مجمع الزوائد ومنبع الفوائد

عامر شعبی بیان کرتے ہیں : جب نبی اکرم صلی اللہ علیہ وسلم کا وصال ہوا تو کچھ لوگ مرتد ہو گئے ، اُن لوگوں نے کہا: کہ ہم نماز پڑھیں گے لیکن زکوٰۃ نہیں دیں گے لوگوں نے سیدنا ابوبکر رضی اللہ عنہ سے کہا: کہ کیا آپ ان لوگوں سے یہ بات قبول کریں گے ، تو سیدنا ابوبکر رضی اللہ عنہ نے فرمایا : اگر وہ مجھے بکری کا کوئی بچہ دینے سے بھی انکار کریں گے ، تو میں اس بات پر بھی ان سے جنگ کروں گا پھر انہوں نے سیدنا خالد بن ولید رضی اللہ عنہ کو بھیجا عدی بن حاتم ، طے قبیلے کے ایک ہزار افراد کو لے کے یمامہ آ گئے راوی کہتے ہیں : بنو عامر نے نبی اکرم صلی اللہ علیہ وسلم کے مقرر کردہ سرکاری اہلکاروں کو قتل کر دیا تھا ، اور انہیں آگ کے ذریعے جلا دیا تھا ، تو سیدنا ابوبکر رضی اللہ عنہ نے سیدنا خالد بن ولید رضی اللہ عنہ کو خط لکھا کہ تم بنو عامر کو قتل کر دو اور انہیں آگ کے ذریعے جلا دو انہوں نے ایسا ہی کیا ، یہاں تک کہ عورتیں چیخیں مارنے لگے پھر وہ آگے بڑھ گئے ، یہاں تک کہ وہ پانی تک پہنچ گئے جس کی طرف نکل کر وہ آئے تھے انہوں نے کہا: اللہ اکبر اللہ اکبر ہم اس بات کی گواہی دیتے ہیں کہ اللہ تعالیٰ کے علاوہ اور کوئی معبود نہیں ہے ، اور ہم اس بات کی گواہی دیتے ہیں کہ سیدنا محمد ( صلی اللہ علیہ وسلم ) اللہ کے رسول ہیں جب انہوں نے یہ بات سنی تو ان سے رک گئے سیدنا ابوبکر رضی اللہ عنہ نے انہیں یہ حکم دیا کہ وہ چلتے رہیں ، یہاں تک کہ حیرہ پہنچ جائیں پھر وہ شام کی طرف چلے گئے جب وہ حیرہ پہنچے تو اہل فارس نے انہیں خط لکھا ، اور پھر یہ کہا: کہ مجھے یہ بات پسند ہے کہ میں مسلسل انہیں خوف زدہ کرتا رہوں ، یہاں تک کہ انہوں نے ان پر حملہ کیا اور وہ سورنامی جگہ تک پہنچ گئے وہاں انہوں نے قتل و غارت گری کی اور قیدی بنایا پھر انہوں نے عین تمر پر حملہ کیا وہاں قتل و غارت گری کی اور لوگوں کو قیدی بنایا پھر وہ شام کی طرف چلے گئے ۔ عامر شعبی بیان کرتے ہیں : ابن بقیلہ نے مجھے سیدنا خالد رضی اللہ عنہ کا مکتوب نکال کر دکھایا جس میں یہ تحریر تھا : ” اللہ تعالیٰ کے نام سے برکت حاصل کرتے ہوئے جو بڑا مہربان نہایت رحم کرنے والا ہے یہ خالد بن ولید کی طرف سے فارس کے سپہ سالاروں کے نام ہے اس شخص پر سلام ہو جو ہدایت کی پیروی کر لیتا ہے میں اس اللہ کی حمد بیان کرتا ہوں جس کے علاوہ اور کوئی معبود نہیں ہے ایسی حمد جس نے تمہاری اجتماعیت کو توڑ دیا تمہاری جماعت کو منتشر کر دیا ، اور تمہاری مضبوط چیزوں کو کمزور کر دیا ، اور تمہاری بادشاہی کو سلب کر لیا جب میرا یہ مکتوب تمہارے پاس آئے ، تو تم میری طرف سے ذمہ قبول کر لینا اور مجھے جزیہ ادا کرنا اور چیزیں میری طرف بھجوا دینا اگر ایسا نہ ہوا تو اس اللہ کی قسم جس کے علاوہ اور کوئی معبود نہیں ہے میں ایسے لوگوں کے ساتھ تم سے لڑوں گا ، جو موت کو اس طرح پسند کرتے ہیں جس طرح تم لوگ زندگی کو پسند کرتے ہو اس شخص پر سلام ہو جو ہدایت کی پیروی کرتا ہے “
یہ روایت امام ابویعلیٰ نے نقل کی ہے ۔ اس کی سند میں ایک راوی مجالد ہے ، اور وہ ضعیف ہے ویسے اس کی توثیق کی گئی ہے ۔

محمد بن اسحاق بیان کرتے ہیں : جب سیدنا خالد بن ولید رضی اللہ عنہ جنگ یمامہ سے فارغ ہوئے ، تو سیدنا ابوبکر صدیق رضی اللہ عنہ نے سیدنا علاء بن حضرمی رضی اللہ عنہ کو بحرین کی طرف بھیجا سیدنا علاء وہ شخصیت ہیں ، جنہیں نبی اکرم صلی اللہ علیہ وسلم نے منذر بن ساوی عبدی کی طرف بھیجا تھا تو منذر نے اسلام قبول کر لیا تھا ۔ سیدنا علاء وہاں پر نبی اکرم صلی اللہ علیہ وسلم کے مقرر کردہ امیر کے طور پر رہے تھے بحرین میں ربیعہ مرتد ہو گئے یہ ان لوگوں میں شامل تھے جو عرب مرتد ہوئے تھے صرف جارود بن عمرو مرتد نہیں ہوئے تھے کیونکہ وہ اسلام پر برقرار رہے تھے اور ان کی قوم میں سے ان کی پیروی کرنے والے لوگ بھی اسلام پر برقرار رہے تھے ۔ ربیعہ ، بحرین میں اکٹھے ہوئے وہ لوگ مرتد ہو گئے تھے انہوں نے یہ کہا: کہ بادشاہی آل منذر میں واپس آئے گی انہوں نے اس بارے میں منذر بن نعمان بن منذر کے ساتھ بات چیت کی جنہیں غرور کہا: جاتا تھا بعد میں جب انہوں نے اسلام قبول کر لیا اور ان لوگوں نے بھی اسلام قبول کر لیا تو وہ یہ کہا: کرتے تھے : میں غرور نہیں ہوں بلکہ میں مغرور ہوں ۔ جب ربیعہ قبیلے کے لوگ بحرین میں اکٹھے ہوئے ، تو سیدنا علاء بن حضرمی رضی اللہ عنہ ان کی طرف روانہ ہوئے سیدنا ثمامہ بن اثال حنفی رضی اللہ عنہ ان کی امداد کے لئے آئے جو مسلمان ہو چکے تھے اور ان کی قوم بھی مسلمان ہو چکی تھی جب علاء بن حضرمی نے سیدنا ثمامہ کو امیر بنایا تو ان کے ساتھ بنو سحیم سے تعلق رکھنے والے افراد بھی روانہ ہو گئے یہاں تک کہ یہ لوگ ربیعہ البحر تک پہنچ گئے ربیعہ ان لوگوں کی طرف آئے ان لوگوں نے جواثا کے مقام پر ان کا محاصرہ کر لیا جو بحرین میں موجود ایک قلعہ ہے ، یہاں تک کہ قریب تھا کہ مسلمان بھوک کی وجہ سے ہلاکت کا شکار ہو جاتے اس صورت حال کے بارے میں عبداللہ بن حدق عامری نے یہ اشعار کہے ہیں : ” خبردار سیدنا ابوبکر اور مدینہ منورہ کے تمام نوجوانوں تے قاصد ( کے ذریعے یہ پیغام ) بھیج دو ، کیا آپ کو ، آپ سے تعلق رکھنے والے نوجوانوں ( کے بارے میں جاننے میں ) کوئی دلچسپی ہے ، جنہوں نے ” جواثا “ کے مقام پر محاصرہ کیا ہوا ہے ، ہم نے رحمن پر توکل کیا ہے ، اور ہم نے توکل کرنے والوں کے لیے مدد پائی ہے “ ۔ پھر عبداللہ بن حدق نے کہا: تم لوگ مجھے موقع دو تاکہ میں قلعے سے اتر کر نیچے جاؤں اور تم لوگوں کے پاس خبر لے کے آؤں عبداللہ بن حدق کے ساتھ بنو عجل سے تعلق رکھنے والی ایک عورت بھی تھی وہ قلعے سے نیچے اترے لوگوں نے انہیں پکڑ لیا اور دریافت کیا : تمہارا تعلق کس سے ہے اس نے اپنا نسب بیان کرنا شروع کیا اور پھر بلند آواز میں پکارا اے ابجر وہ صاحب لوگوں میں موجود تھے ابجر آ گئے ، اور انہیں پہچان گئے ، اور بولے : تمہارا کیا معاملہ ہے اس نے بتایا : میں بھوک کی وجہ سے ہلاکت کا شکار ہونے والا ہوں تو انہوں نے انہیں کھانا دیا پانی پلایا پھر یہ کہا: کہ مجھے سواری دو اور میرا راستہ چھوڑ دو پھر وہ گئے ، اور انہیں ایک خچر سواری کے لئے دیا ، اور پھر کہا: کہ تم اپنے کام کے سلسلے میں چلے جاؤ جب عبداللہ بن حدق ان کے پاس سے نکل گئے ، تو وہ اپنے ساتھیوں کے پاس واپس آئے ، اور انہیں بتایا : دشمن برے حال میں ہیں ان کے پاس اناج نہیں ہے ، تو سیدنا علاء بن حضرمی رضی اللہ عنہ نے اپنے ساتھ موجود مسلمانوں جن کا تعلق عربیوں اور عجمیوں سے تھا ان کو ساتھ لے کر دشمن پر حملہ کر دیا ، اور انہیں زبردست طریقے سے قتل کیا ، یہاں تک کہ دشمن پسپا ہو گیا ۔
یہ روایت امام طبرانی نے نقل کی ہے ، اور ابن اسحاق تک اس کے رجال ثقہ ہیں ۔

عروہ بیان کرتے ہیں : سیدنا ابوبکر رضی اللہ عنہ نے سیدنا علاء بن حضرمی رضی اللہ عنہ کو مسلمانوں کے ایک لشکر میں اہل بحرین کی طرف بھیجا جنہوں نے جزیہ ادا کرنے سے انکار کر دیا تھا جو جزیہ وہ نبی اکرم صلی اللہ علیہ وسلم کو ادا کیا کرتے تھے جب سیدنا علاء بن حضرمی رضی اللہ عنہ نے ان کے علاقے کو فتح کیا تھا ، اور انہوں نے ان لوگوں کے ساتھ جزیہ پر ہی صلح کی تھی جب ان لوگوں نے اپنے اموال کے بارے میں اللہ تعالیٰ کے حق کو ادا کرنے سے انکار کر دیا ، تو سیدنا ابوبکر رضی اللہ عنہ نے ان لوگوں کی طرف سیدنا علاء بن حضرمی رضی اللہ عنہ کو بھیجا وہ ان کی طرف روانہ ہوئے سیدنا علاء رضی اللہ عنہ اور ان لوگوں کے درمیان سمندر موجود تھا وہ پیدل چلتے رہے ، اور یہ راستہ پار کرتے رہے اسی طرح وہ اس مقام پر پہنچ گئے جہاں کشتیاں چلتی تھیں سیدنا علاء بن حضرمی رضی اللہ عنہ نے ان لوگوں کے ساتھ جنگ کی اللہ تعالیٰ نے انہیں ان لوگوں پر غلبہ عطا کر دیا ، اور ان لوگوں نے اس بات کو تسلیم کیا کہ وہ اپنے اموال میں سے اللہ تعالیٰ کے حق کو ، پہلے کی طرح ادا کریں گے ۔
یہ روایت امام طبرانی نے نقل کی ہے ۔ اس کی سند میں ایک راوی ابن لہیعہ ہے ۔ اس کی سند نقل کردہ حدیث حسن ہے اس میں ضعف پایا جاتا ہے ۔

محمد بن سلام جمحی بیان کرتے ہیں : ابوعبیدہ نے یہ بات بیان کی ہے ضرار بن ازور نے مالک بن نمیرہ کو قتل کیا تھا اسی بارے میں متمم بن نویرہ نے یہ شعر کہا: ہے ۔ انہوں نے سیدنا خالد بن ولید پر تعریض کرتے ہوئے یہ اشعار کہے ہیں : ” جب درختوں میں ہر طرف سے تیز ہوائیں چل رہی تھیں اس وقت تمہارے ہاتھوں قتل ہونے والا ابن ازور ، اچھا مقتول ہے ، اس کی زرہ اچھی تھی ، جب میں اس سے ملا تھا اور وہ روشن طارق ( نامی ستارے ) کا اچھا ٹھکانہ ہے ، تیروں کے کناروں میں نرمی ، جب حلال مال کی مٹھاس کسی عہد شکنی کے بغیر ، لڑھک جائے ، اس نے اپنے لباس کے نیچے فحاشی کو نہیں پہنا ، وہ مشکل تھا لیکن پاکدامن فرد تھا ، تم نے اس کو اللہ کے نام پر دعوت دی اور پھر اسے قتل کر دیا ، اگر اس نے تمہیں پناہ دی ہوتی تو اس نے عہد شکنی نہیں کرنی تھی ، جنگ کے دن بہترین شہسوار ، فہر کے شہسوار ہیں جو گہرے غبار میں بھی ( زبردست شہسوار ہوتے ہیں ) “
یہ روایت امام طبرانی نے نقل کی ہے ، اور اس کے رجال ثقہ ہیں ۔

طارق بن شہاب بیان کرتے ہیں : اسد اور غطفان قبیلے سے تعلق رکھنے والے مرتد ہونے والے لوگ نبی اکرم صلی اللہ علیہ وسلم کے بعد سیدنا ابوبکر رضی اللہ عنہ کے پاس آئے ، اور ان سے صلح کی درخواست کی تو سیدنا ابوبکر رضی اللہ عنہ نے فرمایا : اس شرط پر کہ ہم تم سے زرہیں اور گھوڑے الگ کر لیں گے ، اور تمہیں یوں چھوڑ دیں گے کہ تم گائے کی دموں کے پیچھے جاتے رہو ، یہاں تک کہ اللہ تعالیٰ اپنے نبی کے خلیفہ کو اور اہل ایمان کو وہ صورت حال دکھا دے کہ جس کی بنیاد پر وہ تمہاری معذرت قبول کر لیں اور تم اس بات کی بھی گواہی دو گے کہ تمہارے مقتولین جہنم میں ہیں ، اور ہمارے مقتولین جنت میں ہیں ، اور تم ہماری مقتولین کی دیت دو گے لیکن ہم تمہارے مقتولین کی دیت نہیں دیں گے ۔ سیدنا عمر رضی اللہ عنہ نے عرض کی : اے اللہ کے رسول کے خلیفہ بات اسی طرح ہے ، جس طرح آپ نے بیان کیا ہے لیکن ہمارے مقتولین اللہ کے ذمہ میں قتل ہوئے ہیں اس لئے انہیں دیت نہیں ملے گی ۔ ( علام ہیثمی فرماتے ہیں : ) میں یہ کہتا ہوں
یہ روایت امام طبرانی نے معجم اوسط میں نقل کی ہے ۔ اس کی سند میں ایک راوی ابراہیم بن بشار رمادی ہے ۔ جسے ابن حبان اور دیگر حضرات نے ثقہ قرار دیا ہے یحییٰ بن معین اور دیگر حضرات نے اسے ضعیف کہا: ہے اس روایت کے بقیہ رجال صحیح کے رجال ہیں ۔

سیدنا خریم بن اوس رضی اللہ عنہ بیان کرتے ہیں : میں نے نبی اکرم صلی اللہ علیہ وسلم کو یہ ارشاد فرماتے ہوئے سنا : ” یہ سفید حیرہ ہے ، جو میرے سامنے پیش کیا گیا ہے ، اور یہ شیماء بنت بقیلہ ازدیہ ہے ، جو سفید خچر پر سوار ہے ، اور اس نے سیاہ چادر اوڑھی ہوئی ہے ۔ راوی کہتے ہیں : میں نے عرض کی : یا رسول اللہ ! ہم حیرہ میں داخل ہوں گے ، تو جب یہ صورت حال پائیں گے ، تو وہ عورت میری ہو گی نبی اکرم صلی اللہ علیہ وسلم نے فرمایا : وہ تمہاری ہوئی راوی کہتے ہیں : پھر عرب مرتد ہو گئے لیکن طے قبیلے میں کوئی مرتد نہیں ہوا تو ہم قیس قبیلے کے لوگوں کے ساتھ اسلام کی بنیاد پر جنگ کرتے رہے ان میں سے ایک عیینہ بن حصن تھا ، اور ہم طلیحہ بن خویلد فقعسی کے ساتھ جنگ کرتے رہے ہم نے سیدنا خالد بن ولید کی تعریف کی ان کے بارے میں جو کچھ کہا: گیا اس میں یہ اشعار بھی ہیں : ” اللہ تعالیٰ ہماری طرف سے طے قبیلے کے افراد کو بہترین جزائے خیر عطا کرے ، جو اپنے علاقوں میں بہادروں کی آماجگاہ ہیں ، وہ نرمی اور بھلائی کے جھنڈوں کو اٹھانے والے ہیں ، جب تک صبا ( نامی تیز ہوا ) ہر خیمے کو ہلاتی رہے گی ، انہوں نے دین کی وجہ سے قیس قبیلے کے لوگوں پر ضرب لگائی ، جب ( قیس قبیلے کے لوگوں نے ) ظلمت اور اندھے پن کے منادی کی بات کو قبول کیا “ ۔ سیدنا خالد رضی اللہ عنہ مسیلمہ کی طرف روانہ ہوئے ہم بھی ان کے ساتھ روانہ ہوئے جب ہم مسیلمہ اور اس کے ساتھیوں سے فارغ ہوئے ، تو ہم بصرہ کی ایک نواحی بستی کی طرف آئے ہم نے ہرمز کو دیکھا کہ وہ ایک بڑے لشکر کے ساتھ اکٹھا ہو چکا ہے عربوں کا اس سے بڑا دشمن اور کوئی نہیں تھا ۔ ابوسکن نامی راوی نے یہ بات بیان کی ہے : یہ چیز ضرب المثل کی حیثیت رکھتی ہے عرب کہتے ہیں : ہرمز سے کفارہ دلاؤ ۔ سیدنا خالد بن ولید رضی اللہ عنہ اس کے سامنے آئے انہوں نے مقابلے کے لئے للکارا تو ہرمز ان کے سامنے آیا سیدنا خالد بن ولید رضی اللہ عنہ نے اسے قتل کر دیا انہوں نے اس بارے میں سیدنا ابوبکر رضی اللہ عنہ کو خط لکھا تو ہرمز کا سامان سیدنا ابوبکر رضی اللہ عنہ نے سیدنا خالد رضی اللہ عنہ کو انعام کے طور پر دے دیا ہرمز کی ٹوپی کی قیمت ایک لاکھ بنتی تھی پھر ہم طرف نامی علاقے کی طرف روانہ ہوئے ، یہاں تک کہ ہم حیرہ میں داخل ہوئے وہاں ہمیں سب سے پہلے ایک خاتون ملی جو شیما بنت بقیلہ تھی وہ ایک سفید خچر پر سوار تھی اور اس نے سیاہ چادر لی ہوئی تھی جس طرح نبی اکرم صلی اللہ علیہ وسلم نے ارشاد فرمایا تھا : تو میں اس کے پاس آیا اور میں نے کہا: یہ عورت اللہ کے رسول نے مجھے ہبہ کی تھی سیدنا خالد رضی اللہ عنہ نے اس بارے میں مجھ سے ثبوت مانگا میں نے انہیں ثبوت پیش کیا ، تو انہوں نے وہ خاتون میرے حوالے کر دی اس خاتون کا بھائی عبدالمسیح ہمارے پاس آیا اور اس نے مجھ سے کہا: اس عورت کو مجھے فروخت کر دو میں نے کہا: اللہ کی قسم میں ایک ہزار سے کوئی کمی نہیں کروں گا ، تو اس نے مجھے ایک ہزار درہم دے دیے مجھ سے کہا: گیا کہ اگر تم ایک لاکھ بھی کہتے تو اس نے وہ بھی تمہیں دے دینے تھے میں نے کہا: مجھے یہ اندازہ نہیں تھا کہ ایک ہزار سے بھی زیادہ مال ہوتا ہے ۔ اس روایت کے علاوہ دیگر روایات میں یہ بات مذکور ہے کہ وہ دونوں گواہ سیدنا محمد بن مسلمہ رضی اللہ عنہ اور سیدنا عبداللہ بن عمر رضی اللہ عنہما تھے ( جنہوں نے ان صاحب کے حق میں گواہی دی تھی ) ۔
یہ روایت امام طبرانی نے نقل کی ہے ۔ اس کی سند میں راویوں کی ایک جماعت ایسی ہے جن سے میں واقف نہیں ہوں ۔ اس مضمون کی حدیث اس سے پہلے گزر چکی ہے ، جو سیدنا عدی بن حاتم رضی اللہ عنہ سے منقول ہے ، اور فارسیوں اور رومیوں کے ساتھ جنگ کرنے سے متعلق باب میں گزری ہے اس کے رجال صحیح کے رجال ہیں میں نے
یہ روایت مرتدین کے ساتھ جنگ کرنے سے متعلق ہونے کے حوالے سے ذکر کی ہے ۔

محمد بن سیرین بیان کرتے ہیں : مسیلمہ کے ساتھ جنگ کے دن سیدنا براء بن مالک رضی اللہ عنہ کے سامنے ایک شخص آیا جسے یمامہ کا گدھا کہا: جاتا تھا وہ ایک لمبا تڑنگا شخص تھا اس کے ہاتھ میں سفید تلوار تھی سیدنا براء رضی اللہ عنہ چھوٹے قد کے شخص تھے سیدنا براء رضی اللہ عنہ نے اس کی ٹانگوں پر تلوار ماری تو ان کا وار خطا گیا اور پھر وہ ان کی گدی پر لگ گئی ۔ وہ کہتے ہیں : پھر میں نے اپنی تلوار میان میں ڈال لی اور اُس کی تلوار کو لہرایا میں نے ایک ہی ضرب لگائی تھی ، یہاں تک کہ وہ کٹ گیا تو میں نے اسے پھینک دیا ، اور میں نے اپنی تلوار پکڑ لی ۔
یہ روایت امام طبرانی نے نقل کی ہے ، اور اس کے رجال صحیح کے رجال ہیں البتہ ابن سیرین نے سیدنا براء بن مالک رضی اللہ عنہ کا زمانہ نہیں پایا ہے ۔ رجال بن عنقوہ کے بارے میں روایت آگے چل کر آئے گی جو سیدنا رافع بن خدیج رضی اللہ عنہ سے منقول ہے ، اور پوشیدہ چیزوں کے متعلق اطلاع دینے کے بارے میں ہے ۔