مجمع الزوائد ومنبع الفوائد

سیدنا ابوذر غفاری رضی اللہ عنہ بیان کرتے ہیں : قیامت کے دن میں نبی اکرم صلی اللہ علیہ وسلم کے سب سے زیادہ قریب ہوؤں گا ، کیونکہ میں نے نبی اکرم صلی اللہ علیہ وسلم کو یہ ارشاد فرماتے ہوئے سنا ہے : ” قیامت کے دن تم میں سے ، میرے زیادہ قریب وہ شخص ہو گا ، جو دنیا سے جاتے ہوئے اُسی حالت میں ہو گا کہ جس حالت میں ، میں نے اُسے چھوڑا تھا ( پھر سیدنا ابوذر غفاری رضی اللہ عنہ نے فرمایا : ) اللہ کی قسم ! تم میں سے ہر شخص دنیا کے حوالے سے کسی نہ کسی چیز میں مبتلاء ہوا ، سوائے میرے ۔ “
یہ روایت امام أحمد نے نقل کی ہے اور اس کے رجال ثقہ ہیں ، البتہ عراک بن مالک نامی راوی نے سیدنا ابوذر غفاری رضی اللہ عنہ سے ، میرے خیال میں ، سماع نہیں کیا ہے ، باقی اللہ بہتر جانتا ہے ۔
یہ روایت امام طبرانی نے اس کی مانند نقل کی ہے ۔

سیدنا عبداللہ بن عباس رضی اللہ عنہما بیان کرتے ہیں : سیدنا ابوذر غفاری رضی اللہ عنہ نے یہ بات بیان کی ہے : میں نے نبی اکرم صلی اللہ علیہ وسلم کو یہ ارشاد فرماتے ہوئے سنا ہے : ” تم میں سے میرے نزدیک سب سے زیادہ محبوب اور میرے سب سے زیادہ قریب وہ شخص ہو گا ، جو میرے بعد بھی اس عہد پر کاربند رہے گا ، جس عہد پر وہ مجھ سے جدا ہوا ۔ “
یہ روایت امام طبرانی نے نقل کی ہے اس کی سند میں ایک راوی موسیٰ بن عبیدہ ہے اور وہ ضعیف ہے ۔

امام طبرانی نے سیدنا ابوذر غفاری رضی اللہ عنہ کے بارے میں یہ کہا: ہے : یہ سیدنا جندب رضی اللہ عنہ بن جناده بن سفیان بن عبید بن حرام بن غفار بن ملیل بن ضمره بن بکر بن عبدمناف بن کنانہ بن خزیمہ بن مدرکہ بن الیاس بن مضر بن نزار بن معد بن عدنان ہیں ۔

محمد بن عبدالله بن نمیر بیان کرتے ہیں : سیدنا ابوذر غفاری رضی اللہ عنہ کا نام ” جندب بن جنادہ “ تھا ، اور ایک قول کے مطابق سیدنا ابوذر غفاری رضی اللہ عنہ کا نام ” بریر “ تھا ۔
یہ روایت امام طبرانی نے نقل کی ہے ۔

زید بن اسلم بیان کرتے ہیں : نبی اکرم صلی اللہ علیہ وسلم نے سیدنا ابوذر غفاری رضی اللہ عنہ سے فرمایا : ” اے بریر ! “ ۔
یہ روایت امام طبرانی نے ایک حدیث میں نقل کی ہے ، جسے ہم نے مختصر طور پر نقل کیا ہے
یہ روایت ” مرسل “ ہے اور اس کے رجال ثقہ ہیں ۔

جبیر بن نفیر بیان کرتے ہیں : سیدنا ابوذر غفاری رضی اللہ عنہ یہ فرماتے ہیں : مجھے اپنے بارے میں یہ بات یاد ہے کہ میں اسلام قبول کرنے والا چوتھا فرد تھا ، مجھ سے پہلے صرف نبی اکرم صلی اللہ علیہ وسلم سیدنا ابوبکر رضی اللہ عنہ اور سیدنا بلال رضی اللہ عنہ نے اسلام قبول کیا تھا ۔
یہ روایت امام طبرانی نے دو اسناد کے ساتھ نقل کی ہے ، ان میں سے ایک سند کے اعتبار سے ” متصل “ ہے اور اس کے رجال ثقہ ہیں ۔

سیدنا ابوذر غفاری رضی اللہ عنہ بیان کرتے ہیں : میرا ایک بھائی تھا ، جس کا نام انیس تھا ، وہ شاعر تھا ، اس کا ایک شاعر کے ساتھ مکالمہ ہوا ، انیس نے کہا: میں تم سے زیادہ بڑا شاعر ہوں ، دوسرے نے کہا: میں بڑا شاعر ہوں ، انیس نے کہا: تم کس فرد پر راضی ہوتے ہو ؟ جو ہمارے درمیان فیصلہ کرے ، تو اس نے کہا: میں اس بات پر راضی ہوؤں گا کہ مکہ کا کاہن ہمارے درمیان فیصلہ کرے تو اس نے کہا: ٹھیک ہے ، پھر وہ دونوں نکل کر مکہ چلے گئے ، وہ دونوں اس کاہن کے پاس اکٹھے ہوئے ، انیس نے بھی اپنا کلام سنایا ، دوسرے نے بھی اپنا کلام سنایا ، تو کاہن نے انیس سے کہا: تم نے اپنے ذمہ لازم چیز کو ادا کر دیا ہے ، تو گویا اس نے انیس کے شعر کو بہتر قرار دیا ، میرے بھائی نے آ کر بتایا : مکہ میں ایک فرد ہیں ، جو یہ کہتے ہیں کہ وہ نبی ہیں اور وہ تمہارے دین کے مطابق ہیں ۔ سیدنا عبداللہ بن عباس رضی اللہ عنہما کہتے ہیں : میں نے سیدنا ابوذر غفاری رضی اللہ عنہ سے دریافت کیا : آپ کا دین کیا تھا ؟ انہوں نے بتایا : میری قوم کے لوگ جن معبودوں کی عبادت کرتے تھے ، میں نے ان سے منہ موڑ لیا ہوا تھا ، سیدنا عبداللہ بن عباس رضی اللہ عنہما کہتے ہیں : میں نے دریافت کیا : پھر آپ کس کی عبادت کرتے تھے ؟ انہوں نے فرمایا : کسی چیز کی نہیں کی ، میں رات کے وقت نماز پڑھتا تھا ( یا دعا کرتا تھا ) یہاں تک کہ میں یوں گر جاتا تھا ، جیسے میں چادر ہوں ، یہاں تک کہ دھوپ کی تپش مجھے بیدار کرتی تھی ، اُن سے دریافت کیا گیا : آپ کس طرف رُخ کرتے تھے ؟ انہوں نے کہا: جس طرح میرا پروردگار مجھے پھیر دیتا تھا ، اُس طرف ۔ سیدنا ابوذر غفاری رضی اللہ عنہ بیان کرتے ہیں : انیس نے مجھ سے کہا: اُن لوگوں نے انہیں برا قرار دیا ہے ، سیدنا ابوذر غفاری رضی اللہ عنہ کہتے ہیں : میں آیا ، میں مکہ میں داخل ہوا ، میں خانہ کعبہ اور اس کے پردوں کے درمیان پندرہ دن ٹھہرا رہا ، میں دن کے وقت باہر آتا تھا ، آب زمزم پی لیتا تھا ، تو مجھے بھوک محسوس نہیں ہوتی تھی ، بلکہ میرے پیٹ پر شکنیں پڑنا شروع ہو گئیں ، اسی دوران ایک مرتبہ دو عورتیں رات کے وقت آئیں ، وہ اپنے معبودوں سے دعا کر رہی تھیں ، ان میں سے ایک یہ کہہ رہی تھی : اے اساف ! تم مجھے بیٹا دے دو ، دوسری کہہ رہی تھی : اے نائلہ ! تم مجھے یہ یہ چیز دو ! تو میں نے کہا: یہ فضولیات ہیں ، تو وہ دونوں یہ کہتے ہوئے چلی گئیں کہ ایک بے دین شخص کعبہ کے پردوں کے درمیان موجود ہے ، اسی دوران نبی اکرم صلی اللہ علیہ وسلم وہاں سے گزرے ، سیدنا ابوبکر رضی اللہ عنہ آپ کے پیچھے چلتے ہوئے جا رہے تھے ، اُن عورتوں نے کہا: کعبہ کے پردوں کے پیچھے ایک بے دین شخص موجود ہے ، تو نبی اکرم صلی اللہ علیہ وسلم نے ان کی کہی ہوئی بات کو برا قرار دیا ، سیدنا ابوذر غفاری رضی اللہ عنہ کہتے ہیں : مجھے یہ اندازہ ہو گیا کہ یہی اللہ کے رسول صلی اللہ علیہ وسلم ہیں ، میں نکل کر آپ کے پاس آیا ، میں نے کہا: یا رسول اللہ ! آپ کو سلام ہو ، نبی اکرم صلی اللہ علیہ وسلم نے فرمایا : تم پر بھی سلام ہو ، اللہ تعالیٰ کی رحمتیں اور اس کی برکتیں ہوں ، یہ کلمات آپ نے تین مرتبہ کہے ، پھر آپ نے مجھ سے دریافت کیا : تم کتنے عرصے سے یہاں پر ہو ؟ میں نے عرض کی : پندرہ دن سے ، نبی اکرم صلی اللہ علیہ وسلم نے دریافت کیا : تم کہاں سے کھاتے ہو ؟ میں نے عرض کی : میں زمزم کے پاس نصف رات کے وقت آتا ہوں اور اس میں سے کچھ پی لیتا ہوں ، تو مجھے اپنے جگر پر بھوک کی سختی محسوس نہیں ہوتی ، بلکہ میرے پیٹ پر شکنیں پڑ گئی ہیں ، تو نبی اکرم صلی اللہ علیہ وسلم نے فرمایا : ضرورت بھی پوری کرتا ہے اور پینے کی ضرورت بھی پوری کرتا ہے ، اور یہ برکت والی چیز ہے ، یہ کلمات آپ نے تین مرتبہ ارشاد فرمائے ، پھر آپ نے مجھ سے دریافت کیا : تمہارا تعلق کس قبیلے سے ہے ؟ میں نے کہا: غفار قبیلے سے ہے ، راوی کہتے ہیں : غفار قبیلے کے لوگ حاجیوں کو لوٹ لیا کرتے تھے ، تو نبی اکرم صلی اللہ علیہ وسلم کو میرے حوالے سے کچھ الجھن ہوئی ، آپ نے سیدنا ابوبکر رضی اللہ عنہ سے فرمایا : اے ابوبکر ! تم چلو ! اے ابوبکر ! تم چلو ! پھر وہ ہمیں ساتھ لے کر سیدنا ابوبکر رضی اللہ عنہ کے گھر چلے گئے ، انہوں نے میرے سامنے کشمش رکھی ، ہم نے اس میں سے کچھ کھایا ، پھر میں نبی اکرم صلی اللہ علیہ وسلم کے پاس ٹھہر گیا ، آپ نے مجھے اسلامی احکامات کی تعلیم دی اور کچھ قرآن سکھایا ، میں نے عرض کی : یا رسول اللہ ! میں یہ چاہتا ہوں کہ میں اپنے دین کو ظاہر کروں ، نبی اکرم صلی اللہ علیہ وسلم نے فرمایا : مجھے تمہارے بارے میں یہ اندیشہ ہے کہ تمہیں قتل کر دیا جائے گا ، میں نے کہا: لیکن میں ایسا ضرور کروں گا ، نبی اکرم صلی اللہ علیہ وسلم نے فرمایا : مجھے تمہارے بارے میں یہ اندیشہ ہے کہ تمہیں قتل کر دیا جائے گا ، میں نے کہا: یا رسول اللہ ! میں ایسا ضرور کروں گا ، اگرچہ مجھے قتل کر دیا جائے ، تو نبی اکرم صلی اللہ علیہ وسلم خاموش ہو گئے ، قریش کے لوگ خانہ کعبہ کے آس پاس حلقے بنا کر بیٹھے ہوئے بات چیت کر رہے تھے ، میں نے آ کے کہا: میں اس بات کی گواہی دیتا ہوں ، اللہ تعالیٰ کے علاوہ اور کوئی معبود نہیں ہے اور سیدنا محمد صلی اللہ علیہ وسلم اُس کے بندے اور اس کے رسول ہیں ، تو وہ حلقے ختم ہوئے اور وہ لوگ اُٹھ کر میری طرف آئے اور انہوں نے میری پٹائی کرنی شروع کر دی ، یہاں تک کہ انہوں نے مجھے ایسی حالت میں چھوڑا کہ میں سرخ استھان کی مانند تھا ، وہ یہ سمجھے تھے کہ وہ مجھے قتل کر چکے ہیں ، میں اُٹھا اور نبی اکرم صلی اللہ علیہ وسلم کے پاس آ گیا ، جب نبی اکرم صلی اللہ علیہ وسلم نے میری یہ صورت حال دیکھی ، تو آپ صلی اللہ علیہ وسلم نے فرمایا : کیا میں نے تمہیں منع نہیں کیا تھا ؟ میں نے عرض کی : یا رسول اللہ ! میرے دل میں ایک خواہش تھی ، وہ میں نے پوری کر لی ہے ، پھر میں نبی اکرم صلی اللہ علیہ وسلم کے ساتھ ٹھہرا رہا ، نبی اکرم صلی اللہ علیہ وسلم نے فرمایا : تم اپنی قوم کے پاس واپس چلے جاؤ ! جب تمہیں میرے ظہور کے بارے میں پتہ چلے ، تو تم میرے پاس آ جانا ، تو میں اپنی قوم کے پاس واپس آ گیا ۔ مجھے اُن لوگوں کے پاس آنے میں تاخیر ہو گئی ، میری ملاقات ( اپنے بھائی ) انیس سے ہوئی ، تو وہ رونے لگا اس نے کہا: اے میرے بھائی ! تمہیں آنے میں اتنی تاخیر ہو گئی تھی کہ تمہارے بارے میں ، میں تو یہ سمجھ رہا تھا کہ تم شاید قتل ہو گئے ہو گے ، تمہارا کیا بنا ؟ کیا تمہاری ملاقات ان صاحب سے ہو گئی ؟ جن کی تلاش میں تم گئے تھے ، میں نے کہا: میں اس بات کی گواہی دیتا ہوں کہ اللہ تعالیٰ کے علاوہ اور کوئی معبود نہیں ہے اور سیدنا محمد صلی اللہ علیہ وسلم کے رسول ہیں ، تو انیس نے بھی اسی جگہ اسلام قبول کر لیا ، پھر میں اپنی والدہ کے پاس آیا ، جب انہوں نے مجھے دیکھا تو رونے لگیں اور بولیں : اے میرے بیٹے ! تمہیں ہمارے پاس آنے میں اتنی تاخیر ہو گئی کہ مجھے یہ اندیشہ ہوا کہ کہیں تم قتل نہ ہو گئے ، ہو تمہارا کیا بنا ؟ کیا تمہاری ملاقات ان صاحب سے ہو گئی ؟ جن کی تلاش میں تم گئے تھے ؟ میں نے جواب دیا : جی ہاں ! میں اس بات کی گواہی دیتا ہوں کہ اللہ تعالیٰ کے علاوہ اور کوئی معبود نہیں ہے اور سیدنا محمد صلی اللہ علیہ وسلم اللہ کے رسول ہیں ، تو میری والدہ نے جواب دیا : انیس نے کیا کیا ؟ میں نے کہا: اس نے اسلام قبول کر لیا ، تو میری والدہ نے کہا: میں بھی تم دونوں سے منہ نہیں پھیروں گی ، میں اس بات کی گواہی دیتی ہوں ، اللہ تعالیٰ کے علاوہ اور کوئی معبود نہیں ہے اور سیدنا محمد صلی اللہ علیہ وسلم اللہ کے رسول ہیں ، سیدنا ابوذر غفاری رضی اللہ عنہ کہتے ہیں : تو میں اپنی قوم میں مقیم رہا اور ان میں سے بہت سے لوگوں نے اسلام قبول کر لیا ، یہاں تک کہ جب ہمیں نبی اکرم صلی اللہ علیہ وسلم کے ظہور کا پتہ چلا تو میں نبی اکرم صلی اللہ علیہ وسلم کی خدمت میں حاضر ہو گیا ۔ ( علامہ ہیثمی فرماتے ہیں : ) میں یہ کہتا ہوں :
یہ روایت ” صحیح “ میں اختصار کے ساتھ منقول ہے ۔
یہ روایت امام طبرانی نے معجم اوسط میں نقل کی ہے ۔

اُن کی نقل کردہ ایک روایت میں یہ الفاظ ہیں : میں نے اپنی والدہ اور اپنی بہن کو سوار کیا ، یہاں تک کہ ہم مکہ کے قریب آ کر ٹھہر گئے ، میرے بھائی نے کہا: میں نے ایک شخص کے ساتھ پانی کے پاس مقابلہ کرنا ہے ، وہ شخص ایک شاعر تھا ، میں نے کہا: تم ایسا نہ کرو ، لیکن پھر لجاج اسے اپنے ساتھ لے گیا اور اس کا مقابلہ درید بن صمہ سے کروایا ، اس میں اونٹوں کی بڑی تعداد انعام یا شرط قرار پائی ، راوی کہتے ہیں : اللہ کی قسم ! درید میرے بھائی سے زیادہ بڑا شاعر تھا ، اُن دونوں نے خنساء نامی خاتون کو ثالث مقرر کیا ، تو اس خاتون نے درید کے مقابلے میں ، میرے بھائی کے حق میں فیصلہ دے دیا ، اس کی وجہ یہ تھی کہ درید نے اس خاتون کے باپ کو اس خاتون کے ساتھ شادی کا پیغام دیا تھا ، تو اس خاتون نے کہا: تھا : یہ ایک بوڑھا آدمی ہے ، مجھے اس میں کوئی دلچسپی نہیں ہے ، تو اس خاتون نے درید کے خلاف دل میں غصہ رکھا ہوا تھا ، ہم نے انعام کے اونٹ اپنے اونٹوں کے ساتھ ملا لئے ، تو ہمارے اونٹوں کی تعداد ایک سو کے قریب ہو گئی ، پھر میں مکہ آیا ، میں پہلے صفا پر آیا ، وہاں قریش کے کچھ افراد موجود تھے ، مجھے یہ بات پتہ چلی کہ وہ لوگ یہ کہتے ہیں : وہ فرد بے دین ہے ، یا پاگل ہے ، یا شاعر ہے ، یا جادوگر ہے ، تو میں نے کہا: وہ صاحب کہاں ہیں ؟ جن کے بارے میں لوگ یہ کہتے ہیں کہ وہ ایسے ہیں ، تو لوگوں نے بتایا کہ وہ ہیں ، میں نبی اکرم صلی اللہ علیہ وسلم کے پاس آیا ، اللہ کی قسم ! ابھی میں اُن سے ذرا ہی دور گیا تھا کہ انہوں نے اپنے پاس موجود ہر پتھر ، ہڈی اور ڈھیلے کو پکڑا اور مجھے مار مار کے خون آلود کر دیا ، میں بیت اللہ کے پاس آیا اور اس کی عمارت اور پردوں کے درمیان داخل ہو گیا ، میں نے تین دن تک روزہ رکھا ، اس دوران میں نے کچھ کھایا پیا نہیں ، صرف آب زمزم پیتا تھا ، یہاں تک کہ جب ایک چاندنی رات آئی ، تو اسی دوران خزاعہ قبیلے کی دو عورتیں آئیں اور انہوں نے بیت اللہ کا طواف کیا ۔ ( علامہ ہیثمی فرماتے ہیں : ) میں یہ کہتا ہوں : اس کے بعد راوی نے پوری حدیث ذکر کی ہے ، جو اس روایت کی مانند ہے ، جو ” صحیح “ میں مذکور ہے ۔ پہلے طریق میں ایک راوی ابوطاہر ہے جس نے ابویزید مدینی کے حوالے سے
یہ روایت نقل کی ہے اور میں ابوطاہر سے واقف نہیں ہوں ، اس روایت کے بقیہ رجال صحیح کے رجال ہیں ۔ دوسری روایت میں راویوں کی ایک جماعت ایسی ہے جن سے میں واقف نہیں ہوں ۔

سیدنا ابودرداء رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” آسمان نے ایسے کسی شخص پر سایہ نہیں کیا اور زمین نے اپنے اوپر کسی ایسے شخص کو نہیں اُٹھایا ، جو ابوذر غفاری سے زیادہ سچا ہو ۔ “
یہ روایت امام أحمد نے ، امام بزار اور امام طبرانی نے نقل کی ہے ، اس کی سند میں ایک راوی علی بن زید ہے ، جس کی توثیق کی گئی ہے اور اس میں ضعف پایا جاتا ہے اس روایت کے بقیہ رجال ثقہ ہیں ۔

عبدالرحمن بن غنم بیان کرتے ہیں : وہ حمص میں ، سیدنا ابودرداء رضی اللہ عنہ سے ملنے کے لئے گئے ، اور چند دن ان کے ہاں ٹھہرے ، ان کے حکم کے تحت ان کے گدھے پر چادر رکھی گئی ، پھر سیدنا ابودرداء رضی اللہ عنہ نے فرمایا : اپنے بارے میں میرا یہ خیال ہے کہ میں تمہارے پیچھے چلوں گا ، پھر انہوں نے اپنے گدھے کے بارے میں حکم دیا اس پر زین رکھی گئی ، پھر وہ دونوں اپنے دونوں گدھوں پر سوار ہو کر روانہ ہوئے ، ان دونوں کی ملاقات ایک شخص سے ہوئی ، جس نے گزشتہ دن سیدنا معاویہ رضی اللہ عنہ کی اقتداء میں ” جابیہ “ کے مقام پر جمعہ کی نماز میں شرکت کی تھی ، اُس شخص نے ان دونوں کو پہچان لیا ، لیکن یہ دونوں صاحبان اس شخص کو نہیں پہچان پائے ، اس شخص نے ان دونوں کو لوگوں کی صورت حال کے بارے میں بتایا ، پھر اس شخص نے یہ کہا: ایک اور خبر بھی ہے اور مجھے یہ پسند نہیں ہے کہ میں آپ کو اس کے بارے میں بتاؤں ، کیونکہ آپ دونوں کے بارے میں میرا یہ خیال ہے کہ آپ دونوں بھی اسے ناپسند کریں گے ، تو سیدنا ابودرداء رضی اللہ عنہ نے فرمایا : شاید سیدنا ابوذر غفاری رضی اللہ عنہ کو جلاوطن کر دیا گیا ہے ، اس شخص نے جواب دیا : جی ہاں ! راوی کہتے ہیں : اللہ کی قسم ! سیدنا ابودرداء رضی اللہ عنہ اور اُن کے ساتھی نے تقریباً دس مرتبہ انا لله وانا اليه راجعون پڑھا ۔ پھر سیدنا ابودرداء رضی اللہ عنہ نے فرمایا : تم انہیں دیکھتے رہو اور صبر سے کام لو ، جیسا کہ اونٹنی والے لوگوں ( یعنی سیدنا صالح علیہ السلام کی قوم کے افراد ) سے کہا: گیا ، پھر انہوں نے کہا: اے اللہ ! اگر ان لوگوں نے سیدنا ابوذر غفاری رضی اللہ عنہ کو جھوٹا قرار دیا ہے ، تو میں انہیں جھوٹا قرار نہیں دیتا ، اے اللہ ! اگر ان لوگوں نے ان پر تہمت عائد کی ہے ، تو میں اُن پر تہمت عائد نہیں کرتا ، اے اللہ ! اگر ان لوگوں نے انہیں فریبی قرار دیا ہے ، تو میں انہیں فریبی قرار نہیں دیتا ، کیونکہ نبی اکرم صلی اللہ علیہ وسلم نے اُس وقت انہیں ” امین “ بنایا تھا ، جب آپ صلی اللہ علیہ وسلم نے کسی کو ” امین “ نہیں بنایا تھا اور نبی اکرم صلی اللہ علیہ وسلم نے اُن کے ساتھ راز کی باتیں کی تھیں ، جب کسی کے ساتھ راز کی باتیں نہیں کی تھیں ، اس ذات کی قسم ! جس کے دست قدرت میں ابودرداء کی جان ہے ، اگر سیدنا ابوذر رضی اللہ عنہ میرا دایاں ہاتھ کاٹ دیں ، تو میں پھر بھی انہیں ناپسند نہیں کروں گا ، اس کے بعد کہ میں نے نبی اکرم صلی اللہ علیہ وسلم کو یہ ارشاد فرماتے ہوئے سنا ہے : ” آسمان نے ایسے کسی شخص پر سایہ نہیں کیا اور زمین نے کسی ایسے شخص کو اپنے اوپر نہیں اٹھایا ، جو ابوذر سے زیادہ سچا ہو ۔ “
یہ روایت امام أحمد نے نقل کی ہے اور امام طبرانی نے اس کی مانند نقل کی ہے ، انہوں نے یہ الفاظ زائد نقل کئے ہیں : سیدنا ابودرداء رضی اللہ عنہ نے فرمایا : میں نے نبی اکرم صلی اللہ علیہ وسلم کو یہ ارشاد فرماتے ہوئے سنا ہے : ” جو شخص سیدنا مسیح عیسیٰ بن مریم علیہ السلام کی طرف ، اُن کی نیکی ، اُن کی سچائی اور ان کی کوشش کی طرف دیکھنا چاہے ، اُسے ابوذر کو دیکھ لینا چاہیے ۔ “
یہ روایت امام بزار نے اختصار کے ساتھ نقل کی ہے ، امام أحمد کے رجال کی توثیق کی گئی ہے ، اس کے بعض راویوں میں اختلاف پایا جاتا ہے ۔

سیدنا ابودرداء رضی اللہ عنہ بیان کرتے ہیں : اللہ کی قسم ! نبی اکرم صلی اللہ علیہ وسلم کا یہ معمول تھا ، جب سیدنا ابوذر غفاری رضی اللہ عنہ موجود ہوتے تھے تو آپ انہیں اپنے قریب رکھتے تھے اور جب وہ غیر موجود ہوتے تھے تو اُن کے بارے میں پوچھ گچھ کرتے تھے ۔
یہ روایت امام طبرانی نے نقل کی ہے اس کی سند میں ایک راوی ابوبکر بن ابومریم ہے ، جو اختلاط کا شکار ہو گیا تھا ۔

سیدنا عبداللہ بن مسعود رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” ابوذر اپنی عبادت میں سیدنا عیسیٰ بن مریم علیہ السلام کے ساتھ مشابہت رکھتا ہے ۔ “
یہ روایت امام طبرانی نے نقل کی ہے اس کی سند میں ایک راوی ابراہیم ہجری ہے اور وہ ضعیف ہے ، اور ابراہیم نامی راوی کے ضعیف ہونے کے ہمراہ ، اُس نے سیدنا عبداللہ بن مسعود رضی اللہ عنہ کا زمانہ بھی نہیں پایا ہے ۔

اسی سند کے ساتھ یہ بات منقول ہے : سیدنا عبداللہ بن مسعود رضی اللہ عنہ یہ بات بیان کرتے ہیں : نبی اکرم صلی اللہ علیہ وسلم نے ارشاد فرمایا : ” جو شخص اخلاق اور ظاہری تخلیق کے اعتبار سے سیدنا عیسیٰ بن مریم علیہ السلام سے مشابہت رکھنے والے فرد کو دیکھنا چاہے ، اُسے ابوذر کو دیکھ لینا چاہیے ۔ “

سیدنا ابوذر غفاری رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” اے ابوذر ! میں نے دیکھا کہ جیسے چالیس افراد کے ساتھ میرا وزن کیا گیا ، جن میں ایک تم بھی تھے ، تو میں اُن پر بھاری رہا ۔ “
یہ روایت امام بزار نے نقل کی ہے اور اس کے رجال ثقہ ہیں ۔

سیدنا امام حسین بن علی رضی اللہ عنہ بیان کرتے ہیں : سیدنا جبرائیل علیہ السلام نبی اکرم صلی اللہ علیہ وسلم کے پاس آئے اور بولے : اے سیدنا محمد ( صلی اللہ علیہ وسلم ) ! اللہ تعالیٰ آپ کے اصحاب میں سے تین افراد سے محبت کرتا ہے ، تو آپ بھی اُن سے محبت رکھیں ! علی بن ابوطالب ، ابوذر اور مقداد بن اسود ۔
یہ روایت امام ابویعلیٰ نے نقل کی ہے ، اس کی سند میں ایک راوی نضر بن حمید ہے اور وہ متروک ہے ۔

سیدنا انس رضی اللہ عنہ ” مرفوع “ حدیث کے طور پر یہ بات نقل کرتے ہیں ( نبی اکرم صلی اللہ علیہ وسلم نے ارشاد فرمایا : ) ” جنت تین آدمیوں کی مشتاق ہے ، علی ، عمار ( راوی کہتے ہیں : میرا خیال ہے ، روایت میں یہ الفاظ ہیں : ) ابوذر ۔ “ ( علامہ ہیثمی فرماتے ہیں : ) میں یہ کہتا ہوں :
یہ روایت امام ترمذی نے بھی نقل کی ہے ، تاہم انہوں نے سیدنا ابوذر غفاری رضی اللہ عنہ کا ذکر نہیں کیا ہے ۔
یہ روایت امام بزار نے نقل کی ہے اور اس کی سند حسن ہے ۔

سیدنا ابوذر غفاری رضی اللہ عنہ بیان کرتے ہیں : نبی اکرم صلی اللہ علیہ وسلم کو سیدنا جبرائیل علیہ السلام اور سیدنا میکائیل علیہ السلام نے جو کچھ بھی دیا تھا ، اس میں سے آپ نے کوئی بھی چیز نہیں چھوڑی ، مگر یہ کہ وہ آپ نے میرے سینے میں ڈال دی اور نبی اکرم صلی اللہ علیہ وسلم نے میرے سینے میں جو کچھ بھی ڈالا تھا ، میں نے اُس میں کوئی بھی چیز نہیں چھوڑی ، مگر یہ کہ اُسے مالک بن ضمرہ کے سینے میں ڈال دیا ۔
یہ روایت امام طبرانی نے نقل کی ہے اور اس کی سند میں ایسے راوی ہیں ، جن سے میں وقف نہیں ہوں ۔

عبدالله بن خراش بیان کرتے ہیں : میں نے ” ربذہ “ کے مقام پر سیدنا ابوذر غفاری رضی اللہ عنہ کو ایک سیاہ چھپر میں دیکھا ، اُن کے ساتھ ایک بھاری بھرکم خاتون تھیں اور سیدنا ابوزر رضی اللہ عنہ اس وقت جوالق ( شاید مشکیزہ مراد ہے ) کے ٹکڑے پر بیٹھے ہوئے تھے ، ان سے کہا: گیا : آپ ایک ایسے افراد ہیں کہ آپ کی اولاد زندہ نہیں رہتی ہے ، تو انہوں نے فرمایا : ” ہر طرح کی حمد اللہ تعالیٰ کے لئے مخصوص ہے ، جس نے فنا ہونے والی دنیا میں سے اُنہیں لے لیا اور باقی رہ جانے والی ( آخرت ) میں اُنہیں ذخیرہ کر لیا ۔ “ لوگوں نے کہا: اے سیدنا ابوذر رضی اللہ عنہ ! اگر آپ اس خاتون کی بجائے کسی اور خاتون کو رکھتے ، تو مناسب تھا ، انہوں نے فرمایا : میں ایک ایسی عورت کے ساتھ شادی کروں ، جو مجھے پست رکھے ، یہ میرے نزدیک اس سے زیادہ محبوب ہے کہ ایسی عورت ہو جو مجھے بلند کرے ۔ لوگوں نے کہا: اگر آپ اس سے زیادہ نرم بچھونا بچھا لیتے تو مناسب ہوتا ، انہوں نے فرمایا : اے اللہ ! تجھ سے مغفرت کا سوال ہے ، تم نے جو عطیہ کے طور پر دیا ہو اس میں سے جو تمہیں مناسب لگے وہ لے لو ۔
یہ روایت امام طبرانی نے نقل کی ہے ، اس کی سند میں ایک راوی موسیٰ بن عبیدہ ہے اور وہ ضعیف ہے ۔

محمد بن سیرین بیان کرتے ہیں : شام میں قریش سے تعلق رکھنے والا ایک شخص تھا ، اس کا نام حارث تھا ، وہ بیان کرتے ہیں : سیدنا ابوذر غفاری رضی اللہ عنہ کو حاجت لاحق ہوئی ، تو انہوں نے سیدنا ابوذر غفاری رضی اللہ عنہ کو تین سو دینار بھیجے ، تو سیدنا ابوذر غفاری رضی اللہ عنہ نے فرمایا : عبداللہ کو ایسا کوئی بندہ نہیں ملا ، جو اس کے نزدیک مجھ سے زیادہ بے حیثیت ہوتا ، میں نے نبی اکرم صلی اللہ علیہ وسلم کو یہ ارشاد فرماتے ہوئے سنا ہے : ” جو شخص مانگے اور اُس کے پاس چالیس ہوں ، تو اس نے لپٹ کر مانگا ۔ “ راوی کہتے ہیں : سیدنا ابوذر غفاری رضی اللہ عنہ کے پاس چالیس درہم تھے ، چالیس بکریاں تھیں اور دو خادم تھے ۔ ابوبکر بن عیاش کہتے ہیں : اس سے مراد خادم ہے ۔
یہ روایت امام طبرانی نے نقل کی ہے اور اس کے رجال صحیح کے رجال ہیں ، صرف عبداللہ بن أحمد بن عبداللہ بن یونس کا معاملہ مختلف ہے اور وہ ثقہ ہے ۔

ابوشعبہ بیان کرتے ہیں : ایک شخص سیدنا ابوذر غفاری رضی اللہ عنہ کے پاس آیا اور ان کے سامنے رقم پیش کی ، تو سیدنا ابوذر غفاری رضی اللہ عنہ نے فرمایا : ہمارے پاس بکریاں ہیں ، جن کا دودھ ہم دوہ لیتے ہیں ، اور گدھے ہیں جن پر ہم سفر کر لیتے ہیں ، اور آزاد بیوی ہے جو ہماری خدمت کرتی ہے ، اور اضافی لباس بھی ہے ، مجھے یہ اندیشہ ہے کہ کہیں اضافی چیز کے حوالے سے مجھ سے حساب نہ لیا جائے ۔
یہ روایت امام طبرانی نے نقل کی ہے اور شعبہ بکری نامی راوی سے میں واقف نہیں ہوں ، اس روایت کے بقیہ رجال صحیح کے رجال ہیں ۔

ابواسود دؤلی بیان کرتے ہیں : میں نے نبی اکرم صلی اللہ علیہ وسلم کے اصحاب کو دیکھا ہے ، میں نے سیدنا ابوذر غفاری رضی اللہ عنہ جیسا کوئی فرد نہیں دیکھا ۔
یہ روایت عبداللہ نے نقل کی ہے ۔

ابراہیم بن اشتر بیان کرتے ہیں : سیدنا ابوذر غفاری رضی اللہ عنہ کی وفات کا وقت قریب آیا ، وہ اُس وقت ” ربذہ “ میں موجود تھے ، ان کی بیوی رونے لگی ، سیدنا ابوزر رضی اللہ عنہ نے دریافت کیا : تم کیوں رو رہی ہو ؟ اس خاتون نے جواب دیا : میں اس بات پر رو رہی ہوں کہ میں آپ کے لئے کچھ نہیں کر سکتی ، میرے پاس اتنا کپڑا بھی نہیں ہے جو آپ کے کفن کے لئے کفایت کر جائے ، تو سیدنا ابوذر غفاری رضی اللہ عنہ نے فرمایا : تم نہ رؤو ! کیونکہ میں نے ایک دن نبی اکرم صلی اللہ علیہ وسلم کو یہ ارشاد فرماتے ہوئے سنا ، اُس وقت میں کچھ افراد سمیت آپ صلی اللہ علیہ وسلم کے پاس موجود تھا ، نبی اکرم صلی اللہ علیہ وسلم نے فرمایا : ” تم میں سے ایک شخص ویرانے میں انتقال کرے گا اور اہل ایمان کی ایک جماعت اُس کے جنازے میں شریک ہو گی ۔ “ سیدنا ابوذر غفاری رضی اللہ عنہ نے فرمایا : اس محفل میں جتنے بھی لوگ موجود تھے ، وہ سب اجتماع اور بستیوں میں فوت ہوئے ہیں ، اب اُن میں سے میرے علاوہ اور کوئی باقی نہیں رہا ، اور میں بھی اس وقت ایک ویرانے میں مرنے کے قریب ہوں ، تو تم راستے کا دھیان رکھو ! تم عنقریب وہ چیز دیکھ لو گی ، جو میں نے بیان کی ہے ، کیونکہ اللہ کی قسم ! نہ تو میں نے غلط بیانی کی ہے اور نہ میرے ساتھ غلط بیانی کی گئی ہے ، اس خاتون نے کہا: اب بھلا ایسا کیسے ہو سکتا ہے ؟ جبکہ حاجی رخصت ہو چکے ہیں ، تو سیدنا ابوذر غفاری رضی اللہ عنہ اللہ نے فرمایا : تم راستے کا دھیان رکھنا ۔ راوی بیان کرتے ہیں : وہ خاتون راستے میں موجود تھی ، وہاں سے کچھ لوگ گزرے جو اپنی سواریوں کو دوڑاتے ہوئے لے جا رہے تھے ، وہ لوگ وہاں آئے اور اس خاتون کے پاس ٹھہر گئے ، انہوں نے دریافت کیا : تمہارا کیا معاملہ ہے ؟ اس نے کہا: ایک مسلمان شخص کے کفن کا بندوبست کرنا ہے ، تمہیں اُس کا اجر ملے گا ، اُن لوگوں نے دریافت کیا : وہ شخص کون ہے ؟ اُس عورت نے بتایا : سیدنا ابوزر رضی اللہ عنہ ، تو وہ لوگ یہ کہنے لگے : ہمارے ماں باپ اُن پر قربان ہوں ، پھر وہ تیزی سے سیدنا ابوذر غفاری رضی اللہ عنہ کی طرف گئے ، سیدنا ابوذر غفاری رضی اللہ عنہ نے فرمایا : تم لوگ یہ خوشخبری قبول کرو کہ تم وہ لوگ ہو جن کے بارے میں نبی اکرم صلی اللہ علیہ وسلم نے ایک بات ارشاد فرمائی تھی ، تم لوگ یہ خوشخبری قبول کرو کہ میں نے نبی اکرم صلی اللہ علیہ وسلم کو یہ ارشاد فرماتے ہوئے سنا ہے : ” جب بھی دو مسلمان ( میاں بیوی ) کے دو یا تین بچے فوت ہو جائیں اور وہ دونوں ثواب کی امید رکھیں ، اور صبر سے کام لیں ، تو وہ دونوں کبھی بھی جہنم کو نہیں دیکھیں گے ۔ “ پھر سیدنا ابوذر غفاری رضی اللہ عنہ نے فرمایا : میری جو صورت حال ہے ، وہ تمہارے سامنے ہے ، اگر میرے پاس اتنا کپڑا ہوتا ، جو میرے کفن کے لئے کفایت کر جاتا ، تو مجھے اُسی کپڑے میں کفن دیا جاتا ( میرے کفن کا بندوبست تم نے کرنا ہے ) لیکن میں تمہیں اللہ کا واسطہ دے کر یہ کہتا ہوں کہ تم میں سے کوئی ایسا شخص مجھے کفن فراہم نہ کرے ، جو عریف یا امیر یا برید ( یعنی کسی سرکاری عہدے پر فائز ) رہ چکا ہو ، راوی کہتے ہیں : تو ان سب لوگوں میں سے کوئی نہ کوئی ، کسی نہ کسی عہدے پر فائز رہا تھا ، صرف انصار سے تعلق رکھنے والے ایک نوجوان کا معاملہ مختلف تھا ، وہ ان لوگوں کے ساتھ تھا ، اس نے کہا: میں آپ کا یہ کام کروں گا ، میرے تھیلے میں دو کپڑے ہیں ، جو میری والدہ نے تیار کیے ہیں ، ان دو کپڑوں میں سے ایک میرے جسم پر ہے ، تو سیدنا ابوذر غفاری رضی اللہ عنہ نے فرمایا : تم میرے متعلقہ فرد ہو ، تم مجھے کفن دینا ۔
یہ روایت امام أحمد نے دو حوالوں سے نقل کی ہے اور ان میں سے ایک یہ ہے اور دوسری روایت مختصر ہے انہوں نے اسے ابراہیم بن اشتر کے حوالے سے سیدہ ام ذر رضی اللہ عنہا سے نقل کیا ہے ، پہلی روایت کے طریق کے رجال صحیح کے رجال ہیں ،
یہ روایت امام بزار نے اس کی مانند اختصار کے ساتھ نقل کی ہے ۔

محمد بن کعب بیان کرتے ہیں : سیدنا عبداللہ بن مسعود رضی اللہ عنہ سیدنا عمار رضی اللہ عنہ کے سواروں ہمراہ آئے ، اُن کا گزر سیدنا ابوذر غفاری رضی اللہ عنہ کے جنازے کے پاس سے ہوا ، جو راستے میں تھا ، تو وہ اور ان کے ساتھی نیچے اترے اور انہیں دفن کیا ۔ سیدنا ابوذر رضی اللہ عنہ مصر میں داخل ہوئے تھے اور وہاں انہوں نے ایک گھر کی نشاندہی کروائی تھی ۔
یہ روایت امام طبرانی نے نقل کی ہے اور محمد بن کعب نامی راوی نے سیدنا ابوذر غفاری رضی اللہ عنہ کا زمانہ نہیں پایا ہے اور ابن اسحاق نامی راوی مدلس ہے ۔

یزید بن ابوحبیب بیان کرتے ہیں : سیدنا ابوذر غفاری رضی اللہ عنہ ان افراد میں سے ایک ہیں جو سیدنا عمرو بن العاص رضی اللہ عنہ کے ہمراہ ( مصر کی ) فتح میں شریک ہوئے تھے ۔
یہ روایت امام طبرانی نے نقل کی ہے اور اس کی سند منقطع ہے ۔

یحیی بن بکیر بیان کرتے ہیں : سیدنا ابوذر غفاری رضی اللہ عنہ کا انتقال ” ربذہ “ کے مقام 32 ہجری میں ہوا تھا ، ان کا نام سیدنا جندب بن جنادہ رضی اللہ عنہ تھا ۔ اس روایت کی سند منقطع ہے ۔