مجمع الزوائد ومنبع الفوائد

سیدنا انس رضی اللہ عنہ بیان کرتے ہیں : غزوہ حنین کے دن انصار سے تعلق رکھنے والے ہمارے ایک نوجوان نے یہ کہا: کہ آج ہم قلت کی وجہ سے مغلوب نہیں ہوں گے ، اور پھر یہ ہوا کہ جب ہم نے دشمن کا سامنا کیا ، تو ہم لوگ پسپا ہو گئے نبی اکرم صلی اللہ علیہ وسلم اپنے خچر پر سوار تھے سیدنا ابوسفیان بن حارث رضی اللہ عنہ نے اس کی لگام پکڑی ہوئی تھی اور نبی اکرم صلی اللہ علیہ وسلم کے چچا سیدنا عباس رضی اللہ عنہ نے اس کی رکاب تھامی ہوئی تھی ہم ایک ایسی وادی میں تھے جس کی زمین نرم تھی اور غبار بلند ہوا تھا ہم میں سے کوئی شخص اپنی تھیلی کو نہیں دیکھ پاتا تھا اسی دوران کوئی شخص آتا ہوا محسوس ہوا تو نبی اکرم صلی اللہ علیہ وسلم نے فرمایا ٹھہرو تم کون ہو انہوں نے جواب دیا میں ابوبکر ہوں میرے ماں باپ آپ پر قربان ہوں ۔ ان کے جسم پر دس سے زیادہ ضربیں لگی ہوئی تھیں پھر کوئی اور شخص آتا ہوا دکھائی دیا ، تو نبی اکرم صلی اللہ علیہ وسلم نے فرمایا : تم ٹھہرو تم کون ہو انہوں نے عرض کی : میں عمر بن خطاب ہوں میرے ماں باپ آپ پر قربان ہوں ۔ ان کے جسم پر بھی دس سے زیادہ ضربیں تھیں اسی دوران ایک شخص آتا ہوا دکھائی دیا جس کے جسم پر بیس سے زیادہ ضربیں تھیں نبی اکرم صلی اللہ علیہ وسلم نے فرمایا : تم کون ہو انہوں نے عرض کی : میں عثمان بن عفان ہوں میرے ماں باپ آپ پر قربان ہوں پھر ایک اور شخص آتا ہوا محسوس ہوا اس کے جسم پر دس سے زیادہ ضربیں تھیں نبی اکرم صلی اللہ علیہ وسلم نے فرمایا ٹھہرو تم کون ہو انہوں نے عرض کی : میں علی بن ابوطالب ہوں میرے ماں باپ آپ پر قربان ہوں پھر لوگ آ گئے نبی اکرم صلی اللہ علیہ وسلم نے ارشاد فرمایا : کیا کوئی اونچی آواز والا شخص جا کر لوگوں میں اعلان نہیں کرتا تو ایک صاحب گئے انہوں نے چیخ کر کہا: ان کی آواز لوگوں کی سماعت تک پہنچی تو وہ لوگ واپس پلٹ آئے نبی اکرم صلی اللہ علیہ وسلم نے اور آپ کے ساتھ مسلمانوں نے حملہ کیا ، تو مشرکین پسپا ہو گئے درید بن صمہ ایک چھوٹے پہاڑ پر یا ایک ٹیلے پر چڑھ گیا اس کے ساتھ چھ سو افراد تھے ۔ نبی اکرم صلی اللہ علیہ وسلم کے اصحاب میں سے کسی نے آپ کی خدمت میں عرض کی : اللہ کی قسم مجھے لگتا ہے کوئی چھوٹا سا دستہ آ رہا ہے ۔ نبی اکرم صلی اللہ علیہ وسلم نے فرمایا : ان کا حلیہ میرے سامنے بیان کرو لوگوں نے بتایا : ان کی نشانی یہ ہے ، اور ان کا حلیہ اس طرح کا ہے ، تو نبی اکرم صلی اللہ علیہ وسلم نے فرمایا : تمہارے اوپر کوئی حرج نہیں ہے یہ قضاعہ قبیلے کے لوگ ہیں جو دشمن کے پیچھے گئے تھے لوگوں نے عرض کی : اللہ کی قسم ہمیں ایک سخت قسم کا دستہ آتا ہوا محسوس ہو رہا ہے ۔ نبی اکرم صلی اللہ علیہ وسلم نے فرمایا : ان کا حلیہ میرے سامنے بیان کرو لوگوں نے بتایا : ان کی نشانی یہ ہے ، اور ان کا حلیہ اس طرح ہے ۔ نبی اکرم صلی اللہ علیہ وسلم نے فرمایا : تم پر کوئی حرج نہیں ہے یہ سلیم قبیلے کے لوگ ہیں پھر لوگوں نے بتایا : ہمیں ایک شہسوار آتا ہوا نظر آ رہا ہے ۔ نبی اکرم صلی اللہ علیہ وسلم نے فرمایا : تمہارا ستیاناس ہو کیا وہ اکیلا ہے لوگوں نے عرض کی : وہ اکیلا ہے ۔ نبی اکرم صلی اللہ علیہ وسلم نے فرمایا : اس کا حلیہ میرے سامنے بیان کرو لوگوں نے بتایا : اس نے سیاہ عمامہ باندھا ہوا ہے ، تو درید نے کہا: اللہ کی قسم وہ زبیر بن عوام ہو گا اور اللہ کی قسم وہ تمہیں قتل کر دے گا اور وہ تمہیں تمہاری جگہ سے نکلوا دے گا راوی کہتے ہیں : پھر میں نے ان لوگوں کی طرف متوجہ ہو کر دیکھا کہ لوگ کیا کر رہے ہیں ، تو وہ شخص اور اس کے پیروکار چلے گئے ، اور وہاں تین سو افراد قتل ہو گئے سیدنا زبیر رضی اللہ عنہ نے درید بن صمہ کا سر کاٹ کر نبی اکرم صلی اللہ علیہ وسلم کے آگے رکھ دیا ۔
یہ روایت امام بزار نے نقل کی ہے ۔ اس کی سند میں ایک راوی علی بن عاصم بن صہیب ہے ، اور وہ اپنی کثرت سے غلطیوں اور زیادتی کی وجہ سے ضعیف ہے ویسے اس کی توثیق کی گئی ہے ۔ اس روایت کے بقیہ رجال ثقہ ہیں ۔

سیدنا جابر بن عبداللہ رضی اللہ عنہما بیان کرتے ہیں : جب ہم لوگ وادی حنین میں آئے ، تو ہم تہامہ کی وادیوں میں سے ایک وادی کے اندر آئے تھے جو درمیان میں تھی اور اس میں نیچے کی طرف آنا پڑتا تھا انہوں نے یہ بھی بتایا : اس وقت صبح کا اندھیرا پایا جاتا تھا ، اور لوگوں نے اس گھاٹی کے اندر ہمارے لئے کمین گاہیں بنا لی ہوئی تھیں اس کے اطراف میں اور اس کی تنگ جگہ پر وہ لوگ جمع تھے وہ اکٹھے ہو گئے تھے وہ تیار تھے راوی کہتے ہیں : اللہ کی قسم ہمیں پتہ بھی نہیں چلا ہم نیچے کی طرف اتر رہے تھے اسی دوران کچھ دستوں نے ہم پر حملہ کر دیا ، تو لوگ واپس پلٹے وہ لوگ الٹے قدموں واپس آئے تھے کوئی بھی مڑا نہیں تھا نبی اکرم صلی اللہ علیہ وسلم دائیں طرف ہو گئے پھر آپ نے ارشاد فرمایا : میری طرف آؤ اے لوگو میری طرف آؤ اے لوگو میں اللہ کا رسول ہوں ۔ میں محمد بن عبداللہ ہوں راوی کہتے ہیں : کوئی معاملہ نہیں ہوا ، یہاں تک کہ وہ ایک دوسرے کے ساتھ گھتم گتھا ہو گئے ، اور لوگ ادھر ادھر ہو گئے ، البتہ نبی اکرم صلی اللہ علیہ وسلم کے ساتھ مہاجرین انصار اور آپ کے گھر والوں سے تعلق رکھنے والے کچھ افراد تھے جن کی تعداد زیادہ نہیں تھی جو لوگ آپ کے ساتھ ثابت قدم رہے ان میں سیدنا ابوبکر رضی اللہ عنہ تھے سیدنا عمر رضی اللہ عنہ تھے آپ کے اہل بیت میں سے سیدنا علی بن ابوطالب رضی الله عنہ سیدنا عباس بن عبدالمطلب رضی اللہ عنہ ان کے صاحبزادے سیدنا فضل بن عباس رضی اللہ عنہما اور سیدنا ابوسفیان بن حارث رضی اللہ عنہ سیدنا ربیعہ بن حارث رضی اللہ عنہ سیدنا ایمن بن عبید رضی اللہ عنہ جو سیدہ ام ایمن رضی اللہ عنہا کے صاحبزادے ہیں ، اور سیدنا اسامہ بن زید رضی اللہ عنہما تھے ۔ راوی کہتے ہیں : ہوازن قبیلے سے تعلق رکھنے والا ایک شخص اپنے سرخ اونٹ پر سوار تھا اس کے ہاتھ میں سیاہ رنگ کا جھنڈا تھا ، اور اس کے نیزے کا سرا لمبا تھا وہ لوگوں کے سامنے تھا ہوازن اس کے پیچھے تھے جب اس تک کوئی پہنچتا تھا تو وہ اپنے نیزے کے ذریعے حملہ کر دیتا تھا ، اور جب لوگ اس سے دور ہوتے تھے ، تو وہ اس کو اپنے پیچھے والوں کے لئے بلند کر لیتا تھا ، اور وہ اس کے پیچھے آ جاتے تھے ۔

ابن اسحاق بیان کرتے ہیں : عاصم بن عمر بن قتادہ نے عبدالرحمن بن جابر کے حوالے سے ان کے والد سیدنا جابر بن عبداللہ رضی اللہ عنہما کا یہ بیان نقل کیا ہے اس دوران ہوازن قبیلے سے تعلق رکھنے والا ایک شخص تھا جو ان کا علم بردار تھا وہ اپنے اونٹ پر سوار تھا ، اور یہ یہ کر رہا تھا سیدنا علی بن ابوطالب رضی اللہ عنہ اور انصار سے تعلق رکھنے والا ایک شخص اس کی طرف بڑھے سیدنا جابر رضی اللہ عنہ کہتے ہیں ۔ سیدنا علی رضی اللہ عنہ پیچھے کی طرف سے اس کے پاس آئے ، اور انہوں نے اونٹ کی پچھلی ٹانگوں پر ضرب لگائی ، تو وہ پشت کے بل نیچے گر گیا انصاری شخص نے اس شخص پر اچھیل کر ضرب لگائی ، تو نصف پنڈلی کے پاس سے اس کا پاؤں کاٹ دیا وہ اپنے پالان سے نیچے گرا اور لوگوں میں بھگدڑ مچ گئی اللہ کی قسم ابھی لوگ واپس نہیں آئے تھے کہ انہوں نے قیدیوں کو نبی اکرم صلی اللہ علیہ وسلم کے پاس بندھے ہوئے پایا ۔
یہ روایت امام أحمد اور امام ابویعلیٰ نے نقل کی ہے ۔ انہوں نے یہ الفاظ زائد نقل کیے ہیں جب پسپائی ہو گئی ، تو کلدہ نے چیخ کر کہا: جو صفوان بن امیہ کا بھائی تھا ، اور اس وقت مشرک تھا ، اور یہ اس مدت میں تھا جو نبی اکرم صلی اللہ علیہ وسلم نے اس کے لئے مقرر کی تھی اس نے کہا: آج جادو باطل ہو گیا تو صفوان نے اس سے کہا: تم خاموش ہو جاؤ اللہ تعالیٰ تمہارا منہ بند کرے اللہ کی قسم قریش سے تعلق رکھنے والا ایک شخص میری دیکھ بھال کرے یہ میرے نزدیک اس سے زیادہ پسندیدہ ہے کہ ہوازن قبیلے سے تعلق رکھنے والا کوئی شخص میرا آقا بن جائے ۔
یہ روایت بزار نے اختصار کے ساتھ نقل کی ہے ۔ اس کی سند میں ایک راوی ابن اسحاق ہے ، جس نے سماع کی صراحت کی ہے ، اور یہ امام ابویعلیٰ کی روایت کے مطابق ہے ۔ امام أحمد کے بقیہ رجال صحیح کے رجال ہیں ۔

سیدنا عبداللہ بن مسعود رضی اللہ عنہ بیان کرتے ہیں : غزوہ حنین کے موقع پر میں نبی اکرم صلی اللہ علیہ وسلم کے ساتھ تھا راوی کہتے ہیں : لوگ نبی اکرم صلی اللہ علیہ وسلم کو چھوڑ کر مڑ گئے آپ کے ساتھ اسی افراد رہ گئے جن کا تعلق مہاجرین اور انصار سے تھا ہم اسی قدم کے لگ بھگ پیچھے ہٹے تھے لیکن ہم نے پیٹھ نہیں پھیری تھی یہ وہ لوگ ہیں ، جن پر اللہ تعالیٰ نے سکینت نازل کی تھی نبی اکرم صلی اللہ علیہ وسلم اپنے خچر پر سوار ہو کر آگے کی طرف بڑھ رہے تھے آپ اپنے خچر کو لے کے آگے بڑھ رہے تھے ، تو اسی دوران اس کی زین ہٹ گئی میں نے آپ سے کہا: آپ اٹھیں اللہ تعالیٰ آپ کو بلند کرے تو نبی اکرم صلی اللہ علیہ وسلم نے فرمایا : مجھے مٹھی بھر مٹی دو پھر نبی اکرم صلی اللہ علیہ وسلم نے وہ مٹی ان لوگوں کے منہ پر پھینکی تو وہ ان کی آنکھوں میں بھر گئی پھر آپ نے دریافت کیا : مہاجرین اور انصار کہاں ہیں میں نے عرض کی : وہ یہاں ہیں نبی اکرم صلی اللہ علیہ وسلم نے فرمایا : تم انہیں پکارو میں نے انہیں پکارا تو وہ لوگ آ گئے ان کی تلواریں ان کے ہاتھوں میں تھیں وہ شہاب کی طرح تھے اور پھر مشرکین پیٹھ پھیر کر بھاگے ۔
یہ روایت امام أحمد اور امام بزار نے اور طبرانی نے نقل کی ہے ۔ امام أحمد کے رجال صحیح کے رجال ہیں صرف حارث بن حصیرہ کا معاملہ مختلف ہے ، اور وہ ثقہ ہے ۔

سیدنا انس رضی اللہ عنہ بیان کرتے ہیں : غزوہ حنین کے موقع پر لوگ نبی اکرم صلی اللہ علیہ وسلم کو چھوڑ کر پسپا ہو گئے صرف سیدنا عباس بن عبدالمطلب رضی اللہ عنہ اور سیدنا ابوسفیان بن حارث رضی اللہ عنہ کا معاملہ مختلف ہے ۔ نبی اکرم صلی اللہ علیہ وسلم نے حکم دیا کہ یہ اعلان کیا جائے اے سورت بقرہ کے ماننے والو ! اے انصار کے گروہ پھر بنو حارث بن خزرج کو پکارا گیا جب انہوں نے آواز سنی تو وہ آ گئے اللہ کی قسم ان کی مثال میں یوں دے سکتا ہوں کہ جس طرح کوئی اونٹ اپنی اولاد کی طرف آتا ہے جب وہ لوگ آئے ، تو لڑائی تیز ہو گئی نبی اکرم صلی اللہ علیہ وسلم نے فرمایا : اب بھٹی گرم ہو گئی ہے پھر نبی اکرم صلی اللہ علیہ وسلم نے سفید کنکریاں مٹھی میں لیں اور انہیں پھینکا تو فرمایا رب کعبہ کی قسم یہ لوگ پسپا ہو گئے ۔ راوی کہتے ہیں : اس وقت سیدنا علی رضی اللہ عنہ نے نبی اکرم صلی اللہ علیہ وسلم کے سامنے شدید ترین لڑائی کی ۔
یہ روایت امام ابویعلیٰ نے اور امام طبرانی نے معجم اوسط میں نقل کی ہے ، اور ان دونوں کے رجال صحیح کے رجال ہیں صرف عمران بن داور کا معاملہ مختلف ہے وہ ابوعوام ہے ابن حبان اور دیگر حضرات نے اسے ثقہ قرار دیا ہے یحیی بن معین اور دیگر حضرات نے اسے ضعیف کہا: ہے ۔

سیدنا بریدہ رضی اللہ عنہ بیان کرتے ہیں : غزوہ حنین کے موقع پر لوگ نبی اکرم صلی اللہ علیہ وسلم کو چھوڑ کر ادھر ادھر ہو گئے آپ کے ساتھ صرف ایک شخص باقی رہ گیا جس کا نام زید تھا اس نے نبی اکرم صلی اللہ علیہ وسلم کے خچر شہبا کی لگام پکڑی ہوئی تھی نبی اکرم صلی اللہ علیہ وسلم نے اس سے فرمایا تمہارا ستیاناس ہو تم لوگوں کو بلاؤ تو زید نے بلند آواز میں پکارا اے لوگو یہ اللہ کے رسول تمہیں بلا رہے ہیں ، تو کوئی شخص نہیں آیا نبی اکرم صلی اللہ علیہ وسلم نے فرمایا : تم انصار کو بلاؤ اس نے کہا: اے انصار کے گروہ اللہ کے رسول تمہیں بلا رہے ہیں ، تو کوئی شخص نہیں آیا نبی اکرم صلی اللہ علیہ وسلم نے فرمایا : تمہارا ستیاناس ہو تم بطور خاص اوس اور خزرج کو بلاؤ تو اس نے پکار کے کہا: اے اوس اور خزرج کے گروہ یہ اللہ کے رسول تمہیں بلا رہے ہیں ، تو کوئی نہیں آیا نبی اکرم صلی اللہ علیہ وسلم نے فرمایا : تم بطور خاص مہاجرین کو بلاؤ کیونکہ ان کی گردنوں میں میری بیعت ہے ۔ راوی کہتے ہیں : سیدنا بریدہ رضی اللہ عنہ نے مجھے یہ بات بتائی ہے کہ پھر وہ لوگ اس طرح آئے کہ انہوں نے میانیں ایک طرف رکھ دیں وہ نبی اکرم صلی اللہ علیہ وسلم کے پاس آئے ، اور پھر انہوں نے پیش قدمی شروع کی ، یہاں تک کہ اللہ تعالیٰ نے انہیں فتح نصیب کر دی ۔
یہ روایت امام بزار نے نقل کی ہے ، اور اس کے رجال ثقہ ہیں ۔

سیدنا انس رضی اللہ عنہ بیان کرتے ہیں : غزوہ حنین کے دن نبی اکرم صلی اللہ علیہ وسلم نے ارشاد فرمایا : ان لوگوں کے ٹکڑے کر دو آپ نے اپنے دست مبارک کے ذریعے حلق کی طرف اشارہ کر کے یہ بات ارشاد فرمائی ۔
یہ روایت امام بزار نے نقل کی ہے ، اور اس کے رجال ثقہ ہیں ۔

سیدنا حارث بن بدل رضی اللہ عنہ بیان کرتے ہیں : غزوہ حنین کے موقع پر میں نبی اکرم صلی اللہ علیہ وسلم کے ساتھ موجود تھا آپ کے تمام اصحاب پسپا ہو گئے صرف سیدنا عباس بن عبدالمطلب رضی اللہ عنہ اور سیدنا ابوسفیان بن حارث رضی اللہ عنہ نہیں ہوئے نبی اکرم صلی اللہ علیہ وسلم نے مٹھی بھر مٹی ہماری طرف پھینکی تو ہم پسپا ہو گئے ، اور مجھے یوں محسوس ہو رہا تھا کہ ہر درخت اور پتھر ہمارا پیچھا کر رہا ہے ۔
یہ روایت امام طبرانی نے نقل کی ہے ، اور اس کے رجال ثقہ ہیں ۔

سیدنا ابوعبدالرحمن فہری رضی اللہ عنہ بیان کرتے ہیں : غزوہ حنین کے موقع پر ہم نبی اکرم صلی اللہ علیہ وسلم کے ساتھ تھے وہ ایک شدید گرم دن تھا ہم نے درختوں کے نیچے پڑاؤ کیا ہوا تھا دھوپ مسلسل میرے ہتھیاروں پر پڑ رہی تھی میں اپنے گھوڑے پر سوار ہوا اور نبی اکرم صلی اللہ علیہ وسلم کے مخصوص خیمے میں آپ کی خدمت میں حاضر ہوا میں نے آپ کو سلام کیا آپ نے ارشاد فرمایا : تم پر بھی سلام ہو ، اور اللہ تعالیٰ کی رحمتیں اور اس کی برکتیں نازل ہوں ۔ میں نے عرض کی : یا رسول اللہ ! روانگی کا وقت ہو چلا ہے ۔ نبی اکرم صلی اللہ علیہ وسلم نے فرمایا : بلال کو آواز دو تو سیدنا بلال رضی اللہ عنہ ایک ایسے درخت کے نیچے سے نکل کر آئے جس کا سایہ پرندے کے سائے کی مانند تھا انہوں نے عرض کی : میں حاضر ہوں ۔ میں آپ پر فدا ہو جاؤں نبی اکرم صلی اللہ علیہ وسلم نے ارشاد فرمایا : میرے گھوڑے پر میرے لئے زین رکھو تو انہوں نے ایک ایسی زین نکالی جس کے دونوں کناروں کے درمیان پتے بھرے ہوئے تھے ، آپ میں کوئی تکبر اور خود پسندی نہیں تھی انہوں نے نبی اکرم صلی اللہ علیہ وسلم کے لئے زین رکھ دی تو نبی اکرم صلی اللہ علیہ وسلم اس پر سوار ہوئے اس شام اور اس رات ہم چلتے رہے ، یہاں تک کہ جب دونوں طرف کے شہسوار ایک دوسرے کے مد مقابل آئے ، تو مسلمان پیٹھ پھیر کر مڑ گئے جیسا کہ اللہ تعالیٰ نے ارشاد فرمایا ہے : تو نبی اکرم صلی اللہ علیہ وسلم نے ارشاد فرمایا : اے اللہ کے بندو میں اللہ کا بندہ اور اس کا رسول ہوں پھر نبی اکرم صلی اللہ علیہ وسلم اپنے گھوڑے سے اترے آپ نے مٹھی بھر کنکریاں لیں مجھے اس شخص نے یہ بات بیان کی ہے ، جو میرے سے زیادہ نبی اکرم صلی اللہ علیہ وسلم کے قریب تھا کہ نبی اکرم صلی اللہ علیہ وسلم نے وہ کنکریاں دشمن کی طرف پھینکیں اور ارشاد فرمایا : ان کے چہرے قبیح ہو جائیں تو اللہ تعالیٰ نے مشرکین کو پسپا کر دیا ۔ راوی بیان کرتے ہیں ؟ ان لوگوں کے بیٹوں نے ہمیں یہ بات بتائی ہے کہ ان کے آباء یہ بات بیان کرتے تھے کہ اس دن ہم میں سے ہر ایک کی آنکھوں اور منہ میں مٹی بھر گئی تھی اور ہمیں آسمان سے زمین کی طرف آنے والی ایک آواز یوں سنائی دی جیسے کسی لوہے کو طشت پر پھیرا جاتا ہے ۔ ( علامہ ہیثمی فرماتے ہیں : ) میں یہ کہتا ہوں امام ابوداؤد نے یہ روایت ان الفاظ تک نقل کی ہے : «ليس فيه الشر ولا بطر» ( آپ میں کوئی تکبر اور خود پسندی نہیں تھی ) ۔
یہ روایت امام بزار اور امام طبرانی نے نقل کی ہے ، اور ان دونوں کے رجال ثقہ ہیں ۔

سیدنا عبداللہ بن عباس رضی اللہ عنہما بیان کرتے ہیں : سیدنا علی بن ابوطالب رضی اللہ عنہ نے نبی اکرم صلی اللہ علیہ وسلم کو مٹی پکڑائی وہ آپ صلی اللہ علیہ وسلم نے غزوہ حنین کے موقع پر مشرکین کی طرف پھینکی ۔
یہ روایت امام بزار نے نقل کی ہے ۔

یاسر بیان کرتے ہیں : سیدنا عمرو بن مرہ رضی اللہ عنہ یہ حدیث بیان کرتے ہیں : کہ نبی اکرم صلی اللہ علیہ وسلم نے سیدنا عمرو بن مرہ رضی اللہ عنہ کو حکم دیا کہ وہ اور ان کی قوم جہینہ بن زید کے لوگ جنگ ہوازن کے دن ٹھہر جائیں نبی اکرم صلی اللہ علیہ وسلم نے ان سے فرمایا جہینہ قبیلے کے لوگو تم بنوسلیم کے عقب میں رہنا اگر وہ سرکش ہوئے ، تو تم ہتھیار ان کی گدی پر رکھنا ، تو اس دن ان میں سے ایک قبیلہ سرکش ہو گیا ، جس کا نام بنو عصیہ تھا کیونکہ ان لوگوں نے اللہ اور اس کے رسول کی نافرمانی کی تھی تو جہینہ قبیلے کے لوگوں نے ان کے ساتھ لڑائی کی نبی اکرم صلی اللہ علیہ وسلم نے جہینہ کو حکم دیا ، تو وہ بڑھ کر ہوازن کی طرف گئے ، اور انہوں نے سلیم قبیلے کو ان کی جگہ سے پھیر دیا اس دن اللہ تعالیٰ نے انہیں پسپا کر دیا اس دن بہت قتل و غارت گری ہوئی تھی ، سیدنا عمرو بن مرہ رضی اللہ عنہ نے اس دن ابن ذی بردین ہلالی کو قتل کیا اور جہینہ قبیلے کے لئے اس میں بڑی عمدہ آزمائش تھی ۔
یہ روایت امام طبرانی نے نقل کی ہے ۔ اس کی سند میں راویوں کی ایک جماعت ایسی ہے جن سے میں واقف نہیں ہوں ۔

سیدنا عیاض رضی اللہ عنہ بیان کرتے ہیں : نبی اکرم صلی اللہ علیہ وسلم بارہ ہزار افراد کے ساتھ ہوازن تشریف لائے غزوہ حنین کے موقع پر ہم اہل طائف میں سے اتنے افراد قتل ہوئے تھے جتنے غزوہ بدر کے موقع پر قریش کے افراد قتل ہوئے تھے نبی اکرم صلی اللہ علیہ وسلم نے زمین کی مٹھی بھر مٹی لی اور وہ ہماری طرف پھینکی تو ہم پسپا ہو گئے ۔
یہ روایت امام طبرانی نے نقل کی ہے ۔ اس کی سند میں ایک راوی عبداللہ بن عیاض ہے ابن ابوحاتم نے اس کا ذکر کیا ہے ۔ انہوں نے اس پر جرح نہیں کی ہے ۔ اس روایت کے بقیہ رجال ثقہ ہیں ۔

سیدنا زید بن ارقم رضی اللہ عنہ بیان کرتے ہیں : غزوہ حنین کے دن لوگ نبی اکرم صلی اللہ علیہ وسلم کو چھوڑ کر پیچھے ہو گئے ، تو نبی اکرم صلی اللہ علیہ وسلم نے ارشاد فرمایا : ” میں نبی ہوں یہ بات جھوٹ نہیں ہے ، اور میں عبدالمطلب کا بیٹا ہوں “ ۔
یہ روایت امام طبرانی نے نقل کی ہے ، اور اس کے رجال ثقہ ہیں ۔

عمرو بن دینار بیان کرتے ہیں : میرے علم کے مطابق یہ بات سیدنا جابر رضی اللہ عنہ سے منقول ہے کہ نبی اکرم صلی اللہ علیہ وسلم نے غزوہ حنین کے دن یہ بات ارشاد فرمائی تھی اب بھٹی گرم ہو گئی ہے پھر نبی اکرم صلی اللہ علیہ وسلم نے فرمایا : یہ لوگ پسپا ہو جائیں گے رب کعبہ کی قسم ۔
یہ روایت امام طبرانی نے معجم اوسط میں نقل کی ہے ، اور اس کے رجال صحیح کے رجال ہیں ۔

اور سیدنا یزید بن عامر سوائی رضی اللہ عنہ سے روایت ہے ، وہ بیان کرتے ہیں کہ غزوہِ حنین کے دن جب مسلمانوں میں بھگدڑ مچ گئی (اور وہ پیچھے ہٹ گئے ) تو کفار نے ان کا پیچھا کیا ۔ چنانچہ رسول اللہ صلی اللہ علیہ وسلم نے زمین سے ایک مٹھی مٹی لی اور اسے ان (کفار) کے چہروں پر پھینکا اور فرمایا :” لوٹ جاؤ ! یہ چہرے ذلیل و رسوا ہو گئے “ ۔ (چونکہ یزید بن عامر اس وقت کافروں کے لشکر میں تھے ، اس لیے وہ بتاتے ہیں کہ اس مٹھی کا اثر یہ تھا کہ) ہم میں سے جو بھی اپنے کسی ساتھی سے ملتا تھا تو وہ آنکھ میں کرکری (مٹی یا تنکا) پڑنے کی شکایت کر رہا ہوتا تھا اور اپنی آنکھیں مل رہا ہوتا تھا ۔
(اسے امام طبرانی رحمہ اللہ نے روایت کیا ہے ، اور اس کے تمام راوی ثقہ ہیں) ۔

یزید بن عامر سوائی کے بارے میں یہ بات منقول ہے کہ جب مسلمان غزوہ حنین کے موقع پر بکھر گئے ، اور کفار نے ان کا پیچھا کیا ، تو اس وقت نبی اکرم صلی اللہ علیہ وسلم نے زمین سے مٹی لی اور اسے دشمن کی طرف پھینکا اور فرمایا : واپس چلے جاؤ تمہارے چہرے قبیح ہوں راوی کہتے ہیں : تو ہم میں سے جو شخص بھی اپنے بھائی سے ملتا تھا تو وہ گندگی ( یا غبار ) کی شکایت کرتا تھا ، اور اپنی آنکھیں مل رہا ہوتا تھا ۔
یہ روایت امام طبرانی نے نقل کی ہے ، اور اس کے رجال ثقہ ہیں ۔

سیدنا یزید بن عامر سوائی رضی اللہ عنہ جو غزوہ حنین میں مشرکین کے ساتھ شریک ہوئے تھے اور پھر بعد میں انہوں نے اسلام قبول کر لیا تھا راوی کہتے ہیں : ہم نے ان سے اس رعب کے بارے میں دریافت کیا : جو غزوہ حنین کے موقع پر اللہ تعالیٰ نے ان لوگوں کے دلوں میں ڈال دیا تھا وہ کیسا تھا ؟ تو سیدنا یزید بن عامر سوائی رضی اللہ عنہ نے کنکریاں لیں اور انہیں طشت پر ڈالا تو ان کی آواز آئی ، تو انہوں نے فرمایا : ہمیں اپنے پیٹ میں اس کی مانند محسوس ہو رہا تھا ۔
یہ روایت امام طبرانی نے نقل کی ہے ، اور اس کے رجال ثقہ ہیں ۔ سیدنا جبیر بن مطعم رضی اللہ عنہ بیان کرتے ہیں : غزوہ حنین کے دن میں نے آسمان اور زمین کے درمیان چادر کی مانند ایک سیاہ چیز دیکھی جب وہ زمین کی طرف آئی ، تو زمین میں ذروں کی طرح پھیل گئی اور مشرکین پسپا ہو گئے ۔
یہ روایت امام طبرانی نے معجم اوسط میں دو اسناد کے ساتھ نقل کی ہے ، جس میں سے ایک سند میں ایک راوی عباد بن آدم ہے کسی نے اس کی توثیق نہیں کی اور اس پر جرح نہیں کی ۔

سیدنا عبداللہ بن عباس رضی اللہ عنہما روایت کرتے ہیں نبی اکرم صلی اللہ علیہ وسلم نے ارشاد فرمایا : ” مجھے مٹھی بھر کنکریاں پکڑاؤ وہ میں نے آپ کو پکڑائیں وہ آپ نے دشمن کی طرف پھینکیں تو دشمن میں سے ہر ایک کی آنکھوں میں کنکریاں بھر گئیں اس بارے میں یہ آیت نازل ہوئی تھی : ” جب تم نے کنکریاں پھینکیں تھیں تو وہ تم نے نہیں پھینکیں تھیں بلکہ وہ اللہ نے پھینکیں تھیں “ ۔
یہ روایت امام طبرانی نے معجم اوسط میں نقل کی ہے ۔ اس کی سند میں ایک راوی یحیی بن یعلیٰ ہے ، اور وہ ضعیف ہے ۔

سیدنا عبداللہ بن عباس رضی اللہ عنہما بیان کرتے ہیں سیدنا علی بن ابوطالب رضی اللہ عنہ نے نبی اکرم صلی اللہ علیہ وسلم کو مٹی پکڑائی تھی جو آپ نے مشرکین کی طرف پھینکی تھی یہ جنگ حنین کے موقع پر ہوا تھا ۔
یہ روایت امام بزار نے اسماعیل بن سیف کے حوالے سے نقل کی ہے ، اور وہ ضعیف ہے ۔

سیدنا انس رضی اللہ عنہ بیان کرتے ہیں : غزوہ حنین کے موقع پر جب مسلمان پسپا ہو گئے ، اور نبی اکرم صلی اللہ علیہ وسلم اس وقت اپنے شہباء خچر پر سوار تھے جس کا نام دلدل تھا نبی اکرم صلی اللہ علیہ وسلم نے اس سے فرمایا : اے دلدل تم بیٹھ جاؤ تو اس نے اپنا پیٹ زمین کے ساتھ ملا لیا ، یہاں تک کہ نبی اکرم صلی اللہ علیہ وسلم نے مٹھی بھر مٹی لی اور وہ ان لوگوں کی طرف پھینکی آپ نے فرمایا : حم لا ینصرون تو دشمن پسپا ہو گیا حالانکہ ہم نے نہ انہیں کوئی تیر مارا تھا نہ کوئی نیزہ مارا تھا نہ انہیں تلوار کے ذریعے ضرب لگائی تھی ۔
یہ روایت امام طبرانی نے معجم اوسط میں نقل کی ہے ۔ اس کی سند میں ایک راوی أحمد بن محمد بن قاسم ہے ، اور وہ ضعیف ہے ۔

مصعب بن شیبہ اپنے والد کا یہ بیان نقل کرتے ہیں غزوہ حنین کے موقع پر میں نبی اکرم صلی اللہ علیہ وسلم کے ساتھ نکلا اللہ کی قسم نہ تو اسلام نے مجھے نکالا تھا ، اور نہ ہی اس کی معرفت نے مجھے نکلنے پر مجبور کیا تھا لیکن میری یہ خواہش تھی کہ ہوازن قریش پر غالب آ جائیں میں نے کہا: میں اس وقت آپ کے ساتھ تھا یا رسول اللہ ! میں نے ابلق گھوڑا دیکھا ہے ۔ نبی اکرم صلی اللہ علیہ وسلم نے فرمایا : اے شیبہ اسے کوئی کافر ہی دیکھ سکتا ہے پھر نبی اکرم صلی اللہ علیہ وسلم نے اپنا دست مبارک میرے سینے پر مارا اور پھر دعا کی اے اللہ تو شیبہ کو ہدایت نصیب کر پھر نبی اکرم صلی اللہ علیہ وسلم نے دوسری مرتبہ اسے مارا اور فرمایا : اے اللہ تو شیبہ کو ہدایت نصیب کر تو اللہ کی قسم تیسری مرتبہ ابھی آپ نے اپنا ہاتھ میرے سینے سے بلند نہیں کیا تھا کہ اللہ کی مخلوق میں کوئی بھی میرے نزدیک آپ سے زیادہ محبوب نہیں تھا ۔ راوی بیان کرتے ہیں : جب دونوں فریقوں کا مقابلہ ہوا تو نبی اکرم صلی اللہ علیہ وسلم اپنی اونٹنی پر یا شاید خچر پر سوار تھے سیدنا عمر رضی اللہ عنہ نے اس کی لگام پکڑی ہوئی تھی سیدنا عباس بن عبدالمطلب رضی اللہ عنہ نے اس جانور کا منہ پکڑا ہوا تھا مسلمان پسپا ہو گئے ، تو سیدنا عباس رضی اللہ عنہ نے بلند آواز میں کہا: مہاجرین اولین کہاں ہیں ؟ سورت بقرہ والے لوگ کہاں ہیں ؟ اور نبی اکرم صلی اللہ علیہ وسلم یہ فرما رہے تھے آگے بڑھو ۔ میں نبی ہوں اس میں کوئی جھوٹ نہیں ہے ، اور میں عبدالمطلب کا بیٹا ہوں تو مسلمان پلٹ آئے ، اور انہوں نے اپنی تلواریں نکال لیں نبی اکرم صلی اللہ علیہ وسلم نے ارشاد فرمایا : اب بھٹی گرم ہو گئی ہے ۔ راوی کہتے ہیں : تو اللہ تعالیٰ نے مشرکین کو پسپا کر دیا ۔
یہ روایت امام طبرانی نے نقل کی ہے ۔ اس کی سند میں ایک راوی ایوب بن جابر ہے ، اور وہ ضعیف ہے ۔

مکرمہ بیان کرتے ہیں : سیدنا شیبہ بن عثمان رضی اللہ عنہ نے یہ بات بیان کی ہے کہ جب غزوہ حنین کے لئے نبی اکرم صلی اللہ علیہ وسلم نے تیاری کی تو مجھے اپنے والد اور اپنے چچا یاد آ گئے جنہیں سیدنا علی رضی اللہ عنہ اور سیدنا حمزہ رضی اللہ عنہ نے قتل کیا تھا میں نے کہا: آج میں سیدنا محمد ( صلی اللہ علیہ وسلم ) سے اپنا بدلہ لے لوں گا میں آپ کے پاس آیا تو سیدنا عباس رضی اللہ عنہ آپ کے دائیں طرف موجود تھے انہوں نے سفید زرہ پہنی ہوئی تھی یوں جیسے وہ چاندی کی بنی ہوئی ہو ، غبار ہٹا ، تو میں نے کہا: یہ تو ان کے چچا ہیں یہ انہیں رسوائی کا شکار نہیں کریں گے پھر میں بائیں طرف سے آپ کے پاس آیا تو وہاں ابوسفیان بن حارث موجود تھے میں نے کہا: یہ تو ان کے چچا زاد ہیں یہ انہیں رسوائی کا شکار نہیں کریں گے پھر میں پیچھے سے آپ کی طرف آیا میں قریب ہوتا گیا قریب ہوتا گیا ، یہاں تک کہ اتنا فاصلہ باقی رہ گیا کہ میں آپ کو تلوار مار سکتا تھا لیکن اسی دوران آگ کا ایک شعلہ میرے سامنے آیا جو برق کی مانند تھا مجھے یہ ڈر ہوا کہ کہیں وہ مجھے جلا نہ دے تو میں الٹے پاؤں پیچھے ہٹ گیا نبی اکرم صلی اللہ علیہ وسلم نے میری طرف متوجہ ہو کر ارشاد فرمایا : اے شیب آگے آ جاؤ پھر نبی اکرم صلی اللہ علیہ وسلم نے اپنا دست مبارک میرے سینے پر رکھا تو اللہ تعالیٰ نے میرے دل سے شیطان کو نکال دیا میں نے نگاہ اٹھا کر آپ کی طرف دیکھا تو آپ میری سماعت اور میری بصارت میں میرے نزدیک سب سے زیادہ محبوب تھے پھر آپ نے مجھ سے فرمایا : اے شیب کفار کے ساتھ لڑائی کرو پھر آپ نے فرمایا : اے عباس مہاجرین اولین کو بلند آواز میں بالائیں جنہوں نے درخت کے نیچے بیعت کی تھی اور انصار کو بلائیں جنہوں نے پناہ دی تھی اور مدد کی تھی راوی کہتے ہیں : تو انصار نبی اکرم صلی اللہ علیہ وسلم کی طرف اس طرح واپس آئے جس طرح گائے اپنی اولاد کی طرف آتی ہے ، یہاں تک کہ نبی اکرم صلی اللہ علیہ وسلم سواری سے یوں نیچے اتر آئے جیسے وہ درختوں کے اکٹھے ہونے کی جگہ ہوتی ہے ۔ راوی کہتے ہیں : انصار کے نیزوں کے حوالے سے میرے نزدیک نبی اکرم صلی اللہ علیہ وسلم کو کفار کے نیزوں سے زیادہ خوف تھا ، پھر آپ نے ارشاد فرمایا : اے عباس مجھے مٹی پکڑائیں اللہ تعالیٰ نے آپ کے خچر کو آپ کا کلام سمجھا دیا وہ نیچے جھک گیا ، یہاں تک کہ اس کا پیٹ زمین کے ساتھ مس ہونے لگا نبی اکرم صلی اللہ علیہ وسلم نے کنکریاں اٹھائیں اور پھر ان کے چہروں کی طرف پھونک ماری اور پھر یہ کہا: ان کے چہرے قبیح ہو جائیں ، حم لا ینصرون ۔
یہ روایت امام طبرانی نے نقل کی ہے ۔ اس کی سند میں ایک راوی ابوبکر ہذلی ہے ، اور وہ ضعیف ہے ۔

محمد بن سلام جمحی بیان کرتے ہیں : مالک بن عوف بن سعد بن ربیعہ بن یربوع بن واثلہ بن دہمان بن نصر بن معاویہ بن بکر بن ہوازن ابن سلام کہتے ہیں عوف نامی صاحب ایک رئیس اور پیشوا تھے ان کا ذکر اور ان کی شہرت کا آغاز یوم فجار سے ہوا تھا جب وہ اپنی قوم کے ساتھ تھے اس موقع پر انہوں نے بڑا کام کیا تھا ، اور وہ اس وقت ہوازن کے امیر تھے جب نبی اکرم صلی اللہ علیہ وسلم نے ہوازن کے ساتھ مقابلہ کیا تھا وہ اپنے ساتھ اپنے اموال اور بال بچے بھی لے کے آئے تھے درید بن صمہ نے ان کی مخالفت کی وہ اندر چلے گئے ، اور انکار کیا ، تو سارا معاملہ اس کی طرف آ گیا انہوں نے اس کی رائے کی تعریف نہیں کی وہ ان دنوں ان کا رئیس تھا جب اس نے اپنے ساتھیوں کی ہزیمت دیکھی تو اس نے نبی اکرم صلی اللہ علیہ وسلم کا قصد کیا وہ تیزی سے پیش قدمی کرنے والا شخص تھا تاکہ آپ کو نقصان پہنچائے ، تو سیدنا مرثد بن ابومرثد غنوی رضی اللہ عنہ اس کے مقابلے میں آئے ، اور انہوں نے اسے قتل کر دیا انہوں نے اس کے گھوڑے پر محاج کو سوار کیا لیکن وہ آگے نہیں بڑھا پھر انہوں نے اس کا ارادہ کیا اور بلند آواز میں اسے پکارا تو وہ آگے نہیں بڑھا تو انہوں نے یہ اشعار کہے : ” اے محاج آگے بڑھو ، یہ نا قابل برداشت دن ہے ، میرے جیسا تم جیسے پر حمایت کرتا ہے اور پلٹ کر حملہ آور ہوتا ہے ، اور ایسا وار کرتا ہے ، جو دہشت زدہ اور اضطراب کا شکار کر دیتی ہے ، اس سے پیٹ سے تیزی سے خون بہنے لگتا ہے ، اور اس میں کام کرنے والے کے نیزے کا سرا ٹوٹ جاتا ہے ، جب ایک کے بعد دوسرے گروہ بلند ہوتے ہیں “ اس کے بعد جب انہوں نے اسلام قبول کر لیا تو وہ جنگ قادسیہ میں شریک ہوئے تھے وہاں انہوں نے یہ اشعار کہے تھے ” اے محاج ! آگے بڑھو ! یہ ان کے شہسوار ہیں اور ان کا نادر ( یعنی مختلف ) ہونا تمہیں ہولناکی کا شکار نہ کرے “ ۔ پھر وہ حنین سے پسپا ہو گئے ، اور طائف چلے گئے نبی اکرم صلی اللہ علیہ وسلم نے ارشاد فرمایا : اگر وہ میرے پاس آ گیا تو میں اسے امان بھی دوں گا اور اسے ایک سو ( اونٹ ) بھی دوں گا پھر وہ صاحب آئے ، تو نبی اکرم صلی اللہ علیہ وسلم نے ان کے ساتھ ایسا ہی کیا پھر نبی اکرم صلی اللہ علیہ وسلم نے انہیں اہل طائف کے ساتھ جنگ کے لئے بھیجا ۔ سیدنا سعد بن ابی وقاص رضی اللہ عنہ نے ایک مرتبہ سیدنا عمر بن خطاب رضی اللہ عنہ کو خط لکھا جس میں ان سے مدد مانگی تو سیدنا عمر رضی اللہ عنہ نے انہیں جوابی خط میں لکھا تھا کہ تم مجھ سے مدد مانگ رہے ہو حالانکہ تمہارے پاس دس ہزار افراد موجود ہیں تمہارے پاس مالک بن عوف ہے حنظلہ بن ربیعہ ہے یہ وہی صاحب ہیں ، جنہیں حنظلہ کاتب کہا: جاتا ہے ۔ ابن سلام بیان کرتے ہیں : ان کی قوم کے کسی فرد نے مجھے یہ بات بتائی ہے کہ انہوں نے سیدنا عمر بن خطاب رضی اللہ عنہ سے یہ کہا: تھا : نبی اکرم صلی اللہ علیہ وسلم نے مجھے اس لئے ( مال ) عطا کیا تھا تاکہ اسلام کے حوالے سے میری تالیف قلب کریں مجھے یہ بات اچھی نہیں لگی کہ میں اسلام قبول کرنے کا معاوضہ وصول کروں میں نے یہ ارادہ کیا کہ میں اسے واپس کروں تو سیدنا عمر رضی اللہ عنہ نے کہا: کہ نبی اکرم صلی اللہ علیہ وسلم نے یہ تمہیں صرف اس لئے دیا ہے کہ آپ صلی اللہ علیہ وسلم یہ سمجھتے تھے کہ یہ تمہارا حق ہے ۔
یہ روایت امام طبرانی نے خلیفہ بن خیاط کے حوالے سے محمد بن سلام جمحی سے نقل کی ہے ، اور یہ دونوں ثقہ ہیں ۔

عبدالرحمن بن ازہر کے بارے میں یہ بات منقول ہے وہ بیان کرتے ہیں : وہ نبی اکرم صلی اللہ علیہ وسلم کے پاس موجود تھے جب نبی اکرم صلی اللہ علیہ وسلم نے دشمن پر مٹی پھینکی تھی ۔
یہ روایت امام أحمد نے نقل کی ہے ، اور اس کے رجال صحیح کے رجال ہیں ۔

سیدنا رافع بن خدیج رضی اللہ عنہ کی اہلیہ بیان کرتی ہیں سیدنا رافع رضی اللہ عنہ کو غزوہ احد کے موقع پر یا جنگ حنین کے موقع پر پہلو میں ایک تیر لگ گیا وہ نبی اکرم صلی اللہ علیہ وسلم کے پاس آئے انہوں نے عرض کی : یا رسول اللہ ! آپ تیر نکال دیں نبی اکرم صلی اللہ علیہ وسلم نے فرمایا : اے رافع اگر تم چاہو ، تو تم تیر اور اس کا پھل دونوں نکلوا لو اگر تم چاہو ، تو میں تیر نکال دیتا ہوں ، اور پھل اندر رہنے دیتا ہوں ، اور قیامت کے دن میں تمہارے حق میں یہ گواہی دوں گا کہ تم شہید ہو ، تو انہوں نے عرض کی : یا رسول اللہ ! آپ تیر نکال دیں ، اور پھل اندر رہنے دیں راوی کہتے ہیں : تو نبی اکرم صلی اللہ علیہ وسلم نے تیر نکال دیا ، اور پھل رہنے دیا ۔
یہ روایت امام أحمد نے نقل کی ہے ۔ سیدنا رافع رضی اللہ عنہ کی اہلیہ سے میں واقف نہیں ہوں اس روایت کے بقیہ رجال ثقہ ہیں ۔

عبدالصمد بن حبیب عوذی اپنے والد کا یہ بیان نقل کرتے ہیں ہم نے سیدنا سنان بن سلمہ بن محبق رضی اللہ عنہ کے ہمراہ ایک جنگ میں حصہ لیا تو انہوں نے بتایا : میں غزوہ حنین کے دن پیدا ہوا تھا میرے بارے میں جب میرے والد کو خوشخبری سنائی گئی اور لوگوں نے کہا: کہ آپ کے ہاں بیٹا ہوا ہے ، تو انہوں نے فرمایا : میں نبی اکرم صلی اللہ علیہ وسلم کی طرف سے ایک سنان ( یعنی تیر ) پھینکوں یہ میرے نزدیک اس سے زیادہ محبوب ہو گا جس کی تم نے مجھے خوشخبری سنائی ہے پھر انہوں نے میرا نام سنان رکھا ۔
یہ روایت امام أحمد نے نقل کی ہے حبیب نامی راوی سے ان کے صاحبزادے کے علاوہ اور کسی نے روایت نقل نہیں کی ہے ۔

سیدنا عداء بن خالد بن ہوذہ رضی اللہ عنہ بیان کرتے ہیں : ہم نے نبی اکرم صلی اللہ علیہ وسلم کے ساتھ لڑائی کی تو اللہ تعالیٰ نے ہماری مدد نہیں کی اور اس میں ہمیں غلبہ نہیں دیا ۔
یہ روایت امام طبرانی نے نقل کی ہے ، اور اس کے رجال ثقہ ہیں ۔