مجمع الزوائد ومنبع الفوائد

سیدنا جبیر بن مطعم رضی اللہ عنہ بیان کرتے ہیں : ایک مرتبہ میں نبی اکرم صلی اللہ علیہ وسلم کے ساتھ ” حطیم “ میں بیٹھا ہوا تھا ، اسی دوران حکم بن ابوالعاص وہاں سے گزرا ، تو نبی اکرم نے ارشاد فرمایا : اس کی پشت میں جو ( بچہ ) موجود ہے ، اُس کی وجہ سے میری اُمت کی بربادی ہے ۔
یہ روایت امام طبرانی نے معجم اوسط میں نقل کی ہے اور اس کی سند میں ایسا راوی ہے ، جس سے میں واقف نہیں ہوں ۔

سیدنا زبیر رضی اللہ عنہ کے غلام ، عبداللہ بہی بیان کرتے ہیں : میں مسجد میں موجود تھا ، مروان خطبہ دے رہا تھا ، سیدنا عبدالرحمن بن ابوبکر رضی اللہ عنہ نے کہا: اللہ کی قسم ! سیدنا ابوبکر رضی اللہ عنہ نے اپنے اہل خانہ میں سے ، کسی کو اپنا نائب ( یا جانشین ) مقرر نہیں کیا ، تو مردان بولا: تمہیں وہ فرد ہو ، جس کے بارے میں یہ آیت نازل ہوئی : ” اور وہ شخص جس نے اپنے ماں باپ کو یہ : کہا تمہارے لیے اُف ہے “ تو سیدنا عبدالرحمن رضی اللہ عنہ نے فرمایا : تم نے غلط کہا: ہے ، لیکن اللہ تعالیٰ کے رسول صلی اللہ علیہ وسلم نے تمہارے باپ پر لعنت کی ہے ۔
یہ روایت امام بزار نے نقل کی ہے اور اس کی سند حسن ہے ۔

سیدنا ابوعبیدہ بن جراح رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” میری اُمت کا معاملہ عدل پر گامزن رہے گا ، یہاں تک کہ سب سے پہلے ، اُس میں بنوامیہ سے تعلق رکھنے والا ایک شخص رخنہ ڈالے گا ، جس کا نام یزید ہو گا“ ۔
یہ روایت امام ابویعلیٰ اور امام بزار نے نقل کی ہے ، امام ابویعلیٰ کے رجال ” صحیح “ کے رجال ہیں ، البتہ مکحول نے سیدنا ابوعبیدہ رضی اللہ عنہ کا زمانہ نہیں پایا ہے ۔

سیدنا عبداللہ بن مسعود رضی اللہ عنہ بیان کرتے ہیں : نبی اکرم صلی اللہ علیہ وسلم ایک گھر کے پاس سے گزرے ، جس میں بارہ افراد موجود تھے ، آپ صلی اللہ علیہ وسلم نے ارشاد فرمایا : ” اس گھر میں ایسا شخص موجود ہے ، جس کا فتنہ ، میری امت کے لیے ، دجال کے فتنے سے زیادہ برا ہو گا “ ۔
یہ روایت امام بزار نے نقل کی ہے ، اس کی سند میں ایک راوی مسلم بن کیسان ہے اور وہ ضعیف ہے ۔

سیدنا عبداللہ بن عمرو رضی اللہ عنہ ، نبی اکرم صلی اللہ علیہ وسلم کا یہ فرمان نقل کرتے ہیں : ” ایک خلیفہ ہو گا ، وہ اور اُس کی اولاد اہل جہنم میں سے ہوں گے “ ۔
یہ روایت امام طبرانی نے نقل کی ہے ، اس کی سند میں ایسا راوی ہے ، جس سے میں واقف نہیں ہوں ۔

سیدنا عبداللہ بن عمر رضی اللہ عنہ بیان کرتے ہیں : میں نبی اکرم صلی اللہ علیہ وسلم کی خدمت میں جلدی حاضر ہو گیا ، سیدنا ابوالحسن رضی اللہ عنہ تشریف لائے ، نبی اکرم صلی اللہ علیہ وسلم نے ان سے فرمایا : اے ابوالحسن ! تم میرے قریب ہو جاؤ ، نبی اکرم صلی اللہ علیہ وسلم نے انہیں اتنا زیادہ قریب کر لیا کہ اُن کے کان کے پاس منہ کر لیا ، پھر وہ نبی اکرم صلی اللہ علیہ وسلم کے پاس بائیں طرف سے آئے ، یہاں تک کہ نبی اکرم صلی اللہ علیہ وسلم نے پریشانی کے عالم میں اپنا سر اٹھایا اور فرمایا : خبیث شخص نے دروازہ بجایا ہے ، آپ نے فرمایا : ابوالحسن ! تم جاؤ اور اُسے یوں لے کر آؤ ، جس طرح بکری کو دودھ دوہنے کے لیے لے جایا جاتا ہے ، سیدنا علی رضی اللہ عنہ اپنے ساتھ حکم کو لے کر آئے ، جسے انہوں نے سر اور کانوں سے پکڑا ہوا تھا اور اُسے لا کر نبی اکرم صلی اللہ علیہ وسلم کے سامنے کھڑا کر دیا ، نبی اکرم صلی اللہ علیہ وسلم نے تین مرتبہ اس پر لعنت کی ، پھر آپ صلی اللہ علیہ وسلم نے سیدنا علی رضی اللہ عنہ سے ارشاد فرمایا : اسے کونے میں بٹھا دو ! پھر کچھ مہاجرین اور انصار ، نبی اکرم صلی اللہ علیہ وسلم کی خدمت میں حاضر ہوئے ، تو نبی اکرم صلی اللہ علیہ وسلم نے حکم کو بلوایا اور ارشاد فرمایا : یہ شخص ، عنقریب اللہ کی کتاب اور اس کے نبی کی سنت کی خلاف ورزی کرے گا اور اس کی پشت میں سے وہ شخص نکلے گا ، جس کے فتنہ کا دھواں آسمان تک پہنچے گا ، مسلمانوں میں سے ایک شخص نے یہ کہا: اللہ تعالیٰ اور اس کے رسول صلی اللہ علیہ وسلم نے سچ فرمایا ہے ، لیکن یہ لوگ تو اس سے کم تعداد میں ہیں اور کم حیثیت کے مالک ہیں کہ ان کا یہ حال ہو ، نبی اکرم صلی اللہ علیہ وسلم نے فرمایا : ایسا ہی ہو گا ، اُس وقت تم میں سے کچھ لوگ اس کے ساتھی ہوں گے ۔
یہ روایت امام طبرانی نے نقل کی ہے ، اس کی سند میں ایک راوی حسن بن قیس رحبی ہے اور وہ ضعیف ہے ۔

نصر بن عاصم نے ، اپنے والد کے حوالے سے یہ بات نقل کی ہے : وہ بیان کرتے ہیں : میں مسجد نبوی میں داخل ہوا ، تو کچھ لوگ یہ کہہ رہے تھے ہم اللہ تعالیٰ کے غضب اور اُس کے رسول صلی اللہ علیہ وسلم کے غضب سے ، اللہ تعالیٰ کی پناہ مانگتے ہیں ، میں نے دریافت کیا : کیا ہوا ہے ؟ لوگوں نے بتایا : نبی اکرم صلی اللہ علیہ وسلم اپنے منبر پر خطبہ دے رہے تھے ، اس دوران ایک شخص کھڑا ہوا ، اُس نے اپنے بیٹے کے ہاتھ کو پکڑا ، اور اسے مسجد سے باہر لے گیا ، تو نبی اکرم نے ارشاد فرمایا : اللہ تعالیٰ لے جانے والے پر ، اور جانے والے پر لعنت کرے ، ایک دن ، اس امت کی بربادی ہو گی ، جو فلاں شخص کی وجہ سے ہو گی ، جو پیچھے والا ہے ۔
یہ روایت امام طبرانی نے نقل کی ہے اور اس کے رجال ثقہ ہیں ۔

سیدنا عمرو بن مرہ جہنی رضی اللہ عنہ ، جنہیں صحابی ہونے کا شرف حاصل ہے ، وہ بیان کرتے ہیں : ایک مرتبہ حکم بن ابوالعاص نے نبی اکرم صلی اللہ علیہ وسلم کی خدمت میں حاضر ہونے کی اجازت مانگی ، نبی اکرم صلی اللہ علیہ وسلم نے اُس کی آواز پہچان لی ، آپ صلی اللہ علیہ وسلم نے ارشاد فرمایا : ” اسے اجازت دیدو ! اس پر اللہ تعالیٰ ، فرشتوں اور انسانوں ، سب کی لعنت ہو ، اور اُن پر بھی لعنت ہو ، جو اس کی پشت سے نکلیں گے ، البتہ اُن لوگوں کا معاملہ مختلف ہے ، جو اُن میں سے نیک ہوں گے ، اور ایسے لوگ تھوڑے ہوں گے وہ ( یعنی اس کی پشت میں سے نکلنے والے ) لوگ ، دنیا میں نمایاں حیثیت کے مالک ہوں گے اور آخرت میں فقیر ہوں گے ، وہ دھوکہ اور فریب کرنے والے لوگ ہوں گے “ ۔
یہ روایت امام طبرانی نے اسی طرح نقل کی ہے ، دوسری روایت میں یہ الفاظ ہیں : ” اور وہ جو اس کی پشت میں سے نکلے ، اُس پر بھی لعنت ہو ، البتہ اُن میں سے نیک لوگوں کا حکم مختلف ہے ، اور وہ تھوڑے ہوں گے “ اس کی سند میں ایک راوی ابوالحسن جزری ہے ، اور وہ مستور ہے ، اس روایت کے بقیہ رجال ثقہ ہیں ۔

عبداللہ بن موہب بیان کرتے ہیں : وہ سیدنا معاویہ بن ابوسفیان رضی اللہ عنہ کے پاس موجود تھے ، مروان اُن کے پاس آیا اور اپنی ضروریات کے بارے میں اُن کے ساتھ بات چیت کی ، اُس نے کہا: اے امیرالمؤمنین ! میری حاجت پوری کر دیں ، اللہ کی قسم میرے اخراجات زیادہ ہیں ، میں دس افراد کا باپ ہوں ، دس افراد کا بھائی ہوں ، دس افراد کا چچا ہوں ، جب مروان چلا گیا ، تو اس وقت سیدنا عبداللہ بن عباس رضی اللہ عنہ ، سیدنا معاویہ رضی اللہ عنہ کے ساتھ اُن کے پلنگ پر بیٹھے ہوئے تھے ، سیدنا معاویہ رضی اللہ عنہ نے فرمایا : اے ابن عباس ! میں آپ کو اللہ کا واسطہ دے کر دریافت کرتا ہوں کیا آپ یہ بات جانتے ہیں کہ نبی اکرم صلی اللہ علیہ وسلم نے ارشاد فرمایا ہے : ” جب ابوالحکم کے بیٹے تیسں تک پہنچ جائیں گے تو وہ اپنے درمیان اللہ تعالیٰ کی آیات کو دولت بنا لیں گے ، اللہ کے بندوں کو غلام بنا لیں گے اور اس کی کتاب میں دخل دیں گے اور جب وہ چار سو ستانوے ہو جائیں گے ، تو اُن کی ہلاکت کھجور سے زیادہ تیزی سے ہو گی ، تو سیدنا عبداللہ بن عباس رضی اللہ عنہ نے جواب دیا : اللہ جانتا ہے ، مروان نے اپنی حاجت کا ذکر کیا تھا ، پھر مروان نے عبدالملک کو دوبارہ سیدنا معاویہ رضی اللہ عنہ کے پاس بھیجا ، اس نے ان کے ساتھ اس بارے میں بات چیت کی ، جب وہ واپس چلا گیا ، تو سیدنا معاویہ رضی اللہ عنہ نے فرمایا : اے ابن عباس ! میں آپ کو اللہ کا واسطہ دے کر دریافت کرتا ہوں کیا آپ یہ بات جانتے ہیں ؟ کہ نبی اکرم صلی اللہ علیہ وسلم نے اس کا ذکر کیا تھا اور یہ فرمایا تھا : ” یہ چار ظالموں کا باپ ہے “ ۔ سیدنا ابن عباس رضی اللہ عنہ نے جواب دیا : اللہ جانتا ہے ، جی ہاں ! راوی بیان کرتے ہیں : اسی وجہ سے سیدنا معاویہ رضی اللہ عنہ نے زیاد کا دعوی کیا تھا ۔
یہ روایت امام طبرانی نے نقل کی ہے اس کی سند میں ایک راوی ابن لہیعہ ہے اور اس میں ضعیف ہونا پایا جاتا ہے ، اس کی نقل کردہ حدیث حسن ہے ۔

سیدنا عبداللہ بن عمرو رضی اللہ عنہ روایت کرتے ہیں : نبی اکرم نے ارشاد فرمایا : ” اس دروازے سے ، سب سے پہلے سامنے آنے والا شخص ، جہنمی ہو گا ، تو فلاں شخص سامنے آیا “ ۔ ایک روایت میں یہ الفاظ ہیں : ” تمہارے سامنے ایک ایسا شخص ضرور آئے گا ، جسے قیامت کے دن میری سنت کے علاوہ ( راوی کو شک ہے ، یا شاید یہ الفاظ ہیں : ) میرے دین کے علاوہ پر اٹھایا جائے گا “ ۔ سیدنا عبداللہ بن عمرو رضی اللہ عنہ کہتے ہیں : میں اپنے والد کو گھر چھوڑ کر آیا تھا ، مجھے یہ اندیشہ ہوا کہ کہیں وہ مراد نہ ہوں ، لیکن پھر ایک اور شخص آ گیا ، نبی اکرم صلی اللہ علیہ وسلم نے ارشاد فرمایا : ” وہ ، یہ ہے “ ۔ یہ پوری روایت امام طبرانی نے نقل کی ہے اس کی سند میں ایک راوی محمد بن اسحاق بن راہویہ ہے اس کی نقل کردہ حدیث مستقیم ہوتی ہے ، اس میں ضعف پایا جاتا ہے لیکن وہ زیادہ واضح نہیں ہے ، اس روایت کے بقیہ رجال ” صحیح “ کے رجال ہیں ۔

سیدنا عبدالرحمن بن ابوبکر رضی اللہ عنہ بیان کرتے ہیں : حکم بن ابوالعاص ، نبی اکرم صلی اللہ علیہ وسلم کے پاس بیٹھا ہوا تھا ، جب نبی اکرم صلی اللہ علیہ وسلم گفتگو کرنے لگے تو اسے اختلاج ہونے لگا ، نبی اکرم صلی اللہ علیہ وسلم نے اسے دیکھا اور ارشاد فرمایا : تم اسی طرح رہو ! تو وہ شخص مرتے دم تک مسلسل اختلاج کا شکار رہا ۔
یہ روایت امام طبرانی نے نقل کی ہے ، اس کی سند میں ایک راوی ضرار بن صرد ہے اور وہ ضعیف ہے ۔

سیدنا حذیفہ رضی اللہ عنہ بیان کرتے ہیں : جب نبی اکرم صلی اللہ علیہ وسلم کا وصال ہوا اور سیدنا ابوبکر رضی اللہ عنہ کو خلیفہ بنا دیا گیا ، تو اُن سے حکم بن ابوالعاص کے بارے میں بات کی گئی ، تو انہوں نے فرمایا : میں اُس گرہ کو نہیں کھولوں گا ، جو گرہ ، اللہ کے رسول صلی اللہ علیہ وسلم نے لگائی ہو ۔
یہ روایت امام طبرانی نے نقل کی ہے ، اس کی سند میں ایک راوی حماد بن عیسیٰ عبسی ہے ، امام ذہبی کہتے ہیں : اس میں مجہول ہونا پایا جاتا ہے ، اس روایت کے بقیہ رجال ثقہ ہیں ۔

سیدنا ابوہریرہ رضی اللہ عنہ بیان کرتے ہیں : نبی اکرم صلی اللہ علیہ وسلم نے خواب میں دیکھا کہ حکم کے بچے آپ صلی اللہ علیہ وسلم کے منبر پر اتر اور چڑھ رہے ہیں ، صبح کے وقت آپ کو غصہ آیا ہوا تھا ، آپ صلی اللہ علیہ وسلم نے ارشاد فرمایا : کیا وجہ ہے کہ میں نے حکم کے بیٹوں کو دیکھا کہ وہ میرے منبر پر ، بندروں کی طرح چڑھ رہے تھے ، راوی بیان کرتے ہیں : اُس کے بعد نبی اکرم صلی اللہ علیہ وسلم کو ، آپ صلی اللہ علیہ وسلم کے وصال تک کبھی کھل کر ہنستے ہوئے نہیں دیکھا گیا ۔
یہ روایت امام ابویعلیٰ نے نقل کی ہے اور اس کے رجال ” صحیح “ کے رجال ہیں ، صرف مصعب بن عبداللہ بن زبیر کا معاملہ مختلف ہے اور وہ ثقہ ہے ۔

سیدنا ثوبان رضی اللہ عنہ ، نبی اکرم صلی اللہ علیہ وسلم کا یہ فرمان نقل کرتے ہیں : ” مجھے خواب میں ، بنو مروان دکھائے گئے ، جو میرے منبر پر اتر چڑھ رہے تھے ، تو مجھے یہ بات بری لگی ، پھر میں نے بنوعباس کو دیکھا کہ وہ میرے منبر پر چڑھ اور اتر رہے تھے ، تو مجھے یہ بات اچھی لگی “ ۔
یہ روایت امام طبرانی نے نقل کی ہے ، اس کی سند میں ایک راوی زید بن معاویہ ہے اور وہ متروک ہے ۔

سیدہ ام حکیم بنت عمرو بن سنان رضی اللہ عنہا بیان کرتی ہیں : اشعث بن قیس نے سیدنا علی رضی اللہ عنہ کے پاس آنے کی اجازت مانگی ، قنبر نے انہیں روکا ، اور ان کی ناک کو خون آلود کر دیا ، سیدنا علی رضی اللہ عنہ باہر تشریف لائے تو انہوں نے فرمایا : اے اشعث ! تمہارا اس کے ساتھ کیا مقابلہ ہے ؟ اللہ کی قسم ! اگر ثقیف قبیلے کے کسی غلام کے ساتھ تمہارا جھگڑا ہوا ہوتا ، تو تمہاری شرمگاہ کے بالوں پر بھی لرزہ طاری ہو جانا تھا ، اُن سے کہا: گیا : اے امیرالمؤمنین ! ثقیف قبیلے کا غلام کون ہے ؟ انہوں نے فرمایا : وہ ایک غلام ہو گا ، جو لوگوں کا امیر بن جائے گا اور عربوں کے ہر ایک گھرانے میں ، ذلت داخل کر دے گا ، اُن سے دریافت کیا گیا : وہ کتنا عرصہ حکمران رہے گا ؟ انہوں نے جواب دیا بیس سال ، اگر وہ پہنچ گیا ۔
یہ روایت امام طبرانی نے نقل کی ہے اس کی سند میں ایک راوی اجلح کندی ہے جے یحیی بن معین اور دیگر حضرات نے ثقہ قرار دیا ہے ، جبکہ امام أحمد اور دیگر حضرات نے اسے ضعیف کہا: ہے ۔

سیدنا ثوبان رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” بنو عباس کے دو جھنڈے ہوں گے ، جن میں سے اوپر والا ( حصہ ) کفر ہو گا ، اور گاڑھے جانے کی جگہ والا ( حصہ ) گمراہی ہو گا ، اگر تم اس کو پاؤ تو تم گمراہ نہ ہونا “ ۔
یہ روایت امام طبرانی نے نقل کی ہے ، اس کی سند میں ایک راوی یزید بن ربیعہ ہے اور وہ متروک ہے ، اس کی نسبت حدیث ایجاد کرنے کی طرف کی گئی ہے ، ابن عدی کہتے ہیں : اس میں کوئی حرج نہیں ہے ۔

سیدنا ثوبان رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : میرا بنو عباس کے ساتھ کیا واسطہ ؟ وہ میری اُمت کو لے کر چلیں گے اور اُن کا خون بہائیں گے اور انہیں سیاہ رنگ کے کپڑے پہنائیں گے ، اللہ تعالیٰ انہیں جہنم کے کپڑے پہنائے گا ۔
یہ روایت امام طبرانی نے نقل کی ہے ، اس کی سند میں ایک راوی زید بن ربیع ہے ، جس پر کلام ، پہلے گزر چکا ہے ۔

سیدنا ابوامامہ باہلی رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” مشرق کی طرف سے ، بنو عباس کے لیے جھنڈے نکلیں گے ، جن کا پہلا حصہ بربادی والا ہو گا اور آخری دم کٹا ہو گا ، تم اُن لوگوں کی مدد نہ کرنا ، اللہ تعالیٰ اُن کی مدد نہ کرے ، جو شخص ان کے جھنڈوں میں سے کسی جھنڈے کے نیچے چلے گا ، اللہ تعالیٰ اس شخص کو قیامت کے دن جہنم میں داخل کرے گا ، خبردار ! وہ لوگ اللہ کی مخلوق کے بدترین لوگ ہوں گے اور ان کے پیروکار ، اللہ کی مخلوق کے بدترین لوگ ہوں گے ، وہ لوگ یہ کہیں گے : کہ اُن کا مجھ سے تعلق ہے ، حالانکہ میں اُن سے لاتعلق ہوں اور وہ مجھ سے لاتعلق ہیں ، ان کی علامت یہ ہیں کہ وہ لوگ لمبے بال رکھیں گے اور سیاہ لباس پہنیں گے ، تم محفلوں میں اُن کے ساتھ نہ بیٹھنا اور بازاروں میں اُن کے ساتھ خرید و فروخت نہ کرنا ، انہیں راستہ نہ بتانا ، پانی نہ پلانا ، اُن کے تکبیر کہنے سے آسمان والوں کو اذیت ہو گی “ ۔
یہ روایت امام طبرانی نے نقل کی ہے ، اس کی سند میں ایک راوی عنبسہ بن ابوصغیرہ ہے اور اُس پر جھوٹا ہونے کا الزام عائد کیا گیا ہے ۔