مجمع الزوائد ومنبع الفوائد

سیدنا ابوہریرہ رضی اللہ عنہ بیان کرتے ہیں : نبی اکرم صلی اللہ علیہ وسلم جمعہ کے دن ناخن تراشا کرتے تھے ، اور مونچھیں چھوٹی کرتے تھے آپ جمعہ میں جانے سے پہلے ایسا کرتے تھے ۔
یہ روایت امام بزار نے اور امام طبرانی نے معجم اوسط میں نقل کی ہے ، اس کی سند میں ایک راوی ابراہیم بن قدامہ ہے امام بزار کہتے ہیں : یہ حجت نہیں ہے ، جب کسی حدیث کو نقل کرنے میں یہ منفرد ہو اور اس روایت کو نقل کرنے میں بھی یہ راوی منفرد ہے ۔ ( علامہ ہیثمی فرماتے ہیں : ) میں یہ کہتا ہوں : امام ابن حبان رحمہ اللہ نے اس کا تذکرہ کتاب ” الثقات “ میں کیا ہے ۔

سیدہ عائشہ صدیقہ رضی عنہا بیان کرتی ہیں : نبی اکرم صلی اللہ علیہ وسلم نے ارشاد فرمایا : ” جو شخص جمعہ کے دن ناخن تراشتا ہے وہ اس کی مثل ( یعنی اگلے جمعے تک ) برائی سے بچا لیا جاتا ہے “ ۔
یہ روایت امام طبرانی نے معجم اوسط میں نقل کی ہے ، اس کی سند میں ایک راوی أحمد بن ثابت ہے ، جس کا لقب فرخو یہ ہے ، اور وہ ” ضعیف “ ہے ۔