المعجم الأوسط

سیدنا علی رضی اللہ عنہ سے روایت ہے کہ جب نبی کریم ﷺ کی نعل مبارک کا تسمہ ٹوٹ جاتا تو آپ ﷺ ایک جوتی پہن کر چلتے اور دوسری ہاتھ میں پکڑے رکھتے، یہاں تک کہ تسمہ مل جاتا تو اسے پہن لیتے۔
امام طبرانی رحمہ اللہ فرماتے ہیں: ”یہ حدیث سیدنا علی رضی اللہ عنہ سے اسی سند کے ساتھ ہی روایت کی جاتی ہے، اس میں ابن ابی فدیک منفرد ہیں۔“

ام المومنین سیدہ عائشہ رضی اللہ عنہا سے روایت ہے کہ رسول اللہ ﷺ نے فرمایا: ”جس چیز کی زیادہ مقدار نشہ پیدا کرے، اس کی تھوڑی مقدار بھی حرام ہے۔“
امام طبرانی رحمہ اللہ فرماتے ہیں: ”اس حدیث کو امام مالک رحمہ اللہ سے بشر بن عمر کے سوا کسی نے روایت نہیں کیا، اور ان سے روایت کرنے میں حسن بن یحییٰ اصم منفرد ہیں۔“

سیدنا عبداللہ بن عباس رضی اللہ عنہما بیان کرتے ہیں: ”میں رسول اللہ ﷺ کے پیچھے چلا تاکہ آزماؤں کہ کیا آپ ﷺ اسے ناپسند فرماتے ہیں؟ تو آپ ﷺ نے ہاتھ سے مجھے ٹٹولا اور مجھے اپنے ساتھ ملا لیا۔ پھر میں آزمانے کے لیے پیچھے رہ گیا کہ کیا آپ ﷺ اسے ناپسند فرماتے ہیں؟ تو آپ ﷺ نے ہاتھ سے مجھے ٹٹولا اور مجھے ساتھ ملا لیا۔ پھر میں آزمانے کے لیے پیچھے رہ گیا تو آپ ﷺ نے پھر ہاتھ سے مجھے ٹٹولا اور مجھے ساتھ ملا لیا، تب میں نے جان لیا کہ آپ ﷺ اسے ناپسند فرماتے ہیں۔“
امام طبرانی رحمہ اللہ فرماتے ہیں: ”اس حدیث کو ابن جریج رحمہ اللہ سے عبدالمجید کے سوا کسی نے روایت نہیں کیا۔“

سیدنا عبداللہ بن عمر رضی اللہ عنہما سے روایت ہے کہ نبی کریم ﷺ نے فرمایا: ”میری مسجد میں ایک نماز، مسجد حرام کے سوا دوسری مساجد میں ایک ہزار نمازوں کے برابر ہے۔“
امام طبرانی رحمہ اللہ فرماتے ہیں: ”اس حدیث کو یزید بن ابراہیم سے عبدالملک جدی کے سوا کسی نے روایت نہیں کیا، اور احمد بن شیبان اس کے روایت کرنے میں منفرد ہیں۔“

سیدنا عبداللہ بن مسعود رضی اللہ عنہ سے روایت ہے کہ نبی کریم ﷺ انہیں سکھاتے تھے کہ جب بیوی اپنے شوہر کے پاس (رخصت ہو کر) آئے تو شوہر کھڑا ہو اور بیوی اس کے پیچھے کھڑی ہو، پھر دونوں دو رکعت نماز پڑھیں اور شوہر یہ دعا کرے: «اللَّهُمَّ بَارِكْ لِي فِي أَهْلِي، وَبَارِكْ لِأَهْلِي فِيَّ، اللَّهُمَّ ارْزُقْهُمْ مِنِّي، وَارْزُقْنِي مِنْهُمْ، اللَّهُمَّ اجْمَعْ بَيْنَنَا مَا جَمَعْتَ فِي خَيْرٍ، وَفَرِّقْ بَيْنَنَا إِذَا فَرَّقْتَ إِلَى خَيْرٍ» ”اے اللہ! میرے لیے میری بیوی میں برکت دے اور میری بیوی کے لیے مجھ میں برکت دے۔ اے اللہ! انہیں میری طرف سے رزق عطا فرما اور مجھے ان کی طرف سے رزق عطا فرما۔ اے اللہ! جب تک تو ہمیں اکٹھا رکھے بھلائی کے ساتھ اکٹھا رکھ، اور جب جدا کرے تو بھلائی کی طرف جدا کر۔“

سیدنا عبداللہ بن مسعود رضی اللہ عنہ نے فرمایا: ”رسول اللہ ﷺ نے جنازوں پر سات، پانچ اور چار تکبیریں کہی ہیں، لہٰذا جب تم کسی کو امام بناؤ تو جتنی تکبیریں امام کہے تم بھی اتنی ہی کہو۔“
امام طبرانی رحمہ اللہ فرماتے ہیں: ”ان دونوں حدیثوں کو عطاء سے حسین بن واقد کے سوا کسی نے روایت نہیں کیا۔“

سیدنا جبیر بن مطعم رضی اللہ عنہ بیان کرتے ہیں کہ رسول اللہ ﷺ اپنے صحابہ رضی اللہ عنہم سے فرماتے تھے: ”ہمارے ساتھ بنو واقف کے ہاں چلو، ہم بصیر کی عیادت کریں“ حالانکہ وہ نابینا تھے۔
امام طبرانی رحمہ اللہ فرماتے ہیں: ”اس حدیث کو سفیان سے، انہوں نے عمرو سے، انہوں نے محمد سے، انہوں نے اپنے والد سے متصل بیان کرنے والے صرف محمد بن یونس جمال ہیں۔“
اور اسے حسین جعفی نے ابن عیینہ سے، انہوں نے عمرو بن دینار سے، انہوں نے سیدنا جابر رضی اللہ عنہما سے روایت کیا ہے۔

سیدنا ابو سعید خدری رضی اللہ عنہ سے روایت ہے کہ رسول اللہ ﷺ نے حنتم اور نقیر (کے برتنوں میں نبیذ بنانے) سے منع فرمایا۔
امام طبرانی رحمہ اللہ فرماتے ہیں: ”اس حدیث کو مثنیٰ سے ابو داود کے سوا کسی نے روایت نہیں کیا۔“

سیدنا عبداللہ بن عباس رضی اللہ عنہما سے روایت ہے کہ نبی کریم ﷺ نے نماز پڑھی تو آپ ﷺ کے جوتوں میں مٹی کے نشان تھے اور آپ ﷺ پر ایک چادر تھی، چنانچہ آپ ﷺ اس بات سے بچنے لگے کہ (وہ مٹی) چادر کو لگ جائے۔
امام طبرانی رحمہ اللہ فرماتے ہیں: ”اس حدیث کو عطاء سے عبدالرحمن کے سوا کسی نے روایت نہیں کیا، اس میں ابو علی حنفی منفرد ہیں۔“

سیدنا ابوہریرہ رضی اللہ عنہ سے روایت ہے کہ نبی کریم ﷺ سے مشرکین کے بچوں کے بارے میں پوچھا گیا تو آپ ﷺ نے فرمایا: ”اللہ بہتر جانتا ہے کہ وہ (بڑے ہو کر) کیا عمل کرنے والے تھے۔“
امام طبرانی رحمہ اللہ فرماتے ہیں: ”اس حدیث کو عثام سے حسین بن قزعہ کے سوا کسی نے روایت نہیں کیا۔“
دار الحرمین کے نسخے میں اسی طرح ہے، جبکہ درست (حسن بن قزعہ) ہے۔

محمد بن عبید اللہ رحمہ اللہ بیان کرتے ہیں: ”ہم مسجد میں سیدنا ابو سعید خدری رضی اللہ عنہ کے پاس تھے کہ ایک آدمی نے تیروں کو الٹنا پلٹنا شروع کر دیا، تو سیدنا ابو سعید رضی اللہ عنہ نے فرمایا: ”کیا اسے معلوم نہیں تھا کہ رسول اللہ ﷺ نے مسجد میں ہتھیار الٹنے پلٹنے اور اسے (میان سے) سونتنے سے منع فرمایا ہے؟““
امام طبرانی رحمہ اللہ فرماتے ہیں: ”اس حدیث کو ابو البلاد سے مروان کے سوا کسی نے روایت نہیں کیا۔“

سیدنا ابوہریرہ رضی اللہ عنہ بیان کرتے ہیں کہ رسول اللہ ﷺ نے فرمایا: ”تمہارے پاس اہلِ یمن آئے ہیں، وہ نرم دل لوگ ہیں۔ ایمان یمنی ہے، فقہ (دین کی سمجھ) یمنی ہے اور حکمت یمنی ہے۔ خبردار! سکون و وقار بکریوں والوں میں ہے، اور خبردار! تکبر اور فخر گھوڑوں اور اونٹوں والوں میں ہے، اور بلند آواز سے چیخنے چلانے والے خیمہ نشین (اون کے خیموں میں رہنے والے) لوگوں میں ہے۔“
امام طبرانی رحمہ اللہ فرماتے ہیں: ”اس حدیث کو عتبہ بن ابی حکیم سے بقیہ کے سوا کسی نے روایت نہیں کیا۔“

سیدنا ابو موسیٰ رضی اللہ عنہ بیان کرتے ہیں کہ رسول اللہ ﷺ نے فرمایا: ”جس نے پانسوں (نرد/چوسر) سے کھیلا، اس نے اللہ اور اس کے رسول کی نافرمانی کی۔“
امام طبرانی رحمہ اللہ فرماتے ہیں: ”اس حدیث کو موسیٰ سے ضحاک کے سوا کسی نے روایت نہیں کیا، اس میں عبدالرحمن منفرد ہیں۔“
دار الحرمین کے نسخے میں اسی طرح ہے، جبکہ درست (موسیٰ بن میسرہ) ہے، جیسا کہ امام مالک رحمہ اللہ کے ہاں ہے، اور انہی کے طریق سے امام احمد، امام ابو داود رحمہما اللہ وغیرہ نے روایت کیا ہے، اور ان کا ترجمہ (حالات) تہذیب الکمال اور تہذیب التہذیب میں دیکھا جائے۔

سیدنا ابوہریرہ رضی اللہ عنہ سے روایت ہے کہ رسول اللہ ﷺ نے فرمایا: ”اپنی ڈھالیں پکڑ لو، اپنی ڈھالیں پکڑ لو۔“
صحابہ کرام رضی اللہ عنہم نے عرض کیا: ”اے اللہ کے رسول! کیا کوئی دشمن آ پہنچا ہے؟“ آپ ﷺ نے فرمایا: ”نہیں، بلکہ (یہ ڈھال) جہنم کی آگ سے بچاؤ کے لیے ہے، تم یہ کہا کرو: «سُبْحَانَ اللهِ، وَالْحَمْدُ لِلهِ، وَلَا إِلَهَ إِلَّا اللهُ، وَاللهُ أَكْبَرُ» (اللہ پاک ہے، تمام تعریفیں اللہ کے لیے ہیں، اللہ کے سوا کوئی معبود نہیں اور اللہ سب سے بڑا ہے)، کیونکہ یہ کلمات قیامت کے دن آگے آگے اور دائیں بائیں (محافظ بن کر) آئیں گے، اور یہی ”باقیات صالحات“ (باقی رہنے والی نیکیاں) ہیں۔“
امام طبرانی رحمہ اللہ فرماتے ہیں: ”اس حدیث کو محمد بن عجلان رحمہ اللہ سے صرف عبدالعزیز رحمہ اللہ نے روایت کیا ہے، اور عبدالعزیز رحمہ اللہ سے صرف ابو عمر حوضی رحمہ اللہ اور ابن بلال رحمہ اللہ نے روایت کیا ہے۔“

ام المومنین سیدہ عائشہ رضی اللہ عنہا بیان کرتی ہیں کہ ایک شخص رسول اللہ ﷺ کے پاس آیا تو آپ ﷺ نے اسے اپنے قریب کیا اور اپنی مجلس میں اسے اپنے نزدیک بٹھایا۔ جب وہ آپ ﷺ کے پاس سے چلا گیا تو میں نے عرض کیا: ”اے اللہ کے رسول! کیا آپ اس شخص کی (برائی کی) شکایت نہیں کیا کرتے تھے؟“ آپ ﷺ نے فرمایا: ”کیوں نہیں! لیکن یہ ان بدترین لوگوں میں سے ہے جن کے شر سے بچنے کے لیے ان کی عزت کی جاتی ہے۔“
امام طبرانی رحمہ اللہ فرماتے ہیں: ”اس حدیث کو اعمش رحمہ اللہ سے صرف شریک رحمہ اللہ نے روایت کیا ہے۔“

صلت بن ایاس حنفی رحمہ اللہ بیان کرتے ہیں کہ میں اور امیہ بن عبداللہ بن خالد بن اسید رحمہ اللہ سیدنا ابن عمر رضی اللہ عنہما کے پاس آئے تو میں نے عرض کیا: ”اے ابو عبدالرحمن! رسول اللہ ﷺ وتر کب ادا فرمایا کرتے تھے؟“ انہوں نے فرمایا: ”رات کے آخری حصے میں۔“
امام طبرانی رحمہ اللہ فرماتے ہیں: ”اس حدیث کو صلت بن ایاس رحمہ اللہ سے صرف عبدالمومن رحمہ اللہ نے روایت کیا ہے، اور ابو تمیلہ رحمہ اللہ اس روایت میں منفرد ہیں۔“

ام المومنین سیدہ ام حبیبہ رضی اللہ عنہا بیان کرتی ہیں کہ میں نے رسول اللہ ﷺ کو فرماتے ہوئے سنا: ”مشرق کی جانب سے کچھ لوگ نکلیں گے جو بیت اللہ کے پاس موجود ایک شخص (کو قتل کرنے یا اس سے لڑنے) کا ارادہ رکھتے ہوں گے، یہاں تک کہ جب وہ زمین کے ایک چٹیل میدان میں پہنچیں گے تو انہیں زمین میں دھنسا دیا جائے گا، پھر جو لوگ ان سے پیچھے رہ گئے ہوں گے وہ بھی ان سے آ ملیں گے تو انہیں بھی وہی کچھ پہنچے گا جو ان کو پہنچا۔“ میں نے عرض کیا: ”اے اللہ کے رسول! اس شخص کا کیا ہوگا جسے زبردستی (ان کے ساتھ) نکالا گیا ہو؟“ آپ ﷺ نے فرمایا: ”اسے بھی وہی کچھ پہنچے گا جو (دوسرے) لوگوں کو پہنچا، پھر اللہ تعالیٰ ہر شخص کو اس کی نیت کے مطابق اٹھائے گا۔“
امام طبرانی رحمہ اللہ فرماتے ہیں: ”اس حدیث کو ابو جراح رحمہ اللہ سے صرف محمد بن ابراہیم رحمہ اللہ نے روایت کیا ہے، اور محمد رحمہ اللہ سے صرف محمد بن اسحاق رحمہ اللہ نے، اور سلمہ بن فضل رحمہ اللہ اس روایت میں منفرد ہیں۔“

سیدنا ابن عمر رضی اللہ عنہما سے روایت ہے کہ رسول اللہ ﷺ نے فرمایا: ”جو شخص تم سے اللہ کے نام پر مانگے اسے دے دو، اور جو تم سے اللہ کی پناہ مانگے اسے پناہ دو، اور جو تمہیں دعوت دے اس کی دعوت قبول کرو، اور جو تمہیں بکری کا پایہ (ہی) ہدیہ کرے اسے بھی قبول کر لو۔“
امام طبرانی رحمہ اللہ فرماتے ہیں: ”اس حدیث کو حصین رحمہ اللہ سے صرف ابو جعفر رحمہ اللہ نے روایت کیا ہے، اور سلمہ بن فضل رحمہ اللہ اس روایت میں منفرد ہیں۔“

سیدنا بریدہ رضی اللہ عنہ سے روایت ہے کہ رسول اللہ ﷺ نے وضو کیا، موزوں پر مسح کیا اور تمام نمازیں ایک ہی وضو سے ادا کیں، تو سیدنا عمر رضی اللہ عنہ نے آپ ﷺ سے عرض کیا: ”آپ نے آج ایسا کام کیا ہے جو آپ پہلے نہیں کیا کرتے تھے؟“ آپ ﷺ نے فرمایا: ”اے عمر! میں نے یہ کام جان بوجھ کر کیا ہے۔“

عمرو بن شعیب رحمہ اللہ اپنے والد سے اور وہ اپنے دادا (سیدنا عبداللہ بن عمرو رضی اللہ عنہما) سے روایت کرتے ہیں کہ نبی کریم ﷺ نے اس بات سے منع فرمایا کہ عورت سے اس کی پھوپھی یا اس کی خالہ کے ہوتے ہوئے نکاح کیا جائے۔
امام طبرانی رحمہ اللہ فرماتے ہیں: ”یہ دونوں حدیثیں عمرو (بن قیس) سے اس سند کے ساتھ صرف اسماعیل بن بہرام ہی نے روایت کی ہیں، وہ ان دونوں کے روایت کرنے میں منفرد ہیں۔“

سیدنا حبیب بن مسلمہ رضی اللہ عنہ بیان کرتے ہیں: ”میں ایک غزوے میں نبی کریم ﷺ کے ساتھ موجود تھا، آپ ﷺ نے روانگی کے وقت (حاصل ہونے والے مال میں سے) چوتھائی اور واپسی کے وقت تہائی حصہ بطورِ نفل (اضافی انعام) عطا فرمایا۔“
امام طبرانی رحمہ اللہ فرماتے ہیں: ”اس حدیث کو سعید سے، انہوں نے عطیہ سے صرف زید نے روایت کیا ہے، جبکہ عبدالرزاق وغیرہ نے اسے سعید بن عبدالعزیز سے، انہوں نے مکحول سے روایت کیا ہے۔“

سیدنا عبدالرحمن بن سمرہ رضی اللہ عنہ بیان کرتے ہیں کہ رسول اللہ ﷺ نے فرمایا: ”اللہ تمہیں ان حکمرانوں سے محفوظ رکھے جو میرے بعد ہوں گے۔“ انہوں نے عرض کیا: ”اے اللہ کے رسول! وہ کون ہوں گے؟“ آپ ﷺ نے فرمایا: ”جو شخص ان کے پاس جائے، ان کے جھوٹ میں ان کی تصدیق کرے اور ان کے ظلم میں ان کی مدد کرے، تو وہ مجھ سے نہیں ہے اور نہ ہی وہ میرے حوض پر آئے گا۔ اے عبدالرحمن! جان لو کہ روزہ ڈھال ہے اور نماز دلیل (نورِ برہان) ہے۔ اے عبدالرحمن بن سمرہ! اللہ تعالیٰ نے میرے لیے یہ بات طے فرما دی ہے کہ وہ گوشت جنت میں داخل نہیں ہوگا جو حرام مال سے پروان چڑھا ہو، آگ ہی اس کے زیادہ لائق ہے۔“
امام طبرانی رحمہ اللہ فرماتے ہیں: ”اس حدیث کو قتادہ سے صرف سعید بن بشیر نے روایت کیا ہے اور سعید سے صرف زید بن یحییٰ نے، اور اس کی روایت میں علی بن معبد منفرد ہیں۔“

سیدنا جابر بن سمرہ رضی اللہ عنہ بیان کرتے ہیں: ”رسول اللہ ﷺ فجر کی نماز میں سورۂ واقعہ اور اسی طرح کی دوسری سورتیں پڑھا کرتے تھے۔“
امام طبرانی رحمہ اللہ فرماتے ہیں: ”اس حدیث کو سماک سے صرف اسرائیل نے روایت کیا ہے اور اسرائیل سے صرف سلمہ بن رجاء نے، اور اس کی روایت میں یعقوب بن حمید منفرد ہیں۔“

سیدنا ابوذر رضی اللہ عنہ سے روایت ہے کہ رسول اللہ ﷺ نے صدقات جمع کرنے کا حکم دیا، تو لوگ اپنے اپنے مال کے حساب سے اپنا صدقہ لانے لگے، (یہ دیکھ کر) میں رو پڑا۔ آپ ﷺ نے فرمایا: ”اے ابوذر! تم کیوں رو رہے ہو؟“ میں نے عرض کیا: ”مال دار لوگ تو سارا اجر لے گئے۔“ آپ ﷺ نے فرمایا: ”وہ کیسے؟“ میں نے عرض کیا: ”وہ بھی ہماری طرح نماز پڑھتے ہیں اور ہماری طرح روزے رکھتے ہیں، مگر انھیں صدقہ کرنے کے لیے مال میسر ہے اور ہمیں میسر نہیں۔“ تو آپ ﷺ نے فرمایا: ”بلکہ زیادہ مال والے ہی (قیامت کے دن) پست درجے والے ہوں گے، سوائے اس کے جس نے مال کو یوں یوں (دائیں بائیں، دونوں ہاتھوں سے) خرچ کیا، اور ایسے لوگ بہت کم ہیں۔“
میں نے عرض کیا: ”اللہ کے رسول! وہ کیسے؟“ آپ ﷺ نے فرمایا: ”جس اونٹوں والے نے ان کی زکوٰۃ ادا نہ کی، خواہ وہ دودھ کی فراوانی اور آسانی کی حالت میں ہوں یا سختی و تنگی کی حالت میں، تو وہ اونٹ قیامت کے دن ایک ہموار کشادہ میدان میں آئیں گے اور اپنے کھروں سے اسے روندیں گے، جب ان کا پہلا حصہ گزر جائے گا تو آخری حصہ پھر اس پر لوٹ آئے گا، یہاں تک کہ لوگوں کے درمیان فیصلہ کر دیا جائے۔“ میں نے عرض کیا: ”اللہ کے رسول! گھوڑوں کا کیا حکم ہے؟“ آپ ﷺ نے فرمایا: ”گھوڑے تین طرح کے لوگوں کے لیے ہیں: جس نے انھیں اللہ کی راہ میں (جہاد کی) تیاری کے لیے رکھا، تو ان کی تنگی اور آسانی (کی ہر حالت) اس کے لیے (اجر کا باعث) ہے، اور اللہ کی قسم! اگر وہ گھوڑا کشادہ میدان طے کرتا ہوا ایک دو ٹیلوں پر دوڑ کر چڑھے اور پھر کسی سرسبز چراگاہ میں اترے (تو اس کا سارا اجر اس مالک کو ملتا ہے)، اور جس نے انھیں اِترانے اور فخر و غرور کے لیے رکھا تو وہ قیامت کے دن اس کے لیے وبال بن جائیں گے۔“ صحابہ کرام رضی اللہ عنہم نے عرض کیا: ”اللہ کے نبی! گدھوں کا کیا حکم ہے؟“ آپ ﷺ نے فرمایا: ”ان کے بارے میں اللہ تعالیٰ نے کوئی خاص حکم نازل نہیں فرمایا، سوائے اس بے مثال جامع آیت کے: ﴿فَمَنْ يَعْمَلْ مِثْقَالَ ذَرَّةٍ خَيْرًا يَرَهُ ۞ وَمَنْ يَعْمَلْ مِثْقَالَ ذَرَّةٍ شَرًّا يَرَهُ﴾ ”پھر جو کوئی ذرہ برابر نیکی کرے گا وہ اسے دیکھ لے گا، اور جو کوئی ذرہ برابر برائی کرے گا وہ اسے دیکھ لے گا۔““
امام طبرانی رحمہ اللہ فرماتے ہیں: ”اس حدیث کو جیفر بن حکم سے ابو احمد زبیری کے سوا کسی نے روایت نہیں کیا، اور ان سے روایت کرنے میں ان کے بیٹے طاہر منفرد ہیں۔“

ام المومنین سیدہ ام سلمہ رضی اللہ عنہا بیان کرتی ہیں: ”میرے اور رسول اللہ ﷺ کے لیے (غسل کے واسطے) ایک ہی برتن رکھا جاتا تھا، جس میں تقریباً آدھے فرق کے برابر پانی ہوتا تھا، آپ ﷺ مجھ سے پہلے (پانی لینا) شروع کرتے، پھر ہم دونوں اکٹھے غسل کرتے تھے۔“
امام طبرانی رحمہ اللہ فرماتے ہیں: ”اس حدیث کو علی بن حکم سے سعید بن زید کے سوا کسی نے روایت نہیں کیا۔“

سیدنا جابر رضی اللہ عنہما سے روایت ہے کہ رسول اللہ ﷺ نے سورج کو حکم دیا تو وہ دن کے وقت میں سے ایک گھڑی بھر پیچھے ہٹ گیا۔
امام طبرانی رحمہ اللہ فرماتے ہیں: ”اس حدیث کو معقل سے ولید کے سوا کسی نے روایت نہیں کیا، اور ولید سے روایت کرنے میں احمد بن عبدالرحمن منفرد ہیں، نیز اسے ابو الزبیر سے معقل کے سوا کسی نے روایت نہیں کیا۔“

سیدنا علی رضی اللہ عنہ نے فرمایا: ”عیدین کے لیے کھلے میدان (صحرا) کی طرف نکلنا سنت میں سے ہے۔“

سیدنا علی رضی اللہ عنہ نے فرمایا: ”عیدین کی نماز میں بلند آواز سے قراءت کرنا سنت میں سے ہے۔“
امام طبرانی رحمہ اللہ فرماتے ہیں: ”ان دونوں حدیثوں کو مطرف سے عمرو بن ابی قیس کے سوا کسی نے روایت نہیں کیا۔“
دار الحرمین کے نسخے میں اسی طرح ہے، اور غالباً درست (محمد بن سہل بن زنجلہ) ہے، یا پھر (علی بن) کا لفظ زائد ہے، اس اشکال پر تنبیہ کی گئی ہے، واللہ اعلم۔

سیدنا جریر بن عبداللہ رضی اللہ عنہ بیان کرتے ہیں: ”میں سورۃ المائدہ کے نازل ہونے کے بعد اسلام لایا تھا، اور اسلام لانے کے بعد میں نے رسول اللہ ﷺ کو (موزوں پر) مسح کرتے دیکھا ہے۔“
امام طبرانی رحمہ اللہ فرماتے ہیں: ”اس حدیث کو مجاہد رحمہ اللہ سے صرف عبد الکریم نے روایت کیا ہے، اور عبد الکریم سے صرف زیاد بن عبداللہ نے، اور زیاد سے صرف ابو النضر نے روایت کیا ہے، اور ابوبکر بن ابی النضر اس روایت میں منفرد ہیں۔“

میمون بن ابی شبیب رحمہ اللہ سے روایت ہے کہ سیدنا علی رضی اللہ عنہ نے کچھ غلام بیچے اور ایک عورت اور اس کے بیٹے کے درمیان جدائی ڈال دی، تو رسول اللہ ﷺ نے انہیں اس سے منع فرمایا اور وہ بیع رد کر دی۔
امام طبرانی رحمہ اللہ فرماتے ہیں: ”اس حدیث کو ابو خالد سے صرف عبد السلام نے روایت کیا ہے۔“

سیدنا انس بن مالک رضی اللہ عنہ سے روایت ہے کہ نبی کریم ﷺ نے فرمایا: ”قریب ہے کہ حسد تقدیر پر سبقت لے جائے، اور قریب ہے کہ محتاجی کفر تک پہنچا دے۔“
امام طبرانی رحمہ اللہ فرماتے ہیں: ”اس حدیث کو سلیمان سے صرف عیسیٰ نے روایت کیا ہے، اور عیسیٰ سے صرف عمرو بن عثمان نے، اور احمد بن محمد الکاتب اس روایت میں منفرد ہیں۔“

سیدنا علی رضی اللہ عنہ سے روایت ہے کہ رسول اللہ ﷺ منبر پر ﴿قُلْ يَا أَيُّهَا الْكَافِرُونَ﴾ اور ﴿قُلْ هُوَ اللَّهُ أَحَدٌ﴾ پڑھا کرتے تھے۔
امام طبرانی رحمہ اللہ فرماتے ہیں: ”اس حدیث کو سفیان سے صرف ابراہیم بن خالد نے روایت کیا ہے، اور اسحاق بن زریق اس روایت میں منفرد ہیں۔“

سیدنا جابر رضی اللہ عنہما سے روایت ہے کہ نبی کریم ﷺ نے فرمایا: ”اس امت کے مجوسی وہ لوگ ہیں جو تقدیر کو جھٹلاتے ہیں۔“
امام طبرانی رحمہ اللہ فرماتے ہیں: ”اس حدیث کو ابن جریج سے صرف اوزاعی نے روایت کیا ہے، اور بقیہ اس روایت میں منفرد ہیں۔“

سیدنا قیس بن حارث رضی اللہ عنہ سے روایت ہے کہ وہ مسلمان ہوئے تو ان کے نکاح میں آٹھ بیویاں تھیں، چنانچہ رسول اللہ ﷺ نے انہیں حکم دیا کہ ان میں سے چار کو منتخب کر لیں۔
امام طبرانی رحمہ اللہ فرماتے ہیں: ”اس حدیث کو مختار بن فلفل رحمہ اللہ سے عیسیٰ بن یونس رحمہ اللہ کے سوا کسی نے روایت نہیں کیا، اور اس میں سری بن عاصم رحمہ اللہ منفرد ہیں۔“
دار الحرمین کے نسخے میں اسی طرح ہے، جبکہ درست (ابن ابی لیلیٰ) ہے، جیسا کہ تخریج کے مصادر میں ہے۔

سیدنا علی بن ابی طالب رضی اللہ عنہ سے روایت ہے کہ رسول اللہ ﷺ نے فرمایا: ”عورتوں کے لیے راستے کے عین وسط میں چلنے کا کوئی حصہ نہیں، وہ راستے کے کناروں کو اختیار کریں اور بیچ راستے میں نہ چلیں۔“
امام طبرانی رحمہ اللہ فرماتے ہیں: ”اس حدیث کو عبید بن عمیر رحمہ اللہ سے شریک رحمہ اللہ کے سوا کسی نے روایت نہیں کیا، اور شریک سے محمد بن طلحہ رحمہ اللہ کے سوا کسی نے روایت نہیں کیا، اور اس میں عبدالعزیز رحمہ اللہ منفرد ہیں، نیز سیدنا علی رضی اللہ عنہ سے یہ روایت اسی سند کے سوا مروی نہیں۔“

سیدنا کعب بن عجرہ رضی اللہ عنہ سے روایت ہے کہ سیدنا سلمان رضی اللہ عنہ نے بیان کیا کہ میں نے رسول اللہ ﷺ کو فرماتے ہوئے سنا: ”اللہ کی راہ میں ایک دن سرحد کی نگہبانی کرنا ایک مہینے کے روزوں اور قیام سے بہتر ہے، اور جو شخص اللہ کی راہ میں سرحد کی نگہبانی کی حالت میں فوت ہو جائے اسے قبر کے فتنے سے پناہ دے دی جاتی ہے اور قیامت کے دن تک اس کے نیک عمل کا اجر جاری رہتا ہے۔“
امام طبرانی رحمہ اللہ فرماتے ہیں: ”اس حدیث کو کعب بن عجرہ رضی اللہ عنہ سے عبادہ بن نسی رحمہ اللہ کے سوا کسی نے روایت نہیں کیا، اور عبادہ سے ہشام بن غاز رحمہ اللہ کے سوا کسی نے روایت نہیں کیا، اور اس میں ولید رحمہ اللہ منفرد ہیں۔“

سیدنا ابوہریرہ رضی اللہ عنہ سے روایت ہے کہ رسول اللہ ﷺ نے فرمایا: ”ہر بچہ فطرت (اسلام) پر پیدا ہوتا ہے، پھر اس کے ماں باپ اسے یہودی یا نصرانی بنا دیتے ہیں، جیسے جانور صحیح سالم بچہ جنم دیتا ہے، کیا تم اس میں کوئی کان کٹا پاتے ہو؟ (نہیں) یہاں تک کہ تم خود اس کے کان کاٹ دیتے ہو۔“
امام طبرانی رحمہ اللہ فرماتے ہیں: ”اس حدیث کو عمار بن ابی عمار رحمہ اللہ سے یزید بن ابی عبید رحمہ اللہ کے سوا کسی نے روایت نہیں کیا، اور اس میں عبدالوارث رحمہ اللہ منفرد ہیں۔“

سیدنا جندب رضی اللہ عنہ بیان کرتے ہیں کہ جب خوارج سیدنا علی رضی اللہ عنہ سے جدا ہو گئے تو آپ ان کی تلاش میں نکلے اور ہم بھی آپ کے ساتھ نکلے، یہاں تک کہ ہم اس گروہ کے لشکر تک جا پہنچے۔ وہاں قرآن کی تلاوت سے شہد کی مکھیوں کی بھنبھناہٹ جیسی گونج تھی، اور ان میں سجدوں کے گٹوں والے اور اونچی ٹوپیوں والے چوغے پہنے ہوئے لوگ تھے۔ جب میں نے انہیں دیکھا تو میرے دل میں شک پیدا ہو گیا، چنانچہ میں ایک طرف ہو گیا، اپنا نیزہ گاڑ دیا، گھوڑے سے اتر گیا، ڈھال رکھ دی، اس پر اپنی زرہ ڈال دی، اپنے گھوڑے کی لگام تھام لی اور اپنے نیزے کی طرف رخ کر کے نماز پڑھنے کھڑا ہو گیا، اور نماز میں یہ کہہ رہا تھا: «اللَّهُمَّ إِنْ كَانَ قِتَالُ هَؤُلَاءِ الْقَوْمِ لَكَ طَاعَةً فَائْذَنْ فِيهِ، وَإِنْ كَانَ مَعْصِيَةً فَأَرِنِي بَرَاءَتَكَ» ”اے اللہ! اگر ان لوگوں سے لڑنا تیری اطاعت ہے تو مجھے اس کی اجازت دے، اور اگر یہ نافرمانی ہے تو مجھے اپنی بیزاری دکھا دے۔“ میں اسی حال میں تھا کہ سیدنا علی رضی اللہ عنہ رسول اللہ ﷺ کے خچر پر سوار آ پہنچے، اور جب میرے برابر پہنچے تو فرمایا: ”اے جندب! شک سے اللہ کی پناہ مانگو۔“ میں دوڑتا ہوا آپ کے پاس آیا، آپ اتر کر نماز پڑھنے کھڑے ہو گئے۔ اتنے میں ایک شخص ترکی گھوڑے پر سوار اسے دوڑاتا ہوا آیا اور کہا: «يَا أَمِيرَ الْمُؤْمِنِينَ» ”اے امیر المومنین!“ آپ نے فرمایا: ”کیا چاہتے ہو؟“ اس نے کہا: ”کیا آپ کو اس گروہ سے کوئی کام ہے؟“ فرمایا: ”وہ کیا؟“ اس نے کہا: ”وہ نہر پار کر کے چلے گئے ہیں۔“ آپ نے فرمایا: ”انہوں نے اسے پار نہیں کیا۔“ میں نے کہا: «سُبْحَانَ اللهِ» ”اللہ پاک ہے!“ پھر ایک اور شخص آیا جو پہلے سے بڑھ کر تیزی سے آیا اور کہا: «يَا أَمِيرَ الْمُؤْمِنِينَ» ”اے امیر المومنین!“ آپ نے فرمایا: ”کیا چاہتے ہو؟“ اس نے کہا: ”کیا آپ کو اس گروہ سے کوئی کام ہے؟“ فرمایا: ”وہ کیا؟“ اس نے کہا: ”وہ نہر پار کر کے چلے گئے ہیں۔“ میں نے کہا: «اللهُ أَكْبَرُ» ”اللہ سب سے بڑا ہے!“ تو سیدنا علی رضی اللہ عنہ نے فرمایا: ”انہوں نے اسے پار نہیں کیا۔“ پھر ایک اور شخص اپنا گھوڑا سرپٹ دوڑاتا ہوا آیا اور کہا: «يَا أَمِيرَ الْمُؤْمِنِينَ» ”اے امیر المومنین!“ آپ نے فرمایا: ”کیا چاہتے ہو؟“ اس نے کہا: ”کیا آپ کو اس گروہ سے کوئی کام ہے؟“ فرمایا: ”وہ کیا؟“ اس نے کہا: ”وہ نہر پار کر گئے ہیں۔“ تو سیدنا علی رضی اللہ عنہ نے فرمایا: ”انہوں نے اسے پار نہیں کیا اور نہ کبھی پار کریں گے، وہ اسی کے اس طرف مارے جائیں گے، یہ اللہ اور اس کے رسول ﷺ کی طرف سے کیا ہوا وعدہ ہے۔“
میں نے کہا: «اللهُ أَكْبَرُ» ”اللہ سب سے بڑا ہے!“ پھر میں کھڑا ہوا اور آپ کے لیے رکاب تھام لی، آپ اپنے گھوڑے پر سوار ہو گئے۔ پھر میں اپنی زرہ کی طرف لوٹا اور اسے پہن لیا، پھر اپنے گھوڑے پر سوار ہوا، رکاب میں پاؤں رکھا اور آپ کے ساتھ ساتھ چلنے لگا۔ آپ نے مجھ سے فرمایا: ”اے جندب!“ میں نے عرض کیا: ”حاضر ہوں، اے امیر المومنین!“ فرمایا: ”میں ان کی طرف ایک ایسے آدمی کو بھیجوں گا جو مصحف پڑھتا ہوا انہیں ان کے رب کی کتاب اور ان کے نبی ﷺ کی سنت کی طرف بلائے گا، مگر وہ ہماری طرف منہ پھیر کر لوٹنے بھی نہ پائے گا کہ وہ اسے تیروں سے چھلنی کر دیں گے۔ اے جندب! سن لو، ہمارے دس آدمی بھی قتل نہ ہوں گے اور ان کے دس آدمی بھی بچ کر نہ جائیں گے۔“
پھر ہم اس گروہ کے پاس پہنچے، وہ اپنے اسی پڑاؤ میں تھے جہاں وہ ٹھہرے ہوئے تھے، اپنی جگہ سے ہٹے نہیں تھے۔ سیدنا علی رضی اللہ عنہ نے اپنے ساتھیوں کو آواز دی اور ان کی صف بندی کی، پھر صف کے اس سرے سے اس سرے تک دو مرتبہ گئے اور فرماتے جاتے تھے: ”کون ہے جو یہ مصحف لے کر ان لوگوں کی طرف جائے اور انہیں ان کے رب کی کتاب اور ان کے نبی ﷺ کی سنت کی طرف بلائے، حالانکہ وہ قتل کر دیا جائے گا اور اس کے لیے جنت ہے؟“ تو بنو عامر بن صعصعہ کے ایک نوجوان کے سوا کسی نے جواب نہ دیا۔ سیدنا علی رضی اللہ عنہ نے جب اس کی کم عمری دیکھی تو اس سے فرمایا: ”اپنی جگہ پر لوٹ جاؤ۔“ پھر آپ نے دوسری بار پکارا تو اس نوجوان کے سوا کوئی نہ نکلا، پھر تیسری بار پکارا تو بھی اس نوجوان کے سوا کوئی نہ نکلا۔ تب سیدنا علی رضی اللہ عنہ نے اس سے فرمایا: ”لے لو۔“ اس نے مصحف لے لیا۔ آپ نے فرمایا: ”سنو! تم قتل کر دیے جاؤ گے، اور تم ہماری طرف منہ کر کے لوٹ بھی نہ سکو گے کہ وہ تمہیں تیروں سے چھلنی کر دیں گے۔“ چنانچہ وہ نوجوان مصحف لیے ہوئے ان لوگوں کی طرف چل پڑا، اور جب ان کے اتنا قریب پہنچا کہ وہ اس کی آواز سن سکتے تھے تو وہ لوگ اٹھ کھڑے ہوئے اور اس کے لوٹنے سے پہلے ہی جنگ چھیڑ دی۔ ایک شخص نے اسے تیر مارا تو اس نے ہماری طرف منہ کیا اور بیٹھ گیا۔ اس پر سیدنا علی رضی اللہ عنہ نے فرمایا: ”اب ان لوگوں پر ٹوٹ پڑو۔“
سیدنا جندب رضی اللہ عنہ نے فرمایا: ”جو شک مجھے لاحق ہوا تھا اس کے بعد میں نے ظہر کی نماز پڑھنے سے پہلے اپنے اسی ہاتھ سے آٹھ آدمی قتل کیے، اور ہمارے دس آدمی قتل نہ ہوئے اور ان کے دس آدمی بچ کر نہ گئے، جیسا کہ آپ نے فرمایا تھا۔“
امام طبرانی رحمہ اللہ فرماتے ہیں: ”اس حدیث کو ابن شبرمہ رحمہ اللہ سے سعید بن خثیم رحمہ اللہ کے سوا کسی نے روایت نہیں کیا، اور اس میں اسحاق بن موسیٰ انصاری رحمہ اللہ منفرد ہیں۔“

ابو مالک اشجعی رحمہ اللہ کے والد سیدنا طارق بن اشیم رضی اللہ عنہ سے روایت ہے کہ رسول اللہ ﷺ نے فرمایا: ”جس نے فجر کی نماز پڑھی وہ اللہ کی ذمہ داری اور حفاظت میں ہے، اور اس کا حساب اللہ کے ذمے ہے۔“
امام طبرانی رحمہ اللہ فرماتے ہیں: ”اس حدیث کو ابو مالک سے اسماعیل کے سوا کسی نے روایت نہیں کیا، اس میں ہیثم بن یمان منفرد ہیں۔“

سیدنا انس بن مالک رضی اللہ عنہ سے روایت ہے کہ رسول اللہ ﷺ نے فرمایا: ”اذان اور اقامت کے درمیان کی جانے والی دعا رد نہیں کی جاتی۔“
امام طبرانی رحمہ اللہ فرماتے ہیں: ”اس حدیث کو عبداللہ بن عیسیٰ سے عمر بن شبیب کے سوا کسی نے روایت نہیں کیا، اس میں ابو ہشام منفرد ہیں۔“