مجمع الزوائد ومنبع الفوائد

سیدنا ابوہریرہ رضی اللہ عنہ بیان کرتے ہیں : نبی اکرم صلی اللہ علیہ وسلم اکثر یہ دعا کیا کرتے تھے :
«اللَّهُمَّ اجْعَلْنِي أَخْشَاكَ حَتَّى كَأَنِّي أَرَاكَ أَبَدًا حَتَّى أَلْقَاكَ ، وَأَسْعِدْنِي بِتَقْوَاكَ ، وَلَا تُشْقِنِي بِمَعْصِيَتِكَ ، وَخِرْ لِي فِي قَضَائِكَ ، وَبَارِكْ لِي فِي قَدَرِكَ حَتَّى لَا أُحِبَّ تَعْجِيلَ مَا أَخَّرْتَ ، وَلَا تَأْخِيرَ مَا عَجَّلْتَ ، وَاجْعَلْ غَنَائِي فِي نَفْسِي ، وَأَمْتِعْنِي بِسَمْعِي وَبَصَرِي ، وَاجْعَلْهُمَا الْوُرِاثَ مِنِّي ، وَانْصُرْنِي عَلَى مَنْ ظَلَمَنِي ، وَأَرِنِي فِيهِ ثَأْرِي ، وَأَقِرَّ بِذَلِكَ عَيْنِي» ” اے اللہ ! تو مجھے ایسا بندہ بنا دے جو تجھ سے سب سے زیادہ ڈرنے والا ہو ، یہاں تک کہ میں یوں ہو جاؤں ، جیسے میں ہمیشہ تجھے دیکھتا رہتا ہوں ، اور ایسا اس وقت تک رہے ، جب تک میں تیری بارگاہ میں حاضر نہیں ہو جاتا ، اور تو مجھے اپنے تقویٰ کے ذریعے سعادت عطا فرما ، اور اپنی نافرمانی کے ذریعے تو مجھے بدنصیب نہ کرنا ، اپنے فیصلے میں ، میرے لیے بہتری اختیار کر لے ، اور اپنی تقدیر میں میرے لئے برکت رکھ دے ، یہاں تک کہ میں اس چیز کو جلدی نہ چاہوں ، جسے تو نے موخر کیا ہو ، اور اس میں تاخیر نہ چاہوں ، جسے تو نے جلدی کر دیا ہو ، میری خوشحالی ( یا بے نیازی ) میرے نفس میں ڈال دے ، مجھے میری سماعت اور بصارت کے ذریعے نفع عطا کرتے رہنا اور ان دونوں کو میرا وارث بنانا اور جس نے مجھ پر ظلم کیا ، اس کے خلاف میری مدد کرنا ، اور اس کے بارے میں مجھے بدلہ دکھا دینا ، اور اس کے ذریعے میری آنکھیں ٹھنڈی کرنا“ ۔
یہ روایت امام طبرانی نے معجم اوسط میں نقل کی ہے ، اس کی سند میں ایک راوی ابراہیم بن خیثم بن عراک ہے اور وہ متروک ہے ۔ امام بزار نے اس روایت کا آخری حصہ نقل کیا ہے جس میں یہ الفاظ ہیں : ” تو میری سماعت کے ذریعے مجھے نفع دینا ۔ ۔ ۔ ۔ ۔ ۔ “ ۔ اس کے بعد حسب سابق روایت ہے جو عمدہ سند کے ساتھ منقول ہے ۔

سیدنا جابر بن عبدالله رضی اللہ عنہ بیان کرتے ہیں : نبی اکرم صلی اللہ علیہ وسلم یہ دعا کیا کرتے تھے :
«اللَّهُمَّ مَتِّعْنِي بِسَمْعِي وَبَصَرِي ، وَاجْعَلْهُمَا الْوَارِثَ مِنِّي ، وَانْصُرْنِي عَلَى مَنْ ظَلَمَنِي ، وَأَرِنِي مِنْهُ ثَأْرِي»
” اے اللہ ! تو مجھے میری سماعت اور میری بصارت کے ذریعے نفع دینا ، اور ان دونوں کو میرا وارث بنانا ، اور جس نے مجھ پر ظلم کیا ، اس کے خلاف میری مدد کرنا اور اس کی طرف سے مجھے بدلہ دکھانا ۔ “
یہ روایت امام بزار نے نقل کی ہے ، اس کی سند میں ایک راوی لیث بن ابوسلیم ہے اور وہ مدلس ہے ، اس روایت کے بقیہ رجال ” صحیح “ کے رجال ہیں ۔

سیدنا عبداللہ بن شحیر رضی اللہ عنہ بیان کرتے ہیں : نبی اکرم صلی اللہ علیہ وسلم یہ پڑھا کرتے تھے :
«اللَّهُمَّ أَمْتِعْنِي بِسَمْعِي وَبَصَرِي ، وَاجْعَلْهُ الْوَارِثَ مِنِّي»
” اے اللہ ! تو میری سماعت اور میری بصارت کے ذریعے مجھے نفع دینا اور اسے میرا وارث بنانا ۔ “
یہ روایت امام بزار اور امام طبرانی نے نقل کی ہے ، اس کی سند میں ایک راوی حسن بن حکم بن طہمان ہے اور وہ ضعیف ہے ، اس روایت کے بقیہ رجال ” ثقہ “ ہیں ۔

سیدنا حذیفہ بن یمان رضی اللہ عنہ بیان کرتے ہیں : سیدنا جبرائیل علیہ السلام نبی اکرم صلی اللہ علیہ وسلم کے پاس آئے اور بولے : اے سیدنا محمد ( صلی اللہ علیہ وسلم ) ! مجھے کبھی بھی ، کسی ایسے نبی کی طرف مبعوث نہیں کیا گیا ، جو میرے نزدیک آپ سے زیادہ محبوب ہوں ، کیا میں آپ کو اللہ تعالیٰ کے ایسے اسماء کی تعلیم نہ دوں ؟ جو اللہ تعالیٰ کے نزدیک اس حوالے سے سب سے زیادہ محبوب ہیں کہ ان کے ساتھ دعا کی جائے ، آپ یہ پڑھیں :
«يَا نُورَ السَّمَاوَاتِ وَالْأَرْضِ ، يَا زَيْنَ السَّمَاوَاتِ وَالْأَرْضِ ، يَا جَبَّارَ السَّمَاوَاتِ وَالْأَرْضِ ، يَا عِمَادَ السَّمَاوَاتِ وَالْأَرْضِ ، يَا بَدِيعَ السَّمَاوَاتِ وَالْأَرْضِ ، يَا قَيَّامُ السَّمَاوَاتِ وَالْأَرْضِ ، يَا ذَا الْجَلَالِ وَالْإِكْرَامِ ، يَا صَرِيخَ الْمُسْتَصْرِخِينَ ، وَيَا غَيَّاثُ الْمُسْتَغِيثِينَ وَمُنْتَهَى الْعَابِدِينَ ، الْمُفَرِّجُ عَنِ الْمَكْرُوبِينَ ، الْمُرَوِّحُ عَنِ الْمَغْمُومِينَ ، وَمُجِيبَ دُعَاءِ الْمُضْطَرِّينَ ، وَكَاشِفَ الْكَرْبِ ، يَا إِلَهَ الْعَالَمِينَ ، وَيَا أَرْحَمَ الرَّاحِمِينَ ، مَنْزُولٌ لَكَ كُلُّ حَاجَةٍ» ” اے آسمانوں اور زمین کے نور ! اے آسمانوں اور زمین کی زینت ! اے آسمانوں اور زمین کے زبردست ! اے آسمانوں اور زمین کے ستون ! اے آسمانوں اور زمین کو پیدا کرنے والے ! اے آسمانوں اور زمین کو قائم رکھنے والے ! اسے جلال اور اکرام والے ! اے چیخ و پکار کرنے والوں کی مدد کرنے والے ! اے مدد مانگنے والوں کے مددگار ! اے عبادت گزاروں کی منزل ! اے پریشان حالوں کو کشادگی نصیب کرنے والے ! اے مغموم لوگوں کو راحت عطا کرنے والے ! اے پریشان لوگوں کی دعا قبول کرنے والے ! مشکل کو ختم کرنے والے ! اے تمام جہانوں کے پروردگار ! اے سب سے زیادہ رحم کرنے والے ! تیرے ذریعے ہر حاجت پوری ہو جاتی ہے ۔ “
یہ روایت امام طبرانی نے معجم اوسط میں نقل کی ہے ، اس کی سند میں ایک راوی سلام طویل ہے اور وہ متروک ہے ۔

سیدنا عبداللہ بن مسعود رضی اللہ عنہ بیان کرتے ہیں : نبی اکرم صلی اللہ علیہ وسلم ہمیں اس کلام کی تعلیم دیتے تھے :
«اللَّهُمَّ أَصْلِحْ ذَاتَ بَيْنِنَا ، وَأَلِّفْ بَيْنَ قُلُوبِنَا ، وَاهْدِنَا سُبُلَ السَّلَامِ ، وَنَجِّنَا مِنَ الظُّلُمَاتِ إِلَى النُّورِ ، وَجَنِّبْنَا الْفَوَاحِشَ مَا ظَهَرَ مِنْهَا وَمَا بَطَنَ ۔ اللَّهُمَّ بَارِكْ لَنَا فِي أَسْمَاعِنَا وَفِي أَبْصَارِنَا ، وَقُلُوبِنَا وَأَرْوَاحِنَا ، وَذُرِّيَّاتِنَا ، وَتُبْ عَلَيْنَا ; إِنَّكَ أَنْتَ التَّوَّابُ الرَّحِيمُ ، وَاجْعَلْنَا شَاكِرِينَ لِنِعَمِكَ مُثْنِينَ بِهَا ، قَابِلِينَ لَهَا ، وَأَتِمَّهَا عَلَيْنَا» ” اے اللہ ! ہمارے درمیان صلح ( یا بہتری ) رکھنا اور ہمارے دلوں کے درمیان الفت رکھنا اور ہمیں سلامتی کے راستے پر ثابت قدم رکھنا اور ہمیں تاریکیوں سے نجات دے کر ، نور کی طرف لے جانا اور ہمیں برائیوں سے لاتعلق رکھنا ، ان میں سے جو ظاہر ہوں اور جو باطن ہوں ، اے اللہ ! ہماری سماعتوں میں ، ہماری بصارتوں میں ، ہمارے دلوں میں ، ہماری بیویوں میں ، ہماری اولاد میں ، ہمارے لئے برکت رکھنا اور ہماری توبہ قبول فرما ، بے شک تو بہت زیادہ توبہ قبول کرنے والا ، رحم کرنے والا ہے ، اور ہمیں اپنی نعمتوں کا شکر کرنے والا اور ان کی تعریف کرنے والا اور ان کا قائل ہونے والا بنانا ، اور وہ نعمتیں ہم پر مکمل کرنا ۔ “
یہ روایت امام طبرانی نے معجم کبیر اور معجم اوسط میں نقل کی ہے ، اور معجم کبیر کی سند عمدہ ہے ۔

سیدنا عبداللہ بن عمر رضی اللہ عنہ بیان کرتے ہیں : نبی اکرم صلی اللہ علیہ وسلم یہ پڑھا کرتے تھے :
«اللَّهُمَّ إِنِّي أَسْأَلُكَ عِيشَةً نَقِيَّةً ، وَمِيتَةً سَوِيَّةً ، وَمَرَدًّا غَيْرَ مُخْزٍ وَلَا فَاضِحٍ»
” اے اللہ ! میں تجھ سے پاک زندگی اور ٹھیک موت اور ایسے لوٹنے کا سوال کرتا ہوں جو مجھے رسوائی اور شرمندگی کا شکار نہ کرے ۔ “
یہ روایت امام طبرانی اور امام بزار نے نقل کی ہے ، روایت کے یہ الفاظ ان کے نقل کردہ ہیں ، امام طبرانی کی سند عمدہ ہے ۔

سیدنا عبداللہ بن عمرو رضی اللہ عنہ بیان کرتے ہیں : نبی اکرم صلی اللہ علیہ وسلم کی مجھ سے ملاقات ہوئی ، آپ صلی اللہ علیہ وسلم نے ارشاد فرمایا : ” کیا میں تمہیں ایسے کلمات کی تعلیم نہ دوں کہ اللہ تعالیٰ جس شخص کے بارے میں بھلائی کا ارادہ کر لے ، اُسے ان کلمات کی تعلیم دیتا ہے ، میں نے عرض کی : جی ہاں ! یا رسول اللہ ! تو نبی اکرم صلی اللہ علیہ وسلم نے ارشاد فرمایا : تم یہ پڑھو :
«اللَّهُمَّ إِنِّي ضَعِيفٌ فَقَوِّ فِي رِضَاكَ ضَعْفِي ، وَإِنِّي ذَلِيلٌ فَأَعِزَّنِي ، وَإِنِّي فَقِيرٌ فَأَغْنِنِي »
” اے اللہ ! بے شک میں کمزور ہوں ، اپنی رضامندی کے بارے میں ، میری کمزوری کو قوت عطا فرما ، اور میں کمتر ہوں ، مجھے عزت عطا فرما ، میں غریب ہوں ، مجھے خوشحال کر دے ۔ “
یہ روایت امام طبرانی نے نقل کی ہے ، اس کی سند میں ایک راوی ابوداؤد نابینا ہے اور وہ متروک ہے ۔

سیدنا صہیب رضی اللہ عنہ بیان کرتے ہیں : نبی اکرم صلی اللہ علیہ وسلم دعا کرتے ہوئے یہ پڑھتے تھے :
«اللَّهُمَّ إِنَّكَ لَسْتَ بِإِلَهٍ اسْتَحْدَثْنَاهُ ، وَلَا بِرَبِّ ابْتَدَعْنَاهُ ، وَلَا كَانَ لَنَا قَبْلَكَ إِلَهٌ نَلْجَأُ إِلَيْهِ وَنَذَرُكَ ، وَلَا أَعَانَكَ عَلَى خَلْقِنَا أَحَدٌ فَنُشْرِكُهُ فِيكَ تَبَارَكْتَ وَتَعَالَيْتَ» ” اے اللہ ! تو کوئی ایسا معبود نہیں ہے ، جسے ہم نے بنایا ہو ، اور نہ کوئی ایسا پروردگار ہے ، جسے ہم نے ایجاد کیا ہو ، نہ تجھ سے پہلے کوئی پروردگار تھا ، جس کی ہم پناہ لے لیں ، اور تجھے چھوڑ دیں ، اور ہماری تخلیق میں ، کسی نے تیری مدد نہیں کی ، کہ ہم اُس کو تیرا شریک بنا لیں ، تو برکت والا اور بلند و برتر ہے ۔ “
کعب کہتے ہیں : اللہ کے نبی سیدنا داؤد علیہ السلام یہ دعا کیا کرتے تھے ۔
یہ روایت امام طبرانی نے نقل کی ہے ، اس کی سند میں ایک راوی عمرو بن حصین عقیلی ہے اور وہ متروک ہے ۔

سیدنا ابوہریرہ رضی اللہ عنہ بیان کرتے ہیں : نبی اکرم صلی اللہ علیہ وسلم کھڑے ہوئے ، آپ نے دعا کی ، لوگوں نے ایسا کلام نہیں سنا تھا ، آپ نے پناہ مانگی ، لوگوں نے اس طرح کا کلام نہیں سنا تھا ، حاضرین میں سے کسی نے آپ صلی اللہ علیہ وسلم کی خدمت میں عرض کی : یا رسول اللہ ! جس طرح آپ نے دعا مانگی ہے ، اگر ہم اس طرح دعا مانگیں اور جس طرح آپ نے پناہ مانگی ہے ، اگر ہم اس طرح پناہ مانگیں تو ہمیں کیا ملے گا ؟ نبی اکرم صلی اللہ علیہ وسلم نے فرمایا : تم یہ کہو :
«اللَّهُمَّ إِنَّا نَسْأَلُكَ بِمَا سَأَلَكَ مُحَمَّدٌ عَبْدُكَ وَرَسُولُكَ ، وَنَسْتَعِيذُ بِمَا اسْتَعَاذَ عَبْدُكَ وَرَسُولُكَ»
” اے اللہ ! بے شک ہم تجھ سے ، اس کے مطابق مانگتے ہیں ، جو تیرے بندے اور تیرے رسول سیدنا محمد صلی اللہ علیہ وسلم نے تجھ سے مانگا ، اور ہم ہر اس چیز سے تیری پناہ مانگتے ہیں ، جس سے تیرے بندے اور تیرے رسول نے پناہ مانگی ۔ “
یہ روایت امام طبرانی نے معجم صغیر میں نقل کی ہے ، اس کی سند میں ایک راوی محمد بن عبدالرحمن بن محبر ہے اور وہ متروک ہے ۔

سیدنا ابوامامہ رضی اللہ عنہ بیان کرتے ہیں : ہم لوگ نبی اکرم صلی اللہ علیہ وسلم کے پاس موجود تھے ، آپ نے بہت زیادہ دعا کی ، جسے ہم یاد نہیں رکھ سکے پھر آپ صلی اللہ علیہ وسلم نے ارشاد فرمایا : ” میں تمہیں ایسی چیز کے بارے میں بتاتا ہوں ، جو اس ساری دعا کو جمع کر لے گی ، تم لوگ یہ پڑھو :
«اللَّهُمَّ إِنَّا نَسْأَلُكَ مِمَّا سَأَلَكَ مُحَمَّدٌ نَبِيُّكَ وَرَسُولُكَ ، وَنَسْتَعِيذُكَ مِمَّا اسْتَعَاذَ بِهِ نَبِيُّكَ مُحَمَّدٌ عَبْدُكَ وَرَسُولُكَ ، أَنْتَ الْمُسْتَعَانُ وَعَلَيْكَ الْبَلَاغُ وَلَا حَوْلَ وَلَا قُوَّةَ إِلَّا بِاللَّهِ» ” اے اللہ ! بے شک ہم تجھ سے وہ چیزیں مانگتے ہیں ، جو تیرے نبی اور تیرے رسول نے تجھ سے مانگی ہیں ، اور ہم ان چیزوں سے تیری پناہ مانگتے ہیں ، جن سے تیرے نبی سیدنا محمد صلی اللہ علیہ وسلم نے پناہ مانگی ہے ، جو تیرے بندے اور تیرے رسول ہیں ، تجھ سے مدد مانگی جاتی ہے اور پہنچانا تیرے ذمہ ہے ، اللہ تعالیٰ کی مدد کے بغیر کچھ نہیں ہو سکتا ۔ “
یہ روایت امام طبرانی نے نقل کی ہے ، اس کی سند میں ایک راوی لیث بن ابوسلیم ہے اور وہ ضعیف ہے ۔

سیدنا زید بن ارقم رضی اللہ عنہ بیان کرتے ہیں : نبی اکرم صلی اللہ علیہ وسلم نے ارشاد فرمایا : ” اے علی ! کیا میں تمہیں ایسی دعا کی تعلیم نہ دوں ؟ کہ اگر تم وہ دعا کرو گے ، تو اگر تمہارے گناہ ذرات ( یا چیونٹیوں ) کی تعداد جتنے ہوں ، تو وہ بخش دیئے جائیں گے ، اگرچہ تمہاری مغفرت ہو چکی ہے ، تم یہ پڑھو :
«اللَّهُمَّ لَا إِلَهَ إِلَّا أَنْتَ الْحَلِيمُ الْكَرِيمُ ، سُبْحَانَكَ تَبَارَكْتَ رَبَّ الْعَرْشِ الْعَظِيمِ»
” اے اللہ ! تیرے علاوہ اور کوئی معبود نہیں ہے ، تو بردبار ہے ، کرم کرنے والا ہے ، تو ہر عیب سے پاک ہے ، تو برکت والا ہے ، اے عظیم عرش کے پروردگار !“ ۔
یہ روایت امام طبرانی نے نقل کی ہے ، اس کی سند میں ایک راوی حبیب بن حبیب ہے ، جو حمزہ زیات کا بھائی ہے ، اور وہ ضعیف ہے ۔

سیدنا خباب خزاعی رضی اللہ عنہ بیان کرتے ہیں : میں نے نبی اکرم صلی اللہ علیہ وسلم کو یہ کہتے ہوئے سنا ہے :
«اللَّهُمَّ اسْتُرْ عَوْرَتِي ، وَآمِنْ رَوْعَتِي وَاقْضِ عَنِّي دَيْنِي»
” اے اللہ ! میرے پوشیدہ معاملات کی پردہ پوشی فرما ، اور میری پریشانیوں کو امان نصیب فرما ، اور میری طرف سے میرا قرض ادا کروا دے ۔ “
یہ روایت امام طبرانی نے نقل کی ہے ، اس کی سند میں ایسا راوی ہے ، جس سے میں واقف نہیں ہوں ۔

سیدنا سائب بن یزید رضی اللہ عنہ بیان کرتے ہیں : نبی اکرم صلی اللہ علیہ وسلم یہ فرمایا کرتے تھے : ” آدمی کے لیے یہ کافی ہے کہ وہ دعا کرتے ہوئے یہ کہے :
«اللَّهُمَّ اغْفِرْ لِي وَارْحَمْنِي ، وَأَدْخِلْنِي الْجَنَّةَ» ” اے اللہ ! تو میری مغفرت کر دے ، تو مجھ پر رحم کر ، اور تو مجھے جنت میں داخل کر دینا ۔ “
یہ روایت امام طبرانی نے نقل کی ہے اور اس کے رجال ” صحیح “ کے رجال ہیں ، صرف ابن لہیعہ کا معاملہ مختلف ہے اور وہ حسن الحدیث ہے ۔

سیدنا ابوامامہ رضی اللہ عنہ بیان کرتے ہیں : نبی اکرم صلی اللہ علیہ وسلم نے ایک شخص سے فرمایا : تم یہ پڑھو :
«اللَّهُمَّ إِنِّي أَسْأَلُكَ نَفْسًا بِكَ مُطْمَئِنَّةً ، تُؤْمِنُ بِلِقَائِكَ ، وَتَرْضَى بِقَضَائِكَ ، (وَتَقْنَعُ بِعَطَائِكَ) »
” اے اللہ ! میں تجھ سے ایسے نفس کا سوال کرتا ہوں جو تیری ذات پر مطمئن ہو ، اور تیری بارگاہ میں حاضری پر ایمان رکھتا ہو ، اور تیری تقدیر کے فیصلے سے راضی ہو ، اور تیری عطاؤں پر قناعت کرتا ہو ۔ “
یہ روایت امام طبرانی نے نقل کی ہے اور اس کی سند میں ایسا راوی ہے ، جس سے میں واقف نہیں ہوں ۔

سیدہ میمونہ بنت ابوعسیب رضی اللہ عنہا ، جو نبی اکرم صلی اللہ علیہ وسلم کی کنیز ہیں ، وہ بیان کرتی ہیں : ” حریش سے تعلق رکھنے والی ایک خاتون اونٹ پر سوار ہو کر نبی اکرم صلی اللہ علیہ وسلم کی خدمت میں حاضر ہوئی ، اس نے بلند آواز میں کہا: اے عائشہ ! آپ نبی اکرم صلی اللہ علیہ وسلم کی دعا کے حوالے سے میری مدد کیجئے ، آپ مجھے سکون فراہم کیجیے ! ( راوی کو شک ہے ، شاید یہ الفاظ ہیں : ) مجھے اطمینان فراہم کیجئے ، سیدہ عائشہ رضی اللہ عنہا نے اس عورت سے کہا: تم اپنا ہاتھ اپنے سینے پر رکھو اور اس پر پھیرتے ہوئے یہ پڑھو :
«بِسْمِ اللَّهِ ، اللَّهُمَّ دَاوِنِي بِدَوَائِكَ ، وَاشْفِنِي بِشِفَائِكَ ، وَأَغْنِنِي بِفَضْلِكَ عَمَّنْ سِوَاكَ ، وَاحْذَرْ عَنِّي أَذَاكَ» ” اے اللہ ! تو اپنی دوا کے ذریعے مجھے دوا دے ، اور اپنی شفا کے ذریعے مجھے شفا نصیب کر ، اور اپنے فضل کے ذریعے مجھے اپنے علاوہ ہر ایک سے بے نیاز کر دے ، اور مجھے کسی تکلیف کا شکار نہ کرنا ۔ “
ربیعہ نامی خاتون کہتی ہیں : میں نے یہ دعا کی ، تو میں نے اس دعا کو عمدہ پایا ، منتجع کہتے ہیں : میرا خیال ہے ربیعہ نامی خاتون نے اس روایت میں یہ بات بیان کی تھی : کہ اس عورت کے مزاج میں تیزی پائی جاتی تھی ۔
یہ روایت امام طبرانی نے نقل کی ہے ، اور اس کی سند میں ایسے راوی ہیں ، جن سے میں واقف نہیں ہوں ۔

سیدنا انس بن مالک رضی اللہ عنہ بیان کرتے ہیں : ہم لوگ نبی اکرم صلی اللہ علیہ وسلم کے ساتھ مسجد میں موجود تھے ، یہاں تک کہ جب سورج طلوع ہوا تو نبی اکرم صلی اللہ علیہ وسلم باہر تشریف لے گئے ، میں آپ کے پیچھے گیا ، نبی اکرم صلی اللہ علیہ وسلم نے فرمایا : تم ہمارے ساتھ چلو ! تاکہ ہم فاطمہ بنت محمد کے ہاں جائیں ، سیدنا انس رضی اللہ عنہ بیان کرتے ہیں : ہم ان کے گھر گئے تو وہ سو رہی تھیں اور لیٹی ہوئی تھیں ، نبی اکرم صلی اللہ علیہ وسلم نے فرمایا : اے فاطمہ ! یہ سونے کا کون سا وقت ہے ؟ انہوں نے عرض کی : مجھے گزشتہ رات بخار رہا ہے ، نبی اکرم صلی اللہ علیہ وسلم نے فرمایا : اس دعا کا کیا بنا ؟ جو میں نے تمہیں تعلیم دی تھی ، انہوں نے عرض کی : وہ میں بھول گئی ، نبی اکرم صلی اللہ علیہ وسلم نے فرمایا : تم یہ پڑھو :
«يَا حَيُّ يَا قَيُّومُ ، بِرَحْمَتِكَ أَسْتَغِيثُ ، أَصْلِحْ لِي شَأْنِي كُلَّهِ ، وَلَا تَكِلْنِي إِلَى نَفْسِي طَرْفَةَ عَيْنٍ وَلَا إِلَى أَحَدٍ مِنَ النَّاسِ» ” یا حی ! یا قیوم ! میں تیری رحمت کے وسیلے سے مدد مانگتا ہوں کہ تو میرے تمام کاموں کو ٹھیک کر دے اور مجھے پلک جھپکنے کے عرصے کے لیے بھی میری ذات کے سپرد نہ کرنا ، یا لوگوں میں سے کسی ایک کے سپرد نہ کرنا ۔ “

یہ روایت امام طبرانی نے معجم صغیر اور معجم اوسط میں نقل کی ہے ، یہ سلمہ بن حرب بن زیاد کلابی کے حوالے سے ، ابومدرک کے حوالے سے سیدنا انس رضی اللہ عنہ سے منقول ہے ، امام ذہبی نے سلمہ کا ذکر ” میزان الاعتدال “ میں کیا ہے ، اور یہ بات کہی ہے : یہ اپنے استاد ابومدرک کی طرح مجہول ہے ، ابن حبان نے سلمہ کو ثقہ قرار دیا ہے ، انہوں نے اس کے حالات میں اس کے حوالے سے یہ حدیث ذکر کی ہے ” میزان الاعتدال “ میں یہ مذکور ہے : ابومدرک امام دارقطنی رحمہ اللہ کہتے ہیں : یہ متروک ہے ۔ ( علامہ ہیثمی فرماتے ہیں : ) مجھے نہیں معلوم کہ اس سے مراد یہی ابومدرک ہے یا کوئی اور ہے ؟ اس روایت کے بقیہ رجال ” ثقہ “ ہیں ۔

سیدنا عبداللہ بن عمر رضی اللہ عنہما بیان کرتے ہیں : نبی اکرم صلی اللہ علیہ وسلم کی دعا یہ ہوتی تھی :
«اللَّهُمَّ لَا تَكِلْنِي إِلَى نَفْسِي طَرْفَةَ عَيْنٍ ، وَلَا تَنْزِعْ مِنِّي صَالِحَ مَا أَعْطَيْتَنِي»
” اے اللہ ! تو مجھے پلک جھپکنے کے عرصے کے لیے بھی میرے نفس کے سپرد نہ کرنا اور تو نے مجھے جو کچھ عطا کیا ہے ، اس میں سے جو صالح ہے وہ مجھ سے الگ نہ کرنا ۔ “
یہ روایت امام بزار نے نقل کی ہے ، اس کی سند میں ایک راوی ابراہیم بن یزید خوزی ہے اور وہ متروک ہے ۔

سیدنا عبداللہ بن عمر رضی اللہ عنہما بیان کرتے ہیں : نبی اکرم صلی اللہ علیہ وسلم ان کلمات کے ہمراہ دعا کیا کرتے تھے :
«اللَّهُمَّ - أَحْسَبُهُ قَالَ : أَسْأَلُكَ إِيمَانًا يُبَاشِرُ قَلْبِي حَتَّى أَعْلَمَ أَنْ لَا يُصِيبَنِي إِلَّا مَا كَتَبْتَ لِي ، وَرِضًا مِنَ الْمَعِيشَةِ بِمَا قَسَمْتَ لِي» ” اے اللہ ! ( یہاں ایک لفظ کے بارے میں راوی کو شک ہے ) میں تجھ سے ایسے ایمان کا سوال کرتا ہوں ، جو میرے دل کے ساتھ مل جائے ، یہاں تک کہ مجھے یہ علم ہو جائے کہ مجھے وہی چیز نصیب ہو گی ، جو تو نے میرے لیے تحریر کی ہے ، اور تو نے جو چیز زندگی میں سے میرے حصے میں رکھی ہے ، اُس سے مجھے راضی کر دے ۔ “
یہ روایت امام بزار نے نقل کی ہے ، اس کی سند میں ایک راوی ابومہدی سعید بن سنان ہے اور وہ حدیث میں ضعیف ہے ۔

سیدنا زبیر رضی اللہ عنہ بیان کرتے ہیں : نبی اکرم صلی اللہ علیہ وسلم یہ پڑھا کرتے تھے : «اللَّهُمَّ بَارِكْ لِي فِي دِينِي الَّذِي هُوَ عِصْمَةُ أَمْرِي ، وَفِي آخِرَتِي الَّتِي إِلَيْهَا مَصِيرِي ، وَفِي دُنْيَايَ الَّتِي فِيهَا بَلَاغِي ، وَاجْعَلْ حَيَاتِي زِيَادَةً فِي كُلِّ خَيْرٍ ، وَاجْعَلِ الْمَوْتَ رَاحَةً لِي مِنْ كُلِّ شَرٍّ»
” اے اللہ ! تو میرے دین میں ، میرے لئے برکت رکھ دے ، جو میرے معاملے کے بچاؤ کا باعث ہے ، اور میری آخرت میں ، میرے لئے برکت رکھ دے ، جس کی طرف میں نے لوٹ کے جانا ہے ، اور میری دنیا میں ، میرے لئے برکت رکھ دے ، جس میں میرا بلاغ ہے ، اور میری زندگی کو ہر بھلائی میں اضافہ ( کا باعث ) بنا دے اور میری موت کو ، میرے لیے ہر شر سے راحت کا باعث بنا دے ۔ “
یہ روایت امام بزار نے نقل کی ہے اور اس کے رجال ” صحیح “ کے رجال ہیں ، صرف صالح بن محمد جزرہ کا معاملہ مختلف ہے اور وہ ثقہ ہے ۔

سیدنا بریدہ رضی اللہ عنہ بیان کرتے ہیں : نبی اکرم صلی اللہ علیہ وسلم یہ پڑھا کرتے تھے :
«اللَّهُمَّ اجْعَلْنِي شَكُورًا ، وَاجْعَلْنِي صَبُورًا ، وَاجْعَلْنِي فِي عَيْنِي صَغِيرًا ، وَفِي أَعْيُنِ النَّاسِ كَبِيرًا»
” اے اللہ ! تو مجھے شکر کرنے والا بنا دے اور تو مجھے صبر کرنے والا بنا دے اور تو مجھے اپنی آنکھوں میں چھوٹا بنا دے ( یعنی مجھے ایسا بنا دے کہ میں تکبر کا شکار نہ ہوؤں اور عاجزی و انکساری کے ساتھ رہوں ) اور لوگوں کی آنکھوں میں بڑا بنا دے ۔ “
یہ روایت امام بزار نے نقل کی ہے ، اس کی سند میں ایک راوی عقبہ بن عبداللہ اصم ہے اور وہ ضعیف ہے ، امام بزار نے اپنی حدیث کو حسن قرار دیا ہے ۔

سیدنا عمران بن حصین رضی اللہ عنہ یا شاید کوئی اور بیان کرتے ہیں : سیدنا حصین رضی اللہ عنہ نبی اکرم صلی اللہ علیہ وسلم کی خدمت میں حاضر ہوئے اور بولے : اے سیدنا محمد ( صلی اللہ علیہ وسلم ) ! جناب عبدالمطلب اپنی قوم کے لئے آپ سے بہتر تھے ، وہ انہیں جگر اور کوہان ( کا گوشت وغیرہ ) کھلایا کرتے تھے اور آپ ان لوگوں کو قربان کر رہے ہیں ، نبی اکرم صلی اللہ علیہ وسلم نے ، جو اللہ کو منظور تھا ، وہ اُن سے فرمایا ، سیدنا حصین رضی اللہ عنہ نے دریافت کیا : آپ مجھے کیا حکم دیتے ہیں ؟ کہ میں کیا پڑھوں ؟ نبی اکرم صلی اللہ علیہ وسلم نے فرمایا : تم یہ پڑھو :
«اللَّهُمَّ قِنِي شَرَّ نَفْسِي ، وَاعْزِمْ لِي عَلَى أَرْشَدِ أَمْرِي»
” اے اللہ ! مجھے میری ذات کے شر سے بچا لے ، اور مجھے میرے معاملے کے بارے میں سب سے زیادہ ہدایت والے طریقے پر پختہ کر دے ۔ “
پھر وہ صاحب چلے گئے ، انہوں نے اسلام قبول کر لیا پھر وہ آئے اور بولے : میں آپ کے پاس آیا تھا اور آپ نے مجھ سے یہ کہا: تھا تم یہ پڑھو :
«اللَّهُمَّ قِنِي شَرَّ نَفْسِي ، وَاعْزِمْ لِي عَلَى أَرْشَدِ أَمْرِي»
” اے اللہ ! مجھے میری ذات کے شر سے بچا لے ، اور مجھے میرے معاملے کے بارے میں سب سے زیادہ ہدایت والے طریقے پر پختہ کر دے ۔ “
اب مجھے کیا پڑھنا چاہیے ؟ تو نبی اکرم صلی اللہ علیہ وسلم نے فرمایا : تم یہ پڑھو :
«اللَّهُمَّ اغْفِرْ لِي مَا أَسْرَرْتُ وَمَا أَعْلَنْتُ ، وَمَا أَخْطَأْتُ وَمَا عَمَدْتُ ، وَمَا عَلِمْتُ وَمَا جَهِلْتُ»
” اے اللہ ! تو مغفرت کر دے اس چیز کی ، جو میں نے پوشیدہ طور پر کیا اور اس کی جو میں نے اعلانیہ طور پر کیا ، اس کی جو میں نے غلطی سے کیا ، اس کی جو میں نے جان بوجھ کر کیا ، اس کی جو میں جانتا ہوں ، اور اس کی جس سے میں ناواقف ہوں ۔ “
یہ روایت امام أحمد نے نقل کی ہے ، اور اس کے رجال ” صحیح“ کے رجال ہیں ۔

سیدنا ثوبان رضی اللہ عنہ بیان کرتے ہیں : نبی اکرم صلی اللہ علیہ وسلم یہ پڑھا کرتے تھے :
«اللَّهُمَّ إِنِّي أَسْأَلُكَ الطَّيِّبَاتِ ، وَتَرْكَ الْمُنْكَرَاتِ ، وَحُبَّ الْمَسَاكِينِ ، وَأَنْ تَتُوبَ عَلَيَّ ، وَإِنْ أَرَدْتَ بِعِبَادِكَ فِتْنَةً أَنْ تَقْبِضَنِي غَيْرَ مَفْتُونٍ»
” اے اللہ ! میں تجھ سے پاکیزہ چیزیں مانگتا ہوں اور منکرات کو ترک کرنے اور غریبوں سے محبت رکھنے ( کا سوال کرتا ہوں ) اور یہ کہ تو میری توبہ قبول فرما ! اور جب تو اپنے بندوں کو آزمائش کا شکار کرنے کا ارادہ کرے تو مجھے ایسی حالت میں وفات دینا کہ میں آزمائش کا شکار نہ ہوا ہوؤں ۔ “
یہ روایت امام بزار نے نقل کی ہے اور اس کی سند حسن ہے ۔

مکحول بیان کرتے ہیں : وہ سیدنا انس بن مالک رضی اللہ عنہ کی خدمت میں حاضر ہوئے ، وہ کہتے ہیں : میں نے انہیں یہ ذکر کرتے ہوئے سنا کہ نبی اکرم صلی اللہ علیہ وسلم یہ دعا کیا کرتے تھے :
«اللَّهُمَّ انْفَعْنِي بِمَا عَلَّمْتَنِي ، وَعَلِّمْنِي مَا يَنْفَعُنِي» ” اے اللہ ! تو نے مجھے جو علم دیا ہے ، اس کے حوالے سے مجھے نفع عطا فرما اور مجھے اُس چیز کا علم عطا فرما ، جو مجھے نفع دے ۔ “
یہ روایت امام طبرانی نے معجم اوسط میں ، اسماعیل بن عیاش کی ، اہل مدینہ سے نقل کردہ روایت کے طور پر نقل کی ہے اور
یہ روایت ضعیف ہے ۔

سیدہ عائشہ صدیقہ رضی اللہ عنہا بیان کرتی ہیں : نبی اکرم صلی اللہ علیہ وسلم یہ پڑھا کرتے تھے :
«اللَّهُمَّ إِنِّي أَسْأَلُكَ عِلْمًا نَافِعًا ، وَأَعُوذُ بِكَ مِنْ عِلْمٍ لَا يَنْفَعُ» ” اے اللہ ! میں تجھ سے نفع دینے والا علم مانگتا ہوں ، اور ایسے علم سے تیری پناہ مانگتا ہوں ، جو نفع نہ دے ۔ “
یہ روایت امام طبرانی نے معجم اوسط میں نقل کی ہے اور اس کے رجال ثقہ ہیں ۔

سیدنا جابر رضی اللہ عنہ بیان کرتے ہیں : نبی اکرم صلی اللہ علیہ وسلم یہ پڑھا کرتے تھے :
«اللَّهُمَّ إِنِّي أَسْأَلُكَ عِلْمًا نَافِعًا ، وَأَعُوذُ بِكَ مِنْ عِلْمٍ لَا يَنْفَعُ»
” اے اللہ ! میں تجھ سے نفع دینے والے علم کا سوال کرتا ہوں ، اور ایسے علم سے تیری پناہ مانگتا ہوں ، جو نفع نہ دے ۔ “ ( علامہ ہیثمی فرماتے ہیں : ) میں یہ کہتا ہوں : اور سیدنا جابر رضی اللہ عنہ کی نقل کردہ روایت امام ابن ماجہ نے نقل کی ہے ، جس میں یہ الفاظ ہیں :
«سَلُوا اللَّهَ عِلْمًا نَافِعًا» ” تم لوگ اللہ تعالیٰ سے نفع دینے والا علم مانگو ۔ “
جبکہ یہاں جو
یہ روایت نقل ہوئی ہے ، اس میں یہ مذکور ہے کہ نبی اکرم صلی اللہ علیہ وسلم بذات خود یہ دعا مانگا کرتے تھے ۔
یہ روایت امام طبرانی نے معجم اوسط میں نقل کی ہے اور اس کی سند حسن ہے ۔

سیدنا جابر رضی اللہ عنہ بیان کرتے ہیں : انہوں نے نبی اکرم صلی اللہ علیہ وسلم کو یہ کہتے ہوئے سنا :
«اللَّهُمَّ إِنِّي أَسْأَلُكَ عِلْمًا نَافِعًا ، وَعَمَلًا مُتَقَبَّلًا»
” اے اللہ ! میں تجھ سے نفع دینے والے علم اور مقبول عمل کا سوال کرتا ہوں ۔ “
یہ روایت امام طبرانی نے معجم اوسط میں نقل کی ہے اور اس کے رجال کی توثیق کی گئی ہے ۔

سیدنا عبداللہ بن عمر رضی اللہ عنہما بیان کرتے ہیں : نبی اکرم صلی اللہ علیہ وسلم دعا میں یہ پڑھا کرتے تھے : ” ایسا بچاؤ جیسے بچے کا بچاؤ ہوتا ہے ۔ “ امام ابویعلیٰ کہتے ہیں : یعنی ( نو ) مولود ، ہمارے سامنے اسی طرح وضاحت بیان کی گئی ہے ۔
یہ روایت امام ابویعلیٰ نے نقل کی ہے اور اس کی سند میں ایک راوی ایسا ہے ، جس کا نام بیان نہیں کیا گیا ہے ، اس روایت کے بقیہ رجال ” ثقہ “ ہیں ۔

سیدہ عائشہ صدیقہ رضی اللہ عنہا بیان کرتی ہیں : نبی اکرم صلی اللہ علیہ وسلم یہ پڑھا کرتے تھے :
«اللَّهُمَّ اجْعَلْ أَوْسَعَ رِزْقِكَ عَلَيَّ عِنْدَ كِبَرِ سِنِّي ، وَانْقِطَاعِ عُمُرِي» ” اے اللہ ! میری عمر زیادہ ہونے کے وقت اور میری عمر منقطع ہونے کے وقت مجھے اپنا وسیع ترین رزق عطا فرمانا ۔ “
یہ روایت امام طبرانی نے معجم اوسط میں نقل کی ہے اور اس کی سند حسن ہے ۔

حارث اعور بیان کرتے ہیں : میں عشاء کے بعد سیدنا علی رضی اللہ عنہ کی خدمت میں حاضر ہوا ، تو انہوں نے دریافت کیا : تم اس وقت کس سلسلے میں آئے ہو ، میں نے جواب دیا : میں آپ سے محبت رکھتا ہوں ، انہوں نے دریافت کیا : کیا اللہ کی قسم ! تم واقعی مجھ سے محبت رکھتے ہو ؟ میں نے جواب دیا : جی ہاں ! اللہ کی قسم ! میں آپ سے محبت رکھتا ہوں ، تو انہوں نے فرمایا : کیا میں تمہیں اس دعا کی تعلیم نہ دوں ، جس کی تعلیم ، نبی اکرم صلی اللہ علیہ وسلم نے مجھے دی تھی ؟ میں نے جواب دیا : جی ہاں ! تو انہوں نے فرمایا : تم یہ پڑھو :
«اللَّهُمَّ افْتَحْ مَسَامِعَ قَلْبِي لِذِكْرِكَ ، وَارْزُقْنِي طَاعَتَكَ ، وَطَاعَةَ رَسُولِكَ - صَلَّى اللَّهُ عَلَيْهِ وَسَلَّمَ - وَعَمَلًا بِكِتَابِكَ»
” اے اللہ ! میرے دل کے مسامع کو اپنے ذکر کے لئے کھول دے اور مجھے اپنی اور اپنے رسول کی فرمانبرداری اور اپنی کتاب پر عمل نصیب فرما ۔ “
یہ روایت امام طبرانی نے معجم اوسط میں نقل کی ہے اور حارث نامی راوی ضعیف ہے ۔

سیدنا ابوہریرہ رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” تم میں سے کوئی ایک شخص یہ ہرگز نہ کہے : اے اللہ ! تو مجھے میری حجت تلقین فرما ، کیونکہ کافر شخص کو اس کی حجت تلقین کی جاتی ہے بلکہ آدمی کو یہ پڑھنا چاہیے :
«اللَّهُمَّ لَقِّنِي حُجَّةَ الْإِيمَانِ عِنْدَ الْمَوْتِ» ” اے اللہ ! تو موت کے وقت مجھے ایمان کی حجت تلقین فرمانا ۔ “
یہ روایت امام طبرانی نے معجم اوسط میں نقل کی ہے ، اس کی سند میں ایک راوی ابن لہیعہ ہے اور اس کی نقل کردہ حدیث حسن ہے ، اس روایت کے بقیہ رجال ” ثقہ “ ہیں ۔

سیدنا ابوہریرہ رضی اللہ عنہ بیان کرتے ہیں : جب نبی اکرم صلی اللہ علیہ وسلم نے سیدنا جعفر بن ابوطالب رضی اللہ عنہ کو حبشہ کی طرف بھیجا ، تو آپ ان کے ساتھ چلتے ہوئے کچھ دور تک گئے اور انہیں زادراہ کے طور پر یہ کلمات تعلیم دیے :
«اللَّهُمَّ الْطُفْ بِي فِي تَيْسِيرِ كُلِّ عَسِيرٍ ; فَإِنَّ تَيْسِيرَ كُلِّ عَسِيرٍ عَلَيْكَ يَسِيرٌ ، وَأَسْأَلُكَ الْيُسْرَ وَالْمُعَافَاةَ فِي الدُّنْيَا وَالْآخِرَةِ»
” اے اللہ ! مجھ پر یہ مہربانی فرمانا ، کہ ہر مشکل آسان کر دینا ، کیونکہ ہر مشکل کو آسان کر دینا ، تیرے لئے آسان ہے ، اور میں دنیا اور آخرت میں آسانی اور معافی کا تجھ سے سوال کرتا ہوں ۔ “
یہ روایت امام طبرانی نے معجم اوسط میں نقل کی ہے اور اس کی سند میں ایسے راوی ہیں جن سے میں واقف نہیں ہوں ۔

سیدنا بریدہ اسلمی رضی اللہ عنہ بیان کرتے ہیں : نبی اکرم صلی اللہ علیہ وسلم نے مجھ سے فرمایا : ” اے بریدہ ! کیا میں تمہیں ایسے کلمات کی تعلیم نہ دوں ؟ کہ اللہ تعالیٰ جس شخص کے بارے میں بھلائی کا ارادہ کر لے ، اُسے ان کلمات کی تعلیم عطا کرتا ہے ، اور پھر وہ بندہ اُن کو کبھی نہیں بھولتا ، راوی کہتے ہیں ، میں نے عرض کی : جی ہاں ! یا رسول اللہ ! نبی اکرم صلی اللہ علیہ وسلم نے ارشاد فرمایا : تم یہ پڑھو :
«اللَّهُمَّ إِنِّي ضَعِيفٌ فَقَوِّ فِي رِضَاكَ ضَعْفِي ، وَخُذْ إِلَى الْخَيْرِ بِنَاصِيَتِي ، وَاجْعَلِ الْإِسْلَامَ مُنْتَهَى رِضَائِي ، اللَّهُمَّ إِنِّي ضَعِيفٌ فَقَوِّنِي ، وَإِنِّي ذَلِيلٌ فَأَعِزَّنِي ، وَإِنِّي فَقِيرٌ فَأَغْنِنِي»
” اے اللہ ! بے شک میں کمزور ہوں ، اپنی رضامندی کے بارے میں تو میری کمزوری کو قوت دیدے اور میری پیشانی کو بھلائی کی طرف لے جا ، اور اسلام کو میری رضامندی کی آخری حد بنا دے ، اے اللہ ! بے شک میں کمزور ہوں ، تو مجھے قوت عطا فرما ، میں مغلوب ہوں ، تو مجھے غلبہ عطا فرما ! میں غریب ہوں ، تو مجھے خوشحال کر دے ۔ “

یہ روایت امام طبرانی نے معجم اوسط میں نقل کی ہے ، اس کی سند میں ایک راوی ابوداؤد نابینا ہے اور وہ انتہائی ضعیف ہے ۔

سیدنا سمرہ رضی اللہ عنہ بیان کرتے ہیں : نبی اکرم صلی اللہ علیہ وسلم یہ دعا کیا کرتے تھے :
«اللَّهُمَّ ضَعْ فِي أَرْضِنَا بَرَكَتَهَا ، وَزِينَتَهَا ، وَسَكَنَهَا»
” اے اللہ ! ہماری زمین میں اس کی برکت ، اس کی زینت اور اس کا سکون رکھ دے ( یا شاید یہاں باسی مراد ہوں ) ۔ “
یہ روایت امام طبرانی نے معجم اوسط میں نقل کی ہے اور اس کی سند عمدہ ہے ۔