مجمع الزوائد ومنبع الفوائد

سیدہ عائشہ رضی اللہ عنہا فرماتی ہیں : نبی اکرم صلی اللہ علیہ وسلم جب اپنی کسی صاحبزادی کی شادی کرنے کا ارادہ کرتے تھے ، تو آپ پردے کے پاس تشریف فرما ہوتے تھے اور فرماتے تھے : فلاں شخص نے فلاں خاتون کا ذکر کیا ہے ، نبی اکرم صلی اللہ علیہ وسلم صاحبزادی کا نام لیتے تھے اور اس شخص کا نام لیتے تھے ، جس نے ذکر کیا ہوتا تھا ، اگر وہ صاحبزادی خاموش رہتی ، تو آپ ان کی شادی طے کر دیتے تھے ، اور اگر وہ ناپسندیدگی کا اظہار کرتی تھی ، تو پردے کو کھٹکھٹا دیتی تھیں ، جب وہ پردہ کھٹکھٹا دیتیں ، تو نبی اکرم صلی اللہ علیہ وسلم ان کی شادی نہیں کرتے ۔
یہ روایت امام أحمد اور امام ابویعلیٰ نے نقل کی ہے ، اس کی سند میں ایک راوی ایوب بن عتبہ ہے اور وہ ضعیف ہے ، ویسے اس کی توثیق کی گئی ہے ۔

سیدنا ابوہریرہ رضی اللہ عنہ نبی اکرم صلی اللہ علیہ وسلم کے بارے میں یہ بات نقل کرتے ہیں : جب آپ نے اپنی صاحبزادی کی شادی کرنے کا ارادہ کیا ، تو آپ پردے کے پاس بیٹھ گئے ، پھر آپ نے فرمایا : فلاں شخص نے فلاں خاتون کے لئے شادی کا پیغام بھیجا ہے ، اگر وہ صاحبزادی خاموش رہیں ، تو یہ ان کی اجازت شمار ہوئی ، آپ نے ارشاد فرمایا : اس کی خاموشی اس کی اجازت ہو گی ۔
یہ روایت امام بزار نے نقل کی ہے اور اس کے رجال ثقہ ہیں ۔

سیدنا انس بن مالک رضی اللہ عنہ بیان کرتے ہیں : نبی اکرم صلی اللہ علیہ وسلم کو جب کسی صاحبزادی کے لئے شادی کا پیغام دیا گیا ، تو آپ پردے کے پیچھے تشریف فرما ہوئے ، آپ نے فرمایا : فلاں شخص نے فلاں خاتون کے لئے شادی کا پیغام دیا ہے ، اگر وہ صاحبزادی خاموش رہیں ، تو ان کی خاموشی ان کی رضامندی شمار ہوئی ، اور اگر انہیں ناگوار گزرا ، تو انہوں نے پردے کو کھٹکھٹا دیا ، تو یہ چیز ان کی طرف سے ناگواری کا اظہار شمار ہوا ۔
یہ روایت امام طبرانی نے معجم اوسط میں نقل کی ہے ، اس کی سند میں ایک راوی عبدالعزیز بن حصین ہے اور وہ ضعیف ہے ۔

سیدنا عبداللہ بن عباس رضی اللہ عنہما بیان کرتے ہیں : نبی اکرم صلی اللہ علیہ وسلم کو جب آپ کی کسی صاحبزادی کے لئے شادی کا پیغام دیا گیا تو آپ پردے کے پاس تشریف لائے ، آپ نے ارشاد فرمایا : فلاں شخص نے فلاں خاتون کے لئے شادی کا پیغام دیا ہے ، اگر اس صاحبزادی نے پردے کو ہاتھ لگا دیا ، تو نبی اکرم صلی اللہ علیہ وسلم نے ان کی شادی نہیں کی ، اور اگر انہوں نے پردے کو ہاتھ نہیں لگایا ، تو نبی اکرم صلی اللہ علیہ وسلم نے ان کی شادی کروا دی ۔
یہ روایت امام طبرانی نے نقل کی ہے ، اس کی سند میں ایک راوی یحیی بن عبدالحمید حمانی ہے ، جس کی توثیق کی گئی ہے ، ویسے اس میں ضعف پایا جاتا ہے ۔

سیدنا عمر رضی اللہ عنہ بیان کرتے ہیں : نبی اکرم صلی اللہ علیہ وسلم نے جب اپنے خاندان کی خواتین میں سے کسی خاتون کی شادی کروانی ہوتی تو آپ پردے کے پیچھے ان کے پاس تشریف لاتے اور ان سے فرماتے : اے میری بیٹی ! فلاں شخص نے تمہیں شادی کا پیغام دیا ہے اگر تمہیں یہ ناپسند ہے ، تو تم یہ کہہ دو : جی نہیں ! کیونکہ کوئی بھی شخص ” نہ “ کہتے ہوئے نہیں شرماتا ، اور اگر یہ تمہیں پسند ہے ، تو تمہاری خاموشی اقرار شمار ہو گی ۔
یہ روایت امام طبرانی نے نقل کی ہے ، اس کی سند میں ایک راوی یزید بن عبدالملک نوفلی ہے اور وہ متروک ہے ، اور یحیی بن معین نے ایک روایت کے مطابق اسے ثقہ قرار دیا ہے ۔

معاویہ بن حدیج بیان کرتے ہیں : سیدنا معاویہ رضی اللہ عنہ نے مجھے سیدنا امام حسن بن علی رضی اللہ عنہما کے پاس بھیجا ، تاکہ میں ان کی صاحبزادی ، یا اُن کی کسی بہن کے لئے یزید کا رشتہ پیش کروں ، میں ان کے پاس آیا ، میں نے ان کے سامنے یزید کا ذکر کیا تو انہوں نے فرمایا : ہم ایسے لوگ ہیں کہ ہم اپنی خواتین کی شادیاں اُن کی مرضی معلوم کیے بغیر نہیں کرتے ہیں ، میں اس خاتون کے پاس آیا اور میں نے اس خاتون کے سامنے یزید کا ذکر کیا ، تو اس خاتون نے کہا: اللہ کی قسم ! ایسا اس وقت تک نہیں ہو گا ، جب تک تمہارے آقا ہمارے درمیان یوں نہیں چلتے ، جس طرح فرعون ، بنی اسرائیل کے درمیان چلا تھا کہ اس نے ان کے بیٹوں کو ذبح کر دیا تھا اور ان کی عورتوں کو زندہ رکھا تھا ، راوی کہتے ہیں : میں واپس سیدنا امام حسن رضی اللہ عنہ کے پاس آیا ، اور میں نے کہا: آپ نے مجھے ایک تیز مزاج خاتون کی طرف بھیجا تھا ، جس نے امیرالمؤمنین کو ” فرعون “ کا نام دیا ہے ، تو سیدنا امام حسن رضی اللہ عنہ نے فرمایا : اے معاویہ ! ہمارے ساتھ بغض رکھنے سے بچنا ! کیونکہ نبی اکرم صلی اللہ علیہ وسلم نے ارشاد فرمایا ہے : ” ہمارے ساتھ جو بھی شخص بغض رکھے گا ، یا جو بھی شخص حسد رکھے گا ، قیامت کے دن اُسے آگ کے کوڑوں کے ذریعے حوض سے پرے کیا جائے گا “ ۔
یہ روایت امام طبرانی نے نقل کی ہے ، اس کی سند میں ایک راوی عبداللہ بن عمر واقفی ہے اور وہ کذاب ہے ۔

ابراہیم بن صالح سے روایت منقول ہے ، صالح وہ شخص ہے ، جو سیدنا نعیم بن نحام رضی اللہ عنہ کے نام سے معروف ہیں ، اور نبی اکرم صلی اللہ علیہ وسلم نے ان کا نام ” صالح “ رکھا تھا ، وہ بیان کرتے ہیں : سیدنا عبداللہ بن عمر رضی اللہ عنہما نے سیدنا عمر بن خطاب رضی اللہ عنہ سے کہا: آپ صالح کی صاحبزادی کو میرے لئے شادی کا پیغام دیں ، تو سیدنا عمر رضی اللہ عنہ نے کہا: اس کے ( زیر پروش ) یتیم بچے ( یعنی صالح کے اپنے یتیم بھانجے یا بھتیجے ) ہیں ، وہ ہمیں ان پر ترجیح نہیں دے گا ( یعنی وہ اپنے کسی بھتیجے وغیرہ کے ساتھ اس کی شادی کرے گا ) پھر سیدنا عبداللہ رضی اللہ عنہ اپنے چچا سیدنا زید بن خطاب رضی اللہ عنہ کے پاس گئے ، تاکہ وہ شادی کا پیغام دے دیں ، تو سیدنا زید رضی اللہ عنہ سیدنا صالح رضی اللہ عنہ کے پاس گئے اور کہا: عبداللہ بن عمر نے مجھے آپ کے پاس بھیجا ہے ، تاکہ وہ آپ کی صاحبزادی کے لئے شادی کا پیغام دے ، انہوں نے فرمایا : میرے زیر پرورش کچھ یتیم بچے ہیں ( یعنی میرے بھتیجے وغیرہ ہیں ) تو میں اپنے خون کو نظر انداز نہیں کروں گا ، اور آپ کے رشتہ دار کو ترجیح نہیں دوں گا ، میں آپ کو گواہ بنا کر یہ کہتا ہوں کہ میں نے اس عورت کی شادی فلاں کے ساتھ کر دی ہے ، اس لڑکی کی ماں کی خواہش یہ تھی کہ اس لڑکی کی شادی سیدنا عبداللہ بن عمر رضی اللہ عنہما کے ساتھ ہو ، وہ خاتون نبی اکرم صلی اللہ علیہ وسلم کے پاس آئی اور بولی: اے اللہ ! کے نبی ! عبداللہ بن عمر نے میری بیٹی کے لئے شادی کا پیغام دیا ، لیکن اس بچی کے باپ نے اپنے زیر پرورش ایک یتیم لڑکے کے ساتھ اس لڑکی کی شادی کر دی اور اس نے لڑکی سے مرضی بھی معلوم نہیں کی ، نبی اکرم صلی اللہ علیہ وسلم نے سیدنا صالح رضی اللہ عنہ کو پیغام بھیجا اور دریافت کیا : کیا تم نے اپنی بیٹی کی شادی کر دی ہے ؟ اور اس کی مرضی بھی معلوم نہیں کی ؟ انہوں نے جواب دیا : جی ہاں ! نبی اکرم صلی اللہ علیہ وسلم نے فرمایا : خواتین کے ساتھ ان کی ذات کے بارے میں مشورہ لو ! اگرچہ وہ کنواری ہی کیوں نہ ہوں ۔ سیدنا صالح رضی اللہ عنہ نے کہا: اس خاتون نے ایسا اس لئے کیا ہے کیونکہ عبداللہ بن عمر نے اس خاتون کو پیسے دیے تھے ، اس عورت کو میرے مال میں سے اتنا ہی مال ملتا ہے ، جتنا عبداللہ بن عمر نے اسے دیا تھا ۔
یہ روایت امام أحمد نے نقل کی ہے اور
یہ روایت ” مرسل“ ہے اور اس کے رجال ثقہ ہیں ۔

سیدنا ابوموسیٰ اشعری رضی اللہ عنہ بیان کرتے ہیں : نبی اکرم صلی اللہ علیہ وسلم نے ارشاد فرمایا : ” جب کوئی شخص اپنی بیٹی کی شادی کا ارادہ کرے ، تو اُس سے مرضی معلوم کر لے “ ۔
یہ روایت امام ابویعلیٰ اور امام طبرانی نے نقل کی ہے اور امام ابویعلیٰ کے رجال صحیح کے رجال ہیں ۔

سیدنا ابوہریرہ رضی اللہ عنہ ، نبی اکرم صلی اللہ علیہ وسلم کا یہ فرمان نقل کرتے ہیں : ” کنواری کی شادی ، اُس وقت تک نہ کی جائے گی ، جب تک اس کی مرضی معلوم نہ کی جائے ، اس کی مرضی اس کی خاموشی ہو گی اور ثیبہ عورت ، اپنی مرضی کے مطابق عمل کرے گی ، جبکہ وہ کسی ناراضگی کی طرف نہ جاتی ہو ، لیکن اگر وہ کسی ناراضگی کی طرف جا رہی ہو ، اور اس کے اولیاء اسے رضا مندی کی طرف لے جا رہے ہوں ، تو پھر معاملہ سلطان کے سامنے پیش کیا جائے گا “ ۔ ( علامہ ہیثمی فرماتے ہیں : ) میں یہ کہتا ہوں :
یہ روایت ” صحیح “ میں اختصار کے ساتھ منقول ہے ۔
یہ روایت امام طبرانی نے معجم اوسط میں نقل کی ہے ، اسحاق بن راہویہ کہتے ہیں : میں نے عیسیٰ بن یونس بن اسحاق سے کہا: نبی اکرم صلی اللہ علیہ وسلم سے منقول وہ آخری حدیث کیا ہے ؟ انہوں نے فرمایا : امام اوزاعی نے اسی طرح بیان کیا ہے ، اس روایت کے رجال صحیح کے رجال ہیں ، صرف ابراہیم بن مرہ کا معاملہ مختلف ہے ، ویسے وہ ثقہ ہے ۔

سیدنا ابوموسی اشعری رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” خواتین کا معاملہ ان کے باپوں کے ہاتھ میں ہوتا ہے اور ان کی خاموشی ان کی اجازت ہوتی ہے “ ۔
یہ روایت امام طبرانی نے نقل کی ہے اس کی سند میں ایک راوی محمد بن سالم ہمدانی ہے اور وہ متروک ہے ۔

سیدنا عبداللہ بن عباس رضی اللہ عنہما بیان کرتے ہیں : نبی اکرم صلی اللہ علیہ وسلم نے ایک ثیبہ اور ایک کنواری لڑکی کے نکاح کو مسترد کر دیا تھا ، ان کے باپ نے ان دونوں کی شادیاں کروائیں تھیں ، اور زبردستی کروائیں تھیں ۔
یہ روایت امام طبرانی نے نقل کی ہے اس کی سند میں ایک راوی اسحاق بن ابراہیم بن جوثی ہے ، میں اس سے واقف نہیں ہوں اس روایت کے بقیہ رجال ثقہ ہیں ۔

سیدنا العرس (بن عمیرہ) رضی اللہ عنہ سے روایت ہے ، وہ بیان کرتے ہیں کہ رسول اللہ صلی اللہ علیہ وسلم نے فرمایا : «عورتوں سے (ان کے نکاح کے بارے میں) اجازت و مشورہ لیا کرو ؛ چنانچہ ثیب (بیوہ یا مطلقہ عورت) اپنے نفس کے بارے میں خود کھل کر بات کرے گی (اپنی زبان سے صراحت کرے گی) ، اور دوشیزہ (کنواری لڑکی) کا خاموش رہنا ہی اس کی اجازت ہے » ۔
اسے امام طبرانی رحمہ اللہ نے روایت کیا ہے اور فرمایا کہ سفیان نے اس کی سند میں العرس رضی اللہ عنہ کا اضافہ کیا ہے ۔ جبکہ لیث بن سعد نے اسے ابن ابی حسین سے روایت کیا اور انہوں نے اس سند کو عدی بن عدی پر ہی روک دیا یعنی مرسل رکھا ۔ میں [حافظ ہیثمی رحمہ اللہ] کہتا ہوں : اور اس کے تمام راوی ثقہ ہیں ۔

سیدہ ام سلمہ رضی اللہ عنہا بیان کرتی ہیں : ایک لڑکی کی شادی اس کے باپ نے کر دی ، وہ لڑکی کسی اور کے ساتھ شادی کرنا چاہتی تھی ، وہ نبی اکرم صلی اللہ علیہ وسلم کی بارگاہ میں حاضر ہوئی ، اور یہ چیز آپ کے سامنے ذکر کی ، تو نبی اکرم صلی اللہ علیہ وسلم نے اس کی اس شخص سے علیحدگی کروا دی ، جس کے ساتھ اس کے باپ نے اس کی شادی کی تھی ، اور نبی اکرم صلی اللہ علیہ وسلم نے اس لڑکی کی شادی اس شخص کے ساتھ کروا دی ، جس کے ساتھ وہ شادی کرنا چاہتی تھی ۔
یہ روایت امام طبرانی نے نقل کی ہے اور اس کے رجال صحیح کے رجال ہیں ۔

سیدنا عبدالرحمن رضی اللہ عنہ اور سیدنا مجمع بن یزید بن جاریہ رضی اللہ عنہ یہ دونوں حضرات بیان کرتے ہیں : سیدنا حذام رضی اللہ عنہ نے اپنی صاحبزادی کی شادی زبردستی ایک شخص کے ساتھ کر دی ، وہ صاحبزادی ثیبہ تھیں ، وہ نبی اکرم صلی اللہ علیہ وسلم کی خدمت میں حاضر ہوئیں ، اور یہ بات آپ کے سامنے ذکر کی ، تو نبی اکرم صلی اللہ علیہ وسلم نے ان کے نکاح کو کالعدم قرار دیا ۔
یہ روایت امام طبرانی نے نقل کی ہے اور اس کے رجال ثقہ ہیں ۔