مجمع الزوائد ومنبع الفوائد

سیدنا انس رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” جو شخص جمعہ کے دن صرف وضو کر لے ، تو یہ بھی کافی ہے ، اور ٹھیک ہے ، لیکن جو شخص غسل کر لے ، تو غسل کرنا زیادہ فضیلت رکھتا ہے “ ۔
یہ روایت امام بزار نے نقل کی ہے ، اس کی سند میں ایک راوی یزید رقاشی ہے ، جس کے بارے میں کلام کیا گیا ہے ۔

سیدنا جابر نبی اکرم صلی اللہ علیہ وسلم کا یہ فرمان نقل کرتے ہیں : ” جو شخص جمعہ کے دن وضو کرے تو یہ بھی کافی ہے ، اور اچھا ہے ، اور جو شخص غسل کر لے ، تو غسل کرنا زیادہ فضیلت رکھتا ہے “ ۔
یہ روایت امام بزار نے نقل کی ہے ، اس کی سند میں ایک راوی قیس بن ربیع ہے ، جسے شعبہ اور ثوری نے ” ثقہ “ قرار دیا ہے ، اور ایک جماعت نے اسے ضعیف قرار دیا ہے ۔

سیدنا ابوسعید خدری رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا ہے : ” جو شخص جمعہ کے دن وضو کرے تو یہ بھی کافی ہے ، اور اچھا ہے ، اور جو شخص غسل کر لے ، تو غسل کرنا زیادہ فضیلت رکھتا ہے “ ۔
یہ روایت امام بزار نے نقل کی ہے ، اس کی سند میں ایک راوی اسید بن زید ہے ، اور وہ کذاب ہے ۔

سیدنا عبداللہ بن عباس رضی اللہ عنہما بیان کرتے ہیں : نبی اکرم صلی اللہ علیہ وسلم جمعہ کے دن بعض اوقات غسل کر لیتے تھے کبھی کبھار آپ اسے ترک بھی کر دیتے تھے ۔
یہ روایت امام طبرانی نے معجم کبیر میں نقل کی ہے ، اس کی سند میں ایک راوی محمد بن معاویہ نیشا پوری ہے ، اور وہ ضعیف ہے ، تاہم امام أحمد نے اس کی تعریف کی ہے عمرو بن علی کہتے ہیں : یہ ضعیف ہے ، لیکن صدوق ہے ۔

سیدنا عبدالرحمن بن سمرہ رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا ہے : ” جو شخص جمعہ کے دن وضو کر لے ، تو یہ بھی کافی ہے ، اور اچھا ہے ، اور جو شخص غسل کرے تو غسل کرنا زیادہ فضیلت رکھتا ہے “ ۔
یہ روایت امام طبرانی نے معجم اوسط میں نقل کی ہے ، اس کی سند میں ایک راوی ابوحرہ رقاشی ہے ، جسے امام ابوداؤد نے ” ثقہ “ قرار دیا ہے ، اور یحیی بن معین نے اسے ضعیف قرار دیا ہے ۔

سیدنا عبداللہ بن عباس رضی اللہ عنہما بیان کرتے ہیں : نبی اکرم صلی اللہ علیہ وسلم جمعہ کے دن خطبہ دے رہے تھے ۔ اسی دوران ایک شخص ( مسجد میں ) داخل ہوا اور لوگوں کی گردنیں پھلانگ کر آگے آیا تو نبی اکرم صلی اللہ علیہ وسلم نے ارشاد فرمایا : تم میں سے کوئی ایک شخص آنے میں تاخیر کرتا ہے ، اور پھر لوگوں کی گردنیں پھلانگتا ہے ، اور انہیں اذیت پہنچاتا ہے ، اس شخص نے کہا: میں نے جیسے ہی اذان سنی تو اور کچھ نہیں کیا صرف وضو کیا ( اور آ گیا ہوں ) نبی اکرم صلی اللہ علیہ وسلم نے فرمایا : کیا یہ صرف وضو کرنے کا دن ہے ؟ “
یہ روایت امام طبرانی نے معجم اوسط میں نقل کی ہے ، اس کی سند میں ایک راوی عمرو بن ولید سہمی ہے امام نسائی رحمہ اللہ کہتے ہیں : یہ قوی نہیں ہے امام ابن حبان رحمہ اللہ نے اس کا تذکرہ کتاب ” الثقات “ میں کیا ہے ، اس روایت کے بقیہ رجال ” ثقہ “ ہیں ۔

سیدنا علی رضی اللہ عنہ فرماتے ہیں : جمعہ کے دن غسل کرنے کو مستحب قرار دیا گیا ہے یہ لازمی نہیں ہے ۔
یہ روایت امام طبرانی نے معجم اوسط میں نقل کی ہے ، اور اس کے رجال ” ثقہ “ ہیں ۔ ( علامہ ہیثمی فرماتے ہیں : ) میں یہ کہتا ہوں : اس سے پہلے والے باب میں یہ روایت گزر چکی ہے ، جو اس بات پر دلالت کرتی ہے کہ جمعہ کے دن غسل کرنا سنت ہے باقی اللہ بہتر جانتا ہے ۔