مجمع الزوائد ومنبع الفوائد

سیدنا عبداللہ بن عمر رضی اللہ عنہما روایت کرتے ہیں : نبی اکرم صلی اللہ علیہ وسلم نے ارشاد فرمایا : ” جو شخص عقبہ کے پاس موجود جمرہ کو سات کنکریاں مار لے اور پھر واپس آ جائے اور قربانی کے جانور کو ذبح کر لے پھر وہ سر مونڈوا دے تو حج کے حوالے سے جو چیز اس پر حرام تھی وہ اس کے لئے حلال ہو جاتی ہے “ ۔
( علامہ ہیثمی فرماتے ہیں : ) میں یہ کہتا ہوں : سیدنا عبداللہ بن عمر رضی اللہ عنہما کے حوالے سے ایک اثر منقول ہے ، جو ان پر موقوف ہے اور اس میں یہ مذکور ہے ، البتہ خواتین کا معاملہ مختلف ہے ۔
یہ روایت امام بزار نے نقل کی ہے اور اس کے رجال ثقہ ہیں اور صحیح کے رجال ہیں ۔

عطاء بیان کرتے ہیں : نبی اکرم صلی اللہ علیہ وسلم نے جب جمرہ کو کنکریاں مار لیں ( قربانی کا جانور ) ذبح کر لیا اور سر مونڈوا لیا تو خواتین کے علاوہ ہر چیز کے حوالے سے آپ حلال ہو جاتے تھے ۔
یہ روایت امام ابویعلیٰ نے نقل کی ہے اس کی سند میں ایک راوی حجاج بن ارطاۃ ہے اور اس کے بارے میں کلام کیا گیا ہے اور
یہ روایت ” مرسل“ ہے ۔