مجمع الزوائد ومنبع الفوائد

سیدنا بدیل بن ورقاء رضی اللہ عنہ بیان کرتے ہیں : نبی اکرم صلی اللہ علیہ وسلم نے انہیں حکم دیا کہ وہ قیدیوں اور اموال کو جعرانہ کے مقام پر روک کے رکھیں جب تک نبی اکرم صلی اللہ علیہ وسلم تشریف نہیں لے آتے راوی کہتے ہیں : تو میں نے اسے روک کے رکھا ۔
یہ روایت امام طبرانی نے معجم کبیر اور معجم اوسط میں نقل کی ہے ۔ امام بزار نے بھی اسے نقل کیا ہے ۔ انہوں نے اسے سیدنا بدیل رضی اللہ عنہ کے صاحبزادے کے حوالے سے ان کے والد سے نقل کیا ہے ۔ انہوں نے سیدنا بدیل رضی اللہ عنہ کے صاحبزادے کا نام بیان نہیں کیا ہے ۔ اس روایت کے بقیہ رجال ثقہ ہیں ۔

سیدنا ابوجرول زہیر بن صرد رضی اللہ عنہ بیان کرتے ہیں : جب غزوہ حنین کے موقع پر ہوازن کے ساتھ جنگ کے موقع پر اللہ کے رسول نے ہمیں قیدی بنا لیا تو آپ قیدیوں اور بھیڑ بکریوں کو الگ کرنے لگے میں آپ کے پاس آیا اور میں نے یہ اشعار سنانے شروع کیے : ” اے اللہ کے رسول اکرم کے ہمراہ ہم پر احسان کیجیے ! کیونکہ آپ ایک ایسے فرد ہیں ، جن سے ہم امید رکھتے ہیں اور ہم ( آپ کے کرم کے ) منتظر ہیں ، آپ اس جماعت پر احسان کیجیے جس کو تقدیر نے عاق کر دیا ہے ، اور اس کی اجتماعیت کو منتشر کر کے زمانے نے ان کے احوال تبدیل کر دیے ہیں ، زمانے نے ہمیں یوں باقی رکھا ہے کہ ہم غم کی چیخ و پکار کرتے ہیں ، ان کے دلوں پر شدید غم اور پریشانی ہے ، اگر آپ نے رحمت کو پھیلا کر ، ان کی مدد نہ کی ، اے وہ فرد کہ جب تحقیق کی جائے تو برد باری کے حوالے سے آپ لوگوں میں سب سے زیادہ راجح ہوں گے ، آپ ان خواتین پر مہربانی کیجیئے ، جن کا آپ نے دودھ پیا ہے ، کیونکہ آپ کے منہ میں ، ان کے دودھ کے برتن کے ذریعے خالص دودھ آیا ، جب آپ چھوٹے بچے تھے تو آپ ان کا دودھ پیتے تھے ، جب آپ کو وہ چیز اچھی لگتی تھی جو وہ لے کر آتی تھی اور جو وہ چھوڑ جاتی تھی ، آپ ہمیں اس کی طرح نہ بنا دیں ، جس کی اجتماعیت منتشر ہو گئی ، اور ہمیں باقی رہنے دیں کیونکہ ہم روشن گروہ ہیں ، جب کفران نعمت کیا جائے تو ہم اس وقت ( نعمتوں کے ) شکر گزار ہوتے ہیں ، اور اس دن کے بعد بھی ہمارے پاس ذخیرہ ہے ، تو آپ انہیں معافی عطا کر دیں جن کے ہاں آپ کی رضاعت ہوئی تھی ، جن میں آپ کی ( رضاعی ) مائیں بھی ہیں ، کیونکہ معاف کرنا مشہور ہوتا ہے ، اے ان میں سب سے بہتر ، کہ جنگ کے وقت ، سرخ و سیاہ رنگ کے گھوڑے جس سے آرام پاتے ہیں ، جب تک ( جنگ کے ) شعلے بھڑکتے رہیں ، ہم آپ کی طرف سے معافی کی امید رکھتے ہیں ، آپ کو ” مخلوق کو ہدایت دینے والے “ کا لقب دیا گیا ہے ، کیونکہ آپ معاف کرتے ہیں اور مدد کرتے ہیں ، تو آپ معاف کر دیں ، اللہ تعالیٰ قیامت کے دن آپ کو ان چیزوں سے بچا کر رکھے ، جن سے آپ بچنا چاہتے ہیں اور آپ کو کامیابی نصیب کرے “ ۔ جب نبی اکرم صلی اللہ علیہ وسلم نے یہ اشعار سنے تو آپ نے فرمایا : جو چیز میرے حصے میں اور بنو عبدالمطلب کے حصے میں آتی ہے وہ تمہاری ہوئی قریش نے کہا: جو چیز ہمارے حصے میں آتی ہے وہ اللہ اور اس کے رسول کی ہوئی انصار نے کہا: جو چیز ہمارے حصے میں آتی ہے وہ اللہ اور اس کے رسول کی ہوئی ۔
یہ روایت امام طبرانی نے تینوں کتابوں میں نقل کی ہے ، اور اس کی سند میں ایسے راوی ہیں ، جن سے میں واقف نہیں ہوں ۔

سیدنا عبداللہ بن عمرو رضی اللہ عنہ بیان کرتے ہیں : ہوازن قبیلے کا وفد جب جعرانہ میں نبی اکرم صلی اللہ علیہ وسلم کی خدمت میں حاضر ہوا تو وہ لوگ اسلام قبول کر چکے تھے انہوں نے عرض کی : ہم اصل ہیں ، اور خاندان کے لوگ ہیں ہمیں جو آزمائش لاحق ہوئی ہے وہ آپ سے مخفی نہیں ہے آپ ہم پر احسان کیجئے اللہ تعالیٰ آپ پر مہربانی کرے ہوازن قبیلے سے تعلق رکھنے والے ایک صاحب جن کا تعلق بنو سعد بن بکر سے تھا جن کا نام زہیر تھا ، اور ان کی کنیت ابوصرد تھی انہوں نے یہ بات بیان کی یا رسول اللہ ہماری عورتیں آپ کی پھوپھیاں ہیں آپ کی خالائیں ہیں آپ کی دائی مائیں ہیں ، جنہوں نے آپ کی کفالت کی تھی اگر ہم حارث بن ابوشمر یا نعمان بن منذر سے جا کے ملے ہوتے اور پھر اس کی طرف سے ہمیں اس طرح کی صورت حال کا سامنا کرنا پڑتا جس طرح کی صورت حال کا ہمیں سامنا کرنا پڑ رہا ہے ، تو ہمیں اس کی اپنے اوپر مہربانی اور عنایت کی امید ہونی تھی اور آپ تو کفالت کرنے والوں میں سب سے بہتر ہیں پھر انہوں نے نبی اکرم صلی اللہ علیہ وسلم کو اشعار سنائے جو انہوں نے کہے تھے اور اس میں انہوں نے نبی اکرم صلی اللہ علیہ وسلم کے ساتھ اپنی قرابت کا ذکر کیا اور نبی اکرم صلی اللہ علیہ وسلم کی جو انہوں نے کفالت کی تھی اس کا ذکر کیا اور یہ اشعار سنائے : ” اے اللہ کے رسول ! کرم کے ہمراہ ہم پر احسان کیجیے ! کیونکہ آپ ایک ایسے فرد ہیں ، جن سے ہم امید رکھتے ہیں اور ہم ( آپ کے کرم کے ) منتظر ہیں ، آپ اس جماعت پر احسان کیجیے جس کو تقدیر نے عاق کر دیا ہے ، اور اس کی اجتماعیت کو منتشر کر کے زمانے نے ان کے احوال تبدیل کر دیے ہیں ، زمانے نے ہمیں یوں باقی رکھا ہے کہ ہم غم کی چیخ و پکار کرتے ہیں ان کے دلوں پر شدید غم اور پریشانی ہے ، اگر آپ نے رحمت کو پھیلا کر ، ان کی مدد نہ کی ، اے وہ فرد کہ جب تحقیق کی جائے تو برد باری کے حوالے سے آپ لوگوں میں سب سے زیادہ راجح ہوں گے ، آپ ان خواتین پر مہربانی کیجئے جن کا آپ نے دودھ پیا ہے ، کیونکہ آپ کے منہ میں ، ان کے دودھ کے برتن کے ذریعے خالص دودھ آیا ، جب آپ چھوٹے بچے تھے تو آپ ان کا دودھ پیتے تھے ، جب آپ کو وہ چیز اچھی لگتی تھی جو وہ لے کر آتی تھی اور جو وہ چھوڑ جاتی تھی ، آپ ہمیں اس کی طرح نہ بنا دیں ، جس کی اجتماعیت منتشر ہو گئی اور ہمیں باقی رہنے دیں کیونکہ ہم روشن گروہ ہیں “ ۔ راوی بیان کرتے ہیں : اس کے بعد انہوں نے پوری حدیث ذکر کی ہے ۔
یہ روایت امام طبرانی نے نقل کی ہے ۔ اس کی سند میں ایک راوی ابن اسحاق ہے ، اور وہ مدلس ہے لیکن وہ ثقہ ہے ۔ اس روایت کے بقیہ رجال ثقہ ہیں ۔

سیدنا عبداللہ بن عمرو رضی اللہ عنہ بیان کرتے ہیں : غزوہ حنین کے موقع پر میں نبی اکرم صلی اللہ علیہ وسلم کے پاس موجود تھا ہوازن کے وفود آپ کی خدمت میں حاضر ہوئے انہوں نے عرض کی : یا رسول اللہ ! ہم اصل ہیں اور خاندان کے لوگ ہیں آپ ہم پر احسان کیجئے اللہ تعالیٰ آپ پر احسان کرے گا کیونکہ ہمیں جس آزمائش کا سامنا کرنا پڑا ہے وہ آپ سے مخفی نہیں ہے ۔ نبی اکرم صلی اللہ علیہ وسلم نے فرمایا : تم اپنی بیویوں اموال اور بچوں میں سے کسی کو اختیار کر لو انہوں نے عرض کی : آپ نے ہمارے حسب اور ہمارے اموال کے درمیان ہمیں اختیار دیا ہے تو ہم اپنے بیٹوں کو اختیار کرتے ہیں نبی اکرم صلی اللہ علیہ وسلم نے ارشاد فرمایا : جو میرے حصے میں اور بنو عبدالمطلب کے حصے میں آتا ہے وہ تمہارا ہوا جب میں ظہر کی نماز ادا کر لوں گا ، تو تم یہ کہنا کہ ہم اللہ کے رسول کی سفارش مسلمانوں کے سامنے پیش کرتے ہیں ، اور مسلمانوں کی سفارش اللہ کے رسول کے سامنے پیش کرتے ہیں جو ہماری خواتین اور ہمارے بچوں کے بارے میں ہے ۔ انہوں نے ایسا ہی کیا ، تو نبی اکرم صلی اللہ علیہ وسلم نے یہ ارشاد فرمایا : جو کچھ میرے حصے میں اور بنو عبدالمطلب کے حصے میں آتا ہے وہ تمہارا ہوا مہاجرین نے کہا: جو ہمارے حصے میں آتا ہے وہ اللہ کے رسول کا ہوا انصار نے بھی اس کی مانند بات کہی عیینہ بن بدر نے کہا: جہاں تک اس چیز کا تعلق ہے ، جو میرے اور بنوفزارہ کے حصے میں آتی ہے ، تو وہ ہم نہیں دیتے اقرع بن حابس نے کہا: جو چیز میرے اور بنو تمیم کے حصے میں آتی ہے وہ بھی ہم نہیں چھوڑتے عباس بن مرداس نے کہا: جو چیز میرے اور بنوسلیم کے حصے میں آتی ہے وہ ہم نہیں چھوڑتے حیان نے کہا: تم غلط کہہ رہے ہو بلکہ وہ بھی اللہ کے رسول کی ہو گی تو نبی اکرم صلی اللہ علیہ وسلم نے ارشاد فرمایا : اے لوگو تم ان کی عورتیں اور ان کے بیٹے انہیں واپس کر دو تم میں سے جو شخص اس مال غنیمت میں سے کوئی چیز رکھنا چاہتا ہو ، تو اللہ تعالیٰ ہمیں جو پہلا مال فئے عطا کرے گا اس میں سے ہم چھ حصے اسے دے دیں گے پھر نبی اکرم صلی اللہ علیہ وسلم اپنی سواری پر سوار ہوئے ، اور لوگوں کے ساتھ ملے لوگوں نے یہ کہنا شروع کیا کہ آپ ہمارے درمیان تقسیم کریں جو ہمارا مال فئے ہے ، یہاں تک کہ لوگوں نے آپ کو درخت کی طرف جانے پر مجبور کر دیا آپ کی چادر کھینچ لی گئی نبی اکرم صلی اللہ علیہ وسلم نے ارشاد فرمایا : اے لوگو میری چادر مجھے واپس کرو اللہ کی قسم اگر تمہارے لئے تہامہ کے درختوں کی تعداد جتنی نعمتیں ہوں تو میں وہ تمہارے درمیان تقسیم کر دوں گا اور پھر تم مجھ سے ایسی حالت میں نہیں ملو گے کہ مجھے کنجوس یا بزدل یا جھوٹا پاؤ پھر نبی اکرم صلی اللہ علیہ وسلم ایک اونٹ کے قریب ہوئے آپ نے اس کی کوہان میں سے ایک بال لیا اور اسے اپنی دو انگلیوں کے درمیان شہادت کی انگلی اور درمیانی انگلی کے درمیان رکھا پھر اسے بلند کیا اور فرمایا : اے لوگو اس مال فئے میں سے اور اس میں سے میرے لئے اتنی چیز لینے کی بھی اجازت نہیں ہے البتہ خمس کا حکم مختلف ہے ، اور خمس بھی تم لوگوں کی طرف لوٹا دیا جائے گا ، تو تم دھاگہ اور سوئی تک ادا کر دو کیونکہ خیانت قیامت کے دن اپنے کرنے والے کے لئے شرمندگی آگ اور رسوائی کا باعث ہو گی تو ایک شخص کھڑا ہوا جس کے پاس بالوں کا ایک گچھا تھا اس نے کہا: یا رسول اللہ ! یہ میں نے اس لئے لیا تھا تاکہ اپنے اونٹ کو نکلنے والے پھوڑے کی خاطر اسے پالان کے نیچے رکھ دوں نبی اکرم صلی اللہ علیہ وسلم نے ارشاد فرمایا : جو کچھ میرا اور بنو عبدالمطلب کے حصے کا ہے وہ تمہارا ہوا اس شخص نے عرض کی : یا رسول اللہ ! اب میں نے جو چیز دیکھی ہے جب یہ صورت حال ہو چکی ہے ، تو پھر مجھے اس میں کوئی دلچسپی نہیں ہے پھر اس نے اسے رکھ دیا ۔ ( علامہ ہیثمی فرماتے ہیں : ) میں یہ کہتا ہوں یہ روایت امام ابوداؤد نے بہت زیادہ اختصار کے ساتھ نقل کی ہے ۔
یہ روایت امام أحمد نے نقل کی ہے ، اور ان کی مختلف اسانید میں سے ایک کے رجال ثقہ ہیں ۔

سیدنا عطیہ رضی اللہ عنہ بیان کرتے ہیں ہوازن کے قیدیوں کے بارے میں جب نبی اکرم صلی اللہ علیہ وسلم سے بات چیت کی گئی ، تو انہوں نے عرض کی : یا رسول اللہ ! یہ آپ کے خاندان کے لوگ اور آپ کے اصل ہیں ، اور دودھ پلانے کے حوالے سے آپ کے رشتے دار ہیں آج کے دن کے لئے ہی ہم نے آپ کو سنبھال کے رکھا ہوا تھا یہ خواتین آپ کی مائیں ہیں آپ کی بہنیں ہیں آپ کی خالائیں ہیں نبی اکرم صلی اللہ علیہ وسلم نے اپنے اصحاب کے ساتھ اس بارے میں بات چیت کی اور ان لوگوں کے قیدی انہیں واپس کر دیے صرف دو افراد کا معاملہ مختلف تھا نبی اکرم صلی اللہ علیہ وسلم نے فرمایا : تم لوگ جاؤ اور ان دونوں کو اختیار دو تو ان دونوں میں سے ایک نے کہا: میں اپنا حصہ چھوڑتا ہوں ، اور دوسرے نے کہا: میں اسے نہیں چھوڑوں گا جب وہ شخص چلا گیا تو نبی اکرم صلی اللہ علیہ وسلم نے فرمایا : اے اللہ تو اس کے حصے کو خراب کر دے ، تو وہ شخص ایک کنواری کنیز اور لڑکے کے پاس سے گزرا اس نے اسے چھوڑ دیا پھر وہ ایک بوڑھی عورت کے پاس سے گزرا ، تو اس نے یہ سوچا کہ مجھے اس کو لے لینا چاہیے کیونکہ یہ قبیلے کی ماں ہے وہ لوگ بھرپور کوشش کر کے مجھ سے اس کو چھڑوائیں گے ، تو سیدنا عطیہ رضی اللہ عنہ نے تکبیر کہی اور کہا: اسے لے لو پھر انہوں نے نبی اکرم صلی اللہ علیہ وسلم سے کہا: یا رسول اللہ نہ تو اس عورت کا منہ ٹھنڈا ہے ، اور نہ ہی اس کی چھاتی ابھری ہے ، اور نہ ہی اس کا کوئی سگا ہے ، یا رسول اللہ یہ ایک بوڑھی عورت ہے ، اس کا کوئی نہیں ہے ، جب اس شخص نے یہ صورت حال دیکھی کہ کوئی اس عورت کی طرف توجہ نہیں دے رہا تو اس نے اس عورت کو چھوڑ دیا ۔
یہ روایت امام طبرانی نے نقل کی ہے ۔ اس کی سند میں ایک راوی زبیر ہے ، جو نعمان بن زبیر صنعانی کا والد ہے میں اس سے واقف نہیں ہوں اس روایت کے بقیہ رجال ثقہ ہیں ۔

امام طبرانی بیان کرتے ہیں : سیدنا حکیم بن حزام رضی اللہ عنہ بن خویلد بن اسد بن عبدالعزی بن قصی بن کلاب ان کی کنیت ابوخالد ہے ان کی والدہ سیدہ صفیہ رضی اللہ عنہا بنت زہیر بن حارث بن اسد ہیں اور ان کی والدہ سلمہ بنت عبد مناف بن عبدالدار ہیں ان صحابی نے فتح مکہ کے موقع پر اسلام قبول کیا تھا یہ مؤلفۃ القلوب میں سے ہیں نبی اکرم صلی اللہ علیہ وسلم نے غزوہ حنین کے مال غنیمت میں سے ایک سو اونٹ انہیں عطا کیے تھے ۔

سیدنا عبداللہ بن عباس رضی اللہ عنہما بیان کرتے ہیں نبی اکرم صلی اللہ علیہ وسلم نے غزوہ حنین کا مال غنیمت مؤلفۃ القلوب کے درمیان تقسیم کر دیا ، تو انصار کو اس حوالے سے الجھن ہوئی ۔ انہوں نے یہ کہا: کہ نبی اکرم صلی اللہ علیہ وسلم نے ان لوگوں کے درمیان ( مال غنیمت ) تقسیم کر دیا ہے ، تو نبی اکرم صلی اللہ علیہ وسلم نے ارشاد فرمایا : اے انصار کے گروہ ! کیا تم اس بات سے راضی نہیں ہو کہ تم لوگ اپنے ساتھ اللہ کے رسول کو لے جاؤ تو انہوں نے عرض کی : جی ہاں ۔
یہ روایت امام بزار نے نقل کی ہے اس کی سند میں ایک راوی حفص بن عمر عدنی ہے ، اور وہ ضعیف ہے ابن طہرانی کہتے ہیں یہ ثقہ ہے ۔

محمد بن اسحاق بیان کرتے ہیں : نبی اکرم صلی اللہ علیہ وسلم نے حنین میں ہوازن قبیلے کے وفد سے فرمایا جب کہ ان لوگوں سے آپ نے مالک بن عوف نصری کے بارے میں دریافت کیا تھا کہ مالک کا کیا حال ہے ، تو انہوں نے بتایا : وہ طائف میں ہیں نبی اکرم صلی اللہ علیہ وسلم نے فرمایا : تم لوگ مالک کو یہ بتا دو کہ اگر وہ مسلمان ہو کر میرے پاس آ گیا تو میں اس کے اہلخانہ اور اس کا مال اسے واپس کر دوں گا اور اسے ایک سو اونٹ بھی دوں گا ، اس بات کی اطلاع مالک کو دی گئی ، تو وہ طائف سے نکل کر نبی اکرم صلی اللہ علیہ وسلم کے پاس آئے مالک کو اپنی ذات کے حوالے سے ثقیف قبیلے کے لوگوں سے اندیشہ تھا کہ وہ یہ بات جان چکے ہیں کہ نبی اکرم صلی اللہ علیہ وسلم نے ان کے بارے میں یہ بات کہی ہے ، تو کہیں وہ ان کو قید نہ کر لیں مالک نے اپنی سواری کے بارے میں حکم دیا وہ تیار کی گئی ۔ انہوں نے اپنے گھوڑے کے بارے میں حکم دیا وہ طائف سے ان کے پاس لایا گیا اور وہ رات کے وقت نکل آئے وہ اپنے گھوڑے پر بیٹھے اور نبی اکرم صلی اللہ علیہ وسلم سے آ ملے وہ جعرانہ یا شاید مکہ میں نبی اکرم صلی اللہ علیہ وسلم کے پاس پہنچے تھے ، تو نبی اکرم صلی اللہ علیہ وسلم نے ان کے اہلخانہ اور ان کا مال انہیں واپس کر دیا ، اور انہیں ایک سو اونٹ بھی عطا کیے ۔
یہ روایت امام طبرانی نے نقل کی ہے ، اور اس کے رجال ثقہ ہیں ۔

سیدنا عبداللہ بن عباس رضی اللہ عنہما بیان کرتے ہیں : جب نبی اکرم صلی اللہ علیہ وسلم غزوہ حنین کا مال غنیمت تقسیم کر رہے تھے ، تو سیدنا جبرائیل علیہ السلام آپ کے پہلو میں موجود تھے ایک فرشتہ آیا اس نے کہا: آپ کے پروردگار نے آپ کو اس اس بات کا حکم دیا ہے ، تو نبی اکرم صلی اللہ علیہ وسلم نے سیدنا جبرائیل علیہ السلام سے دریافت کیا : کیا تم اسے پہنچانتے ہو ؟ انہوں نے عرض کی : یہ فرشتہ ہی ہے آپ کے پروردگار کے تمام فرشتوں سے میں واقف نہیں ہوں ۔
یہ روایت امام بزار نے اور امام طبرانی نے معجم اوسط میں نقل کی ہے ۔ انہوں نے یہ الفاظ زائد نقل کیے ہیں : نبی اکرم صلی اللہ علیہ وسلم کو یہ اندیشہ ہوا کہ کہیں وہ شیطان نہ ہو ۔ اس روایت کی سند میں ایک راوی حسین بن حسن اشقر ہے ، اور وہ منکر الحدیث ہے ، اس پر جھوٹا ہونے کا الزام ہے ابن حبان نے اسے ثقہ قرار دیا ہے ۔ غزوہ حنین کے مال غنیمت کے بارے میں انصار کے مناقب سے متعلق باب میں بہت سی احادیث آئیں گی ۔