مجمع الزوائد ومنبع الفوائد

سیدنا بریدہ بن حصیب رضی اللہ عنہ بیان کرتے ہیں : میں سیدنا علی رضی اللہ عنہ کو اتنا ناپسند کرتا تھا کہ اتنا کسی اور کو ناپسند نہیں کرتا تھا اور میں قریش سے تعلق رکھنے والے ایک شخص سے محبت رکھتا تھا ، میں اس سے صرف اس وجہ سے محبت رکھتا تھا ، کیونکہ وہ سیدنا علی رضی اللہ عنہ سے بغض رکھتا تھا ۔ راوی بیان کرتے ہیں : نبی اکرم صلی اللہ علیہ وسلم نے اس شخص کو ایک لشکر کا امیر بنا کر بھیجا ، میں بھی اس شخص کے ساتھ رہا اور جتنا عرصہ اس کے ساتھ رہا ، وہ شخص سیدنا علی رضی اللہ عنہ سے بغض ہی رکھتا تھا ، راوی کہتے ہیں : ہمیں کچھ قیدی ملے تو اس امیر نے نبی اکرم صلی اللہ علیہ وسلم کو خط لکھا کہ آپ ہماری طرف کسی ایسے شخص کو بھیجیں جو اس میں سے خمس وصول کر لے ، راوی کہتے ہیں : تو نبی اکرم صلی اللہ علیہ وسلم نے سیدنا علی رضی اللہ عنہ کو ہماری طرف بھیجا ، قیدیوں میں ایک کنیز تھی جو ان قیدیوں میں سب سے بہتر تھی ، راوی کہتے ہیں : سیدنا علی رضی اللہ عنہ نے خمس الگ کیا اور مال کو تقسیم کر دیا ، ایک دن وہ باہر تشریف لائے تو ان کے سر سے پانی کے قطرے ٹپک رہے تھے ، ہم نے دریافت کیا : اے ابوالحسن اس کی وجہ کیا ہے ؟ انہوں نے فرمایا : تم نے قیدیوں میں موجود اس کنیز کو نہیں دیکھا تھا ، جب میں نے تقسیم کیا اور خمس الگ کیا ، تو وہ کنیز خمس میں آ گئی ، پھر وہ کنیز نبی اکرم صلی اللہ علیہ وسلم کے اہل بیت کے حصے میں آ گئی اور پھر وہ آل علی کے حصے میں آ گئی ، تو میں نے اس کنیز کے ساتھ صحبت کر لی ، راوی کہتے ہیں : تو اس شخص نے نبی اکرم صلی اللہ علیہ وسلم کو خط لکھا ، تو میں نے عرض کی : آپ مجھے زکوۃ وصول کرنے والے کے طور پر بھیجیں ، راوی کہتے ہیں : میں خط پڑھ رہا تھا اور یہ کہہ رہا تھا کہ اس نے ٹھیک کہا: ہے ، راوی کہتے ہیں : نبی اکرم صلی اللہ علیہ وسلم نے میرا ہاتھ اور وہ خط پکڑ لیا اور دریافت کیا : کیا تم علی سے بغض رکھتے ہو ؟ میں نے جواب دیا : جی ہاں ، نبی اکرم صلی اللہ علیہ وسلم نے فرمایا : تم علی سے بغض نہ رکھو اور اگر تم اس سے محبت رکھتے تھے ، تو اس سے زیادہ محبت رکھو ، اس ذات کی قسم ! جس کے دست قدرت میں محمد کی جان ہے ، خمس میں آل علی کا حصہ اس کنیز سے کہیں زیادہ ہے ۔ “ راوی بیان کرتے ہیں : نبی اکرم صلی اللہ علیہ وسلم کے اس فرمان کے بعد کوئی بھی میرے نزدیک سیدنا علی رضی اللہ عنہ سے زیادہ محبوب نہیں رہا ۔ سیدنا بریدہ رضی اللہ عنہ کے صاحبزادے عبداللہ کہتے ہیں : اس ذات کی قسم ! جس کے علاوہ اور کوئی معبود نہیں ہے ، اس روایت میں میرے اور نبی اکرم صلی اللہ علیہ وسلم کے درمیان صرف ایک واسطہ ہے ، اور وہ میرے والد سیدنا بریدہ رضی اللہ عنہ ہیں ۔ ( علامہ ہیثمی فرماتے ہیں : ) میں یہ کہتا ہوں صحیح میں اس روایت کا کچھ حصہ مذکور ہے ۔
یہ روایت امام أحمد نے نقل کی ہے ، اور اس کے رجال ” صحیح “ کے رجال ہیں ، صرف عبدالجلیل بن عطیہ کا معاملہ مختلف ہے ، اور وہ ثقہ ہے ، ویسے اس نے سماع کی صراحت کی ہے ، اور اس میں کمزوری پائی جاتی ہے ۔

سیدنا بریدہ رضی اللہ عنہ بیان کرتے ہیں : نبی اکرم صلی اللہ علیہ وسلم نے یمن کی طرف دو مہمات کو بھیجا ، ان میں سے ایک کے امیر سیدنا علی بن ابوطالب رضی اللہ عنہ تھے اور دوسری کے امیر سیدنا خالد بن ولید رضی اللہ عنہ تھے ، نبی اکرم صلی اللہ علیہ وسلم نے فرمایا : جب تم ایک دوسرے سے ملو ، تو علی سب لوگوں کا امیر ہو گا ، اور جب تم دونوں ایک دوسرے سے جدا ہو جاؤ تو تم میں سے ہر ایک اپنے لشکر کا امیر ہو گا ۔ راوی کہتے ہیں : ہماری ملاقات اہل یمن سے تعلق رکھنے والے بنو زید سے ہوئی ، ہم نے لڑائی کی ، مسلمان مشرکین پر غالب آ گئے ، ہم نے جنگجو افراد کو قتل کر دیا اور بال بچوں کو قیدی بنا لیا ، سیدنا علی رضی اللہ عنہ نے قیدیوں میں سے ایک کنیز اپنے لئے منتخب کر لی ، سیدنا بریدہ رضی اللہ عنہ کہتے ہیں : سیدنا خالد بن ولید رضی اللہ عنہ نے میرے ہاں نبی اکرم صلی اللہ علیہ وسلم کو خط لکھا اور آپ کو اس بارے میں بتایا ، جب میں نبی اکرم صلی اللہ علیہ وسلم کی خدمت میں حاضر ہوا اور وہ خط آپ کے حوالے کیا ، اور وہ خط آپ کے سامنے پڑھا گیا ، تو میں نے نبی اکرم صلی اللہ علیہ وسلم کے چہرے پر ناراضگی کے آثار دیکھے ، میں نے عرض کی : یا رسول اللہ ! یہ پناہ مانگنے والے کا مقام ہے ، آپ نے مجھے ایک شخص کے ساتھ بھیجا اور آپ نے مجھے یہ ہدایت کی کہ میں اس کی اطاعت کروں ، تو میں نے ایسا کیا ، جس حکم کے ہمراہ مجھے بھیجا گیا تھا ، تو نبی اکرم صلی اللہ علیہ وسلم نے فرمایا : ” تم علی پر تنقید نہ کرو کیونکہ وہ مجھ سے ہے اور میں اس سے ہوں ، اور وہ میرے بعد تمہارا ولی ہے ۔ “ ( علامہ ہیثمی فرماتے ہیں : ) میں یہ کہتا ہوں
یہ روایت امام ترمذی نے اختصار کے ساتھ نقل کی ہے ۔
یہ روایت امام أحمد اور امام بزار نے بھی اختصار کے ساتھ نقل کی ہے ۔ اس کی سند میں ایک راوی اجلح کندی ہے ، جسے یحیی بن معین اور دیگر حضرات نے ثقہ قرار دیا ہے ، اور ایک جماعت نے اسے ضعیف کہا: ہے ، امام أحمد کے بقیہ رجال ” صحیح“ کے رجال ہیں ۔

سیدنا بریدہ رضی اللہ عنہ بیان کرتے ہیں : نبی اکرم صلی اللہ علیہ وسلم نے سیدنا علی رضی اللہ عنہ کو یمن کا امیر بنا کر بھیجا ، آپ نے سیدنا خالد بن ولید رضی اللہ عنہ کو پہاڑ کا امیر بنا کر بھیجا ، نبی اکرم صلی اللہ علیہ وسلم نے ارشاد فرمایا : اگر تم دونوں اکٹھے ہو گئے ، تو علی لوگوں کا امیر ہو گا ، وہ لوگ اکٹھے ہوئے ، انہیں مال غنیمت حاصل ہوا ، اس طرح کا مال غنیمت انہیں پہلے کبھی حاصل نہیں ہوا تھا ، سیدنا علی رضی اللہ عنہ نے مال خمس میں سے ایک کنیز لے لی ، تو سیدنا خالد بن ولید رضی اللہ عنہ نے سیدنا بریدہ رضی اللہ عنہ کو بلایا اور فرمایا : تم اس موقع کو غنیمت سمجھو اور نبی اکرم صلی اللہ علیہ وسلم کو سیدنا علی رضی اللہ عنہ کے طرز عمل کے بارے میں بتاؤ ، میں مدینہ منورہ آیا ، میں مسجد میں داخل ہوا ۔ نبی اکرم صلی اللہ علیہ وسلم اپنے گھر میں موجود تھے ، نبی اکرم صلی اللہ علیہ وسلم کے کچھ اصحاب آپ کے دروازے پر موجود تھے ، لوگوں نے دریافت کیا : کیا خبر ہے ؟ میں نے کہا: بھلائی کی بات ہے ، اللہ تعالیٰ نے مسلمانوں کو فتح نصیب کی ہے ، ان لوگوں نے دریافت کیا : پھر تم کیوں آ گئے ہو ؟ میں نے کہا: ایک کنیز کی وجہ سے آیا ہوں ، جسے سیدنا علی رضی اللہ عنہ نے مال خمس میں سے وصول کر لیا ہے ، اور میں اس بارے میں نبی اکرم صلی اللہ علیہ وسلم کو بتانے آیا ہوں ، لوگوں نے کہا: تم نبی اکرم صلی اللہ علیہ وسلم کو اس بارے میں بتا دینا کیونکہ اس طرح سیدنا علی رضی اللہ عنہ کا مرتبہ نبی اکرم صلی اللہ علیہ وسلم کی نظر میں کم ہو جائے گا ، نبی اکرم صلی اللہ علیہ وسلم یہ بات چیت سن رہے تھے ، آپ غصے کے عالم میں باہر تشریف لائے ، آپ نے ارشاد فرمایا : لوگوں کا کیا معاملہ ہے کہ وہ علی کی تنقیص کرنا چاہتے ہیں ، جو شخص علی کی تنقیص کرتا ہے وہ میری تنقیص کرتا ہے ، اور جو شخص علی سے علیحدگی اختیار کرنا چاہتا ہے ، وہ مجھ سے علیحدگی اختیار کرنا چاہتا ہے ، بے شک علی مجھ سے ہے اور میں اس سے ہوں ۔ اسے میری طینت سے پیدا کیا گیا ہے ، اور مجھے سیدنا ابراہیم علیہ السلام کی طینت سے پیدا کیا گیا ہے ، اور میں سیدنا ابراہیم علیہ السلام سے زیادہ فضیلت رکھتا ہوں اور یہ سب ایک دوسرے کی ذریت ہیں ، اور اللہ تعالیٰ سننے والا اور علم رکھنے والا ہے ۔ اسے بریدہ ! کیا تم یہ بات نہیں جانتے ہو کہ علی کا حصہ اس کنیز سے زیادہ ہے ، جو اس نے لی ہے ، اور وہ میرے بعد تم لوگوں کا ولی ہے ؟ میں نے عرض کی : یا رسول الله ! صحبت کا واسطہ ہے آپ اپنا دست مبارک آگے کیجئے ، تاکہ میں نئے سرے سے اسلام کی بیعت کروں ، راوی کہتے ہیں : تو میں اس وقت تک نبی اکرم صلی اللہ علیہ وسلم سے جدا نہیں ہوا جب تک میں نے دوبارہ نبی اکرم صلی اللہ علیہ وسلم کے دست اقدس پر اسلام کی بیعت نہیں کی ۔
یہ روایت امام طبرانی نے معجم اوسط میں نقل کی ہے ۔ اس کی سند میں راویوں کی ایک جماعت ایسی ہے جن سے میں واقف نہیں ہوں اور ایک راوی حسین اشقر ہے ، جسے جمہور نے ضعیف قرار دیا ہے ، اور ابن حبان نے اسے ثقہ کہا: ہے ۔

سیدنا عبدالله بن بریدہ رضی اللہ عنہ سیدنا علی رضی اللہ عنہ کے بارے میں یہ بات نقل کرتے ہیں کہ نبی اکرم صلی اللہ علیہ وسلم نے سیدنا علی بن ابوطالب رضی اللہ عنہ اور سیدنا خالد بن ولید رضی اللہ عنہ کو الگ الگ لشکروں کا امیر بنا کر بھیجا اور پھر ان دونوں کو اکٹھا ہونے کے حوالے سے یہ فرمایا کہ جب تم دونوں اکٹھے ہو جاؤ تو علی تم لوگوں کا امیر ہو گا ، راوی کہتے ہیں : ان دونوں حضرات نے دائیں اور بائیں حصے کے لشکر کو لیا ، پھر سیدنا علی رضی اللہ عنہ اس علاقے میں داخل ہوئے اور دور تک گئے ، وہاں انہیں قیدی ملے ، انہوں نے قیدیوں میں سے ایک کنیز کو حاصل کر لیا ، سیدنا بریدہ رضی اللہ عنہ کہتے ہیں : میں سیدنا علی رضی اللہ عنہ سے شدید بغض رکھتا تھا ، راوی کہتے ہیں : ایک شخص سیدنا خالد بن ولید رضی اللہ عنہ کے پاس آیا اور یہ بات ذکر کی کہ سیدنا علی رضی اللہ عنہ نے خمس میں سے ایک کنیز لے لی ہے ۔ انہوں نے دریافت کیا : یہ کیسے ہوا ؟ پھر ایک اور شخص آیا ، پھر ایک اور شخص آیا ، پھر لگاتار اس بارے میں اطلاعات آنے لگیں ، تو سیدنا خالد رضی اللہ عنہ نے مجھے بلایا اور فرمایا : اے بریدہ ! تمہیں یہ بات پتہ چل گئی ہے کہ جو سیدنا علی رضی اللہ عنہ نے کیا ہے ، تم میرا یہ مکتوب لے کر نبی اکرم صلی اللہ علیہ وسلم کے پاس جاؤ ، پھر سیدنا خالد رضی اللہ عنہ نے نبی اکرم صلی اللہ علیہ وسلم کو خط لکھا ، میں وہ مکتوب لے کے گیا ، یہاں تک کہ نبی اکرم صلی اللہ علیہ وسلم کی خدمت میں حاضر ہوا ، نبی اکرم صلی اللہ علیہ وسلم نے اپنے بائیں ہاتھ کے ذریعے اس مکتوب کو لیا ، نبی اکرم صلی اللہ علیہ وسلم کی یہ شان تھی جس طرح اللہ تعالیٰ نے ارشاد فرمایا ہے : نہ آپ نے باقاعدہ پڑھنا سیکھا تھا اور نہ لکھنا سیکھا تھا ، میری یہ عادت تھی کہ جب میں بات کرتا تھا تو بات پوری ہونے تک اپنے سر کو جھکا کے رکھتا تھا ، تو میں نے اپنے سر کو جھکا لیا ، اور بات چیت شروع کی ، یہاں تک کہ سیدنا علی رضی اللہ عنہ پر تنقید کی ، یہاں تک کہ میں اس سے فارغ ہوا ، پھر میں نے اپنے سر کو اٹھایا تو میں نے دیکھا کہ نبی اکرم صلی اللہ علیہ وسلم شدید غصے کے عالم میں ہیں ، میں نے نبی اکرم صلی اللہ علیہ وسلم کو اس طرح کے غصے کے عالم میں کبھی نہیں دیکھا تھا ، البتہ جنگ قریظہ اور جنگ نضیر کے موقع پر ایسا ہوا تھا ۔ نبی اکرم صلی اللہ علیہ وسلم نے میری طرف دیکھا اور پھر ارشاد فرمایا : اے بریدہ ! علی سے محبت رکھو کیونکہ اس نے وہی کیا ہے جس کا اسے حکم دیا گیا ( یا جس کی اسے اجازت دی گئی ) راوی کہتے ہیں : تو میں اٹھا تو اس وقت میرے نزدیک سیدنا علی رضی اللہ عنہ سے زیادہ محبوب اور کوئی نہیں تھا ۔
یہ روایت امام طبرانی نے معجم اوسط میں نقل کی ہے ۔ اس میں ضعیف راوی بھی ہیں جنہیں ابن حبان نے ثقہ قرار دیا ہے ۔

سیدنا ابوسعید خدری رضی اللہ عنہ بیان کرتے ہیں : کچھ لوگوں نے سیدنا علی رضی اللہ عنہ کی شکایت کی ، تو نبی اکرم صلی اللہ علیہ وسلم ہمارے درمیان خطبہ دینے کے لئے کھڑے ہوئے ، میں نے آپ صلی اللہ علیہ وسلم کو یہ ارشاد فرماتے ہوئے سنا : ” اے لوگو ! علی کی شکایت نہ کرو ، اللہ کی قسم ! وہ اللہ کی ذات کے بارے میں ( راوی کو شک ہے شاید یہ الفاظ ہیں ) اللہ کی راہ میں سب سے زیادہ مضبوط ہے ۔ “
یہ روایت امام أحمد نے نقل کی ہے ، اور اس کے رجال ثقہ ہیں ۔

سیدنا عمرو بن شاس اسلمی رضی اللہ عنہ جو غزوہ بدر میں شرکت کا شرف حاصل رکھتے ہیں ۔ وہ بیان کرتے ہیں : میں سیدنا علی رضی اللہ عنہ کے ساتھ یمن جانے کے لئے روانہ ہوا ، سفر میں سیدنا علی رضی اللہ عنہ نے میرے ساتھ زیادتی کی ، مجھے سیدنا علی رضی اللہ عنہ کے خلاف اپنے من میں الجھن محسوس ہوئی ، جب میں مدینہ منورہ آیا تو میں نے مسجد میں سیدنا علی رضی اللہ عنہ سے شکایت کا اظہار کیا ، تو نبی اکرم صلی اللہ علیہ وسلم نے اس بات کو سن لیا ، اگلے دن میں مسجد میں داخل ہوا تو نبی اکرم صلی اللہ علیہ وسلم اپنے اصحاب کے درمیان تشریف فرما تھے ، جب آپ نے مجھے ملاحظہ کیا ، تو آپ نے مجھ پر نگاہیں مذکور رکھیں ، راوی کہتے ہیں : اس سے مراد یہ ہے کہ میری طرف تیز نظروں سے دیکھا ، جب میں بیٹھ گیا ، تو نبی اکرم صلی اللہ علیہ وسلم نے فرمایا : اے عمرو ! اللہ کی قسم ! تم نے مجھے اذیت دی ہے ، میں نے عرض کی : میں اس بات سے اللہ کی پناہ مانگتا ہوں کہ آپ کو اذیت دوں ، یا رسول اللہ ! نبی اکرم صلی اللہ علیہ وسلم نے فرمایا : جی ہاں ! جس نے علی کو اذیت دی اس نے مجھے اذیت دی ۔
یہ روایت امام أحمد نے نقل کی ہے ، اور امام طبرانی نے اختصار کے ساتھ نقل کی ہے ۔ امام بزار نے اسے اس سے زیادہ مختصر روایت کے طور پر نقل کیا ہے ، اور امام أحمد کے رجال ثقہ ہیں ۔

سیدنا ابورافع رضی اللہ عنہ بیان کرتے ہیں : نبی اکرم صلی اللہ علیہ وسلم نے سیدنا علی رضی اللہ عنہ کو یمن کا امیر بنا کر بھیجا ، ان کے ساتھ اسلم قبیلے سے تعلق رکھنے والا ایک شخص بھی روانہ ہوا ، جس کا نام عمرو بن شاس اسلمی تھا ، جب وہ شخص واپس آیا تو وہ شخص سیدنا علی رضی اللہ عنہ کی مذمت کر رہا تھا اور ان کی شکایت کر رہا تھا ۔ نبی اکرم صلی اللہ علیہ وسلم نے اس کو پیغام بھیج کر بلایا اور فرمایا : اے عمرو ! تم پرے ہو جاؤ ! کیا تم نے علی کو فیصلہ دیتے ہوئے کوئی زیادتی کرتے ہوئے دیکھا ہے یا تقسیم کرتے ہوئے کوئی ترجیحی سلوک کرتے ہوئے دیکھا ہے ، اس شخص نے جواب دیا : اللہ جانتا ہے ، جی نہیں : نبی اکرم صلی اللہ علیہ وسلم نے فرمایا : پھر تم کس بنیاد پر وہ باتیں کہہ رہے ہو جو مجھ تک پہنچی ہیں ، اس شخص نے کہا: ان سے بغض رکھنے کی وجہ سے ، جس کا میں مالک نہیں ہوں ، راوی کہتے ہیں : تو نبی اکرم صلی اللہ علیہ وسلم غصے میں آ گئے ، یہاں تک کہ غصے کے اثرات آپ صلی اللہ علیہ وسلم کے چہرے پر محسوس ہوئے ، پھر آپ صلی اللہ علیہ وسلم نے ارشاد فرمایا : ” جو شخص اس سے بغض رکھتا ہے وہ مجھ سے بغض رکھتا ہے ، اور جو شخص مجھ سے بغض رکھتا ہے وہ اللہ تعالیٰ سے بغض رکھتا ہے ، اور جو شخص اس سے محبت رکھتا ہے ، وہ مجھ سے محبت رکھتا ہے ، اور جو شخص مجھ سے محبت رکھتا ہے ، وہ اللہ تعالیٰ سے محبت رکھتا ہے ۔ “
یہ روایت امام بزار نے نقل کی ہے ۔ اس کی سند میں ایسے رجال ہیں جن کے ضعیف ہونے کے باوجود ان کی توثیق کی گئی ہے ۔

سیدنا سعد بن ابی وقاص رضی اللہ عنہ بیان کرتے ہیں : میں مسجد میں بیٹھا ہوا تھا ، میں تھا اور میرے ساتھ دو افراد تھے ، ہم سیدنا علی رضی اللہ عنہ پر تنقید کرنے لگے ، اسی دوران نبی اکرم صلی اللہ علیہ وسلم یہ تشریف لائے ، آپ غصے کے عالم میں تھے اور آپ کے چہرے سے غصے کا اظہار ہو رہا تھا ، میں نے نبی اکرم صلی اللہ علیہ وسلم کے غضب سے اللہ کی پناہ مانگی ، تو آپ صلی اللہ علیہ وسلم نے ارشاد فرمایا : ” تمہارا میرے ساتھ کیا واسطہ ہے ، جس نے علی کو اذیت دی ، اس نے مجھے اذیت دی ۔ “
یہ روایت امام ابویعلیٰ نے نقل کی ہے ، اور امام بزار نے اختصار کے ساتھ نقل کی ہے ، امام ابویعلیٰ کے رجال ” صحیح “ کے رجال ہیں ، صرف محمود بن خداش اور قنان کا معاملہ مختلف ہے یہ دونوں ثقہ ہیں ۔

ابوبکر بن خالد بن عرفطہ بیان کرتے ہیں : وہ سیدنا سعد بن مالک رضی اللہ عنہ کے پاس آئے اور بولے : مجھے یہ بات پتہ چلی ہے کہ آپ لوگ کوفہ میں سیدنا علی رضی اللہ عنہ کے سامنے آئے اور انہیں برا بھلا کہا: ، تو کیا آپ نے انہیں برا بھلا کہا: ہے ؟ انہوں نے جواب دیا : اس بات سے اللہ کی پناہ ہے ۔ اس ذات کی قسم ! جس کے قبضے میں سعد کی جان ہے ، میں نے نبی اکرم صلی اللہ علیہ وسلم کو سیدنا علی رضی اللہ عنہ کے بارے میں ایسی بات ارشاد فرماتے ہوئے سنا ہے : اگر میری مانگ پر آری رکھ دی جائے ، تو بھی میں کبھی بھی انہیں برا نہیں کہوں گا ۔
یہ روایت امام ابویعلیٰ نے نقل کی ہے ، اور اس کی سند حسن ہے ۔

ابوعبداللہ جدلی بیان کرتے ہیں : میں سیدہ ام سلمہ رضی اللہ عنہا کی خدمت میں حاضر ہوا ، انہوں نے مجھ سے فرمایا : کیا تم لوگوں کے درمیان اللہ کے رسول کو برا کہا: جاتا ہے ؟ میں نے عرض کی : اس بات سے اللہ کی پناہ ہے ( راوی کو شک ہے شاید یہ الفاظ ہیں ) سبحان اللہ ، یا اس کی مانند کوئی اور کلمہ کہا: ، تو سیدہ ام سلمہ رضی اللہ عنہا نے فرمایا : میں نے نبی اکرم صلی اللہ علیہ وسلم کو یہ ارشاد فرماتے ہوئے سنا ہے : ” جس نے علی کو برا کہا: ، تحقیق اس نے مجھے برا کہا: ۔ “
یہ روایت امام أحمد نے نقل کی ہے ، اور اس کے رجال ” صحیح “ کے رجال ہیں ، صرف ابوعبداللہ جدلی کا معاملہ مختلف ہے ، اور وہ ثقہ ہے ۔

ابوعبداللہ جدلی بیان کرتے ہیں : سید ام سلمہ رضی اللہ عنہا نے مجھ سے فرمایا : اے ابوعبداللہ ! کیا تم لوگوں کے درمیان اللہ کے رسول کو برا کہا: جاتا ہے ؟ میں نے عرض کی : اللہ کے رسول کو کیسے برا کہا: جا سکتا ہے ؟ سیدہ ام سلمہ رضی اللہ عنہا نے فرمایا : کیا سیدنا علی رضی اللہ عنہ کو اور ان سے محبت رکھنے والوں کو برا نہیں کہا: جاتا ؟ حالانکہ نبی اکرم صلی اللہ علیہ وسلم ان سے محبت رکھتے تھے ۔ “
یہ روایت امام طبرانی نے تینوں کتابوں میں نقل کی ہے ، امام ابویعلیٰ نے بھی اسے نقل کیا ہے ، امام طبرانی کے رجال ” صحیح“ کے رجال ہیں ، صرف ابوعبداللہ کا معاملہ مختلف ہے ، اور وہ ثقہ ہے ۔

امام طبرانی نے اس کے بعد سیدہ ام سلمہ رضی اللہ عنہا تک ثقہ رجال کے حوالے سے نبی اکرم صلی اللہ علیہ وسلم سے اس کی مانند روایت نقل کی ہے ۔

سیدنا کعب بن عجرہ رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” علی کو برا نہ کہو ! کیونکہ وہ اللہ کی ذات کے بارے میں خود سے بے پرواہ ہے ۔ “
یہ روایت امام طبرانی نے معجم کبیر اور معجم اوسط میں نقل کی ہے ۔ اس کی سند میں ایک راوی سفیان بن بشر یا شاید بشیر ہے ، جو متاخر ہے ، یہ وہ نہیں ہے ، جس نے ابوعبدالرحمن حبلی سے روایات نقل کی ہیں ، میں اس سے واقف نہیں ہوں ۔ اس روایت کے بقیہ رجال کی توثیق کی گئی ہے ، اس کے بعض راویوں میں ضعف پایا جاتا ہے ۔

ابوکثیر بیان کرتے ہیں : میں سیدنا امام حسن بن علی رضی اللہ عنہما کے پاس بیٹھا ہوا تھا ، ایک شخص ان کے پاس آیا اور بولا: سیدنا معاویہ رضی اللہ عنہ کے پاس سیدنا علی رضی اللہ عنہ کو برے طریقے سے برا کہا: گیا ، ایک شخص نے برا کہا: تھا ، جس کا نام معاویہ بن حدیج تھا ، وہ اس سے واقف نہیں تھے ۔ سیدنا حسن رضی اللہ عنہ نے کہا: جب تم اس شخص کو دیکھو تو اسے میرے پاس لے کے آنا ، جب اس شخص نے ان صاحب کو عمرو بن حریث کے گھر کے پاس دیکھا ، تو سیدنا حسن رضی اللہ عنہ کو وہ صاحب دکھائے ، سیدنا حسن رضی اللہ عنہ نے دریافت کیا : کیا تم معاویہ بن حدیج ہو ؟ وہ خاموش رہے ۔ انہوں نے کوئی جواب نہیں دیا ، ایسا تین مرتبہ ہوا ، سیدنا حسن رضی اللہ عنہ نے کہا: تم سیدنا علی رضی اللہ عنہ کو کلیجے کھانے والی عورت کے بیٹے کے پاس برا کہہ رہے تھے ، کیا ایسا نہیں ہو گا کہ تم حوض پر ان کے پاس آؤ گے ، ویسے تمہارے بارے میں میری یہ رائے نہیں ہے کہ تم ان کے پاس جاؤ گے ، تو تم ان کو پاؤ گے کہ انہوں نے کلائیاں چڑھائی ہوئی ہوں گی اور کافروں اور منافقین کو اللہ کے رسول کے حوض سے پیچھے کر رہے ہوں گے ، جس طرح اجنبی اونٹ کو پرے کیا جاتا ہے ، اور یہ بات صادق و مصدوق سیدنا محمد ( صلی اللہ علیہ وسلم ) کا فرمان ہے ۔

ایک روایت میں علی بن ابوطلحہ کے حوالے سے یہ بات منقول ہے ، جو بنوامیہ کا غلام تھا ، وہ بیان کرتا ہے : سیدنا معاویہ بن ابوسفیان رضی اللہ عنہ حج کے لئے گئے ۔ ان کے ساتھ معاویہ بن حدیج بھی حج کے لئے گئے تھے ، وہ لوگوں میں سب سے زیادہ سیدنا علی بن ابوطالب رضی اللہ عنہ کو برا کہا: کرتے تھے ۔ ان کا گزر نبی اکرم صلی اللہ علیہ وسلم کی مسجد سے ہوا ، سیدنا امام حسن بن علی رضی اللہ عنہما وہاں تشریف فرما تھے ۔ ۔ ۔ ۔ ۔ ۔ ۔ اس کے بعد راوی نے حسب سابق حدیث ذکر کی ہے ، تاہم انہوں نے یہ الفاظ زائد نقل کیے ہیں : ” تحقیق وہ شخص رسوا ہو گیا جس نے جھوٹا الزام لگایا ۔ “
یہ روایت امام طبرانی نے دو اسناد کے ساتھ نقل کی ہے جن میں سے ایک سند میں ایک راوی علی بن ابوطلحہ ہے ، جو بنوامیہ کا غلام ہے ، اور میں اس سے واقف نہیں ہوں ۔ اس روایت کے بقیہ رجال ثقہ ہیں اور دوسری سند ضعیف ہے ۔

عبداللہ بن ابونجیح بیان کرتے ہیں : ” بصیر “ کے دن سیدنا علی رضی اللہ عنہ کے پاس سونا اور چاندی لائے گئے تو انہوں نے فرمایا : یہ چاندی اور یہ سونا ، تم میرے علاوہ کسی اور کو غلط فہمی کا شکار کرو ! کل کو جب اہل شام تم پر غالب آ جائیں گے تو تم انہیں دھوکہ دینا ۔ سیدنا علی رضی اللہ عنہ کی یہ بات لوگوں کو گراں گزری ، انہوں نے اس بات کا تذکرہ سیدنا علی رضی اللہ عنہ کے سامنے کیا ، تو سیدنا علی رضی اللہ عنہ نے لوگوں میں اعلان کروایا ، لوگ سیدنا علی رضی اللہ عنہ کے پاس آئے ، تو سیدنا علی رضی اللہ عنہ نے بتایا : میرے خلیل صلی اللہ علیہ وسلم نے یہ بات ارشاد فرمائی تھی : ” اے علی ! بے شک تم اللہ تعالیٰ کی بارگاہ میں ایسی حالت میں حاضر ہو گے کہ تم اور تمہارے ساتھی راضی ہوں گے ، اور ان سے راضی ہوا گیا ہو گا ، اور پھر تمہارا دشمن اللہ تعالیٰ کی بارگاہ میں ایسی حالت میں حاضر ہو گا کہ وہ غصے میں ہوں گے ، اور سر اٹھائے ہوئے ہوں گے ۔ “ پھر سیدنا علی رضی اللہ عنہ نے اپنا ہاتھ گردن کی طرف لے جا کے ان لوگوں کو دکھایا کہ ایسے اُن کے سر اٹھے ہوئے ہوں گے ۔
یہ روایت امام طبرانی نے معجم اوسط میں نقل کی ہے ، اس کی سند میں ایک راوی جابر جعفی ہے ، اور وہ ضعیف ہے ۔

سیدنا ابورافع رضی اللہ عنہ بیان کرتے ہیں : نبی اکرم صلی اللہ علیہ وسلم نے سیدنا علی رضی اللہ عنہ کے بارے میں یہ فرمایا : ” بے شک جس نے علی سے محبت رکھی ، اس نے مجھ سے محبت رکھی ، اور جس نے مجھ سے محبت رکھی ، اللہ تعالیٰ اس سے محبت رکھے گا ، اور جو شخص اس سے بغض رکھے گا اس نے مجھ سے بغض رکھا ، اور جو مجھ سے بغض رکھے گا ، وہ اللہ تعالیٰ سے بغض رکھے گا ۔ “
یہ روایت امام طبرانی نے حرب بن حسن طحان کی یحییٰ بن یعلیٰ سے نقل کردہ روایت کے طور پر نقل کی ہے ، اور یہ دونوں راوی ضعیف ہیں ۔

اسی سند کے ساتھ یہ بات منقول ہے : نبی اکرم صلی اللہ علیہ وسلم نے سیدنا علی رضی اللہ عنہ کو ایک مہم پر بھیجا ، جب وہ واپس آئے تو نبی اکرم صلی اللہ علیہ وسلم نے ان سے فرمایا : ” اللہ اور اس کا رسول اور جبرائیل ، تم سے راضی ہیں ۔ “

اسی سند کے ساتھ یہ بات منقول ہے : نبی اکرم صلی اللہ علیہ وسلم نے سیدنا علی رضی اللہ عنہ سے فرمایا : ” تم اور تمہارے ساتھی حوض پر میرے پاس ایسی حالت میں آئیں گے کہ تم لوگ سیر ہو جاؤ گے ، اور تمہارے چہرے روشن ہوں گے ، اور تمہارا دشمن حوض پر میرے پاس ایسی حالت میں آئے گا کہ وہ پیاسے ہوں گے ، اور ان کے سر اوپر کی طرف اٹھے ہوئے ہوں گے ۔ “

اسی سند کے ساتھ یہ بات منقول ہے : نبی اکرم صلی اللہ علیہ وسلم نے سیدنا علی رضی اللہ عنہ سے فرمایا : ” کیا تم اس بات سے راضی نہیں ہو کہ تم میرے بھائی ہو اور میں تمہارا بھائی ہوں ۔ “

اسی سند کے ساتھ یہ بات منقول ہے : نبی اکرم صلی اللہ علیہ وسلم نے ارشاد فرمایا : ” میں جنت میں داخل ہونے والے پہلے چار افراد میں ایک ہوں ، میں ہوؤں گا ، تم ہو گے ، حسن ہو گا ، حسین ہو گا اور ہماری اولاد ہماری پشت کے پیچھے ہو گی اور ہماری بیویاں ہماری اولاد کے پیچھے ہوں گی اور ہمارے ساتھی ہمارے دائیں طرف اور بائیں طرف ہوں گے ۔ “

اسی سند کے ساتھ یہ بات منقول ہے : نبی اکرم صلی اللہ علیہ وسلم نے سیدنا علی رضی اللہ عنہ سے فرمایا : ” اس ذات کی قسم ! جس کے دست قدرت میں میری جان ہے کہ اگر ایسا نہ ہوتا کہ تمہارے بارے میں میری امت کے مختلف گروہ وہ بات کریں گے جو عیسائی سیدنا عیسیٰ بن مریم علیہ السلام کے بارے میں کہتے تھے ، تو میں نے تمہارے بارے میں ایک بات کہنی تھی کہ مسلمانوں میں جو بھی شخص گزرتا ، وہ تمہارے قدموں کے نیچے سے مٹی لے لیتا اور اس کے ذریعے برکت حاصل کرتا ۔ “

سیدنا امام حسن بن علی رضی اللہ عنہما روایت کرتے ہیں : نبی اکرم صلی اللہ علیہ وسلم نے ارشاد فرمایا : ” اے انس ! جاؤ عربوں کے سردار کو میرے پاس بلا کے لاؤ ۔ “ نبی اکرم صلی اللہ علیہ وسلم کی مراد سیدنا علی رضی اللہ عنہ تھے ۔ سیدہ عائشہ رضی اللہ عنہا نے عرض کی : کیا آپ عربوں کے سردار نہیں ہیں ؟ نبی اکرم صلی اللہ علیہ وسلم نے فرمایا : میں اولاد آدم کا سردار ہوں اور علی ، عربوں کا سردار ہے ۔ “ جب وہ آئے ، تو نبی اکرم صلی اللہ علیہ وسلم نے انصار کو پیغام بھیجا ، وہ لوگ نبی اکرم صلی اللہ علیہ وسلم کے پاس آئے ، تو نبی اکرم صلی اللہ علیہ وسلم نے ان سے فرمایا : اے انصار کے گروہ ! کیا میں تمہاری رہنمائی اس چیز کی طرف نہ کروں کہ جب تم اسے مضبوطی سے تھام لو گے ، تو اس کے بعد تم کبھی گمراہ نہیں ہو گے ، ان لوگوں نے عرض کی : جی ہاں یا رسول اللہ ! نبی اکرم صلی اللہ علیہ وسلم نے ارشاد فرمایا : یہ علی ہے ، تم میرے ساتھ محبت کی وجہ سے اس سے محبت رکھو اور میری عزت کی وجہ سے اس کی عزت افزائی کرو ، کیونکہ جبرائیل نے مجھے یہ کہا: ہے کہ میں اللہ تعالیٰ کی طرف سے تمہیں یہ بات بتا دوں ۔ “
یہ روایت امام طبرانی نے نقل کی ہے ۔ اس کی سند میں ایک راوی اسحاق بن ابراہیم ضبی ہے ، اور وہ متروک ہے ۔

سیدنا سلمان رضی اللہ عنہ بیان کرتے ہیں : نبی اکرم صلی اللہ علیہ وسلم نے سیدنا علی رضی اللہ عنہ سے فرمایا : ” تم سے محبت رکھنے والا مجھ سے محبت رکھنے والا ہو گا ، اور تم سے بغض رکھنے والا مجھ سے بغض رکھنے والا ہو گا ۔ “
یہ روایت امام طبرانی نے نقل کی ہے ۔ اس کی سند میں ایک راوی عبدالملک طویل ہے ، جسے ابن حبان نے ثقہ قرار دیا ہے ، ازدی نے اسے ضعیف کہا: ہے ، اس روایت کے بقیہ رجال کی توثیق کی گئی ہے ۔
یہ روایت امام بزار نے اس کی مانند نقل کی ہے ۔

سیدنا ابومریم ثقفی رضی اللہ عنہ بیان کرتے ہیں : میں نے نبی اکرم صلی اللہ علیہ وسلم کو سیدنا علی رضی اللہ عنہ سے یہ ارشاد فرماتے ہوئے سنا : اے علی ! اس شخص کے لئے مبارک باد ہے جو تم سے محبت رکھے اور تمہارے بارے میں سچ کہے اور اس شخص کے لئے بربادی ہے ، جو تم سے بغض رکھے اور تمہارے بارے میں جھوٹ کہے ۔ “
یہ روایت امام طبرانی نے نقل کی ہے ۔ اس کی سند میں ایک راوی علی بن حزور ہے ، اور وہ متروک ہے ۔

سیدنا عمار بن یاسر رضی اللہ عنہ بیان کرتے ہیں : میں نے نبی اکرم صلی اللہ علیہ وسلم کو سیدنا علی بن ابوطالب رضی اللہ عنہ سے یہ ارشاد فرماتے ہوئے سنا : ” بے شک اللہ تعالیٰ نے تمہیں ایک ایسی زینت کے ذریعے آراستہ کیا ہے کہ اس نے اس جیسی زینت کے ذریعے اپنے بندوں کو آراستہ نہیں کیا ، بے شک اللہ تعالیٰ نے تمہارے نزدیک مسکینوں کو محبوب کر دیا ہے ، اور ان کے قریب رہنا محبوب کر دیا ہے ، اس نے تمہیں ان لوگوں کے لئے امام بنایا ہے ، تم ان سے راضی ہو اور اس نے ان لوگوں کو تمہارا پیروکار بنایا ہے ، اور وہ تم سے راضی ہیں ، تو اس شخص کے لئے مبارک باد ہے ، جو تم سے محبت رکھتا ہے ، اور تمہارے بارے میں سچ بولتا ہے ، اور اس شخص کے لئے بربادی ہے ، جو تم سے بغض رکھتا ہے ، اور تمہارے بارے میں جھوٹ بولتا ہے ، جہاں تک اس شخص کا تعلق ہے جو تم سے محبت رکھتا ہے اور تمہارے بارے میں سچ بولتا ہے ، تو ایسے لوگ تمہاری جگہ پر تمہارے پڑوسی ہوں گے ، اور جنت میں تمہارے ساتھی ہوں گے ، جہاں تک ان لوگوں کا تعلق ہے جو تم سے بغض رکھتے ہیں ، اور جو تمہارے خلاف جھوٹ بولتے ہیں ، تو اللہ تعالیٰ کے ذمہ یہ بات لازم ہے کہ انہیں جھوٹے لوگوں کے مقام پر ٹھہرائے “ ۔
یہ روایت امام طبرانی نے معجم اوسط میں نقل کی ہے ۔ اس کی سند میں ایک راوی علی بن حزور ہے ، اور وہ متروک ہے ۔

سیدہ ام سلمہ رضی اللہ عنہا بیان کرتی ہیں : میں یہ گواہی دیتی ہوں کہ میں نے نبی اکرم صلی اللہ علیہ وسلم کو یہ ارشاد فرماتے ہوئے سنا ہے : ” جو شخص علی سے محبت رکھے گا ، وہ مجھ سے محبت رکھے گا ، اور جو مجھ سے محبت رکھے گا ، وہ اللہ سے محبت رکھے گا ، اور جو علی سے بغض رکھے گا ، وہ مجھ سے بغض رکھے گا ، اور جو مجھ سے بغض رکھے گا ، وہ اللہ سے بغض رکھے گا“ ۔
یہ روایت امام طبرانی نے نقل کی ہے ، اور اس کی سند حسن ہے ۔

نبی اکرم صلی اللہ علیہ وسلم کی صاحبزادی سیدہ فاطمہ رضی اللہ عنہا بیان کرتی ہیں : عرفہ کی شام نبی اکرم صلی اللہ علیہ وسلم ہمارے پاس تشریف لائے ، آپ صلی اللہ علیہ وسلم نے ارشاد فرمایا : ” بے شک اللہ تعالیٰ نے تم پر فخر کا اظہار کیا اور تم لوگوں کی عمومی طور پر اور علی کی بطور خاص مغفرت کر دی ہے ، میں تم لوگوں کی طرف اللہ کا رسول ہوں ، میں اپنے رشتے داروں کے لئے امتیازی سلوک کرنے والا نہیں ہوں ، یہ جبرائیل مجھے بتا رہے ہیں کہ وہ شخص حقیقی طور پر سعادت مند ہے ، جو علی کے ساتھ اس کی زندگی میں اور اس کے مرنے کے بعد بھی محبت رکھے ، اور وہ شخص مکمل طور پر بدنصیب ہے ، جو اس کی زندگی میں اور اس کے مرنے کے بعد بھی علی سے بغض رکھے ۔ “
یہ روایت امام طبرانی نے نقل کی ہے ۔ اس کی سند میں ایسے راوی ہیں جن سے میں واقف نہیں ہوں ۔

سیدنا جابر بن عبدالله رضی اللہ عنہما بیان کرتے ہیں : نبی اکرم صلی اللہ علیہ وسلم کے زمانہ اقدس میں ہم اپنے درمیان منافقین کو اس بات کے حوالے سے پہچان لیتے تھے کہ وہ سیدنا علی رضی اللہ عنہ سے بغض رکھتے تھے ۔
یہ روایت امام طبرانی نے معجم اوسط میں نقل کی ہے ، امام بزار نے اس کی مانند نقل کی ہے ، تاہم انہوں نے یہ الفاظ نقل کیے ہیں : ” ہم انصار کے لوگ منافقین کو اس حوالے سے پہچان لیتے تھے “ اس کی تمام اسناد ضعیف ہیں ۔

سیدنا عبداللہ بن عباس رضی اللہ عنہما بیان کرتے ہیں : نبی اکرم صلی اللہ علیہ وسلم نے سیدنا علی رضی اللہ عنہ کی طرف دیکھا اور فرمایا : ” کوئی مومن ہی تم سے محبت رکھے گا ، اور کوئی منافق ہی تم سے بغض رکھے گا ، جو شخص تم سے محبت رکھے گا ، وہ مجھ سے محبت رکھے گا ، اور جو شخص تم سے بغض رکھے گا ، وہ مجھ سے بغض رکھے گا ، میرا حبیب اللہ کا حبیب ہے ، اور میرا ناپسندیدہ شخص اللہ کا ناپسندیدہ شخص ہے ، اس شخص کے لئے بربادی ہے ، جو میرے بعد تم سے بغض رکھے گا ۔ “
یہ روایت امام طبرانی نے معجم اوسط میں نقل کی ہے ۔ اس کے رجال ثقہ ہیں تاہم ابوازہر أحمد بن ازہر نیشاپوری کے حالات میں بات تحریر ہے کہ معمر کا ایک بھتیجا تھا ، جو رافضی تھا اس نے
یہ روایت ان کی تحریروں میں داخل کر دی ہے ، اور معمر ایک بارعب شخص تھے ۔ انہیں نظرثانی کے لئے نہیں کہا: جاتا تھا ، امام عبدالرزاق نے ان سے سماع کیا ہے ۔

سیدنا عمران بن حصین رضی اللہ عنہ بیان کرتے ہیں : نبی اکرم صلی اللہ علیہ وسلم نے سیدنا علی رضی اللہ عنہ سے فرمایا : ” صرف کوئی مومن ہی تم سے محبت رکھے گا ، اور صرف کوئی منافق ہی تم سے بغض رکھے گا ۔ “
یہ روایت امام طبرانی نے معجم اوسط میں نقل کی ہے ۔ اس کی سند میں ایک راوی محمد بن کثیر کوفی ہے ، امام أحمد نے اس کی نقل کردہ حدیث کو جلا دیا تھا ، جمہور نے اسے ضعیف قرار دیا ہے ، ابن معین نے اسے ثقہ کہا: ہے ، ایک راوی عثمان بن ہشام ہے ، میں اس سے واقف نہیں ہوں ۔ اس روایت کے بقیہ رجال ثقہ ہیں ۔