدینہ منورہ کے باہر موجود ایک بستی میں آ کے ٹھہر گئے ، وہ لوگ سیدنا عثمان رضی اللہ عنہ کے پاس گئے اور بولے : آپ نے ہمارے بارے میں اس اس طرح کا خط لکھا ہے ؟ سیدنا عثمان رضی اللہ عنہ نے فرمایا : دو صورتیں ہیں ، یا تو یہ ہے کہ تم لوگ دو گواہ پیش کرو ، یا پھر یہ ہے کہ میں اللہ کے نام کی قسم اٹھا لیتا ہوں ، کہ نہ میں نے اسے لکھا ہے ، نہ املاء کروایا ہے اور نہ ہی مجھے اس بارے میں علم ہے ، اور تم لوگ یہ بات جانتے ہو کہ کوئی شخص دوسرے کی طرف سے کچھ بھی لکھ سکتا ہے ، اور انگوٹھی کے نقش کی نقل بھی تیار کی جا سکتی ہے ۔ راوی بیان کرتے ہیں : تو ان لوگوں نے سیدنا عثمان رضی اللہ عنہ کا محاصرہ کر لیا ، ایک دن سیدنا عثمان رضی اللہ عنہ نے انہیں جھانک کر دیکھا اور فرمایا : السلام علیکم ! راوی کہتے ہیں : میں نے کسی کو ان کے سلام کا جواب دیتے ہوئے نہیں سنا ، البتہ کسی نے دل میں جواب دیدیا ہو تو اس کا معاملہ مختلف ہو گا ، سیدنا عثمان رضی اللہ عنہ نے فرمایا : میں تم لوگوں کو اللہ کا واسطہ دے کر یہ دریافت کرتا ہوں کہ کیا تم لوگ یہ بات جانتے ہو ؟ کہ میں نے اپنے مال میں سے بئر رومہ کو خریدا تھا ، تاکہ اس کے ذریعے میٹھا پانی حاصل کیا جائے اور میں نے اس کنویں کے بارے میں اپنے ڈول کو مسلمانوں کے کسی بھی فرد کے ڈول کی مانند قرار دیدیا تھا ، انہیں جواب دیا گیا : جی ہاں ! سیدنا عثمان رضی اللہ عنہ نے فرمایا : پھر تم مجھے اسی کنویں کا پانی پینے سے کیوں روک رہے ہو ؟ مجھے کھارے پانی کے ذریعے افطاری کرنا پڑی ہے ، پھر سیدنا عثمان رضی اللہ عنہ نے فرمایا : میں تمہیں اللہ کا واسطہ دے کر دریافت کرتا ہوں کہ کیا تم لوگ یہ بات جانتے ہو ؟ کہ میں نے اپنے مال میں سے اتنی اتنی رقم کے عوض میں ، مسجد میں توسیع کروائی تھی ، لوگوں نے جواب دیا : جی ہاں ! تو سیدنا عثمان رضی اللہ عنہ نے فرمایا : کیا تم لوگ یہ بات جانتے ہو کہ مجھ سے پہلے کسی کو اس مسجد میں نماز پڑھنے سے روکا گیا ہو ؟ پھر انہوں نے کچھ اور اُمور کا ذکر کیا ، جو نبی اکرم صلی اللہ علیہ وسلم نے ان سے ارشاد فرمائے تھے ، راوی کہتے ہیں : میرا خیال ہے انہوں نے یہ بات ذکر کی تھی کہ انہوں نے مفصل سورتوں کی کتابت اپنے ہاتھ کے ذریعے کی تھی ، راوی کہتے ہیں : تو اسی دوران ممانعت پھیل گئی اور یہ کہا: گیا : امیرالمؤمنین سے رک جاؤ ! ( علامہ ہیثمی فرماتے ہیں ) میں یہ کہتا ہوں : امام ترمذی نے اس روایت کا کچھ حصہ نقل کیا ہے ۔
یہ روایت امام بزار نے نقل کی ہے اور اس کے رجال صحیح کے رجال ہیں ، صرف ابوسعید کا معاملہ مختلف ہے جو سیدنا ابواسید رضی اللہ عنہ کا غلام ہے اور وہ ثقہ ہے ۔

سیدنا مغیرہ بن شعبہ رضی اللہ عنہ کے بارے میں یہ بات منقول ہے : وہ سیدنا عثمان رضی اللہ عنہ کے پاس آئے جب انہیں محصور کیا جا چکا تھا اور انہوں نے یہ کہا: آپ حکمران ہیں ، آپ کو جو صورت حال درپیش ہے ، وہ آپ ملاحظہ کر رہے ہیں ، میں آپ کے سامنے تین پیشکشیں رکھتا ہوں ، آپ ان میں سے کسی ایک کو اختیار کر لیں ، یا تو آپ باہر نکلیں اور ان لوگوں کے ساتھ لڑائی کریں ، آپ کے ساتھ ( لوگوں کی ) تعداد اور قوت ہے ، اور آپ حق پر ہیں اور یہ لوگ ( یعنی باغی ) باطل پر ہیں ، یا پھر یہ ہے کہ یہ لوگ جس دروازے کے سامنے موجود ہیں ، آپ اس کے علاوہ کوئی اور دروازہ بنوائیں اور اپنی سواری پر سوار ہو کر مکہ تشریف لے جائیں ، جب آپ مکہ میں موجود ہوں گے ، تو یہ ( باغی ) آپ کو نقصان نہیں پہنچا سکیں گے ، یا پھر آپ شام تشریف لے جائیں ، کیونکہ وہاں اہل شام ہیں اور ان میں سیدنا معاویہ رضی اللہ عنہ بھی موجود ہیں ، تو سیدنا عثمان غنی رضی اللہ عنہ نے فرمایا : ” اگر تو میں نکل کر ان کے ساتھ جنگ کرتا ہوں ، تو میں ایسا پہلا فرد نہیں بننا چاہوں گا ، جس نے نبی اکرم صلی اللہ علیہ وسلم کے بعد آپ کی امت میں خون بہانے کا آغاز کیا ، جہاں تک میرے نکل کر مکہ جانے کا تعلق ہے کہ یہ لوگ وہاں مجھے نقصان نہیں پہنچائیں گے ، تو میں نے نبی اکرم صلی اللہ علیہ وسلم کو یہ ارشاد فرماتے ہوئے سنا ہے : ” قریش سے تعلق رکھنے والا ایک شخص مکہ میں الحاد کرے گا اور اسے تمام جہان کے عذاب کا نصف عذاب ہو گا ۔ “ تو میں وہ فرد نہیں بننا چاہتا ، جہاں تک اس بات کا تعلق ہے کہ میں شام چلا جاؤں ، وہاں اہل شام ہیں اور ان میں معاویہ موجود ہے ، تو میں ہجرت کے مقام اور نبی اکرم صلی اللہ علیہ وسلم کے پڑوس سے جدا نہیں ہونا چاہتا ۔ “
یہ روایت امام أحمد نے نقل کی ہے اور اس کے رجال ثقہ ہیں ، صرف محمد بن عبدالملک بن مروان کا معاملہ مختلف ہے ، میں نے یہ بات نہیں پائی کہ اس نے سیدنا مغیرہ رضی اللہ عنہ سے سماع کیا ہو گا ۔ ( علامہ ہیثمی فرماتے ہیں ) میں یہ کہتا ہوں : اس حدیث کے مختلف طرق ہیں ، جو کتاب الحج میں مکہ کی فضیلت سے متعلق باب میں گزر چکے ہیں ۔

سیدنا نعمان بن بشیر رضی اللہ عنہ بیان کرتے ہیں : ہم میں سے ایک شخص کا انتقال ہو گیا ، جس کا نام خارجہ بن زید تھا ، ہم نے اسے کپڑے کے ذریعے ڈھانپ دیا ، میں اُٹھ کر نماز ادا کرنے لگا ، اسی دوران مجھے آہٹ سی محسوس ہوئی ، میں نے نماز ختم کی ، جب میں خارجہ بن زید کی میت کے پاس آیا ، تو وہ حرکت کر رہی تھی ، اُس نے یہ کہا: لوگوں میں سب سے زیادہ مضبوط وہ تھے ، جو درمیانے تھے ( یعنی عدل کرنے والے تھے ) اور وہ اللہ کے بندے سیدنا عمر رضی اللہ عنہ ہیں ، جو امیرالمؤمنین تھے ، اپنے جسم کے اعتبار سے قوی ، اور اللہ تعالیٰ کے معاملے کے بارے میں قوی تھے ، جبکہ سیدنا عثمان غنی رضی اللہ عنہ امیرالمؤمنین ہیں ، وہ پاک دامن ہیں اور انہوں نے پاکدامنی کو اختیار کیا ہے ، اور انہوں نے بہت سی چیزوں سے درگزر کیا ہے ، دو راتیں گزر گئی ہیں اور چار باقی رہ گئی ہیں ، لوگوں کے درمیان اختلاف ہے ، ان کا کوئی نظام نہیں ہے ، اے لوگو ! اپنے امام کی طرف متوجہ ہو جاؤ اور اطاعت و فرمانبرداری سے کام لو ، یہ اللہ کے رسول صلی اللہ علیہ وسلم اور سیدنا ابن رواحہ رضی اللہ عنہ تشریف لا رہے ہیں ، پھر انہوں نے کہا: زید بن خارجہ کا کیا معاملہ ہوا ؟ یعنی ان کے والد نے کہا: تو انہوں نے کہا: میں نے ظلم کے طور پر ” بئر اریس “ کو حاصل کیا تھا ، اُس کے بعد ان کی آواز پست ہو گئی ۔
یہ روایت امام طبرانی نے نقل کی ہے اور اس کے رجال صحیح کے رجال ہیں ۔ اس سے پہلے اس کے طرق ، کتاب الخلافہ میں گزر چکے ہیں ۔

عبدالله بن رافع اپنی والدہ کا یہ بیان نقل کرتے ہیں : ” صعبہ بنت حضرمی نکلیں ( یہ راوی خاتون کی دادی ہیں ) ہم نے اس خاتون کو اپنے والد سیدنا طلحہ بن عبیداللہ رضی اللہ عنہ کو یہ کہتے ہوئے سنا کہ سیدنا عثمان رضی اللہ عنہ کا محاصرہ شدید ہو چکا ہے ، اگر آپ اس بارے میں بات چیت کریں تاکہ یہ چیز ختم ہو جائے تو مناسب ہو گا ، راوی کہتے ہیں : سیدنا طلحہ رضی اللہ عنہ اس وقت اپنے سر کے دو حصوں میں سے ایک حصہ دھو چکے تھے ، انہوں نے اس خاتون کو کوئی جواب نہیں دیا ، تو اس خاتون نے اپنے دونوں ہاتھ اپنی آستین میں داخل کئے اور اپنی چھاتی نکال لی اور بولیں : میں نے تمہارا حمل برداشت کیا ، تمہیں دودھ پلایا ، اس کا واسطہ دے کر میں تمہیں یہ کہتی ہوں کہ تم ایسا کرو ، تو سیدنا طلحہ بن عبیداللہ رضی اللہ عنہ کھڑے ہو گئے ، انہوں نے اپنے سر کے ایک طرف کے دھلے ہوئے بالوں کو لپیٹا اور ان کو گرہ لگا لی ، پھر وہ نکلے اور سیدنا علی رضی اللہ عنہ کے پاس آئے ، جو اپنے گھر کے کنارے پر بیٹھے ہوئے تھے ، سیدنا طلحہ رضی اللہ عنہ تھے ، اُن کے ساتھ ان کی والدہ تھیں اور ساتھ عبداللہ بن رافع کی والدہ ( یعنی راوی خاتون ) تھیں ، سیدنا طلحہ رضی اللہ عنہ نے کہا: اگر آپ ان صاحب سے لوگوں کو ہٹا لیں ، تو یہ مناسب ہو گا کیونکہ ان کا محاصرہ شدید ہو چکا ہے ، تو سیدنا علی رضی اللہ عنہ نے اپنے ہاتھ میں موجود پیالے کو تین مرتبہ انگلی سے مارا ، پھر انہوں نے اپنا سر اٹھایا اور بولے : اللہ کی قسم ! میں ان صاحب کے حوالے سے ایسی کسی چیز کو پسند نہیں کرتا ، جسے یہ ناپسند کرتے ہوں ۔
یہ روایت امام طبرانی نے نقل کی ہے ، اس کی سند میں ایسے راوی ہیں ، جن سے میں واقف نہیں ہوں ، بظاہر یہ لگتا ہے کہ یہ روایت ضعیف ہے ، کیونکہ جب سیدنا عثمان رضی اللہ عنہ کا محاصرہ کیا گیا تھا ، تو سیدنا علی رضی اللہ عنہ اس وقت مدینہ میں موجود نہیں تھے اور ان کی شہادت کے موقع پر وہاں موجود نہیں تھے ۔

محمد بن سیرین بیان کرتے ہیں : محمد بن ابوحذیفہ بن عتبہ بن ربیعہ اور کعب ، یہ دونوں حضرات سمندر میں کشتی پر سوار ہو کر جا رہے تھے ، تو محمد بن ابوحذیفہ نے کہا: اے کعب ! کیا تمہیں ہماری اس کشتی کا ذکر تورات میں ملتا ہے ؟ کہ یہ کیسے چلتی ہے ؟ انہوں نے جواب دیا : جی نہیں ! لیکن مجھے تورات میں ایک ایسے شخص کا ذکر ملتا ہے ، جس کا تعلق قریش سے ہو گا اور وہ سب سے زیادہ بدنصیب نوجوان ہو گا ، اور وہ فتنے میں یوں کود پڑے گا ، جس طرح گدھا کودتا ہے ، تم اس بات سے بچنے کی کوشش کرنا ، کہ کہیں وہ تم نہ ہو ۔ ابن سیرین کہتے ہیں : لوگوں کا یہ کہنا ہے کہ پھر وہی شخص وہ فرد ثابت ہوا ۔
یہ روایت امام طبرانی نے نقل کی ہے اور اس کے رجال صحیح کے رجال ہیں ۔

سیدہ فاطمہ بنت علی رضی اللہ عنہما اور سیدنا عبداللہ بن جعفر رضی اللہ عنہ بیان کرتے ہیں : سیدنا علی بن ابوطالب رضی اللہ عنہ ، سیدنا عمار بن یاسر رضی اللہ عنہ کے پاس آئے ، سیدنا عمار رضی اللہ عنہ نے سیدنا حسن بن علی رضی اللہ عنہما کے گریبان کو پکڑا ہوا تھا ، سیدنا علی رضی اللہ عنہ نے اُن سے دریافت کیا : آپ کا اور آپ کے بھتیجے کا کیا معاملہ ہے ؟ تو سیدنا عمار رضی اللہ عنہ نے کہا: یہ کہتا ہے کہ سیدنا عثمان رضی اللہ عنہ نے کفر کا ارتکاب نہیں کیا ہے ، تو سیدنا علی رضی اللہ عنہ نے ان سے فرمایا : کیا تم اس چیز پر ایمان رکھتے ہو ؟ جس کا انکار سیدنا عثمان رضی اللہ عنہ نے کیا ہو ، اور کیا تم اس چیز کا انکار کر سکتے ہو ، جس پر سیدنا عثمان رضی اللہ عنہ ایمان لائے ہوں ؟ سیدنا عمار رضی اللہ عنہ نے جواب دیا : جی نہیں ! سیدنا علی رضی اللہ عنہ نے فرمایا : پھر تم اپنے بھتیجے کو چھوڑ دو ! جب سیدنا حسن رضی اللہ عنہ چلے گئے ، تو سیدنا علی رضی اللہ عنہ نے سیدنا عمار رضی اللہ عنہ سے کہا: اے عمار ! کیا تم یہ بات نہیں جانتے ہو کہ سیدنا عثمان رضی اللہ عنہ ، اللہ تعالیٰ پر ایمان لائے اور انہوں نے لات اور عزیٰ کا انکار کیا تھا ؟ تو سیدنا عمار رضی اللہ عنہ نے جواب دیا : جی ہاں ! ( یعنی میں یہ بات جانتا ہوں ) ۔
یہ روایت امام طبرانی نے نقل کی ہے ، اس کی سند میں ایک راوی مسور بن صلت ہے اور وہ متروک ہے ۔

وثاب بیان کرتے ہیں : یہ ان لوگوں میں سے ایک تھے ، جنہیں سیدنا عثمان رضی اللہ عنہ نے آزاد کیا تھا اور یہ سیدنا عثمان رضی اللہ عنہ کے سامنے کھڑے ہوا کرتے تھے ، وہ بیان کرتے ہیں : سیدنا عثمان رضی اللہ عنہ نے مجھے بھیجا ، میں اُن کے لئے اشتر کو بلا کے لایا ، ابن عون نامی راوی کہتے ہیں : میرا خیال ہے روایت میں یہ الفاظ ہیں : میں نے ان کے لئے ایک تکیہ رکھا اور امیرالمؤمنین کے لئے ایک تکیہ رکھا ، امیر المؤمنین نے فرمایا : اے اشتر ! یہ لوگ مجھ سے کیا چاہتے ہیں ؟ انہوں نے جواب دیا : تین چیزیں ہیں ، ان میں سے کسی ایک کو اختیار کرنا ، آپ کے لئے ضروری ہو گا ، سیدنا عثمان رضی اللہ عنہ نے دریافت کیا : وہ کیا ہیں ؟ انہوں نے کہا: لوگ آپ کو یہ اختیار دے رہے ہیں کہ اگر آپ چاہیں تو آپ ان کا معاملہ چھوڑ دیں اور یہ کہہ دیں کہ یہ رہی تمہاری حکومت ، تم اس کے لئے جسے چاہو اختیار کر لو ، یا پھر یہ ہے کہ آپ اپنی طرف سے قصاص دیں ، اگر آپ اس کا انکار کرتے ہیں ، تو لوگ آپ کو شہید کر دیں گے ۔ سیدنا عثمان رضی اللہ عنہ نے دریافت کیا : کیا ان میں سے کسی ایک کو اختیار کیے بغیر چارہ نہیں ہے ؟ اشتر نے جواب دیا : ان میں سے کسی ایک کو اختیار کیے بغیر چارہ نہیں ہے ، تو سیدنا عثمان رضی اللہ عنہ نے فرمایا : جہاں تک اس بات کا تعلق ہے کہ میں ان کے لئے حکومت سے الگ ہو جاؤں ، تو میں ایک ایسے لباس کو انہیں اتاروں گا ، جو مجھے پہنایا گیا ہے ، راوی کہتے ہیں : یہاں حسن نامی راوی نے یہ الفاظ نقل کئے ہیں : سیدنا عثمان رضی اللہ عنہ نے فرمایا : اللہ کی قسم ! اگر مجھے آگے کر کے میری گردن اڑا دی جائے ، تو یہ میرے نزدیک اس سے زیادہ محبوب ہو گا کہ میں سیدنا محمد صلی اللہ علیہ وسلم کی امت کی حکومت سے لاتعلقی اختیار کروں ، اور پھر وہ ایک دوسرے پر چڑھ دوڑیں ، راوی کہتے ہیں : یہ کلمات سیدنا عثمان رضی اللہ عنہ کے کلام سے زیادہ مشابہت رکھتے ہیں ۔ ( سیدنا عثمان رضی اللہ عنہ نے فرمایا : ) جہاں تک اس بات کا تعلق ہے کہ میں اپنی ذات کے حوالے سے بدلہ دوں ، تو اللہ کی قسم ! میں یہ بات جانتا ہوں کہ میرے دونوں متعلقہ افراد کو سزا دی گئی اور میرا جسم قصاص کے لائق نہیں ہے ( یعنی مجھ پر قصاص عائد نہیں ہوتا ہے ) جہاں تک اس بات کا تعلق ہے کہ وہ لوگ مجھے قتل کر دیں گے ، تو اللہ تعالیٰ کی قسم ! اگر تم لوگ مجھے قتل کر دو گے ، تو میرے بعد تم کبھی ایک دوسرے سے محبت نہیں رکھو گے ، اور میرے بعد تم کبھی بھی مل جل کر دشمن کے ساتھ جنگ نہیں کرو گے ، تو اشتر اٹھ کر چلا گیا ، ہم ٹھہرے رہے ، ہم نے کہا: شاید لوگ باز آ جائیں ، اسی دوران ایک شخص آیا ، جو بھیڑیے کی طرح محسوس ہوتا تھا ، اس نے دروازے میں سے جھانک کر دیکھا ، پھر وہ واپس چلا گیا ، پھر محمد بن ابوبکر ، تیرہ افراد سمیت آئے اور سیدنا عثمان رضی اللہ عنہ کے پاس پہنچ گئے ، انہوں نے سیدنا عثمان رضی اللہ عنہ کی داڑھی پکڑی اور انہیں مارنا شروع کیا ، یہاں تک کہ میں نے اُن کی داڑھ ٹوٹنے کی آواز سنی ، محمد بن ابوبکر نے کہا: معاویہ تمہارے کس کام آیا ؟ ابن عامر تمہارے کس کام آیا ؟ تمہارے دستے تمہارے کس کام آئے ؟ سیدنا عثمان رضی اللہ عنہ نے فرمایا : اے میرے بھتیجے ! تم میری داڑھی چھوڑ دو ! اے میرے بھتیجے ! تم میری داڑھی چھوڑ دو ! راوی کہتے ہیں : پھر میں نے انہیں دیکھا کہ انہوں نے حاضرین میں سے ایک شخص کو بلایا ، تو وہ ایک تیر لے کر اُٹھ کر ان کی طرف آیا ، اور اس نے وہ تیر ان کے سر میں گھونپ دیا ، راوی کہتے ہیں : میں نے دریافت کیا : پھر کیا ہوا ؟ تو انہوں نے بتایا : ان لوگوں نے ایک دوسرے کی مدد کی ، اللہ کی قسم ! ان لوگوں نے سیدنا عثمان رضی اللہ عنہ کو ( مل جل کر ) شہید کر دیا ۔
یہ روایت امام طبرانی نے نقل کی ہے ، اس کے رجال صحیح کے رجال ہیں ، صرف وثاب کا معاملہ مختلف ہے ، ابن ابوحاتم نے اس کا ذکر کیا ہے ، کسی نے اس پر جرح نہیں کی ہے ۔

سیدہ نائلہ بنت فرافصہ رضی اللہ عنہا بیان کرتی ہیں : یہ سیدنا عثمان رضی اللہ عنہ کی اہلیہ ہیں ، وہ بیان کرتی ہیں : امیرالمؤمنین سیدنا عثمان رضی اللہ عنہ کو اونگھ آ گئی اور وہ سو گئے ، پھر وہ بیدار ہوئے ، تو انہوں نے فرمایا : لوگ مجھے ضرور قتل کر دیں گے ، میں نے کہا: ہرگز نہیں ! اگر اللہ نے چاہا ، تو اس طرح کی صورت حال پیش نہیں آئے گی ، وہ آپ کی رعایا ہیں جو آپ کے سامنے احتجاج کر رہے ہیں ، سیدنا عثمان رضی اللہ عنہ نے فرمایا : ” میں نے اللہ کے رسول صلی اللہ علیہ وسلم کو ، سیدنا ابوبکر رضی اللہ عنہ اور سیدنا عمر رضی اللہ عنہ کو خواب میں دیکھا ہے ، انہوں نے مجھ سے کہا: ہے کہ آج رات تم نے افطاری ہمارے پاس کرنی ہے ۔ “
یہ روایت عبداللہ نامی راوی نے نقل کی ہے اس کی سند میں ایسے راوی ہیں جن سے میں واقف نہیں ہوں ۔

کثیر بن صلت بیان کرتے ہیں : جس دن سیدنا عثمان رضی اللہ عنہ کو شہید کیا گیا ، اس دن کا واقعہ ہے کہ سیدنا عثمان رضی اللہ عنہ سو گئے ، یہ جمعہ کے دن کی بات ہے ، جب وہ بیدار ہوئے ، تو انہوں نے فرمایا : اگر اس بات کا اندیشہ نہ ہوتا کہ لوگ یہ کہیں گے کہ سیدنا عثمان رضی اللہ عنہ مرنے کی آرزو کر رہے ہیں ، تو میں نے تمہیں ایک بات بتانی تھی ، راوی کہتے ہیں : ہم نے کہا: آپ بیان کیجئے ! اللہ تعالیٰ آپ کو ٹھیک رکھے ، ہم اس طرح نہیں کہیں گے ، جس طرح لوگ کہتے ہیں ، تو انہوں نے فرمایا : میں نے خواب میں نبی اکرم صلی اللہ علیہ وسلم کی زیارت کی ہے ، آپ صلی اللہ علیہ وسلم نے ارشاد فرمایا ہے : تم نے جمعہ میں ہمارے ساتھ شریک ہونا ہے ۔
یہ روایت امام ابویعلیٰ نے کبیر میں نقل کی ہے ، اس کی سند میں ایک راوی ابوعلقمہ ہے ، جو سیدنا عبدالرحمن بن عوف رضی اللہ عنہ کا غلام ہے میں اس سے واقف نہیں ہوں ، اس روایت کے بقیہ رجال ثقہ ہیں ۔

سیدنا عبداللہ بن عمر رضی اللہ عنہما بیان کرتے ہیں : سیدنا عثمان رضی اللہ عنہ نے لوگوں کے ساتھ گفتگو کرتے ہوئے ارشاد فرمایا : میں نے خواب میں نبی اکرم صلی اللہ علیہ وسلم کی زیارت کی ہے ، آپ صلی اللہ علیہ وسلم نے فرمایا : تم نے افطاری ہمارے ساتھ کرنی ہے ( راوی بیان کرتے ہیں : ) تو اُس دن انہوں نے روزہ رکھ لیا اور اسی دن انہیں شہید کر دیا گیا ، اللہ تعالیٰ ان سے راضی ہو اور ان کے چہرے کو عزت عطا کرے ۔
یہ روایت امام ابویعلیٰ نے کبیر میں نقل کی ہے اور امام بزار نے نقل کی ہے اور اس کی سند میں ایسا راوی ہے ، جس سے میں واقف نہیں ہوں ۔

سیدنا عثمان غنی رضی اللہ عنہ کے غلام مسلم ابوسعید بیان کرتے ہیں : سیدنا عثمان غنی رضی اللہ عنہ نے بیس غلاموں کو آزاد کیا ، پھر انہوں نے شلوار منگوائی اور اسے پہن لیا ، حالانکہ انہوں نے زمانہ جاہلیت یا زمانہ اسلام میں کبھی اسے نہیں پہنا تھا ، پھر انہوں نے فرمایا : گزشتہ رات میں نے خواب میں نبی اکرم صلی اللہ علیہ وسلم ، سیدنا ابوبکر اور سیدنا عمر رضی اللہ عنہما کو دیکھا ہے ، انہوں نے مجھ سے کہا: ہے : تم صبر سے کام لینا ، یہاں تک کہ کل تم نے ہمارے ساتھ افطاری کرنی ہے ، پھر سیدنا عثمان رضی اللہ عنہ نے قرآن مجید منگوایا ، اسے اپنے سامنے کھول لیا اور جب انہیں شہید کیا گیا ، تو وہ قرآن مجید ان کے آگے موجود تھا ۔
یہ روایت عبداللہ نے اور ابویعلیٰ نے کبیر میں نقل کی ہے اور ان دونوں کے رجال ثقہ ہیں ۔

عبدالله بن محمد بن عقیل بیان کرتے ہیں : سیدنا عثمان رضی اللہ عنہ کو پینتیس ہجری میں شہید کیا گیا اور فتنہ پانچ سال تک رہا ، جن میں سے چار ماہ وہ ہیں ، جو سیدنا حسن رضی اللہ عنہ کی خلافت کے ہیں ۔
یہ روایت عبداللہ نے نقل کی ہے اور امام طبرانی نے نقل کی ہے ، ابن عقیل نامی راوی نے اس واقعہ کا زمانہ نہیں پایا ہے اور اس کے بارے میں اختلاف پایا جاتا ہے ۔

ابوالعالیہ بیان کرتے ہیں : عید الاضحی کے عشرے میں ، ہم لوگ سیدنا عثمان رضی اللہ عنہ کے دروازے پر موجود رہے تھے ۔
یہ روایت امام أحمد نے نقل کی ہے اور اس کے رجال صحیح کے رجال ہیں ۔

ابومعشر بیان کرتے ہیں : سیدنا عثمان غنی رضی اللہ عنہ کو جمعہ کے دن اٹھارہ ذوالحج ، پینتیس ہجری میں شہید کیا گیا اور اُن کی خلافت بارہ سال سے بارہ دن کم تھی ۔
یہ روایت امام أحمد نے نقل کی ہے اور اس کی سند منقطع ہے ۔

ابوعثمان نہدی بیان کرتے ہیں : سیدنا عثمان غنی رضی اللہ عنہ کو ایام تشریق کے درمیانے دن میں شہید کیا گیا ۔
یہ روایت عبداللہ نے نقل کی ہے اور اس کے رجال صحیح کے رجال ہیں ۔

عبداللہ بن فروخ بیان کرتے ہیں : میں سیدنا عثمان رضی اللہ عنہ کو دفن کیے جانے کے وقت موجود تھا ، انہیں ان کے خون آلود کپڑوں میں ہی دفن کیا گیا اور انہیں غسل نہیں دیا گیا ۔
یہ روایت عبداللہ نے نقل کی ہے ۔

قتادہ بیان کرتے ہیں : سیدنا زبیر رضی اللہ عنہ نے سیدنا عثمان غنی رضی اللہ عنہ کی نماز جنازہ پڑھائی تھی اور انہوں نے ہی انہیں دفن کیا تھا کیونکہ سیدنا عثمان رضی اللہ عنہ نے اُن کے بارے میں وصیت کی تھی ۔
یہ روایت امام أحمد نے نقل کی ہے اور اس کے رجال صحیح کے رجال ہیں البتہ قتادہ نامی راوی نے اس واقعہ کا زمانہ نہیں پایا ہے ۔