مجمع الزوائد ومنبع الفوائد

سیدنا جابر رضی اللہ عنہ بیان کرتے ہیں : ایک شخص نبی اکرم صلی اللہ علیہ وسلم کی خدمت میں حاضر ہوا ، اور بولا: میرا پڑوسی ایک منافق شخص ہے ، وہ اس ، اس طرح کے کام کرتا ہے ، نبی اکرم صلی اللہ علیہ وسلم نے دریافت کیا : ”کیا وہ لا الہ الاللہ پڑھتا ہے ؟“ اس شخص نے جواب دیا : جی ہاں ! تو نبی اکرم صلی اللہ علیہ وسلم نے فرمایا : ”ان ( یعنی کلمہ گو ) لوگوں ( کو قتل کرنے ) سے مجھے منع کیا گیا ہے“ ۔
یہ روایت امام بزار نے نقل کی ہے ، اس کی سند میں ” مستور “ راوی ہیں ، اور محمد بن ابولیلی نامی راوی کا حافظہ خراب ہے ۔

عبیدالله بن عدی بن خیار بیان کرتے ہیں : انصار سے تعلق رکھنے والے ایک شخص نے انہیں یہ بات بتائی : کہ ایک مرتبہ وہ نبی اکرم صلی اللہ علیہ وسلم کی خدمت میں حاضر ہوا ، نبی اکرم صلی اللہ علیہ وسلم اس وقت ایک محفل میں تشریف فرما تھے ، اس نے نبی اکرم صلی اللہ علیہ وسلم کے ساتھ سرگوشی میں بات کرتے ہوئے ، آپ سے ایک منافق کو قتل کرنے کی اجازت مانگی ، نبی اکرم صلی اللہ علیہ وسلم نے بلند آواز میں دریافت کیا : کیا وہ شخص اس بات کی گواہی نہیں دیتا کہ اللہ تعالیٰ کے علاوہ اور کوئی معبود نہیں ہے ؟ اس انصاری نے جواب دیا : جی ہاں ! یا رسول اللہ ! لیکن اس کی گواہی کی کوئی حیثیت نہیں ہے ، نبی اکرم صلی اللہ علیہ وسلم نے دریافت کیا : کیا وہ اس بات کی گواہی نہیں دیتا ؟ کہ سیدنا محمد صلی اللہ علیہ وسلم ، اللہ کے رسول ہیں ، اس شخص نے جواب دیا : جی ہاں ! یا رسول اللہ ! لیکن اس کی گواہی کی کوئی حیثیت نہیں ہے ، نبی اکرم صلی اللہ علیہ وسلم نے دریافت کیا : کیا وہ نماز نہیں پڑھتا ہے ؟ اس شخص نے جواب دیا : جی ہاں ! یا رسول اللہ ! لیکن اُس کی نماز کی کوئی حیثیت نہیں ہے ، تو نبی اکرم صلی اللہ علیہ وسلم نے ارشاد فرمایا : یہ وہ ( یعنی کلمہ گو ) لوگ ہیں ، جن ( کو قتل کرنے ) سے اللہ تعالیٰ نے مجھے منع کیا ہے ۔
یہ روایت امام أحمد نے نقل کی ہے اور اس کے رجال صحیح کے رجال ہیں ، انہوں نے یہی روایت دوبارہ ، عبیداللہ بن عدی بن خیار کے حوالے سے ، عبداللہ بن عدی انصاری سے نقل کی ہے کہ عبداللہ بن عدی نے انہیں یہ حدیث بیان کی اور پھر انہوں نے اسی مضمون کی حدیث ذکر کی ہے ۔

سیدنا جریر رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا ہے : ” مجھے یہ حکم دیا گیا ہے کہ میں لوگوں کے ساتھ اُس وقت تک جنگ کروں ، جب تک وہ یہ نہیں کہہ دیتے کہ اللہ تعالی کے علاوہ اور کوئی معبود نہیں ہے ، جب وہ یہ کہہ دیں گے ، تو وہ اپنی جانوں اور اموال کو مجھ سے محفوظ کر لیں گے ، البتہ اُن کے حق کا معاملہ مختلف ہے ، اور اُن لوگوں کا حساب ، اللہ تعالٰی کے ذمہ ہو گا “ ۔
یہ روایت امام طبرانی نے نقل کی ہے ، اس کی سند میں ایک راوی ابراہیم بن عیینہ ہے ، اکثر محدثین نے اسے ضعیف قرار دیا ہے یحییٰ بن معین کہتے ہیں : وہ ایک سچا مسلمان تھا

سیدنا سہل بن سعد رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” مجھے یہ حکم دیا گیا ہے کہ میں لوگوں کے ساتھ اُس وقت تک جنگ کروں ، جب تک وہ یہ نہیں کہہ دیتے کہ اللہ تعالیٰ کے علاوہ اور کوئی معبود نہیں ہے ، جب وہ لا الہ الا اللہ کہہ دیں گے ، تو وہ اپنی جانوں اور اموال کو مجھ سے محفوظ کر لیں گے ، البتہ اُن کے حق کا معاملہ مختلف ہے ، اور اُن لوگوں کا حساب ، اللہ تعالیٰ کے ذمہ ہو گا ۔ “
یہ روایت امام طبرانی نے نقل کی ہے اور اس کی سند میں ایک راوی مصعب بن ثابت ہے ، ابن حبان نے اسے ثقہ قرار دیا ہے جبکہ اکثر محدثین نے اسے ضعیف قرار دیا ہے

سیدنا عبداللہ بن عباس رضی اللہ عنہما بیان کرتے ہیں : نبی اکرم صلی اللہ علیہ وسلم نے ارشاد فرمایا ہے : ” مجھے یہ حکم دیا گیا ہے کہ میں لوگوں کے ساتھ اس وقت تک جنگ کروں ، جب تک وہ یہ نہیں کہہ دیتے کہ اللہ تعالیٰ کے علاوہ اور کوئی معبود نہیں ہے ، جب وہ یہ کہہ دیں گے ، تو وہ اپنی جانوں اور اموال کو مجھ سے محفوظ کر لیں گے ، البتہ اُن کے حق کا معاملہ مختلف ہے ، اور اُن لوگوں کا حساب اللہ تعالیٰ کے ذمہ ہو گا“ ۔
یہ روایت امام طبرانی نے نقل کی ہے ، اس کے رجال کی توثیق کی گئی ہے ، البتہ اس کی سند میں ایک راوی اسحاق بن یزید خطابی ہے ، میں اُس سے واقف نہیں ہوں ۔

سیدنا ابوبکر صدیق رضی اللہ عنہ بیان کرتے ہیں : نبی اکرم صلی اللہ علیہ وسلم نے ارشاد فرمایا ہے : ” مجھے یہ حکم دیا گیا ہے کہ میں لوگوں کے ساتھ اُس وقت تک جنگ کروں ، جب تک وہ یہ نہیں کہہ دیتے کہ اللہ تعالیٰ کے علاوہ اور کوئی معبود نہیں ہے ، جب وہ یہ کہہ دیں گے ، تو وہ اپنی جانوں اور اموال کو مجھ سے روک لیں ( یعنی محفوظ کر لیں ) گے ، البتہ ان کے حق کا معاملہ مختلف ہے ، اور اُن لوگوں کا حساب ، اللہ تعالیٰ کے ذمہ ہو گا “ ۔
یہ روایت امام بزار نے نقل کی ہے : وہ فرماتے ہیں : میرے علم کے مطابق ، یہ روایت سیدنا انس رضی اللہ عنہ کے حوالے سے ، سیدنا ابوبکر صدیق رضی اللہ عنہ سے منقول ہونے کے طور پر ، صرف اسی سند کے ساتھ منقول ہے اور میں یہ سمجھتا ہوں کہ عمران نامی راوی نے اس کی سند میں غلطی کی ہے ۔

سیدنا عبداللہ بن مسعود رضی اللہ عنہ بیان کرتے ہیں : نبی اکرم صلی اللہ علیہ وسلم نے ارشاد فرمایا ہے : ” جب کوئی شخص نیزے کے ذریعے کسی ( غیر مسلم ) پر حملہ آور ہو ، اور جب نیزے کی نوک ، اُس ( غیر مسلم ) کی گردن کے اوپر ہو اور اس وقت وہ لا الہ الا اللہ پڑھ لے ، تو مسلمان شخص کو اُس سے نیزا اُٹھا لینا چاہیے “ ۔
یہ روایت امام طبرانی نے معجم کبیر اور معجم اوسط میں نقل کی ہے ، اس کی سند میں ایک راوی صلہ بن عبدالرحمن زبیدی ہے ، جس کے ذریعے حجت قائم نہیں ہوتی

ابومالک اشجعی ، اپنے والد کے حوالے سے بات نقل کرتے ہیں : نبی اکرم صلی اللہ علیہ وسلم نے ارشاد فرمایا ہے : ” مجھے یہ حکم دیا گیا ہے کہ میں لوگوں کے ساتھ اس وقت تک جنگ کروں ، جب تک وہ لا الہ الا اللہ نہیں پڑھ لیتے ، جب وہ یہ پڑھ لیں گے ، تو وہ اپنی جانیں اور اموال مجھ سے محفوظ کر لیں گے ، البتہ ان کے حق کا معاملہ مختلف ہے اور ان لوگوں کا حساب اللہ تعالیٰ کے ذمہ ہو گا “ ۔
یہ روایت امام طبرانی نے معجم کبیر میں نقل کی ہے اور اس کے رجال کی توثیق کی گئی ہے ۔

سیدنا ابوبکرہ رضی اللہ عنہ بیان کرتے ہیں : نبی اکرم صلی اللہ علیہ وسلم نے ارشاد فرمایا ہے : ” مجھے یہ حکم دیا گیا ہے کہ میں لوگوں کے ساتھ اس وقت تک جنگ کروں ، جب تک وہ لا الہ الا اللہ نہیں پڑھ لیتے ، جب وہ یہ پڑھ لیں گے ، تو وہ اپنی جانیں اور اموال مجھ سے محفوظ کر لیں گے ، البتہ ان کے حق کا معاملہ مختلف ہے اور ان لوگوں کا حساب اللہ تعالیٰ کے ذمہ ہو گا “ ۔
یہ روایت امام طبرانی نے معجم کبیر اور معجم اوسط میں نقل کی ہے اس کی سند میں ایک راوی عبداللہ بن عیسیٰ حجاز ہے اور وہ ضعیف ہے ، اس سے استدلال نہیں کیا جائے گا ۔

سیدنا سمرہ بن جندب رضی اللہ عنہ بیان کرتے ہیں : نبی اکرم صلی اللہ علیہ وسلم نے ارشاد فرمایا ہے : ” مجھے یہ حکم دیا گیا ہے کہ میں لوگوں کے ساتھ اس وقت تک جنگ کروں ، جب تک وہ لا الہ الا اللہ نہیں پڑھ لیتے ، جب وہ یہ پڑھ لیں گے ، تو وہ اپنی جانیں اور اموال مجھ سے محفوظ کر لیں گے ، البتہ ان کے حق کا معاملہ مختلف ہے اور ان لوگوں کا حساب ، اللہ تعالیٰ کے ذمہ ہو گا “ ۔
یہ روایت امام طبرانی نے معجم اوسط میں نقل کی ہے ، اس کی سند میں ایک راوی مبارک بن فضالہ ہے ، جس سے استدلال کرنے میں اختلاف کیا گیا ہے ۔

سیدنا انس بن مالک رضی اللہ عنہ بیان کرتے ہیں : نبی اکرم صلی اللہ علیہ وسلم نے ارشاد فرمایا ہے : ” مجھے یہ حکم دیا گیا ہے کہ میں لوگوں کے ساتھ اس وقت تک جنگ کروں ، جب تک وہ لا الہ الا اللہ نہیں پڑھ لیتے ، جب وہ یہ پڑھ لیں گے ، تو وہ اپنی جانیں اور اموال مجھ سے محفوظ کر لیں گے ، البتہ اُن کے حق کا معاملہ مختلف ہے اور ان لوگوں کا حساب ، اللہ تعالیٰ کے ذمہ ہو گا ، عرض کی گئی : اُن کے حق سے مراد کیا ہے ؟ نبی اکرم صلی اللہ علیہ وسلم نے فرمایا : محصن ہونے کے باوجود زنا کا ارتکاب کرنا ، یا اسلام قبول کر لینے کے بعد کفر اختیار کرنا ، یا کسی کو قتل کرنا ، تو اس کے عوض میں اس شخص کو قتل کر دیا جائے گا ۔ “
یہ روایت امام طبرانی نے معجم اوسط میں نقل کی ہے ، اس کی سند میں ایک راوی عمرو بن ہاشم بیروتی ہے ، اکثر محدثین نے اس کی توثیق کی ہے

سیدنا عیاض انصاری رضی اللہ عنہ مرفوع حدیث کے طور پر نقل کرتے ہیں : نبی اکرم صلی اللہ علیہ وسلم نے ارشاد فرمایا ہے : ”لا الہٰ الا اللہ اللہ تعلی کی بارگاہ میں معزز کلمہ ہے ، جسے اللہ تعالی کی بارگاہ میں بلند حیثیت حاصل ہے ، یہ ایک ایسا کلمہ ہے کہ جو شخص سچے دل کے ساتھ اسے پڑھ لے گا ، اللہ تعالی اس کی وجہ سے اسے جنت میں داخل کر دے گا ۔ اور جو شخص جھوٹ کے طور پر اسے پڑھے گا ، یہ کلمہ اس کی جان بچا لے گا اور اس کے مال کو محفوظ کر دے گا ، کل جب وہ شخص اللہ تعالیٰ کی بارگاہ میں حاضر ہو گا تو اللہ تعالیٰ اس سے حساب لے گا “۔
یہ روایت امام بزار نے روایت کی ہے ، اس کے رجال کی توثیق کی گئی ہے اگرچہ اس کا تابعی عبدالرحمن بن عبداللہ بن مسعود ہیں ۔

حمید بن ہلال بیان کرتے ہیں : سیدنا عمارہ بن قرض لیثی رضی اللہ عنہ ایک جنگ میں شریک ہوئے ، جتنا عرصہ اللہ کو منظور تھا ، وہ وہاں رہے ، پھر وہ واپس روانہ ہو گئے ، جب وہ اہواز کے قریب پہنچے اور انہوں نے اذان کی آواز سنی ، تو بولے : اللہ کی قسم ! میں نے گزشتہ تین دن سے مسلمانوں کے ساتھ باجماعت نماز ادا نہیں کی ، وہ اذان کی طرف چل پڑے ، اُن کا ارادہ ( با جماعت ) نماز ادا کرنے کا تھا ، لیکن وہ مسجد ” ازارقہ “ ( یعنی خوارج ) کی تھی ، اُن لوگوں نے سیدنا عمارہ رضی اللہ عنہ سے کہا: اے اللہ کے دشمن ! تم کیوں آئے ہو ؟ سیدنا عمارہ رضی اللہ عنہ نے کہا: کیا تم لوگ میرے بھائی یعنی مسلمان نہیں ہو ؟ اُن لوگوں نے کہا: تم شیطان کے بھائی ہو ، ہم تمہیں ضرور قتل کر دیں گے ، تو سیدنا عمارہ رضی اللہ عنہ نے کہا: کیا تم میری طرف سے اُس چیز سے راضی نہیں ہو گے ، جس سے اللہ کے رسول راضی ہوئے تھے ؟ اُن لوگوں نے دریافت کیا : وہ کیا چیز تھی ؟ جس کی وجہ سے اللہ کے رسول صلی اللہ علیہ وسلم آپ سے راضی ہوئے تھے ؟ سیدنا عمارہ رضی اللہ عنہ نے بتایا : ”جب میں نبی اکرم صلی اللہ علیہ وسلم کی خدمت میں حاضر ہوا ، تو میں کافر تھا ، پھر میں نے اس بات کی گواہی دی کہ اللہ تعالیٰ کے علاوہ اور کوئی معبود نہیں ہے ، اور بے شک آپ ، اللہ کے رسول ہیں ، تو نبی اکرم صلی اللہ علیہ وسلم نے مجھے چھوڑ دیا تھا “۔
( راوی کہتے ہیں : ) لیکن اُن خوارج نے انہیں پکڑ کر شہید کر دیا ۔
یہ روایت امام طبرانی نے معجم کبیر اور معجم اوسط میں نقل کی ہے اور اس کے رجال صحیح کے رجال ہیں ۔

سیدنا نعمان بن بشیر رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” مجھے یہ حکم دیا گیا ہے کہ میں لوگوں کے ساتھ اس وقت تک جنگ کروں جب تک وہ لا الہ الا اللہ نہیں پڑھ لیتے ، جب وہ لوگ یہ پڑھ لیں گے ، تو وہ اپنی جانیں اور اموال مجھ سے محفوظ کر لیں گے ، البتہ ان کے حق کا معاملہ مختلف ہے “ ۔
یہ روایت امام بزار نے نقل کی ہے اور اس کے رجال صحیح کے رجال ہیں ۔

سیدنا مسلم تمیمی رضی اللہ عنہ بیان کرتے ہیں : اللہ کے رسول نے ہمیں ایک جنگی مہم پر روانہ کیا ، جب ہم نے دشمن پر حملہ کیا ، تو میں گھوڑے پر سوار ہو کر ، اپنے ساتھیوں سے آگے نکل آیا ، خواتین اور بچے ہمارے سامنے آئے ، جو چیخ و پکار کر رہے تھے ، میں نے اُن سے کہا: کیا تم یہ چاہتے ہو کے اپنی جانیں بچا لو ؟ انہوں نے جواب دیا : جی ہاں ! میں نے کہا: پھر تم لوگ یہ کہو : ” ہم اس بات کی گواہی دیتے ہیں کہ اللہ کے علاوہ اور کوئی معبود نہیں ہے ، صرف وہی ایک معبود ہے اس کا کوئی شریک نہیں ہے ، اور سیدنا محمد صلی اللہ علیہ وسلم اس کے بندے اور اس کے رسول ہیں “ ان لوگوں نے یہ کلمہ پڑھ لیا ، جب میرے ساتھی آئے ، تو انہوں نے مجھے ملامت کی اور یہ کہا: ہمیں تو غنیمت حاصل ہونے کی توقع تھی ، لیکن تم نے وہ ہمیں نہیں ملنے دیا ، ( راوی بیان کرتے ہیں : ) جب ہم لوگ واپس نبی اکرم صلی اللہ علیہ وسلم کی خدمت میں حاضر ہوئے ، ( تو نبی اکرم صلی اللہ علیہ وسلم نے ) میرے ساتھیوں سے فرمایا : کیا تم لوگ یہ جانتے ہو ؟ کہ اس نے کیا کیا ہے ( یعنی اس شخص کے ) اس عمل کا اجر و ثواب کتنا ہو گا ؟ اللہ تعالیٰ نے ( اسلام قبول کرنے والے ) ہر ایک انسان کے بدلے میں اتنی ، اتنی ( نیکیاں یا اجر و ثواب ) اسے عطا کر دیا ہے ، راوی بیان کرتے ہیں : پھر نبی اکرم صلی اللہ علیہ وسلم نے مجھے اپنے قریب کیا ۔
یہ روایت امام طبرانی نے معجم کبیر میں نقل کی ہے ، اور اس کی سند میں ایک راوی حارث بن مسلم ہے ، اور وہ مجہول ہے ۔

سیدنا عقبہ بن مالک لیثی رضی اللہ عنہ بیان کرتے ہیں : نبی اکرم صلی اللہ علیہ وسلم نے ایک جنگی مہم روانہ کی ، ان لوگوں نے دشمن پر حملہ کیا تو دشمن کا ایک فرد ان سے الگ ہو گیا ، ایک مسلمان اس کے پیچھے تلوار لہراتا ہوا گیا ، تو الگ ہونے والے اس فرد نے یہ کہا: میں مسلمان ہوں ، لیکن مسلمان نے اس کی بات پر دھیان نہیں دیا اور اس پر حملہ کر کے اسے قتل کر دیا ، جب نبی اکرم صلی اللہ علیہ وسلم کو اس بات کی اطلاع ملی ، تو نبی اکرم صلی اللہ علیہ وسلم نے اس پر شدید ناراضگی کا اظہار کیا ، اس بات کی اطلاع قتل کرنے والے مسلمان کو ملی ، تو نبی اکرم صلی اللہ علیہ وسلم خطبہ ارشاد فرما رہے تھے ، اسی دوران اُس شخص نے کہا: یا رسول اللہ ! اللہ کی قسم ! اس ( مقتول ) شخص نے یہ بات صرف قتل سے بچنے کے لیے کہی تھی ، نبی اکرم صلی اللہ علیہ وسلم نے اس شخص سے اور اس طرف موجود افراد سے منہ پھیر لیا ، اور اپنا خطبہ جاری رکھا ، اس شخص نے دوسری مرتبہ پھر یہی بات کہی : اللہ کی قسم ! اس نے قتل سے بچنے کے لیے یہ بات کہی تھی ، نبی اکرم صلی اللہ علیہ وسلم نے پھر اس سے منہ پھیر لیا اور اپنا خطبہ جاری رکھا ، اس شخص سے صبر نہیں ہوا ، یہاں تک کہ اس نے تیسری مرتبہ یہ کہا: اللہ کی قسم ! اس نے قتل سے بچنے کے لیے یہ بات کہی تھی ، تو نبی اکرم صلی اللہ علیہ وسلم اس شخص کی طرف متوجہ ہوئے ، آپ کے چہرہ مبارک پر ناگواری کے آثار واضح تھے ، آپ نے ارشاد فرمایا : ” جو شخص کسی مومن کو قتل کر دیتا ہے ، اللہ تعالٰی نے اس کے بارے میں مجھے منع کیا ہے“ ۔ یہ بات آپ صلی اللہ علیہ وسلم نے تین مرتبہ ارشاد فرمائی ۔
یہ روایت امام طبرانی نے معجم کبیر میں نقل کی ہے ، امام أحمد اور امام ابویعلیٰ نے بھی اسے نقل کیا ہے ، تاہم انہوں نے راوی کا نام سیدنا عقبہ بن مالک کی بجائے ، سیدنا عقبہ بن خالد رضی اللہ عنہ نقل کیا ہے ، اس روایت کے تمام رجال ثقہ ہیں ۔

سیدنا جندب بن سفیان رضی اللہ عنہ ، جن کا تعلق ” بجیلہ “ قبیلے سے ہے ، وہ بیان کرتے ہیں : میں نبی اکرم صلی اللہ علیہ وسلم کے پاس موجود تھا ، جب ایک جنگی مہم کی طرف سے خوش خبری سنانے والا ایک شخص آپ صلی اللہ علیہ وسلم کی خدمت میں حاضر ہوا اور آپ کو یہ اطلاع دی : کہ اللہ تعالی نے اس جنگی مہم کی مدد کرتے ہوئے انہیں کامیابی عطا کی ہے اور انہیں فتح نصیب کر دی ہے ، اس شخص نے یہ بھی بتایا : یا رسول اللہ ! جب اللہ تعالیٰ نے دشمن کو پسپا کر دیا اور ہم ان کا تعاقب کر رہے تھے ، اس دوران میں تلوار لے کر ایک شخص کے پاس پہنچا ، میں اس پر حملہ کرنے لگا ، تو وہ دوڑ پڑا اور بولا: میں مسلمان ہوں ، میں مسلمان ہوں ، نبی اکرم صلی اللہ علیہ وسلم نے دریافت کیا : تو کیا تم نے اسے قتل کر دیا ؟ اس شخص نے عرض کی : یا رسول اللہ ! وہ بچنا چاہ رہا تھا ، نبی اکرم صلی اللہ علیہ وسلم نے فرمایا : تم نے اس کا دل کیوں نہیں چیر دیا ؟ تاکہ تم یہ دیکھ لیتے کہ کیا وہ سچا ہے ، یا جھوٹا ہے ؟ اس شخص نے عرض کی : اگر میں اس کا دل چیر بھی لیتا ، تو بھی مجھے یہ پتہ نہیں چل سکتا تھا ، کیونکہ اس کا دل تو صرف گوشت کا ایک لوتھڑا ہے ، نبی اکرم صلی اللہ علیہ وسلم نے فرمایا : اُس کے دل میں جو تھا ، نہ تو تم اس کے بارے میں جان سکتے تھے ، اور نہ ہی تم نے اُس کی زبان کی تصدیق کی ، اس شخص نے عرض کی : یا رسول اللہ ! آپ میرے لیے دعائے مغفرت کیجیے ! نبی اکرم صلی اللہ علیہ وسلم نے فرمایا : میں تمہارے لئے دعائے مغفرت نہیں کروں گا ۔ راوی بیان کرتے ہیں : جب وہ شخص مر گیا اور لوگوں نے اسے دفن کر دیا ، تو اگلے دن اس کی لاش ( قبر سے باہر ) زمین پر پڑی ہوئی تھی ، لوگوں نے اسے دوبارہ دفن کیا ، ( تو اگلے دن ) اس کی لاش پھر زمین پر پڑی ہوئی تھی ، ایسا تین مرتبہ ہوا ، جب لوگوں نے یہ صورت حال دیکھی ، تو اس شخص کے معاملے کے حوالے سے انہیں حیا محسوس ہوئی اور شرمندگی محسوس ہوئی ، تو لوگوں نے اس کی لاش اُٹھا کر ایک گڑھے میں ڈال دی ۔
( علامہ ہیثمی کہتے ہیں : ) میں یہ کہتا ہوں : یہ روایت ” صحیح “ میں اختصار کے ساتھ منقول ہے ۔
یہ روایت امام طبرانی نے معجم کبیر میں اور امام ابویعلیٰ نے بھی نقل کی ہے ، اس کی سند میں دو راوی ، عبدالحمید بن بہرام اور شہر بن حوشب ہیں ، ان دونوں سے استدلال کرنے کے بارے میں اختلاف کیا گیا ہے ۔

سیدنا عمران بن حصین رضی اللہ عنہ بیان کرتے ہیں : نبی اکرم صلی اللہ علیہ وسلم نے ارشاد فرمایا : ( یعنی مذکورہ بالا روایت میں یہ الفاظ ہیں : ) ” میں لوگوں کے ساتھ صرف اسلام کی بنیاد پر جنگ کرتا ہوں ، اللہ کی قسم ! میں تمہارے لیے دعائے مغفرت نہیں کروں گا “ ( راوی بیان کرتے ہیں : ) یا جس طرح بھی آپ صلی اللہ علیہ وسلم نے ارشاد فرمایا ۔
( علامہ ہیثمی کہتے ہیں : ) میں یہ کہتا ہوں : یہ بات ایک طویل حدیث میں ذکر کی گئی ہے ، جسے امام ابن ماجہ نے فتنوں سے متعلق باب میں نقل کیا ہے ، اور یہ الفاظ اُن کے نقل کردہ ہیں ، اس کی سند میں ایک مجہول شخص ہے ، یہ روایت امام طبرانی نے معجم کبیر میں نقل کی ہے ۔

سیدنا قطبہ بن قتادہ سدوی رضی اللہ عنہ بیان کرتے ہیں : میں نے عرض کی : یا رسول اللہ ( صلی اللہ علیہ وسلم ) ! آپ اپنا دست مبارک آگے کیجیئے ، تاکہ میں اپنی ذات اور اپنی بیٹی ”حویصلہ “ کے حوالے سے ، آپ کی بیعت کر لوں ، اور اگر میں اللہ کی طرف جھوٹی بات منسوب کروں گا ، تو میں آپ کو دھوکا دوں گا ۔
سیدنا قطبہ رضی اللہ عنہ بیان کرتے ہیں : سیدنا خالد بن ولید رضی اللہ عنہ نے اپنے شہسواروں کے ساتھ ہم پر حملہ کیا تھا ، تو ہم نے کہا: ہم مسلمان ہیں ، تو انہوں نے ہمیں چھوڑ دیا ہم نے سیدنا خالد رضی اللہ عنہ کے ہمراہ جنگ ”ابلہ“ میں حصہ لیا تھا ، انہیں فتح نصیب ہوئی ، تو انہوں نے ہمارے ہاتھ ( مال غنیمت کے ذریعے ) بھر دیے تھے ۔
یہ روایت امام طبرانی نے معجم کبیر میں نقل کی ہے اور اس کی سند میں ایک مجہول راوی ہے ، اور وہ قتادہ نامی شخص ہے ، جس نے سیدنا قطبہ رضٰ اللہ عنہ کے حوالے سے یہ روایت نقل کی ہے ۔
( علامہ ہیثمی کہتے ہیں : ) میں نے ایسا کوئی شخص نہیں دیکھا ، جس نے اس راوی ( قتادہ ) کا ذکر کیا ہو ۔

سیدنا سعد بن ابوزیاب رضی اللہ عنہ بیان کرتے ہیں : میں نبی اکرم صلی اللہ علیہ وسلم کی خدمت میں حاضر ہوا ، میں نے اسلام قبول کر لیا تو میں نے عرض کی : یا رسول اللہ ! میری قوم کے افراد جن اموال ( یعنی زمینوں ) سمیت اسلام قبول کریں گے ، آپ وہ ( زمینیں ) ان لوگوں کی ملکیت رہنے دیں ، تو نبی اکرم صلی اللہ علیہ وسلم نے ایسا ہی کیا ، اور آپ صلی اللہ علیہ وسلم نے مجھے ان لوگوں پر عامل مقرر کر دیا ، نبي اکرم صلی اللہ علیہ وسلم کے بعد ، سیدنا ابوبکر رضی اللہ عنہ نے مجھے عامل مقرر کیا ، اور اُن کے بعد سیدنا عمر رضی اللہ عنہ نے بھی مجھے ہی عامل مقرر کیا ۔
یہ روایت امام أحمد نے نقل کی ہے اور دوسرے مقام پر ، انہوں نے راوی کا نام ” سعید “ ( بن ابوذیاب ) نقل کیا ہے اور اپنی سند کے ساتھ ، اس راوی کے حوالے سے یہی حدیث نقل کی ہے ، باقی اللہ بہتر جانتا ہے ۔
اس کی سند میں ایک راوی منیر بن عبداللہ ہے اور وہ مجہول ہے ، ازدی نے بھی اسے ضعیف قرار دیا ہے ۔