مجمع الزوائد ومنبع الفوائد

سیدنا ابوموسیٰ اشعری رضی اللہ عنہ بیان کرتے ہیں : نبی اکرم صلی اللہ علیہ وسلم نے ارشاد فرمایا : ” مجھے پانچ خصوصیات عطا کی گئی ہیں ، مجھے ہر سرخ اور سیاہ ( یعنی سفید فام اور سیاہ فام ) کی طرف مبعوث کیا گیا ہے ، میرے لئے تمام زمین کو طہارت کے حصول کا ذریعہ اور نماز کی جگہ قرار دیا گیا ہے ، میرے لئے مال غنیمت کو حلال قرار دیا گیا ہے ، جو مجھ سے پہلے لوگوں کے لئے حلال نہیں تھا ، اور ایک ماہ کے فاصلے سے رعب کے ذریعے میری مدد کی گئی ہے ، اور مجھے شفاعت عطا کی گئی ہے ، ہر نبی نے اپنی شفاعت کے بارے میں دعا مانگ لی تھی اور میں نے اپنی شفاعت ( کی دعا ) کو سنبھال کے رکھ لیا ہے ، اور یہ میں اُس ( یعنی ہر اس فرد ) کے لئے رکھوں گا ، میری امت کا جو بھی فرد ایسی حالت میں مرے گا کہ وہ کسی کو اللہ کا شریک نہ ٹھہراتا ہو ۔ “
یہ روایت امام أحمد نے ” متصل “ اور ” مرسل “ ( دونوں طرح سے ) نقل کی ہے ، اور امام طبرانی نے نقل کی ہے ، اور اس کے رجال ” صحیح “ کے رجال ہیں ۔

سیدنا عبداللہ بن عباس رضی اللہ عنہما بیان کرتے ہیں : نبی اکرم صلی اللہ علیہ وسلم نے ارشاد فرمایا : ” مجھے پانچ چیزیں عطا کی گئی ہیں ، جو مجھ سے پہلے کسی نبی کو عطا نہیں کی گئی ہیں اور میں یہ بات فخر کے طور پر نہیں کہہ رہا ، مجھے ہر سفید فام اور ہر سیاہ فام کی طرف مبعوث کیا گیا ، اور ایک ماہ کے فاصلے سے رعب کے ذریعے میری مدد کی گئی ، اور میرے لئے مال غنیمت کو حلال قرار دیا گیا ، جو مجھ سے پہلے کسی کے لئے حلال قرار نہیں دیا گیا ، اور میرے لئے زمین کو جائے نماز اور طہارت کا ذریعہ بنا دیا گیا ، اور مجھے شفاعت عطا کی گئی ہے ، جسے میں نے اپنی امت کے لئے مؤخر کر دیا ، اور یہ ہر اس فرد کے لئے ہو گی ، جو ایسی حالت میں مرے گا کہ وہ کسی کو اللہ کا شریک نہ ٹھہراتا ہو ۔ “

ایک روایت میں یہ الفاظ ہیں : ” جو بھی سفید فام یا سیام نام شخص ، میری امت میں داخل ہو گا ، وہ اُن میں شمار ہو گا ۔ “
یہ روایت امام أحمد نے ، امام بزار نے نقل کی ہے ، امام طبرانی نے اس کی مانند نقل کی ہے ، تاہم انہوں نے یہ الفاظ نقل کیے ہیں : ” یہاں تک کہ دشمن ایک ماہ یا دو ماہ ( یہ شک راوی کو ہے ) کے فاصلے سے میرا خوف محسوس کرتا ہے ، اور مجھ سے یہ کہا: گیا : تم مانگو تمہیں دیا جائے گا ، تو میں نے اپنی دعا کو اپنی اُمت کی شفاعت کے لئے سنبھال کے رکھ لیا ۔ “ امام أحمد کے رجال ” صحیح “ کے رجال ہیں ، صرف یزید بن ابوزیاد کا معاملہ مختلف ہے ، اور وہ حسن الحدیث ہے ۔

سیدنا عبداللہ بن عباس رضی اللہ عنہما روایت کرتے ہیں : نبی اکرم صلی اللہ علیہ وسلم نے ارشاد فرمایا : ” مجھے پانچ خصوصیات عطا کی گئی ہیں ، جو مجھ سے پہلے دیگر انبیاء کو عطا نہیں کی گئی ہیں ، میرے لئے تمام زمین کو طہارت کے حصول کا ذریعہ اور جائے نماز بنا دیا گیا ، یہ چیز پہلے انبیاء کرام کے لئے نہیں تھی ، وہ اس وقت نماز ادا کر سکتے تھے ، جب وہ محراب میں ( یعنی نماز کے مخصوص مقام پر ) پہنچ جاتے تھے ، اور رعب کے ذریعے میری مدد کی گئی ، مشرکین ایک ماہ کے فاصلے پر ہوتے ہیں ، تو اللہ تعالیٰ اُن لوگوں کے دلوں میں میرا رعب ڈال دیتا ہے ، اور ہر نبی کو اُس کی مخصوص قوم کی طرف مبعوث کیا گیا ، اور مجھے تمام جنات اور انسانوں کی طرف مبعوث کیا گیا ، پہلے انبیاء خمس کو الگ کر لیتے تھے ، آگ آتی تھی اور اسے کھا لیتی تھی ، اور مجھے یہ حکم دیا گیا کہ میں اُس کو اپنی امت کے غریب لوگوں میں تقسیم کر دوں ، اور ہر نبی کو شفاعت عطا کی گئی ، اور میں نے اپنی شفاعت اپنی امت کے لئے مؤخر کر لی ( یا سنبھال کے رکھ لی ) ۔ “
یہ روایت امام بزار نے نقل کی ہے ، اور اس کی سند میں ایسے راوی ہیں ، جن سے میں واقف نہیں ہوں ۔

سیدنا علی بن ابوطالب رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” مجھے پانچ چیزیں عطا کی گئی ہیں ، جو مجھ سے پہلے کسی نبی کو عطا نہیں کی گئیں ، رعب کے ذریعے میری مدد کی گئی ، مجھے جامع کلمات عطا کیے گئے ، میرے لئے مال غنیمت کو حلال قرار دیا گیا ۔ “ راوی کہتے ہیں : میرے استاد نے دو اور خصوصیات کا بھی ذکر کیا تھا ، جو مجھے بھول گئی ہیں ، راوی کہتے ہیں : اس کے بعد انہوں نے پوری حدیث ذکر کی ہے ۔
یہ روایت امام بزار نے نقل کی ہے ، اور اس کے رجال ” صحیح “ کے رجال ہیں ، صرف محمد بن عبداللہ بن عقیل کا معاملہ مختلف ہے ، اور وہ حسن الحدیث ہے ۔ ( علامہ ہیثمی فرماتے ہیں : ) میں یہ کہتا ہوں : اس سے پہلے تیمم کے بارے میں کچھ احادیث گزر چکی ہیں ، اور بقیہ روایات ” خصائص “ سے متعلق باب میں آئیں گی ۔

سیدنا عبداللہ بن عباس رضی اللہ عنہما بیان کرتے ہیں : نبی اکرم صلی اللہ علیہ وسلم کی دو ماہ کے فاصلے سے دشمن پر رعب کے ذریعے مدد کی گئی ۔
یہ روایت امام طبرانی نے نقل کی ہے اس کی سند میں ایک راوی اسماعیل بن ابراہیم بن مہاجر ہے اور وہ ضعیف ہے ۔

سیدنا ابوذر غفاری رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” مجھے پانچ چیزیں دی گئی ہیں ، جو مجھ سے پہلے کسی کو نہیں دی گئی ہیں ، میرے لئے تمام زمین کو طہارت کے حصول کا ذریعہ اور جائے نماز قرار دیا گیا ، میرے لئے مال غنیمت کو حلال قرار دیا گیا ، جو مجھ سے پہلے کسی نبی کے لئے حلال نہیں ہوا ، اور ایک ماہ کے فاصلے سے رعب کے ذریعے میرے دشمن کے خلاف میری مدد کی گئی ، اور مجھے ہر سفید فام اور سیاہ فام کی طرف مبعوث کیا گیا ، اور مجھے شفاعت عطا کی گئی ، اور یہ میری اُمت کے ہر اس فرد کو نصیب ہو گی ، جو کسی کو اللہ کا شریک نہ ٹھہراتا ہو ۔ “ ایک روایت میں یہ الفاظ ہیں : ” جو ایسی حالت میں مرے کہ وہ کسی کو اللہ کا شریک نہ ٹھہراتا ہو ۔ “ ( علامہ ہیثمی فرماتے ہیں : ) میں یہ کہتا ہوں : امام ابوداؤد نے اس روایت کا ایک حصہ نقل کیا ہے ۔
یہ روایت امام أحمد نے نقل کی ہے ، اور اس کے رجال ” صحیح“ کے رجال ہیں ۔ ( علامہ ہیثمی فرماتے ہیں : ) میں یہ کہتا ہوں : اس سے پہلے کچھ احادیث تیمم سے متعلق باب میں گزر چکی ہیں ، جو اس نوعیت کی ہیں ۔

سیدنا ابوامامہ رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” مجھے چار چیزوں کے حوالے سے فضیلت عطا کی گئی ہے ، میری امت کے لئے زمین کو جائے نماز اور طہارت کا ذریعہ قرار دیا گیا ، مجھے تمام لوگوں کی طرف مبعوث کیا گیا ، ایک ماہ کے فاصلے سے رعب کے ذریعے میری مدد کی گئی ہے ، جو میرے آگے چلتا ہے ، اور میری اُمت کے لئے مال غنیمت کو حلال قرار دیا گیا ۔ “

ایک روایت میں یہ الفاظ ہیں : ” میری امت کا کوئی فرد ، جہاں بھی نماز کا وقت پائے گا ، وہیں اُس کے لئے نماز کی جگہ ہو گی ، اور وہیں اُس کے لئے طہارت کا ذریعہ ہو گا ۔ “ ( علامہ ہیثمی فرماتے ہیں : ) میں یہ کہتا ہوں : امام ترمذی نے اس کا ایک حصہ نقل کیا ہے ۔
یہ روایت امام أحمد نے نقل کی ہے ، اور امام طبرانی نے اس کی مانند نقل کی ہے ، تاہم انہوں نے یہ الفاظ نقل کیے ہیں : ” مجھے ہر سفید فام اور سیاہ فام کی طرف مبعوث کیا گیا ۔ ۔ ۔ ۔ ۔ ۔ ۔ “ ۔ امام أحمد کے رجال ثقہ ہیں ۔

سیدنا عبداللہ بن عمر رضی اللہ عنہما روایت کرتے ہیں : نبی اکرم صلی اللہ علیہ وسلم نے ارشاد فرمایا : ” مجھے پانچ خصوصیات عطا کی گئی ہیں ، جو مجھ سے پہلے کسی نبی کو نہیں دی گئی ہیں ، مجھے تمام لوگوں ، ہر سفید فام اور سیاہ فام کی طرف مبعوث کیا گیا ، جبکہ دوسرے ہر نبی کو اس کی مخصوص بستی کی طرف مبعوث کیا گیا ، اور رعب کے ذریعے میری مدد کی گئی ہے ، ایک ماہ کے فاصلے سے میرا دشمن مجھ سے مرعوب ہو جاتا ہے ، اور مجھے مال غنیمت عطا کیا گیا ، اور میرے لئے زمین کو نماز کی جگہ اور طہارت کا ذریعہ بنا دیا گیا ، اور مجھے شفاعت عطا کی گئی ، اور وہ میں نے اپنی امت کے لئے مؤخر کر دی ( یا سنبھال کے رکھ لی ) ۔ “
یہ روایت امام طبرانی نے نقل کی ہے ، اس کی سند میں ایک راوی اسماعیل بن یحیی کہیلی ہے ، اور وہ ضعیف ہے ۔

سیدنا سائب بن یزید رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” مجھے دیگر انبیاء پر پانچ حوالوں سے فضیلت دی گئی ہے ، مجھے تمام لوگوں کی طرف مبعوث کیا گیا ہے ، میں نے شفاعت اپنی امت کے لئے سنبھال کے رکھ لی ہے ، اور آگے کی طرف سے ایک ماہ کے فاصلے اور پیچھے کی طرف سے ایک ماہ کے فاصلے پر رعب کے ذریعے میری مدد کی گئی ہے ، اور میرے لئے زمین کو نماز کی جگہ اور طہارت کا ذریعہ قرار دیا گیا ہے ، اور میرے لئے مال غنیمت کو حلال قرار دیا گیا ہے ، جو مجھ سے پہلے کسی کے لئے حلال نہیں تھا ۔ “
یہ روایت امام طبرانی نے نقل کی ہے ، اس کی سند میں ایک راوی اسحاق بن عبداللہ بن ابوفروہ ہے ، اور وہ متروک ہے ۔