مجمع الزوائد ومنبع الفوائد

سیدنا معاذ بن جبل رضی اللہ عنہ بیان کرتے ہیں : جب نبی اکرم صلی اللہ علیہ وسلم نے انہیں یمن بھیجا تو نبی اکرم صلی اللہ علیہ وسلم بھی ان کے ساتھ نکلے سیدنا معاذ رضی اللہ عنہ اس وقت سوار تھے ، اور نبی اکرم صلی اللہ علیہ وسلم ان کی سواری کے ساتھ پیدل چل رہے تھے ۔ آپ نے ارشاد فرمایا : اے معاذ عنقریب اس سال کے بعد تم میرے ساتھ ملاقات نہیں کرو گے تمہارا گزر میری قبر کے پاس سے ہو گا میری مسجد کے پاس سے ہو گا ، تو نبی اکرم صلی اللہ علیہ وسلم کی جدائی کے غم میں سیدنا معاذ رضی اللہ عنہ رونے لگے تو نبی اکرم صلی اللہ علیہ وسلم نے ارشاد فرمایا : اے معاذ ! تم نہ روؤ رونا شیطان کی طرف سے ہوتا ہے ۔
یہ روایت امام بزار نے نقل کی ہے ، اور اس کے رجال ثقہ ہیں
یہ روایت امام طبرانی نے معجم کبیر میں نقل کی ہے ۔

سیدہ عائشہ صدیقہ رضی اللہ عنہا بیان کرتی ہیں : جب سیدنا عبداللہ بن ابوبکر کا انتقال ہوا تو ان پر رویا جانے لگا سیدنا ابوبکر رضی اللہ عنہ تشریف لائے اور بولے : میں تم لوگوں کے سامنے ان لوگوں کے حوالے سے عذر پیش کرتا ہوں ، کیونکہ یہ لوگ زمانہ جاہلیت کے قریب ہیں میں نے نبی اکرم صلی اللہ علیہ وسلم کو یہ ارشاد فرماتے ہوئے سنا ہے : ” زندہ شخص کے رونے کی وجہ سے میت پر گرم پانی چھڑکا جاتا ہے “ ۔
یہ روایت امام بزار اور امام ابویعلیٰ نے نقل کی ہے ۔ اس کی سند میں ایک راوی محمد بن حسن بن زبالہ ہے ، اور وہ ضعیف ہے ۔

سیدنا سمرہ رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” زندہ شخص کے رونے کی وجہ سے میت کو عذاب دیا جاتا ہے “ ۔
یہ روایت امام طبرانی نے معجم کبیر میں نقل کی ہے ۔ اس کی سند میں ایک راوی عمر بن ابراہیم انصاری ہے ، اور اس کے بارے میں کلام کیا گیا ہے ، اور وہ ثقہ ہے ۔ ٌ

سیدنا ابوہریرہ رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” زندہ شخص کے رونے کی وجہ سے میت کو عذاب دیا جاتا ہے “ ۔
یہ روایت امام ابویعلیٰ نے نقل کی ہے ۔ اس کی سند میں ایسا راوی ہے ، جس کا ذکر کرتے ہوئے میں نے کسی کو نہیں پایا ہے ۔

حاجب بن عمر بیان کرتے ہیں : میں حکم بن اعرج کے ساتھ بکر بن عبداللہ مزنی کے پاس گیا وہ لوگ زندہ شخص کے رونے کی وجہ سے میت کو عذاب دینے کے معاملے پر گفتگو کرنے لگے تو بکر بن عبداللہ مزنی نے ہمیں حدیث بیان کی انہوں نے ہمیں بتایا نبی اکرم صلی اللہ علیہ وسلم کے اصحاب میں سے ایک صاحب نے ہمیں یہ حدیث بیان کی ہے ، اور سیدنا ابوہریرہ رضی اللہ عنہ اس کے برخلاف کہتے ہیں : انہوں نے بتایا : سیدنا ابوہریرہ رضی اللہ عنہ یہ فرماتے ہیں اگر ایک شخص اللہ کی راہ میں جنگ کرنے کے لئے چلا جاتا ہے ، اور پھر دور دراز کے حصے میں کہیں شہید ہونے کے طور قتل ہو جاتا ہے پھر اس کی بیوی بے وقوفی اور جہالت کا مظاہرہ کرتے ہوئے اس پر روتی ہے ، تو کیا اس بے وقوف عورت کے اس پر رونے کی وجہ سے اس شہید کو عذاب دیا جائے گا ، تو ایک صاحب بولے : اللہ کے رسول نے سچ فرمایا ہے ، اور سیدنا ابوہریرہ رضی اللہ عنہ نے غلط کہا: ہے ۔
یہ روایت ابویعلیٰ نے نقل کی ہے ، اور اس کی سند میں ایسا راوی ہے ، جو معروف نہیں ہے ۔

ابوربیع بیان کرتے ہیں : میں سیدنا عبداللہ بن عمر رضی اللہ عنہما کے ساتھ ایک جنازے میں شریک ہوا میں نے ایک انسان کے چیخ کر رونے کی آواز سنی سیدنا عبداللہ بن عمر رضی اللہ عنہما نے اس کی طرف پیغام بھیج کر اسے خاموش کروا دیا میں نے دریافت کیا : اے ابوعبدالرحمن آپ نے اسے خاموش کیوں کروا دیا ہے ؟ انہوں نے فرمایا : اس کی وجہ یہ ہے کہ اس ( رونے ) کی وجہ سے میت کو اذیت ہوتی ہے ، جب تک میت قبر میں داخل نہیں ہو جاتی ۔
یہ روایت امام أحمد نے نقل کی ہے ۔ اس کی سند میں ایک راوی ابوشعبہ طحان ہے ، اور وہ متروک ہے ۔

سیدنا ربیع انصاری رضی اللہ عنہ بیان کرتے ہیں : نبی اکرم صلی اللہ علیہ وسلم میرے بھتیجے جبر انصاری کی عیادت کے لئے آئے اس کے اہل خانہ نے اس پر رونا شروع کر دیا تو جبر نے ان سے کہا: تم لوگ اللہ کے رسول کو اپنی آوازوں کے ذریعے اذیت نہ پہنچاؤ تو نبی اکرم صلی اللہ علیہ وسلم نے ارشاد فرمایا : ان خواتین کو رونے دو جب تک یہ شخص زندہ ہے ، جب واجب ہو جائے ( یعنی یہ شخص فوت ہو جائے ) تو یہ خواتین خاموش ہو جائیں ۔ ( علامہ ہیثمی فرماتے ہیں : ) میں یہ کہتا ہوں :
یہ روایت مکمل طور پر جہاد سے متعلق باب میں آگے آئے گی ، اگر اللہ نے چاہا ۔
یہ روایت امام طبرانی نے معجم کبیر میں نقل کی ہے ، اور اس کے رجال ثقہ ہیں ۔

سیدہ اسماء بنت عمیس رضی اللہ عنہ بیان کرتی ہیں : جب سیدنا جعفر رضی اللہ عنہ شہید ہو گئے تو نبی اکرم صلی اللہ علیہ وسلم ہمارے پاس تشریف لائے آپ نے ارشاد فرمایا : ” تم تین دن سوگ کے کپڑے پہن کے رکھو ، پھر تم جو چاہے کر لو “ ۔

ایک روایت میں یہ الفاظ ہیں : وہ بیان کرتی ہیں : نبی اکرم صلی اللہ علیہ وسلم سیدنا جعفر رضی اللہ عنہ کی شہادت کے تیسرے دن میرے پاس تشریف لائے آپ نے ارشاد فرمایا : آج کے دن کے بعد تم سوگ نہ کرنا ۔ یہ تمام روایات امام أحمد نے نقل کی ہیں امام طبرانی نے ان میں سے کچھ روایات معجم کبیر میں نقل کی ہیں ۔ امام أحمد کے رجال ” صحیح “ کے رجال ہیں ۔

سیدہ ام سلمہ رضی اللہ عنہا بیان کرتی ہیں : سیدہ اسماء رضی اللہ عنہا سیدنا حمزہ رضی اللہ عنہ اور سیدنا جعفر رضی اللہ عنہ پر تین دن تک روئی تھیں پھر نبی اکرم صلی اللہ علیہ وسلم نے انہیں حکم دیا کہ وہ آنسو پونچھ لیں اور سرمہ لگا لیں ۔
یہ روایت امام طبرانی نے معجم کبیر میں نقل کی ہے ۔ اس کی سند میں ایک راوی حجاج بن ارطاۃ ہے ، اور اس کے بارے میں کلام کیا گیا ہے ۔ اس روایت کے بقیہ رجال ” صحیح “ کے رجال ہیں ۔

سیدنا عبداللہ بن عباس رضی اللہ عنہما بیان کرتے ہیں : جب سیدنا عثمان بن مظعون رضی اللہ عنہ کا انتقال ہو گیا تو ان کی اہلیہ نے کہا: اے عثمان بن مظعون آپ کو جنت کی مبارک ہو نبی اکرم صلی اللہ علیہ وسلم نے غصے کی حالت میں اس خاتون کی طرف دیکھا اور فرمایا ، تمہیں کیا پتہ اس خاتون نے عرض کی : یا رسول اللہ ! وہ آپ کے شہسوار تھے ، اور وہ آپ کے ساتھی تھے ۔ نبی اکرم صلی اللہ علیہ وسلم نے ارشاد فرمایا : میں اللہ کا رسول ہوں ، لیکن میں ازخود یہ نہیں جانتا کہ میرے ساتھ کیا ہو گا ، تو لوگ سیدنا عثمان رضی اللہ عنہ کے حوالے سے پریشان ہو گئے جب نبی اکرم صلی اللہ علیہ وسلم کی صاحبزادی سیدہ زینب رضی اللہ عنہا کا انتقال ہوا تو نبی اکرم صلی اللہ علیہ وسلم نے ارشاد فرمایا : ( یعنی ان کی میت کو مخاطب کر کے فرمایا ) تم ہمارے بہترین سلف عثمان بن مظعون سے جا ملو تو خواتین رونے لگیں ۔ سیدنا عمر رضی اللہ عنہ نے لاٹھی کے ذریعے انہیں مارنا چاہا تو نبی اکرم صلی اللہ علیہ وسلم نے ان کا ہاتھ پکڑ لیا اور ارشاد فرمایا : اے عمر رہنے دو پھر آپ نے ارشاد فرمایا : تم روؤ لیکن شیطان کی طرح آوازیں نکالنے سے بچنا پھر آپ نے ارشاد فرمایا : جو چیز دل اور آنکھ سے نکلتی ہے وہ اللہ تعالی کی طرف سے ہوتی ہے ، اور رحمت کی وجہ سے ہوتی ہے ، اور جو چیز ہاتھ اور زبان سے نکلتی ہے ، تو وہ شیطان کی طرف سے ہوتی ہے ۔
یہ روایت امام أحمد نے نقل کی ہے ۔ اس کی سند میں ایک راوی علی بن زید ہے اس کے بارے میں کلام کیا گیا ہے ، اور اس کی توثیق بھی کی گئی ہے ۔ یہاں ایک روایت میں یہ الفاظ زائد ہیں : نبی اکرم صلی اللہ علیہ وسلم قبر کے کنارے پر بیٹھ گئے سیدہ فاطمہ رضی اللہ عنہا آپ کے پہلو میں رو رہی تھیں تو نبی اکرم صلی اللہ علیہ وسلم نے اپنے کپڑے کے ذریعے سیدہ فاطمہ رضی اللہ عنہ ( کے آنسوؤں کو ) پونچھنا شروع کیا ان کے ساتھ رحمت کی وجہ سے ( آپ صلی اللہ علیہ وسلم نے ایسا کیا ) ۔

سیدنا عبدالرحمن بن عوف رضی اللہ عنہ بیان کرتے ہیں : نبی اکرم صلی اللہ علیہ وسلم نے میرا ہاتھ پکڑا اور میں آپ کے ساتھ آپ کے صاحبزادے سیدنا ابراہیم رضی اللہ عنہ کی طرف چلا گیا جو آخری سانسیں لے رہے تھے ۔ نبی اکرم صلی اللہ علیہ وسلم نے انہیں لیا اور اپنی گود میں رکھا یہاں تک کہ ان کی جان نکل گئی تو نبی اکرم صلی اللہ علیہ وسلم نے انہیں رکھ دیا اور پھر آپ رونے لگے میں نے عرض کی : یا رسول اللہ ! کیا آپ رو رہے ہیں جبکہ آپ رونے سے منع کرتے ہیں ؟ نبی اکرم صلی اللہ علیہ وسلم نے ارشاد فرمایا : مجھے رونے سے منع نہیں کیا گیا بلکہ مجھے دو احمق اور فاجر آوازوں سے منع کیا گیا ہے وہ آواز جو نعمت کے وقت نکالی جاتی ہے ، جو لہو و لعب اور شیطان کے باجوں کی صورت میں ہوتی ہے ، اور وہ آواز جو مصیبت کے وقت نکالی جاتی ہے ، جو چہرے پر طمانچے مارنے گریبان پھاڑنے کی صورت میں ہوتی ہے یہ چیز ( یعنی محض رونا ) رحمت ہے ، اور جو شخص رحم نہیں کرتا اس پر رحمت نہیں کی جاتی ہے اے ابراہیم اگر ایک سچا وعدہ نہ ہوتا اور حق فرمان نہ ہوتا اور یہ نہ ہوتا کہ ہمارے آخری فرد نے بھی عنقریب پہلے والے سے جا ملنا ہے ، تو ہمیں تمہارے حوالے سے اس سے زیادہ شدید غم ہونا تھا اے ابراہیم ہم تمہارے حوالے سے غمگین ہیں آنکھ رو رہی ہے دل غمگین ہے ، لیکن ہم کوئی ایسی بات نہیں کہیں گے جو پروردگار کو ناراض کر دے ۔
یہ روایت امام ابویعلیٰ اور امام بزار نے نقل کی ہے ۔ اس کی سند میں ایک راوی محمد بن عبدالرحمن بن ابولیلی ہے ، اور اس کے بارے میں کلام کیا گیا ہے ۔

سیدنا ابوامامہ رضی اللہ عنہ بیان کرتے ہیں : جب نبی اکرم صلی اللہ علیہ وسلم کے صاحبزادے کا انتقال ہوا تو ایک شخص نبی اکرم صلی اللہ علیہ وسلم کی خدمت میں حاضر ہوا نبی اکرم صلی اللہ علیہ وسلم کی آنکھوں سے آنسو جاری تھے اس نے عرض کی : اے اللہ کے نبی ! کیا آپ اس بچے پر رو رہے ہیں ؟ اس ذات کی قسم ! جس نے آپ کو حق کے ہمراہ مبعوث کیا ہے ، میں نے زمانہ جاہلیت میں اپنی اولاد میں سے بارہ بچے دفن کیے ہیں اور ان سب کی عمر اس سے زیادہ تھی ، اور میں نے ان سب کو زندہ زمین میں دفن کیا تھا ، تو نبی اکرم صلی اللہ علیہ وسلم نے ارشاد فرمایا : کیا ہو سکتا ہے ؟ اگر تم سے رحمت رخصت ہو گئی ہو ؟ دل غمگین ہے ، اور آنکھ رو رہی ہے ، اور ہم کوئی ایسی بات نہیں کہتے جو پروردگار کو ناراض کر دے ، ہم ابراہیم کے حوالے سے غمگین ہیں ۔
یہ روایت امام طبرانی نے معجم کبیر میں نقل کی ہے ۔ اس کی سند میں ایک راوی علی بن زید الہانی ہے ، اور وہ ضعیف ہے ۔

سیدنا سائب بن یزید رضی اللہ عنہ بیان کرتے ہیں : جب نبی اکرم صلی اللہ علیہ وسلم کے صاحبزادے سیدنا طاہر رضی اللہ عنہ کا انتقال ہوا تو نبی اکرم صلی اللہ علیہ وسلم کی آنکھوں سے آنسو جاری ہو گئے عرض کی گئی : یا رسول اللہ ! آپ رو رہے ہیں ؟ نبی اکرم صلی اللہ علیہ وسلم نے ارشاد فرمایا : آنکھ بہہ رہی ہے ، اور آنسو ق ابومیں نہیں ہیں اور دل غمگین ہے ، اور ہم اللہ تعالیٰ کی نافرمانی نہیں کر رہے ہیں ۔
یہ روایت امام طبرانی نے معجم کبیر میں نقل کی ہے ۔ اس کی سند میں ایک راوی یحیی بن یزید بن عبدالملک نوفلی ہے ، اور وہ ضعیف ہے ۔

سیدنا عبدالرحمن بن عوف رضی اللہ عنہ بیان کرتے ہیں : نبی اکرم صلی اللہ علیہ وسلم کی صاحبزادی نے آپ کو پیغام بھیجا کہ میری بیٹی فوت ہونے والی ہے نبی اکرم صلی اللہ علیہ وسلم نے قاصد سے کہا: کہ تم اس سے کہہ دو اللہ تعالیٰ جو واپس لے وہ اس کی ملکیت ہے ، اور جو وہ عطا کرے وہ بھی اسی کی ملکیت ہے ان صاحبزادی نے آپ کو دوبارہ پیغام بھیجا نبی اکرم صلی اللہ علیہ وسلم نے دوبارہ یہی بات ارشاد فرما دی ان صاحبزادی نے تیسری مرتبہ آپ کو پیغام بھیجا تو نبی اکرم صلی اللہ علیہ وسلم کچھ اصحاب سمیت ان صاحبزادی کے ہاں تشریف لے گئے ان صاحبزادی نے بچی کو آپ کی طرف بڑھایا اس بچی کا سانس سینے میں اٹک رہا تھا ، تو نبی اکرم صلی اللہ علیہ وسلم کو اس سے انسیت ہوئی اور آپ کی آنکھوں سے آنسو جاری ہو گئے جب آپ کی آنکھوں سے آنسو جاری ہو گئے تو آپ کے بعض اصحاب جو آپ کو دیکھ رہے تھے وہ حیران ہوئے نبی اکرم صلی اللہ علیہ وسلم نے دریافت کیا : تم کیا دیکھ رہے رہو ؟ یہ اللہ تعالیٰ کی رحمت ہے ، جسے وہ جہاں چاہتا ہے وہاں رکھ دیتا ہے ، اور اللہ تعالیٰ اپنے بندوں میں سے رحم کرنے والوں پر رحم کرتا ہے “ ۔
یہ روایت امام بزار نے اور امام طبرانی نے معجم کبیر میں اس کی مانند نقل کی ہے ، تاہم انہوں نے یہ الفاظ نقل کیے ہیں : ” سیدہ امامہ بنت ابوالعاص رضی اللہ عنہا کا آخری وقت قریب آیا تھا ، تو نبی اکرم صلی اللہ علیہ وسلم کی صاحبزادی سیدہ زینب رضی اللہ عنہا نے آپ کو پیغام بھیجا تھا “ ۔ اس روایت کی سند میں ایک راوی ولید بن ابراہیم بن عبدالرحمن بن عوف ہے میں نے کسی کو اس کا ذکر کرتے ہوئے نہیں پایا ہے ۔

سیدنا ابوہریرہ رضی اللہ عنہ بیان کرتے ہیں : جب سیدہ فاطمہ رضی اللہ عنہ کے صاحبزادے کی طبیعت زیادہ خراب ہو گئی تو انہوں نے نبی اکرم صلی اللہ علیہ وسلم کو پیغام بھیج کر آپ کو بلوایا نبی اکرم صلی اللہ علیہ وسلم نے ( قاصد سے ) فرمایا تم واپس چلے جاؤ جو وہ واپس لے وہ بھی اسی کی ملکیت ہے ، اور جسے وہ باقی رہنے دے وہ بھی اسی کی ملکیت ہے ، اور ہر ایک کی ایک متعین مدت ہے ، جب ان صاحبزادے کا وقت قریب آیا تو سیدہ فاطمہ رضی اللہ عنہا نے نبی اکرم صلی اللہ علیہ وسلم کو پیغام بھیجا تو نبی اکرم صلی اللہ علیہ وسلم نے ہم سے فرمایا : تم لوگ اٹھو ! جب آپ تشریف فرما ہوئے تو آپ نے یہ آیت پڑھنی شروع کی : ” پھر ( اس وقت ) کیوں نہیں ( روح کو واپس کرتے ) جب وہ حلق تک پہنچ جاتی ہے ، اور تم اس وقت دیکھتے رہ جاتے ہو “ ۔ یہاں تک کہ ان صاحبزادے کا انتقال ہو گیا تو نبی اکرم صلی اللہ علیہ وسلم کی آنکھوں سے آنسو جاری ہو گئے سیدنا سعد رضی اللہ عنہ نے عرض کی : یا رسول اللہ ! آپ رو رہے ہیں جبکہ آپ رونے سے منع کرتے ہیں ؟ نبی اکرم صلی اللہ علیہ وسلم نے ارشاد فرمایا : یہ رحمت ہے ، اور اللہ تعالیٰ اپنے بندوں میں سے رحم کرنے والے بندوں پر رحم کرتا ہے “ ۔
یہ روایت امام بزار نے نقل کی ہے ۔ اس کی سند میں ایک راوی اسماعیل بن موسیٰ مکی ہے اس کے بارے میں کلام کیا گیا ہے اس کی توثیق بھی کی گئی ہے ۔

سیدنا عبداللہ بن عباس رضی اللہ عنہما بیان کرتے ہیں : نبی اکرم صلی اللہ علیہ وسلم کی صاحبزادی کا آخری وقت قریب آیا نبی اکرم صلی اللہ علیہ وسلم نے انہیں اپنے ساتھ چمٹا لیا اور اپنے سینے کے ساتھ لگا لیا اور آپ کی آنکھوں سے آنسو جاری تھے سیدہ اُم ایمن رضی اللہ عنہ بھی رونے لگیں نبی اکرم صلی اللہ علیہ وسلم نے ان سے فرمایا تم رو رہی ہو ، جبکہ اللہ کے رسول تمہارے پاس موجود ہیں سیدہ اُم ایمن رضی اللہ عنہا نے عرض کی : میں کیوں نہ روؤں جبکہ اللہ کے رسول بھی رو رہے ہیں ۔ نبی اکرم صلی اللہ علیہ وسلم نے ارشاد فرمایا : میں رو نہیں رہا ہوں بلکہ یہ رحمت ہے میں نے اس کی طرف اس حال میں دیکھا کہ اس کی جان نکل رہی ہے ۔
یہ روایت امام بزار نے نقل کی ہے ، اور اس کی سند میں ایک راوی عطاء بن سائب ہے ، جو اختلاط کا شکار ہوا تھا ( چینی جسے اختلاط کا شکار ہونے کی وجہ سے ” ضعیف“ قرار دیا گیا ) ۔

سیدنا سالم ابونضر رضی اللہ عنہ بیان کرتے ہیں : نبی اکرم صلی اللہ علیہ وسلم سیدنا عثمان بن مظعون رضی اللہ عنہ کے پاس تشریف لائے جو انتقال کر گئے تھے ۔ نبی اکرم صلی اللہ علیہ وسلم کے حکم کے تحت انہیں کپڑے کے ذریعے ڈھانپ دیا گیا سیدنا عثمان رضی اللہ عنہ انصار سے تعلق والی ایک خاتون کے ہاں ٹھہرے ہوئے تھے جسے اُم معاذ کہا: جاتا تھا وہ خاتون بیان کرتی ہیں : نبی اکرم صلی اللہ علیہ وسلم خاصی دیر تک ان پر جھکے رہے آپ کے ساتھ آپ کے اصحاب بھی تھے پھر نبی اکرم صلی اللہ علیہ وسلم پیچھے ہٹ گئے اور رونے لگے جب آپ رونے لگے تو گھر میں موجود افراد بھی رونے لگے نبی اکرم صلی اللہ علیہ وسلم نے فرمایا : اے ابوسائب ! اللہ تعالیٰ تم پر رحم کرے راوی بیان کرتے ہیں : سائب نے آپ کے ہمراہ غزوہ بدر میں شرکت کی ہے راوی بیان کرتے ہیں : اُم معاذ نے کہا: اے ابوسائب آپ کو جنت کی مبارک ہو ، تو نبی اکرم صلی اللہ علیہ وسلم نے ارشاد فرمایا : اے ام معاذ تمہیں کیسے پتہ چلا جہاں تک کہ اس کا تعلق ہے ، تو اس کے پاس یقین آ گیا ہے ، اور ہمیں صرف بھلائی کا علم ہے ، تو سیدہ ام معاذ رضی اللہ عنہا نے کہا: جی نہیں اللہ کی قسم ان کے بعد میں کبھی کسی کے بارے میں ، یہ بات نہیں کہوں گی ۔
یہ روایت امام طبرانی نے معجم کبیر میں نقل کی ہے ۔
یہ روایت ” مرسل“ ہے ، اور اس کے رجال ثقہ ہیں ۔

سیدنا جابر بن عبدالله رضی اللہ عنہما بیان کرتے ہیں : غزوہ اُحد میں ان کے والد کو مشرکین نے قتل کر دیا پھر انہوں نے ان کا مثلہ کیا ان کی ناک اور کان کاٹ دیے سیدنا جابر رضی اللہ عنہ بیان کرتے ہیں : میں نے ان کی طرف دیکھا اور مشرکین نے جو ان کے ساتھ سلوک کیا تھا اس کی طرف دیکھا تو میں چیخا انصار آئے اور انہوں نے ان کی لاش کو کپڑے کے ذریعے ڈھانپ دیا میں کپڑا ہٹانے لگا سیدنا جابر رضی اللہ عنہ بیان کرتے ہیں : یہ سب نبی اکرم صلی اللہ علیہ وسلم کی نظروں کے سامنے ہو رہا تھا پھر انصار گئے اور وہ نبی اکرم صلی اللہ علیہ وسلم کی خدمت میں حاضر ہوئے انہوں نے عرض کی : یا رسول اللہ ! کیا آپ ملاحظہ نہیں فرما رہے ہیں جابر کیا کر رہا ہے ؟ نبی اکرم صلی اللہ علیہ وسلم نے فرمایا : اسے رہتے دو ۔
( علامہ ہیثمی فرماتے ہیں : ) میں یہ کہتا ہوں ، اس کے بعد انہوں نے پوری حدیث ذکر کی ہے ” صحیح “ میں اس کا کچھ حصہ منقول ہے ۔
یہ روایت امام طبرانی نے معجم کبیر میں نقل کی ہے ، اور اس کے رجال ثقہ ہیں ۔

سیدنا عائذ بن عمرو رضی اللہ عنہ بیان کرتے ہیں : میں نبی اکرم صلی اللہ علیہ وسلم کے ساتھ ایک جنگ میں شریک ہوا جب ہم واپس آ رہے تھے تو ایک شخص کی بیوی رونے لگی وہ شخص نبی اکرم صلی اللہ علیہ وسلم کے ساتھ جنگ میں شریک ہو کر جام شہادت نوش کر گیا تھا نبی اکرم صلی اللہ علیہ وسلم نے دریافت کیا : یہ رونے والی عورت کون ہے ؟ بتایا گیا فاطمہ بنت علی نبی اکرم صلی اللہ علیہ وسلم نے سیدنا عائذ بن عمرو رضی اللہ عنہ کی طرف توجہ کی اور پھر اس خاتون کی شادی ان صاحب کے ساتھ کر دی اور ان صاحب کو اس خاتون کے بارے میں ( اچھی طرح خیال رکھنے کی ) تلقین کی ۔
یہ روایت امام طبرانی نے معجم کبیر میں نقل کی ہے ، اور اس میں مجہول راوی ہیں ۔

عبداللہ بن یزید فرماتے ہیں : نوحہ کیے بغیر رونے کی اجازت دی گئی ہے ۔
یہ روایت امام طبرانی نے معجم کبیر میں نقل کی ہے ، اور اس کی سند حسن ہے ۔

عامر بن سعد بیان کرتے ہیں : میں ایک چھپر کے نیچے داخل ہوا وہاں سیدنا قرضہ بن کعب رضی اللہ عنہ اور سیدنا ابومسعود انصاری رضی اللہ عنہ موجود تھے راوی کہتے ہیں : پھر انہوں نے ان دونوں صاحبان کے حوالے سے ایک حدیث ذکر کی جس میں ان لوگوں نے یہ کہا: ہمیں مصیبت کے وقت نوحہ کیے بغیر رونے کی اجازت دی گئی ہے ۔
یہ روایت امام طبرانی نے معجم کبیر میں نقل کی ہے ، اور اس کے رجال ” صحیح“ کے رجال ہیں ۔

سیدہ ام اسحاق رضی اللہ عنہا بیان کرتی ہیں : میں نے اپنے بھائی کے ساتھ نبی اکرم صلی اللہ علیہ وسلم کی طرف مدینہ منورہ ہجرت کے لیے نکلی ، راستے میں میرے بھائی نے مجھ سے کہا: اے اُم اسحاق ! تم بیٹھی رہو میں اپنا خرچ مکہ میں بھول آیا ہوں میں نے کہا: مجھے آپ کے بارے میں اپنے فاسق شوہر کے حوالے سے اندیشہ ہے ۔ انہوں نے کہا: جی نہیں اگر اللہ نے چاہا ( تو کچھ نہیں ہو گا ) سیدہ ام اسحاق رضی اللہ عنہا کرتی ہیں : میں کچھ دن تک وہاں ٹھہری رہی پھر ایک شخص میرے پاس سے گزرا میں جس سے واقف تھی ، لیکن میں اس کا نام نہیں جانتی تھی اس نے کہا: اے ام اسحاق تم یہاں کیوں بیٹھی ہوئی ہو سیدہ ام اسحاق نے جواب دیا : میں اسحاق کا انتظار کر رہی ہوں وہ اپنا خرچ لینے کے لئے مکہ گئے ہوئے ہیں تو اس شخص نے کہا: اسحاق تمہارے پاس نہیں آ سکتا تمہارا فاسق شوہر ملا تھا اور اس نے اسے قتل کر دیا ۔ سیدہ اُم اسحاق رضی اللہ عنہا بیان کرتی ہیں : پھر میں آئی اور نبی اکرم صلی اللہ علیہ وسلم کی خدمت میں حاضر ہوئی آپ اس وقت وضو کر رہے تھے میں نے عرض کی : یا رسول اللہ ! اسحاق قتل ہو گیا ہے میں رو رہی تھی اور نبی اکرم صلی اللہ علیہ وسلم میری طرف دیکھ رہے تھے ، جب میں نے آپ کی طرف دیکھا تو آپ نے سر جھکایا تھیلی میں پانی لیا اور اسے میرے چہرے پر چھڑک دیا ۔ بشار نامی راوی بیان کرتے ہیں : میری دادی بیان کرتی ہیں : ہمیں بڑی مصیبت بھی لاحق ہوتی تھی تو ہماری آنکھوں میں آنسو نظر آ جاتے تھے ، لیکن وہ رخسار تک نہیں پہنچتے تھے ۔
یہ روایت امام طبرانی نے معجم اوسط میں نقل کی ہے ۔ اس کی سند میں ایک راوی بشار بن عبدالملک ہے ، جسے یحیی بن معین نے ” ضعیف“ قرار دیا ہے ۔

سیدنا عبداللہ بن عتبہ رضی اللہ عنہ بیان کرتے ہیں : جب سیدنا عتبہ بن مسعود رضی اللہ عنہ کا انتقال ہوا تو سیدنا عبداللہ بن مسعود رضی اللہ عنہ رونے لگے لوگوں نے عرض کی : آپ رو رہے ہیں آپ نے فرمایا : جی ہاں ۔ یہ میرا سگا بھائی ہے میرے ساتھ نبی اکرم صلی اللہ علیہ وسلم کا صحابی ہے ، اور میرے نزدیک سب سے زیادہ محبوب فرد ہے ، البتہ سیدنا عمر بن خطاب رضی اللہ عنہ کا معاملہ مختلف ہے ( یعنی مجھے ان سے زیادہ محبت ہے ۔ )
یہ روایت امام طبرانی نے معجم اوسط میں نقل کی ہے ۔ معجم کبیر میں اس کی مانند روایت نقل کی ہے ، اور یہ الفاظ زائد نقل کیے ہیں : ” اس کے ہمراہ مجھے یہ بات پسند نہیں ہے کہ میں اس سے پہلے مر گیا ہوتا کیونکہ وہ فوت ہو جائے اور میں اس پر ثواب کی امید رکھوں یہ میرے نزدیک اس سے زیادہ پسندیدہ ہے کہ میں مر جاتا اور وہ میرے حوالے سے ثواب کی امید رکھتا“ ۔ اس روایت کے رجال ثقہ ہیں ۔

سیدنا ابوموسیٰ اشعری رضی اللہ عنہ کی اہلیہ سیدہ اُم عبداللہ رضی اللہ عنہ بیان کرتی ہیں : سیدنا ابوموسیٰ اشعری رضی اللہ عنہ بیمار ہو گئے میں ان کے پاس رونے لگی تو مجھے اس سے منع کر دیا گیا انہوں نے فرمایا : اسے آنسو بہانے دو خواہ ایک ڈول ہو ، یا دو ڈول ہوں ۔ ۔ ۔ اس کے بعد راوی نے پوری روایت ذکر کی ہے ۔
یہ روایت امام طبرانی نے معجم کبیر میں نقل کی ہے ۔

سیدنا عبداللہ بن عمر رضی اللہ عنہما روایت کرتے ہیں : نبی اکرم صلی اللہ علیہ وسلم نے ارشاد فرمایا : ” دو قسم کے افراد میں سے کسی ایک پر رویا جا سکتا ہے ایسا گناہ گار شخص جس کا فجور مکمل ہو ، یا ایسا نیکوکار جس کی نیکی مکمل ہو “ ۔
یہ روایت امام طبرانی نے معجم اوسط میں نقل کی ہے ۔ اس کی سند میں ایک راوی رشدین بن سعد ہے ، اور اس کے بارے میں کلام کیا گیا ہے ۔

سیدہ عائشہ صدیقہ رضی اللہ عنہا بیان کرتی ہیں : میں سیدنا ابوبکر رضی اللہ عنہ کے پاس آئی میں نے دیکھا کہ وہ قریب المرگ ہیں ، میں نے کہا: تم اس کو برانگیختہ کرو اس کو برانگیختہ کرو ، جس کے آنسو نہیں ڈھانپے جا سکتے ہیں ، آخر کار ایک مرتبہ دفن کیا جاتا ہے ، تو سیدنا ابوبکر رضی اللہ عنہ نے فرمایا : تم یہ نہ کہو ! بلکہ تم یہ پڑھو : ” موت کی بیہوشی حق کے ہمراہ آ گئی ، یہ وہ جس چیز ہے ، جس سے تم بھاگتے تھے “ ۔
یہ روایت امام ابویعلیٰ نے نقل کی ہے ، اور اس کی سند کے رجال ” صحیح “ کے رجال ہیں ۔