مجمع الزوائد ومنبع الفوائد

سیدنا ثابت بن قیس بن شماس رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا ہے : ” تم لوگ ( مجھ سے علمی باتیں ) سنو ! تم سے بھی سنا جائے گا ، جنہوں نے تم سے سنا ہو گا ، اُن سے بھی سنا جائے گا ، پھر نبی اکرم صلی اللہ علیہ وسلم نے ارشاد فرمایا : اُس کے بعد ایسے لوگ آئیں گے ، جو گواہی دیں گے ، اس سے پہلے کہ اُن سے گواہی مانگی جائے “ ۔
یہ روایت امام بزار ، اور امام طبرانی نے معجم کبیر میں نقل کی ہے ، عبدالرحمن بن ابی لیلی نامی راوی نے ، سیدنا ثابت بن قیس رضی اللہ عنہ سے سماع نہیں کیا ہے ۔

سیدنا ابوسعید خدری رضی اللہ عنہ روایت کرتے ہیں : حجتہ الوداع کے موقعہ پر ، نبی اکرم صلی اللہ علیہ وسلم نے ارشاد فرمایا : ” اللہ تعالیٰ اُس شخص کو خوش رکھے ! جو میری بات سن کر اُسے محفوظ رکھے ، کیونکہ بعض اوقات علمی بات سیکھنے والا شخص عالم نہیں ہوتا ، تین چیزیں ایسی ہیں ، جن کے بارے میں مؤمن شخص کا دل کھوٹ کا شکار نہیں ہوتا ، عمل کا ، اللہ تعالٰی کیلئے خالص ہونا ، مسلمان حکمرانوں کی خیرخواہی اور مسلمانوں کی جماعت کے ساتھ رہنا ، کیونکہ اُن کی دعا ان لوگوں کو بھی محیط ہوتی ہے ، جو اُن کے پیچھے ہوتے ہیں ( یعنی جو ان کے ساتھ نہیں ہوتے ہیں ) ۔ “
یہ روایت امام بزار نے نقل کی ہے ، اس کے رجال کی توثیق کی گئی ہے ، البتہ سلیمان بن سیف کے استاد سعید بن بزیغ کا معاملہ مختلف ہے ، کیونکہ میں نے کسی کو ان کا ذکر کرتے ہوئے نہیں دیکھا ہے ، اگرچہ سعید بن ربیع ، جو صحیح کے رجال میں سے ایک ہیں ، اُنہوں نے ان دونوں سے روایات نقل کی ہیں ، باقی اللہ بہتر جانتا ہے ۔

سیدنا ابودرداء رضی اللہ عنہ بیان کرتے ہیں : نبی اکرم صلی اللہ علیہ وسلم نے ہمیں خطبہ دیتے ہوئے ارشاد فرمایا : ” اللہ تعالیٰ اُس شخص کو خوش رکھے ! جو میری یہ گفتگو سن کر اُس کی تبلیغ کر دے ، کیونکہ بعض اوقات کوئی علمی بات سیکھنے والا شخص ، وہ بات اس شخص تک منتقل کر دیتا ہے ، جو اُس سے زیادہ بڑا عالم ہوتا ہے ، تین چیزیں ایسی ہیں ، جن کے بارے میں مسلمان کا دل کھوٹ کا شکار نہیں ہوتا ، عمل کا اللہ تعالیٰ کیلئے خالص ہونا ، ہر مسلمان کی خیرخواہی کرنا ، اور مسلمانوں کی جماعت کے ساتھ رہنا ، کیونکہ ان کی دعا اُن لوگوں کو بھی محیط ہوتی ہے ، جو اُن کے پیچھے ہوتے ہیں ( یعنی جو ان کے ساتھ نہیں ہوتے ہیں ) “ ۔
یہ روایت امام طبرانی نے معجم کبیر میں نقل کی ہے ، اس روایت کا مدار عبدالرحمن بن زبید نامی راوی پر ہے اور وہ منکر الحدیث ہے ، یہ بات امام بخاری رحمہ اللہ میں بیان کی ہے ۔

عبید بن عمیر نے ، اپنے والد کے حوالے سے ، اپنے دادا سے یہ روایت نقل کی ہے : نبی اکرم صلی اللہ علیہ وسلم نے اُن لوگوں کو خطبہ دیتے ہوئے ارشاد فرمایا : ” اللہ تعالیٰ اُس شخص کو خوش رکھے ، جو میری گفتگو سن کر اسے محفوظ رکھے ، بعض اوقات براہ راست کوئی چیز سیکھنے والا شخص درحقیقت عالم نہیں ہوتا اور بعض اوقات براہ راست کوئی چیز سیکھنے والا شخص ، وہ بات اُس شخص تک منتقل کر دیتا ہے ، جو اس سے بڑا عالم ہوتا ہے “ ۔
یہ روایت امام طبرانی نے معجم کبیر میں نقل کی ہے ، اس کے رجال کی توثیق کی گئی ہے ، البتہ میں نے کسی کو محمد بن نصر نامی راوی کا ذکر کرتے ہوئے نہیں دیکھا ہے ، جو معجم اوسط میں امام طبرانی کے استاد ہیں ۔

سیدنا معاذ بن جبل رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا ہے : ” اللہ تعالیٰ اس شخص کو خوش رکھے ، جو میرا کلام سنے اور اُس میں کوئی اضافہ نہ کرے ، بعض اوقات براہ راست کوئی چیز سیکھنے والا شخص اس بات کو اُس شخص تک منتقل کر دیتا ہے ، جو اُس سے زیادہ بہتر طور پر اس بات کو یاد رکھتا ہے ، تین چیزیں ایسی ہیں ، جن کے بارے میں ، مؤمن کا دل کھوٹ کا شکار نہیں ہوتا ہے ، عمل کا ، اللہ تعالیٰ کیلئے خالص ہونا ، حکمرانوں کی خیرخواہی اور مسلمانوں کی جماعت کو مضبوطی سے تھام کے رکھنا ، کیونکہ ان کی دعاء ان لوگوں کو بھی محیط ہوتی ہے ، جو اُن کے پیچھے ہوتے ہیں ( یعنی جو ان کے ساتھ نہیں ہوتے ہیں ) “ ۔
یہ روایت امام طبرانی نے معجم کبیر اور معجم اوسط میں نقل کی ہے ، تاہم انہوں نے اس میں لفظ ” حامل فقہ “ کی بجائے ” حامل کلمہ “ نقل کیا ہے ، اس کی سند میں ایک راوی عمرو بن واقد ہے جس پر جھوٹا ہونے کا الزام عائد کیا گیا ہے اور وہ منکر الحدیث ہے ۔

سیدنا نعمان بن بشیر رضی اللہ عنہ کے بارے میں یہ بات منقول ہے : اُنہوں نے خطبہ کے دوران یہ بات بیان کی : مسجد خیف میں ، نبی اکرم صلی اللہ علیہ وسلم نے ہمیں خطبہ دیتے ہوئے یہ بات ارشاد فرمائی : ” اللہ تعالیٰ اس شخص کو خوش رکھے ، جو میری بات سن کر اسے سیکھ لے ، کیونکہ بعض اوقات کوئی بات سیکھنے والا شخص عالم نہیں ہوتا ، اور بعض اوقات کوئی بات سیکھنے والا شخص ، وہ بات اس شخص تک منتقل کر دیتا ہے ، جو اُس سے زیادہ سمجھ بوجھ رکھتا ہے ( یعنی اُس سے زیادہ علم رکھتا ہے ) تین چیزیں ایسی ہیں ، جن کے بارے میں مؤمن کا دل کھوٹ کا شکار نہیں ہوتا ہے ، عمل کا اللہ تعالیٰ کیلئے خالص ہونا ، مسلمان حکمرانوں کی خیرخواہی ، اور مسلمانوں کی جماعت کے ساتھ رہنا ، کیونکہ اُن کی دعا ، اُن لوگوں کو بھی محیط ہوتی ہے ، جو ان کے ساتھ نہیں ہوتے ہیں “ ۔
یہ روایت امام طبرانی نے معجم کبیر میں نقل کی ہے ، اس کی سند میں ایک راوی عیسیٰ خیاط ہے ، جو متروک الحدیث ہے ۔

سیدنا نعمان بن بشیر رضی اللہ عنہ نے ، اپنے والد کے حوالے سے ، نبی اکرم صلی اللہ علیہ وسلم کا یہ فرمان نقل کیا ہے : ” اللہ تعالیٰ اس شخص کو خوش رکھے ، جو میری گفتگو سن کر اسے محفوظ رکھے ، بعض اوقات کوئی بات سیکھنے والا شخص عالم نہیں ہوتا اور بعض اوقات کوئی بات سیکھنے والا شخص ، وہ بات اُس شخص تک منتقل کر دیتا ہے ، جو اس سے زیادہ علم رکھتا ہے ، تین چیزیں ایسی ہیں ، جن کے بارے میں مؤمن کا دل کھوٹ کا شکار نہیں ہوتا ، عمل کا ، اللہ تعالیٰ کیلئے خالص ہونا ، مسلمان حکمرانوں کی خیرخواہی ، اور مسلمانوں کی جماعت کے ساتھ رہنا “ ۔
یہ روایت امام طبرانی نے معجم کبیر میں نقل کی ہے ، اس کی سند میں ایک راوی محمد بن کثیر کوفی ہے ، جسے امام بخاری رحمہ اللہ اور دیگر حضرات نے ضعیف قرار دیا ہے ، اور یحیی بن معین نے اُس کا ساتھ دیا ہے ۔

سیدنا ابوقرصافہ جندرہ بن خیثمہ روایت کرتے ہیں : نبی اکرم صلی اللہ علیہ وسلم نے ارشاد فرمایا ہے : ” اللہ تعالیٰ اُس شخص کو خوش رکھے ، جو میری گفتگو سن کر اسے محفوظ کر لے اور یاد رکھے ، بعض اوقات کوئی علمی بات سیکھنے والا شخص ، اس شخص تک ( وہ بات ) منتقل کر دیتا ہے ، جو اس سے زیادہ علم رکھتا ہے ، تین چیزوں کے بارے میں دل کھوٹ کا شکار نہیں ہوتا ہے ، عمل کا خالص ہونا ، حکمرانوں کی خیرخواہی ، اور جماعت کے ساتھ رہنا “ ۔ راوی بیان کرتے ہیں : مجھ تک یہ روایت پہنچی ہے : سیدنا ابوقرصافہ رضی اللہ عنہ کے صاحبزادے کو رومیوں نے قید کر لیا ، تو سیدنا ابوقرصافحہ ہیں رضی اللہ عنہ ہر نماز کے وقت ” عسقلان “ شہر کی فصیل کے پاس بلند آواز میں یہ کہتے تھے : اے فلاں ! نماز کا وقت ہو گیا ہے ، اُن کے بیٹے اُن کی آواز سنتے تھے اور انہیں جواب دیتے تھے ، حالانکہ ان دونوں کے درمیان سمندر کی چوڑائی تھی ۔
یہ روایت امام طبرانی نے معجم اوسط اور معجم صغیر میں نقل کی ہے ، اور اس کی سند ایسی ہے کہ میں نے اُس کے راویوں میں سے کسی کا ذکر کرتے ہوئے ، کسی کو نہیں دیکھا ہے ۔

سیدنا جابر رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا ہے : ” اللہ تعالیٰ اس شخص کو خوش رکھے ، جو میری گفتگو سن کر اسے محفوظ رکھے اور پھر اُس کی تبلیغ کر دے ، کیونکہ بعض اوقات ایسا ہوتا ہے کہ جس تک تبلیغ کی گئی ہوتی ہے ، وہ براہ راست سننے والے کے مقابلے میں ، اُس بات کو زیادہ بہتر طور پر محفوظ رکھتا ہے ، تین چیزیں ایسی ہیں ، جن کے بارے میں کسی مسلمان کا دل کھوٹ کا شکار نہیں ہوتا ہے ، عمل کا اللہ تعالیٰ کیلئے خالص ہونا ، مسلمان حکمرانوں کی خیرخواہی ، اور مسلمانوں کی جماعت کے ساتھ رہنا ، کیونکہ اُن کی دعا ان لوگوں کو بھی محیط ہوتی ہے ، جو اُن کے ساتھ نہیں ہوتے ہیں “ ۔
یہ روایت امام طبرانی نے معجم اوسط میں نقل کی ہے ، اس کی سند میں ایک راوی محمد بن موسیٰ بربری ہے ، امام دارقطنی رحمہ اللہ فرماتے ہیں : یہ قومی نہیں ہے ۔

سیدنا سعد بن ابی وقاص رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا ہے : ” اللہ تعالیٰ اُس شخص کو خوش رکھے ، جو میری گفتگو سن کر اسے محفوظ رکھے ، کیونکہ بعض اوقات کوئی بات سیکھنے والا شخص عالم نہیں ہوتا ، اور بعض اوقات ( ایسا بھی ہوتا ہے ) کوئی بات سیکھنے والا شخص ، وہ بات اُس شخص تک منتقل کر دیتا ہے ، جو اُس سے بڑا عالم ہوتا ہے “ ۔
یہ روایت امام طبرانی نے معجم اوسط میں نقل کی ہے ، اس کی سند میں ایک راوی سعید بن عبداللہ ہے ، میں نے کسی کو اس کا ذکر کرتے ہوئے نہیں دیکھا ہے ۔

سیدنا انس بن مالک رضی اللہ عنہ بیان کرتے ہیں : منی میں ، مسجد خیف میں ، ہمیں خطبہ دیتے ہوئے ، نبی اکرم صلی اللہ علیہ وسلم نے ارشاد فرمایا : ” اللہ تعالیٰ اُس شخص کو خوش رکھے ، جو میری گفتگو سن کر اسے محفوظ رکھے ، اور پھر اُسے اُس شخص تک پہنچا دے ، جس نے اُسے نہیں سنا تھا ، بعض اوقات کوئی بات سیکھنے والا شخص عالم نہیں ہوتا ، اور بعض اوقات کوئی بات سیکھنے والا شخص ، وہ بات اس شخص تک منتقل کر دیتا ہے ، جو اُس سے بڑا عالم ہوتا ہے ، تین چیزیں ایسی ہیں ، جن کے بارے میں مومن کا دل کھوٹ کا شکار نہیں ہوتا ہے ، عمل کا ، اللہ تعالیٰ کیلئے خالص ہونا ، اُن لوگوں کے لیے خیرخواہی ، جنہیں اللہ تعالیٰ نے تمہارا حکمران بنایا ہے ، اور مسلمانوں کی جماعت کے ساتھ رہنا کیونکہ اُن کی دعا ، پیچھے موجود افراد تک محیط ہوتی ہے “ ۔
یہ روایت امام طبرانی نے معجم اوسط میں نقل کی ہے ، اس کی سند میں ایک راوی عبدالرحمن بن زید بن اسلم ہے اور وہ ضعیف ہے ۔

سیدنا عبادہ بن صامت رضی اللہ عنہ بیان کرتے ہیں : نبی اکرم صلی اللہ علیہ وسلم یہ ارشاد فرمایا کرتے تھے : ” میں تمہارے سامنے کوئی بات کرتا ہوں ، تو تم میں سے موجود افراد ، غیر موجود افراد تک ، وہ بات پہنچا دیا کریں ۔
یہ روایت امام طبرانی نے معجم کبیر میں نقل کی ہے اور اس کے رجال کی توثیق کی گئی ہے ۔

سیدنا جبیر بن مطعم رضی اللہ عنہ بیان کرتے ہیں : میں نے نبی اکرم صلی اللہ علیہ وسلم کو یہ ارشاد فرماتے ہوئے سنا ہے : آپ صلی اللہ علیہ وسلم نے ” خیف “ میں ، یعنی منی کے خیف میں ، یہ بات ارشاد فرمائی : ” اللہ تعالیٰ اُس شخص کو خوش رکھے ، جو میری گفتگو سن کر اسے یاد اور محفوظ رکھے اور پھر وہ بات اس شخص تک پہنچا دے جس نے اُسے نہیں سنا تھا ، بعض اوقات کوئی بات سیکھنے والا شخص عالم نہیں ہوتا ، اور بعض اوقات کوئی بات سیکھنے والا شخص ، وہ بات اس شخص تک منتقل کر دیتا ہے ، جو اُس سے بڑا علم ہوتا ہے ، تین چیزیں ایسی ہیں ، جن کے بارے میں مومن کا دل کھوٹ کا شکار نہیں ہوتا ہے ، عمل کا اللہ تعالیٰ کیلے خالص ہونا ، مسلمان حکرانوں کی خیرخواہی ، اور مسلمانوں کی جماعت کے ساتھ رہنا ، کیونکہ اُن کی دعا ، غیر موجود افراد تک محیط ہوتی ہے “ ۔ ( علامہ ہیثمی فرماتے ہیں : ) میں یہ کہتا ہوں : یہ روایت امام ابن ماجہ نے اختصار کے ساتھ نقل کی ہے ۔
یہ روایت امام طبرانی نے معجم کبیر میں اور امام أحمد نے نقل کی ہے ، اس کی سند میں یہ مذکور ہے : اسے ابن اسحاق نے ، زہری سے روایت کیا ہے ، اور وہ تدلیس کرنے والا شخص ہے ، ایک اور سند کے ساتھ ، یہ صالح بن کیسان کے حوالے سے ، زہری سے منقول ہے ، اس روایت کے رجال کی توثیق کی گئی ہے ۔

سیدنا وابصہ رضی اللہ عنہ بیان کرتے ہیں : میں نے ، نبی اکرم صلی اللہ علیہ وسلم کو حجۃ الوداع کے موقعہ پر ، خطبے کے دوران ، یہ ارشاد فرماتے ہوئے سنا ہے : ” موجود ( فرد ) غیر موجود تک تبلیغ کر دے “ ۔
یہ روایت امام طبرانی نے معجم کبیر میں نقل کی ہے ، اس کی سند میں ایک راوی طلحہ بن زید ہے ، جس پر حدیث ایجاد کرنے کا الزام عائد کیا گیا ہے ، یہ روایت امام بزار نے ایک طویل روایت کے طور پر نقل کی ہے ، جس کی سند اس سے زیادہ بہتر ہے ، اور وہ روایت آگے آ رہی ہے ۔

سیدنا وابصہ رضی اللہ عنہ کے بارے میں یہ بات منقول ہے : عیدالفطر یا شاید عیدالاضحی کے دن ، وہ ” رقہ “ کی سب سے بڑی مسجد میں ، لوگوں کے سامنے کھڑے ہوئے اور یہ بات بیان کی : ” حجۃ الوداع کے موقع پر ، میں نبی اکرم صلی اللہ علیہ وسلم کے پاس موجود تھا ، آپ صلی اللہ علیہ وسلم نے لوگوں کو خطبہ دیتے ہوئے یہ بات ارشاد فرمائی : ” اے لوگو ! کون سا مہینہ زیادہ حرمت والا ہے ؟ لوگوں نے جواب دیا : یہ ہے ، آپ نے فرمایا : اے لوگو ! کون سا شہر زیادہ حرمت والا ہے ؟ لوگوں نے جواب دیا : یہ ہے ، نبی اکرم صلی اللہ علیہ وسلم نے فرمایا : تو تمہاری جانیں ، تمہارے مال اور تمہاری عزتیں ، تمہارے لئے اسی طرح قابل احترام ہیں ، جس طرح تمہارے اس دن کی ، اس مہینے میں ، اس شہر میں حرمت ہے اور ( یہ اُس وقت تک قابل احترام رہیں گے ) جب تک تم اپنے پروردگار کی بارگاہ میں حاضر نہیں ہو جاتے ، کیا میں نے تبلیغ کر دی ہے ؟ لوگوں نے جواب دیا : جی ہاں ! تو نبی اکرم صلی اللہ علیہ وسلم نے اپنے دونوں ہاتھ آسمان کی طرف بلند کیے اور ارشاد فرمایا : اے اللہ ! گواہ ہو جا ! پھر آپ صلی اللہ علیہ وسلم نے ارشاد فرمایا : ” اے لوگو ! تم میں سے موجود ( افراد ) غیر موجود ( افراد ) تک تبلیغ کر دیں “ ۔ اُس کے بعد ، سیدنا وابصہ رضی اللہ عنہ نے سامعین سے فرمایا : تم لوگ قریب ہو جاؤ ! تاکہ ہم تمہیں اُسی طرح تبلیغ کر دیں ، جس طرح نبی اکرم صلی اللہ علیہ وسلم نے ہم سے فرمایا تھا ۔
یہ روایت امام بزار نے نقل کی ہے اور اس کے رجال کی توثیق کی گئی ہے ۔

مکحول بیان کرتے ہیں : میں ابن ابوزکریا اور سلیمان بن حبیب ” حمص “ میں ، سیدنا ابوامامہ رضی اللہ عنہ کی خدمت میں حاضر ہوئے ، ہم نے انہیں سلام کیا تو انہوں نے فرمایا : ” تمہاری یہ محفل ( یا نشست ) اللہ تعالیٰ کی طرف سے تمہارے لیے تبلیغ ہے ، اور یہ تمہارے خلاف اُس کی حجت ہے ، نبی اکرم صلی اللہ علیہ وسلم نے تبلیغ کی تھی ، تو تم بھی تبلیغ کرو ! “ ۔
یہ روایت امام طبرانی نے معجم کبیر میں نقل کی ہے ۔

ایک روایت میں یہ مذکور ہے : سلیم بن عامر بیان کرتے ہیں : ہم سیدنا ابوامامہ رضی اللہ عنہ کے پاس بیٹھا کرتے تھے ، تو وہ ہمیں نبی اکرم صلی اللہ علیہ وسلم کے حوالے سے بہت سی احادیث بیان کرتے تھے ، جب وہ خاموش ہوتے ( یعنی جب وہ احادیث بیان کر لیتے تھے ) تو یہ فرماتے تھے : کیا تم نے سمجھ لیا ہے ؟ اب تم تبلیغ کرنا ! جس طرح تمہیں تبلیغ کی گئی ہے ۔
یہ دونوں روایات امام طبرانی نے معجم کبیر میں نقل کی ہیں اور ان دونوں کی سند حسن ہے ۔

سیدنا عبداللہ بن عباس رضی اللہ عنہما فرماتے ہیں : اس امت کے ابتدائی حصے میں کمسن لوگ ، بڑے لوگوں سے سماع کرتے ہیں ( یعنی علم حاصل کرتے ہیں ) اور اس امت کے آخری حصے میں ، بڑی عمر کے لوگ ، کمسن لوگوں سے سماع کریں گے ، سیدنا عبداللہ بن عباس رضی اللہ عنہما سے دریافت کیا گیا : اس کی وجہ کیا ہو گی ؟ انہوں نے جواب دیا : کیونکہ کمسن لوگوں نے سماع کیا ہو گا ، اور بڑی عمر کے لوگوں نے سماع نہیں کیا ہو گا ۔
یہ روایت امام طبرانی نے معجم کبیر میں نقل کی ہے ، اس کی سند میں ایک راوی نضر ابوعمر ہے اور وہ متروک ہے ۔