مجمع الزوائد ومنبع الفوائد

محمد بن حمزه بن یوسف بن عبداللہ بن سلام ، اپنے والد کا یہ بیان نقل کرتے ہیں : سیدنا عبداللہ بن سلام رضی اللہ عنہ نے یہودیوں کے علماء سے کہا: میں اپنے جدامجد سیدنا ابراہیم علیہ السلام اور سیدنا اسماعیل علیہ السلام کی مسجد کے پاس سے ہو کے آتا ہوں ، پھر وہ نبی اکرم صلی اللہ علیہ وسلم کی طرف تشریف لے گئے ، نبی اکرم صلی اللہ علیہ وسلم ان دنوں مکہ میں ہی موجود تھے ، سیدنا عبداللہ بن سلام رضی اللہ عنہ اس وقت وہاں پہنچے جب لوگ حج کر کے واپس جا رہے تھے ، انہوں نے نبی اکرم صلی اللہ علیہ وسلم کو منیٰ میں پایا ، کچھ لوگ آپ کے اردگرد موجود تھے ، وہ لوگوں کے ساتھ کھڑے ہو گئے ، جب نبی اکرم صلی اللہ علیہ وسلم نے اُن کی طرف دیکھا ، تو آپ نے فرمایا : تم عبداللہ بن سلام ہو ؟ انہوں نے عرض کی : جی ہاں ! آپ نے فرمایا : قریب ہو جاؤ ! میں آپ کے قریب ہو گیا ، نبی اکرم صلی اللہ علیہ وسلم نے فرمایا : میں تمہیں اللہ کا واسطہ دے کر یہ دریافت کرتا ہوں اے عبداللہ بن سلام ! کیا تم نے تورات میں یہ بات نہیں پائی ہے ؟ کہ میں اللہ کا رسول ہوں ؟ میں نے آپ کی خدمت میں گزارش کی : آپ اپنے پروردگار کی صفات ہمارے سامنے بیان کیجئے ! راوی کہتے ہیں : تو سیدنا جبرائیل علیہ السلام آئے اور نبی اکرم صلی اللہ علیہ وسلم کے سامنے کھڑے ہو گئے ، انہوں نے یہ آیات پڑھیں : ” تم یہ فرما دو ! کہ اللہ ایک ہے ، اللہ تعالیٰ بے نیاز ہے ، اس نے کسی کو جنم نہیں دیا اور اسے جنم نہیں دیا گیا ، اور کوئی اس کا ہم پلہ نہیں ہے ۔ “ نبی اکرم صلی اللہ علیہ وسلم نے یہ سورت ہمارے سامنے تلاوت کی ، تو سیدنا عبداللہ بن سلام رضی اللہ عنہ نے یہ کہا: میں اس بات کی گواہی دیتا ہوں کہ اللہ تعالیٰ کے علاوہ اور کوئی معبود نہیں ہے اور آپ اللہ کے رسول ہیں ، پھر سیدنا عبداللہ بن سلام رضی اللہ عنہ مدینہ منورہ واپس چلے گئے ، انہوں نے اپنے ایمان کو چھپا کے رکھا ، جب نبی اکرم صلی اللہ علیہ وسلم ہجرت کر کے مدینہ منورہ تشریف لے آئے ، تو سیدنا عبداللہ رضی اللہ عنہ کہتے ہیں : میں اس وقت کھجور کے ایک درخت پر چڑھا ہوا کھجوریں اُتار رہا تھا ، میں نے مدینہ منورہ میں شور کی آواز سنی تو دریافت کیا : یہ کس وجہ سے ہے ؟ تو لوگوں نے بتایا : یہ اللہ کے رسول صلی اللہ علیہ وسلم تشریف لے آئے ہیں ، سیدنا عبداللہ رضی اللہ عنہ کہتے ہیں : تو میں نے کھجور کے درخت کے اوپر سے نیچے چھلانگ مار دی اور پھر میں نکلا اور نبی اکرم صلی اللہ علیہ وسلم کی خدمت میں حاضر ہوا ، میں نے آپ کو سلام کیا ، پھر جب میں واپس آیا ، تو میری والدہ نے کہا: اللہ کی قسم ! اگر سیدنا موسیٰ علیہ السلام ہوتے ، تو تم نے کھجور کے درخت کے اوپر سے اس طرح خود کو نیچے نہیں گرانا تھا ، میں نے کہا: اللہ کی قسم ! نبی اکرم صلی اللہ علیہ وسلم کی تشریف آوری پر میں اُس سے زیادہ خوش ہوا ہوں ، جتنا سیدنا موسیٰ علیہ السلام کی بعثت پر ہوتا ۔
یہ روایت امام طبرانی نے نقل کی ہے اور اس کی سند منقطع ہے اور اس کے رجال ثقہ ہیں ۔

سیدنا سعد بن ابی وقاص رضی اللہ عنہ بیان کرتے ہیں : نبی اکرم صلی اللہ علیہ وسلم کے پاس ایک پیالہ لایا گیا ، آپ نے اس میں سے کچھ کھا لیا اور اس میں سے کچھ بچ گیا ، تو نبی اکرم صلی اللہ علیہ وسلم نے فرمایا : اس راستے سے ایک جنتی شخص آئے گا اور وہ اس بچے ہوئے کو کھائے گا ، سیدنا سعد رضی اللہ عنہ کہتے ہیں : اُس وقت میں اپنے بھائی عمیر کو وضو کرتا ہوا چھوڑ کے آیا تھا ، میں نے سوچا وہ عمیر ہو گا ، لیکن اسی دوران عبداللہ بن سلام آ گئے اور انہوں نے اسے کھا لیا ۔ ( علامہ ہیثمی فرماتے ہیں : ) میں یہ کہتا ہوں : ” صحیح “ میں ان کے حوالے سے ایک حدیث مذکور ہے ، جو اس روایت کے علاوہ ہے ۔
یہ روایت امام أحمد ، امام ابویعلیٰ اور امام بزار نے نقل کی ہے ، اس کی سند میں ایک راوی عاصم بن بہدلہ ہے ، اس کے بارے میں اختلاف پایا جاتا ہے ، اس کے بقیہ رجال صحیح کے رجال ہیں ۔

سیدنا یوسف بن عبداللہ بن سلام رضی اللہ عنہ بیان کرتے ہیں : نبی اکرم صلی اللہ علیہ وسلم نے مجھے اپنی گود میں بٹھایا ، آپ صلی اللہ علیہ وسلم نے میرے سر پر ہاتھ پھیرا اور اور میرا نام ” یوسف “ رکھا ۔
یہ روایت امام أحمد نے مختلف اسانید کے ساتھ نقل کی ہے ، ان میں سے دو اسناد کے رجال ثقہ ہیں ۔
یہ روایت امام طبرانی نے اس کی مانند نقل کی ہے اور انہوں نے یہ الفاظ نقل کئے ہیں : ” نبی اکرم صلی اللہ علیہ وسلم نے مجھے برکت کی دعا دی ۔ “