مجمع الزوائد ومنبع الفوائد

سیدنا انس رضی اللہ عنہ بیان کرتے ہیں : ایک مرتبہ سیدنا خالد بن ولید رضی اللہ عنہ اور سیدنا عبدالرحمن بن عوف رضی اللہ عنہ کے درمیان تلخ کلامی ہو گئی ، تو سیدنا خالد رضی اللہ عنہ نے سیدنا عبدالرحمن رضی اللہ عنہ سے کہا: آپ لوگ ہمارے مقابلے میں خود کو اس لئے نمایاں سمجھتے ہیں کہ جو چند دنوں کے حوالے سے آپ کو ہم پر سبقت حاصل ہے ، راوی کہتے ہیں : ہم تک
یہ روایت پہنچی ہے : جب اس بات کا تذکرہ نبی اکرم صلی اللہ علیہ وسلم سے کیا گیا ، تو آپ نے ارشاد فرمایا :
” میرے لئے میرے اصحاب کو رہنے دو ! اس ذات کی قسم ! جس کے دست قدرت میں میری جان ہے ، اگر تم احد پہاڑ جتنا ۔ راوی کو شک ہے ، شاید یہ الفاظ ہیں : پہاڑوں جتنا سونا خرچ کرو ، تو تم پھر بھی اُن کے اعمال تک نہیں پہنچ سکتے ۔ “
یہ روایت امام أحمد نے نقل کی ہے اور اس کے رجال صحیح کے رجال ہیں ۔

سیدنا ابوہریرہ رضی اللہ عنہ بیان کرتے ہیں : ایک مرتبہ سیدنا خالد بن ولید رضی اللہ عنہ اور سیدنا عبدالرحمن بن عوف رضی اللہ عنہ کے درمیان ویسے تلخ کلامی ہو گئی ، جو لوگوں کے درمیان ہو جاتی ہے ، تو نبی اکرم صلی اللہ علیہ وسلم نے ارشاد فرمایا : ” میرے لئے میرے اصحاب کو رہنے دو ، کیونکہ تم میں سے کوئی شخص اگر اُحد پہاڑ جتنا سونا خیرات کرے ، تو وہ پھر بھی اُن میں سے کسی ایک کے ، ایک مد ، بلکہ نصف مد تک بھی نہیں پہنچ سکتا ۔ “
یہ روایت امام بزار نے نقل کی ہے اور اس کے رجال صحیح کے رجال ہیں ، صرف عاصم بن ابونجود کا معاملہ مختلف ہے اور اس کی توثیق کی گئی ہے ۔

سیدنا عبداللہ بن سلام رضی اللہ عنہ بیان کرتے ہیں : ہم نے عرض کی : یا رسول اللہ ! ہم زیادہ بہتر ہیں یا ہمارے بعد والے لوگ ؟ نبی اکرم صلی اللہ علیہ وسلم نے ارشاد فرمایا : ” اگر ان میں سے کوئی ایک شخص اُحد پہاڑ جتنا سونا اللہ کی راہ میں خرچ کرے ، تو وہ پھر بھی تم میں سے کسی ایک کے ، ایک مد ، بلکہ اس کے نصف تک بھی نہیں پہنچ سکتا ۔ “
یہ روایت امام طبرانی نے معجم کبیر میں نقل کی ہے اور معجم اوسط میں اسی مضمون کی روایت نقل کی ہے ، تاہم اس میں یہ الفاظ ہیں : ” میں نے عرض کی : یا رسول اللہ ! کیا ہم زیادہ بہتر ہیں یا وہ لوگ زیادہ بہتر ہیں جو ہمارے بعد آئیں گے ۔ “ ان دونوں کی سند میں ایک راوی واقدی ہے اور وہ ضعیف ہے ۔

سیدنا یوسف بن عبداللہ بن سلام رضی اللہ عنہ بیان کرتے ہیں : نبی اکرم صلی اللہ علیہ وسلم سے سوال کیا گیا : کیا ہم زیادہ بہتر ہیں ؟ یا ہمارے بعد والے لوگ ؟ تو نبی اکرم صلی اللہ علیہ وسلم نے ارشاد فرمایا : ” اگر ان میں سے کوئی ایک شخص اُحد پہاڑ جتنا سونا خرچ کرے ، تو وہ پھر بھی تم میں سے کسی ایک کے ، ایک مد ، بلکہ نصف مد تک بھی نہیں پہنچ سکتا ۔ “
یہ روایت امام أحمد نے نقل کی ہے ، اس کی سند میں ایک راوی ابن لہیعہ ہے اور اس کی نقل کردہ حدیث حسن ہے ، اس روایت کے بقیہ رجال صحیح کے رجال ہیں ۔

یزید بن عمیرہ بیان کرتے ہیں : سیدنا معاذ بن جبل رضی اللہ عنہ نے اپنی وصیت میں مجھے یہ بات بتائی : نبی اکرم صلی اللہ علیہ وسلم کے اصحاب سے تعلق رکھنے والے کچھ افراد نے ایک دن یہ کہا: ہمارے بچے ہم سے بہتر ہیں ، کیونکہ وہ زمانہ اسلام میں پیدا ہوئے ہیں انہوں نے کبھی شرک نہیں کیا اور ہم تو پہلے شرک کیا کرتے تھے ، جب نبی اکرم صلی اللہ علیہ وسلم کو اس بات کی اطلاع ملی تو آپ نے ارشاد فرمایا : ” ہم اپنے بچوں سے زیادہ بہتر ہیں ، اور ہمارے بچے ان کے بچوں سے زیادہ بہتر ہیں ، اور ہمارے بچوں کے بچے اُن کے بچوں سے زیادہ بہتر ہیں ۔ “
یہ روایت امام طبرانی نے ایک طویل حدیث میں نقل کی ہے ، اس کی سند میں ایک راوی معاویہ بن عمران جرمی ہے اور میں اس سے واقف نہیں ہوں ، اس روایت کے بقیہ رجال ثقہ ہیں ۔

سیدنا انس رضی اللہ عنہ نبی اکرم صلی اللہ علیہ وسلم کے بارے میں یہ بات نقل کرتے ہیں آپ صلی اللہ علیہ وسلم نے اپنے اصحاب سے ارشاد فرمایا : ” لوگ اپنے بچوں سے بہتر ہو ، اور تمہارے بچے اُن کے بچوں سے بہتر ہیں ۔ “
یہ روایت امام بزار نے نقل کی ہے اس کی سند میں ایک راوی حسن بن ابوجعفر ہے اور وہ متروک ہے ۔

سیدنا جابر بن عبداللہ رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” بے شک اللہ تعالیٰ نے انبیاء اور مرسلین کے علاوہ باقی تمام جہانوں میں سے میرے اصحاب کو منتخب کیا ، اور میرے اصحاب میں سے ، میرے لئے چار افراد کو منتخب کیا ( شاید راوی کہتے ہیں : ) یعنی سیدنا ابوبکر رضی اللہ عنہ سیدنا عمر رضی اللہ عنہ سیدنا عثمان رضی اللہ عنہ اور سیدنا علی رضی اللہ عنہ ( نبی اکرم صلی اللہ علیہ وسلم نے فرمایا : ) تو اللہ تعالیٰ نے انہیں میرے اصحاب بنایا ، پھر نبی اکرم صلی اللہ علیہ وسلم نے ارشاد فرمایا : میرے تمام اصحاب میں ، بھلائی پائی جاتی ہے اور اللہ تعالیٰ نے میری امت کو دیگر تمام امتوں پر منتخب کیا ، اور میری امت میں سے چار صدیوں کو ( یا چار زمانوں کو ) منتخب کیا ، پہلا زمانہ ، دوسرا ، تیسرا اور چوتھا ( زمانہ ) ۔ “
یہ روایت امام بزار نے نقل کی ہے اور اس کے رجال ثقہ ہیں اور اس کے بعض راویوں کے بارے میں اختلاف پایا جاتا ہے ۔

سیدنا عیاض انصاری رضی اللہ عنہ ، جنہیں صحابی ہونے کا شرف حاصل ہے ، وہ بیان کرتے ہیں : نبی اکرم صلی اللہ علیہ وسلم نے ارشاد فرمایا : ” میرے اصحاب اور میرے سسرالی عزیزوں کے بارے میں ، میری حفاظت کرو ، جو شخص ان کے بارے میں میری حفاظت کرے گا ، اللہ تعالیٰ دنیا اور آخرت میں اس کی حفاظت کرے گا ، اور جو شخص ان کے بارے میں میری حفاظت نہیں کرے گا ، اللہ تعالیٰ اس سے لاتعلق ہو جائے گا اور جس سے اللہ تعالیٰ لاتعلق ہو جائے گا ، تو قریب ہے کہ اللہ تعالیٰ اس کی گرفت کرے ۔ “
یہ روایت امام طبرانی نے نقل کی ہے اور اس کی سند میں انتہائی ضعیف راوی ہیں ، جن کی توثیق بھی کی گئی ہے ۔

سیدنا عبداللہ بن عمر رضی اللہ عنہما نبی اکرم صلی اللہ علیہ وسلم کا یہ فرمان نقل کرتے ہیں : ” میرے اصحاب کے بارے میں ، میری حفاظت کرو ، جو شخص ان کے بارے میں میری حفاظت کرے گا ، اللہ تعالیٰ دنیا اور آخرت میں اس کی حفاظت کرے گا ، اور جو شخص ان کے بارے میں میری حفاظت نہیں کرے گا ، اللہ تعالیٰ اس سے لاتعلق ہو جائے گا ، اور جس سے اللہ تعالیٰ لاتعلق ہو جائے گا ، تو قریب ہے کہ وہ اُس کی گرفت کرے ۔ “
یہ روایت امام طبرانی نے نقل کی ہے اس کی سند میں انتہائی ضعیف راوی ہیں ، جن کی توثیق کی گئی ہے ۔

سیدنا عبداللہ بن عمر رضی اللہ عنہما نبی اکرم صلی اللہ علیہ وسلم کا یہ فرمان نقل کرتے ہیں : ” جو شخص میرے اصحاب کے بارے میں ، میری حفاظت کرے گا ، وہ میرے حوض پر میرے پاس آئے گا ، اور جو شخص میرے اصحاب کے بارے میں میری حفاظت نہیں کرے گا وہ مجھے صرف دور سے دیکھ پائے گا ۔ “
یہ روایت امام طبرانی نے معجم اوسط میں نقل کی ہے ، اس کی سند میں ایک راوی حبیب ہے ، جو امام مالک کا کاتب ہے اور وہ کذاب ہے ۔

سیدنا عبداللہ بن عمرو رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” میں نے اپنے پروردگار سے یہ چیز مانگی کہ میں جس کے ساتھ شادی کروں ، یا جس کی شادی میرے ساتھ ہو ، تو وہ جنت میں میرے ساتھ ہو ، تو پروردگار نے یہ چیز مجھے عطا کر دی ۔ “
یہ روایت امام طبرانی نے معجم اوسط میں نقل کی ہے اور اس کی سند میں ایک راوی یزید بن کمیت ہے اور وہ ضعیف ہے ۔

سیدنا عبداللہ بن ابواوفیٰ رضی اللہ عنہ بیان کرتے ہیں : نبی اکرم صلی اللہ علیہ وسلم نے ارشاد فرمایا : ” میں نے اپنے پروردگار سے یہ چیز مانگی کہ میں جس کے ساتھ شادی کروں ، یا جس کے ساتھ شادی کرواؤں ، تو وہ جنت میں میرے ساتھ ہو ، تو پروردگار نے یہ چیز مجھے عطا کر دی ۔ “
یہ روایت امام طبرانی نے معجم اوسط میں نقل کی ہے ، اس کی سند میں ایک راوی عمار بن سیف ہے ، جسے ایک جماعت نے ضعیف قرار دیا ہے ، یحیی بن معین نے اسے ثقہ کہا: ہے اس روایت کے بقیہ رجال ثقہ ہیں ۔

سیدنا عبداللہ بن زبیر رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” قیامت کے دن ہر نسب اور سسرالی رشتہ منقطع ہو جائے گا ، البتہ میرے نسبی اور سسرالی رشتے کا معاملہ مختلف ہے ۔ “
یہ روایت امام طبرانی نے نقل کی ہے اس کی سند میں ایک راوی ابراہیم بن یزید خوزی ہے اور وہ متروک ہے ۔

سیدنا عبدالرحمن بن عوف رضی اللہ عنہ بیان کرتے ہیں : جب نبی اکرم صلی اللہ علیہ وسلم کی وفات کا وقت قریب آیا ، تو لوگوں نے عرض کی : یا رسول اللہ ! آپ ہمیں تلقین کر دیں ، تو آپ نے فرمایا : میں تمہیں ابتداء میں ہجرت کرنے والے ، سبقت لے جانے والے مہاجرین اُن کے بعد ان کے بیٹوں کے بارے میں تلقین کرتا ہوں ، اگر تم نے ایسا نہ کیا تو تمہاری کوئی فرض یا نفل عبادت قبول نہیں ہو گی ۔ “
یہ روایت امام طبرانی نے معجم اوسط میں نقل کی ہے اور امام بزار نے نقل کی ہے ، تاہم انہوں نے یہ الفاظ نقل کئے ہیں : ” میں تمہیں سبقت لے جانے والے پہلے لوگوں اور ان کے بعد ، ان کے بیٹوں اور ان کے بعد ان کے بیٹوں اور ان کے بعد ان کے بیٹوں کے بارے میں تلقین کرتا ہوں ۔ “ ان دونوں روایات کے رجال ثقہ ہیں ۔

سیدنا عویم بن ساعده رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” بے شک اللہ تعالیٰ نے مجھے منتخب کیا اور میرے لئے اصحاب کو منتخب کیا ، اس نے ان اصحاب میں سے میرے وزراء اور میرے مددگار اور سسرالی عزیز بنائے ، تو جو شخص انہیں برا کہے گا اس پر اللہ تعالیٰ ، فرشتوں اور انسانوں ، سب کی لعنت ہو گی ، اس شخص کی کوئی فرض یا نفل عبادت قبول نہیں ہو گی ۔ “
یہ روایت امام طبرانی نے نقل کی ہے اور اس کی سند میں ایسا راوی ہے جس سے میں واقف نہیں ہوں ۔

سیدنا عبداللہ بن سعدی رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” میری امت کے بہترین لوگ ، اس کے ابتدائی لوگ ہیں اور اس کے آخری حصے میں برے لوگ ہوں گے ، وہ مجھ سے نہیں ہوں گے ، اور میرا ان سے کوئی تعلق نہیں ہو گا ۔ “
یہ روایت امام طبرانی نے نقل کی ہے ، اس کی سند میں ایک راوی یزید بن ربیعہ ہے اور وہ متروک ہے ۔

سیدنا ابوسعید خدری رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” لوگ ایک مکان میں ہیں ، اور میں اور میرے اصحاب ایک مکان میں ہیں ۔ “ راوی کہتے ہیں : تو سیدنا زید بن ثابت رضی اللہ عنہ اور سیدنا رافع بن خدیج رضی اللہ عنہ نے بتایا : انہوں نے ٹھیک کہا: ہے ، وہ اس وقت مروان کے پاس موجود تھے ۔
یہ روایت امام طبرانی نے نقل کی ہے ، اسے امام أحمد نے ایک طویل حدیث کے ضمن میں نقل کیا ہے جو اس سے پہلے کتاب الجہاد کے آغاز میں ، ہجرت سے متعلق باب میں گزر چکی ہے ، ان دونوں روایات کے رجال صحیح کے رجال ہیں ۔

سیدنا عبداللہ بن عباس رضی اللہ عنہما روایت کرتے ہیں : نبی اکرم صلی اللہ علیہ وسلم نے ارشاد فرمایا : ” ستارے آسمان والوں کے لئے امان ہیں اور میرے اصحاب ، میری امت کے لئے امان ہیں ۔ “
یہ روایت امام طبرانی نے معجم اوسط میں نقل کی ہے اور اس کی سند عمدہ ہے ، البتہ علی بن طلحہ نامی راوی نے ، سیدنا عبداللہ بن عباس رضی اللہ عنہما سے سماع نہیں کیا ہے ۔

سیدنا انس بن مالک رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا :
” میرے اصحاب کی مثال ، کھانے میں نمک کی طرح ہے ، کھانا ، نمک کے ساتھ ہی ٹھیک ہوتا ہے ۔ “
یہ روایت امام ابویعلیٰ نے نقل کی ہے اور امام بزار نے اس کی مانند نقل کی ہے ، اس کی سند میں ایک راوی اسماعیل بن مسلم ہے اور وہ ضعیف ہے ۔

سیدنا سمرہ رضی اللہ عنہ بیان کرتے ہیں : نبی اکرم صلی اللہ علیہ وسلم ہم سے یہ فرماتے تھے : ” عنقریب تم لوگ ( دوسرے ) لوگوں کے درمیان یوں رہ جاؤ گے ، جیسے کھانے میں نمک ہوتا ہے اور کھانا ، نمک کے بغیر ٹھیک نہیں ہوتا ۔ “
یہ روایت امام بزار اور امام طبرانی نے نقل کی ہے اور امام طبرانی کی سند حسن ہے ۔

سیدنا سمرہ رضی اللہ عنہ بیان کرتے ہیں : نبی اکرم صلی اللہ علیہ وسلم ہم سے یہ فرمایا کرتے تھے : ” عنقریب ایسا وقت آئے گا کہ کوئی شخص یہ پسند کرے گا کہ اس نے ایک نظر مجھے دیکھ لیا ہوتا ، اور یہ چیز اس کے نزدیک ، اس کے سارے مال سے زیادہ محبوب ہو گی ۔ “
یہ روایت امام بزار نے ضعیف سند کے ساتھ نقل کی ہے ۔

سیدنا ابوعبدالرحمن جہنی رضی اللہ عنہ بیان کرتے ہیں : ایک مرتبہ ہم نبی اکرم صلی اللہ علیہ وسلم کے پاس موجود تھے ، اسی دوران دو سوار آتے ہوئے نظر آئے ، نبی اکرم صلی اللہ علیہ وسلم نے فرمایا : یہ دونوں کندی ہیں اور مذحج قبیلے سے تعلق رکھتے ہیں ، یہاں تک کہ وہ دونوں نبی اکرم صلی اللہ علیہ وسلم کی خدمت میں حاضر ہوئے ، تو پتہ چلا کہ ان دونوں کا تعلق مذحج سے ہے ، راوی کہتے ہیں : ان دونوں میں سے ایک نبی اکرم صلی اللہ علیہ وسلم کے قریب ہوا تاکہ آپ کی بیعت کرے ، جب وہ قریب ہوا تو اس نے نبی اکرم صلی اللہ علیہ وسلم کا ہاتھ پکڑا اور عرض کی : یا رسول اللہ ! جس شخص نے آپ کی زیارت کی ہو اور آپ پر ایمان لایا ہو اور آپ کی پیروی کی ہو اور آپ کی تصدیق کی ہو ، آپ کیا کہتے ہیں کہ اسے کیا ملے گا ؟ نبی اکرم صلی اللہ علیہ وسلم نے فرمایا : اس کے لئے مبارکباد ہے راوی کہتے ہیں : پھر اس نے نبی اکرم صلی اللہ علیہ وسلم کے دست مبارک پر ہاتھ پھیرا اور وہ واپس چلا گیا ۔ پھر دوسرا شخص آپ کی خدمت میں حاضر ہوا ، یہاں تک کہ اس نے نبی اکرم صلی اللہ علیہ وسلم کا دست مبارک پکڑا تاکہ آپ کی بیعت کرے ، اس نے عرض کی : یا رسول اللہ اس بارے میں آپ کی کیا رائے ہے ؟ کہ جو شخص آپ پر ایمان لائے ، آپ کی پیروی کرے اور آپ کی تصدیق کرے اسے کیا ملے گا ؟ نبی اکرم صلی اللہ علیہ وسلم نے فرمایا : اس کے لئے مبارکباد ہے ، اس کے لئے مزید مبارکباد ہے ۔
یہ روایت امام بزار نے اور امام طبرانی نے نقل کی ہے اور اس کی سند حسن ہے ۔ ( علامہ ہیثمی فرماتے ہیں : ) میں یہ کہتا ہوں : اس روایت کا ایک طریق امام أحمد نے نقل کیا ہے جو آگے چل کر اس باب میں آئے گا کہ جو شخص نبی اکرم صلی اللہ علیہ وسلم پر ایمان لایا اور اس نے نبی اکرم صلی اللہ علیہ وسلم کی زیارت نہ کی ہو ۔