مجمع الزوائد ومنبع الفوائد

سیدنا جابر بن عبداللہ رضی اللہ عنہ بیان کرتے ہیں : نبی اکرم صلی اللہ علیہ وسلم کے بارے میں ہمارے پاس جو سب سے پہلی اطلاع آئی تھی ، اس کا پس منظر یہ ہے کہ ایک عورت جس کا ایک تابع ( یعنی جنّ یا مؤکل ) تھا ، وہ پرندے کی شکل میں اس کے پاس آیا ، اور ان کے کھجور کے درخت پر بیٹھ گیا ، اس عورت نے کہا: کیا تم نیچے نہیں آؤ گے ؟ تاکہ ہم تمہیں خبر دیں اور تم ہمیں خبر دو ، تو اس نے کہا: ” مکہ میں ایک صاحب کا ظہور ہوا ہے ، جنہوں نے ہم پر زنا کو حرام قرار دے دیا ہے ، اور انہوں نے ہمیں کسی ایک جگہ ٹھہرنے سے روک دیا ہے ۔ “
یہ روایت امام أحمد اور امام طبرانی نے معجم اوسط میں نقل کی ہے ، اور اس کے رجال کی توثیق کی گئی ہے ۔

مجاہد بیان کرتے ہیں : ایک بزرگ ، جنہوں نے زمانہ جاہلیت پایا تھا ، انہوں نے ہمیں بتایا ، ہم اس وقت جنگ روڈس میں موجود تھے ، اُن صاحب کا نام سیدنا ابن عبس رضی اللہ عنہ تھا ، وہ بیان کرتے ہیں : ایک مرتبہ میں اپنے گھر والوں کی گائے لے کر جا رہا تھا ، اسی دوران میں نے اس کے پیٹ سے آواز سنی : اے ذریع کی آل ! یہ فصیح قول ہے ، وہ شخص جو بلند آواز میں پکار کر یہ کہہ رہا ہے کہ اللہ تعالیٰ کے علاوہ اور کوئی معبود نہیں ہے ، راوی کہتے ہیں : ہم لوگ مکہ آئے ، تو ہم نے وہاں نبی اکرم صلی اللہ علیہ وسلم کو پایا کہ آپ کا ظہور ہو چکا ہے ۔
یہ روایت امام أحمد نے نقل کی ہے ، اور اس کے رجال ثقہ ہیں ۔

سیدنا جبیر بن مطعم رضی اللہ عنہ بیان کرتے ہیں : نبی اکرم صلی اللہ علیہ وسلم کی بعثت سے ایک ماہ پہلے ہم اپنے بت کے اردگرد موجود تھے ، ہم نے ایک اونٹ قربان کیا تھا ، اسی دوران بت کے پیٹ میں سے کسی پکارنے والے نے یہ کہا: حیران کن بات سن لو ، شرک اور بت ختم ہو گئے ، انہیں شہاب مارے جا رہے ہیں ، مکہ میں آنے والے ایک نبی کی وجہ سے ، جن کا نام أحمد ہے ، اور ان کی ہجرت کی جگہ یثرب ہو گی ۔
یہ روایت امام بزار نے اپنے استاد عبداللہ بن شبیب کے حوالے سے نقل کی ہے ، اور وہ ضعیف ہے ۔

سیدنا عمرو بن مرہ جہنی رضی اللہ عنہ بیان کرتے ہیں : زمانہ جاہلیت میں ، میں اپنی قوم کے کچھ افراد کے ہمراہ حج کرنے کے لئے نکلا ، میں نے خواب میں دیکھا کہ میں مکہ میں موجود ہوں ، اور خانہ کعبہ میں سے ایک نور چمک رہا ہے ، یہاں تک کہ وہ یثرب کے پہاڑوں تک پہنچ گیا ، جو اشعر جہینہ نامی پہاڑ ہے ، پھر میں نے اس نور میں ایک آواز سنی جو یہ کہہ رہا تھا : ” تاریکیاں چھٹ گئی ہیں اور روشنی چمک رہی ہے ، اور انبیاء کے سلسلے کو ختم کرنے والے مبعوث ہو گئے ہیں ۔ “ پھر ایک اور روشنی ہوئی ، یہاں تک کہ میں نے ” حیرہ “ کے محلات اور ” مدائن “ کی سفیدی دیکھ لی اور میں نے اس نور میں ایک آواز سنی ، جو یہ کہہ رہا تھا : ” اسلام غالب آ گیا ، بت توڑ دیے گئے اور صلہ رحمی کر لی گئی ۔ “ میں پریشانی کے عالم میں بیدار ہوا ، میں نے اپنی قوم سے کہا: قریش کے قبیلے میں کوئی نئی صورت حال سامنے آئی ہے ، پھر میں نے انہیں اس خواب کے بارے میں بتایا جو میں نے دیکھا تھا ، جب ہم اپنے علاقے میں پہنچے تو ہمیں یہ اطلاع ملی کہ ایک صاحب جن کا نام أحمد ہے ، وہ مبعوث ہو گئے ہیں ، میں ان کے پاس آیا اور میں نے آپ صلی اللہ علیہ وسلم کو اس بارے میں بتایا ، جو میں نے خواب دیکھا تھا تو آپ صلی اللہ علیہ وسلم نے فرمایا : ” اے عمرو بن مرہ ! میں وہ نبی ہوں ، جسے تمام بندوں کی طرف بھیجا گیا ہے ، میں ان لوگوں کو اسلام کی طرف دعوت دیتا ہوں انہیں قتل و غارت گری سے بچنے اور صلہ رحمی کرنے کا حکم دیتا ہوں ، اللہ کی عبادت کرنے اور بتوں کو پرے کرنے کا حکم دیتا ہوں اور بیت اللہ کا حج کرنے اور سال کے بارہ مہینوں میں سے ایک رمضان کے مہینے کے روزے رکھنے کا حکم دیتا ہوں ، جو شخص اس بات کو مان لے گا ، اُسے جنت ملے گی اور جو شخص نافرمانی کرے گا ، وہ جہنم میں جائے گا ، تو اے عمرو ! تم اللہ پر ایمان لے آؤ ، وہ تمہیں جہنم کی ہولناکیوں سے محفوظ رکھے گا ۔ “ راوی کہتے ہیں : تو میں نے کہا: میں اس بات کی گواہی دیتا ہوں کہ اللہ تعالیٰ کے علاوہ اور کوئی معبود نہیں ہے ، اور آپ اللہ کے رسول ہیں ، اور میں ہر اس چیز پر ایمان رکھتا ہوں ، جو آپ لے کر آئے ہیں ، جس کا تعلق حلال اور حرام سے ہے ، اگرچہ یہ بات لوگوں کو کتنی ہی بری کیوں نہ لگے ، پھر میں نے آپ کو وہ اشعار سنائے ، جو میں نے اُس وقت کہے تھے ، جب میں نے اس بارے میں سنا تھا ، ہمارا ایک بت ہوتا تھا ، میرے والد اس کے نگران تھے ، میں اُٹھا اور میں نے اسے توڑ دیا ، پھر میں نبی اکرم صلی اللہ علیہ وسلم کے پاس آیا اور میں نے یہ اشعار پڑھے : ” میں اس بات کی گواہی دیتا ہوں کہ اللہ تعالیٰ حق ہے ، اور میں بت معبودوں کو چھوڑنے والا پہلا فرد ہوں ، میں نے اپنی پنڈلی سے تہبند ہٹا کے تیاری شروع کر دی ہے ، تاکہ میں آپ کی طرف ہجرت کروں اور یہ ہجرت ویرانوں کو طے کر کے کروں ، تاکہ میں ان صاحب کا ساتھی بن جاؤں ، جو اپنے وجود اور اپنے والد کے حوالے سے ، سب لوگوں سے بہتر ہیں ، اور آسمانوں کے اوپر موجود لوگوں کے بادشاہ ( یعنی خدا ) کے رسول ہیں“ تو نبی اکرم صلی اللہ علیہ وسلم نے فرمایا : اے عمرو بن مرہ ! تمہیں خوش آمدید ہے ۔ میں نے عرض کی : یا رسول اللہ ! میرے ماں باپ آپ پر قربان ہوں ، آپ مجھے میری قوم کی طرف بھیجئے ، تاکہ اللہ تعالیٰ میرے ذریعے اُن لوگوں پر احسان کرے ، جس طرح اس نے آپ کے ذریعے مجھ پر احسان کیا ہے ، تو نبی اکرم صلی اللہ علیہ وسلم نے مجھے ان لوگوں کی طرف بھیجا ، آپ نے فرمایا : تم نے نرمی سے کام لینا ہے ، اور اچھی بات کہنی ہے ، تم نے سختی کا مظاہرہ نہیں کرنا ، تکبر نہیں کرنا ، حسد نہیں کرنا ، میں اپنی قوم کے پاس آیا ، میں نے کہا: ” اے بنو رفاعہ ! اے جہینہ قبیلے کے لوگو ! میں اللہ کے رسول صلی اللہ علیہ وسلم کے قاصد کے طور پر تمہارے پاس آیا ہوں ، میں تمہیں جنت کی طرف دعوت دیتا ہوں اور تمہیں جہنم سے بچنے کی تلقین کرتا ہوں ، اور میں تمہیں یہ ہدایت کرتا ہوں کہ جانوں کی حفاظت کی جائے ، صلہ رحمی کی جائے ، اللہ کی بندگی کی جائے ، بتوں کو پرے کر دیا جائے ، بیت اللہ کا حج کیا جائے ، رمضان کے مہینے کے روزے رکھے جائیں ، جو بارہ مہینوں میں ایک مہینہ ہے ، جو شخص اس بات کو مان لے گا اسے جنت ملے گی اور جو شخص نافرمانی کرے گا ، اسے جہنم ملے گی ، اے جہنیہ قبیلے کے گروہ ! بے شک اللہ تعالیٰ نے تمہیں بہتر صورت حال میں رکھا ہے ، اور زمانہ جاہلیت میں دوسرے لوگوں کے نزدیک جو چیز پسندیدہ ہوتی تھی ، وہ تم لوگوں کے نزدیک ناپسندیدہ رکھی ہے ، جیسے وہ لوگ دو بہنوں کو نکاح میں جمع کر لیتے تھے ، یا کوئی شخص اپنے باپ کی بیوی سے نکاح کر لیتا تھا ، یا حرمت والے مہینے میں جنگ کر لیتا تھا ( تو تم لوگوں کے اندر یہ چیزیں نہیں پائی جاتی ہیں ) تو تم لوگ بنو لؤی بن غالب سے تعلق رکھنے والے اس ” مرسل ، نبی “ کی بات کو قبول کرو ، تاکہ تم دنیا کا شرف اور آخرت کی عزت کو حاصل کرو ، اور تم اس بارے میں جلدی کرو ، تمہیں اللہ تعالیٰ کی بارگاہ میں فضیلت حاصل ہو گی ۔ “ اُن لوگوں نے سیدنا عمرو رضی اللہ عنہ کی بات مان لی ، صرف ایک شخص نے نہیں مانی ، اس نے کہا: اے عمرو بن مرہ ! اللہ تعالیٰ تمہاری زندگی کو ناگوار کر دے ، تم ہمیں یہ حکم دے رہے ہو کہ ہم اپنے معبودوں کو چھوڑ دیں ؟ اور اپنے اجتماع کے اندر علیحدگی اختیار کر لیں اور اپنے آباؤ اجداد کے دین کی مخالفت کریں اور اس چیز کی طرف جائیں ، جس کی دعوت اہل تہامہ سے تعلق رکھنے والا وہ قریشی شخص دے رہا ہے ، جی نہیں ! ایسا ہرگز نہیں ہو سکتا ، پھر اس خبیث نے یہ اشعار کہے : ” ابن مرہ ایک ایسی بات لے کر آیا ہے ، جو کسی ایسے شخص کی بات نہیں ہو سکتی جو بہتری کا ارادہ رکھتا ہو ، میں اس کے قول اور فعل کو بے حیثیت ہی سمجھتا ہوں اگرچہ کتنا ہی زمانہ گزر جائے ، کیا وہ گزرے ہوئے مشائخ کو بیوقوف قرار دیتا ہے ، جو اس بات کا قصد کرے تو وہ کبھی فلاح تک نہیں پہنچ سکتا ۔ “ تو سیدنا عمرو بن مرہ رضی اللہ عنہ نے کہا: تم اور مجھ میں سے جو شخص جھوٹا ہے ، اللہ تعالیٰ اس کے منہ کو کڑوا کر دے ، اُس کی زبان کو گونگا کر دے ، اُس کی آنکھوں کو نابینا کر دے اور اس کے دانت گرا دے ۔ سیدنا عمرو بن مرہ رضی اللہ عنہ کہتے ہیں : اس شخص کے مرنے سے پہلے اس کا منہ گر گیا ( یعنی زبان کا ذائقہ خراب ہو گیا ) اسے کسی کھانے کا ذائقہ محسوس نہیں ہوتا تھا ، وہ نابینا بھی ہو گیا ، گونگا بھی ہو گیا ، پھر سیدنا عمرو بن مرہ رضی اللہ عنہ اور ان کی قوم سے تعلق رکھنے والے ان کے پیروکار لوگ نبی اکرم صلی اللہ علیہ وسلم کے پاس آئے ، نبی اکرم صلی اللہ علیہ وسلم نے انہیں خوش آمدید کہا: ، آپ نے انہیں تحائف دیئے ، اور آپ نے ان کے لئے ایک تحریر لکھوائی ، جس کے الفاظ یہ ہیں : ” اللہ تعالیٰ کے نام سے برکت حاصل کرتے ہوئے ، جو بڑا مہربان نہایت رحم کرنے والا ہے ، یہ اللہ کی طرف سے ، اُس کے نبی کی زبانی ایک تحریر ہے ، جو سچی تحریر ہے ، اور سچی بات ہے ، یہ عمرو بن مرہ جہنی کے لئے ہے ، جو جہینہ بن زیدان سے تعلق رکھتے ہیں ، تم لوگوں کو زمین کا ہموار حصہ اور اس کے ٹیلے اور ان کی پشتیں ملتی ہیں ، تم وہاں نباتات اگاؤ گے اور صاف پانی پیو گے ، اس شرط پر کہ تم پانچ چیزیں برقرار رکھو گے ( یا تم خمس ادا کرو گے ) تم لوگ پانچ نمازیں پڑھنا اگر سعہ اور صریمہ اکٹھی ہو جائیں ، تو اس میں دو بکریوں کی ادائیگی لازم ہو گی ، اور اگر یہ الگ الگ ہوں ، تو ایک بکری کی ادائیگی لازم ہو گی ، اور چادروں والوں پر زکوۃ لازم نہیں ہو گی ۔ “ تو سیدنا قیس بن شماس رضی اللہ عنہ کی لکھی ہوئی اس تحریر پر ، ہمارے نبی صلی اللہ علیہ وسلم اور وہاں موجود مسلمان گواہ بنے تھے ، اسی لئے سیدنا عمرو بن مرہ جہنی رضی اللہ عنہ نے یہ اشعار کہے ہیں : ” کیا تم نے دیکھا نہیں ؟ کہ اللہ تعالیٰ نے اپنے دین کو غالب کر دیا ہے ، اور آباد کرنے والے کے لیے قرآن کی ، اپنی برہان کو بیان کر دیا ہے ، جو رحمن کی طرف سے آنے والی کتاب ہے ، اس نے ہم سب کو اکٹھا کر دیا ہے ، جبکہ ہمارے اخلاف ( یہاں مراد حلیف ہیں ) ہر دیہاتی اور شہری میں ہیں ، اور ہم اس ہستی کی طرف آ گئے ہیں ، جو زمین پر چلنے والوں میں سب سے بہتر ہیں ، اور مختلف پریشان کن مسائل درپیش آنے کے وقت سب سے زیادہ فضیلت رکھتے ہیں ، ہم نے اللہ کے رسول صلی اللہ علیہ وسلم کی اطاعت کی ، اس وقت جب درندوں کے پیٹ ہرنوں کے ذریعے کاٹ دیے گئے ، تو ہم ایک ایسا قبیلہ ہیں کہ بزرگی ہمارے اردگرد تیار کی گی ہے ، جب جنگ کے دوران بڑوں بڑوں کے سر کاٹ دیے جاتے ہیں ، ہم جنگ آزما ہیں ، ہم لمبے ہاتھوں اور غارتگری کرنے والوں کے ہاتھوں میں موجود خودوں کے ذریعے اس کو بھڑکاتے ہیں ، اور ان کے اردگرد انصار ہیں ، جو تیز نیزوں اور کاٹ دینے والی تلواروں کے ذریعے اپنے امیر کی رکھوالی کرتے ہیں ، جب جنگ ہر بڑی چیز کے قریب گھومتی ہے ، تو اس کی چکی کو توڑ پھوڑ کرنے والے شیر گھماتے ہیں ، ان سے رنگ روشن ہوتا ہے ، اور ان کا چہرہ آراستہ ہوتا ہے ، جیسے ستاروں کے درمیان میں چودھویں کا چاند ہوتا ہے ۔ “ یاسر بن سوید نے یہ بات ذکر کی ہے : نبی اکرم صلی اللہ علیہ وسلم نے انہیں کسی جنگی مہم پر روانہ کیا ، ان کی بیوی حاملہ تھی ، اس نے بچے کو جنم دیا ، اس بچے کی والدہ اُسے اٹھا کر نبی اکرم صلی اللہ علیہ وسلم کے پاس آئیں ، انہوں نے عرض کی : یا رسول اللہ ! میرے ہاں یہ بچہ پیدا ہوا ہے ، اس کے والد جنگ میں گئے ہوئے ہیں ، تو آپ صلی اللہ علیہ وسلم اس کا نام رکھ دیں ، نبی اکرم صلی اللہ علیہ وسلم نے اس بچے کو لیا ، آپ نے اس پر اپنا ہاتھ پھیرا اور پھر یہ فرمایا : ” اے اللہ ! ان کے افراد کو زیادہ کر دے ، ان کی تنگی کو کم کر دے اور تو انہیں محتاج نہ کرنا ، اور تو ان کی طرف سے کسی کو لالچ نہ دکھانا ۔ “ تو نبی اکرم صلی اللہ علیہ وسلم نے فرمایا : تم اس کا نام ” مسرع “ رکھو ! کیونکہ یہ اسلام کی طرف تیزی سے آیا ہے ۔
یہ روایت امام طبرانی نے نقل کی ہے ۔

سیدنا عباس بن مرداس سلمی رضی اللہ عنہ کے بارے میں یہ بات منقول ہے : ان کے اسلام قبول کرنے کا واقعہ یہ ہے کہ وہ دوپہر کے وقت ” غمرہ “ کے مقام پر اپنی اونٹنیوں میں موجود تھے ، اسی دوران سفید رنگ کا ایک شتر مرغ ان کے سامنے آیا ، جو روئی کی طرح تھا ، اس پر ایک شخص سوار تھا ، جس پر روئی کی طرح کے سفید کپڑے تھے ، اس نے کہا: اے عباس بن مرداس ! کیا تم نے دیکھا نہیں ہے ؟ کہ آسمان نے اپنے محافظوں کو پیچھے کر دیا ہے ، اور جنگ نے سانسیں لینا شروع کر دی ہیں ، اور گھوڑوں پر زمینیں رکھ دی گئی ہیں ، اور وہ دین نازل ہو گیا ہے ، جو نیکی اور ہدایت کے ہمراہ ہے ، وہ پیر کے دن اور منگل کی رات میں ہوا ہے ، جو اونٹنی والے شخص ہیں ، راوی کہتے ہیں : میں پریشانی کے عالم میں وہاں سے نکلا ، میں نے جو چیز سنی تھی اور جو چیز دیکھی تھی اس نے مجھے خوف زدہ کر دیا تھا ، یہاں تک کہ میں اپنے بت کے پاس آیا ، جس کا نام ” ضماد “ تھا ، ہم اس کی عبادت کیا کرتے تھے اور اس کے پیٹ میں سے آواز آیا کرتی تھی ، میں نے اس کے اردگرد جھاڑو دیا ، اس پر ہاتھ پھیرا ، اس کو بوسہ دیا ، اسی دوران اس کے پیٹ میں سے کسی نے چیخ کر کہا: ” اے عباس بن مرداس ! تم سلیم ( بڑے قبیلے ) کے تمام ( چھوٹے ) قبیلوں سے کہہ دو ، ضماد ہلاکت کا شکار ہو گئے اور مسجد والے کامیاب ہو گئے ، قریش سے تعلق رکھنے والے وہ صاحب جو سیدنا عیسیٰ بن مریم کے بعد نبوت اور ہدایت لے کر آئے ہیں ، وہ ہی ہدایت یافتہ ہیں ، ضماد ہلاکت کا شکار ہو گئے ، نبی سیدنا محمد صلی اللہ علیہ وسلم پر درود بھیجنے سے پہلے تک ، اس ( ضماد ) ایک عرصہ تک عبادت کی جاتی رہی ۔ “ راوی کہتے ہیں : میں وہاں سے پریشانی کے عالم میں نکلا ، یہاں تک کہ میں اپنی قوم کے پاس آیا اور میں نے انہیں سارا واقعہ سنایا ، انہیں پوری بات کے بارے میں بتایا ، پھر میں اپنی قوم بنو حارثہ سے تعلق رکھنے والے تین سو افراد کے ساتھ سوار ہو کر نکلا ، اور نبی اکرم صلی اللہ علیہ وسلم کے پاس آیا ، ہم لوگ مسجد میں داخل ہوئے ، جب نبی اکرم صلی اللہ علیہ وسلم نے مجھے ملاحظہ کیا ، تو آپ صلی اللہ علیہ وسلم مسکرائے ، پھر آپ صلی اللہ علیہ وسلم نے ارشاد فرمایا : ” اے عباس بن مرداس ! تمہارا اسلام کیسے ہوا ؟ میں نے آپ کو پورا واقعہ سنایا ، تو آپ نے فرمایا : تم نے ٹھیک کہا: ہے ، نبی اکرم صلی اللہ علیہ وسلم اس حوالے سے خوش ہوئے ، راوی کہتے ہیں : تو میں نے اور میری قوم نے اسلام قبول کر لیا ۔
یہ روایت امام طبرانی نے نقل کی ہے ، اس کی سند میں ایک راوی عبداللہ بن عبدالعزیز لیثی ہے ، جسے جمہور نے ضعیف قرار دیا ہے ، اور سعید بن منصور نے اسے ثقہ کہا: ہے ، وہ یہ کہتے ہیں : مالک اس سے راضی تھے ، اس روایت کے بقیہ رجال کی توثیق کی گئی ہے ۔

سیدنا مازن بن غضوبہ رضی اللہ عنہ بیان کرتے ہیں : میں عمان کی ایک بستی سمائل میں ” باحر “ نامی بت کا نگران تھا ، ایک دن ہم وہاں آئے ، اس کے پاس ایک ذبیحہ موجود تھا ، اسی دوران میں نے بت میں سے آواز سنی جو کہہ رہا تھا : ” اے مازن تم سنو ! تمہیں خوشی ہو گی ، بھلائی ظاہر ہو گئی اور شر چھپ گیا ، مضر ( قبیلے ) سے تعلق رکھنے والے نبی مبعوث ہو گئے ہیں ( وہ ) سب سے بڑے اللہ کے دین کے ہمراہ ( مبعوث ہوئے ہیں ) تم پتھر کے بتوں کو چھوڑ دو ، تم جہنم کی گرمی سے بچ جاؤ گے ۔ “ راوی بیان کرتے ہیں : میں پریشان ہو گیا ، میں نے کہا: یہ بڑی حیران کن بات ہے ، پھر اس کے کچھ دن بعد میں آیا ، تو میں نے بت میں سے آواز سنی جو یہ کہہ رہا تھا : ” آؤ میری طرف آؤ ، وہ سن لو ، جس سے تم ناواقف نہیں ہو ، یہ نبی مرسل ہیں ، جو نازل شدہ حق لے کر آئے ہیں ، ان پر ایمان لے آؤ تاکہ تمہیں بھڑکتی ہوئی آگ کی تپش سے پھیر دیا جائے ، جس کا ایندھن جندل ( یعنی زمین ) میں ہے ۔ “ تو میں نے کہا: یہ تو بڑی حیران کن بات ہے ، اور یہ ایک بھلائی ہے ، جو میرے بارے میں مراد لی جا رہی ہے ، ابھی ہم وہاں اسی حالت میں تھے کہ ایک شخص حجاز سے ہمارے پاس آیا ، ہم نے کہا: تمہارے پیچھے کیا خیر خبر ہے ؟ اس نے کہا: ایک صاحب کا ظہور ہوا ہے ، جن کا نام ” أحمد “ ہے ، جو اُن کے پاس جاتا ہے ، وہ اس سے یہ کہتے ہیں : اللہ کی طرف دعوت دینے والے کی بات کو قبول کرو ، میں نے کہا: یہ تو وہ خبر ہے کہ جس کے بارے میں میں سن چکا ہوں ، پھر میں اپنے بت کی طرف گیا ، اور میں نے اسے ٹکڑوں میں توڑ دیا ، پھر میں اپنی سواری پر سوار ہو کر نبی اکرم صلی اللہ علیہ وسلم کے پاس آیا ، اللہ تعالیٰ نے مجھے اسلام کے لئے شرح صدر عطا کیا ، اور میں نے اسلام قبول کیا ، پھر میں نے یہ اشعار کہے : ” میں نے بت کو توڑ کر ٹکڑوں میں تقسیم کر دیا ، اس کو جو ہمارا معبود ہوا کرتا تھا ، گمراہی کے اندھے پن کی وجہ سے طواف کیا کرتے تھے ، اور اس گمراہی سے نجات ، ہمیں ایک ہاشمی کے ذریعے ملی جن کے دین کو میں پہلے کوئی توجہ نہیں دیتا تھا ، اے سوار ! تم عمرو اور اس کے بھائیوں تک یہ پیغام پہنچا دو کہ میں اس شخص کو ناپسند کرنے والا ہوں ، جو یہ کہے : کہ بت میرا معبود ہے ۔ ان کی مراد عمرو بن صلت اور بنو خطامہ سے تعلق رکھنے والے اس کے بھائی تھے ۔ سیدنا مازن رضی اللہ عنہ بیان کرتے ہیں : میں نے عرض کی : یا رسول اللہ ! میں ایک ایسا شخص ہوں ، جو موسیقی کا دلدادہ ہے ، شراب پیتا ہے ، زنا کرتا ہے اور ہم پر قحط سالی کے سال گزرے ہیں ، جس نے اموال ختم کر دیے ہیں ، غلاموں اور کنیزوں کو کمزور کر دیا ہے ، میری کوئی اولا دبھی نہیں ہے ، تو آپ اللہ تعالیٰ سے یہ دعا کریں کہ مجھے جس صورت حال کا سامنا ہے ، اللہ تعالیٰ اس کو ختم کر دے ، مجھے حیاء نصیب کر دے اور مجھے اولاد نصیب کر دے ، تو نبی اکرم صلی اللہ علیہ وسلم نے فرمایا : ” اے اللہ ! اس کی گائیگی کی جگہ اسے قرآن کی قرأت عطا کر دے ، حرام کی جگہ حلال عطا کر دے ، زنا کی جگہ شرمگاہ کی عفت عطا کر دے ، شراب کو چھڑوا کر اسے ایسی چیز کے ذریعے سیراب کر دے جس میں کوئی گناہ نہ ہو اور اسے حیاء نصیب کر دے اور اسے اولاد نصیب کر دے ۔ “ سیدنا مازن رضی اللہ عنہ بیان کرتے ہیں : پہلے جو چیزیں مجھے محسوس ہوتی تھیں ، وہ سب اللہ تعالیٰ نے ختم کر دیں ، اس نے مجھے حیاء عطا کر دی ، میں نے قرآن کے ایک بڑے حصے کا علم حاصل کر لیا اور اسی دوران عمان میں قحط سالی ختم ہو گئی ، میں حج کرنے کے لئے گیا تو اللہ تعالیٰ نے مجھے حیان بن مازن ( یعنی بیٹا عطا کر دیا ) پھر انہوں نے یہ اشعار پڑھے : ” یا رسول اللہ ! میری سواری آپ کی طرف تیزی سے چلتی ہوئی گئی ہے ، اس نے عمان سے عرج تک بڑے بڑے صحراؤں کو عبور کیا ہے ، تاکہ آپ میری شفاعت کریں ، اے وہ فرد جو ان سب سے بہتر ہیں ، جو کنکریوں پر چلتے ہیں ، اور میرا پروردگار میری مغفرت کر دے ، اور میں کامیابی کے ہمراہ لوٹ جاؤں ، اس گروہ کی طرف کہ اللہ تعالیٰ کے بارے میں میرا عقیدہ ان کے دین سے مختلف ہے ، تو جو ان کی رائے ہے وہ میری نہیں ہے ، اور جو ان کا طبقہ ہے وہ میرا نہیں ہے ، میں ایک ایسا شخص تھا جو زنا اور شراب نوشی کا ، زندگی بھر دلدادہ رہا ، یہاں تک کہ جسم بوسیدہ ہو گیا ، تو اس ( اللہ تعالیٰ ) نے مجھے شراب کی جگہ خوف اور خشیت عطا کر دیے اور زناکاری کی جگہ پاکدامنی عطا کر کے میری شرمگاہ کو محفوظ کر دیا ، تو اب میری تمام تر توجہ کا مرکز اور میری نیت جہاد ہے ، اور میرا روزہ اللہ تعالیٰ کے لیے ہے اور میرا حج اللہ تعالیٰ کے لیے ہے ۔ “ جب میں اپنی قوم کے پاس آیا ، تو انہوں نے مجھے برا بھلا کہا: اور انہوں نے اپنے شاعر سے کہا: ، تو اس نے میری ہجو بیان کی ، میں نے سوچا : اگر میں نے ان لوگوں کو جواب دیا ، تو اس طرح تو میں اپنے آپ کی ہجو بیان کروں گا ، تو میں ان لوگوں سے الگ ہو کے سمندر کے ساحل کی طرف آ گیا اور میں نے کہا: ” ہمارے نزدیک تم سے بغض رکھنا ہلاکت ہے ، اور اے ہماری قوم ہم سے بغض رکھنا تمہارے نزدیک ، دودھ ہے ( یا کمزوری ہے ) تمہارے عیوب ظاہر ہوئے تو ایک عرصے تک ہمیں اس کا پتہ ہی نہیں چل سکا اور جب ہمارا عیب ظاہر ہوتا تو تم سب فوراً سمجھ جاتے تھے ، ہمارا شاعر گونگا تھا اور ہمارے ساتھ جنگ کے دوران تمہارا شاعر ہمیں برا کہنے میں بڑھ چڑھ کر زبان دراز تھا ، تم لوگ یہ بات جان لو کہ دلوں میں تمہارے خلاف اشتعال نہیں ہے ، لیکن تمہارے دلوں میں بغض اور دشمنی ہے ۔ “ اس کے بعد اُن لوگوں میں سے بہت سے لوگ میرے پاس آئے اور بولے : اے چچازاد ! ہم نے تم پر اعتراض کیا تھا اور تمہارے لئے اس چیز کو ناپسندیدہ قرار دیا تھا ، اگر تم نہیں مانتے تو ٹھیک ہے ، تم اپنے دین پر گامزن رہو ، تم واپس آؤ اور ہمارے معاملات کی دیکھ بھال کرو ، تو میں ان کے معاملات کا نگران بن گیا ، پھر میں ان لوگوں کے پاس واپس آ گیا ، اس کے بعد اللہ تعالیٰ نے ان لوگوں کو بھی اسلام کی طرف ہدایت نصیب کر دی ۔
یہ روایت امام طبرانی نے ہشام بن محمد بن سائب کلبی کے حوالے سے ان کے والد سے نقل کی ہے ، اور یہ دونوں متروک ہیں ۔

محمد بن کعب قرظی بیان کرتے ہیں : ایک مرتبہ سیدنا عمر بن خطاب رضی اللہ عنہ مسجد میں بیٹھے ہوئے تھے ، اسی دوران مسجد کے پچھلے حصے میں سے ایک شخص ان کے پاس سے گزرا ، اس شخص نے کہا: اے امیر المؤمنین ! کیا آپ اس آنے والے شخص کو پہچانتے ہیں ؟ انہوں نے کہا: جی نہیں ! یہ کون ہے ؟ تو اس نے بتایا : یہ سواد بن قارب ہیں ، یہ اہل یمن سے تعلق رکھنے والے ایک فرد ہیں ، جنہیں یمن میں ایک نمایاں حیثیت حاصل ہے ، اور ان کے مؤکل نے انہیں : نبی اکرم صلی اللہ علیہ وسلم کے ظہور کے بارے میں بتایا تھا ، سیدنا عمر رضی اللہ عنہ نے فرمایا : اسے میرے پاس لے کر آؤ ، وہ انہیں بلا کے لائے ، تو سیدنا عمر رضی اللہ عنہ نے دریافت کیا : تم سواد بن قارب ہو ؟ اس نے جواب دیا : جی ہاں ! سیدنا عمر رضی اللہ عنہ نے دریافت کیا : تم وہ شخص ہو ، جس کے مؤکل نے اسے نبی اکرم صلی اللہ علیہ وسلم کے ظہور کے بارے میں بتایا تھا ، اس نے جواب دیا : جی ہاں ! سیدنا عمر رضی اللہ عنہ نے کہا: تم پہلے جو کہانت کیا کرتے تھے ، کیا وہ اب بھی کر رہے ہو ؟ وہ شدید غصے میں آ گیا ، اس شخص نے کہا: اے امیر المؤمنین ! جب سے میں نے اسلام قبول کیا ہے ، میں نے کبھی اس طرح کا کوئی کام نہیں کیا ، تو سیدنا عمر رضی اللہ عنہ نے فرمایا : سبحان اللہ ! ہم جو شرک پر لوگ گامزن رہے ہیں ، یہ اس سے زیادہ بڑی چیز تھی ، جس پر تم اپنی کہانت کے حوالے سے گامزن رہے ہو ، پھر تم مجھے بتاؤ کہ تمہیں اس بارے میں پتہ چلا کہ نبی اکرم صلی اللہ علیہ وسلم کا ظہور ہونے والا ہے ؟ اس نے کہا: جی ہاں ! اے امیر المؤمنین ! ایک رات میں سونے اور جاگنے کے درمیان کی کیفیت میں تھا ، اسی دوران میرا مؤکل میرے پاس آیا ، اس نے اپنا پاؤں مجھے مارا اور بولا: اے سواد بن قارب ! تم اُٹھ جاؤ ، بات سمجھ لو اور یاد ر کھو ، اگر تم سمجھ سکتے ہو ، لؤی بن غالب میں سے ، ایک رسول مبعوث ہو گئے ہیں ، جو اللہ تعالیٰ کی طرف اور اس کی عبادت کی طرف دعوت دیں گے ، پھر اس نے یہ اشعار پڑھے : ” مجھے جن اور اس کے جاسوسی کرنے پر حیرانگی ہوتی ہے کہ اس نے اونٹ پر کپڑے ڈال لیے ہیں ، اور وہ مکہ کی طرف جا کر ہدایت حاصل کرنا چاہتا ہے ، اور جنوں میں سے بہتر ، ان ( جنات ) کے نجس کی مانند نہیں ہیں ، تو تم بھی ہاشم سے تعلق رکھنے والے منتخب فرد کی طرف سفر کرو ، اور اپنی دونوں آنکھوں کے ذریعے ، اُن کے سر پر نشان لگاؤ ( یعنی ان کی زیارت کرو ) ۔ “ سواد بن قارب کہتے ہیں : میں نے اس کی بات کی طرف توجہ نہیں کی ، میں نے کہا: چھوڑو بھی ، ابھی شام کے وقت میں اونگھ رہا تھا ، جب اگلی رات آئی ، تو پھر وہ میرے پاس آیا اس نے پھر مجھے پاؤں مارا اور کہا: اے سواد بن قارب ! کیا میں نے تمہیں کہا: نہیں تھا کہ تم اُٹھو اور سمجھ لو اور یاد رکھو ، اگر تم یاد رکھ سکتے ہو کہ لؤی بن غالب میں سے ایک رسول مبعوث ہو گئے ہیں ، جو اللہ تعالیٰ کی طرف اور اس کی عبادت کی طرف دعوت دیتے ہیں ، پھر اس جنّ نے یہ اشعار پڑھے : ” مجھے جن اور اس کے تلاش کرنے پر حیرت ہوتی ہے کہ اس نے اونٹ پر پالان باندھ دیا ہے وہ مکہ کی طرف جا کر ہدایت حاصل کرنا چاہتا ہے ، اور سچا جن جھوٹے کی مانند نہیں ہوتا ہے ، تو تم ہاشم ( کے خاندان ) سے تعلق رکھنے والے برگزیدہ فرد کی طرف جاؤ اُس کا آگے والا حصہ ، اس کی دم ( یعنی پچھلے حصے ) کی مانند نہیں ہوتا ہے ۔ “ راوی کہتے ہیں : میں نے اس کی بات کی طرف توجہ نہیں دی ، جب تیسری رات آئی تو پھر وہ میرے پاس آیا اور اس نے اپنا پاؤں مجھے مارا اور اس نے کہا: اے سواد بن قارب ! کیا میں نے تمہیں کہا: نہیں تھا کہ تم سمجھ لو اور یاد رکھو ، اگر تم یاد رکھ سکتے ہو کہ لؤی بن غالب میں سے ایک رسول مبعوث ہو گئے ہیں ، جو اللہ تعالیٰ اور اس کی عبادت کی طرف دعوت دیتے ہیں ، پھر اس جنّ نے یہ اشعار پڑھے : ” مجھے جن اور اس کے خبر دینے پر حیرت ہوتی ہے کہ اس نے اونٹ پر متعلقہ چیزیں لاد دی ہیں ، اور وہ مکہ جا کر ہدایت حاصل کرنا چاہتا ہے ، مومن جن ، کافر جن کی مانند نہیں ہوتا ہے ، تو تم باشم ( کے خاندان ) سے تعلق رکھنے والے برگزیدہ فرد کی طرف جاؤ ، جو وہاں کے زمین کے بلند حصوں اور پتھروں کے درمیان ہیں ۔ “ راوی بیان کرتے ہیں : تو میرے دل میں اسلام کی محبت اور اس میں رغبت پیدا ہو گئی ، جب صبح ہوئی تو میں نے اپنی سواری پر پالان باندھا اور مکہ کی طرف روانہ ہو گیا ، راستے میں مجھے کسی جگہ پر یہ بات پتہ چلی کہ نبی اکرم صلی اللہ علیہ وسلم ہجرت کر کے مدینہ منورہ چلے گئے ہیں ، تو میں مدینہ منورہ آ گیا ، میں نے نبی اکرم صلی اللہ علیہ وسلم کے بارے میں دریافت کیا ، تو بتایا گیا کہ وہ مسجد میں ہوں گے ، میں ، مسجد میں آیا ، میں نے اپنی سواری کو باندھا ، نبی اکرم صلی اللہ علیہ وسلم تشریف فرما تھے ، آپ کے اردگرد لوگ موجود تھے ، میں نے کہا: یا رسول اللہ آپ میری بات سن لیجئے ! سیدنا ابوبکر رضی اللہ عنہ نے کہا: اسے قریب آنے دو ! میں قریب ہو گیا ، میں قریب ہوتا رہا ، یہاں تک کہ بالکل نبی اکرم صلی اللہ علیہ وسلم کے سامنے آ گیا ، نبی اکرم صلی اللہ علیہ وسلم نے فرمایا : تم بتاؤ ! تمہارے مؤکل نے آ کر کیا کہا: تھا ؟ تو میں نے یہ کہا: ” میرا مؤکل میرے پاس آیا ، جبکہ میں نیند اور بیداری کے درمیان کی حالت میں تھا ، اس سے پہلے میں نے اسے جب بھی آزمایا ، تو وہ جھوٹا ثابت نہیں ہوا ، وہ تین راتوں تک میرے پاس آتا رہا ، اور ہر مرتبہ وہ مجھ سے یہی کہتا رہا : لؤی بن غالب سے تعلق رکھنے والے رسول تمہارے پاس آ گئے ہیں ، تو میں نے سفر کی تیاری شروع کی اور ایک موٹی تازی اونٹنی ، جس کا منہ بڑا تھا ، وہ مجھے لے کر صحراؤں میں سے گزری ، اور میں اس بات کی گواہی دیتا ہوں کہ اللہ تعالیٰ وہ ہے کہ جس کے علاوہ اور کوئی معبود نہیں ہے ، اور آپ ہر غیر موجود کے حوالے سے محفوظ ہیں ، رسولوں میں اللہ تعالیٰ کی بارگاہ میں وسیلے کے طور پر ، ہونے کے اعتبار سے ، آپ سب سے زیادہ قریبی ( یا موزوں ) ہیں ، اے سب سے زیادہ معزز اور پاکیزہ لوگوں کے صاحبزادے ! جو ( دین ) آپ کے پاس آیا ہے ، آپ اُس کے حوالے سے ہمیں حکم دیں ، اسے سب رسولوں سے بہتر ! اگرچہ جو ( دین یا حکم ) آیا ہے ، اس میں بال سفید ہونے کا امکان کیوں نہ ہو ، اور آپ اس دن میری شفاعت کرنے والے بن جائیں ، جس دن آپ کے علاوہ اور کوئی شفاعت کرنے والا نہیں ہو گا ، جو سواد بن قارب کے کام آ سکے ۔ “ راوی کہتے ہیں : تو میرے اسلام قبول کرنے پر نبی اکرم صلی اللہ علیہ وسلم اور آپ کے اصحاب بہت خوش ہوئے ، یہاں تک کہ ان کے چہروں سے یہ بات محسوس ہو رہی تھی ۔ ( جب سیدنا عمر رضی اللہ عنہ کے عہد خلافت میں انہوں نے یہ واقعہ بیان کر دیا ، تو ) راوی کہتے ہیں : سیدنا عمر رضی اللہ عنہ اُٹھ کر ان کی طرف بڑھے ، انہوں نے ان کو اپنے ساتھ لپٹا لیا اور بولے : میں یہ چاہتا تھا کہ میں تمہاری زبانی یہ بات سنوں ۔
یہ روایت امام طبرانی نے نقل کی ہے ۔

اُن کی نقل کردہ ایک روایت میں یہ الفاظ ہیں : سیدنا سواد بن قارب ازدی رضی اللہ عنہ بیان کرتے ہیں : ایک مرتبہ میں ” سواۃ “ کے پہاڑوں میں سے ایک پہاڑ پر سویا ہوا تھا ، اسی دوران کوئی میرے پاس آیا ، اس نے اپنا پاؤں مجھے مارا اور اُس نے مجھے کہا: تم مکہ جاؤ ! کیونکہ اللہ کے رسول صلی اللہ علیہ وسلم ظاہر ہو گئے ہیں ، پھر میں نے نبی اکرم صلی اللہ علیہ وسلم کو اس بارے میں بتایا اور آپ صلی اللہ علیہ وسلم کی پیروی کر لی ۔ ان دونوں روایات کی سند ضعیف ہے ۔

حسن بن زبیر اسدی بیان کرتے ہیں : سیدنا عمر بن خطاب رضی اللہ عنہ نے ایک دن سیدنا عبداللہ بن عباس رضی اللہ عنہما سے کہا: تم مجھے کوئی ایسی بات بتاؤ ، جو مجھے پسند آئے ، تو انہوں نے بتایا : سیدنا خریم بن فاتک اسدی رضی اللہ عنہ نے مجھے یہ بات بتائی ہے : ” میں اپنے گمشدہ اونٹ کی تلاش میں نکلا ، میں ” ابرق “ کے مقام پر اس تک پہنچ گیا ، میں نے اسے باندھا ، اس اونٹ نے وہاں پاؤں بچھایا ، یہ نبی اکرم صلی اللہ علیہ وسلم کے ظہور کے زمانے کی بات ہے ، پھر میں نے بلند آواز میں کہا: میں اس وادی کے سب سے بڑے فرد کی پناہ لیتا ہوں ، میں اس وادی کے سب سے عظیم فرد کی پناہ لیتا ہوں ، راوی کہتے ہیں : وہ لوگ زمانہ جاہلیت میں اسی طرح کہا: کرتے تھے تو اسی دوران کسی ہاتف غیبی نے یہ اشعار کہے : ” تمہارا ستیاناس ہو ، تم اللہ کی پناہ مانگو ، جو جلال والا ہے ، جو حرام اور حلال کا حکم نازل کرنے والا ہے ، تم اللہ تعالیٰ کی وحدانیت کا اعتراف کرو ، اور اس بات کی پروا نہ کرو کہ جنات کی کیا ہولناکیاں ہوتی ہیں ، جب کوئی میلوں کے فاصلے پر اللہ کا ذکر کرے اور ہموار زمین اور پہاڑوں میں ذکر کرے ، تو جن کا فریب نیچے چلا جاتا ہے ، اور پرہیزگار شخص اور نیک عمل کا حکم مختلف ہے ( یعنی وہ نیچے نہیں جاتے ہیں ) ۔ “ راوی بیان کرتے ہیں تو میں نے کہا: ” اے پکارنے والے شخص ! تم کس چیز کی طرف جانے کا کہہ رہے ہو ؟ کیا تمہارے پاس ہدایت ہے یا گمراہی ہے ؟ “ ۔ اُس نے جواب دیا : ” یہ اللہ کے رسول ہیں ، جو بھلائی والے ہیں ، یہ سورہ ” یٰس “ اور ” حم “ سے شروع ہونے والی سورتیں لے کے آئے ہیں ، اور ان کے علاوہ مفصل سورتیں ہیں ، جو حرام قرار دینے والی ہیں ، اور حلال قرار دینے والی ہیں ، یہ رسول روزہ رکھنے اور نماز پڑھنے کا حکم دیتے ہیں ، اور لوگوں کو برائیوں سے روکتے ہیں ، جو پہلے زمانے میں بھی منکر سمجھی جاتی تھیں ۔ “ راوی کہتے ہیں : میں نے کہا: تم کون ہو ؟ اللہ تعالیٰ تم پر رحم کرے ، اس نے کہا: میں مالک بن مالک ہوں ، اللہ کے رسول صلی اللہ علیہ وسلم نے مجھے اہل مسجد کے جنات کی طرف بھیجا ہے ، میں نے کہا: اگر میرے لئے کوئی ایسا فرد ہوتا ، جو میرے اس اونٹ کے حوالے سے میری کفایت کرتا ، تو میں ان کے پاس چلا جاتا ، یہاں تک کہ ان پر ایمان لے آتا ، اس نے کہا: میں اس اونٹ کے حوالے سے تمہاری کفایت کروں گا ، یہاں تک کہ اسے تمہارے گھر والوں تک سالم پہنچا دوں گا ، اگر اللہ نے چاہا ، تو میں نے اس اونٹ کو کھولا اور پھر میں مدینہ منورہ آ گیا ، میں جمعہ کے دن لوگوں کے پاس پہنچا ، وہ لوگ نماز پڑھ رہے تھے ، میں نے کہا: یہ لوگ نماز ادا کر لیں گے ، پھر میں اندر جاؤں گا ، ابھی میں وہیں تھا اور اپنی سواری کو باندھ رہا تھا ، اسی دوران سیدنا ابوذر غفاری رضی اللہ عنہ نکل کر میرے پاس آئے اور بولے : اللہ کے رسول تم سے یہ فرما رہے ہیں کہ تم اندر آ جاؤ ! میں اندر گیا ، جب آپ نے مجھے ملاحظہ کیا ، تو آپ نے فرمایا : اس بزرگ کا کیا حال ہے ؟ جس نے تمہیں یہ ضمانت دی تھی کہ وہ تمہارا اونٹ پہنچا دے گا ، کیا اس نے صحیح پہنچا دیا ہے ؟ تو میں نے کہا: اللہ تعالیٰ اس پر رحم کرے ، راوی کہتے ہیں : پھر نبی اکرم صلی اللہ علیہ وسلم نے فرمایا : جی ہاں ! اللہ تعالیٰ اس پر رحم کرے ، راوی کہتے ہیں : تو میں نے یہ کہا: کہ میں اس بات کی گواہی دیتا ہوں کہ اللہ تعالیٰ کے علاوہ اور کوئی معبود نہیں ہے ۔
یہ روایت امام طبرانی نے نقل کی ہے ، اور اس کی سند میں ایسے راوی ہیں ، جن سے میں واقف نہیں ہوں ۔

سیدنا ابوہریرہ رضی اللہ عنہ بیان کرتے ہیں سیدنا خریم بن فاتک رضی اللہ عنہ نے سیدنا عمر بن خطاب رضی اللہ عنہ سے کہا: اے امیر المؤمنین ! کیا میں آپ کو یہ نہ بتاؤں کہ میں نے کیسے اسلام قبول کیا تھا ؟ انہوں نے جواب دیا : جی ہاں ! انہوں نے بتایا : ایک مرتبہ میں اپنے جانوروں کی تلاش میں گھوم پھر رہا تھا ، اسی دوران تاریک رات میں مجھے ایک نشان نظر آیا ، تو میں نے بلند آواز میں پکار کر کہا: میں اس وادی کے معزز شخص کی پناہ مانگتا ہوں ، اس کی قوم کے بے وقوف لوگوں کے حوالے سے ، تو اسی دوران کسی ہاتف نے پکار کر کہا: ” تمہارا ستیاناس ہو ، تم اللہ کی پناہ لو ، جو جلال والا ہے ، بزرگی والا ، نعمتیں دینے والا ، کرم کرنے والا ہے ، اور اضافی چیزوں کی نشانیوں کو حاصل کرنے کی کوشش کرو ، اور اللہ تعالیٰ کی وحدانیت کا اعتراف کرو ، اور اس بارے میں کوئی پرواہ نہ کرو “ راوی کہتے ہیں : میں بہت زیادہ ڈر گیا ، جب میری طبیعت سنبھلی تو میں نے کہا: اسے ہاتف ! تم کیا کہہ رہے ہو ؟ کیا تمہارے پاس ہدایت ہے ، یا گمراہی ہے ، تم ہمارے سامنے یہ بات بیان کرو کہ اگر تمہیں ہدایت نصیب ہوئی ہے ، تو اس کا ذریعہ کیا ہے ؟ “ ۔ اُس نے جواب دیا : یہ اللہ کے رسول ہیں ، جو بھلائی والے ہیں ، وہ یثرب میں ہیں ، اور نجات کی طرف دعوت دیتے ہیں ، وہ نماز اور روزے کا حکم دیتے ہیں ، اور لوگوں کو برائیوں سے روکتے ہیں ۔ “ راوی کہتے ہیں : میری اونٹنی کھڑی ہوئی ، تو میں نے کہا: ” تم اس ہدایت کے بارے میں میری رہنمائی کرو ، جو ہدایت تمہیں نصیب ہوئی ہے ، نہ تم بھوکے ہو ، نہ تمہیں لباس کی ضرورت ہے ، اور جب تک تم باقی رہو گے ، تم ہمیشہ سعادت مند رہو گے ، اور تم نے جو بھلائی کی ہے ، اس کے حوالے سے تم ترجیحی سلوک نہیں کرو گے “ راوی بیان کرتے ہیں : تو وہ یہ کہتا ہوا میرے پیچھے آ گیا : ” اللہ تعالیٰ تمہیں سلامت رکھے اور تمہارے نفس کو سلامت رکھے اور تمہیں گھر والوں تک پہنچا دے ، اور تمہاری سواری واپس کر دے ، تم اس پر ایمان لاؤ ، میرا پروردگار تمہارے حق کو کامیابی عطا کرے گا ، تم ان کی مدد کرو ، میرا پروردگار تمہیں مدد سے نوازے گا ۔ “ راوی کہتے ہیں : پھر میں مدینہ منورہ آیا ، یہ جمعہ کے دن کی بات ہے ، میں نے مسجد میں جھانک کر دیکھا تو سیدنا ابوبکر صدیق رضی اللہ عنہ باہر نکل کر میرے پاس آئے اور بولے : تم اندر آ جاؤ ! اللہ تعالیٰ تم پر رحم کرے ، ہمیں تمہارے اسلام قبول کرنے کے بارے میں اطلاع مل چکی ہے ، تو میں نے کہا: مجھے وضو کرنا نہیں آتا ، آپ مجھے تعلیم دیجئے پھر میں مسجد میں داخل ہوا ، میں نے نبی اکرم صلی اللہ علیہ وسلم کو دیکھا کہ آپ منبر پر موجود تھے ، یوں لگ رہا تھا جیسے چودھویں کا چاند ہو ، اور آپ صلی اللہ علیہ وسلم یہ فرما رہے تھے : ” جو بھی مسلمان وضو کرتے ہوئے اچھی طرح وضو کرے اور پھر نماز ادا کرے ، یوں کہ وہ اسے مناسب طور پر سمجھ کر ادا کرے تو وہ شخص جنت میں داخل ہو جائے گا ۔ “ تو سیدنا عمر بن خطاب رضی اللہ عنہ نے کہا: یا تو تم اس بارے میں کوئی ثبوت پیش کرو ، ورنہ پھر میں تمہیں سزا دوں گا ، راوی کہتے ہیں : تو قریش سے تعلق رکھنے والے ایک بزرگ سیدنا عثمان غنی رضی اللہ عنہ نے اس بارے میں گواہی دی ، تو سیدنا عمر رضی اللہ عنہ نے ان کی گواہی کو تسلیم کیا ۔
یہ روایت امام طبرانی نے نقل کی ہے ، اور اس کی سند میں ۔ ۔ ۔ ۔ ۔ ۔ ۔ ۔ ( علامہ ہیثمی فرماتے ہیں : ) میں یہ کہتا ہوں : بھیڑیے ، گوہ اور ہرنی جنہوں نے نبی اکرم صلی اللہ علیہ وسلم کی نبوت کی گواہی دی تھی ، ان کے بارے میں واقعات سے متعلق روایات ، معجزات کے بیان میں آئیں گی ، اگر اللہ نے چاہا ۔