مجمع الزوائد ومنبع الفوائد

سیدنا عاصم بن عمر رضی اللہ عنہما بیان کرتے ہیں : نبی اکرم صلی اللہ علیہ وسلم نے سیدنا عمر بن خطاب رضی اللہ عنہ کی صاحبزادی سیدہ حفصہ رضی اللہ عنہا کو طلاق دیدی تھی پھر آپ نے ان سے رجوع کر لیا تھا ۔
یہ روایت امام أحمد نے اور امام طبرانی نے نقل کی ہے ۔ اور اس کے رجال ثقہ ہیں ۔

سیدنا انس رضی اللہ عنہ بیان کرتے ہیں : نبی اکرم صلی اللہ علیہ وسلم نے سیدہ حفصہ رضی اللہ عنہا کو طلاق دیدی تھی پھر آپ نے ان سے رجوع کر لیا تھا ۔
یہ روایت امام بزار نے نقل کی ہے ۔

امام ابویعلیٰ نے ان کے ( یعنی سیدنا انس رضی اللہ عنہ کے ) حوالے سے یہ بات نقل کی ہے ۔ جب نبی اکرم صلی اللہ علیہ وسلم نے سیدہ حفصہ رضی اللہ عنہا کو طلاق دیدی ، تو آپ کو یہ حکم دیا گیا کہ آپ ان سے رجوع کر لیں ۔ امام ابویعلیٰ کے رجال صحیح کے رجال ہیں ۔

سیدنا عبداللہ بن عمر رضی اللہ عنہما بیان کرتے ہیں : سیدنا عمر رضی اللہ عنہ ، سیدہ حفصہ رضی اللہ عنہا کے پاس تشریف لائے ، تو وہ رو رہی تھیں سیدنا عمر رضی اللہ عنہ نے دریافت کیا : تم کیوں رو رہی ہو ؟ شاید نبی اکرم صلی اللہ علیہ وسلم نے تمہیں طلاق دیدی ہے ۔ نبی اکرم صلی اللہ علیہ وسلم پہلے بھی تمہیں ایک مرتبہ طلاق دے چکے ہیں اور میری وجہ سے آپ نے تم سے رجوع کر لیا تھا اللہ کی قسم ! اگر آپ نے دوسری مرتبہ تمہیں طلاق دیدی ، تو میں کبھی تمہارے ساتھ بات نہیں کروں گا ۔
یہ روایت امام ابویعلیٰ اور امام بزار نے نقل کی ہے ۔ امام ابویعلیٰ کے رجال صحیح کے رجال ہیں امام بزار کے رجال کا معاملہ بھی اسی طرح ہے ۔

سیدنا عقبہ بن عامر جہنی رضی اللہ عنہ بیان کرتے ہیں : نبی اکرم صلی اللہ علیہ وسلم نے سیدہ حفصہ رضی اللہ عنہا کو طلاق دیدی سیدنا عمر بن خطاب رضی اللہ عنہ کو اس بات کی اطلاع ملی ، تو انہوں نے مٹی اپنے سر میں ڈالی اور بولے : اے خطاب کے بیٹے ! اللہ تعالیٰ اس کے بعد تمہاری کیا پروا کرے گا پھر اس کے بعد سیدنا جبرائیل علیہ السلام نبی اکرم صلی اللہ علیہ وسلم پر نازل ہوئے ، اور بولے : اللہ تعالیٰ نے سیدنا عمر رضی اللہ عنہ پر رحمت کی وجہ سے آپ کو یہ حکم دیا ہے کہ آپ رجوع کر لیں ۔
یہ روایت امام طبرانی نے نقل کی ہے ۔ اس کی سند میں ایک راوی عمرو بن صالح حضرمی ہے میں اس سے واقف نہیں ہوں ۔ اس روایت کے بقیہ رجال ثقہ ہیں ۔

سیدنا جابر بن عبداللہ رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” طلاق صرف نکاح کے بعد ہوتی ہے ، اور غلام آزاد کرنا صرف ملکیت کے بعد ہوتا ہے “ ۔
یہ روایت امام طبرانی نے معجم اوسط میں نقل کی ہے ۔ روایت کے یہ الفاظ ان کے ہیں امام بزار نے اس کی مانند روایت نقل کی ہے ۔ اور امام بزار کے رجال صحیح کے رجال ہیں ۔

سیدنا معاذ بن جبل رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” اس شخص کی ( دی ہوئی ) طلاق نہیں ہوتی ، جو مالک نہ ہو ( یعنی جو طلاق دینے کا حق نہ رکھتا ہو ) ، اور اس شخص کا غلام آزاد کرنا ثابت نہیں ہوتا ، جو ( غلام کا ) مالک نہ ہو “ ۔
یہ روایت امام طبرانی نے معجم کبیر اور معجم اوسط میں نقل کی ہے ۔ اور اس کے رجال ثقہ ہیں ، البتہ طاؤس نامی راوی نے سیدنا معاذ بن جبل رضی اللہ عنہ سے ملاقات نہیں کی ۔

سیدنا عبداللہ بن عمر رضی اللہ عنہما روایت کرتے ہیں : نبی اکرم صلی اللہ علیہ وسلم نے ارشاد فرمایا : ” طلاق دینا ، صرف نکاح کے بعد ہی ہوتا ہے “ ۔
یہ روایت امام طبرانی نے معجم صغیر اور معجم اوسط میں أحمد بن صالح کے حوالے سے نقل کی ہے ۔ اور وہ متروک ہے ۔

سیدنا علی بن ابوطالب رضی اللہ عنہ بیان کرتے ہیں : میں نے تمہارے لئے اللہ کے رسول سے چھ باتیں یاد رکھیں ہیں : ” طلاق دینا صرف نکاح کے بعد ہوتا ہے غلام آزاد کرنا صرف ملکیت کے بعد ہوتا ہے معصیت کے بارے میں نذر کو پورا کرنا لازم نہیں ہوتا بالغ ہونے کے بعد یتیمی ثابت نہیں ہوتی رات تک خاموش رہنے ( یعنی چپ کے روزے ) کی کوئی حیثیت نہیں ہے ، اور روزے رکھتے ہوئے صوم وصال نہیں رکھا جائے گا “ ۔ ( علامہ ہیثمی فرماتے ہیں : ) میں یہ کہتا ہوں امام ابوداؤد نے اس میں سے صرف یہ حصہ نقل کیا ہے بالغ ہونے کے بعد یتیمی ثابت نہیں ہوتی اور رات تک خاموش رہنے کی کوئی حیثیت نہیں ہے ۔
یہ روایت امام طبرانی نے معجم صغیر میں نقل کی ہے ۔ اور اس کے رجال ثقہ ہیں اس سے پہلے غلام آزاد کرنے اور نذر سے متعلق باب میں اس نوعیت کی احادیث گزر چکی ہیں ۔

سیدنا عصمہ رضی اللہ عنہ نے بیان کرتے ہیں : ایک غلام نبی اکرم صلی اللہ علیہ وسلم کی خدمت میں حاضر ہوا اس نے عرض کی : یا رسول اللہ ! میرے آقا نے میری شادی کروائی اب وہ یہ چاہتا ہے کہ میرے اور میری بیوی کے درمیان علیحدگی کروا دے راوی بیان کرتے ہیں : نبی اکرم صلی اللہ علیہ وسلم منبر پر چڑھے آپ نے ارشاد فرمایا : اے لوگو ! طلاق کا اختیار اس شخص کو ہوتا ہے جو پنڈلی کو پکڑتا ہے ۔
یہ روایت امام طبرانی نے نقل کی ہے ۔ اور اس کی سند میں ایک راوی فضل بن مختار ہے ، اور وہ ضعیف ہے ۔

ابن جریج بیان کرتے ہیں : سیدنا عبداللہ بن عباس رضی اللہ عنہما کو یہ اطلاع ملی کہ سیدنا عبداللہ بن مسعود رضی اللہ عنہ یہ فرماتے ہیں : اگر آدمی اس عورت کو طلاق دیدے جس کے ساتھ اس نے نکاح نہیں کیا ہوا تھا تو یہ جائز ہو گا ۔ سیدنا عبداللہ بن عباس رضی اللہ عنہما نے فرمایا : انہوں نے اس مسئلے میں غلطی کی ہے اللہ تعالیٰ نے یہ ارشاد فرمایا ہے : ” جب تم مومن عورتوں کے ساتھ نکاح کر لو پھر اس کے بعد اگر تم انہیں مس کرنے سے پہلے انہیں طلاق دیدو “ اللہ تعالیٰ نے یہ نہیں فرمایا : جب تم مومن عورتوں کو طلاق دیدو اور پھر ان سے نکاح کر لو ۔
یہ روایت امام طبرانی نے نقل کی ہے ۔ اور اس کی سند منقطع ہے ، اور اس کے رجال ثقہ ہیں ۔

ایوب بن سلیمان جوزی بیان کرتے ہیں : میں نے عطاء بن ابی رباح سے ایسے شخص کے بارے میں دریافت کیا : جو کسی عورت کا ذکر کرتے ہوئے یہ کہتا ہے کہ جس دن میں نے اس کے ساتھ شادی کی ، تو اسے طلاق بتہ ہو گی ، تو عطاء نے جواب دیا : آدمی جس کے عقدہ کا مالک نہ ہو اسے طلاق نہیں دے سکتا اور جس کی گردن کا مالک نہ ہو اسے آزاد نہیں کر سکتا ۔ یہ بات سیدنا عبداللہ بن عباس رضی اللہ عنہما کے حوالے سے ذکر کی گئی ہے ، اور انہوں نے اس کی نسبت نبی اکرم صلی اللہ علیہ وسلم کی طرف کی ہے ۔
یہ روایت امام طبرانی نے نقل کی ہے ۔ ایوب نامی راوی سے میں واقف نہیں ہوں ۔ اس روایت کے بقیہ رجال ثقہ ہیں ۔