المعجم الأوسط

سیدنا انس بن مالک رضی اللہ عنہ سے روایت ہے کہ رسول اللہ ﷺ نے فرمایا: ”جس نے میری سنت کو زندہ کیا اس نے مجھ سے محبت کی، اور جس نے مجھ سے محبت کی وہ جنت میں میرے ساتھ ہوگا۔“
امام طبرانی رحمہ اللہ فرماتے ہیں: ”اس حدیث کو معبد بن خالد سے عاصم بن سعید کے سوا کسی نے روایت نہیں کیا، اور اس میں نفیلی منفرد ہیں۔“

سیدنا عبداللہ بن عباس رضی اللہ عنہما سے روایت ہے کہ نبی ﷺ نماز میں اپنے چہرے کو (ہاتھ سے) نہیں پونچھتے تھے۔
امام طبرانی رحمہ اللہ فرماتے ہیں: ”اس حدیث کو خالد بن طہمان ابو العلاء سے مروان بن معاویہ کے سوا کسی نے روایت نہیں کیا، اور اس میں نفیلی منفرد ہیں۔“

سیدنا انس بن مالک رضی اللہ عنہ سے روایت ہے کہ رسول اللہ ﷺ نے فرمایا: ”جس نے اچھی طرح وضو کیا، پھر ثواب کی نیت سے اپنے مسلمان بھائی کی عیادت کی، تو اسے جہنم سے ساٹھ خریف کی مسافت کے برابر دور کر دیا جائے گا۔“ (ثابت بنانی رحمہ اللہ کہتے ہیں:) میں نے پوچھا: ”اے ابو حمزہ! خریف کیا ہوتا ہے؟“ انہوں نے کہا: ”سال۔“
(امام طبرانی رحمہ اللہ فرماتے ہیں:) ”اس حدیث کو معمر رحمہ اللہ سے ابو سفیان معمری رحمہ اللہ کے سوا کسی نے روایت نہیں کیا، اور ابو جعفر نفیلی رحمہ اللہ اس کی روایت میں منفرد ہیں۔“

سیدنا ابو سعید خدری رضی اللہ عنہ سے روایت ہے کہ رسول اللہ ﷺ نے فرمایا: ”جو بھی مسلمان شخص اپنے بھائی میں کوئی عیب (قابلِ ستر بات) دیکھے اور اس پر پردہ ڈال دے، تو اللہ تعالیٰ اس کے بدلے اسے جنت میں داخل فرمائے گا۔“
(امام طبرانی رحمہ اللہ فرماتے ہیں:) ”یہ حدیث ابو سعید رضی اللہ عنہ سے اسی سند کے ساتھ ہی مروی ہے، اور خالد بن الیاس رحمہ اللہ اس میں منفرد ہیں۔“

سیدنا انس بن مالک رضی اللہ عنہ سے روایت ہے کہ نبی کریم ﷺ نے فرمایا: ”روزہ جسم کا گوشت گھلا دیتا ہے اور بھڑکتی آگ کی تپش سے دور کر دیتا ہے۔ بے شک اللہ تعالیٰ کا ایک دسترخوان ہے جس پر ایسی نعمتیں ہیں جنہیں نہ کسی آنکھ نے دیکھا، نہ کسی کان نے سنا اور نہ کسی انسان کے دل میں ان کا خیال تک گزرا؛ اس پر صرف روزہ دار ہی بیٹھیں گے۔“
(امام طبرانی رحمہ اللہ فرماتے ہیں:) ”اس حدیث کو ابو قبیل رحمہ اللہ سے ابو بکر عنسی رحمہ اللہ کے سوا کسی نے روایت نہیں کیا، اور بقیہ رحمہ اللہ اس میں منفرد ہیں۔“

سیدنا انس بن مالک رضی اللہ عنہ بیان کرتے ہیں کہ رسول اللہ ﷺ نے منیٰ میں مسجد خیف میں ہمیں خطبہ دیا اور فرمایا: ”اللہ تعالیٰ اس شخص کو تروتازہ اور شاد و آباد رکھے جس نے میری بات سنی، اسے یاد رکھا، پھر اسے اس شخص تک پہنچایا جس نے نہیں سنی تھی؛ کیونکہ بہت سے فقہ (دین کی سمجھ) کے حامل خود فقیہ نہیں ہوتے، اور بہت سے فقہ کے حامل اسے ایسے شخص تک پہنچاتے ہیں جو ان سے زیادہ سمجھ رکھنے والا ہوتا ہے۔ تین باتیں ایسی ہیں جن کے بارے میں مومن کا دل خیانت یا کینہ نہیں رکھتا: عمل کو خالص اللہ کے لیے کرنا، ان لوگوں کی خیرخواہی کرنا جنہیں اللہ نے تمہارا حاکم بنایا ہے، اور مسلمانوں کی جماعت کو لازم پکڑے رکھنا؛ کیونکہ ان کی دعا انہیں پیچھے سے گھیرے رکھتی ہے۔“
(امام طبرانی رحمہ اللہ فرماتے ہیں:) ”اس حدیث کو زید بن اسلم رحمہ اللہ سے ان کے بیٹے کے سوا کسی نے روایت نہیں کیا، اور عطاف بن خالد رحمہ اللہ اور محمد بن شعیب بن شابور رحمہ اللہ اس میں منفرد ہیں۔“

سیدنا عبداللہ بن عمر رضی اللہ عنہما سے روایت ہے کہ رسول اللہ ﷺ نے فرمایا: ”لا الٰہ الا اللہ کہنے والوں پر نہ موت کے وقت کوئی وحشت ہوگی اور نہ قبر میں۔“
(امام طبرانی رحمہ اللہ فرماتے ہیں:) ”اس حدیث کو داود بن ابی ہند رحمہ اللہ سے مجاشع بن عمرو رحمہ اللہ کے سوا کسی نے روایت نہیں کیا، اور جعفر بن عاصم رحمہ اللہ اس میں منفرد ہیں۔“

سیدنا جابر رضی اللہ عنہما سے روایت ہے کہ رسول اللہ ﷺ نے فرمایا: ”جو شخص روزانہ پچاس مرتبہ ﴿قُلْ هُوَ اللَّهُ أَحَدٌ﴾ پڑھے گا، قیامت کے دن اسے اس کی قبر سے پکارا جائے گا: اٹھو اور جنت میں داخل ہو جاؤ۔“

سیدنا عبداللہ بن عباس رضی اللہ عنہما سے روایت ہے کہ رسول اللہ ﷺ نے فرمایا: ”دنیا میں نیکی اور بھلائی کرنے والے لوگ ہی آخرت میں بھی نیکی اور بھلائی والے ہوں گے۔“
امام طبرانی رحمہ اللہ فرماتے ہیں: ”اس حدیث کو لیث سے موسیٰ بن اعین کے سوا کسی نے روایت نہیں کیا۔“

سیدنا انس رضی اللہ عنہ سے روایت ہے کہ رسول اللہ ﷺ ایک دیہاتی کے پاس سے گزرے جو اپنی نماز میں دعا کر رہا تھا اور یوں کہہ رہا تھا: «يَا مَنْ لَا تَرَاهُ الْعُيُونُ، وَلَا تُخَالِطُهُ الظُّنُونُ، وَلَا يَصِفُهُ الْوَاصِفُونَ، وَلَا تُغَيِّرُهُ الْحَوَادِثُ، وَلَا يَخْشَى الدَّوَائِرَ، يَعْلَمُ مَثَاقِيلَ الْجِبَالِ، وَمَكَايِيلَ الْبِحَارِ، وَعَدَدَ قَطْرِ الْأَمْطَارِ، وَعَدَدَ وَرَقِ الْأَشْجَارِ، وَعَدَدَ مَا أَظْلَمَ عَلَيْهِ اللَّيْلُ وَأَشْرَقَ عَلَيْهِ النَّهَارُ، لَا تُوَارِي مِنْهُ سَمَاءٌ سَمَاءً، وَلَا أَرْضٌ أَرْضًا، وَلَا بَحْرٌ مَا فِي قَعْرِهِ، وَلَا جَبَلٌ مَا فِي وَعْرِهِ، اجْعَلْ خَيْرَ عُمُرِي آخِرَهُ، وَخَيْرَ عَمَلِي خَوَاتِمَهُ، وَخَيْرَ أَيَّامِي يَوْمَ أَلْقَاكَ فِيهِ» ”اے وہ ذات جسے آنکھیں نہیں دیکھ سکتیں، جسے گمان و خیالات پا نہیں سکتے، جس کی توصیف بیان کرنے والے بیان نہیں کر سکتے، جسے حوادثِ زمانہ بدل نہیں سکتے اور جو گردشِ زمانہ سے نہیں ڈرتا! وہ پہاڑوں کے وزن، سمندروں کے پیمانوں، بارش کے قطروں کی تعداد، درختوں کے پتوں کی تعداد اور ان تمام چیزوں کی تعداد جانتا ہے جن پر رات اندھیرا ڈالتی اور دن روشنی کرتا ہے۔ نہ کوئی آسمان اس سے دوسرے آسمان کو چھپا سکتا ہے، نہ کوئی زمین دوسری زمین کو، نہ سمندر اپنی تہہ کی چیزوں کو اور نہ پہاڑ اپنی دشوار گزار گھاٹیوں کی چیزوں کو۔ میری عمر کا بہترین حصہ اس کا آخری حصہ بنا دے، میرے عمل کا بہترین حصہ اس کا اختتام بنا دے اور میرے دنوں میں بہترین دن وہ بنا دے جس میں میں تجھ سے ملوں۔“ پھر رسول اللہ ﷺ نے اس دیہاتی کے پاس ایک آدمی مقرر کیا اور فرمایا: ”جب یہ نماز پڑھ لے تو اسے میرے پاس لے آنا۔“ چنانچہ جب اس نے نماز پڑھ لی تو وہ اسے آپ ﷺ کے پاس لے آیا۔ رسول اللہ ﷺ کو کسی کان سے نکلا ہوا کچھ سونا ہدیہ کیا گیا تھا، تو جب وہ دیہاتی آپ ﷺ کے پاس آیا تو آپ ﷺ نے وہ سونا اسے عطا فرما دیا اور پوچھا: ”اے دیہاتی! تم کس قبیلے سے ہو؟“ اس نے کہا: ”اے اللہ کے رسول! میں بنو عامر بن صعصعہ سے ہوں۔“ آپ ﷺ نے فرمایا: ”کیا تم جانتے ہو میں نے تمہیں یہ سونا کیوں دیا ہے؟“ اس نے کہا: ”اے اللہ کے رسول! ہمارے اور آپ کے درمیان رشتہ داری کی وجہ سے۔“ تو آپ ﷺ نے فرمایا: ”بے شک رشتہ داری کا بھی حق ہوتا ہے، لیکن میں نے تمہیں یہ سونا اس لیے دیا ہے کہ تم نے اللہ عز وجل کی نہایت عمدہ ثنا بیان کی ہے۔“
امام طبرانی رحمہ اللہ فرماتے ہیں: ”اس حدیث کو حمید سے ہشیم کے سوا کسی نے روایت نہیں کیا، اور اذرمی اسے بیان کرنے میں منفرد ہیں۔“

عبدالرحمن بن شماسہ مہری رحمہ اللہ بیان کرتے ہیں: ”میں ام المومنین سیدہ عائشہ رضی اللہ عنہا کی خدمت میں حاضر ہوا تو انہوں نے پوچھا: تم کس علاقے سے ہو؟“ میں نے کہا: ”میں اہلِ مصر سے ہوں۔“ انہوں نے پوچھا: ”تمہاری اس جنگی مہم میں تم نے ابن خدیج کو کیسا پایا؟“ میں نے کہا: ”ہم نے انہیں بہترین امیر پایا؛ ہم میں سے کسی آدمی کا گھوڑا مر جاتا تو وہ اسے دوسرا گھوڑا دے دیتے تھے۔“ تو سیدہ عائشہ رضی اللہ عنہا نے فرمایا: ”میں نے رسول اللہ ﷺ کو فرماتے سنا: «اللَّهُمَّ مَنْ وَلِيَ مِنْ أَمْرِ أُمَّتِي شَيْئًا فَرَفَقَ بِهِمْ فَارْفُقْ بِهِ، وَمَنْ شَقَّ عَلَيْهِمْ فَاشْقُقْ عَلَيْهِ» ”اے اللہ! جو شخص میری امت کے کسی معاملے کا ذمہ دار بنے اور ان کے ساتھ نرمی کرے تو تو بھی اس کے ساتھ نرمی فرما، اور جو ان پر سختی کرے تو تو بھی اس پر سختی فرما۔““
امام طبرانی رحمہ اللہ فرماتے ہیں: ”یہ حدیث عبدالرحمن بن شماسہ سے، وہ سیدہ عائشہ رضی اللہ عنہا سے صرف اسی سند سے مروی ہے، اور اسے بیان کرنے میں حرملہ بن عمران منفرد ہیں۔“

سیدنا براء بن عازب رضی اللہ عنہ سے روایت ہے کہ نبی کریم ﷺ جب بھی کوئی فرض نماز پڑھتے تو اس میں قنوت ضرور کرتے۔
(امام طبرانی رحمہ اللہ فرماتے ہیں:) ”اس حدیث کو مطرف سے محمد بن انس کے سوا کسی نے روایت نہیں کیا۔“

ام المومنین سیدہ عائشہ رضی اللہ عنہا سے روایت ہے کہ رسول اللہ ﷺ نے فرمایا: ”عورتوں میں سب سے زیادہ بابرکت وہ ہے جس کا مہر سب سے کم ہو۔“
(امام طبرانی رحمہ اللہ فرماتے ہیں:) ”یہ حدیث ام نعمان سے، سیدہ عائشہ رضی اللہ عنہا کے واسطے سے، صرف اسی سند سے مروی ہے، اس میں حارث بن شبل منفرد ہیں۔“

سیدنا انس رضی اللہ عنہ سے روایت ہے کہ رسول اللہ ﷺ نے فرمایا: ”اللہ تعالیٰ کا ایک فرشتہ ہے جو ہر نماز کے وقت پکارتا ہے: ’اے بنی آدم! اٹھو اور اپنی اس آگ کو جو تم نے خود اپنے اوپر بھڑکائی ہے، نماز کے ذریعے بجھا دو۔‘“
(امام طبرانی رحمہ اللہ فرماتے ہیں:) ”اس حدیث کو ابن عون سے ازہر کے سوا کسی نے روایت نہیں کیا، اس میں یحییٰ بن زہیر قرشی منفرد ہیں۔“

سیدنا عبد اللہ بن عمر رضی اللہ عنہما سے روایت ہے کہ رسول اللہ ﷺ نے فرمایا: ”جنین (پیٹ کے بچے) کا ذبح اس کی ماں کا ذبح ہے۔“
(امام طبرانی رحمہ اللہ فرماتے ہیں:) ”اس حدیث کو ایوب بن موسیٰ سے محمد بن مسلم طائفی کے سوا کسی نے روایت نہیں کیا۔“

سیدنا عبد اللہ بن عباس رضی اللہ عنہما سے روایت ہے کہ رسول اللہ ﷺ نے فرمایا: ”جس شخص کی موت اس حال میں آ پہنچے کہ وہ علم کی طلب میں لگا ہوا ہو، وہ اللہ سے اس طرح ملے گا کہ اس کے اور انبیاء کے درمیان صرف نبوت کے درجے کا فرق ہوگا۔“
(امام طبرانی رحمہ اللہ فرماتے ہیں:) ”اس حدیث کو زہری سے محمد بن جعد کے سوا کسی نے روایت نہیں کیا، اس میں عباس بن بکار منفرد ہیں۔“

سیدنا انس بن مالک رضی اللہ عنہ سے روایت ہے کہ رسول اللہ ﷺ نے سینگی لگوائی اور سینگی لگانے والے کو اس کی اجرت بھی دی۔
امام طبرانی رحمہ اللہ فرماتے ہیں: ”اس حدیث کو عاصم بن عبدالواحد سے طالوت کے سوا کسی نے روایت نہیں کیا۔“

سیدنا عبداللہ بن زبیر رضی اللہ عنہما سے روایت ہے کہ رسول اللہ ﷺ جب نماز میں بیٹھتے تو اپنا بایاں قدم اپنی بائیں ران کے نیچے کر لیتے، دایاں قدم بچھا دیتے، بایاں ہاتھ اپنے گھٹنے پر رکھتے اور دایاں ہاتھ اپنی دائیں ران پر رکھتے اور انگلی سے اشارہ فرماتے۔
امام طبرانی رحمہ اللہ فرماتے ہیں: ”اس حدیث کو عثمان بن حکیم سے عبدالواحد بن زیاد کے سوا کسی نے روایت نہیں کیا۔“

موسیٰ بن عقبہ رحمہ اللہ کے نانا (ابو حبیبہ) سے روایت ہے کہ وہ سیدنا عثمان رضی اللہ عنہ کے پاس ان کے گھر میں گئے، جبکہ آپ رضی اللہ عنہ اس میں محصور تھے، اور انہوں نے سیدنا ابوہریرہ رضی اللہ عنہ کو سنا کہ وہ سیدنا عثمان رضی اللہ عنہ سے بات کرنے کی اجازت مانگ رہے تھے۔ آپ رضی اللہ عنہ نے انہیں اجازت دے دی تو وہ کھڑے ہوئے، اللہ کی حمد و ثنا بیان کی، پھر کہا: ”میں نے رسول اللہ ﷺ کو فرماتے ہوئے سنا: ’میرے بعد فتنے اور اختلافات ہوں گے۔‘ لوگوں میں سے ایک کہنے والے نے عرض کیا: ’اے اللہ کے رسول! ہمارے لیے (کون سہارا) ہوگا؟‘ تو آپ ﷺ نے فرمایا: ’تم امیر اور اس کے ساتھیوں کو لازم پکڑنا‘ اور آپ ﷺ اس وقت سیدنا عثمان رضی اللہ عنہ کی طرف اشارہ فرما رہے تھے۔“
امام طبرانی رحمہ اللہ فرماتے ہیں: ”اس حدیث کو موسیٰ بن عقبہ سے وہیب کے سوا کسی نے روایت نہیں کیا، اور موسیٰ بن عقبہ کے نانا کی کنیت ابو حبیبہ ہے۔“

سیدنا انس رضی اللہ عنہ سے روایت ہے کہ نبی کریم ﷺ نے فرمایا: ”لوگوں سے بدگمانی کے ذریعے سے اپنا بچاؤ کرو۔“
امام طبرانی رحمہ اللہ فرماتے ہیں: ”یہ حدیث سیدنا انس رضی اللہ عنہ سے اسی سند کے ساتھ ہی روایت کی جاتی ہے، اس میں بقیہ منفرد ہیں۔“
دار الحرمین کے مطبوعہ نسخے میں اسی طرح ہے، اور شاید درست نام ”سلیمان بن سلیم“ ہے۔

ام المومنین سیدہ ام سلمہ رضی اللہ عنہا سے روایت ہے کہ رسول اللہ ﷺ نے فرمایا: ”رکن اور مقام (ابراہیم) کے درمیان ایک آدمی کے ہاتھ پر اہلِ بدر کی تعداد کے برابر لوگ بیعت کریں گے۔ پھر اس کے پاس اہلِ عراق کی جماعتیں اور اہلِ شام کے ابدال آئیں گے۔ پھر اہلِ شام کا ایک لشکر اس سے جنگ کے لیے نکلے گا، یہاں تک کہ جب وہ بیداء کے مقام پر ہوں گے تو انہیں زمین میں دھنسا دیا جائے گا۔ پھر قریش کا ایک آدمی، جس کے ننھیال بنو کلب میں سے ہوں گے، ان سے جنگ کرے گا، دونوں گروہوں کا مقابلہ ہوگا تو اللہ تعالیٰ انہیں شکست دے گا۔ پس نامراد وہی ہے جو بنو کلب کی غنیمت (کی تقسیم) سے محروم رہا۔“
امام طبرانی رحمہ اللہ فرماتے ہیں: ”اس حدیث کو قتادہ سے عمران قطان کے سوا کسی نے روایت نہیں کیا۔“

سیدنا ابو سعید خدری رضی اللہ عنہ سے روایت ہے کہ نبی کریم ﷺ نے فرمایا: ”میرے اہلِ بیت میں سے ایک شخص حکمران بنے گا، جس کی پیشانی کشادہ اور ناک بلند (باریک اور خمدار) ہوگی، وہ زمین کو عدل و انصاف سے بھر دے گا جیسے وہ ظلم و جور سے بھر چکی ہوگی، وہ اتنی مدت زندہ رہے گا“ (راوی نے) اپنی دائیں ہتھیلی پھیلائی اور اس کے ساتھ دو انگلیاں پھیلائیں اور اپنی بائیں ہتھیلی بھی پھیلائی۔
امام طبرانی رحمہ اللہ فرماتے ہیں: ”اس حدیث کو قتادہ رحمہ اللہ سے عمران قطان کے سوا کسی نے روایت نہیں کیا۔“

سیدنا عبداللہ بن عمر رضی اللہ عنہما سے روایت ہے کہ انہوں نے فرمایا: ”ہمیں ایسے جنازے کے پیچھے چلنے سے منع کیا گیا جس کے ساتھ نوحہ کرنے والی عورت ہو۔“
امام طبرانی رحمہ اللہ فرماتے ہیں: ”اس حدیث کو یزید بن ابراہیم رحمہ اللہ سے عفان کے سوا کسی نے روایت نہیں کیا۔“

ام المومنین سیدہ عائشہ رضی اللہ عنہا سے روایت ہے کہ انہوں نے فرمایا: ”میرے دروازے پر ایک جھالر دار (روئیں دار) پردہ لٹکا ہوا تھا جس میں پروں والے گھوڑوں کی تصویریں تھیں، تو رسول اللہ ﷺ نے فرمایا: ”اسے اتار پھینکو۔““

ام المومنین سیدہ عائشہ رضی اللہ عنہا سے (اسی سند سے) روایت ہے کہ انہوں نے فرمایا: ”رسول اللہ ﷺ رات کو نماز پڑھتے اور میں آپ ﷺ اور قبلے کے درمیان آڑی لیٹی ہوتی تھی، پھر جب آپ ﷺ وتر پڑھنے کا ارادہ فرماتے تو مجھے جگا دیتے، تو میں آہستگی سے آپ ﷺ کے سامنے سے کھسک جاتی۔“
امام طبرانی رحمہ اللہ فرماتے ہیں: ”جریر بن حازم رحمہ اللہ نے ہشام بن عروہ رحمہ اللہ سے صرف یہی دو حدیثیں روایت کی ہیں۔“

سیدنا عبداللہ بن عباس رضی اللہ عنہما سے روایت ہے کہ نبی کریم ﷺ نے فرمایا: ”میں نے تمہیں گھوڑوں اور غلاموں (کی زکوٰۃ) سے معاف کر دیا ہے، اور دو سو (درہم) سے کم میں زکوٰۃ نہیں ہے۔“
امام طبرانی رحمہ اللہ فرماتے ہیں: ”یہ حدیث ابن عباس رضی اللہ عنہما سے صرف اسی سند سے مروی ہے، اس میں معن بن عیسیٰ رحمہ اللہ منفرد ہیں۔“

سیدنا ابوہریرہ رضی اللہ عنہ سے روایت ہے کہ انہوں نے کہا: ”میں نے رسول اللہ ﷺ کو دیکھا کہ آپ ﷺ نے وضو کیا اور اپنے سر کا مسح ایک ہی مرتبہ کیا۔“
امام طبرانی رحمہ اللہ فرماتے ہیں: ”ضمضم بن جوس سے یہ حدیث صرف محمد بن جابر نے روایت کی ہے۔“

سیدنا عبداللہ بن عباس رضی اللہ عنہما سے روایت ہے کہ رسول اللہ ﷺ نے فرمایا: ”مکہ حرمت والا شہر ہے، نہ اس کی (تر) گھاس کاٹی جائے، نہ اس کے درخت کاٹے جائیں اور نہ اس کے وحشی جانوروں کو ڈرایا جائے۔“
امام طبرانی رحمہ اللہ فرماتے ہیں: ”حبیب بن ابی ثابت سے، انہوں نے ابن عباس رضی اللہ عنہما سے یہ حدیث صرف محمد بن جابر نے روایت کی ہے۔“

سیدنا عبداللہ بن عباس رضی اللہ عنہما سے روایت ہے کہ انہوں نے کہا: ”رسول اللہ ﷺ نے ہمیں پالتو گدھوں کا گوشت کھانے سے منع فرمایا، تاکہ سواری کے جانور باقی رہیں۔“
امام طبرانی رحمہ اللہ فرماتے ہیں: ”اعمش سے یہ حدیث صرف حبان اور محمد بن جابر نے روایت کی ہے۔ محمد بن جابر سے روایت کرنے میں اسحاق بن ابی اسرائیل منفرد ہیں اور حبان سے روایت کرنے میں بکر بن یحییٰ بن زبان منفرد ہیں۔“

سیدنا عبداللہ بن عباس رضی اللہ عنہما سے روایت ہے کہ انہوں نے کہا: ”جب رسول اللہ ﷺ جمع (مزدلفہ) میں تشریف لائے تو آپ ﷺ نے اپنے گھر والوں کے کمزور افراد کو حکم دیا کہ وہ رات ہی کو آگے روانہ ہو جائیں، اور فرمایا: ”جب تک سورج طلوع نہ ہو جائے جمرہ کو کنکریاں نہ مارنا۔““
امام طبرانی رحمہ اللہ فرماتے ہیں: ”حماد سے یہ حدیث صرف محمد بن جابر اور ابوحنیفہ رحمہ اللہ نے روایت کی ہے۔ محمد بن جابر سے روایت کرنے میں اسحاق بن ابی اسرائیل منفرد ہیں اور ابوحنیفہ رحمہ اللہ سے روایت کرنے میں عبدالرحیم بن سلیمان منفرد ہیں۔“

سیدنا ابن عباس رضی اللہ عنہما سے روایت ہے کہ رسول اللہ ﷺ نے فرمایا: ”مزدلفہ پورا کا پورا مشعر (ٹھہرنے کی جگہ) ہے، البتہ بطنِ عُرنہ سے ہٹ کر اوپر کی طرف ٹھہرو، اور عرفات پورا کا پورا موقف (وقوف کی جگہ) ہے، البتہ وادیِ محسر سے ہٹ کر اوپر کی طرف ٹھہرو۔“
امام طبرانی رحمہ اللہ فرماتے ہیں: ”اس حدیث کو یعقوب بن عطاء سے محمد بن جابر اور سفیان بن عیینہ کے سوا کسی نے روایت نہیں کیا۔“

سیدنا عقبہ بن عمرو رضی اللہ عنہ سے روایت ہے کہ رسول اللہ ﷺ نماز (کی صفیں درست کرتے وقت) ہمارے کندھوں پر ہاتھ پھیرتے اور فرماتے: ”کندھوں کو برابر رکھو، صفوں کو سیدھا کرو اور (آگے پیچھے ہو کر) اختلاف نہ کرو، ورنہ تمہارے دلوں میں اختلاف پڑ جائے گا۔“
امام طبرانی رحمہ اللہ فرماتے ہیں: ”اس حدیث کو عمرو بن مرہ سے محمد بن جابر کے سوا کسی نے روایت نہیں کیا، اور اسے بیان کرنے میں اسحاق بن ابی اسرائیل منفرد ہیں۔“

ام المومنین سیدہ عائشہ رضی اللہ عنہا سے روایت ہے کہ رسول اللہ ﷺ روزے کی حالت میں بوسہ لے لیا کرتے تھے۔
امام طبرانی رحمہ اللہ فرماتے ہیں: ”اس حدیث کو عبدالعزیز بن رفیع سے محمد بن جابر اور عبیدہ بن حمید کے سوا کسی نے روایت نہیں کیا۔“

سیدنا عبداللہ بن عمر رضی اللہ عنہما سے روایت ہے کہ انہوں نے کہا: ”میں نے نبی ﷺ کو فرماتے ہوئے سنا کہ اللہ تعالیٰ جو چاہتا ہے مٹا دیتا ہے، سوائے بدبختی اور نیک بختی کے، اور زندگی اور موت کے۔“
امام طبرانی رحمہ اللہ فرماتے ہیں: ”اس حدیث کو ابن ابی لیلیٰ سے محمد بن جابر کے سوا کسی نے روایت نہیں کیا، اور نافع سے ابن ابی لیلیٰ کے سوا کسی نے اسے بیان نہیں کیا۔“

امام سفیان بن عیینہ رحمہ اللہ سے روایت ہے کہ عمار دہنی رحمہ اللہ نے بیان کیا: ”میں نے ابو اسحاق رحمہ اللہ سے کہا: کیا آپ کو (وہ حدیث) یاد ہے؟“ ان کی مراد مسلم بن نذیر رحمہ اللہ کی وہ روایت تھی جو سیدنا حذیفہ رضی اللہ عنہ سے مروی ہے کہ نبی ﷺ نے میری پنڈلی کے گوشت کو پکڑا۔ تو انہوں نے مجھے یہ حدیث بیان کر دی۔ سفیان رحمہ اللہ کہتے ہیں: ”پھر میں ان (ابو اسحاق) سے ملا اور ان سے اس کے بارے میں پوچھا تو انہوں نے مجھے یہ حدیث بیان کی۔“

سیدنا براء رضی اللہ عنہ سے روایت ہے کہ نبی کریم ﷺ سے (قبر کے احوال والی) حدیث، یعنی زاذان کی حدیث، اعمش کی روایت کردہ حدیث کی مانند مروی ہے۔
امام طبرانی رحمہ اللہ فرماتے ہیں: ”اس حدیث کو حجاج سے قیس بن سعد کے سوا کسی نے روایت نہیں کیا، اور قیس بن سعد سے جریر بن حازم کے سوا کسی نے روایت نہیں کیا، اور جریر سے وہب کے سوا کسی نے روایت نہیں کیا، اور اسحاق بن ابی اسرائیل اس روایت میں منفرد ہیں۔“

سیدنا جابر رضی اللہ عنہما سے روایت ہے کہ نبی کریم ﷺ نے فرمایا: ”پیشانی کے بال (چوٹیاں) صرف حج یا عمرہ (کے احرام سے حلال ہونے) ہی میں کاٹے جاتے ہیں۔“

سیدنا جابر رضی اللہ عنہما سے روایت ہے کہ نبی کریم ﷺ نے گھوڑوں کو (دوڑ کے لیے) تیار کیا اور ان کے درمیان دوڑ کا مقابلہ کروایا، تو آپ ﷺ نے مجھے اونٹ پر سوار دیکھا، چنانچہ فرمایا: ”اے جابر! تم اسے مسلسل مارتے ہی رہتے ہو۔“
امام طبرانی رحمہ اللہ فرماتے ہیں: ”ان دونوں حدیثوں کو عمر بن محمد بن منکدر سے محمد بن سلیمان بن مسمول کے سوا کسی نے روایت نہیں کیا۔“

سیدنا عبداللہ بن عباس رضی اللہ عنہما سے روایت ہے کہ رسول اللہ ﷺ نے اپنی سواری پر (سوار ہو کر) طواف کیا، اور آپ ﷺ کے ہاتھ میں خمدار سر والی چھڑی تھی جس سے آپ ﷺ رکن (حجرِ اسود) کا استلام فرماتے تھے۔
امام طبرانی رحمہ اللہ فرماتے ہیں: ”اس حدیث کو عبدالکریم سے ابن ابی لیلی کے سوا کسی نے روایت نہیں کیا، اور عمران بن محمد اس میں منفرد ہیں۔“

سیدنا عبداللہ بن عمر رضی اللہ عنہما سے روایت ہے کہ رسول اللہ ﷺ نے فرمایا: ”لا الہ الا اللہ کہنے والوں کو نہ ان کی قبروں میں کوئی وحشت ہوگی اور نہ ان کے (قبروں سے) اٹھائے جانے کے وقت۔ گویا میں ان لا الہ الا اللہ کہنے والوں کو دیکھ رہا ہوں کہ وہ اپنے سروں سے مٹی جھاڑ رہے ہیں اور کہہ رہے ہیں: «الْحَمْدُ لِلهِ الَّذِي أَذْهَبَ عَنَّا الْحَزَنَ» ”تمام تعریفیں اس اللہ کے لیے ہیں جس نے ہم سے غم دور کر دیا۔““