مجمع الزوائد ومنبع الفوائد

سیدنا عبداللہ بن مسعود رضی اللہ عنہ بیان کرتے ہیں : نبی اکرم صلی اللہ علیہ وسلم نے مندر بن ساویٰ کو خط میں یہ لکھا تھا : ” جو شخص ہماری نماز ادا کرے ، اور وہ ہمارا ذبیحہ کھائے ، تو وہ مسلمان شمار ہو گا ، اور اُس کے لئے اللہ اور اس کے رسول کے ذمہ ( ثابت ) ہو گا “ ۔
یہ روایت امام طبرانی نے معجم کبیر میں نقل کی ہے ، اور اس کی سند میں ایک راوی حسن بن ادریس حلوانی ہے ، ( علامہ ہیثمی کہتے ہیں : ) میں نے کسی کو اس کا ذکر کرتے ہوئے نہیں دیکھا ، نیز یہ روایت ابوعبیدہ نے اپنے والد ( سیدنا عبداللہ بن مسعود رضی اللہ عنہ ) سے نقل کی ہے ، حالانکہ انہوں ( یعنی ابوعبیدہ ) نے اپنے والد ( سیدنا عبداللہ بن مسعود رضی اللہ عنہ ) سے سماع نہیں کیا ہے ۔

سیدنا جندب رضی اللہ عنہ بیان کرتے ہیں : نبی اکرم صلی اللہ علیہ وسلم نے ارشاد فرمایا ہے : ” جو شخص ہماری نماز ادا کرے ، اور ہمارے قبلہ کی طرف رُخ کرے اور ہمارا ذبیحہ کھائے ، وہ مسلمان شمار ہو گا ، اُس کے لیے اللہ کا ، اور اُس کے رسول کا ذمہ ( ثابت ) ہو گا“ ۔
یہ روایت امام طبرانی نے معجم کبیر میں نقل کی ہے ، عبید بن عبیدہ تمار ، نامی راوی کے حالات سے میں واقف نہیں ہو سکا ۔

سیدنا عبداللہ بن ماعز رضی اللہ عنہ کے بارے میں یہ بات منقول ہے : وہ نبی اکرم صلی اللہ علیہ وسلم کی خدمت میں حاضر ہوئے ، تو نبی اکرم صلی اللہ علیہ وسلم نے ارشاد فرمایا : ماعز نے اسلام قبول کیا ، تو اپنا مال محفوظ کر لیا ، اب اُس کے خلاف صرف اُس کا اپنا ہاتھ ہی جنایت کرے گا ۔ راوی کہتے ہیں : تو اس بات پر ، میں نے نبی اکرم صلی اللہ علیہ وسلم کی بیعت کر لی ۔
یہ روایت امام طبرانی نے معجم کبیر میں نقل کی ہے اور اس کی سند میں ایک راوی ہنید بن قاسم ہے اور وہ مجہول ہے ۔