مجمع الزوائد ومنبع الفوائد

سیدنا عبداللہ بن مسعود رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” جب میرے اصحاب کا ذکر ہو ، تو ( اُن پر تنقید کرنے کے حوالے سے ) رک جاؤ ۔ ۔ ۔ ۔ ۔ ۔ ۔ “ ۔ اس کے بعد راوی نے پوری حدیث ذکر کی ہے ، جو طویل روایت کے طور پر کتاب القدر میں گزر چکی ہے ، اس کی سند میں ایک راوی مسہر بن عبدالملک ہے ، جسے ابن حبان اور دیگر حضرات نے ثقہ قرار دیا ہے ، اس کے بارے میں اختلاف پایا جاتا ہے ، اس کے بقیہ رجال صحیح کے رجال ہیں ۔

سیدنا عبداللہ بن عمر رضی اللہ عنہما نبی اکرم صلی اللہ علیہ وسلم کا یہ فرمان نقل کرتے ہیں : ” جو میرے اصحاب کے حوالے سے میری حفاظت کرے گا ، وہ میرے حوض پر آئے گا ، اور جو شخص میرے اصحاب کے بارے میں ، میری حفاظت نہیں کرے گا ، وہ قیامت کے دن مجھے صرف دور سے دیکھ پائے گا ۔ “
یہ روایت امام طبرانی نے نقل کی ہے اس کی سند میں ایک راوی حبیب ہے ، جو امام مالک کا کاتب ہے اور وہ متروک ہے ۔

طارق بن شہاب بیان کرتے ہیں : ایک مرتبہ سیدنا خالد بن ولید رضی اللہ عنہ اور سیدنا سعد بن ابی وقاص رضی اللہ عنہ کے درمیان تکرار ہو گئی ، سیدنا سعد رضی اللہ عنہ کے سامنے سیدنا خالد رضی اللہ عنہ کا ذکر منفی انداز میں کیا گیا ، تو انہوں نے فرمایا : رک جاؤ ! کیونکہ جو ہمارے درمیان اختلاف ہے وہ ہمارے دین تک نہیں پہنچا ہے ۔
یہ روایت امام طبرانی نے نقل کی ہے اور اس کے رجال صحیح کے رجال ہیں ۔

عروہ بن زبیر بیان کرتے ہیں : سیدنا علی بن ابوطالب رضی اللہ عنہ کی ملاقات بازار میں سیدنا زبیر رضی اللہ عنہ سے ہوئی ، سیدنا عثمان رضی اللہ عنہ کے معاملے میں اُن دونوں نے ایک دوسرے کے ساتھ تکرار کی ، اُس کے بعد سیدنا عبداللہ بن زبیر رضی اللہ عنہما ، سیدنا علی رضی اللہ عنہ کے سامنے سختی سے بولنے لگے ، تو سیدنا علی رضی اللہ عنہ نے سیدنا زبیر رضی اللہ عنہ سے کہا: کیا آپ سن نہیں رہے ہیں ؟ یہ جو مجھ سے کہہ رہا ہے ؟ تو سیدنا زبیر رضی اللہ عنہ نے سیدنا عبداللہ بن زبیر رضی اللہ عنہما کو ضرب لگائی ، یہاں تک کہ وہ گر گئے ۔
یہ روایت امام طبرانی نے نقل کی ہے ، اس کی سند میں ایک راوی عبداللہ بن محمد بن یحیی بن عروہ ہے اور وہ متروک ہے ۔

ابوراشد بیان کرتے ہیں : اہل بصرہ میں سے کچھ افراد عبید بن عمیر کے پاس آئے ، انہوں نے یہ کہا: اہل بصرہ سے تعلق رکھنے والے آپ کے بھائیوں نے ، آپ سے سیدنا علی رضی اللہ عنہ اور سیدنا عثمان غنی رضی اللہ عنہ کے بارے میں دریافت کیا ہے ، انہوں نے فرمایا : کیا تم لوگ صرف اسی مقصد کے لئے آئے ہو ؟ ان لوگوں نے جواب دیا : جی ہاں ! تو انہوں نے یہ آیت تلاوت کی : ” وہ ایک ایسی امت ہے جو گزر چکی ہے ، اس نے جو کمایا تھا اس کا اجر نہیں مل جائے گا ، اور تم جو کماؤ گے اس کا اجر تمہیں ملے گا ، وہ لوگ جو عمل کرتے ہیں ، اس کے بارے میں تم سے حساب نہیں لیا جائے گا ۔ “
یہ روایت امام طبرانی نے نقل کی ہے اور اس کے رجال ثقہ ہیں ۔

سیدنا طارق بن اشیم رضی اللہ عنہ بیان کرتے ہیں : انہوں نے نبی اکرم صلی اللہ علیہ وسلم کو یہ ارشاد فرماتے ہوئے سنا ہے : ” میرے اصحاب کے لئے قتل ہو جانا ہی کافی ہے ۔ “
یہ روایت امام أحمد اور امام طبرانی نے مختلف اسانید کے ساتھ نقل کی ہے اور امام بزار نے نقل کی ہے ، امام أحمد کے رجال صحیح کے رجال ہیں ۔

سیدنا سعید بن زید رضی اللہ عنہ بیان کرتے ہیں : نبی اکرم صلی اللہ علیہ وسلم نے ارشاد فرمایا : ” عنقریب میرے بعد فتنے ہوں گے ، جن میں یہ ہو گا اور وہ ہو گا ، ہم نے عرض کی : اگر ہم نے وہ زمانہ پایا ، تو ہم تو ہلاکت کا شکار ہو جائیں گے ؟ نبی اکرم صلی اللہ علیہ وسلم نے ارشاد فرمایا : میرے اصحاب کے لئے قتل ہو جانا ہی کافی ہے ۔ “

ایک روایت میں یہ الفاظ ہیں : ” لوگ ان فتنوں میں تیزی سے جائیں گے ۔ “
یہ روایت امام طبرانی نے مختلف اسانید کے ساتھ نقل کی ہے ، جن میں سے ایک کے رجال ثقہ ہیں اوریہ روایت امام بزار نے بھی اسی طرح نقل کی ہے ۔

سیدنا زبیر بن عوام رضی اللہ عنہ اللہ تعالیٰ کے اس فرمان کے بارے میں بیان کرتے ہیں : ( ارشاد باری تعالیٰ ہے : ) ” تم اس فتنے سے ڈرو ! جو بطور خاص ان لوگوں کو لاحق ہو گا کہ تم میں سے جنہوں نے ظلم کیا ہو ۔ “ سیدنا زبیر رضی اللہ عنہ فرماتے ہیں : نبی اکرم صلی اللہ علیہ وسلم کے زمانے میں سیدنا ابوبکر رضی اللہ عنہ کے زمانے میں ، سیدنا عمر رضی اللہ عنہ کے زمانے میں اور سیدنا عثمان رضی اللہ عنہ کے زمانے میں ہم اس بارے میں بات چیت کیا کرتے تھے اور ہم یہ نہیں گمان کرتے تھے کہ ہم اس کے متعلقہ لوگ ہوں گے یہاں تک کہ یہ فتنہ ہمارے درمیان نازل ہو گیا ۔
یہ روایت امام بزار نے نقل کی ہے ، اس کی سند میں ایک راوی حجاج بن نصیر ہے ، جس کا ذکر ابن حبان نے کتاب الثقات میں کیا ہے ، وہ کہتے ہیں : یہ غلطی کر جاتا ہے اور وہم کا شکار ہو جاتا ہے ، ایک روایت کے مطابق یحیی بن معین نے اسے ثقہ قرار دیا ہے ، ایک جماعت نے اسے ضعیف کہا: ہے ، اس روایت کے بقیہ رجال صحیح کے رجال ہیں ۔

سیدنا عبدالرحمن بن عوف رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” قیامت اس وقت تک قائم نہیں ہو گی ، جب تک دو بڑے گروہ ایک دوسرے کے ساتھ جنگ نہیں کریں گے ، اور اُن دونوں کا دعویٰ ( یا دعوت ) ایک ہو گا ۔ “
یہ روایت امام بزار نے اپنے استاد عبداللہ بن شبیب سے نقل کی ہے اور وہ انتہائی ضعیف ہے ۔

سیدہ ام حبیبہ رضی اللہ عنہا نبی اکرم صلی اللہ علیہ وسلم کا یہ فرمان نقل کرتی ہیں : ” میں نے یہ چیز دیکھی کہ میری امت ، میرے بعد جس صورت حال کا سامنا کرے گی اور کس طرح وہ ایک دوسرے کا خون بہائیں گے ، اور اس بارے میں اللہ تعالیٰ کی طرف سے جو چیز پہلے سے طے ہو چکی ہے ، جس طرح ان سے پہلے کی امتوں کے بارے میں پہلے سے طے ہوئی تھی ، تو میں نے اللہ تعالیٰ سے یہ دعا کی : وہ قیامت کے دن اُن لوگوں کے بارے میں مجھے شفاعت کا درجہ عطا کرے ، تو اُس نے ایسا کر دیا ۔ “
یہ روایت امام أحمد ، امام طبرانی نے معجم اوسط میں نقل کی ہے اور ان دونوں کے رجال صحیح کے رجال ہیں ، البتہ امام أحمد کی روایت میں یہ بات مذکور ہے کہ ابن ابوحسین بیان کرتے ہیں : سیدنا انس رضی اللہ عنہ نے ہمیں سیدہ ام حبیبہ رضی اللہ عنہا کے حوالے سے یہ روایت بیان کی ہے جبکہ امام طبرانی کی روایت میں یہ ہے کہ یہ زہری کے حوالے سے سیدنا انس رضی اللہ عنہ سے منقول ہے ۔

سیدنا عبداللہ بن یزید خطمی رضی اللہ عنہ روایت کرتے ہیں نبی اکرم صلی اللہ علیہ وسلم نے ارشاد فرمایا : ” میری امت کا عذاب انہیں دنیا میں ہو گا ۔ “
یہ روایت امام طبرانی نے معجم صغیر اور معجم کبیر میں نقل کی ہے اور اس کے رجال ثقہ ہیں ۔

سیدنا ابوہریرہ رضی اللہ عنہ روایت کرتے ہیں نبی اکرم صلی اللہ علیہ وسلم نے ارشاد فرمایا : ” میری امت ، امت مرحومہ ہے ، ان سے عذاب اٹھا لیا گیا ہے ، البتہ ان کا عذاب خود ان کے اپنے ہاتھوں ہو گا ۔ “
یہ روایت امام طبرانی نے معجم اوسط میں نقل کی ہے ، اس کی سند میں ایک راوی سعید بن مسلمہ اموی ہے اور وہ ضعیف ہے ، جسے ابن حبان نے ثقہ قرار دیا ہے ، وہ کہتے ہیں : یہ غلطی کر جاتا ہے ، اس روایت کے بقیہ رجال ثقہ ہیں ۔

سیدنا معقل بن یسار رضی اللہ عنہ کے بارے میں یہ بات منقول ہے : وہ عبیداللہ بن زیاد کی عیادت کرنے کے لئے اُس کے پاس تشریف لائے ، سیدنا معقل رضی اللہ عنہ نے اس سے فرمایا : میں نے نبی اکرم صلی اللہ علیہ وسلم کو یہ ارشاد فرماتے ہوئے سنا ہے : ” اس اُمت کی سزا ، تلوار کے ذریعے ہو گی ، اور ان کے ساتھ وعدے کا وقت قیامت ہے ، اور قیامت بہت سخت اور بہت ہی تلخ ہے ۔ “
یہ روایت امام طبرانی نے نقل کی ہے ، اس کی سند میں ایک راوی عبداللہ بن عیسیٰ خزاز ہے اور وہ ضعیف ہے ۔

سیدنا ابوبردہ رضی اللہ عنہ بیان کرتے ہیں : میں عبیداللہ بن زیاد کے پاس سے نکلا ، میں نے اسے دیکھا کہ وہ شدید ترین سزا دے رہا ہے ، پھر میں ایک صحابی کے پاس آ کر بیٹھا ، تو انہوں نے بتایا : میں نے نبی اکرم صلی اللہ علیہ وسلم کو یہ ارشاد فرماتے ہوئے سنا ہے : ” اس امت کی سزا ، تلوار کے ذریعے ہو گی ۔ “
یہ روایت امام طبرانی نے نقل کی ہے اور اس کے رجال صحیح کے رجال ہیں ۔

ابوبردہ بیان کرتے ہیں : خوارج کے سر لائے گئے ، تو میں نے یہ کہا: یہ جہنم میں جائیں گے ، تو سیدنا عبداللہ بن یزید رضی اللہ عنہ نے فرمایا : تمہیں کیا پتہ ( کہ کیا ہو گا ؟ ) میں نے نبی اکرم صلی اللہ علیہ وسلم کو یہ ارشاد فرماتے ہوئے سنا ہے : ” اللہ تعالیٰ نے اس اُمت کا عذاب ، اُن کی دنیا میں رکھ دیا ہے ۔ “
یہ روایت امام طبرانی نے معجم کبیر میں نقل کی ہے اور معجم صغیر میں اختصار کے ساتھ نقل کی ہے ، اور معجم اوسط میں اسی طرح نقل کی ہے ، معجم کبیر کے رجال صحیح کے رجال ہیں ۔