مجمع الزوائد ومنبع الفوائد

سیدنا ابوایوب انصاری رضی اللہ عنہ بیان کرتے ہیں : میں نے نبی اکرم صلی اللہ علیہ وسلم کو یہ ارشاد فرماتے ہوئے سنا ہے : ” جو شخص جمعہ کے دن غسل کرے اور خوشبو لگائے اگر اس کے پاس موجود ہو اور اپنا سب سے بہتر لباس پہنے اور پھر نکلے یہاں تک کہ مسجد آ جائے اور اسے مناسب لگے ، تو نوافل ادا کرے اور اس دوران کسی کو اذیت نہ پہنچائے پھر وہ خاموش رہے ، یہاں تک کہ ( جمعہ کی نماز با جماعت ادا کر لے ) تو یہ چیز اس کے لئے اس جمعہ اور دوسرے جمعہ کے درمیان کے گناہوں کا کفارہ بن جائے گی “ ۔ ایک روایت میں یہ الفاظ ہیں : ” پھر وہ نکلے اور اس پر سکینت ہو ( یعنی وہ پرسکون انداز میں چلتا ہوا ) مسجد تک آ جائے “ ۔ یہ تمام روایات امام أحمد اور امام طبرانی نے معجم کبیر میں نقل کی ہیں ، اور اس کے رجال ” ثقہ “ ہیں ۔

سیدنا ابودرداء رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا ہے : ” جو شخص جمعہ کے دن غسل کر کے اپنا سب سے بہتر لباس پہنے اور خوشبو لگائے اگر اس کے پاس موجود ہو پھر جمعہ کی طرف پیدل چل کر جائے اور پرسکون انداز میں چل کر جائے وہ کسی کو پھلانگے نہیں وہ کسی کو اذیت نہ پہنچائے اور جو اس کے نصیب میں ہو اتنے نوافل ادا کرے پھر انتظار کرتا رہے ، یہاں تک کہ امام فارغ ہو جائے تو اس کے دو جمعوں کے درمیان کے گناہوں کی مغفرت ہو جاتی ہے “ ۔
یہ روایت امام أحمد نے اور امام طبرانی نے معجم کبیر میں حرب بن قیس کے حوالے سے سیدنا ابودرداء سے نقل کی ہے حرب نامی راوی نے سیدنا ابودرداء سے سماع نہیں کیا ہے ۔

عطاء خراسانی بیان کرتے ہیں : سیدنا نبیشہ ہذلی رضی اللہ عنہ نبی اکرم صلی اللہ علیہ وسلم کے حوالے سے یہ حدیث نقل کرتے تھے : ” مسلمان جمعہ کے دن جب غسل کرتا ہے ، اور پھر مسجد کی طرف آتا ہے ، اور کسی کو اذیت نہیں پہنچاتا اگر وہ یہ پاتا ہے کہ امام ابھی نہیں آیا تو پھر جتنا اس کو مناسب لگتا ہے اتنے نوافل ادا کرتا ہے ، اور اگر امام آچکا ہو تو وہ بیٹھ جاتا ہے ، اور غور سے ( خطبہ ) سنتا ہے ، اور خاموش رہتا ہے یہاں تک کہ امام اپنا جمعہ اور اپنا کلام مکمل کر لیتا ہے ، تو اگر اس کے اس جمعہ کے تمام گناہوں کی مغفرت نہ ہوئی ہو ، تو پھر یہ اس کے بعد والے جمعہ تک کے گناہوں کا کفارہ بن جاتا ہے “ ۔
یہ روایت امام أحمد نے نقل کی ہے ، اور اس کے رجال ” صحیح“ کے رجال ہیں صرف امام أحمد کے استاد کا معاملہ مختلف ہے ، اور وہ ” ثقہ“ ہے ۔

سیدنا عبداللہ بن عمرو بن العاص رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” جو شخص سر دھوئے اور غسل کرے اور ( امام کے ) قریب ہو اور جلدی چلا جائے اور غور سے خطبہ سنے تو اس کے اٹھائے ہوئے ہر قدم کے عوض میں اسے ایک سال کے قیام ( یعنی نوافل ادا کرنے ) اور روزوں کا ثواب ملتا ہے “ ۔ علامہ ہیثمی فرماتے ہیں : ) میں یہ کہتا ہوں : ان صحابی کے حوالے سے امام ابوداؤد نے دو احادیث روایت کی ہیں جو اس کے علاوہ ہیں
یہ روایت امام أحمد نے نقل کی ہے ، اور اس کے رجال ” صحیح “ کے رجال ہیں ۔

سیدنا ابوسعید خدری رضی اللہ عنہ نبی اکرم ؑ صلی اللہ علیہ وسلم کا یہ فرمان نقل کرتے ہیں : ” جب کوئی شخص وضو کرتے ہوئے اچھی طرح وضو کرے اور پھر وہ جمعہ کے لئے آئے اور کوئی لغو حرکت نہ کرے اور جہالت کا مظاہرہ نہ کرے یہاں تک کہ امام ( نماز ادا کر کے ) فارغ ہو جائے تو یہ چیز اس شخص کے اس جمعہ اور اس کے بعد والے جمعہ کے ( درمیان کے ) گناہوں کا کفارہ بن جاتی ہے ، اور جمعہ میں ایک گھڑی ایسی ہے ، جس میں مؤمن بندہ اللہ تعالیٰ سے جو بھی چیز مانگتا ہے اللہ تعالیٰ وہ چیز اسے عطا کر دیتا ہے ، اور فرض نمازیں درمیان میں ہونے والے گناہوں کا کفارہ ہوتی ہیں“ ۔ ( علامہ ہیثمی فرماتے ہیں : ) میں یہ کہتا ہوں :
یہ روایت امام ابوداؤد نے اختصار کے ساتھ نقل کی ہے ۔

یہ روایت امام أحمد امام بزار نے امام طبرانی نے معجم اوسط میں نقل کی ہے ، تاہم انہوں نے یہ الفاظ زائد نقل کیے ہیں : ” اگر اسے مناسب لگے ، تو وہ کچھ نوافل ادا کر لے ، تو یہ چیز اس کے اس جمعہ سے لے کر اگلے جمعہ تک کے درمیان کے گناہوں کا کفارہ بن جاتی ہے ، اور مزید تین دن کے ( گناہوں کا کفارہ بنتی ہے ) “ ۔ اس روایت کی سند میں ایک راوی عطیہ ہے ، جس کے بارے میں بہت زیادہ کلام کیا گیا ہے ۔

سیدنا عبداللہ بن عباس رضی اللہ عنہما کے بارے میں یہ بات منقول ہے : ایک شخص نے ان سے جمعہ کے دن غسل کرنے کے بارے میں دریافت کیا : کہ کیا یہ واجب ہے انہوں نے فرمایا : جی نہیں البتہ غسل کے ( حکم ) کا آغاز کیسے ہوا ؟ میں تمہیں اس بارے میں بتا دیتا ہوں پہلے لوگ غریب ہوتے تھے وہ اونی لباس پہنتے تھے ، اور اپنی پشت پر لا کر کھجوروں کو پانی دیا کرتے تھے نبی اکرم صلی اللہ علیہ وسلم کی مسجد چھوٹی تھی اس کی چھت نیچی تھی لوگ اونی لباس پہن کر آ گئے انہیں پسینہ آ گیا نبی اکرم صلی اللہ علیہ وسلم کا منبر بھی چھوٹا تھا اس کے تین درجے تھے لوگوں کو اونی لباس میں پسینہ آیا تو ان کی بو پھیل گئی انہیں ایک دوسرے کی وجہ سے اذیت ہوئی یہاں تک کہ ان کی بو نبی اکرم صلی اللہ علیہ وسلم تک بھی پہنچ گئی آپ اس وقت منبر پر تشریف فرما تھے آپ نے ارشاد فرمایا : اے لوگو ! جب تم جمعہ کے لئے آؤ تو غسل کر لیا کرو اور اگر کسی شخص کے پاس موجود ہو تو وہ سب سے عمدہ خوشبو لگایا کرے “ ( علامہ ہیثمی فرماتے ہیں : ) میں یہ کہتا ہوں : ” صحیح “ میں اس کا کچھ حصہ منقول ہے
یہ روایت امام أحمد نے نقل کی ہے ، اور اس کے رجال ” صحیح “ کے رجال ہیں ۔

انصار سے تعلق رکھنے والے ایک صحابی نبی اکرم صلی اللہ علیہ وسلم کا یہ فرمان نقل کرتے ہیں : ” ہر مسلمان پر یہ لازم ہے کہ وہ جمعہ کے دن غسل کرے مسواک کرے اور خوشبو لگائے اگر اس کے اہل خانہ کے پاس وہ ہو “ ۔
یہ روایت امام أحمد نے نقل کی ہے ، اور اس کے رجال ” صحیح “ کے رجال ہیں ۔

سیدنا عبداللہ بن عباس رضی اللہ عنہما روایت کرتے ہیں : نبی اکرم صلی اللہ علیہ وسلم نے ارشاد فرمایا ہے : ” جو شخص جمعہ کے دن سر کو دھوئے اور غسل کرے پھر وہ قریب آ جائے جہاں وہ امام کا خطہ سن سکتا ہو جب امام آ جائے تو وہ غور سے خطبہ سنے اور خاموش رہے ، یہاں تک کہ امام کی اقتداء میں نماز ادا کرے تو اس کے اٹھائے ہوئے ہر ایک قدم کے عوض میں اس کے لئے ایک سال کی عبادت یعنی ایک سال کے قیام اور روزوں کا ثواب نوٹ کیا جاتا ہے “ ۔
یہ روایت امام بزار نے نقل کی ہے ، اور امام طبرانی نے اسے معجم اوسط میں نقل کیا ہے ، اس کی سند میں ایک راوی عطاء بن عجلان ہے ، اور وہ کذاب ہے ۔

سیدنا ثوبان رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا ہے : ” ہر مسلمان پر جمعہ کے دن مسواک کرنا اور غسل کرنا لازم ہے ، اور اگر اس کے اہل خانہ کے پاس خوشبو موجود ہو تو وہ لگانا بھی لازم ہے “ ۔
یہ روایت امام بزار نے نقل کی ہے ، اس کی سند میں ایک راوی یزید بن ربیعہ ہے ، جسے امام بخاری رحمہ اللہ اور امام نسائی رحمہ اللہ نے ضعیف قرار دیا ہے ۔ ابن عدی کہتے ہیں : میں یہ امید رکھتا ہوں کہ اس میں کوئی حرج نہیں ہے ۔

سیدنا ابوایوب انصاری رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا ہے : ” اے مسلمانوں کے گروہ ! تم میں سے جو شخص جمعہ کی ادائیگی کے لئے آئے اسے غسل کر لینا چاہیے اور اگر اس کے پاس خوشبو ہو تو پھر اس پر کوئی حرج نہیں ہو گا کہ اگر وہ اسے لگا لے اور تم پر مسواک کرنا لازم ہے “ ۔
یہ روایت امام طبرانی نے معجم کبیر میں نقل کی ہے ، اس کی سند میں ایک راوی معاویہ بن یحیی صدفی ہے ، جس کے بارے میں بہت زیادہ کلام کیا گیا ہے ۔

سیدنا ابوہریرہ رضی اللہ عنہ روایت کرتے ہیں : نبی اکرم صلی اللہ علیہ وسلم نے ایک جمعہ کے دن ارشاد فرمایا : ” اے مسلمانوں کے گروہ ! بے شک یہ ایسا دن ہے ، جسے اللہ تعالیٰ نے تمہارے لئے عید بنایا ہے ، تو تم لوگ غسل کرو اور تم پر مسواک کرنا لازم ہے “ ۔
یہ روایت امام طبرانی نے معجم اوسط اور معجم اور صغیر میں نقل کی ہے ، اور اس کے رجال ” ثقہ “ ہیں ۔

سیدنا بریده رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” جو شخص جمعہ کے لئے آئے اسے غسل کر لینا چاہیے “ ۔
یہ روایت امام بزار نے نقل کی ہے ۔

ان صحابی کے حوالے سے امام طبرانی نے معجم اوسط میں یہ روایت نقل کی ہے : ( وہ بیان کرتے ہیں : ) اللہ کے رسول نے ہمیں یہ حکم دیا تھا کہ ہم ہر ہفتے میں ایک دن غسل کیا کریں راوی کہتے ہیں : اس سے مراد یہ ہے کہ جمعہ کے دن ایسا کیا کریں ۔ ان دونوں روایات کی سند میں ایک راوی زکریا بن یحیی ہے عقیلی بیان کرتے ہیں : اس کی نقل کردہ حدیث کی متابعت نہیں کی جاتی امام ذہبی کہتے ہیں : انہوں نے اس کے حوالے سے ایک عمدہ حدیث نقل کی ہے ۔ ابن حبان نے اس راوی کا ذکر کتاب ” الثقات “ میں کیا ہے : اور یہ بات بیان کی ہے : یہ غلطی کرتا ہے ۔

سیدہ عائشہ رضی اللہ عنہا نبی اکرم صلی اللہ علیہ وسلم کا یہ فرمان نقل کرتی ہیں : ” جو شخص جمعہ کے لئے اسے غسل کرنا چاہیے “ ۔
یہ روایت امام بزار نے نقل کی ہے ، اس کی سند میں ایک راوی عبدالواحد بن میمون ابوحمزہ ہے ، جسے امام بخاری رحمہ اللہ اور امام دارقطنی رحمہ اللہ نے ضعیف قرار دیا ہے ۔

سیدنا جابر نبی اکرم صلی اللہ علیہ وسلم کا یہ فرمان نقل کرتے ہیں : جمعہ کے دن غسل کرنا ہر بالغ شخص پر واجب ہے “ ۔
یہ روایت امام طبرانی نے معجم اوسط میں نقل کی ہے ، اس کی سند میں ایک راوی عبداللہ بن محمد بن سعید بن ابومریم ہے ، اور وہ انتہائی ” ضعیف “ ہے ۔

سیدنا عبداللہ بن مسعود رضی اللہ عنہ فرماتے ہیں : سنت میں یہ چیز شامل ہے کہ جمعہ کے دن غسل کیا جائے “ ۔
یہ روایت امام بزار نے نقل کی ہے ، اور اس کے رجال ” ثقہ “ ہیں ۔

سیدنا عبداللہ بن عمر فرماتے ہیں : جمعہ کے دن غسل کرنا سنت ہے ۔
یہ روایت امام طبرانی نے معجم کبیر میں نقل کی ہے ، اس کی سند میں ایک راوی ابوبحر بکراوی ہے امام أحمد کہتے ہیں : لوگوں نے اس کی حدیث کو پرے کر دیا تھا بعض حضرات نے یہ بات بیان کی ہے ، اس کی حدیث کو نوٹ کیا جائے گا یحیی بن معین اور دیگر حضرات نے اسے ضعیف قرار دیا ہے ۔

سیدنا عبداللہ بن زبیر رضی اللہ عنہما روایت کرتے ہیں : نبی اکرم صلی اللہ علیہ وسلم نے ارشاد فرمایا ہے : ” جو شخص جمعہ کے لئے آئے اسے غسل کر لینا چاہیے “ ۔
یہ روایت امام طبرانی نے معجم کبیر میں نقل کی ہے ، اس کی سند میں ایک راوی ابراہیم بن یزید ہے ، اس کے بارے میں میرا یہ گمان ہے کہ یہ خوری ہے کیونکہ یہ اسی کے طبقے سے تعلق رکھتا ہے ، اس نے تابعین سے روایات نقل کی ہیں ، اور یہ متروک ہے ۔

سیدنا سہل بن حنیف رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” جمعہ کے حق میں مسواک کرنا اور غسل کرنا شامل ہے ، اور جو شخص خوشبو پائے وہ اسے لگا لے “ ۔
یہ روایت امام طبرانی نے معجم کبیر میں نقل کی ہے ، اس کی سند میں ایک راوی یزید بن عیاض ہے ، اور وہ کذاب ہے ۔

سیدنا ابوامامہ رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا ہے : ” جمعہ کے دن غسل کرو کیونکہ جو شخص جمعہ کے دن غسل کرے تو یہ اس جمعہ سے لے کر دوسرے جمعہ تک اور مزید تین دنوں کے درمیان ( میں ہونے والے گناہوں ) کا کفارہ بن جائے گا“ ۔
یہ روایت امام طبرانی نے معجم کبیر اور معجم اوسط میں نقل کی ہے ، اس کی سند میں ایک راوی سوید بن عبدالعزیز ہے ، جسے امام أحمد یحیی بن معین اور دیگر حضرات نے ضعیف قرار دیا ہے ، جب کہ دحیم اور دیگر حضرات نے اسے ” ثقہ “ کہا: ہے ۔

سیدنا ابومالک رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا ہے : ” جمعہ اس جمعہ سے لے کر اس کے بعد والے جمعہ تک اور مزید تین دنوں کے درمیان ( میں ہونے والے گناہوں ) کا کفارہ بن جاتا ہے ، اس کی وجہ یہ ہے کہ اللہ تعالیٰ نے ارشاد فرمایا ہے : ” جو شخص ایک اچھائی کرے گا اسے اس کا دس گنا اجر ملے گا “ ۔
یہ روایت امام طبرانی نے معجم کبیر میں نقل کی ہے ، اس کی سند میں ایک راوی محمد بن اسماعیل بن عیاش ہے ، جس نے اپنے والد سے یہ روایت نقل کی ہے : امام ابوحاتم کہتے ہیں : اس نے اپنے والد سے کسی چیز کا سماع نہیں کیا ہے ۔

سیدنا سلمان فارسی رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : اے سلمان ! کیا تم جانتے ہو جمعہ کا دن کیا ہے ؟ میں نے عرض کی : یہ وہ دن ہے ، جس میں اللہ تعالی نے آپ کے والد ( راوی کو شک ہے شاید یہ الفاظ ہیں : ) آپ کے ماں باپ ( یعنی سیدنا آدم اور سیدہ حوا علیہا السلام ) کو اکٹھا کیا تھا نبی اکرم صلی اللہ علیہ وسلم نے ارشاد فرمایا : جی نہیں میں تمہیں جمعہ کے دن کے بارے میں بتاتا ہوں جو بھی مسلمان طہارت حاصل کر کے عمدہ لباس پہنے اور خوشبو لگائے اگر اس کے پاس خوشبو موجود ہو ورنہ پانی ہی کافی ہے پھر وہ مسجد میں آئے اور خاموش رہے ، یہاں تک کہ امام آ جائے پھر وہ نماز ادا کرے تو یہ چیز اس شخص کے لئے اس جمعہ سے دوسرے جمعہ تک کے درمیان گناہوں کا کفارہ بن جاتی ہے ، جب کہ قتل کرنے سے اجتناب کیا گیا ہو اور یہ فضیلت ہمیشہ رہے گی “ ۔ ( علامہ ہیثمی فرماتے ہیں : ) میں یہ کہتا ہوں : امام نسائی رحمہ اللہ نے اس کا کچھ حصہ نقل کیا ہے امام طبرانی نے معجم کبیر میں اسے نقل کیا ہے ، اور اس کی سند حسن ہے ۔

سیدنا سلمان فارسی رضی اللہ عنہ بیان کرتے ہیں : نبی اکرم صلی اللہ علیہ وسلم نے ارشاد فرمایا : اے سلمان ! جمعہ کا دن کیا ہے ؟ میں نے عرض کی : اللہ اور اس کا رسول زیادہ بہتر جانتے ہیں یہ مکالمہ تین مرتبہ ہوا پھر سیدنا سلمان نے عرض کی : جمعہ کا دن وہ ہے ، جس میں آپ کے والد کو ( راوی کو شک ہے شاید یہ الفاظ ہیں : ) آپ کے ماں باپ کو ( یعنی سیدنا آدم اور سیدہ حواء علیہا السلام ) کو جمع کیا گیا “ ۔ اس کے بعد انہوں نے اس کی مانند روایت نقل کی ہے ، اور اس کے رجال ” ثقہ “ ہیں ۔

سیدنا ابوبکر صدیق رضی اللہ عنہ اور سیدنا عمران بن حصین رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا ہے : ” جو شخص جمعہ کے دن غسل کرتا ہے ، اس سے اس کے گناہ اور خطائیں دور کر دیے جاتے ہیں ، اور جب وہ پیدل چلتا ہوا جاتا ہے ، تو ہر ایک قدم کے عوض میں بیس نیکیاں نوٹ کی جاتی ہیں جب وہ نماز سے فارغ ہوتا ہے ، تو اسے دو سو سال کے عمل کی جزا دی جاتی ہے “ ۔
یہ روایت امام طبرانی نے معجم کبیر اور معجم اوسط میں نقل کی ہے ، اس کی سند میں ایک راوی ضحاک بن حمرہ ہے ، جسے یحیی بن معین اور امام نسائی رحمہ اللہ نے ضعیف قرار دیا ہے ۔ ابن حبان نے اس کا تذکرہ کتاب ” الثقات “ میں کیا ہے ۔

سیدنا ابوبکر صدیق رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا ہے : ” جو شخص جمعہ کے دن غسل کرے اس کے گناہوں ، اور خطاؤں کی مغفرت ہو جاتی ہے ، اور جب وہ پیدل چل کر جمعہ کے لئے جاتا ہے ، تو اسے ہر ایک قدم کے عوض میں بیس سال کے عمل کا ثواب ملتا ہے ، جب وہ جمعہ کی نماز پڑھ کر فارغ ہوتا ہے ، تو اسے دو سال کے عمل کی جزا دی جاتی ہے “ ۔
یہ روایت امام طبرانی نے معجم اوسط میں نقل کی ہے ، اس کی سند میں ایک راوی عباد بن عبدالصمد ابومعمر ہے ، جسے امام بخاری رحمہ اللہ اور ابن حبان نے ضعیف قرار دیا ہے ۔

سیدنا ابوامامہ رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” جمعہ کے دن غسل کرنے سے بالوں کی جڑوں سے بھی خطائیں نکل جاتی ہیں “ ۔
یہ روایت امام طبرانی نے معجم کبیر میں نقل کی ہے ، اور اس کے رجال ” ثقہ “ ہیں ۔

عبداللہ بن ابوقتادہ بیان کرتے ہیں : میرے والد میرے ہاں تشریف لائے میں جمعہ کے دن غسل کر رہا تھا انہوں نے دریافت کیا : یہ غسل جنابت ہے یا جمعہ کے لئے نسل ہے ؟ میں نے جواب دیا : غسل جنابت ہے انہوں نے فرمایا : تم دوبارہ غسل کرو کیونکہ میں نے نبی اکرم صلی اللہ علیہ وسلم کو یہ ارشاد فرماتے ہوئے سنا ہے : ” جو شخص جمعہ کے دن غسل کرتا ہے ، تو وہ اگلے جمعہ تک طہارت کی حالت میں رہتا ہے “ ۔
یہ روایت امام طبرانی نے معجم اوسط میں نقل کی ہے ، اس کی سند میں ایک راوی ہارون بن مسلم ہے ابوحاتم کہتے ہیں : اس میں کمزوری پائی جاتی ہے امام حاکم رحمہ اللہ اور ابن حبان نے اسے ” ثقہ “ قرار دیا ہے ، اس روایت کے بقیہ رجال ” ثقہ “ ہیں ۔

سیدنا عبداللہ بن عمر نبی اکرم صلی اللہ علیہ وسلم یہ فرمان نقل کرتے ہیں : ” جو شخص جمعہ کے دن غسل کرے اور پھر اپنے پاس موجود سب سے عمدہ خوشبو لگائے اور اپنا سب سے بہترین لباس پہنے پھر وہ جائے اور دو آدمیوں کے درمیان جدائی نہ ڈالے یہاں تک کہ اپنی جگہ تک پہنچ جائے پھر وہ خاموش رہے ، یہاں تک کہ امام اپنے خطبے سے فارغ ہو جائے تو اس شخص کے دو جمعوں کے درمیان کے اور مزید تین دنوں کے گناہوں کی مغفرت ہو جاتی ہے “ ۔
یہ روایت امام طبرانی نے معجم اوسط میں نقل کی ہے ، اس کی سند میں ایک راوی محمد بن عبدالرحمن بن رواد ہے ، اور وہ ” ضعیف“ ہے ۔

سیدنا اوس بن انس رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” جو شخص جمعہ کے دن صبح کے وقت سر دھوئے اور غسل کرے اور جلدی جائے اور پیدل چل کر جائے سوار ہو کر نہ جائے اور قریب ہو اور لغو حرکت نہ کرے تو اسے ہر ایک قدم کے عوض میں نیکیوں کے اعمال میں سے عمل یعنی روزے اور نماز کا ثواب دیا جاتا ہے “ ۔ ( علامہ ہیثمی فرماتے ہیں : ) میں یہ کہتا ہوں : ان صاحب کے حوالے سے ایک حدیث منقول ہے ، جو اس کی مانند ہے ، اور ” سنن “ میں مذکور ہے ، تاہم وہ اس روایت کے علاوہ ہے ۔ اس روایت کی سند میں ایک راوی صالح عدانی ہے میں نے کسی کو اس کے حالات بیان کرتے ہوئے نہیں پایا ہے ، اس روایت کے بقیہ رجال ” ثقہ “ ہیں ۔