مجمع الزوائد ومنبع الفوائد

سیدنا ابوامامہ رضی اللہ عنہ بیان کرتے ہیں : نبی اکرم صلی اللہ علیہ وسلم نے عمرو بن طفیل کو خیبر کی طرف بھیجا تاکہ وہ نبی اکرم صلی اللہ علیہ وسلم کے لئے اپنی قوم سے کمک طلب کرے آپ نے فرمایا : اے عمرو ! تم جاؤ ، اور اپنی قوم سے ہمارے لئے کمک طلب کرو ۔ عمرو نے عرض کی : یا رسول اللہ ! آپ مجھے بھیج رہے ہیں ، جبکہ جنگ کا وقت قریب آ چکا ہے ، تو نبی اکرم صلی اللہ علیہ وسلم نے ارشاد فرمایا : کیا تم اس بات سے راضی نہیں ہو کہ تم اللہ کے رسول کے پیغام رساں بن جاؤ ۔
یہ روایت امام طبرانی نے نقل کی ہے ، اس کی سند میں ایک راوی علی بن یزید الہانی ہے اور وہ ضعیف ہے ۔

سیدنا ابوامامہ رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : اس بستی کے لئے تیاری کر لو ، جس کے رہنے والے ظالم ہیں نبی اکرم صلی اللہ علیہ وسلم کی مراد خیبر تھا ، اللہ تعالیٰ نے چاہا ، تو وہ تمہارے لئے اس کو فتح کروا دے گا ، اور میرے ساتھ کوئی ایسا شخص نہ نکلے ، جس کا سواری کا جانور دشوار ہو ( یعنی ق ابومیں نہ آتا ہو ) یا انتہائی کمزور ہو ، سیدنا ابوہریرہ رضی اللہ عنہ اپنی والدہ کے پاس گئے ، اور بولے : مجھے سامان سفر فراہم کریں ، کیونکہ اللہ کے رسول نے جنگ کے لئے تیاری کا ہمیں حکم دے دیا ہے ، اس خاتون نے کہا: تم جا رہے ہو ؟ جبکہ تم جانتے ہو کہ مجھے ہر معاملے میں تمہارے ساتھ کی ضرورت ہوتی ہے ، سیدنا ابوہریرہ رضی اللہ عنہ نے کہا: میں نبی اکرم صلی اللہ علیہ وسلم سے پیچھے نہیں رہ سکتا ، تو اس خاتون نے اپنی چھاتی کی طرف اشارہ کر کے واسطہ دیا کہ انہوں نے اپنا دودھ جو انہیں پلایا ہے ( اس کے واسطے سے وہ رک جائیں ) پھر وہ خاتون نبی اکرم صلی اللہ علیہ وسلم کے پاس چھپ کر آئیں نبی اکرم صلی اللہ علیہ وسلم نے فرمایا : تم چلی جاؤ ! تمہارا معاملہ حل ہو جائے ، پھر سیدنا ابوہریرہ رضی اللہ عنہ آپ کی خدمت میں حاضر ہوئے ، تو نبی اکرم صلی اللہ علیہ وسلم نے ان سے منہ پھیر لیا انہوں نے عرض کی : یا رسول اللہ ! میں دیکھ رہا ہوں کہ آپ نے مجھ سے منہ پھیر لیا ہے ، یہ یقینا کسی ایسی وجہ سے ہوا ہو گا ، جس کے بارے میں آپ کو کوئی اطلاع پہنچی ہو گی ، نبی اکرم صلی اللہ علیہ وسلم نے فرمایا : تم ہی وہ شخص ہو ، جس کی ماں نے اسے اپنے دودھ کا واسطہ دیا تھا ( اور تم نے پھر بھی اس کی بات نہیں مانی ؟ ) کیا تم میں سے کوئی ایک شخص یہ گمان کرتا ہے کہ جب وہ اپنے ماں باپ کے پاس : اُن دونوں میں سے کسی ایک کے پاس ہوتا ہے ، تو وہ اللہ کی راہ میں نہیں ہوتا ؟ بلکہ وہ ( اس وقت ) اللہ کی راہ میں ہوتا ہے جب وہ ان دونوں کے ساتھ اچھا سلوک کرتا ہے اور ان دونوں کا حق ادا کرتا ہے ۔ سیدنا ابوہریرہ رضی اللہ عنہ کہتے ہیں : میں اس کے بعد کئی سال تک رکا رہا ، میں نے کسی جنگ میں حصہ نہیں لیا ، یہاں تک کہ میری والدہ کا انتقال ہو گیا ۔ نبی اکرم صلی اللہ علیہ وسلم مدینہ منورہ سے نکلے ، آپ کے ساتھ بنو عامر سے تعلق رکھنے والا ایک نوجوان بھی روانہ ہوا ، ایک سخت نوجوان اونٹ پر سوار تھا ، وہ راستے میں ایک جگہ چل رہا تھا ، لوگ بھی جا رہے تھے اس کا اونٹ ایک گڑھے میں گر گیا ، نے پکارا : اے آل عامر ! تو وہ اور اس کا اونٹ کپکپا گئے ، پھر اس کی قوم کے افرادا سے اٹھا کر لے کے آئے ، نبی اکرم صلی اللہ علیہ وسلم روانہ ہو گئے ، یہاں تک کہ آپ خیبر آ گئے آپ نے وہاں پڑاؤ کیا ، آپ نے طفیل بن حارث خزاعی کو بلایا اور فرمایا : اپنی قوم کے پاس جاؤ ، اور اس بستی کے بارے میں کمک حاصل کرو ، جس کے رہنے والے ظالم ہیں ، کیونکہ اللہ تعالیٰ نے چاہا ، تو اللہ تعالیٰ اسے عنقریب تمہارے لئے فتح کروا دے گا ، تو سیدنا طفیل رضی اللہ عنہ نے عرض کی : یا رسول اللہ ! آپ مجھے اپنے آپ سے دور کر رہے ہیں ۔ اللہ کی قسم ! جس دن میں آپ کے قریب ہوؤں ، اور اس دن میں مر جاؤں ، یہ میرے نزدیک اس سے زیادہ محبوب ہے کہ میں آپ سے دور ہو کر زندہ رہوں ، تو نبی اکرم صلی اللہ علیہ وسلم نے ارشاد فرمایا : جو چیز ضروری ہے ، تم جاؤ ۔ انہوں نے عرض کی : یا رسول اللہ ! ہو سکتا ہے کہ پھر میری آپ سے ملاقات نہ ہو ، تو مجھے زاد راہ کے طور پر ایسی چیز عطا کر دیں ، جن کے ذریعے میں زندہ رہوں ( یعنی مجھے کوئی نصیحت کر دیں ) ، نبی اکرم صلی اللہ علیہ وسلم نے فرمایا : کیا تم اپنی زبان کے مالک ہو ؟ انہوں نے عرض کی : اگر میں اپنی زبان کا مالک نہیں ہوتا ، تو میں کس چیز کا مالک ہوؤں گا ؟ نبی اکرم صلی اللہ علیہ وسلم نے دریافت کیا : کیا تم اپنے ہاتھ کے مالک ہو ؟ انہوں نے عرض کی : اگر میں اپنے ہاتھ کا مالک نہیں ہوؤں گا ، تو کس چیز کا مالک ہوؤں گا ۔ نبی اکرم صلی اللہ علیہ وسلم نے فرمایا : ” پھر تم اپنی زبان کے ذریعے صرف بھلائی کی بات کہنا ، اور اپنا ہاتھ ، صرف بھلائی کی طرف بڑھانا “ ۔ ابن ابوکریمہ نامی راوی نے یہ بات بیان کی ہے : میں نے ابوعبدالرحیم نامی راوی کی تحریر میں ان کے خط میں
یہ روایت پائی ہے ، جس میں یہ الفاظ ہیں : نبی اکرم صلی اللہ علیہ وسلم نے ارشاد فرمایا : ” تم سلام کو پھیلاؤ ، کھانا خرچ کرو ، اور اللہ تعالیٰ سے یوں حیاء کرو ، جس طرح سے تم اپنے گروہ کے کسی باہیبت شخص سے حیاء کرتے ہو ، اور تمہارا اخلاق اچھا ہونا چاہیئے ، اور جب تم ( کوئی ) برائی کرو ، تو اچھائی بھی کر لو ، کیونکہ اچھائیاں ، برائیوں کو ختم کر دیتی ہیں “ ۔
یہ روایت امام طبرانی نے نقل کی ہے ، اس کی سند میں ایک راوی علی بن یزید ہے اور وہ ضعیف ہے ۔

سیدنا حسیل بن خارجہ اشجعی رضی اللہ عنہ بیان کرتے ہیں : میں کچھ سامان فروخت کرنے کے لئے مدینہ منورہ آیا ، مجھے نبی اکرم صلی اللہ علیہ وسلم کے پاس لایا گیا ، نبی اکرم صلی اللہ علیہ وسلم نے ارشاد فرمایا : میں تمہیں کھجور کے بیس صاع دوں گا ، اس شرط پر کہ تم میرے ساتھیوں کی خیبر کی طرف رہنمائی کرو ، میں نے ایسا ہی کیا ، جب نبی اکرم صلی اللہ علیہ وسلم خیبر آ گئے ، اور آپ نے اسے فتح کر لیا ، تو میں آیا ، تو نبی اکرم صلی اللہ علیہ وسلم نے مجھے بیس صاع عطا کیے ، پھر میں نے اسلام قبول کر لیا ۔
یہ روایت امام طبرانی نے نقل کی ہے ، اس کی سند میں ایک راوی عبدالعزیز بن عمران ہے اور وہ ضعیف ہے ۔

سیدنا نصر بن دہر اسلمی رضی اللہ عنہ بیان کرتے ہیں : انہوں نے ، خیبر کی طرف روانگی کے وقت ، نبی اکرم صلی اللہ علیہ وسلم کو سیدنا عامر بن اکوع رضی اللہ عنہ سے یہ کہتے ہوئے سنا ، جو سیدنا سلمہ بن عمرو بن اکوع رضی اللہ عنہ کے چچا ہیں ، اکوع کا نام سنان تھا ( نبی اکرم صلی اللہ علیہ وسلم نے فرمایا : ) ” اے ابن اکوع ! تم نیچے اترو اور اپنے نغموں میں سے ہمیں حدی سناؤ “ ۔ راوی کہتے ہیں : وہ نیچے اترے اور انہوں نے نبی اکرم صلی اللہ علیہ وسلم کے لئے یہ رجز پڑھنا شروع کیا : ” اللہ کی قسم اگر اللہ تعالیٰ کی ذات نہ ہوتی تو ہم نے ہدایت حاصل نہیں کرنی تھی ، ہم نے نہ تو صدقہ کرنا تھا اور نہ ہم نے نماز پڑھنی تھی ، ہماری یہ صورتحال ہے کہ دشمن ہمارے خلاف سرکشی پر آمادہ ہے وہ آزمائش ( یعنی جنگ ) کا ارادہ رکھتا ہے اور ہم یہ نہیں چاہتے ( اے ہمارے پروردگار ! ) تو ہم پر سکینت نازل کرنا ، اور ہمیں ثابت قدم رکھنا ، اگر ہم ( میدان جنگ میں ) دشمن کا سامنا کریں “ ۔
یہ روایت امام أحمد اور امام طبرانی نے نقل کی ہے ، انہوں نے یہ الفاظ زائد نقل کیے ہیں ، نبی اکرم صلی اللہ علیہ وسلم نے ارشاد فرمایا : ” اللہ تعالیٰ تم پر رحم کرے ! “ ۔ سیدنا عمر رضی اللہ عنہ نے عرض کی : یا رسول اللہ ! اللہ کی قسم ! اس شخص کے لئے ( موت یا شہادت ) واجب ہو گئی ہے ، اگر آپ ہمیں اس کا نفع حاصل کرنے دیتے ( یعنی اسے زندگی کی دعا دیتے ، تو اچھا تھا ) تو وہ صاحب غزوہ خیبر کے موقع پر شہید ہوئے تھے ۔ ان دونوں روایات کے رجال ثقہ ہیں ۔

سیدنا ابوطلحہ رضی اللہ عنہ بیان کرتے ہیں : نبی اکرم صلی اللہ علیہ وسلم صبح کے وقت خیر پہنچے ، وہ لوگ اپنی کدالیں اور پھاؤڑے لے کر اپنے کھیتوں اور زمینوں کی طرف جا رہے تھے ، جب انہوں نے نبی اکرم صلی اللہ علیہ وسلم کو دیکھا کہ آپ کے ساتھ لشکر موجود ہے ، تو وہ الٹے قدموں واپس چلے گئے نبی اکرم صلی اللہ علیہ وسلم نے ارشاد فرمایا : اللہ اکبر ! اللہ اکبر ! خیبر برباد ہو گیا ، جب ہم کسی قوم کے میدان میں اترتے ہیں ، تو ان لوگوں کی صبح بری ہوتی ہے ، جنہیں ڈرایا گیا ہو “ ۔
یہ روایت امام أحمد اور امام طبرانی نے مختلف اسانید کے ساتھ نقل کی ہے ، امام أحمد کے رجال صحیح کے رجال ہیں ۔

سیدنا ابوطلحہ رضی اللہ عنہ بیان کرتے ہیں : میں نبی اکرم صلی اللہ علیہ وسلم کے ساتھ سواری پر پیچھے موجود تھا ، اگر میں یہ کہوں کہ میرا گھٹنا آپ کے گھٹنے سے مس ہو رہا تھا ( تو یہ کہہ سکتا ہوں ) نبی اکرم صلی اللہ علیہ وسلم خاموش رہے ، یہاں تک کہ جب سحری کا وقت ہوا اور مال مویشی والے مال مویشی کی طرف گئے ، اور کھیتی باڑی کرنے والے کھیتی کی طرف گئے ، تو نبی اکرم صلی اللہ علیہ وسلم نے ان لوگوں پر حملہ کر دیا ، اور آپ نے یہ فرمایا : جب ہم کسی قوم کے میدان میں اترتے ہیں ، تو اُن لوگوں کی صبح بری ہوتی ہے ، جنہیں ڈرایا گیا ہو ۔
یہ روایت امام طبرانی نے نقل کی ہے ، اور اس کے رجال صحیح کے رجال ہیں ۔

سیدنا عبداللہ بن ابواوفی رضی اللہ عنہ بیان کرتے ہیں : نبی اکرم صلی اللہ علیہ وسلم نے خیبر پر حملہ کیا ، وہ لوگ اس وقت غفلت کا شکار تھے ، ان لوگوں نے کہا: محمد ( صلی اللہ علیہ وسلم ) آ گئے ، اور ساتھ لشکر بھی ہے ۔ نبی اکرم صلی اللہ علیہ وسلم نے فرمایا : اللہ اکبر ! خیبر برباد ہو گیا ، جب ہم کسی قوم کے میدان میں اترتے ہیں ، تو اُن لوگوں کی صبح بری ہوتی ہے ، جنہیں ڈرایا گیا ہو ۔
یہ روایت امام طبرانی نے معجم صغیر اور معجم اوسط میں نقل کی ہے ، اس کی سند میں ایک راوی عبداللہ بن محمد بن مغیرہ ہے ، اور وہ ضعیف ہے ۔

سیدنا ابوالیسر کعب بن عمرو رضی اللہ عنہ بیان کرتے ہیں : اللہ کی قسم خیبر میں شام کے وقت میں نبی اکرم صلی اللہ علیہ وسلم کے ساتھ موجود تھا جب یہودیوں کا ایک شخص بکریاں لے کے آیا وہ قلعے میں جانا چاہ رہا تھا ہم نے ان لوگوں کا محاصرہ کیا ہوا تھا نبی اکرم صلی اللہ علیہ وسلم نے ارشاد فرمایا : کون شخص ہمیں ان بکریوں میں سے خوراک فراہم کرے گا سیدنا ابوالیسر رضی اللہ عنہ کہتے ہیں میں نے عرض کی : یا رسول اللہ میں نبی اکرم صلی اللہ علیہ وسلم نے فرمایا : تم ایسا کرو ۔ راوی کہتے ہیں : میں نکلا اور شتر مرغ کی طرح تیزی سے چلتا ہوا گیا جب نبی اکرم صلی اللہ علیہ وسلم نے مجھے واپس آتے ہوئے دیکھا تو فرمایا : اے اللہ تو ہمیں اس کے ذریعے نفع دینا راوی کہتے ہیں : میں بکریوں تک پیچ گیا جن کا ابتدائی حصہ قلعہ میں داخل ہو چکا تھا میں نے اس کے آخری حصے میں سے دو بکریاں پکڑیں اور انہیں اپنی بغلوں میں اٹھا لیا پھر ان دونوں کو لے کر دوڑتا ہوا یوں آیا جیسے میرے پاس کوئی چیز ہی نہیں تھی ، یہاں تک کہ وہ دونوں بکریاں میں نے نبی اکرم صلی اللہ علیہ وسلم کے سامنے پیش کر دیں ان لوگوں نے انہیں ذبح کیا اور ان دونوں کا گوشت کھایا راوی بیان کرتے ہیں : سیدنا ابوالیسر رضی اللہ عنہ نبی اکرم صلی اللہ علیہ وسلم کے اصحاب میں سے آخر میں وصال کرنے والے فرد ہیں جب وہ یہ حدیث بیان کرتے تھے ، تو رو پڑتے تھے پھر یہ فرماتے تھے تم لوگ مجھ سے نفع حاصل کر لو مجھے اپنی زندگی کی قسم ہے میں ان میں سے آخری فرد ہوں ۔
یہ روایت امام أحمد نے بنو سلمہ سے تعلق رکھنے والے بعض افراد کے حوالے سے نقل کی ہے ۔ اس روایت کے بقیہ رجال ثقہ ہیں ۔

سیدنا سلمہ بن اکوع رضی اللہ عنہ بیان کرتے ہیں : ان کے چچا نے مشرکین سے تعلق رکھنے والے ایک شخص پر ضرب لگا کر اسے قتل کیا اور اس کی وجہ سے وہ خود بھی زخمی ہو گئے ، تو انہوں نے یہ کہنا شروع کیا : یہ تو میں نے خودکشی کر لی نبی اکرم صلی اللہ علیہ وسلم کو اس بات کی اطلاع ملی تو آپ نے فرمایا : اسے دگنا اجر ملے گا ۔
یہ روایت امام طبرانی نے معجم اوسط میں نقل کی ہے ۔ اس کی سند میں ایسے راوی ہیں ، جن سے میں واقف نہیں ہوں ۔

سیدنا جابر بن عبداللہ انصاری رضی اللہ عنہما بیان کرتے ہیں : مرحب یہودی ان کے قلعوں میں سے نکلا اس نے اپنے ہتھیار اکٹھے کیے ہوئے تھے اور یہ رجز پڑھ رہا تھا : ” خیبر یہ بات جانتا ہے کہ میں مرحب ہوں ، مکمل استعداد رکھنے والا تجربہ کار بہادر ہوں ، کبھی ( نیزے یا تلوار کو ) چبھوتا ہوں اور کبھی ضرب لگاتا ہوں ، جب شیر آتے ہیں تو وہ ( حملہ کرنے کے لیے ) بیقرار ہوتے ہیں ، اور وہ تجربہ کار شخص کی بہادری سے رک جاتے ہیں ، گویا میری چراگاہ وہ چراگاہ ہے جس کے قریب نہیں جایا جا سکتا ہے “ ۔ وہ یہ کہہ رہا تھا کون مقابلہ کرے گا نبی اکرم صلی اللہ علیہ وسلم نے فرمایا : کون مقابلہ کرے گا ؟ تو سیدنا محمد بن مسلمہ رضی اللہ عنہ نے عرض کی : یا رسول اللہ ! میں اس کا مقابلہ کروں گا ، جس کے ساتھ زیادتی ہوئی ہے ، اور جو بکھرے ہوئے بالوں کا مالک ہے ، اس نے کل میرے بھائی کو قتل کیا تھا نبی اکرم صلی اللہ علیہ وسلم نے فرمایا : تم اٹھ کر اس کی طرف جاؤ اے اللہ اس کے خلاف تو اس کی مدد کر جب ان دونوں میں سے ایک دوسرے کے قریب آیا تو ان دونوں کے درمیان ایک درخت آ گیا اور اس درخت میں گوند تھی ان دونوں میں سے ایک دوسرے کے مقابلے میں اس درخت کے ذریعے بچنے لگا جب بھی وہ اس میں سے بچ جاتا تھا تو دوسرے کی تلوار کا وار خالی جاتا تھا ، یہاں تک کہ ان دونوں میں سے ہر ایک دوسرے فریق کے سامنے آ گیا اور وہ ان دونوں کے درمیان کھڑے ہوئے شخص کی مانند ہو گیا اس میں کوئی ٹہنی نہیں تھی پھر مرحب نے سیدنا محمد بن مسلمہ رضی اللہ عنہ پر حملہ کر کے انہیں ضرب لگائی سیدنا محمد بن مسلمہ رضی اللہ عنہ نے ڈھال کے ذریعے اس کا بچاؤ کیا اس کی تلوار ان کی ڈھال پر لگی اور انہوں نے اس کے ذریعے وار کو روک لیا پھر سیدنا محمد بن مسلمہ رضی اللہ عنہ نے اس پر ضرب لگائی اور اسے قتل کر دیا ۔
یہ روایت امام أحمد اور امام ابویعلیٰ نے نقل کی ہے ۔ امام أحمد کے رجال ثقہ ہیں ۔

سیدنا بریدہ اسلمی رضی اللہ عنہ بیان کرتے ہیں : جب نبی اکرم صلی اللہ علیہ وسلم نے خیبر کے پاس علاقے میں پڑاؤ کیا ، تو نبی اکرم صلی اللہ علیہ وسلم نے جھنڈا سیدنا عمر بن خطاب رضی اللہ عنہ کو دیا ان کے ساتھ کچھ مسلمان بھی گئے ان کا اہل خیبر کے ساتھ مقابلہ بھی ہوا لیکن وہ لوگ واپس آ گئے پھر نبی اکرم صلی اللہ علیہ وسلم نے ارشاد فرمایا : کل میں جھنڈا ایسے شخص کو دوں گا ، جو اللہ اور اس کے رسول سے محبت رکھتا ہے ، اور اللہ اور اس کا رسول بھی اس سے محبت رکھتے ہیں اگلے دن نبی اکرم صلی اللہ علیہ وسلم نے سیدنا علی رضی اللہ عنہ کو بلوایا ان کو آشوب چشم کی شکایت تھی نبی اکرم صلی اللہ علیہ وسلم نے ان کی آنکھوں پر لعاب دہن ڈالا اور انہیں جھنڈا عطا کیا آپ نے ان کے ساتھ لوگوں کو بھیجا ان لوگوں کا اہل خیبر سے سامنا ہوا ان لوگوں کے درمیان مرحب یہ رجز پڑھ رہا تھا ، اور یہ کہہ رہا تھا : ” خیبر یہ بات جانتا ہے کہ میں مرحب ہوں ، مکمل استعداد رکھنے والا تجربہ کار بہادر ہوں ، کبھی ( نیزے یا تلوار کو ) چبھوتا ہوں اور کبھی ضرب لگاتا ہوں ، جب شیر آتے ہیں تو وہ ( حملہ کرنے کے لیے ) بیقرار ہوتے ہیں “ ۔ راوی کہتے ہیں : ان دونوں کا مقابلہ ہوا ۔ سیدنا علی رضی اللہ عنہ اس نے اس کے سر پر وار کیا ، یہاں تک کہ اس کی تلوار ان کو کاٹتی ہوئی اس کے دانتوں تک پہنچ گئی سیدنا علی رضی اللہ عنہ کی ضرب کی آواز کو اہل لشکر نے بھی سنا اور پھر ابھی سیدنا علی رضی اللہ عنہ کے ساتھ جانے والے آخری فرد بھی نہیں پہنچے تھے کہ ان کے لئے شہر فتح ہو گیا ۔
یہ روایت امام أحمد اور امام بزار نے نقل کی ہے ۔ اس کی سند میں ایک راوی میمون ابوعبداللہ ہے ۔ جسے ابن حبان نے ثقہ قرار دیا ہے ، اور ایک جماعت نے اسے ضعیف کہا: ہے ۔ اس روایت کے بقیہ رجال ثقہ ہیں ۔

سیدنا بریدہ رضی اللہ عنہ بیان کرتے ہیں : ہم نے خیبر کا محاصرہ کر لیا سیدنا ابوبکر رضی اللہ عنہ نے جھنڈا لیا پھر وہ واپس آ گئے شہر فتح نہیں ہوا اگلے دن سیدنا عمر رضی اللہ عنہ نے جھنڈا لیا وہ گئے ، اور واپس آ گئے ان کے لئے بھی شہر فتح نہیں ہوا اس دن لوگوں کو مشقت اور پریشانی کا سامنا کرنا پڑا نبی اکرم صلی اللہ علیہ وسلم نے ارشاد فرمایا : کل میں جھنڈا ایسے شخص کو دوں گا جس سے اللہ اور اس کا رسول محبت کرتے ہیں ، اور وہ اللہ اور اس کے رسول سے محبت کرتا ہے ، اور وہ فتح حاصل کیے بغیر نہیں آئے گا ۔ راوی کہتے ہیں : ہم نے وہ رات اس خواہش میں گزار دی کہ کل فتح نصیب ہو جائے گی اگلے دن صبح نبی اکرم صلی اللہ علیہ وسلم نے صبح کی نماز ادا کی پھر آپ کھڑے ہوئے آپ نے جھنڈا منگوایا لوگ صفوں میں موجود تھے آپ نے سیدنا علی رضی اللہ عنہ کو بلوایا انہیں آشوب چشم کی شکایت تھی نبی اکرم صلی اللہ علیہ وسلم نے ان کی آنکھوں پر لعاب دہن ڈالا اور انہیں جھنڈا عطا کیا ، تو ان کے لئے شہر فتح ہو گیا ۔

سیدنا ابوسعید خدری رضی اللہ عنہ بیان کرتے ہیں : نبی اکرم صلی اللہ علیہ وسلم نے جھنڈا پکڑ کر اسے ہلایا پھر آپ نے ارشاد فرمایا : کون اسے اس کے حق کے ہمراہ اسے لے گا ، تو فلاں صاحب آئے ، اور بولے : میں نبی اکرم صلی اللہ علیہ وسلم نے فرمایا : تم رہنے دو پھر ایک اور صاحب آئے ، تو نبی اکرم صلی اللہ علیہ وسلم نے فرمایا : تم رہنے دو پھر نبی اکرم صلی اللہ علیہ وسلم نے ارشاد فرمایا : اس ذات کی قسم ! جس نے نبی اکرم صلی اللہ علیہ وسلم کے چہرے کو عزت عطا کی ہے میں یہ جھنڈا اس شخص کو دوں گا ، جو فرار نہیں ہو گا اے علی تم آگے آؤ سیدنا علی رضی اللہ عنہ تشریف لے گئے ، یہاں تک کہ اللہ تعالیٰ نے ان کے لئے خیبر اور فدک کو فتح کروا دیا ، اور وہ ان دونوں علاقوں کی عجوہ اور قدید کھجوریں لے کے آئے ۔
یہ روایت امام أحمد نے نقل کی ہے ، اور اس کے رجال ثقہ ہیں ۔

سیدنا علی رضی اللہ عنہ بیان کرتے ہیں : ہم لوگ خیبر آئے جب نبی اکرم صلی اللہ علیہ وسلم وہاں تشریف لائے ، تو آپ نے سیدنا عمر رضی اللہ عنہ کو بھیجا اور ان کے ساتھ کچھ لوگوں کو بھیجا لیکن تھوڑی دیر گزرنے کے بعد سیدنا عمر رضی اللہ عنہ اور ان کے ساتھیوں کو پسپا ہونا پڑا پھر نبی اکرم صلی اللہ علیہ وسلم نے ارشاد فرمایا : میں ان لوگوں کی طرف ایسے شخص کو بھیجوں گا ، جو اللہ اور اس کے رسول کے ساتھ محبت رکھتا ہو گا اور اللہ اور اس کا رسول اس سے محبت رکھتے ہوں گے وہ ان لوگوں کے ساتھ جنگ کرے گا ، یہاں تک کہ اللہ تعالیٰ اس شخص کو فتح نصیب کر دے گا ۔ راوی کہتے ہیں : تو لوگ اس بات کے آرزو مند رہے ، اور اپنی گردنیں اٹھا کے دیکھتے رہے کچھ دیر گزرنے کے بعد نبی اکرم صلی اللہ علیہ وسلم نے دریافت کیا : علی کہاں ہے لوگوں نے عرض کی : انہیں آشوب چشم کی شکایت ہے ۔ نبی اکرم صلی اللہ علیہ وسلم نے فرمایا : اسے میرے پاس بلا کے لاؤ جب میں نبی اکرم صلی اللہ علیہ وسلم کی خدمت میں حاضر ہوا تو آپ نے میری دونوں آنکھیں کھولیں اور ان میں لعاب دہن ڈالا پھر آپ نے مجھے جھنڈا عطا کیا میں روانہ ہوا اور ان لوگوں کے پاس آیا وہاں مرحب رجز پڑھتا ہوا آیا ، یہاں تک کہ جب ہم دونوں کا مقابلہ ہوا تو اللہ تعالیٰ نے اسے پسپا کر دیا ، اور اس کے ساتھی بھی پسپا ہو گئے ، اور قلعہ بند ہو گئے انہوں نے دروازہ بند کر لیا ہم دروازے کے پاس آئے ، اور مسلسل اسے کھلوانے کی کوشش کرتے رہے ، یہاں تک کہ اللہ تعالی نے وہ ( شہر یا قلعہ ) فتح کروا دیا ۔
یہ روایت امام بزار نے نقل کی ہے ۔ اس کی سند میں ایک راوی نعیم بن حکیم ہے ۔ جسے ابن حبان اور دیگر حضرات نے ثقہ قرار دیا ہے ، اور اس میں کمزور ہونا پایا جاتا ہے ۔

سیدنا جابر بن عبداللہ رضی اللہ عنہما بیان کرتے ہیں : جب غزوہ خیبر کا موقع آیا تو نبی اکرم صلی اللہ علیہ وسلم نے ایک شخص کو بھیجا وہ بزدلی کا شکار ہو گیا پھر سیدنا محمد بن مسلمہ رضی اللہ عنہ آئے انہوں نے عرض کی : یا رسول اللہ ! میں نے آج کے دن جیسا دن نہیں دیکھا محمود بن مسلمہ قتل ہو گئے ہیں نبی اکرم صلی اللہ علیہ وسلم نے ارشاد فرمایا : تم دشمن کا سامنے کرنے کی آرزو نہ کرو تم اللہ تعالیٰ سے عافیت مانگو کیونکہ تم یہ بات نہیں جانتے ہو کہ اس کے حوالے سے تمہیں کسی چیز میں مبتلا کیا جاتا ہے ، اور جب تم دشمن کا سامنا کرو تو یہ کہو اے اللہ تو ہمارا اور ان کا پروردگار ہے ہماری پیشانیاں اور ان کی پیشانیاں تیرے ہاتھ میں ہیں ان کے ساتھ تو ہی لڑنے ( کی ہمت دیتا ہے ) پھر تم لوگ زمین پر بیٹھ جاؤ اگر دشمن تمہارے پاس آ جائے ، تو تکبیر کہہ کر اٹھ کھڑے ہو ۔ پھر نبی اکرم صلی اللہ علیہ وسلم نے ارشاد فرمایا : کل میں ایسے شخص کو بھیجوں گا ، جو اللہ اور اس کے رسول سے محبت رکھتا ہے ، اور وہ دونوں اس سے محبت رکھتے ہیں وہ پیٹھ نہیں پھیرے گا جب اگلا دن آیا تو نبی اکرم صلی اللہ علیہ وسلم نے سیدنا علی رضی اللہ عنہ کو بلوایا ان کو آشوب چشم کی شدید شکایت تھی نبی اکرم صلی اللہ علیہ وسلم نے فرمایا : روانہ ہو جاؤ انہوں نے عرض کی : یا رسول اللہ ! میں تو اپنے قدموں کی جگہ بھی نہیں دیکھ سکتا ہوں راوی کہتے ہیں : تو نبی اکرم صلی اللہ علیہ وسلم نے ان کی آنکھوں میں لعاب دہن ڈالا ان کے لئے جھنڈا باندھا اور جھنڈا ان کو دیا سیدنا علی رضی اللہ عنہ نے عرض کی : یا رسول اللہ ! میں کس بنیاد پر ان لوگوں کے ساتھ لڑائی کروں نبی اکرم صلی اللہ علیہ وسلم نے ارشاد فرمایا : اس بات پر کہ وہ اس بات کی گواہی دیں کہ اللہ کے علاوہ اور کوئی معبود نہیں ہے ، اور میں اللہ کا رسول ہوں جب وہ ایسا کر لیں گے ، تو وہ اپنی جانوں اور اپنے اموال کو محفوظ کر لیں گے ، البتہ ان کے حق کا معاملہ مختلف ہے ، اور ان لوگوں کا حساب اللہ تعالیٰ کے ذمہ ہو گا ۔
یہ روایت امام طبرانی نے معجم صغیر میں نقل کی ہے ۔ اس کی سند میں ایک راوی خلیل بن مرہ ہے ابوزرعہ کہتے ہیں یہ ایک نیک بزرگ ہے ایک جماعت نے اسے ضعیف قرار دیا ہے ۔ ( علامہ ہیثمی فرماتے ہیں : ) میں یہ کہتا ہوں اس بارے میں دیگر احادیث سیدنا علی رضی اللہ عنہ کے مناقب سے متعلق باب میں آگے آئیں گی ۔

سیدنا علی رضی اللہ عنہ بیان کرتے ہیں : جب میں نے مرحب کو قتل کر دیا ، تو میں اس کا سر لے کر نبی اکرم صلی اللہ علیہ وسلم کے پاس آیا ۔
یہ روایت امام أحمد نے نقل کی ہے ۔ اس کی سند میں ایک راوی ابن قابوس ہے میں اس سے واقف نہیں ہوں اس روایت کے بقیہ رجال کی توثیق کی گئی ہے ویسے ان میں ضعف پایا جاتا ہے ۔

نبی اکرم صلی اللہ علیہ وسلم کے غلام سیدنا ابورافع رضی اللہ عنہ بیان کرتے ہیں : ہم لوگ سیدنا علی رضی اللہ عنہ کے ساتھ نکلے جب نبی اکرم نے انہیں جھنڈے کے ہمراہ روانہ کیا تھا جب سیدنا علی رضی اللہ عنہ قلعہ کے قریب پہنچے تو قلعہ کے لوگ نکل کر ان کی طرف آئے سیدنا علی رضی اللہ عنہ نے ان لوگوں کے ساتھ جنگ کی یہود سے تعلق رکھنے والے ایک شخص نے ان پر ضرب لگائی ، تو ان کے ہاتھ سے ڈھال چھوٹ گئی سیدنا علی رضی اللہ عنہ نے دروازے کے پاس موجود دروازے کو پکڑا اور اسے اپنی ذات کے لئے ڈھال بنا لیا وہ دروازہ مسلسل ان کے ہاتھ میں رہا اور وہ جنگ کرتے رہے ، یہاں تک کہ اللہ تعالیٰ نے انہیں فتح نصیب کر دی پھر انہوں نے اس دروازے کو اپنے ہاتھ سے رکھ دیا جب وہ لڑائی سے فارغ ہو گئے تھے بعد میں میں نے سات افراد کے ساتھ مل کر جن میں آٹھواں میں تھا ہم نے پوری کوشش کی کہ ہم اس دروازے کو ہلا سکیں تو ہم اسے ہلا نہیں سکے ۔
یہ روایت امام أحمد نے نقل کی ہے ، اور اس کی سند میں ایک راوی ایسا ہے ، جس کا نام بیان نہیں کیا گیا ہے ۔

سیدہ ام سلمہ رضی اللہ عنہا جو غزوہ خیبر میں موجود تھیں وہ بیان کرتی ہیں میں نے مرحب کے دانتوں میں تلوار لگنے کی آواز سنی ۔
یہ روایت امام طبرانی نے نقل کی ہے ، اور اس کے رجال ثقہ ہیں ۔

سیدنا عبداللہ بن عباس رضی اللہ عنہا بیان کرتے ہیں : نبی اکرم صلی اللہ علیہ وسلم نے اہل خیبر کے ساتھ اس بات پر صلح کی تھی کہ ہر زرد اور سفید چیز ( یعنی سونا اور چاندی ) اور ہر چیز ( مسلمانوں کو ملے گی ) البتہ ان کی اپنی جانیں اور ان کے بال بچے نہیں ملیں گے راوی کہتے ہیں پھر ربیع اور کنانہ بن ابوالحقیق کیک کو لایا گیا ان دونوں میں سے ایک سیدہ صفیہ بنت حیی رضی اللہ عنہا کا شوہر تھا جب ان دونوں کو لایا گیا تو نبی اکرم صلی اللہ علیہ وسلم نے دریافت کیا : تم دونوں کا وہ برتن کہاں ہے ، جو مدینہ منورہ میں مستعار لیا جاتا تھا تو اس نے کہا: آپ نے ہمیں نکلوا دیا تھا ، اور جلا وطن کر دیا تھا تو ہم نے اس دوران وہ رقم خرچ کر لی ہے ۔ نبی اکرم صلی اللہ علیہ وسلم نے فرمایا : تم دونوں اس بات کا جائزہ لو کہ تم دونوں کیا کہہ رہے ہو کیونکہ اگر تم دونوں نے مجھ سے کوئی بات چھپائی ، تو میں اس وجہ سے تم دونوں کے خون اور تمہاری ذریت کو حلال قرار دے دوں گا ۔ راوی کہتے ہیں : پھر نبی اکرم صلی اللہ علیہ وسلم نے ایک انصاری شخص کو بلایا اور فرمایا : فلاں فلاں جگہ کے پاس جاؤ اور فلاں درخت کا جائزہ لینا اس کے سرے میں ایک کپڑا ہو گا تم اسے نکال لینا اور پھر اس برتن کو نکال کے اسے لے آنا وہ شخص گیا اور اسے لے آیا پھر نبی اکرم صلی اللہ علیہ وسلم نے ان دونوں کو آگے کر کے ان کی گردنیں اڑوا دیں آپ نے ان دونوں کے گھر والوں کو بلوایا سیدہ صفیہ بنت حیی رضی اللہ عنہا کو لایا گیا جو نئی نویلی دلہن تھیں نبی اکرم صلی اللہ علیہ وسلم نے سیدنا بلال رضی اللہ عنہ کو حکم دیا وہ انہیں ساتھ لے کر نبی اکرم صلی اللہ علیہ وسلم کی رہائشی جگہ کی طرف چلے گئے جب سیدنا بلال رضی اللہ عنہ انہیں لے کے جا رہے تھے ، تو اس خاتون کے شوہر اور بھائی کی میت کے پاس سے گزرے جو دونوں قتل ہو چکے تھے جب وہ نبی اکرم صلی اللہ علیہ وسلم کے پاس واپس آئے ، تو نبی اکرم صلی اللہ علیہ وسلم نے فرمایا : سبحان اللہ اے بلال تم نے ایک لڑکی کے بارے میں کیا ارادہ کیا تھا تم اسے دو مقتولوں کے پاس سے لے کے گزرے تھے تاکہ وہ دونوں اس کو دکھاؤ کیا تمہارے اندر رحمت نہیں ہے ۔ سیدنا بلال رضی اللہ عنہ نے کہا: میں نے یہ ارادہ کیا تھا کہ اس کے من کو جلا دوں راوی کہتے ہیں : پھر نبی اکرم صلی اللہ علیہ وسلم گھر تشریف لائے آپ نے اس خاتون کے ساتھ رات گزاری اس دوران سیدنا ابوایوب رضی اللہ عنہ تلوار لے کے آئے ، اور خیمے کے کنارے کے پاس بیٹھ گئے انہوں نے کہا: اگر مجھے کوئی پریشان کن بات سنائی دی اور مجھے اس حوالے سے کوئی الجھن ہوئی ، تو میں نبی اکرم صلی اللہ علیہ وسلم کے قریب رہوں گا نبی اکرم صلی اللہ علیہ وسلم نکل کر سیدنا بلال رضی اللہ عنہ کی اقامت گاہ کی طرف آئے ، اور فرمایا : کون ہے ، تو انہوں نے بتایا : میں ابوایوب ہوں نبی اکرم صلی اللہ علیہ وسلم نے فرمایا : تم اس وقت یہاں کیا کر رہے ہو انہوں نے عرض کی : یا رسول اللہ ! آپ نے ایک کمسن لڑکی کے ساتھ شادی کی ہے ، جس کے شوہر اور بھائی کو آپ قتل کروا چکے ہیں ، تو مجھے آپ کے حوالے سے خدشہ تھا تو میں نے یہ سوچا کہ میں اللہ کے رسول کے قریب رہوں گا نبی اکرم صلی اللہ علیہ وسلم نے تین مرتبہ یہ ارشاد فرمایا : اے ابوایوب اللہ تعالیٰ تم پر رحم کرے اس خاتون کے بارے میں لوگوں کی مختلف آراء ہو گئیں بعض کا یہ کہنا تھا کہ نبی اکرم صلی اللہ علیہ وسلم نے اس خاتون کو کنیز بنایا ہے ، اور بعض کا یہ کہنا تھا کہ یہ نبی اکرم صلی اللہ علیہ وسلم کی زوجہ محترمہ ہیں جب روانگی کا وقت ہوا تو لوگوں نے کہا: تم لوگ نبی اکرم صلی اللہ علیہ وسلم کا جائزہ لو اگر نبی اکرم صلی اللہ علیہ وسلم نے اس خاتون کو پردہ کروایا تو وہ آپ کی زوجہ شمار ہوں گی اور اگر نبی اکرم صلی اللہ علیہ وسلم نے انہیں پردہ نہ کروایا تو وہ آپ کی کنیز شمار ہوں گی جب نبی اکرم صلی اللہ علیہ وسلم ان کو روانہ کروانے لگے ، تو آپ نے ان کا پردہ کروایا آپ نے ان کے لئے اپنا پاؤں رکھا ، یہاں تک کہ انہوں نے اپنا گھٹنا نبی اکرم صلی اللہ علیہ وسلم کے زانوں پے رکھا اور پھر سوار ہوئیں ۔ اس سے پہلے نبی اکرم صلی اللہ علیہ وسلم نے اس خاتون کو یہ پیشکش کی تھی کہ یا تو آپ اسے اپنی کنیز بنا لیتے ہیں یا اسے آزاد کر کے اس کے ساتھ نکاح کر لیتے ہیں ، تو اس خاتون نے جواب دیا جی نہیں بلکہ آپ نے آزاد کر کے میرے ساتھ نکاح کریں تو نبی اکرم صلی اللہ علیہ وسلم نے ایسا ہی کیا ۔
یہ روایت امام طبرانی نے نقل کی ہے ۔ اس کی سند میں ایک راوی محمد بن ابولیلی ہے ، اور وہ خراب حافظے کا مالک ہے ۔ اس روایت کے بقیہ رجال ثقہ ہیں ۔

عروہ بیان کرتے ہیں : جب اللہ تعالیٰ نے رسول اللہ کے لئے خیبر کو فتح کروا دیا ، اور ان میں سے کچھ لوگ قتل ہو گئے ، تو زینب بنت حارث نامی ایک یہودی عورت نے جو مرحب کی بھتیجی تھی ایک بکری بھونی اور اس میں زہر ملا دیا اس نے کندھے اور دستی کے گوشت میں زیادہ زہر ملایا کیونکہ اسے یہ بات بتائی گئی تھی کہ نبی اکرم صلی اللہ علیہ وسلم بکری کے اعضا میں سے انہیں زیادہ پسند کرتے ہیں جب نبی اکرم صلی اللہ علیہ وسلم اندر تشریف لائے ، تو آپ کے ساتھ سیدنا بشر بن براء بن معرور رضی اللہ عنہ تھے جن کا تعلق بنو سلمہ سے تھا اس خاتون نے نبی اکرم صلی اللہ علیہ وسلم کے سامنے وہ بکری پیش کی نبی اکرم صلی اللہ علیہ وسلم نے کندھے اور دستی کے گوشت کو پکڑا اور اس میں سے نوچ کے کھانے لگے ۔ سیدنا بشر رضی اللہ عنہ نے اس میں ایک اور ہڈی کو پکڑا اور اس میں سے نوچا جب نبی اکرم صلی اللہ علیہ وسلم نے اپنے منہ میں موجود چیز کو باہر نکال دیا ، تو سیدنا بشر رضی اللہ عنہ نے بھی اپنے منہ میں موجود چیز کو باہر نکال دیا نبی اکرم صلی اللہ علیہ وسلم نے ارشاد فرمایا : تم لوگ اپنے ہاتھ اٹھا لو کیونکہ اس بکری نے مجھے یہ بتایا ہے کہ اس میں زیادتی کی گئی ہے ۔ سیدنا بشر رضی اللہ عنہ نے عرض کی : اس ذات کی قسم ! جس نے آپ کو عزت عطا کی ہے میں نے جو لقمہ لیا تھا اس میں ہی مجھے یہ چیز محسوس ہو گئی تھی لیکن میں نے اس کو اس لئے نہیں تھوکا کیونکہ میں نے اس بات کو ناپسند کیا کہ میں آپ کے کھانے کو خراب کروں لیکن جب آپ نے اپنے منہ میں موجود چیز کو کھا لیا ، تو میں نے آپ کے مقابلے میں اپنی ذات میں رغبت نہیں رکھی مجھے یہ امید تھی کہ اگرچہ اس میں زیادتی کی گئی ہے ۔ لیکن اس کا نقصان نہیں ہو گا ، راوی کہتے ہیں : اس کے بعد سیدنا بشر رضی اللہ عنہ اپنی جگہ سے اُٹھے نہیں تھے کہ ان کا رنگ سبز ہو گیا اور ان کی تکلیف زیادہ ہو گئی ، یہاں تک کہ ایک سال گزرنے سے پہلے ان کا انتقال ہو گیا نبی اکرم صلی اللہ علیہ وسلم اس واقعہ کے بعد تین سال تک زندہ رہے ، یہاں تک کہ اسی کی تکلیف کی وجہ سے آپ کا انتقال ہوا ۔
یہ روایت امام طبرانی نے ” مرسل “ روایت کے طور پر نقل کی ہے ۔ اس کی سند میں ایک راوی ابن لہیعہ ہے اس میں ضعف پایا جاتا ہے ، اور اس کی نقل کردہ حدیث حسن ہے ۔

سیدنا انس رضی اللہ عنہ بیان کرتے ہیں : جب نبی اکرم صلی اللہ علیہ وسلم نے خیبر فتح کیا تو حجاج بن علاط نے کہا: یا رسول اللہ ! مکہ میں میرا مال موجود ہے وہاں میرے اہل خانہ بھی موجود ہیں میں یہ چاہتا ہوں کہ میں ان لوگوں کے پاس جاؤں اگر میں آپ کے بارے میں آپ کے خلاف کوئی باتیں کروں تو آپ مجھے اس کی اجازت دے دیں نبی اکرم صلی اللہ علیہ وسلم نے انہیں اس کی اجازت دے دی کہ وہ جو چاہیں کہہ دیں جب وہ صاحب آئے ، تو اپنی بیوی کے پاس آئے ، اور بولے : تمہارے پاس جو کچھ بھی ہے وہ میرے لئے جمع کر دو کیونکہ میں محمد اور ان کے ساتھیوں سے مال غنیمت خریدنا چاہتا ہوں کیونکہ ان کا حال خراب ہو چکا ہے ، اور ان کے اموال کو نقصان پہنچ چکا ہے ۔ راوی کہتے ہیں : یہ بات مکہ میں پھیل گئی اس سے مسلمان پریشان ہو گئے ، اور مشرکین میں خوشی کی لہر دوڑ گئی راوی کہتے ہیں : جب سیدنا عباس بن عبدالمطلب رضی اللہ عنہ کو اس بات کی اطلاع ملی تو ان کی ٹانگوں میں جان نہ رہی وہ کھڑے ہونے کے قابل نہ رہے ۔ معمر بیان کرتے ہیں : عثمان جزری نے مقسم کے حوالے سے یہ بات نقل کی ہے ۔ سیدنا عباس رضی اللہ عنہ اپنے بیٹے قسم کو پکڑ کر لیٹ جاتے تھے اسے اپنے سینے پر بٹھاتے تھے اور یہ فرماتے تھے یہ میرا محبوب قسم ہے جو خوشبو والی ناک والی شخصیت کے ساتھ مشابہت رکھتا ہے ، جو نعمتوں والے نبی ہیں خواہ کسی بھی شخص کو کتنا بھی ناگوار گزرے ۔ ثابت نے حجاج کے حوالے سے سیدنا انس رضی اللہ عنہ سے یہ بات نقل کی ہے پھر انہوں نے اپنے غلام کو حجاج بن علاط کی طرف بھیجا اور کہا: تمہارا ستیاناس ہو تم کیا اطلاع لے کے آئے ہو کیا بیان کرتے پھر رہے ہو تم جو چیز لے کے آئے ہو اللہ تعالیٰ کا کیا ہوا وعدہ اس سے زیادہ بہتر ہے ، تو حجاج بن علاط نے ان کے غلام سے کہا: تم ابوالفضل کو میری طرف سے سلام کہنا اور ان سے یہ کہنا کہ وہ اپنے گھر میں کی جگہ پر تنہا ہوں ۔ میں ان کے پاس آؤں گا کیونہ اصل اطلاع وہ ہے ، جس سے وہ خوش ہو جائیں گے ان کا غلام آ گیا جب سیدنا حجاج بن علاط رضی اللہ عنہ دروازے پر پہنچے تو انہوں نے فرمایا : اے ابوالفضل آپ خوشخبری حاصل کریں تو سیدنا عباس رضی اللہ عنہ خوشی کے عالم میں اٹھ کھڑے ہوئے ، اور انہوں نے سیدنا حجاج بن علاط رضی اللہ عنہ کی دونوں آنکھوں کے درمیان بوسہ دیا جب حجاج کی باتوں کی اطلاع انہیں ملی تو انہوں نے اس غلام کو آزاد کر دیا ۔ راوی کہتے ہیں : پھر حجاج آئے ، اور انہوں نے انہیں بتایا : نبی اکرم صلی اللہ علیہ وسلم نے خیبر فتح کر لیا اور وہاں کے اموال کو غنیمت کے طور پر حاصل کر لیا ہے ، اور ان اموال میں اللہ تعالیٰ کے حصے جاری ہوئے ہیں ، اور نبی اکرم صلی اللہ علیہ وسلم نے صفیہ بنت حیی رضی اللہ عنہا کو منتخب کر کے اسے اپنی ذات کے لئے حاصل کر لیا ہے آپ نے اس خاتون کو یہ اختیار دیا تھا کہ اسے آزاد کر دیں ، اور وہ خاتون آپ کی زوجہ بن جائیں یا پھر وہ اپنے اہل خانہ کے پاس چلی جائے ، تو اس خاتون نے اس بات کو اختیار کیا کہ آپ اسے آزاد کریں اور وہ آپ کی زوجہ بن جائے پھر حجاج نے بتایا : میں یہاں اپنے مال کے سلسلے میں آیا ہوں جو یہاں موجود تھا میرا ارادہ یہ ہے کہ میں اسے اکٹھا کر کے لے کے چلا جاؤں گا ۔ میں نے نبی اکرم صلی اللہ علیہ وسلم سے اس بارے میں اجازت مانگی تھی آپ نے مجھے اجازت دی تھی کہ میں جو چاہوں بیان کر دوں تو آپ نے میرے حوالے سے تین دن تک اس بات کو پوشیدہ رکھنا ہے پھر آپ کو مناسب لگے گا اس کو ذکر کر دیجئے گا ۔ راوی بیان کرتے ہیں : پھر ان صاحب کی بیوی نے اپنے پاس موجود ہر زیور اور سامان اکٹھا کیا اور ان کے سپرد کر دیا پھر وہ صاحب اسے لے کے چلے گئے تین دن گزرنے کے بعد سیدنا عباس رضی اللہ عنہ حجاج کی اہلیہ کے پاس آئے ، اور بولے : تمہارے شوہر کا کیا حال ہے ، تو اس خاتون نے انہیں بتایا : وہ تو فلاں دن چلے گئے تھے اس خاتون نے یہ بھی کہا: کہ اے ابوالفضل اللہ تعالیٰ آپ کو رسوائی کا شکار نہیں کرے گا آپ کو جو اطلاع ملی تھی وہ ہم پر بھی گراں گزری تھی سیدنا عباس رضی اللہ عنہ نے فرمایا : جی ہاں اللہ تعالیٰ مجھے رسوائی کا شکار نہیں کرے گا اور صورت حال الحمدللہ وہ ہو گی جو ہمیں پسند ہو گی اللہ تعالیٰ نے اپنے رسول کے لئے خیبر کو فتح کروا دیا ہے ، اور اللہ کے حصے جاری ہو گئے ہیں ، اور اللہ کے نبی نے صفیہ کو اپنے لئے منتخب کیا ہے اگر تم اپنے شوہر کے پاس جانا چاہتی ہو ، تو اس کے ساتھ جا ملو اس خاتون نے کہا: آپ کے بارے میں اللہ کی قسم میرا یہ گمان ہے کہ آپ سچ کہہ رہے ہیں ۔ سیدنا عباس رضی اللہ عنہ نے فرمایا : میں سچ کہہ رہا ہوں ، اور معاملہ اسی طرح ہے ، جو میں نے تمہیں بتایا ہے پھر سیدنا عباس رضی اللہ عنہ تشریف لے گئے ، اور قریش کی محافل میں آئے وہ لوگ یہ کہہ رہے تھے جب وہ ان کے پاس سے گزرے کہ اے ابوالفضل آپ کو بھلائی نصیب نہیں ہوئی ہے ، تو سیدنا عباس رضی اللہ عنہ نے فرمایا : مجھے الحمدللہ صرف بھلائی ہی نصیب ہوئی ہے حجاج بن علاط نے مجھے یہ بتایا ہے کہ خیبر کو اللہ تعالیٰ نے اپنے رسول کے لئے فتح کروا دیا ہے ، اور اس میں اللہ تعالیٰ کے حصے جاری ہوئے ہیں ، اور نبی اکرم صلی اللہ علیہ وسلم نے سیدہ صفیہ رضی اللہ عنہا کو اپنی ذات کے لئے مخصوص کیا ہے حجاج نے مجھ سے یہ کہا: تھا کہ میں تین دن تک اس کے حوالے سے اس بات کو چھپا کے رکھوں کیونکہ وہ اس لئے آیا ہے ، تاکہ اپنا مال حاصل کر لے اور اس کی جو چیزیں بھی یہاں ہیں وہ حاصل کر لے پھر وہ چلا جائے گا ۔ راوی کہتے ہیں : تو مسلمانوں کی جو پریشانی تھی وہ مشرکین کی طرف لوٹ گئی ، تو مسلمان باہر نکل آئے ، اور وہ فرد باہر نکل آیا جو اپنے گھر میں چھپ کے بیٹھا ہوا تھا ، یہاں تک کہ وہ لوگ سیدنا عباس رضی اللہ عنہ کے پاس آئے سیدنا عباس رضی اللہ عنہ نے انہیں اصل صورت حال کے بارے میں بتایا تو اس سے مسلمان خوش ہو گئے ، اور ان کو جو پریشانی غصہ اور تکلیف لاحق تھے ۔ اللہ تعالیٰ نے وہ مشرکین پر عائد کر دیے ۔
یہ روایت امام أحمد امام ابویعلیٰ اور امام بزار اور امام طبرانی نے نقل کی ہے ، اور اس کے رجال صحیح کے رجال ہیں ۔

عروہ بیان کرتے ہیں : غزوہ خیبر کے موقع پر قریش کی شاخ بنو عبدمناف سے تعلق رکھنے والے سیدنا ثقف بن عمرو رضی اللہ عنہ نے جام شہادت نوش کیا تھا یہ ان لوگوں کے حلیف تھے اور ان کا تعلق بنو اسد بن خزیمہ سے تھا ۔ انصار کی شاخ بنوزریق سے تعلق رکھنے والے سیدنا مسعود بن سعد بن خالد رضی اللہ عنہ ( نے جام شہادت نوش کیا ) بنو عمرو سے تعلق رکھنے والے سیدنا ابوصياح ( راوی کو شک ہے شاید یہ الفاظ ہیں ) سیدنا ابوضیاح رضی اللہ عنہ ( نے جام شہادت نوش کیا ) ۔
یہ روایت امام طبرانی نے نقل کی ہے ۔ اس کی سند میں ایک راوی ابن لہیعہ ہے ۔ اس کی سند میں ضعف پایا جاتا ہے اس کی نقل کردہ حدیث حسن ہے ۔

ابن شہاب نے غزوہ خیبر میں جام شہادت نوش کرنے والوں کے ناموں میں انصار سے تعلق رکھنے والے سیدنا محمود بن مسلمہ رضی اللہ عنہ کا ذکر کیا ہے جن کا تعلق بنو حارثہ سے تھا ان لوگوں نے یہ بات بھی ذکر کی ہے کہ نبی اکرم صلی اللہ علیہ وسلم نے سیدنا محمد بن مسلمہ رضی اللہ عنہ سے فرمایا تھا تمہارے بھائی کو دو شہیدوں کا اجر ملے گا اس کے علاوہ بنوزریق سے تعلق رکھنے والے سیدنا مسعود بن سعد بن قیس رضی اللہ عنہ ( نے جام شہادت نوش کیا ) ۔
یہ روایت امام طبرانی نے نقل کی ہے ، اور اس کے رجال صحیح کے رجال ہیں ۔

سیدنا ابوہریرہ رضی اللہ عنہ بیان کرتے ہیں : میں نے جب بھی نبی اکرم صلی اللہ علیہ وسلم کے ساتھ مال غنیمت والی کسی جنگ میں حصہ لیا تو نبی اکرم صلی اللہ علیہ وسلم نے اس میں سے مجھے حصہ دیا البتہ خیبر کا معاملہ مختلف ہے کیونکہ اس کا مال غنیمت ان لوگوں کے ساتھ مخصوص تھا جو غزوہ حدیبیہ میں شامل ہوئے تھے ۔ راوی بیان کرتے ہیں : سیدنا ابوہریرہ رضی اللہ عنہ اور سیدنا ابوموسی اشعری رضی اللہ عنہ حدیبیہ اور خیبر کے درمیانی عرصے میں آئے تھے ۔
یہ روایت امام أحمد نے نقل کی ہے ۔ اس کی سند میں ایک راوی علی بن زید ہے ، اور وہ خراب حافظے کا مالک ہے ۔ اس روایت کے بقیہ رجال صحیح کے رجال ہیں ۔

سیدنا عقبہ بن سوید انصاری رضی اللہ عنہ بیان کرتے ہیں : انہوں نے اپنے والد کو سنا ہے ، جو نبی اکرم صلی اللہ علیہ وسلم کے اصحاب میں سے ایک ہیں وہ بیان کرتے ہیں : ہم غزوہ خیبر سے نبی اکرم صلی اللہ علیہ وسلم کے ساتھ واپس آئے جب اُحد پہاڑ آپ کے سامنے آیا تو نبی اکرم صلی اللہ علیہ وسلم نے ارشاد فرمایا : ” اللہ اکبر ! یہ پہاڑ ہم سے محبت کرتا ہے ، اور ہم اس سے محبت کرتے ہیں “ ۔
یہ روایت امام أحمد نے نقل کی ہے عقبہ نامی راوی کا ذکر ابن ابوحاتم نے کیا ہے وہ بیان کرتے ہیں : عبدالعزیز نے اس سے روایت نقل کی ہے ۔ انہوں نے اس پر جرح نہیں کی ہے میں یہ کہتا ہوں امام أحمد کے نزدیک زہری نے اس سے روایت نقل کی ہے ۔ اس روایت کے بقیہ رجال صحیح کے رجال ہیں ۔