المعجم الأوسط

سیدنا ابن عباس رضی اللہ عنہما سے روایت ہے کہ رسول اللہ ﷺ نے فرمایا: ”باہم محبت کرنے والوں کے لیے نکاح جیسی کوئی چیز (بہتر) نہیں دیکھی گئی۔“
اس حدیث کو طاؤس رحمہ اللہ سے صرف ابراہیم رحمہ اللہ نے روایت کیا ہے، اور ابراہیم رحمہ اللہ سے اسے صرف محمد رحمہ اللہ اور سفیان ثوری رحمہ اللہ نے روایت کیا ہے، جبکہ سفیان ثوری رحمہ اللہ سے اسے روایت کرنے میں مؤمل بن اسماعیل رحمہ اللہ منفرد ہیں۔

ربیعہ بن الغاز رحمہ اللہ سے روایت ہے کہ انہوں نے ام المومنین سیدہ عائشہ رضی اللہ عنہا سے رسول اللہ ﷺ کے روزوں کے متعلق دریافت کیا تو انہوں نے فرمایا: ”آپ ﷺ پورے شعبان کے روزے رکھتے یہاں تک کہ اسے رمضان سے ملا دیتے تھے، اور آپ ﷺ پیر اور جمعرات کے روزے کا خاص اہتمام فرمایا کرتے تھے۔“
اس حدیث کو ثور سے صرف یحییٰ نے روایت کیا ہے۔

سیدنا انس بن مالک رضی اللہ عنہ سے روایت ہے کہ رسول اللہ ﷺ نے فرمایا: ”جو شخص اللہ سے ملاقات کو پسند کرتا ہے، اللہ بھی اس سے ملاقات کو پسند فرماتا ہے، اور جو اللہ سے ملاقات کو ناپسند کرتا ہے، اللہ بھی اس سے ملاقات کو ناپسند فرماتا ہے۔“
صحابہ نے عرض کیا: ”اے اللہ کے رسول ﷺ! ہم میں سے تو ہر کوئی موت کو ناپسند کرتا ہے۔“
آپ ﷺ نے فرمایا: ”اس کا یہ مطلب نہیں ہے؛ بلکہ حقیقت یہ ہے کہ مومن کے پاس جب اللہ کی طرف سے خوشخبری دینے والا (فرشتہ) آتا ہے تو وہ اللہ سے ملاقات کو پسند کرنے لگتا ہے اور اللہ بھی اس سے ملاقات کو زیادہ پسند فرماتا ہے، اور جب کافر کے پاس وہ (منظر) آتا ہے جسے وہ ناپسند کرتا ہے تو وہ اللہ سے ملاقات کو ناپسند کرنے لگتا ہے اور اللہ عزوجل بھی اس سے ملاقات کو کہیں زیادہ ناپسند فرماتا ہے۔“

سیدنا جابر بن عبداللہ رضی اللہ عنہما سے روایت ہے کہ انہوں نے فرمایا: ”ہم نے رسول اللہ ﷺ کی معیت میں ایک اونٹ سات افراد کی طرف سے ذبح کیا“؛ پھر سیدنا جابر رضی اللہ عنہما سے دریافت کیا گیا کہ گائے کا کیا حکم ہے؟ تو انہوں نے فرمایا: ”وہ بھی اسی کی مانند ہے“۔ راوی بیان کرتے ہیں کہ سیدنا جابر رضی اللہ عنہما صلحِ حدیبیہ کے موقع پر موجود تھے، انہوں نے فرمایا: ”اور ہم نے اس دن ستر اونٹ ذبح کیے تھے“۔
اس حدیث کو ابن جریج رحمہ اللہ سے صرف یحییٰ رحمہ اللہ نے ہی روایت کیا ہے۔

سیدنا سراقہ بن مالک بن جعشم رضی اللہ عنہ سے روایت ہے کہ رسول اللہ ﷺ نے فرمایا: ”کیا میں تمہیں اہل جنت اور اہل جہنم کے بارے میں خبر نہ دوں؟“ میں نے عرض کیا: ”کیوں نہیں، اے اللہ کے رسول!“ آپ ﷺ نے فرمایا: ”اہل جہنم تو ہر وہ شخص ہے جو بدخو، سرکش اور تکبر کرنے والا ہو، اور اہل جنت وہ کمزور لوگ ہیں جو (دنیا میں) مغلوب رہے۔“
یہ حدیث سیدنا سراقہ رضی اللہ عنہ سے صرف اسی سند کے ساتھ مروی ہے، اور اسے روایت کرنے میں موسیٰ رحمہ اللہ منفرد ہیں۔

حارثہ بن مضرب رحمہ اللہ سے روایت ہے کہ سیدنا عبداللہ بن مسعود رضی اللہ عنہ نے ابن النواحہ سے فرمایا: ”میں نے رسول اللہ ﷺ کو یہ فرماتے ہوئے سنا تھا: «لَوْلَا أَنَّكَ رَسُولٌ لَقَتَلْتُكَ» ”اگر تم قاصد نہ ہوتے تو میں تمہیں قتل کر دیتا“، لیکن آج کے دن تم قاصد نہیں ہو۔ اے خرشہ! اٹھو اور اس کی گردن اڑا دو۔“ پس وہ اس کی طرف بڑھے اور اس کی گردن اڑا دی۔
امام طبرانی رحمہ اللہ فرماتے ہیں: ”اس حدیث کو اعمش رحمہ اللہ سے صرف ابو معاویہ رحمہ اللہ نے روایت کیا ہے۔“

سیدنا ابوذر رضی اللہ عنہ سے روایت ہے کہ رسول اللہ ﷺ نے (مجھ سے) فرمایا: ”اے ابوذر! یہ کون سا پہاڑ ہے؟“ میں نے عرض کیا: ”احد۔“ آپ ﷺ نے فرمایا: ”اس ذات کی قسم جس کے ہاتھ میں میری جان ہے! مجھے یہ بات خوش نہیں کرتی کہ یہ میرے لیے سونے کے ٹکڑے ہو اور میں اسے اللہ کی راہ میں خرچ کر دوں، مگر اس میں سے ایک قیراط بھی (باقی) چھوڑ دوں۔“ میں نے عرض کیا: ”اے اللہ کے رسول! (کیا آپ کی مراد) ایک قنطار ہے؟“ آپ ﷺ نے فرمایا: ”قیراط۔“ میں نے (پھر) عرض کیا: ”اے اللہ کے رسول! ایک قنطار؟“ آپ ﷺ نے فرمایا: ”قیراط۔“ پھر تیسری بار مجھ سے فرمایا: ”اے ابوذر! میں وہی بات کہہ رہا ہوں جو کم ہے، اور وہ نہیں کہہ رہا جو زیادہ ہے۔“
اس حدیث کو ابو منصور سے صرف محمد رحمہ اللہ نے روایت کیا ہے۔

سیدنا ابوہریرہ رضی اللہ عنہ سے روایت ہے کہ انہوں نے فرمایا: ”رسول اللہ ﷺ نے ایک سریہ (فوجی دستے) کو روانہ ہونے کا حکم دیا، تو انہوں نے عرض کی: ”اے اللہ کے رسول ﷺ! کیا ہم آج رات ہی روانہ ہوں یا صبح ہونے تک ٹھہریں؟“ آپ ﷺ نے فرمایا: ”کیا تم یہ پسند نہیں کرتے کہ تم جنت کے باغات کے چنے ہوئے پھلوں کے درمیان رات بسر کرو؟““
امام طبرانی رحمہ اللہ فرماتے ہیں: ”اس حدیث کو صفوان رحمہ اللہ سے صرف ابن لہیعہ رحمہ اللہ نے روایت کیا ہے۔“

ام المومنین سیدہ عائشہ رضی اللہ عنہا سے روایت ہے کہ رسول اللہ ﷺ نے اپنے اس مرض میں جس میں آپ ﷺ کی وفات ہوئی، فرمایا: ”بے شک میرے لیے موت کی شدت کو اس بات نے آسان کر دیا ہے کہ مجھے دکھا دیا گیا ہے کہ تم جنت میں میری زوجہ ہو۔“
اس حدیث کو حماد رحمہ اللہ سے ابوحنیفہ رحمہ اللہ اور مسعر رحمہ اللہ کے علاوہ کسی نے روایت نہیں کیا، اور ابو معاویہ رحمہ اللہ اسے (امام ابوحنیفہ رحمہ اللہ سے نقل کرنے میں) منفرد ہیں۔

ام المومنین سیدہ ام حبیبہ رضی اللہ عنہا سے روایت ہے کہ رسول اللہ ﷺ نے فرمایا: ”جو شخص دوپہر کی نماز (ظہر) سے پہلے چار رکعتوں اور اس کے بعد کی چار رکعتوں کی پابندی کرے گا، اللہ تعالیٰ اسے جہنم پر حرام کر دے گا۔“
اس حدیث کو نعمان بن منذر سے صرف ہیثم بن حمید اور یحییٰ بن حمزہ نے ہی روایت کیا ہے۔

سیدنا معاویہ رضی اللہ عنہ سے روایت ہے کہ: ”رسول اللہ ﷺ جب مؤذن کی اذان سنتے تو ویسے ہی (کلمات) کہتے جیسے وہ کہتا تھا۔“
اس حدیث کو محمد بن علی رحمہ اللہ سے ابن لہیعہ رحمہ اللہ کے علاوہ کسی نے روایت نہیں کیا۔

سیدنا فضالہ بن عبید رضی اللہ عنہ سے روایت ہے، انہوں نے کہا: میں نے رسول اللہ ﷺ کو فرماتے ہوئے سنا: ”اپنی قبروں کو (زمین کے) برابر رکھا کرو۔“

سیدنا عمرو بن عبسہ رضی اللہ عنہ سے روایت ہے کہ انہوں نے فرمایا: ”میں نے رسول اللہ ﷺ کو یہ فرماتے ہوئے سنا: ”جس شخص کا اللہ کی راہ میں کوئی بال سفید ہوا، وہ قیامت کے دن اس کے لیے نور ہو گا؛ اور جس نے دشمن پر کوئی تیر چلایا، خواہ وہ خطا ہو جائے یا نشانے پر لگے، وہ ایک غلام آزاد کرنے کے برابر ہے؛ اور جس نے کسی مسلمان غلام کو آزاد کیا، تو وہ اسے جہنم کی آگ سے چھڑانے کا ذریعہ ہو گا، اس (آزاد کردہ) کے ہر عضو کے بدلے اس (آزاد کرنے والے) کا ایک عضو ہو گا۔“ “
امام طبرانی رحمہ اللہ فرماتے ہیں: ”سلیمان سے اس حدیث کو صرف ابن لہیعہ نے روایت کیا ہے۔“

سیدنا ابوامامہ رضی اللہ عنہ سے روایت ہے کہ رسول اللہ ﷺ نے فرمایا: ”جس نے کسی یتیم کے سر پر ہاتھ پھیرا، تو اس کے لیے ہر بال کے بدلے ایک نیکی ہے۔“
اس حدیث کو خالد رحمہ اللہ سے صرف ابن لہیعہ رحمہ اللہ نے روایت کیا ہے۔

سیدنا ابو سعید خدری رضی اللہ عنہ سے روایت ہے کہ رسول اللہ ﷺ نے ان کا ہاتھ پکڑا اور فرمایا: ”اے ابو سعید!“ میں نے عرض کیا: ”لبیک یا رسول اللہ!“ آپ ﷺ نے فرمایا: ”تین خصلتیں ایسی ہیں کہ جس میں وہ موجود ہوں، اس کے لیے جنت واجب ہو گئی“۔ میں نے عرض کیا: ”اے اللہ کے رسول! وہ کیا ہیں؟“ تو آپ ﷺ نے فرمایا: ”جو شخص «رَضِيَ بِاللهِ رَبًّا ، وَبِالْإِسْلَامِ دِينًا ، وَبِمُحَمَّدٍ رَسُولًا» ”اللہ کے رب ہونے، اسلام کے دین ہونے اور محمد ﷺ کے رسول ہونے پر راضی ہو گیا“۔“ پھر آپ ﷺ نے فرمایا: ”اور چوتھی بات اے ابو سعید! اس کی فضیلت زمین و آسمان کے درمیانی فاصلے سے بھی بڑھ کر سو درجات ہے، اور وہ جہاد ہے“۔
امام طبرانی رحمہ اللہ فرماتے ہیں: ”اس حدیث کو ابو عبد الرحمن رحمہ اللہ سے صرف خالد رحمہ اللہ نے روایت کیا ہے، اور اس کے ساتھ ابن لہیعہ رحمہ اللہ منفرد ہیں۔“

سیدنا ابوامامہ رضی اللہ عنہ سے روایت ہے کہ انہوں نے رسول اللہ ﷺ کو یہ فرماتے ہوئے سنا: ”جو شخص اللہ اور یومِ آخرت پر ایمان رکھتا ہو، وہ ہرگز ریشم نہ پہنے اور نہ ہی سونا۔“
اس حدیث کو سلیمان رحمہ اللہ سے صرف ابن لہیعہ رحمہ اللہ نے روایت کیا ہے۔

سیدنا نعیم بن ہمار رضی اللہ عنہ سے روایت ہے کہ ایک شخص نے رسول اللہ ﷺ کو آواز دی اور عرض کیا: ”اے اللہ کے رسول! (افضل) شہداء کون ہیں؟“ آپ ﷺ نے فرمایا: ”وہ شہداء جو پہلی صف میں (جم کر) قتال کرتے ہیں اور اپنے چہروں کو (پیچھے کی طرف) نہیں پھیرتے یہاں تک کہ وہ قتل کر دیے جائیں، یہی وہ لوگ ہیں جو جنت کے بلند و بالا بالا خانوں میں (ایک دوسرے سے) ملیں گے، آپ کا رب ان کی طرف دیکھ کر مسکراتا ہے، اور بے شک اللہ عزوجل جب اپنے کسی مومن بندے کی طرف دیکھ کر مسکراتا ہے تو پھر اس پر کوئی حساب نہیں ہوتا۔“
امام طبرانی رحمہ اللہ فرماتے ہیں: ”اس حدیث کو علی ابو دینار سے صرف ابن لہیعہ ہی نے روایت کیا ہے۔“
دار الحرمین کے مطبوعہ نسخے میں اسی طرح ہے، جبکہ علامہ مغلطائی رحمہ اللہ نے ’الاکمال‘ میں فرمایا ہے: ”اور ان سے روایت کی ہے جیسا کہ ابو القاسم امام طبرانی رحمہ اللہ نے ’المعجم الکبیر‘ میں ذکر کیا ہے: «عَلِيٌّ أَبُو دِينَارٍ الْهُذَلِيُّ»“، اور جو ’مجمع البحرین‘ میں ہے وہ «عَلِيُّ بْنُ دِينَارٍ الْهُذَلِيُّ» ہے، اور غالباً صحیح نام «عَطَاءُ بْنُ دِينَارٍ الْهُذَلِيُّ» ہے، واللہ اعلم۔

سیدنا عبداللہ بن عمرو رضی اللہ عنہما سے روایت ہے کہ ایک شخص نے رسول اللہ ﷺ سے سوال کیا: ”اے اللہ کے رسول! مسلمانوں میں سب سے بہتر کون ہے؟“ آپ ﷺ نے فرمایا: ”جس کی زبان اور ہاتھ سے لوگ محفوظ رہیں۔“

سیدنا ابوہریرہ رضی اللہ عنہ سے روایت ہے کہ انہوں نے فرمایا: ”جو بندہ بھی اللہ عزوجل کی ایک بار تسبیح کرتا ہے، یا اس کی حمد بیان کرتا ہے، یا اس کی بڑائی بیان کرتا ہے، تو اللہ عزوجل اس کے بدلے اس کے لیے جنت میں ایک درخت لگا دیتا ہے، جس کی جڑ سونے کی اور اس کا بالائی حصہ جواہرات کا ہے، وہ موتیوں اور یاقوت سے جڑا ہوا ہے، اس کے پھل دوشیزاؤں کے پستانوں کی مانند ہیں، وہ مکھن سے زیادہ نرم اور شہد سے زیادہ میٹھے ہیں، جب بھی ان میں سے کوئی پھل توڑ لیا جاتا ہے تو (فوراً) اس کی جگہ دوسرا آ جاتا ہے۔“ پھر رسول اللہ ﷺ نے یہ آیت تلاوت فرمائی: ﴿لَا مَقْطُوعَةٍ وَلَا مَمْنُوعَةٍ﴾۔
اس حدیث کو ابن جریج رحمہ اللہ سے صرف سلیمان رحمہ اللہ نے روایت کیا ہے، اور عمرو بن ہاشم رحمہ اللہ اس کی روایت میں منفرد ہیں۔

سیدنا عبداللہ بن عمر رضی اللہ عنہما سے روایت ہے کہ انہوں نے فرمایا: ”جب سیدنا عمر بن خطاب رضی اللہ عنہ کو (خنجر سے) زخمی کیا گیا اور انہوں نے (خلیفہ کے انتخاب کے لیے) شوریٰ کا حکم دیا، تو ان کی صاحبزادی ام المومنین سیدہ حفصہ رضی اللہ عنہا ان کے پاس آئیں اور عرض کیا: اے ابا جان! لوگ کہہ رہے ہیں کہ یہ لوگ جنہیں آپ نے شوریٰ میں مقرر کیا ہے، وہ (عوام میں) مقبول نہیں ہیں؟ تو انہوں نے فرمایا: ”مجھے سہارا دے کر بٹھاؤ۔“ چنانچہ انہوں نے انہیں سہارا دیا، جبکہ وہ اپنی اسی تکلیف کی حالت میں تھے، پھر انہوں نے فرمایا: ”وہ سیدنا عثمان رضی اللہ عنہ کے بارے میں کیا کہہ سکتے ہیں؟ میں نے رسول اللہ ﷺ کو فرماتے ہوئے سنا: «يَوْمَ يَمُوتُ عُثْمَانُ تُصَلِّي عَلَيْهِ مَلَائِكَةُ السَّمَاءِ» ”جس دن عثمان کی وفات ہوگی، آسمان کے فرشتے ان پر درود (دعا) بھیجیں گے۔“ میں نے (نبی ﷺ سے) عرض کیا: کیا خاص طور پر عثمان کے لیے یا تمام لوگوں کے لیے؟ آپ ﷺ نے فرمایا: «بَلْ لِعُثْمَانَ خَاصَّةً» ”بلکہ خاص عثمان کے لیے۔“
اور وہ سیدنا عبدالرحمن بن عوف رضی اللہ عنہ کے بارے میں کیا کہہ سکتے ہیں؟ میں نے نبی ﷺ کو دیکھا کہ آپ ﷺ کو شدید بھوک لگی تھی، تو عبدالرحمن دو روٹیاں لے کر آئے جن کے درمیان سالن تھا، انہوں نے وہ رسول اللہ ﷺ کے سامنے رکھ دیں، تو آپ ﷺ نے فرمایا: «كَفَاكَ اللهُ أَمْرَ دُنْيَاكَ ، أَمَّا الْآخِرَةُ فَأَنَا لَهَا ضَامِنٌ» ”اللہ تمہاری دنیا کے معاملات کے لیے کافی ہو گیا، رہی آخرت تو میں اس کا ضامن ہوں۔“
وہ سیدنا طلحہ رضی اللہ عنہ کے بارے میں کیا کہہ سکتے ہیں؟ میں نے نبی ﷺ کو دیکھا کہ ایک سخت سرد رات میں آپ ﷺ کا کجاوہ گر گیا، تو آپ ﷺ نے فرمایا: «مَنْ يُسَوِّي رَحْلِي وَلَهُ الْجَنَّةُ؟» ”کون میرا کجاوہ درست کرے گا اور (عوض میں) اس کے لیے جنت ہے؟“ تو سیدنا طلحہ تیزی سے کجاوے کی طرف بڑھے اور اسے درست کر دیا، تو نبی ﷺ نے فرمایا: «لَكَ الْجَنَّةُ عَلَيَّ يَا طَلْحَةُ غَدًا» ”اے طلحہ! کل (قیامت کے دن) میرے ذمے تمہارے لیے جنت (واجب) ہے۔“
وہ سیدنا زبیر رضی اللہ عنہ کے بارے میں کیا کہہ سکتے ہیں؟ میں نے نبی ﷺ کو دیکھا کہ آپ ﷺ سو رہے تھے، اور وہ مسلسل نبی ﷺ کے چہرے سے (تکلیف دہ چیزیں) ہٹاتے رہے یہاں تک کہ آپ ﷺ بیدار ہو گئے۔ تو نبی ﷺ نے ان سے فرمایا: «لَمْ تَزَلْ يَا أَبَا عَبْدِ اللهِ؟» ”اے ابو عبداللہ! کیا تم مسلسل (یہی کر رہے) تھے؟“ انہوں نے عرض کیا: جی ہاں، میرے ماں باپ آپ پر فدا ہوں۔ آپ ﷺ نے فرمایا: «هَذَا جِبْرِيلُ يَقْرَأُ عَلَيْكَ السَّلَامَ ، وَيَقُولُ لَكَ : عَلَيَّ أَنْ أَذُبَّ عَنِ وَجْهِكَ شَرَرَ جَهَنَّمَ يَوْمَ الْقِيَامَةِ» ”یہ جبریل ہیں، وہ تمہیں سلام کہہ رہے ہیں اور تم سے کہہ رہے ہیں: میرے ذمے ہے کہ میں قیامت کے دن تمہارے چہرے سے جہنم کی چنگاریاں دور رکھوں۔“
وہ سیدنا علی رضی اللہ عنہ کے بارے میں کیا کہہ سکتے ہیں؟ میں نے رسول اللہ ﷺ کو فرماتے ہوئے سنا: «يَا عَلِيُّ ، يَدُكَ مَعَ يَدِي يَوْمَ الْقِيَامَةِ ، تَدْخُلُ مَعِي حَيْثُ أَدْخُلُ» ”اے علی! قیامت کے دن تمہارا ہاتھ میرے ہاتھ میں ہوگا، تم میرے ساتھ وہیں داخل ہو گے جہاں میں داخل ہوں گا۔“ “
اس حدیث کو زہری رحمہ اللہ سے صرف معمر رحمہ اللہ نے، اور معمر رحمہ اللہ سے صرف ابن مبارک رحمہ اللہ نے روایت کیا ہے۔ عبداللہ بن یحییٰ رحمہ اللہ اسے روایت کرنے میں منفرد ہیں۔

سیدنا انس بن مالک رضی اللہ عنہ سے روایت ہے کہ ایک شخص نبی ﷺ کی خدمت میں حاضر ہوا اور عرض کی: ”اے اللہ کے رسول! میں تند زبان آدمی ہوں اور میری اس تند خوئی کا زیادہ تر رخ اپنے اہل خانہ کی طرف ہوتا ہے،“ تو رسول اللہ ﷺ نے فرمایا: ”تم استغفار کا کتنا اہتمام کرتے ہو؟ میں تو دن اور رات میں سو مرتبہ اللہ سے بخشش طلب کرتا ہوں۔“

سیدنا انس بن مالک رضی اللہ عنہ سے روایت ہے کہ رسول اللہ ﷺ نے فرمایا: ”خیر اس گھر کی طرف جس میں کثرت سے مہمان آتے ہوں، اونٹ کی کوہان میں چھری کے اترنے سے بھی زیادہ تیزی سے پہنچتی ہے۔“

سیدنا انس بن مالک رضی اللہ عنہ سے روایت ہے کہ انہوں نے فرمایا: ”رسول اللہ ﷺ کے سامنے سے کبھی بھی بھنا ہوا گوشت نہیں اٹھایا گیا مگر یہ کہ اس کے ساتھ ہی وہ بچھونا (یعنی چھوٹا قالین) بھی اٹھا لیا گیا۔“

سیدنا انس بن مالک رضی اللہ عنہ سے روایت ہے کہ نبی کریم ﷺ نے فرمایا: ”جس رات مجھے معراج کرائی گئی، میرا گزر فرشتوں کی جس جماعت پر بھی ہوا، انہوں نے یہی کہا کہ اپنی امت کو حجامہ کا حکم دیجیے۔“

سیدنا انس بن مالک رضی اللہ عنہ سے روایت ہے کہ نبی اکرم ﷺ نے فرمایا: ”جب جبار عز و جل کسی بندے کی دو محبوب چیزیں (یعنی آنکھیں) لے لیتا ہے، تو ان کے عوض اس کا ثواب جنت ہی ہوتا ہے۔“

سیدنا انس بن مالک رضی اللہ عنہ سے روایت ہے کہ نبی ﷺ جب نماز پڑھ لیتے اور اپنی نماز سے فارغ ہوتے تو اپنے دائیں ہاتھ سے اپنے سر پر مسح فرماتے اور کہتے: «بِاسْمِ اللهِ الَّذِي لَا إِلَهَ إِلَّا هُوَ الرَّحْمَنُ الرَّحِيمُ ، اللَّهُمَّ أَذْهِبْ عَنِّي الْهَمَّ وَالْحَزَنَ» ”اللہ کے نام کے ساتھ، جس کے سوا کوئی معبودِ برحق نہیں، وہ نہایت مہربان اور بہت رحم کرنے والا ہے؛ اے اللہ! مجھ سے فکر اور غم کو دور فرما دے۔“

سیدنا انس بن مالک رضی اللہ عنہ سے روایت ہے کہ نبی اکرم ﷺ نے ایک دن اپنے مصاحبین سے فرمایا: ”اپنی ڈھالیں پکڑ لو۔“ انہوں نے عرض کیا: ”اے اللہ کے رسول ﷺ! ہمارے ماں باپ آپ پر فدا ہوں، کیا کوئی دشمن سامنے آ گیا ہے؟“ آپ ﷺ نے فرمایا: ”تم جہنم کی آگ سے (بچاؤ کے لیے) اپنی ڈھالیں لے لو، کہو: «سُبْحَانَ اللهِ ، وَالْحَمْدُ لِلهِ ، وَلَا إِلَهَ إِلَّا اللهُ ، وَاللهُ أَكْبَرُ ، وَلَا حَوْلَ وَلَا قُوَّةَ إِلَّا بِاللهِ» ”اللہ پاک ہے، تمام تعریفیں اللہ ہی کے لیے ہیں، اللہ کے سوا کوئی معبودِ برحق نہیں، اللہ سب سے بڑا ہے، اور گناہ سے بچنے کی ہمت اور نیکی کرنے کی طاقت اللہ ہی کی توفیق سے ہے۔“ کیونکہ یہ کلمات (قیامت کے دن) تمہارے آگے رہنے والے، پہلوؤں سے حفاظت کرنے والے اور پیچھے سے آنے والے نگہبان ہوں گے، اور یہی ﴿الْبَاقِيَاتُ الصَّالِحَاتُ﴾ (ہمیشہ باقی رہنے والی نیکیاں) ہیں۔“

سیدنا انس بن مالک رضی اللہ عنہ سے روایت ہے کہ ایک شخص رسول اللہ ﷺ کی خدمت میں حاضر ہوا اور عرض کیا: ”اے اللہ کے رسول! میں ایسے خواب دیکھتا ہوں جو مجھے بیمار کر دیتے ہیں۔“ اس پر رسول اللہ ﷺ نے اس سے فرمایا: ”اچھا خواب اللہ کی طرف سے ہے اور برا خواب شیطان کی طرف سے؛ لہٰذا جب تم میں سے کوئی ایسا خواب دیکھے تو اسے چاہیے کہ اپنی بائیں جانب تین بار تھتکارے اور اس کے شر سے پناہ مانگے، تو وہ اسے ہرگز نقصان نہیں پہنچائے گا۔“

ابراہیم بن ابی عبلہ رحمہ اللہ بیان کرتے ہیں کہ میں اریحا میں بیٹھا ہوا تھا کہ سیدنا واثلہ بن اسقع رضی اللہ عنہ میرے پاس سے گزرے، وہ عبد اللہ بن دیلمی رحمہ اللہ کے سہارے ٹیک لگائے ہوئے تھے؛ انہوں نے انہیں بٹھایا، پھر وہ (عبد اللہ) میرے پاس آئے اور کہا: ”شیخ (یعنی سیدنا واثلہ رضی اللہ عنہ) نے مجھے جو حدیث سنائی ہے وہ بڑی عجیب ہے!“
میں نے پوچھا: ”انہوں نے آپ سے کیا بیان کیا؟“ انہوں نے کہا کہ سیدنا واثلہ رضی اللہ عنہ نے فرمایا: ”ہم غزوہ تبوک میں نبی ﷺ کے ساتھ تھے کہ آپ ﷺ کے پاس بنو سلیم کے کچھ لوگ حاضر ہوئے اور عرض کی: ”اے اللہ کے رسول! ہمارے ایک ساتھی نے (اپنے گناہ کی وجہ سے جہنم کو) واجب کر لیا ہے“، تو رسول اللہ ﷺ نے فرمایا: ”اس کی طرف سے ایک گردن (غلام) آزاد کرو، اللہ تعالیٰ اس (غلام) کے ہر عضو کے بدلے اس (شخص) کے ایک عضو کو آگ سے آزاد کر دے گا۔““

سیدہ اسماء بنت ابی بکر رضی اللہ عنہما سے روایت ہے کہ رسول اللہ ﷺ نے فرمایا: ”مومن اپنی قبر میں اس وقت اٹھ کر بیٹھ جاتا ہے جب اس کے پاس (جنازے میں) حاضر ہونے والے لوگ واپس لوٹ جاتے ہیں، پھر اس سے پوچھا جاتا ہے: «مَا رَجُلٌ يُقَالُ لَهُ مُحَمَّدٌ مَا هُوَ ؟» ”وہ شخص جنہیں محمد (ﷺ) کہا جاتا ہے، ان کی کیا حقیقت ہے؟“ پس اگر وہ مومن ہو تو کہتا ہے: ”وہ اللہ کے بندے اور اس کے رسول ہیں“، تو اس سے کہا جاتا ہے: ”تو سو جا، تیری آنکھیں (سکھ کی نیند) سوئیں“۔ اور اگر وہ (مرنے والا) مومن نہ ہو تو کہتا ہے: ”اللہ کی قسم! میں نہیں جانتا، میں نے لوگوں کو ایک بات کہتے سنا تو میں نے بھی وہی کہہ دیا، اور وہ جس (لغو) بحث و تکرار میں پڑتے تھے میں بھی اسی میں پڑ گیا“، تو اس سے کہا جاتا ہے: «لَا نَامَتْ عَيْنَاكَ» ”تیری آنکھیں کبھی نہ سوئیں (تجھے کبھی چین نہ ملے)“۔“
اس حدیث کو ابو الاسود سے صرف ابن لہیعہ رحمہ اللہ نے روایت کیا ہے۔

سیدنا جابر بن عبداللہ رضی اللہ عنہما رسول اللہ ﷺ سے روایت کرتے ہیں کہ حجۃ الوداع کے موقع پر جب کچھ لوگ آپ ﷺ کی خدمت میں حاضر ہوئے تو ان میں سے بعض نے عرض کیا: ”میں نے قربانی کرنے سے پہلے ہی سر منڈوا لیا؟“ آپ ﷺ نے فرمایا: ”کوئی حرج نہیں۔“ اور کسی نے عرض کیا: ”میں نے رمی کرنے سے پہلے ہی قربانی کر لی؟“ تو آپ ﷺ نے فرمایا: ”کوئی حرج نہیں۔“
نیز آپ ﷺ نے فرمایا: ”پورا عرفات ٹھہرنے کی جگہ ہے، پورا مزدلفہ ٹھہرنے کی جگہ ہے اور مکہ کی تمام گھاٹیاں راستے اور قربان گاہ ہیں۔“

سیدنا عقبہ بن عامر جہنی رضی اللہ عنہ سے روایت ہے کہ انہوں نے فرمایا: ”تین اوقات ایسے ہیں جن میں رسول اللہ ﷺ نے ہمیں نماز پڑھنے یا اپنے مردوں کو دفن کرنے سے منع فرمایا ہے: جس وقت سورج طلوع ہو رہا ہو یہاں تک کہ وہ بلند ہو جائے، اور جس وقت ٹھیک دوپہر ہو یہاں تک کہ سورج ڈھل جائے، اور جس وقت سورج غروب ہونے کے لیے مائل ہو جائے یہاں تک کہ وہ مکمل طور پر غروب ہو جائے۔“

سیدنا عقبہ بن عامر رضی اللہ عنہ سے روایت ہے کہ رسول اللہ ﷺ نے فرمایا: ”عرفہ کا دن، قربانی کا دن اور ایامِ تشریق ہم اہل اسلام کی عید کے دن ہیں، اور یہ کھانے پینے کے ایام ہیں۔“

سیدنا عقبہ بن عامر رضی اللہ عنہ سے روایت ہے کہ انہوں نے فرمایا: ”رسول اللہ ﷺ ہمارے پاس تشریف لائے جب کہ ہم صُفہ میں (بیٹھے ہوئے) تھے، تو آپ ﷺ نے دریافت فرمایا: ”تم میں سے کون یہ پسند کرتا ہے کہ وہ ہر روز صبح سویرے مقامِ بطحان یا عقیق جائے اور وہاں سے کسی گناہ کے ارتکاب یا قطع رحمی کے بغیر بڑے کوہان والی، نہایت عمدہ اور فربہ دو اونٹنیاں لے آئے؟“ صحابہ کرام نے عرض کی: ”اے اللہ کے رسول ﷺ! ہم سب اسے پسند کرتے ہیں۔“ آپ ﷺ نے فرمایا: ”تو تم میں سے کسی کا ہر روز صبح مسجد جانا اور وہاں اللہ کی کتاب کی دو آیتیں سیکھ لینا اس کے لیے دو اونٹنیوں سے بہتر ہے، اور تین (آیات) تین (اونٹنیوں) سے، اور (آیات کی) جتنی تعداد ہو اتنے ہی اونٹوں سے بہتر ہے۔““

سیدنا عقبہ بن عامر رضی اللہ عنہ سے روایت ہے کہ رسول اللہ ﷺ نے فرمایا: ”اللہ کی کتاب سیکھو، اس کی تلاوت کا باقاعدہ اہتمام کرو، اسے (یاد کر کے) اپنے پاس محفوظ رکھو اور اسے خوش الحانی کے ساتھ پڑھا کرو؛ پس اس ذات کی قسم جس کے قبضۂ قدرت میں میری جان ہے! یقیناً یہ (قرآن) لوگوں کے سینوں سے نکل جانے میں ان حاملہ اونٹنیوں سے بھی زیادہ تیز ہے جو اپنے بندھنوں میں بندھی ہوں۔“

سیدنا عبداللہ بن عمرو بن العاص رضی اللہ عنہما سے روایت ہے کہ رسول اللہ ﷺ نے فرمایا: ”کیا تم جانتے ہو کہ مسلمان کون ہے؟“ صحابہ نے عرض کیا: ”اللہ اور اس کے رسول ﷺ بہتر جانتے ہیں۔“ آپ ﷺ نے فرمایا: ”جس کے ہاتھ اور زبان سے مسلمان محفوظ رہیں۔“
صحابہ نے عرض کیا: ”تو مومن کون ہے؟“ آپ ﷺ نے فرمایا: ”جس سے مومن اپنی جانوں اور اپنے مالوں کے بارے میں پرامن رہیں۔“
انہوں نے عرض کیا: ”تو مہاجر کون ہے؟“ آپ ﷺ نے فرمایا: ”وہ جس نے برائی کو چھوڑ دیا اور اس سے اجتناب کیا۔“

سیدنا عمرو بن العاص رضی اللہ عنہ سے روایت ہے کہ انہوں نے فرمایا: ”رسول اللہ ﷺ نے میری طرف پیغام بھیجا کہ اپنی تلوار اور اسلحہ ساتھ لے لو؛ چنانچہ میں نے اپنی تلوار اور اسلحہ اٹھایا، پھر میں رسول اللہ ﷺ کی خدمت میں حاضر ہوا تو دیکھا کہ آپ ﷺ وضو فرما رہے تھے۔ آپ ﷺ نے اپنی نظر مبارک اٹھا کر مجھے دیکھا، پھر نگاہ نیچی کر لی اور فرمایا: ”اے عمرو! میں تمہیں ایک لشکر کا امیر بنا کر بھیجنا چاہتا ہوں، اللہ تعالیٰ تمہیں مالِ غنیمت بھی عطا فرمائے گا اور سلامت بھی رکھے گا، اور میں تمہارے لیے مال میں سے ایک عمدہ حصہ مقرر کروں گا۔“ میں نے عرض کی: ”اے اللہ کے رسول ﷺ! اللہ کی قسم، میں نے مال کے لیے اسلام قبول نہیں کیا بلکہ میں تو اسلام کی رغبت کی وجہ سے اور اس لیے مسلمان ہوا ہوں کہ آپ ﷺ کی معیت نصیب ہو۔“ آپ ﷺ نے فرمایا: ”اے عمرو! نیک آدمی کے لیے پاکیزہ مال کتنا ہی بہترین ہے!““

سیدنا عمرو بن العاص رضی اللہ عنہ سے روایت ہے کہ انہوں نے رسول اللہ ﷺ کو فرماتے ہوئے سنا: ”جب حاکم فیصلہ کرے اور اجتہاد کرے، پھر وہ درست نتیجے تک پہنچ جائے تو اس کے لیے دو اجر ہیں، اور جب وہ فیصلہ کرے اور اجتہاد کرے پھر اس سے خطا ہو جائے تو اس کے لیے ایک اجر ہے۔“
(یزید بن الہاد رحمہ اللہ کہتے ہیں کہ) میں نے یہ حدیث ابوبکر بن محمد بن عمرو بن حزم رحمہ اللہ کو بیان کی تو انہوں نے فرمایا: ”اسی طرح مجھے ابوسلمہ رحمہ اللہ نے سیدنا ابوہریرہ رضی اللہ عنہ کے حوالے سے بیان کیا تھا۔“
امام طبرانی رحمہ اللہ فرماتے ہیں: ”یہ حدیث سیدنا عمرو بن العاص رضی اللہ عنہ سے صرف اسی سند کے ساتھ مروی ہے، یزید بن الہاد رحمہ اللہ اس کی روایت کرنے میں منفرد ہیں۔“

سیدنا عقبہ بن عامر رضی اللہ عنہ سے روایت ہے کہ انہوں نے فرمایا: ”ہم نے رسول اللہ ﷺ کے ہمراہ بھیڑ کے جذعہ (کم عمر بچے) کی قربانی کی۔“

سیدنا جابر بن عبداللہ رضی اللہ عنہما بیان کرتے ہیں کہ رسول اللہ ﷺ نے فرمایا: ”جس نے رمضان کے روزے رکھے اور شوال کے چھ روزے رکھے تو گویا اس نے پورے سال کے روزے رکھے۔“