مجمع الزوائد ومنبع الفوائد

سیدنا ابوموسی اشعری رضی اللہ عنہ بیان کرتے ہیں : نبی اکرم صلی اللہ علیہ وسلم نے ارشاد فرمایا : خواتین کو صرف مشکوک صورت حال ( یعنی کسی شرعی خرابی کی صورت ) میں طلاق دی جائے گی ، بے شک اللہ تعالیٰ چکھنے والے مردوں اور چکھنے والی عورتوں ( یعنی حلالہ کی خاطر وقتی نکاح کرنے والوں ) کو پسند نہیں کرتا ہے ۔
یہ روایت امام بزار اور امام طبرانی نے معجم کبیر اور معجم اوسط میں نقل کی ہے ۔ امام بزار کی اسانید میں سے ایک سند میں ایک راوی عمران القطان ہے ، جسے امام أحمد اور ابن حبان نے ثقہ قرار دیا ہے یحیی بن سعید اور دیگر حضرات نے اسے ضعیف کہا: ہے ۔

سیدنا عبادہ بن صامت رضی اللہ عنہ بیان کرتے ہیں : بے شک اللہ تعالیٰ چکھنے والے مردوں اور چکھنے والی عورتوں ( یعنی حلالہ کی خاطر وقتی نکاح کرنے والوں ) کو پسند نہیں کرتا ہے ۔
یہ روایت امام طبرانی نے نقل کی ہے ۔ اس کی سند میں ایک ایسا راوی ہے جس کا نام بیان نہیں کیا گیا ہے اس کی بقیہ سند حسن ہے ۔

سیدنا جابر رضی اللہ عنہ بیان کرتے ہیں : ایک شخص نبی اکرم صلی اللہ علیہ وسلم کی خدمت میں حاضر ہوا اس نے عرض کی : یا رسول اللہ ! میری بیوی کسی چھونے والے کے ہاتھ کو پرے نہیں کرتی نبی اکرم صلی اللہ علیہ وسلم نے فرمایا : تم اسے طلاق دیدو اس نے عرض کی : میں اس سے محبت کرتا ہوں وہ بہت خوبصورت ہے ۔ نبی اکرم صلی اللہ علیہ وسلم نے فرمایا ، پھر تم اس سے نفع حاصل کرو ۔
یہ روایت امام طبرانی نے معجم اوسط میں نقل کی ہے ۔ اور اس کے رجال صحیح کے رجال ہیں ۔

محمد بن سیرین بیان کرتے ہیں : سیدنا امام حسن بن علی رضی اللہ عنہ نے منصور بن سیار بن ریان فزاری سے اس کی بیٹی کا رشتہ مانگا ، تو اس نے کہا: میں اللہ کی قسم ! ( اپنی بیٹی کی ) شادی نہیں کرواؤں گا کیونکہ میں یہ بات جانتا ہوں کہ آپ خواتین ( کے ساتھ شادی ) میں دلچسپی رکھتے ہیں ، ( اکثر اوقات ، اپنی ازواج کو ) طلاق دیدیتے ہیں ، اور شادی کرنے کے بعد ، اپنی بیویوں سے ) علیحدگی اختیار کر لیتے ہیں ، البتہ یہ ہے کہ عربوں میں ، آپ سب سے زیادہ معزز گھرانے کے مالک ہیں اور نسب کے اعتبار سے سب سے زیادہ معزز ہیں ۔
یہ روایت امام طبرانی نے نقل کی ہے ۔ اور اس کے رجال ثقہ ہیں ۔

سیدنا فضالہ بن عبید انصاری رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” تین چیزوں میں کھیل ( یعنی مذاق ) جائز نہیں ہے طلاق دینا نکاح کرنا اور غلام آزاد کرنا “ ۔
یہ روایت امام طبرانی نے نقل کی ہے ۔ اس کی سند میں ایک راوی ابن لہیعہ ہے ، اور اس کی نقل کردہ حدیث حسن ہے ، اور اس روایت کے بقیہ رجال صحیح کے رجال ہیں ۔ اس سے پہلے اس نوعیت کی احادیث گزر چکی ہیں ۔