مجمع الزوائد ومنبع الفوائد

سیدنا جابر رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” ( ثواب کے حصول کی خاطر ) صرف حج اور عمرہ میں بال مونڈے جائیں گے “ ۔
یہ روایت امام بزار نے اور امام طبرانی نے معجم اوسط میں نقل کی ہے اس کی سند میں ایک راوی محمد بن سلیمان بن مسمول ہے اور وہ اس حدیث اور دیگر روایات کے حوالے سے ضعیف ہے ۔

سیدنا معمر بن عبداللہ رضی اللہ عنہ بیان کرتے ہیں : حجۃ الوداع کے موقع پر میں نبی اکرم صلی اللہ علیہ وسلم کے لئے پالان تیار کیا کرتا تھا ایک رات آپ نے مجھ سے فرمایا : اے معمر ! گزشتہ رات میں نے اپنے پالان میں اضطراب محسوس کیا میں نے عرض کی : اس ذات کی قسم جس نے آپ کو حق کے ہمراہ مبعوث کیا میں نے تو اسے اسی طرح باندھا تھا جس طرح میں پہلے باندھا کرتا تھا لیکن شاید اسے اس شخص نے ڈھیلا کر دیا ہو گا جو میری جگہ یہ خدمت لینا چاہتا ہے تاکہ آپ میری جگہ کسی اور کو یہ خدمت سپرد کر دیں نبی اکرم صلی اللہ علیہ وسلم نے فرمایا : میں ایسا نہیں کروں گا راوی بیان کرتے ہیں : جب نبی اکرم صلی اللہ علیہ وسلم نے منی میں قربانی کے جانور کو قربان کر لیا تو آپ نے مجھے یہ ہدایت کی کہ میں آپ کا سر مونڈ دوں راوی بیان کرتے ہیں : میں نے استرا پکڑا اور آپ کے سر کے پاس آ کر کھڑا ہوا نبی اکرم صلی اللہ علیہ وسلم نے میرے چہرے کی طرف دیکھا اور پھر مجھ سے ارشاد فرمایا : اے معمر ! اللہ کے رسول نے اپنے کانوں کی لو تمہارے ق ابومیں دے دی ہے اور تمہارے ہاتھ میں استرا ہے میں نے عرض کی : اللہ کی قسم یا رسول اللہ ! یہ ان کی نعمت ہے اور احسان ہے ، جو مجھ پر ہوا ہے ۔ نبی اکرم صلی اللہ علیہ وسلم نے ارشاد فرمایا : ٹھیک ہے پھر میں تمہیں برقرار رکھتا ہوں راوی بیان کرتے ہیں : تو پھر میں نے نبی اکرم صلی اللہ علیہ وسلم کا سر مونڈ دیا ۔
یہ روایت امام أحمد نے اور امام طبرانی نے معجم کبیر میں نقل کی ہے اس کی سند میں ایک راوی معمر کا غلام عبدالرحمن بن عقبہ ہے ، جس کا ذکر ابن ابوحاتم نے کیا ہے اس کی نہ توثیق کی گئی ہے اور نہ اس پر جرح کی گئی ہے اس روایت کے بقیہ رجال ثقہ ہیں ۔

سیدہ ام سلمہ رضی اللہ عنہا بیان کرتی ہیں قربانی کے دن معمر بن عبداللہ عدوی نے نبی اکرم صلی اللہ علیہ وسلم کا سر مونڈا تھا ۔
یہ روایت امام طبرانی نے معجم اوسط میں نقل کی ہے اس کی سند میں ایک راوی محمد بن اسحاق ہے اور وہ ثقہ ہے لیکن وہ تدلیس کرنے والا ہے ۔

سیدنا حبشی بن جنادہ رضی اللہ عنہ جنہیں حجتہ الوداع میں شرکت کا شرف حاصل ہے وہ بیان کرتے ہیں : نبی اکرم صلی اللہ علیہ وسلم نے ارشاد فرمایا : ” اے اللہ ! تو سر مونڈوانے والوں کی مغفرت کر دے لوگوں نے عرض کی : یا رسول اللہ بال چھوٹے کروانے والوں کی بھی نبی اکرم صلی اللہ علیہ وسلم نے فرمایا : اے اللہ ! تو سر مونڈوانے والوں کی مغفرت کر دے لوگوں نے عرض کی : یا رسول اللہ ! اور بال چھوٹے کروانے والوں کی بھی ؟ تیسری مرتبہ آپ نے ارشاد فرمایا اور بال چھوٹے کروانے والوں کی بھی ( مغفرت کر دے ) “ ۔
یہ روایت امام أحمد نے اور امام طبرانی نے معجم کبیر میں نقل کی ہے اور امام أحمد کے رجال صحیح کے رجال ہیں ۔

سیدنا مالک بن ربیعہ رضی اللہ عنہ بیان کرتے ہیں : انہوں نے نبی اکرم صلی اللہ علیہ وسلم کو سنا آپ یہ کہہ رہے تھے : ” اے اللہ ! تو سر مونڈوانے والوں کی مغفرت کر دے اے اللہ ! تو سر مونڈوانے والوں کی مغفرت کر دے حاضرین میں سے ایک نے عرض کی اور بال چھوٹے کروانے والوں کی بھی ؟ نبی اکرم صلی اللہ علیہ وسلم نے تیسری مرتبہ یا شاید چوتھی مرتبہ میں فرمایا اور بال چھوٹے کروانے والوں کی بھی ( مغفرت کر دے ) پھر آپ نے ارشاد فرمایا : آج میں نے سر مونڈوایا ہوا ہے اور مجھے یہ بات پسند نہیں ہے کہ سر مونڈوانے کے عوض میں مجھے سرخ اونٹ مل جائیں ( راوی کو شک ہے یا شاید یہ الفاظ ہیں : ) یا عظیم چیز مل جائے ۔
یہ روایت امام أحمد نے اور امام طبرانی نے معجم اوسط میں نقل کی ہے اور اس کی سند حسن ہے ۔

سیدنا قارب رضی اللہ عنہ بیان کرتے ہیں : میں نے نبی اکرم صلی اللہ علیہ وسلم کو یہ کہتے ہوئے سنا اے اللہ ! سر مونڈوانے والوں کی مغفرت کر دے ایک صاحب نے عرض کی اور بال چھوٹے کروانے والوں کی بھی ؟ چوتھی مرتبہ میں آپ نے فرمایا : اور بال چھوٹے کروانے والوں کی بھی سفیان نامی راوی نے اپنے ہاتھ کے ذریعے اشارہ کر کے یہ بات بیان کی کہ یہ کم حیثیت رکھتا ہے ، سفیان کہتے ہیں : انہوں نے یوں اشارہ کیا جس طرح کسی چیز کے کم ہونے کو ظاہر کر رہے ہوں ۔
یہ روایت امام أحمد نے اور امام طبرانی نے معجم کبیر میں اور امام بزار نے نقل کی ہے اور اس کی سند صحیح ہے ۔

یحیی بن حصین اپنی دادی کا یہ بیان نقل کرتے ہیں : وہ بیان کرتی ہیں میں نے نبی اکرم صلی اللہ علیہ وسلم کو سنا آپ یہ فرما رہے تھے : اللہ تعالیٰ سر مونڈوانے والوں پر رحم کرے اللہ تعالیٰ سر مونڈوانے والوں پر رحم کرے اللہ تعالیٰ سر مونڈوانے والوں پر رحم کرے تیسری مرتبہ لوگوں نے عرض کی اور بال چھوٹے کروانے والوں پر بھی ؟ آپ نے فرمایا : اور بال چھوٹے کروانے والوں پر بھی ( اللہ تعالیٰ رحم کرے ) ۔
یہ روایت امام أحمد نے نقل کی ہے اور اس کے رجال صحیح کے رجال ہیں ۔

سیدنا ابوسعید خدری رضی اللہ عنہ بیان کرتے ہیں : حدیبیہ کے دن نبی اکرم صلی اللہ علیہ وسلم اور آپ کے اصحاب نے سر مونڈوا لیا صرف سیدنا ابوقتادہ رضی اللہ عنہ اور سیدنا عثمان رضی اللہ عنہ نے ایسا نہیں کیا نبی اکرم صلی اللہ علیہ وسلم نے فرمایا : اللہ تعالٰی سر مونڈوانے والوں پر رحم کرے لوگوں نے عرض کی : یا رسول اللہ ! اور بال چھوٹے کروانے والوں پر بھی ؟ آپ نے فرمایا : اللہ تعالیٰ سر مونڈوانے والوں پر رحم کرے لوگوں نے عرض کی : یا رسول اللہ ! اور بال چھوٹے کروانے والوں پر بھی ؟ نبی اکرم صلی اللہ علیہ وسلم نے تیسری مرتبہ میں یہ ارشاد فرمایا : اور بال چھوٹے کروانے والوں پر بھی ( رحم کرے ) ۔
یہ روایت امام ابویعلیٰ نے نقل کی ہے روایت کے یہ الفاظ ان کے نقل کردہ ہیں اس کی سند میں ایک راوی ابوابراہیم انصاری ہے ، جسے ابوحاتم نے مجہول قرار دیا ہے اس کے بقیہ رجال صحیح کے رجال ہیں ۔

سیدنا ابوسعید خدری رضی اللہ عنہ بیان کرتے ہیں : حدیبیہ کے سال نبی اکرم صلی اللہ علیہ وسلم اور آپ کے اصحاب نے احرام باندھا ہوا تھا صرف سیدنا عثمان غنی رضی اللہ عنہ اور سیدنا ابوقتادہ رضی اللہ عنہ نے نہیں باندھا ہوا تھا تو نبی اکرم صلی اللہ علیہ وسلم نے سر مونڈوانے والوں کے لئے دو مرتبہ دعائے مغفرت کی اور بال چھوٹے کروانے والوں کے لئے ایک مرتبہ ( دعائے مغفرت کی ) ۔
یہ روایت امام أحمد نے نقل کی ہے اور اس کی سند میں بھی ابراہیم نامی راوی ہے ۔

سیدنا عبداللہ بن عباس رضی اللہ عنہما روایت کرتے ہیں : نبی اکرم صلی اللہ علیہ وسلم نے ارشاد فرمایا : اللہ تعالی سر مونڈوانے والوں پر رحم کرے ہم نے عرض کی : اور بال چھوٹے کروانے والوں پر بھی ؟ نبی اکرم صلی اللہ علیہ وسلم نے فرمایا : اللہ تعالی سر مونڈوانے والوں پر رحم کرے لوگوں نے عرض کی : یا رسول اللہ ! اور بال چھوٹے کروانے والوں پر بھی ؟ تیسری یا چوتھی مرتبہ میں نبی اکرم صلی اللہ علیہ وسلم نے فرمایا : اور بال چھوٹے کروانے والوں پر بھی ( اللہ تعالیٰ رحم کرے ) ۔
یہ روایت امام طبرانی نے معجم اوسط میں نقل کی ہے اس کی سند میں ایک راوی عبداللہ بن مومل ہے ، جسے امام أحمد اور دیگر حضرات نے ضعیف قرار دیا ہے ویسے اس کی توثیق کی گئی ہے ۔

ازرق بن قیس بیان کرتے ہیں : میں سیدنا عبداللہ بن عمر رضی اللہ عنہما کے پاس بیٹھا ہوا تھا ایک شخص نے ان سے سوال کیا اس نے کہا: اے ابوعبدالرحمن ! میں نے احرام باندھ لیا اور اپنے بال اکھٹے کر لیے تو سیدنا عبداللہ بن عمر رضی اللہ عنہما نے فرمایا کیا تم نے سیدنا عمر رضی اللہ عنہ کو ان کی خلافت کے دوران یہ فرماتے نہیں سنا کہ جس شخص نے اپنے بالوں کی مینڈھاں بنا لی ہوں یا ان کی تلبید کر لی ہو ، تو وہ سر مونڈوا لے اس نے کہا: اے ابوعبدالرحمن میں نے ان کی مینڈھیاں نہیں بنائی تھیں بلکہ میں نے انہیں اکٹھا کر لیا تھا تو سیدنا عبداللہ بن عمر رضی اللہ عنہما نے فرمایا تیس اور عنز اور عنز اور تیس ( دونوں ایک ہی چیز ہوتا ہے ) ۔
یہ روایت امام طبرانی نے معجم کبیر میں نقل کی ہے اور اس کے رجال صحیح کے رجال ہیں ۔