مجمع الزوائد ومنبع الفوائد

سیدنا عثمان غنی رضی اللہ عنہ کے بارے میں یہ بات منقول ہے : انہوں نے پانی منگوایا اور ” مقاعد “ کے پاس وضو کرتے ہوئے اعضاء کو تین ، تین مرتبہ دھویا ، پھر انہوں نے نبی اکرم صلی اللہ علیہ وسلم کے اصحاب سے دریافت کیا : کیا آپ لوگوں نے اللہ کے رسول کو اسی طرح کرتے ہوئے دیکھا ہے ؟ انہوں نے جواب دیا : جی ہاں !
یہ روایت امام أحمد نے نقل کی ہے ، سیدنا عثمان صلی اللہ علیہ وسلم سے منقول حدیث ” صحیح “ میں مذکور ہے اور اس روایت کے رجال ” صحیح “ کے رجال ہیں ۔

ابونضر بیان کرتے ہیں : سیدنا عثمان رضی اللہ عنہ نے وضو کا پانی منگوایا ، اُس وقت ان کے پاس سیدنا زبیر رضی اللہ عنہ سیدنا طلحہ رضی اللہ عنہ سیدنا علی رضی اللہ عنہ اور سیدنا سعد رضی اللہ عنہ موجود تھے ، سیدنا عثمان رضی اللہ عنہ نے وضو کرنا شروع کیا ، یہ حضرات دیکھ رہے تھے ، انہوں نے اپنے چہرے کو تین مرتبہ دھویا ، دائیں بازو پر تین مرتبہ پانی بہایا ، پھر بائیں بازو پر تین مرتبہ پانی بہایا ، پھر انہوں نے اپنے سر کا مسح کیا ، پھر دائیں پاؤں پر تین مرتبہ پانی بہایا ، پھر بائیں پاؤں پر تین مرتبہ پانی بہایا ، پھر انہوں نے حاضرین سے فرمایا : میں آپ لوگوں کو اللہ کا واسطہ دے کر دریافت کرتا ہوں ، کیا آپ لوگ یہ بات جانتے ہیں ؟ کہ نبی اکرم صلی اللہ علیہ وسلم اسی طرح وضو کیا کرتے تھے جس طرح میں نے ابھی وضو کیا ہے ؟ اُن لوگوں نے جواب دیا : جی ہاں ! راوی بیان کرتے ہیں : سیدنا عثمان رضی اللہ عنہ نے ایسا اس لیے کیا تھا کیونکہ انہیں اس حوالے سے کوئی اطلاع ملی تھی ۔
یہ روایت امام ابویعلیٰ نے نقل کی ہے ، ابونضر نامی راوی نے ” عشرہ مبشرہ“ میں سے کسی سے سماع نہیں کیا ہے ، اس کی سند میں یہ بھی مذکور ہے ، ایک راوی غسان بن الربیع ہے ، جسے امام دارقطنی رحمہ اللہ نے ایک مرتبہ ” ضعیف“ قرار دیا ہے ، اور ایک مرتبہ انہوں نے یہ کہا: ہے : یہ صالح ہے ، ابن حبان نے اس راوی کا ذکر کتاب ” الثقات“ میں کیا ہے ۔

حمران بن ابان بیان کرتے ہیں : میں نے سیدنا عثمان غنی رضی اللہ عنہ کو دیکھا انہوں نے وضو کے لئے پانی منگوایا ، وہ اس وقت مسجد کے دروازے کے پاس موجود تھے ، انہوں نے دونوں ہاتھ دھوئے ، کلی کی ، ناک میں پانی ڈالا ، پھر انہوں نے اپنے چہرے کو تین مرتبہ دھویا پھر انہوں نے دونوں بازو کہنیوں تک تین مرتبہ دھوئے ، پھر انہوں نے اپنے سر کا مسح کیا ، اور اپنے ہاتھ کان کے بیرونی حصے پر پھیرے ، پھر انہیں اپنی داڑھی پر پھیرا ، پھر انہوں نے دونوں پاؤں ٹخنوں تک دھوئے ، پھر انہوں نے اُٹھ کر دو رکعت ادا کیں اور پھر یہ فرمایا : میں نے تمہارے سامنے اسی طرح وضو کیا ہے ، جس طرح میں نے نبی اکرم صلی اللہ علیہ وسلم کو وضو کرتے ہوئے دیکھا ہے ، پھر میں نے اسی طرح دو رکعات ادا کی ہیں ، جس طرح میں نے نبی اکرم صلی اللہ علیہ وسلم کو ادا کرتے ہوئے دیکھا ، جب نبی اکرم صلی اللہ علیہ وسلم وہ دو رکعات ادا کر کے فارغ ہوئے تو آپ صلی اللہ علیہ وسلم نے ارشاد فرمایا : ” جو شخص اس طرح وضو کرے ، جس طرح میں نے وضو کیا ہے اور پھر دو رکعات یوں ادا کرے کہ اس دوران اپنے خیالوں میں گم نہ ہو جائے ، تو اس شخص کے ان دو رکعات ، اور اس سے پچھلے دن کی نماز کے درمیان کے گناہوں کی مغفرت ہو جاتی ہے “ ( علامہ ہیثمی فرماتے ہیں : ) میں یہ کہتا ہوں :
یہ روایت امام أحمد نے نقل کی ہے اور یہ ” صحیح “ میں اختصار کے ساتھ منقول ہے اور اس کے رجال کی توثیق کی گئی ہے ۔

سیدنا عثمان رضی اللہ عنہ کے بارے میں یہ بات منقول ہے : انہوں نے وضو کا پانی منگوایا ، کلی کی ، ناک میں پانی ڈالا ، اپنے چہرے کو تین مرتبہ دھویا ، دونوں بازو تین مرتبہ دھوئے ، اپنے سر پر مسح کیا ، اپنے پاؤں دھوئے اور پھر ہنس پڑے ، انہوں نے فرمایا : کیا تم لوگ مجھ سے یہ دریافت نہیں کرو گے ؟ کہ میں کیوں ہنسا ہوں ؟ ہم نے کہا: اے امیر المؤمنین ! آپ کیوں ہنسے ہیں ؟ انہوں نے فرمایا : میرے ہنسنے کی وجہ یہ ہے ، ایک مرتبہ نبی اکرم صلی اللہ علیہ وسلم نے اس جگہ کے قریب وضو کا پانی منگوایا ، پھر آپ نے اُسی طرح وضو کیا ، جس طرح میں نے وضو کیا ہے ، پھر آپ صلی اللہ علیہ وسلم اسی طرح ہنس پڑے ، جس طرح میں ہنس پڑا ہوں ، پھر آپ صلی اللہ علیہ وسلم نے ارشاد فرمایا : کیا تم لوگ مجھ سے یہ نہیں پوچھو گے ؟ کہ میں کیوں ہنسا ہوں ؟ ہم نے عرض کی : اے اللہ کے نبی ! آپ کس بات پر ہنسے ہیں ؟ آپ صلی اللہ علیہ وسلم نے فرمایا : میں اس بات پر ہنسا ہوں کہ جب کوئی بندہ وضو کرتا ہے اور اپنا چہرہ دھوتا ہے ، تو اللہ تعالیٰ اُس کا ہر وہ گناہ ختم کر دیتا ہے ، جس کا ارتکاب اس نے اپنے چہرے کے ذریعے کیا ہو ، جب وہ بندہ اپنے بازو دھوتا ہے تو بھی ایسا ہی ہوتا ہے ، جب وہ اپنے سر کا مسح کرتا ہے ، تو بھی ایسا ہی ہوتا ہے ، جب وہ اپنے پاؤں دھوتا ہے تو بھی ایسا ہی ہوتا ہے ۔
یہ روایت امام بزار نے نقل کی ہے اور اس کے رجال ” صحیح “ کے رجال ہیں ، اور یہ ” صحیح “ میں اختصار کے ساتھ منقول ہے ۔

سیدنا عبداللہ بن زید رضی اللہ عنہ بیان کرتے ہیں : نبی اکرم صلی اللہ علیہ وسلم نے وضو کرتے ہوئے ، دونوں بازو دو مرتبہ دھوئے ، چہرہ تین مرتبہ دھویا اور سر پر دو مرتبہ مسح کیا ۔ ( علامہ ہیثمی فرماتے ہیں : ) میں یہ کہتا ہوں :
یہ روایت ” صحیح “ میں منقول ہے ، تاہم اس میں یہ الفاظ نہیں ہیں : ” اپنے سر پر دو مرتبہ مسح کیا “
یہ روایت امام أحمد نے نقل کی ہے اور اس کے رجال ” صحیح “ کے رجال ہیں ۔

یزید بن براء بن عازب ، جو ” عمان “ کے گورنر تھے اور بہترین گورنر تھے ، وہ بیان کرتے ہیں : میرے والد نے یہ کہا: تم لوگ اکٹھے ہو جاؤ ! تاکہ میں تم لوگوں کو یہ دکھاؤں کہ نبی اکرم صلی اللہ علیہ وسلم کس طرح وضو کیا کرتے تھے اور آپ کس طرح نماز ادا کیا کرتے تھے ؟ کیونکہ مجھے یہ نہیں معلوم کہ میں اور کتنا عرصہ تمہارے ساتھ رہوں گا ؟ راوی بیان کرتے ہیں : پھر انہوں نے اپنے بال بچوں کو اکٹھا کیا اور وضو کا پانی منگوایا ، انہوں نے کلی کی ، ناک میں پانی ڈالا ، اور اپنے چہرے کو تین مرتبہ دھویا ، اپنا دایاں بازو تین مرتبہ دھویا ، اپنا یہ والا تین مرتبہ دھویا ، اُن کی مراد بایاں بازو تھا ، پھر انہوں نے اپنے سر کا اور کانوں کے اندرونی اور بیرونی حصے کا مسح کیا ، پھر انہوں نے یہ یعنی دایاں پاؤں تین مرتبہ دھویا ، پھر یہ یعنی بایاں پاؤں تین مرتبہ دھویا ، پھر انہوں نے فرمایا : میں نے اس بارے میں کوئی کوتاہی نہیں کی ہے کہ میں تمہیں یہ دکھاؤں کہ نبی اکرم صلی اللہ علیہ وسلم کس طرح وضو کیا کرتے تھے ؟
یہ روایت امام أحمد نے نقل کی ہے اور اس کے رجال کی توثیق کی گئی ہے ۔

سیدنا عبدالرحمن بن ابوقراد رضی اللہ عنہ بیان کرتے ہیں : میں نبی اکرم صلی اللہ علیہ وسلم کے ساتھ حج کرنے کے لیے روانہ ہوا ، میں نے آپ صلی اللہ علیہ وسلم کو دیکھا کہ آپ قضائے حاجت کے لیے تشریف لے گئے ہیں ، تو میں برتن ، راوی کو شک ہے یا شاید یہ الفاظ ہیں : پانی لے کر آپ صلی اللہ علیہ وسلم کے پیچھے گیا نبی اکرم صلی اللہ علیہ وسلم جب قضائے حاجت کا ارادہ کرتے تھے ، تو آپ دور تشریف لے جاتے تھے ، میں آپ کے لئے راستے میں بیٹھ گیا ، یہاں تک کہ جب نبی اکرم صلی اللہ علیہ وسلم واپس تشریف لائے ، تو میں نے آپ صلی اللہ علیہ وسلم کی خدمت میں عرض کی : یا رسول اللہ ! آپ وضو کریں گے ؟ یہاں وضو کا پانی موجود ہے ، تو نبی اکرم صلی اللہ علیہ وسلم میری طرف تشریف لائے ، آپ نے اپنے ہاتھ پر پانی ڈال کر اُسے دھویا ، پھر آپ نے اپنا ہاتھ پانی میں داخل کیا ، اور چلو میں پانی لے کر اپنے بازو پر ایک مرتبہ بہایا ، پھر آپ نے اپنے سر کا مسح کیا ، پھر اپنی مٹھی میں پانی لیا اور اسے اپنے پاؤں کے اوپری حصے پر ڈالا ، آپ نے اپنے ہاتھ کے ذریعے پاؤں کے اوپری حصے پر پانی چھڑکا ۔ ( علامہ ہیثمی فرماتے ہیں : ) میں یہ کہتا ہوں : ” اصل “ میں
یہ روایت اسی طرح مذکور ہے ،
یہ روایت امام أحمد نے نقل کی ہے ، امام نسائی رحمہ اللہ اور امام ابن ماجہ نے اس میں سے صرف یہ الفاظ نقل کئے ہیں : ” نبی اکرم صلی اللہ علیہ وسلم جبکہ قضائے حاجت کرنے لگتے ، تو آپ دور تشریف لے جاتے “ اس روایت کے رجال ثقہ ہیں ۔

سیدنا ابوایوب رضی اللہ عنہ بیان کرتے ہیں : نبی اکرم صلی اللہ علیہ وسلم جب وضو کرتے تھے ، تو آپ صلی اللہ علیہ وسلم کلی کرتے تھے اور پانی کے ذریعے اپنی داڑھی کا نیچے کی طرف سے مسح کرتے تھے ۔
یہ روایت امام أحمد نے نقل کی ہے ، اس کی سند میں ایک راوی واصل بن سائب ہے ، جس کے ضعیف ہونے پر محدثین کا اتفاق ہے ۔

سیدنا ابوہریرہ رضی اللہ عنہ کے حوالے سے ، ایسی سند کے ساتھ ،
یہ روایت منقول ہے ، جس کے رجال ” صحیح“ کے رجال ہیں ، وہ بیان کرتے ہیں : نبی اکرم صلی اللہ علیہ وسلم نے وضو کیا ، آپ نے تین مرتبہ کلی کی ، تین مرتبہ ناک میں پانی ڈالا ، تین مرتبہ اپنا چہرہ دھویا تین مرتبہ دونوں بازو دھوئے ، تین مرتبہ سر کا مسح کیا ، اور تین مرتبہ دونوں پاؤں دھوئے ۔
علامہ ہیثمی فرماتے ہیں میں یہ کہتا ہوں : یہ روایت امام ابن ماجہ نے نقل کی ہے ، تاہم انہوں نے یہ الفاظ نقل نہیں کیے ہیں : ” اپنے سر کا تین مرتبہ مسح کیا “
یہ روایت امام طبرانی نے معجم اوسط میں نقل کی ہے ۔

سیدنا ابوامامہ رضی اللہ عنہ بیان کرتے ہیں : نبی اکرم صلی اللہ علیہ وسلم نے وضو کرتے ہوئے اپنے ہاتھ تین مرتبہ دھوئے ، تین مرتبہ کلی کی ، تین مرتبہ ناک میں پانی ڈالا ، تین مرتبہ اپنا چہرہ دھویا اور تین مرتبہ دونوں بازو دھوئے ۔
یہ روایت امام طبرانی نے معجم کبیر میں سمیع نامی راوی کے حوالے سے سیدنا ابوامامہ رضی اللہ عنہ سے نقل کی ہے اور اس کی سند حسن ہے ، سمیع نامی راوی کا تذکرہ امام ابن حبان رحمہ اللہ نے کتاب ” الثقات “ میں کیا ہے ، وہ فرماتے ہیں : مجھے نہیں معلوم یہ کون ہے اور کس کا بیٹا ہے ؟ ( علامہ ہیثمی فرماتے ہیں : ) بظاہر یہ لگتا ہے کہ انہوں نے اسے ” ثقہ “ قرار دینے میں کسی اور پر اعتماد کیا ہے ۔

سیدنا عبداللہ بن عمر رضی اللہ عنہما نبی اکرم صلی اللہ علیہ وسلم کا یہ فرمان نقل کرتے ہیں : ” جو شخص ایک ، ایک مرتبہ وضو کرتا ہے ( یعنی وضو کرتے ہوئے ، ہر عضو کو ایک مرتبہ دھوتا ہے ) تو یہ وضو کا ایسا طریقہ ہے جس کے بغیر کوئی چارہ نہیں ہے ، اور جو شخص دو مرتبہ وضو کرتا ہے ، تو اسے اجر کے دو کفل ملیں گے ، اور جو شخص تین مرتبہ وضو کرتا ہے ، تو یہ میرا اور مجھ سے پہلے کے انبیاء کرام کا وضو کا طریقہ ہے “ ۔
یہ روایت امام أحمد نے نقل کی ہے ، اس کی سند میں ایک راوی زید عمی ہے اور وہ ضعیف ہے ، اسے ثقہ بھی قرار دیا گیا ہے ، اس روایت کے بقیہ رجال ” صحیح “ کے رجال ہیں ، سیدنا عبداللہ بن عمر رضی اللہ عنہما سے منقول حدیث امام ابن ماجہ نے بھی نقل کی ہے ، اور وہ اس سے طویل حدیث ہے ، تاہم دونوں روایات میں کچھ چیزیں ایسی ہیں ، جو دوسری میں نہیں ہیں ، باقی اللہ بہتر جانتا ہے ۔

راشد ابومحمد حمانی بیان کرتے ہیں : میں نے ” زاویہ “ میں سیدنا انس بن مالک رضی اللہ عنہ کو دیکھا ، تو میں نے اُن سے کہا: آپ مجھے نبی اکرم صلی اللہ علیہ وسلم کے وضو کے بارے میں بتائیں کہ وہ کیسا ہوتا تھا ؟ مجھے یہ اطلاع ملی ہے کہ آپ اس طرح وضو کر کے دکھاتے ہیں ، تو انہوں نے فرمایا : ٹھیک ہے ، پھر انہوں نے وضو کا پانی منگوایا ، تو ایک طشت اور ایک پیالہ لایا گیا جو پتھر سے بنا ہے ، وہ اُن کے سامنے رکھا گیا ، انہوں نے اپنے دونوں ہاتھوں پر پانی انڈیلا ، اور پھر دونوں ہاتھ اچھی طرح دھوئے ، پھر انہوں نے تین مرتبہ کلی کی ، تین مرتبہ ناک میں پانی ڈالا ، تین مرتبہ اپنا چہرہ دھویا ، پھر اپنا دایاں بازو ( آستین سے ) نکال کر اسے تین مرتبہ دھویا ، پھر بایاں بازو تین مرتبہ دھویا ، پھر انہوں نے اپنے سر کا ایک مرتبہ مسح کیا ، البتہ انہوں نے اپنے کانوں پر بھی ہاتھ پھیرا اور ان پر مسح کیا ، پھر انہوں نے اپنی دونوں ہتھیلیاں پانی میں داخل کیں ، ۔ ۔ ۔ ۔ ۔ ۔ ۔ ۔ راوی بیان کرتے ہیں : اس کے بعد انہوں نے پوری حدیث ذکر کی ہے ۔
یہ روایت امام طبرانی نے معجم اوسط میں نقل کی ہے اور اس کی سند حسن ہے ۔

ابراہیم بن ابوعبلہ بیان کرتے ہیں : میں نے سیدنا انس بن مالک رضی اللہ عنہ سے سوال کیا : میں کیسے وضو کروں ؟ تو انہوں نے فرمایا : تم نے مجھ سے یہ سوال کیا ہے ، کہ میں کیسے وضو کروں ؟ تم نے مجھ سے یہ سوال نہیں کیا : کہ آپ نے ، اللہ کے رسول کو کس طرح وضو کرتے ہوئے دیکھا ہے ؟ ( پھر انہوں نے بتایا : ) میں نے اللہ کے رسول کو دیکھا ہے کہ آپ صلی اللہ علیہ وسلم تین ، تین مرتبہ وضو کے اعضاء کو دھوتے تھے ، آپ نے یہ ارشاد فرمایا : میرے پروردگار نے مجھے اس بات کا حکم دیا ہے ۔
یہ روایت امام طبرانی نے معجم اوسط اور معجم صغیر میں نقل کی ہے ، امام بزار نے اس روایت کو اختصار کے ساتھ نقل کیا ہے ، اس کے رجال ثقہ ہیں ۔

سیدنا بریدہ رضی اللہ عنہ بیان کرتے ہیں : نبی اکرم صلی اللہ علیہ وسلم نے وضو کا پانی منگوایا ، اور ایک ، ایک مرتبہ وضو کیا ، پھر آپ صلی اللہ علیہ وسلم نے ارشاد فرمایا : یہ وہ وضو ہے ، کہ اللہ تعالیٰ اس کے بغیر نماز کو قبول نہیں کرتا ، پھر آپ نے دو ، دو مرتبہ وضو کیا اور ارشاد فرمایا : یہ تم سے پہلے کی امتوں کا وضو کا طریقہ ہے ، پھر آپ نے تین ، تین مرتبہ وضو کیا اور ارشاد فرمایا : یہ میرا اور مجھ سے پہلے کے انبیاء کرام کا وضو کا طریقہ ہے ۔
یہ روایت امام طبرانی نے معجم اوسط میں نقل کی ہے ، اس کی سند میں ایک راوی ابن لہیعہ ہے اور وہ ضعیف ہے ۔

سیدنا ابورافع رضی اللہ عنہ بیان کرتے ہیں : میں نے اللہ کے رسول کو وضو کرتے ہوئے دیکھا ، آپ نے اپنے چہرے کو تین مرتبہ دھویا دونوں ہاتھ تین مرتبہ دھوئے ، اپنے سر اور دونوں کانوں کا مسح کیا ، دونوں پاؤں تین مرتبہ دھوئے ، پھر ایک مرتبہ میں نے آپ صلی اللہ علیہ وسلم کو وضو کرتے ہوئے دیکھا ، تو آپ نے ایک ، ایک مرتبہ وضو کیا ۔
یہ روایت امام بزار نے ، اور امام طبرانی نے معجم اوسط میں نقل کی ہے ، ان صحابی کے حوالے سے معجم کبیر میں
یہ روایت منقول ہے : ” میں نے اللہ کے رسول کو تین ، تین مرتبہ دو ، دو مرتبہ اور ایک ، ایک مرتبہ وضو کرتے ہوئے دیکھا ہے ان دونوں روایات کے رجال ” صحیح “ کے رجال ہیں ۔

سیدنا عبداللہ بن عباس رضی اللہ عنہما بیان کرتے ہیں : ایک دیہاتی نبی اکرم صلی اللہ علیہ وسلم کی خدمت میں حاضر ہوا اور بولا: یا رسول اللہ ! وضو کیسے کیا جائے گا ؟ نبی اکرم صلی اللہ علیہ وسلم نے وضو کا پانی منگوایا ، آپ صلی اللہ علیہ وسلم نے اپنا ہاتھ تین مرتبہ دھویا ، پھر آپ صلی اللہ علیہ وسلم نے اپنا دایاں ہاتھ برتن میں داخل کیا ، اور تین مرتبہ کلی کی ، اور ناک میں پانی ڈالا ، آپ نے اپنا چہرہ اور دونوں بازو تین مرتبہ دھوئے ، اور اپنے سر کا مسح کیا ، سر کے ہمراہ آپ نے اپنے دونوں کانوں کے بیرونی حصے کا بھی مسح کیا ، پھر آپ نے دونوں پاؤں تین مرتبہ دھوئے ، پھر آپ صلی اللہ علیہ وسلم نے ارشاد فرمایا : اسی طرح وضو ہو گا جو شخص اس سے زیادہ کرے گا ، وہ زیادتی اور ظلم کرے گا ۔
یہ روایت امام طبرانی نے معجم کبیر میں نقل کی ہے ، ان صحابی کے حوالے سے ” صحیح “ میں اس کے علاوہ حدیث منقول ہے ، اس روایت کی سند میں ایک راوی سوید بن عبدالعزیز ہے ، جسے امام أحمد ، یحییٰ بن معین اور ایک جماعت نے ” ضعیف“ قرار دیا ہے ، جبکہ دحیم نے اُسے ” ثقہ “ قرار دیا ہے ۔

سیدنا عبداللہ بن عباس رضی اللہ عنہما بیان کرتے ہیں : میں نبی اکرم صلی اللہ علیہ وسلم کی خدمت میں حاضر ہوا ، آپ صلی اللہ علیہ وسلم اُس وقت وضو کر رہے تھے ، آپ کے سامنے جو برتن موجود تھا ، اس میں ایک ” مد “ کی مقدار میں پانی آتا تھا ، اگر زیادہ ہوتا ، تو تھوڑا سا زیادہ ہوتا ، اور اگر کم ہوتا ، تو تھوڑا سا کم ہوتا ، آپ نے اپنے دونوں ہاتھ دھوئے ، کلی کی ، ناک میں پانی ڈالا ، ایسا آپ نے تین ، تین مرتبہ کیا ، آپ نے اپنے چہرے کو تین مرتبہ دھویا ، اور اپنی داڑھی کا خلال کیا ، پھر اپنے دونوں بازو تین مرتبہ دھوئے ، اور اپنے سر اور دونوں کانوں پر دو ، دو مرتبہ مسح کیا پھر اپنے دونوں پاؤں دھوئے ، اور انہیں اچھی طرح صاف کیا ، میں نے عرض کی : یا رسول اللہ ! کیا اسی طرح طہارت حاصل کی جاتی ہے ؟ آپ نے ارشاد فرمایا : میرے پروردگار نے مجھے اسی طرح کرنے کا حکم دیا ہے ۔
یہ روایت امام طبرانی نے معجم اوسط میں نقل کی ہے ، اس کی سند میں ایک راوی نافع ابوہرمز ہے اور وہ انتہائی ضعیف ہے ۔

سیدنا وائل بن حجر رضی اللہ عنہ بیان کرتے ہیں : میں نبی اکرم صلی اللہ علیہ وسلم کے پاس موجود تھا ، ایک برتن لایا گیا ، جس میں پانی تھا ، آپ نے اپنے دائیں ہاتھ پر تین مرتبہ پانی ڈالا ، پھر اپنا دایاں ہاتھ برتن میں داخل کیا ، اور اس کے ذریعے بائیں ہاتھ پر تین مرتبہ پانی ڈالا ، پھر اپنے دائیں ہاتھ کو پانی میں ڈال کر چلو میں پانی لیا اور اس کے ذریعے کلی کی اور ناک میں پانی ڈالا ، ایسا آپ نے تین مرتبہ کیا ، پھر اپنے دونوں ہاتھ برتن میں داخل کئے ، ان میں پانی لیا اور اس کے ذریعے چہرے کو تین مرتبہ دھویا ، پھر آپ نے اپنی داڑھی کا خلال کیا ، اپنے دونوں کانوں کے اندرونی حصے کا مسح کیا اور اپنی چھوٹی انگلی کان میں داخل کی ، تاکہ وہاں تک پانی پہنچ جائے ، پھر آپ نے اپنی گردن کا اور داڑھی کے نیچے والے حصے کا ، چہرے کے پانی سے بچ جانے والے پانی کے ذریعے مسح کیا ؟ پھر آپ نے اپنا دایاں بازو تین مرتبہ دھویا ، یہاں تک کہ کہنی سے اوپر تک دھویا ، پھر بایاں بازو اسی طرح کہنی سے اوپر تک دھویا ، پھر آپ نے اپنے سر پر تین مرتبہ مسح کیا اور کانوں کے بیرونی حصے کا مسح کیا ، آپ نے اپنی گردن اور داڑھی کے نیچے والے حصے کا ، سر کے پانی سے بچ جانے والے پانی کے ذریعے مسح کیا ، پھر آپ نے اپنا دایاں پاؤں دھویا اور اس کی انگلیوں کا خلال کیا ، یہاں تک کہ پانی ٹخنے سے اوپر تک آیا ، آپ نے پانی پنڈلی تک ڈالا ، پھر اپنے بائیں پاؤں کے ساتھ بھی ایسا ہی کیا ، پھر اپنی دائیں ہتھیلی میں ، چلو میں پانی لیا ، اور اسے اپنے سر پر ڈال دیا یہاں تک کہ وہ سر کے اطراف سے نیچے آ گیا ، آپ صلی اللہ علیہ وسلم نے ارشاد فرمایا : یہ مکمل وضو ہے ، پھر آپ محراب میں داخل ہوئے ، لوگوں نے آپ کے پیچھے صف بنا لی ، آپ نے اپنے دائیں طرف اور بائیں طرف دیکھا ۔ ۔ ۔ ۔ ۔ ۔ ۔ ۔ علامہ ہیثمی بیان کرتے ہیں میں یہ کہتا ہوں : اس کے بعد راوی نے پوری حدیث ذکر کی ہے ، یہ حدیث امام طبرانی نے معجم کبیر میں اور امام بزار نے نقل کی ہے ، اس کی سند میں ایک راوی سعید بن عبدالجبار ہے ، امام نسائی رحمہ اللہ فرماتے ہیں : وہ قوی نہیں ہے ، ابن حبان نے اس کا تذکرہ کتاب ” الثقات “ میں کیا ہے ، امام بزار اور امام طبرانی کی سند میں ایک راوی محمد بن حجر ہے اور وہ ضعیف ہے امام بزار کی نقل کردہ روایت میں نماز کا تذکرہ طوالت کے ساتھ ہے ، اور وہ روایت آگے چل کر ” نماز کے طریقے “ سے متعلق بات میں آئے گی اگر اللہ نے چاہا ۔

سیدنا عبداللہ بن عمرو رضی اللہ عنہ بیان کرتے ہیں : نبی اکرم صلی اللہ علیہ وسلم نے ایک ، ایک مرتبہ وضو کیا ۔
یہ روایت امام بزار نے اور امام طبرانی نے معجم اوسط میں نقل کی ہے ، انہوں نے یہ الفاظ زائد نقل کئے ہیں : ” پھر آپ کھڑے ہوئے اور آپ نے نماز ادا کی “ ۔ اس روایت کی سند میں ایک راوی مندل بن علی ہے ، جسے امام أحمد اور علی بن مدینی نے ، اور ایک روایت کے مطابق یحیی بن معین نے ” ضعیف“ قرار دیا ہے ، جبکہ دوسری روایت کے مطابق انہوں ( یعنی یحیی بن معین ) نے اُسے ” ثقہ “ قرار دیا ہے ۔

سیدنا ابوبکرہ رضی اللہ عنہ بیان کرتے ہیں : میں نے اللہ کے رسول کو وضو کرتے ہوئے دیکھا ، آپ نے اپنے دونوں ہاتھ تین مرتبہ دھوئے ، تین مرتبہ کلی کی ، تین مرتبہ ناک میں پانی ڈالا ، اپنے چہرے کو تین مرتبہ دھویا ، دونوں بازو کہنیوں تک دھوئے ، اور اپنے سر کا مسح کیا ، آپ اپنے دونوں ہاتھ آگے سے پیچھے کی طرف لے کر گئے اور پھر پیچھے سے آگے کی طرف لے کر آئے ، پھر آپ نے دونوں پاؤں تین مرتبہ دھوئے ، آپ نے پاؤں کی انگلیوں ، اور داڑھی کا خلال کیا ۔
یہ روایت امام بزار نے نقل کی ہے ، وہ فرماتے ہیں : سیدنا ابوبکرہ رضی اللہ عنہ کے حوالے سے
یہ روایت صرف اسی سند کے ساتھ منقول ہے ، اور بکار نامی راوی میں کوئی حرج نہیں ہے ، اس کا بیٹا عبدالرحمن ، صالح ہے ، میں یہ کہتا ہوں : امام بزار کے استاد محمد بن صالح بن عوام کا ذکر کرتے ہوئے ، میں نے کسی کو نہیں پایا ، اس روایت کے بقیہ رجال ” صحیح“ کے رجال ہیں ۔

سیدنا انس بن مالک رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” جب کوئی شخص وضو کرے تو اُسے تین مرتبہ کلی کرنی چاہیے ، کیونکہ ( اس کی وجہ سے ) اُس کے چہرے سے گناہ نکل جاتے ہیں ، اور تین مرتبہ دونوں بازو دھونے چاہییں ، اور تین مرتبہ سر پر مسح کرنا چاہیے ، پھر اُسے اپنے ہاتھ کان میں داخل کرنے چاہیں اور پھر اپنے پاؤں پر تین مرتبہ پانی ڈالنا چاہیے “ ۔
یہ روایت امام طبرانی نے معجم اوسط میں نقل کی ہے ، اس کی سند میں ایک راوی ابوموسیٰ حناط ہے اور وہ متروک ہے ۔

عبدالرحمن بن عباد بن یحییٰ بن خلاد زرقی بیان کرتے ہیں : ہم لوگ سیدنا عبداللہ بن انیس رضی اللہ عنہ کی خدمت میں حاضر ہوئے ، تو انہوں نے فرمایا : کیا میں تمہیں یہ ( کر کے ) نہ دکھاؤں کہ نبی اکرم صلی اللہ علیہ وسلم کیسے وضو کیا کرتے تھے اور کیسے نماز ادا کرتے تھے ؟ ہم نے جواب دیا : جی ہاں ! تو انہوں نے دونوں ہاتھ تین ، تین مرتبہ دھوئے ، سر کا آگے سے پیچھے کی طرف اور پیچھے سے آگے کی طرف مسیح کیا ، انہوں نے اپنے کانوں پر بھی ہاتھ پھیرا ، اور دونوں پاؤں تین ، تین مرتبہ دھوئے ، پھر انہوں نے کپڑا لے کر اسے لپیٹا اور نماز ادا کی ، انہوں نے یہ بتایا : میں نے اپنے محبوب ( یعنی ) اللہ کے رسول کو دیکھا کہ آپ صلی اللہ علیہ وسلم نے اس طرح وضو کر کے نماز ادا کی ۔
یہ روایت امام طبرانی نے معجم اوسط میں نقل کی ہے ، اس کی سند میں ایک راوی عبدالرحمن بن عباد بن یحییٰ بن خلاد زرقی ہے ، میں نے کسی کو اُس کے حالات ذکر کرتے ہوئے نہیں پایا ہے ۔

سیدنا جابر بن عبداللہ رضی اللہ عنہما بیان کرتے ہیں : نبی اکرم صلی اللہ علیہ وسلم ” بقیع غرقد “ کی طرف تشریف لے گئے ، آپ نے وضو کرتے ہوئے اپنے چہرے ، دونوں بازوؤں کو دھویا ، اور اپنے سر پر مسح کیا ، پھر اپنے دائیں ہاتھ میں پانی لے کر اپنے قدموں پر ڈالا ، اور انہیں دھو لیا ۔
یہ روایت امام طبرانی نے معجم اوسط میں نقل کی ہے ، اس کی سند میں ایک راوی ابن لہیعہ ہے اور وہ ضعیف ہے ۔

سیدنا معاذ بن جبل رضی اللہ عنہ بیان کرتے ہیں : نبی اکرم صلی اللہ علیہ وسلم ایک ، ایک مرتبہ دو ، دو مرتبہ ، اور تین ، تین مرتبہ ، ان میں سے ہر طرح وضو کر لیتے تھے ۔
یہ روایت امام طبرانی نے معجم کبیر میں نقل کی ہے ، اس کی سند میں ایک راوی محمد بن سعید مصلوب ہے اور وہ ضعیف ہے ۔

سیدنا ابوکاہل رضی اللہ عنہ بیان کرتے ہیں : ایک مرتبہ میں نبی اکرم صلی اللہ علیہ وسلم کے پاس سے گزرا ، آپ اُس وقت وضو کرنے لگے تھے ، میں نے عرض کی : یا رسول اللہ ! اللہ تعالیٰ نے ہمیں آپ صلی اللہ علیہ وسلم کے حوالے سے بہت سی بھلائی عطا کی ہے ، نبی اکرم صلی اللہ علیہ وسلم نے دونوں ہاتھ دھوئے ، پھر تین مرتبہ کلی کی ، تین مرتبہ ناک میں پانی ڈالا ، اپنے چہرے کو تین مرتبہ دھویا ، دونوں بازو تین مرتبہ دھوئے ، اپنے سر کا مسح کیا ، تاہم انہوں نے متعین نہیں کیا ، اور دونوں پاؤں دھوئے اور متعین نہیں کیا ، آپ نے ارشاد فرمایا : اے ابوکاہل ! تم وضو کے پانی کو اس کے مخصوص مقام پر ڈالو ! اور وضو کا بچ جانے والا پانی اپنے اہل خانہ کے لئے باقی رہنے دو ! تم اپنے اہلخانہ کو پیاسا نہ رکھو ، اور اپنے خادم کو مشقت کا شکار نہ کرو !
یہ روایت امام طبرانی نے معجم کبیر میں نقل کی ہے ، اس کی سند میں ایک راوی ہیثم بن جماز ہے اور وہ متروک ہے ۔

سیدنا ابوایوب رضی اللہ عنہ بیان کرتے ہیں : نبی اکرم صلی اللہ علیہ وسلم جب وضو کرتے تھے ، تو تین مرتبہ ناک صاف کرتے تھے ، کلی کرتے تھے ، اپنی انگلی منہ میں ڈالتے تھے ، جب آپ چہرہ دھوتے تھے ، تو اپنی ہتھیلیاں کانوں پر بھی لگاتے تھے اور جب آپ اپنے سر کا مسح کرتے تھے ، تو انگلیوں کے ذریعے پیچھے والے حصے کا مسح کرتے تھے ، سر کے ہمرہ آپ کانوں کا بھی مسح کرتے تھے ۔
یہ روایت امام طبرانی نے معجم کبیر میں نقل کی ہے ، میں نے ” اصل “ میں
یہ روایت اسی طرح پائی ہے اس کی سند میں ایک راوی واصل بن سائب ہے اور وہ متروک ہے ۔

عباد بن تمیم نے ، اپنے والد کے حوالے سے ، یہ بات نقل کی ہے : وہ بیان کرتے ہیں : میں نے نبی اکرم صلی اللہ علیہ وسلم کو وضو کرتے ہوئے دیکھا آپ نے پہلے اپنا چہرہ دھویا اور دونوں بازو دھوئے ، پھر آپ نے کلی کی اور ناک میں پانی ڈالا پھر اپنے سر کیا مسح کیا ۔
یہ روایت امام طبرانی نے معجم کبیر میں نقل کی ہے ، اس کی سند میں ایک راوی ابن لہیعہ ہے اور وہ ضعیف ہے ۔

انہی صحابی کے حوالے سے معجم کبیر میں
یہ روایت بھی منقول ہے : وہ بیان کرتے ہیں : میں نے نبی اکرم صلی اللہ علیہ وسلم کو دیکھا ، آپ نے وضو کرتے ہوئے ، اپنی داڑھی اور پاؤں پر ، پانی کے ذریعے مسح کیا ۔ اس روایت کے رجال کی توثیق کی گئی ہے ۔

نمران بن جاریہ ، اپنے والد کے حوالے سے ، نبی اکرم صلی اللہ علیہ وسلم کا یہ فرمان نقل کرتے ہیں : ” سر کے لیے نئے سرے سے پانی لو ! “ ۔
یہ روایت امام طبرانی نے معجم کبیر میں نقل کی ہے ، اس کی سند میں ایک راوی دہثم بن قرآن ہے ، جسے ایک جماعت نے ” ضعیف“ قرار دیا ہے ، اور ابن حبان نے اس کا تذکرہ کتاب ” الثقات “ میں کیا ہے ۔

سیدنا امام حسن بن علی رضی اللہ عنہ بیان کرتے ہیں : نبی اکرم صلی اللہ علیہ وسلم جب وضو کرتے تھے ، تو کچھ پانی بچا لیتے تھے ، یہاں تک کہ اسے سجدہ کے مقام پر بہاتے تھے ۔
یہ روایت امام طبرانی نے معجم کبیر میں نقل کی ہے اور اس کی سند حسن ہے ۔

سیدنا امام حسین بن علی رضی اللہ عنہ بیان کرتے ہیں : نبی اکرم صلی اللہ علیہ وسلم وضو کرتے ہوئے پانی کے ذریعے سجدے کے مقام کو دھوتے تھے ، یہاں تک کہ آپ سجدہ کے مقام پر پانی بہاتے تھے ۔
یہ روایت امام ابویعلیٰ نے نقل کی ہے اور اس کی سند حسن ہے ۔

عباد بن تمیم نے اپنے والد کا یہ بیان نقل کیا ہے : میں نے نبی اکرم صلی اللہ علیہ وسلم کو وضو کرتے ہوئے دیکھا ، آپ نے پانی کے ذریعے اپنے پاؤں پر مسح کیا ۔
یہ روایت امام طبرانی نے معجم اوسط میں نقل کی ہے اور اس کے رجال ” صحیح “ کے رجال ہیں ، البتہ امام طبرانی کے استاد کا معاملہ مختلف ہے ۔

عبداللہ بن بدر بیان کرتے ہیں : قرآن میں مسح کا حکم نازل ہوا ، لیکن اللہ کے رسول نے ہمیں دھونے کا حکم دیا ، تو ہم دھوتے ہیں ۔
یہ روایت امام طبرانی نے معجم کبیر میں نقل کی ہے ، عبداللہ بن بدر نامی راوی تابعی ہیں ، مجھے نہیں معلوم کہ غلطی کی وجہ سے صحابی کا ذکر نہیں ہوا ، یا
یہ روایت اسی طرح ہے ، اس کی سند میں ایک راوی محمد بن جابر ہے اور وہ ضعیف ہے ۔

سیدنا عبداللہ بن مسعود رضی اللہ عنہ کے بارے میں یہ بات منقول ہے : اُنہوں نے پاؤں دھونے کے حکم کے بارے میں اپنے قول سے رجوع کر لیا تھا ، جو اللہ تعالیٰ کے اس فرمان کے بارے میں ہے : ” اور تم اپنے پاؤں ٹخنوں تک “ ۔
یہ روایت امام طبرانی نے معجم کبیر میں نقل کی ہے ، قتادہ نامی راوی نے سیدنا عبداللہ بن مسعود رضی اللہ عنہ سے سماع نہیں کیا ہے ۔