مجمع الزوائد ومنبع الفوائد

سیدنا بشر خثعمی رضی اللہ عنہ بیان کرتے ہیں : انہوں نے نبی اکرم صلی اللہ علیہ وسلم کو یہ ارشاد فرماتے ہوئے سنا ہے : ” عنقریب قسطنطنیہ فتح ہو جائے گا ، تو اس کا امیر بہترین امیر ہو گا اور سب سے بہتر لشکر وہ والا لشکر ہو گا “ راوی کہتے ہیں : تو مسلمہ بن عبدالملک نے مجھے بلایا میں نے انہیں یہ حدیث بیان کی تو انہوں نے قسطنطنیہ کی جنگ کی ۔
یہ روایت امام أحمد امام بزار اور امام طبرانی نے نقل کی ہے ، اور اس کے رجال ثقہ ہیں ۔

سیدنا ابوقبیل رضی اللہ عنہ بیان کرتے ہیں ہم لوگ سیدنا عبداللہ بن عمرو رضی اللہ عنہ کے پاس آئے ان سے دریافت کیا گیا : کون سا شہر پہلے فتح ہو گا قسطنطنیہ یا رومیہ راوی کہتے ہیں ، تو سیدنا عبداللہ رضی اللہ عنہ نے اپنا صندوق منگوایا انہوں نے اس میں سے ایک تحریر نکالی سیدنا عبداللہ رضی اللہ عنہ نے بتایا ایک مرتبہ ہم نبی اکرم صلی اللہ علیہ وسلم کے ارد گرد بیٹھے ہوئے نوٹ کر رہے تھے اسی دوران نبی اکرم صلی اللہ علیہ وسلم سے سوال کیا گیا دو شہروں میں سے کونسا شہر فتح ہو گا قسطنطنیہ یا رومیہ ؟ نبی اکرم صلی اللہ علیہ وسلم نے ارشاد فرمایا : ہرقل کا شہر پہلے فتح ہو گا ۔ راوی کہتے ہیں : اس سے مراد قسطنطنیہ ہے ۔
یہ روایت امام أحمد نے نقل کی ہے ، اور اس کے رجال صحیح کے رجال ہیں صرف ابوقبیل نامی راوی کا معاملہ مختلف ہے ، اور وہ ثقہ ہے ۔

سیدنا ابوثعلبہ خشنی رضی اللہ عنہ جو نبی اکرم صلی اللہ علیہ وسلم کے صحابی ہیں ان سے یہ بات منقول ہے کہ وہ سیدنا معاویہ رضی اللہ عنہ کے عہد خلافت میں فسطاط میں موجود تھے اور سیدنا معاویہ رضی اللہ عنہ لوگوں کو قسطنطنیہ کی جنگ کے لئے تیار کر رہے ہیں ۔ سیدنا ابوثعلبہ خشنی رضی اللہ عنہ نے فرمایا : اللہ کی قسم یہ امت دن کے نصف سے عاجز نہیں آئے گی جب تم شام کو دیکھو گے کہ وہاں ایک شخص اور اس کے اہلخانہ کا دستر خوان ہو گا اس وقت قسطنطنیہ فتح ہو جائے گا ۔ ( علامہ ہیثمی فرماتے ہیں : ) میں یہ کہتا ہوں امام ابوداؤد نے اس روایت کا ایک حصہ نقل کیا ہے ۔
یہ روایت امام أحمد نے نقل کی ہے ، اور اس کے رجال صحیح کے رجال ہیں ۔

سیدنا عمرو بن عوف رضی اللہ عنہ بیان کرتے ہیں : میں نے نبی اکرم صلی اللہ علیہ وسلم کو یہ ارشاد فرماتے ہوئے سنا ہے : ” قیامت اس وقت تک قائم نہیں ہو گی جب تک مسلمانوں کا رابطہ بولان نامی جگہ پر نہیں ہو گا ، اے علی ! مزنی نامی راوی کہتے ہیں : اس سے مراد سیدنا علی بن ابوطالب رضی اللہ عنہ تھے انہوں نے عرض کی : یا رسول اللہ ! میں حاضر ہوں نبی اکرم صلی اللہ علیہ وسلم نے فرمایا : تم یہ بات جان لو کہ تم لوگ بنو اصفر کے ساتھ عنقریب جنگ کرو گے ، اور تم لوگوں کے بعد اہل ایمان ان لوگوں کے ساتھ جنگ کریں گے پھر مسلمانوں کے کچھ لوگ جن کا تعلق اہل حجاز سے ہو گا وہ نکل کر ان کی طرف چلے جائیں گے یہ وہ لوگ ہوں گے ، جو اللہ کی راہ میں جہاد کرتے ہوں گے اللہ تعالیٰ کے بارے میں کسی ملامت کرنے والے کی ملامت انہیں گرفت میں نہیں لے گی ، یہاں تک کہ اللہ تعالیٰ ان کے لئے قسطنطنیہ اور رومیہ کو فتح کر دے گا ، جو تسبیح اور تکبیر کے ذریعے ہو گا وہ لوگ ان دونوں علاقوں کے قلعوں کو منہدم کر دیں گے ، اور وہاں سے بہت سا مال انہیں ملے گا اس طرح کا مال پہلے انہیں کبھی نہیں ملا ہو گا ، یہاں تک کہ وہ ڈھال تک تقسیم کر لیں گے پھر کوئی شخص پکار کر کہے گا اے اہل اسلام تمہارے علاقوں میں اور تمہارے بال بچوں میں دجال نکل آیا ہے ، تو لوگ اس مال کو چھوڑیں گے کچھ اس مال کو لے لیں گے ، اور کچھ اس مال کو چھوڑ دیں گے ، تو جو لے گا وہ ندامت کا شکار ہو گا اور جو چھوڑ دے گا وہ بھی ندامت کا شکار ہو گا پھر وہ یہ کہیں گے یہ چیخنے والا شخص کون ہے وہ لوگ یہ نہیں جانتے ہوں گے کہ وہ کون ہو گا پھر وہ کہیں گے کہ تم مقام ’ لد ، کی طرف کسی جاسوس کو بھیجو اگر تو دجال نکل چکا ہوا تو تمہیں اس کے بارے میں اطلاع مل جائے گی پھر وہ لوگ آئیں گے ، اور اس کو دیکھیں گے ، تو وہاں کوئی چیز نظر نہیں آئے گی وہ لوگوں کو دیکھیں گے کہ وہ خاموش ہوں گے ، تو وہ یہ کہیں گے کہ چیخنے والے نے صرف ہماری طرف متوجہ ہو کر چیخ ماری تھی تو تم لوگ پختہ ہو جاؤ اور ہدایت پر رہو ہم سب نکل کر ’ لد ، کی طرف جاتے ہیں اگر وہاں دجال موجود ہوا تو ہم اس کے ساتھ جنگ کریں گے ، یہاں تک کہ اللہ تعالیٰ ہمارے اور اس کے درمیان فیصلہ کر دے اور وہ بہترین فیصلہ کرنے والا ہے ، اور اگر صورت حال مختلف ہوئی ، تو وہ تمہارا علاقہ ہے ، اور تمہارا خاندان ہے تمہارے لشکر ہیں تم ان کی طرف واپس چلے جاؤ گے ۔ ( علامہ ہیثمی فرماتے ہیں : ) میں یہ کہتا ہوں
یہ روایت امام ابن ماجہ نے اختصار کے ساتھ نقل کی ہے ۔
یہ روایت امام طبرانی نے نقل کی ہے ۔ اس کی سند میں ایک راوی کثیر بن عبداللہ ہے ۔ جسے جمہور نے ضعیف قرار دیا ہے ۔ امام ترمذی نے اس کی نقل کردہ حدیث کو حسن قرار دیا ہے ۔