مجمع الزوائد ومنبع الفوائد

سیدنا انس رضی اللہ عنہ بیان کرتے ہیں : نبی اکرم صلی اللہ علیہ وسلم یہ فرماتے تھے : ” اسلام علانیہ ہوتا ہے ، اور ایمان دل میں ہوتا ہے ، پھر آپ صلی اللہ علیہ وسلم نے اپنے سینے کی طرف اپنے دست مبارک کے ذریعے تین مرتبہ اشارہ کیا ، پھر آپ نے ارشاد فرمایا : تقویٰ یہاں ہے ، تقویٰ یہاں ہے ۔
یہ روایت امام أحمد اور امام ابویعلیٰ نے مکمل روایت کے طور پر نقل کی ہے ، جبکہ امام بزار نے اسے اختصار کے ساتھ نقل کیا ہے علی بن مسعدہ نامی راوی کے علاوہ ، اس کے تمام رجال صحیح کے رجال ہیں ، اور اُسے بھی ابن حبان ، ابوداؤد طیالسی ، ابوحاتم اور ابن معین نے ثقہ قرار دیا ہے ، جبکہ دیگر حضرات نے اسے ضعیف قرار دیا ہے ۔

سیدنا ابوسعید خدری رضی اللہ عنہ نبی اکرم صلی اللہ علیہ وسلم کا فرمان نقل کرتے ہیں : ” دنیا میں ایمان والے تین قسم کے ہیں ، وہ لوگ ، جو اللہ اور اس کے رسول پر ایمان لائے اور پھر کسی شک کا شکار نہیں ہوئے ، اور انہوں نے اپنے اموال اور اپنی جانوں کے ہمراہ ، اللہ کی راہ میں جہاد کیا ( اور دوسری قسم ، وہ اہل ایمان ہیں ) کہ دوسرے لوگ اپنے اموال اور اپنی جانوں کے حوالے سے اُن سے محفوظ ہوں ( اور تیسری قسم ، وہ اہل ایمان ہیں ) کہ جب کوئی لالچ کی چیز ، ان کے سامنے آئے ، تو وہ اللہ کی رضا کے لیے اُسے ترک کر دیں “ ۔
یہ روایت امام أحمد نے نقل کی ہے ، اس کی سند میں ایک راوی ” دراج “ ہے ، جس کی توثیق کی گئی ہے ، تاہم ایک سے زیادہ افراد نے اسے ضعیف قرار دیا

سیدنا عبداللہ بن عباس رضی اللہ عنہما روایت کرتے ہیں : نبی اکرم صلی اللہ علیہ وسلم نے ارشاد فرمایا ہے : ” ایمان کے حوالے سے آدمی کے لیے اتنا ہی کافی ہے کہ وہ یہ کہے : کہ میں اللہ تعالٰی کے پروردگار ہونے ، سیدنا محمد ( صلی اللہ علیہ وسلم ) کے رسول ہونے اور اسلام کے دین ہونے سے راضی ہوں ( یعنی ان پر ایمان رکھتا ہوں ) “ ۔
یہ روایت امام طبرانی نے معجم اوسط میں نقل کی ہے اور انہوں نے یہ بات بیان کی ہے : یہ روایت ہشام بن عروہ کے حوالے سے صرف محمد بن عمیر نے نقل کی ہے ۔ ( علامہ ہیثمی کہتے ہیں : ) میں یہ کہتا ہوں : ابن حبان نے اس راوی کا تذکرہ کتاب ” الثقات “ میں کیا ہے ۔

سیدنا جابر رضی اللہ عنہ بیان کرتے ہیں : نبی اکرم صلی اللہ علیہ وسلم نے سیدنا سحیم رضی اللہ عنہ کو یہ حکم دیا : کہ وہ لوگوں کے درمیان یہ اعلان کر دیں : ” جنت میں ، صرف مؤمن ہی داخل ہو گا “ ۔
یہ روایت امام أحمد نے نقل کی ہے اور اس کی سند میں ایک راوی ابن لہیعہ ہے اور اس کی سند حسن ہے ۔

سیدنا عبداللہ بن مسعود رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا ہے : ” بے شک اللہ تعالیٰ نے تمہارے درمیان تمہارے اخلاق اُسی طرح تقسیم کیے ہیں ، جس طرح اُس نے تمہارے درمیان تمہارا رزق تقسیم کیا ہے ، بے شک اللہ تعالیٰ دنیا اسے بھی عطا کرتا ہے ، جسے وہ پسند کرتا ہے اور اُسے بھی عطا کرتا ہے ، جسے وہ پسند نہیں کرتا ہے ، لیکن وہ دین صرف اُسے عطا کرتا ہے ، جسے وہ پسند کرتا ہے ، تو جس شخص کو وہ دین عطا کر دے ( تو اس کا مطلب یہ ہو گا : ) کہ وہ اُسے پسند کرتا ہے ، اس ذات کی قسم ! جس کے دست قدرت میں میری جان ہے ، کوئی بندہ اس وقت تک مسلمان نہیں ہوتا ، جب تک اُس کا دل اور زبان مسلمان نہیں ہوتے ( یا سلامت نہیں رہتے ) اور وہ اُس وقت تک مؤمن نہیں ہوتا ، جب تک اُس کا پڑوی اُس کی زیادتی سے محفوظ نہ ہو ، میں نے عرض کی : اے اللہ کے نبی ! اُس کی زیادتیوں سے مراد کیا ہے ؟ نبی اکرم صلی اللہ علیہ وسلم نے فرمایا : اس کا دھوکہ دینا اور ظلم کرنا ۔ ۔ ۔ ۔ ۔ ۔ ۔ ۔ ۔ ( نبی اکرم صلی اللہ علیہ وسلم نے مزید ارشاد فرمایا : ) ایسا نہیں ہوتا کہ آدمی نے حرام طور پر مال کمایا ہو ، اور پھر اس میں سے ( اللہ کی راہ میں ) خرچ کیا ہو ، تو اس کے لیے اُس مال میں برکت ڈال دی گئی ہو ، یا اُس شخص نے اُس مال میں سے صدقہ کیا ہو ، تو وہ اُس کی طرف سے قبول ہو جائے ، اگر وہ ایسا مال اپنے پیچھے چھوڑ کر جاتا ہے ، تو وہ مال جہنم کی طرف جانے کے لیے اُس کا زاد سفر ہو گا ، بے شک اللہ تعالٰی برائی کو برائی کے ذریعے نہیں مٹاتا ہے ، بلکہ وہ برائی کو ، اچھائی کے ذریعے مٹاتا ہے ، کیونکہ خبیث چیز کسی خبیث چیز کو نہیں مٹاتی ہے ۔
یہ روایت امام أحمد نے نقل کی ہے اور اس کی سند کے بعض راوی مستور ہیں ، جبکہ زیادہ تر ثقہ ہیں ۔

سیدنا انس بن مالک رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” بندے کا ایمان اُس وقت تک ٹھیک نہیں ہوتا ، جب تک اُس کا دل ٹھیک نہ ہو ، اور اُس کا دل اُس وقت تک ٹھیک نہیں ہوتا ، جب تک اُس کی زبان ٹھیک نہ ہو ، اور آدمی اُس وقت تک جنت میں داخل نہیں ہو گا ، جب تک اُس کا پڑوسی اُس کی زیادتیوں سے محفوظ نہ ہو “ ۔
یہ روایت امام أحمد نے نقل کی ہے ، اس کی سند میں ایک راوی علی بن مسعدہ ہے ، جسے ایک جماعت نے ثقہ قرار دیا ہے اور دیگر حضرات نے اس کو ضعیف قرار دیا ہے ۔

سیدنا ابورزین عقیلی رضی اللہ عنہ بیان کرتے ہیں : میں اللہ کے رسول صلی اللہ علیہ وسلم کی خدمت میں حاضر ہوا ، میں نے عرض کی : یا رسول اللہ ! اللہ تعالیٰ مردوں کو کیسے زندہ کرے گا ؟ نبی اکرم صلی اللہ علیہ وسلم نے دریافت کیا : کیا کبھی تمہارا گزر ، اپنے علاقے میں کسی ایسی زمین کے پاس سے ہوا ہے ؟ جو پہلے بنجر تھی اور پھر جب تم اُس کے پاس سے گزرے ، تو وہ سرسبز و شاداب ہو چکی ہو ؟ سیدنا ابورزین رضی اللہ عنہ نے جواب دیا : جی ہاں ! نبی اکرم صلی اللہ علیہ وسلم نے ارشاد فرمایا : اسی طرح ( انسانوں کو ) دوبارہ زندہ کیا جائے گا ، انہوں نے عرض کی : یا رسول اللہ ! ایمان سے مراد کیا ہے ؟ نبی اکرم صلی اللہ علیہ وسلم نے ارشاد فرمایا : یہ کہ تم اس بات کی گواہی دو کہ اللہ تعالیٰ کے علاوہ اور کوئی معبود نہیں ہے ، صرف وہی معبود ہے ، اُس کا کوئی شریک نہیں ہے اور سیدنا محمد صلی اللہ علیہ وسلم اس کے بندے اور اُس کے رسول ہیں ، اور یہ کہ اللہ اور اُس کا رسول ، تمہارے نزدیک ان دونوں کے علاوہ ، ہر ایک سے زیادہ محبوب ہوں ، اور یہ کہ تم آگ میں جل جاؤ یہ تمہارے نزدیک اس سے زیادہ پسندیدہ ہو ، کہ تم کسی کو اللہ کا شریک قرار دو ، اور یہ کہ تم کسی ایسے شخص کے ساتھ محبت رکھو ، جو نسب والا نہ ہو ( یعنی جس کے ساتھ کوئی نسبی تعلق نہ ہو ) تم صرف اللہ تعالیٰ کی خاطر ، اُس سے محبت رکھو ! جب تم ایسے ہو جاؤ گے ، تو ایمان کی محبت تمہارے دل میں یوں داخل ہو جائے گی ، جیسے سخت گرم دن میں ، پانی کی محبت پیاسے شخص ( کے دل میں ) داخل ہو جاتی ہے ، میں نے عرض کی : یا رسول اللہ ! میں یہ بات کیسے جان سکتا ہوں کہ میں مؤمن ہوں ؟ نبی اکرم صلی اللہ علیہ وسلم نے ارشاد فرمایا : میری امت کا ( راوی کو شک ہے ، یا شاید یہ الفاظ ہیں : ) اس امت کا جو بھی شخص نیکی کرے ، اور وہ یہ جانتا ہو کہ یہ نیکی ہے ، اور اللہ تعالیٰ اُسے اس کی جزائے خیر عطا کرے گا ، یا جو شخص کسی برائی کا ارتکاب کرے اور پھر اُس کے حوالے سے ، اللہ تعالیٰ سے مغفرت طلب کرے ، اور وہ یہ بات جانتا ہو کہ اللہ تعالیٰ ہی مغفرت کر سکتا ہے ، تو ایسا شخص مؤمن ہو گا ۔
یہ روایت امام أحمد نے نقل کی ہے ، اس کی سند میں ایک راوی سلیمان بن موسیٰ ہے ، جسے یحییٰ بن معین اور ابوحاتم نے ثقہ قرار دیا ہے ، جبکہ دیگر حضرات نے اسے ضعیف قرار دیا ہے ۔

سیدنا عمرو بن عبسہ رضی اللہ عنہ بیان کرتے ہیں ۔ میں اللہ کے رسول کی خدمت میں حاضر ہوا ، میں نے دریافت کیا : دین میں آپ صلی اللہ علیہ وسلم کا ساتھ دینے والے کون ہیں ؟ نبی اکرم صلی اللہ علیہ وسلم نے جواب دیا : ایک آزاد شخص اور ایک غلام ، میں نے دریافت کیا : اسلام سے مراد کیا ہے ؟ ( یعنی اسلام کی بنیادی تعلیمات کیا ہیں ؟ ) نبی اکرم صلی اللہ علیہ وسلم نے ارشاد فرمایا : اچھی گفتگو کرنا اور کھانا کھلانا ، میں نے دریافت کیا : ایمان سے مراد کیا ہے ؟ نبی اکرم نے جواب دیا : صبر اور نرمی ، میں نے دریافت کیا : اسلام میں ( کون سا شخص ) سب سے بہتر ہے ؟ نبی اکرم صلی اللہ علیہ وسلم نے ارشاد فرمایا : جس کی زبان اور ہاتھ سے ( دوسرے ) مسلمان سلامت رہیں ، میں نے دریافت کیا : ایمان ( یعنی مؤمن کی ) کون کسی چیز سب سے زیادہ فضیلت رکھتی ہے ؟ نبی اکرم صلی اللہ علیہ وسلم نے ارشاد فرمایا : اچھے اخلاق ، میں نے دریافت کیا : کون سی نماز زیادہ فضیلت رکھتی ہے ؟ نبی اکرم صلی اللہ علیہ وسلم نے ارشاد فرمایا : طویل قیام والی ، میں نے دریافت کیا : کون سی ہجرت زیادہ فضیلت رکھتی ہے ؟ نبی اکرم صلی اللہ علیہ وسلم نے ارشاد فرمایا : یہ کہ تم اس چیز سے لاتعلق ہو جاؤ ، جو تمہارے پروردگار کو ناپسند ہو ۔
( علامہ ہیثمی فرماتے ہیں : ) میں یہ کہتا ہوں : کہ امام مسلم نے اس روایت میں سے یہ الفاظ نقل کیے ہیں : ” اس دین میں آپ کے ساتھ کون ہے ؟ نبی اکرم صلی اللہ علیہ وسلم نے فرمایا : ایک آزاد شخص اور ایک غلام “ ۔
یہ روایت امام أحمد نے نقل کی ہے ، اس کی سند میں ایک راوی شہر بن حوشب ہے ، اس میں موجود ضعف کے باوجود اس کو ثقہ قرار دیا گیا ہے ۔

سیدنا انس رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا ہے : ” مومن وہ ہے ، جس سے لوگ امان میں ہوں ، اور مسلمان وہ ہے ، جس کی زبان اور ہاتھ سے مسلمان سلامت ( یعنی محفوظ ، رہیں ) ، اور مہاجر وہ ہے ، جو برائی سے لاتعلق ہو جائے ، اس ذات کی قسم ! جس کے دست قدرت میں میری جان ہے ، ایسا بندہ جنت میں داخل نہیں ہو گا ، جس کا پڑوسی اُس کی زیادتیوں سے محفوظ نہ ہو “ ۔
یہ روایت امام أحمد ، امام ابویعلیٰ اور امام بزار نے نقل کی ہے ، اس کے رجال صحیح کے رجال ہیں ، صرف علی بن زید کا معاملہ مختلف ہے ، اس روایت کے بارے میں حمید اور یونس بن عبید نے اس کی مشارکت کی ہے ۔

سہل بن معاذ ، اپنے والد کے حوالے سے ، نبی اکرم صلی اللہ علیہ وسلم کا یہ فرمان نقل کرتے ہیں : ” سلامتی والا وہ ہے ، جس کی زبان اور ہاتھ سے لوگ محفوظ رہیں “ ۔
یہ روایت امام أحمد نے اور امام طبرانی نے معجم کبیر میں نقل کی ہے ، اس کی سند میں یہ مذکور ہے کہ اسے ابن لبیعہ نے زبان سے روایت کیا ہے اور یہ دونوں ضعیف ہیں ، زبان کو ابوحاتم نے ثقہ قرار دیا ہے ، زبان نے ہی یہ روایت لفظ ” سالم “ کی جگہ لفظ ” مسلم “ کے ساتھ نقل کی ہے ، لیکن اس روایت کی سند میں ابن لہیعہ نہیں ہے ۔

سیدنا انس رضی اللہ عنہ بیان کرتے ہیں : نبی اکرم صلی اللہ علیہ وسلم سے مؤمن کے بارے میں سوال کیا گیا ، تو آپ نے ارشاد فرمایا : جس سے اُس کا پڑوسی محفوظ ہو اور جس کی زیادتی کا ( اُس کے پڑوسی کو ) خوف نہ ہو ۔
اس کے بعد راوی نے پوری حدیث نقل کی ہے ، اسے امام ابویعلیٰ نے روایت کیا ہے اور اس کی سند میں ایک راوی مبارک بن فضالہ ہے ، اکثر حضرات نے اُس کی توثیق کی ہے ۔

سیدنا عبداللہ بن عباس : بیان کرتے ہیں : نبی اکرم صلی اللہ علیہ وسلم سیدنا عمر رضی اللہ عنہ کے پاس تشریف لائے ، آپ صلی اللہ علیہ وسلم کے ساتھ آپ صلی اللہ علیہ وسلم کے کچھ اصحاب بھی تھے ، نبی اکرم صلی اللہ علیہ وسلم نے دریافت کیا : کیا تم لوگ مؤمن ہو ؟ تو وہ لوگ خاموش رہے ، ایسا تین مرتبہ ہوا ، آخری مرتبہ میں سیدنا عمر رضی اللہ عنہ نے کہا: جی ہاں ! اہم اس چیز پر ایمان رکھتے ہیں ، جو آپ ہمارے پاس لے کر آئے ہیں ، ہم خوشحالی پر اللہ کی حمد بیان کرتے ہیں اور آزمائش پر صبر سے کام لیتے ہیں اور تقدیر کے فیصلے پر ایمان رکھتے ہیں ، تو نبی اکرم صلی اللہ علیہ وسلم نے ارشاد فرمایا : ” ( تم لوگ ) مؤمن ہو رب کعبہ کی قسم ! “ ۔
یہ روایت امام طبرانی نے معجم اوسط میں نقل کی ہے ، جبکہ معجم کبیر کی روایت میں یہ الفاظ ہیں : ” اُن میں سے آخری مرتبہ میں ، سیدنا عمر رضی اللہ عنہ نے عرض کی : جی ہاں ! یا رسول اللہ ! نبی اکرم صلی اللہ علیہ وسلم نے دریافت کیا : وہ کیسے ؟ سیدنا عمر رضی اللہ عنہ نے عرض کی : ہم اللہ تعالیٰ سے ثواب کی امید رکھتے ہیں ، تو نبی اکرم صلی اللہ علیہ وسلم نے ارشاد فرمایا : ( تم لوگ ) مؤمن ہو رب کعبہ کی قسم ! ۔
اس کی سند میں ایک راوی یوسف بن میمون ہے اسے ابن حبان نے ثقہ قرار دیا ہے اکثر حضرات نے اسے ضعیف قرار دیا ہے ۔

سیدنا عبداللہ بن زید انصاری رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا ہے : ” جب تم میں کسی سے یہ پوچھا: جائے : کیا تم مومن ہو ؟ تو وہ شخص شک کا اظہار نہ کرے “ ۔
یہ روایت امام طبرانی نے معجم کبیر میں نقل کی ہے اور اس کی سند میں ایک راوی أحمد بن بدیل ہے ، جسے امام نسائی رحمہ اللہ اور ابوحاتم نے ثقہ قرار دیا ہے ، جبکہ دیگر حضرات نے اسے ضعیف قرار دیا ہے ۔

علقمہ بیان کرتے ہیں : سیدنا عبداللہ بن مسعود رضی اللہ عنہ کی موجودگی میں ، ایک شخص نے یہ کہہ دیا : بے شک میں مومن ہوں سیدنا عبداللہ نے فرمایا : تم یہ بھی کہہ دو : بے شک میں جنتی ہوں ، لیکن ہم ( تو یہ کہتے ہیں : ) ہم اللہ تعالی اس کے فرشتوں اُس کی کتابوں ، اور اُس کے رسولوں پر ایمان رکھتے ہیں ۔
یہ روایت امام طبرانی نے معجم کبیر میں نقل کی ہے اور اس کے رجال ثقہ ہیں ۔

سیدنا عثمان بن سہیل بن حنیف رضی اللہ عنہ فرماتے ہیں : نبی اکرم صلی اللہ علیہ وسلم کے مکہ سے ( مدینہ منورہ ) تشریف لانے سے پہلے آپ صلی اللہ علیہ وسلم لوگوں کو اللہ پر ایمان لانے کی دعوت دیتے تھے اور قول کے ذریعے اُس کی تصدیق کرنے ( کی دعوت دیتے تھے ) اس میں عمل کی شرط نہیں ہوتی تھی ، اس وقت قبلہ ، بیت المقدس تھا ، جب نبی اکرم صلی اللہ علیہ وسلم ہجرت کر کے ہماری طرف تشریف لے آئے ، اور فرائض کے احکام نازل ہو گئے ، تو مدینہ نے مکہ ( یعنی وہاں کے احکام ) کو منسوخ کر دیا اور اس بارے میں قول ( یعنی ایمان کے لیے عمل کی شرط کے بغیر ، صرف زبانی اقرار کافی ہونے کے حکم کو منسوخ کر دیا گیا ) اور بیت الحرام ( کے قبلہ ہونے کے حکم نے ) بیت المقدس کو منسوخ کر دیا ، تو ایمان ، قول اور عمل ( کے مجموعہ کا نام ) ہو گیا ۔
یہ روایت امام طبرانی نے معجم کبیر میں نقل کی ہے ، اس کی سند میں ( راویوں کی ) ایک جماعت ایسی ہے ، جن سے میں واقف نہیں ہوں ۔

سیدنا ابوامامہ رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا ہے : ” تین چیزیں ، جس شخص میں موجود ہوں گی ، وہ ایمان کی حلاوت کو پا لے گا ، ایک یہ کہ اللہ اور اس کا رسول اس کے نزدیک ، ان دونوں کے علاوہ ، ہر ایک سے زیادہ محبوب ہوں ، اور یہ کہ وہ کسی شخص کے ساتھ صرف ، اللہ تعالی کی خاطر محبت رکھے ، اور یہ کہ جب اللہ تعالٰی نے اُسے کفر سے بچا لیا ہے ، تو وہ کفر کی طرف واپس نہ جائے ( وہ کفر کی طرف واپس جانے کو ) اسی طرح ناپسند کرے ، جس طرح وہ آگ میں ڈالے جانے کو ناپسند کرتا ہے “ ۔
یہ روایت امام طبرانی نے معجم کبیر میں نقل کی ہے اور اس کی سند میں ایک راوی فضال بن جبیر ہے ، جس سے استدلال کرنا جائز نہیں ہے ۔

قتادہ بیان کرتے ہیں : سیدنا عبداللہ بن مسعود رضی اللہ عنہ فرماتے ہیں : ” تین چیزیں جس میں ہوں گی ، وہ اُن کی وجہ سے ایمان کی حلاوت پا لے گا حق کے بارے میں بحث ( کو ترک کرنا ) مذاق کے طور پر جھوٹ بولنے کو ترک کرنا اور اس بات کا یقین رکھنا کہ جو چیز آدمی کو ملنی ہے ، وہ اُسے ملے بغیر نہیں رہے گی ، اور جو چیز اسے نہیں ملنی ہے ، وہ ( کسی صورت میں ) نہیں ملے گی “ ۔
یہ روایت امام طبرانی نے نقل کی ہے ، اور قتادہ نامی راوی نے سیدنا عبداللہ بن مسعود رضی اللہ عنہ سے سماع نہیں کیا ہے ۔

یحییٰ بن سعید نے نوفل بن مسعود کا یہ بیان نقل کیا ہے : ہم لوگ سیدنا انس بن مالک رضی اللہ عنہ کی خدمت میں حاضر ہوئے اور ہم نے کہا: آپ ہمیں کوئی ایسی حدیث بیان کیجیے ! جو آپ نے نبی اکرم صلی اللہ علیہ وسلم کی زبانی سنی ہو ، تو انہوں نے فرمایا : میں نے نبی اکرم صلی اللہ علیہ وسلم کو یہ ارشاد فرماتے ہوئے سنا ہے : ” تین چیزیں ، جس شخص میں ہوں گی ، اُسے آگ پر حرام قرار دیدیا جائے گا ، اور آگ کو اُس پر حرام قرار دیدیا جائے گا اللہ تعالیٰ پر ایمان رکھنا ، اللہ تعالیٰ سے محبت رکھنا ، اور آگ میں ڈالے جا کر جل جانا ، اُس کے نزدیک اس سے زیادہ پسندیدہ ہو ، کہ وہ کفر کی طرف واپس چلا جائے “ ۔
( علامہ ہیثمی فرماتے ہیں : ) میں یہ کہتا ہوں : اُن کے حوالے سے ” صحیح “ میں یہ حدیث مذکور ہے ، لیکن وہ اس سیاق کے بغیر ہے ۔
یہ روایت امام أحمد اور امام ابویعلیٰ نے نقل کی ہے ، اور نوفل بن مسعود کے بارے میں ، میں نے کسی کو نہیں دیکھا ، کہ کسی نے اُس کے حالات ذکر کئے ہوں ، صرف امام مزی نے یحییٰ القطان کے حالات میں یہ بات کہی ہے : انہوں نے سیدنا انس رضی اللہ عنہ کے شاگرد نوفل بن مسعود سے روایات نقل کی ہیں ۔

سیدنا انس بن مالک رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” تین چیزیں ، جس شخص میں ہوں گی ، وہ ایمان کا ذائقہ چکھ لے گا ، وہ شخص کہ کوئی بھی چیز اُس کے نزدیک ، اللہ اور اُس کے رسول سے زیادہ محبوب نہ ہو ، اور وہ شخص کہ جس کے نزدیک آگ میں جل جانا اس سے زیادہ محبوب ہو کہ وہ اپنے دین ( یعنی اسلام ) کو چھوڑ دے ، اور وہ شخص جو اللہ تعالیٰ کی خاطر ( کسی سے ) محبت رکھتا ہو اور اللہ تعالٰی کی خاطر ( کسی سے ) بغض رکھتا ہو “ ۔
یہ روایت امام طبرانی نے معجم کبیر اور معجم صغیر میں نقل کی ہے ، اور یہ ” صحیح “ میں بھی منقول ہے ، صرف یہ الفاظ نہیں ہیں : ” وہ اللہ تعالیٰ کی خاطر بغض رکھتا ہو “ اس کی سند میں ایک راوی ابوحویرث ہے ، جسے امام مالک اور یحییٰ بن معین نے ضعیف قرار دیا ہے ، جبکہ ابن حبان نے اُسے ثقہ قرار دیا ہے ۔

سیدنا ابوامامہ رضی اللہ عنہ بیان کرتے ہیں : ایک شخص نے دریافت کیا : یا رسول اللہ ! مسلمان کون ہے ؟ نبی اکرم صلی اللہ علیہ وسلم نے ارشاد فرمایا : وہ جس کی زبان اور ہاتھ سے ( دوسرے ) مسلمان سلامت ( یعنی محفوظ ) رہیں ۔
یہ روایت امام طبرانی نے معجم کبیر میں اور معجم اوسط میں نقل کی ہے ، اس کی سند میں ایک راوی فضال بن جبیر ہے ، جس سے استدلال کرنا جائز نہیں ہے ۔

سیدنا بلال بن حارث مزنی رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” مسلمان وہ ہے ، جس کی زبان اور ہاتھ سے ، ( دوسرے ) مسلمان محفوظ رہیں “ ۔
یہ روایت امام طبرانی نے معجم کبیر اور معجم اوسط میں نقل کی ہے اور اس کے رجال کی توثیق کی گئی ہے ۔

سیدنا فضالہ بن عبید رضی اللہ عنہ روایت کرتے ہیں : حجتہ الوداع کے دن نبی اکرم صلی اللہ علیہ وسلم نے ارشاد فرمایا : ” اور مسلمان وہ ہے ، جس کی زبان اور ہاتھ سے ( دوسرے ) مسلمان محفوظ رہیں “ ۔
یہ روایت امام طبرانی نے معجم کبیر میں نقل کی ہے اور اس کی سند حسن ہو گی ، اگر اللہ نے چاہا ۔