مجمع الزوائد ومنبع الفوائد

سیدنا عبداللہ بن عمر رضی اللہ عنہما بیان کرتے ہیں : کچھ لوگ نبی اکرم صلی اللہ علیہ وسلم کے پاس موجود تھے نبی اکرم صلی اللہ علیہ وسلم نے سیدنا بلال رضی اللہ عنہ کو حکم دیا کہ ہمارے پاس کچھ کھانے کے لئے کچھ لے آؤ ! سیدنا بلال رضی اللہ عنہ گئے ۔ انہوں نے کھجوروں کے دو صاع کے عوض میں عمدہ قسم کی کھجوروں کا ایک صاع لیا ان حضرات کی کھجوریں ہلکی قسم کی تھیں ، نبی اکرم صلی اللہ علیہ وسلم کو وہ کھجوریں پسند آئیں نبی اکرم صلی اللہ علیہ وسلم نے ان سے دریافت کیا : یہ کھجوریں کہاں سے آئی ہیں ؟ انہوں نے نبی اکرم صلی اللہ علیہ وسلم کو بتایا کہ انہوں نے ایک صاع کے عوض میں دو صاع کھجوریں دی ہیں ، تو نبی اکرم صلی اللہ علیہ وسلم نے ارشاد فرمایا : ہماری کھجوریں ہمارے پاس واپس لے آؤ ۔
یہ روایت امام أحمد اور امام ابویعلیٰ نے اور امام طبرانی نے معجم کبیر میں نقل کی ہے اور امام أحمد کے رجال ثقہ ہیں ۔

سیدنا بلال رضی اللہ عنہ بیان کرتے ہیں : میرے پاس کھجوریں موجود تھیں میں نے انہیں بازار میں ان سے زیادہ عمدہ کھجوروں کے عوض میں فروخت کر دیا اور ان سے آدھی کھجوریں حاصل کیں ، پھر میں وہ لے کر نبی اکرم صلی اللہ علیہ وسلم کے پاس آیا ، تو آپ نے فرمایا : میں نے آج جتنی عمدہ کھجوریں نہیں دیکھیں ، اے بلال ! یہ کہاں سے آئی ہیں ؟ میں نے جو کیا تھا اس کے بارے میں نبی اکرم صلی اللہ علیہ وسلم کو بتایا تو نبی اکرم صلی اللہ علیہ وسلم نے فرمایا : تم جاؤ ! یہ کھجوریں اس کے مالک کو واپس کر دو ، اور اپنی کھجوریں واپس لے لو ، پھر ان کھجوروں کو گندم ، یا جو کے عوض میں فروخت کرو اور پھر ان کے عوض میں یہ کھجوریں خرید لو ، میں نے ایسا ہی کیا ، تو نبی اکرم صلی اللہ علیہ وسلم نے ارشاد فرمایا : ” کھجور کے عوض میں کھجور کا لین دین برابر برابر ہو گا ، گندم کے عوض میں گندم کا لین دین برابر برابر ہو گا ، جو کے عوض - میں جو کا لین دین برابر برابر ہو گا ، نمک کے عوض میں نمک کا لین دین برابر برابر ہو گا ، چاندی کے عوض میں چاندی کا لین دین برابر برابر کے وزن کے ساتھ ہو گا ، جو اضافی ادائیگی ہو گی ، وہ سود شمار ہو گی “ ۔
یہ روایت امام بزار نے اور امام طبرانی نے معجم کبیر میں اس کی مانند نقل کی ہے ۔ انہوں نے یہ الفاظ زائد نقل کیے ہیں : ” جب دونوں طرف دو مختلف چیزیں ہوں ، تو پھر کوئی حرج نہیں ہے ، خواہ دس کے عوض میں ایک ہو “ ۔ امام بزار کے رجال صحیح کے رجال ہیں ، تاہم انہوں نے اسے سعید بن مسیب کی سیدنا بلال رضی اللہ عنہ سے نقل کردہ روایت کے طور پر نقل کیا ہے ، اور سعید نے سیدنا بلال رضی اللہ عنہ سے سماع نہیں کیا ہے ، اس روایت کی طبرانی میں بھی کچھ اسانید ہیں ، جن میں سے بعض میں یہ مذکور ہے : یہ سیدنا عبداللہ بن عمر رضی اللہ عنہما کے حوالے سے سیدنا بلال رضی اللہ عنہ سے منقول ہے ، یہ روایات اس روایت سے مختصر ہیں اور اس روایت کے رجال ثقہ ہیں ، جبکہ بعض راویات سیدنا عمر بن خطاب رضی اللہ عنہ کے حوالے سے سیدنا بلال رضی اللہ عنہ سے منقول ہیں اور یہ پہلی روایت کی مانند ہیں ، لیکن ان کی سند ضعیف ہے ۔

سیدنا انس رضی اللہ عنہ بیان کرتے ہیں : نبی اکرم صلی اللہ علیہ وسلم کی خدمت میں ” ریان “ نامی کھجوریں لائی گئیں ، آپ نے ارشاد فرمایا : یہ تمہارے پاس کہاں سے آئی ہیں ؟ لوگوں نے بتایا ہمارے پاس ” بعل “ کھجوریں تھیں ، تو ہم نے ایک صاع کے عوض میں ان کے دو صاع فروخت کر دیئے ، نبی اکرم صلی اللہ علیہ وسلم نے فرمایا : یہ اس کے مالک کو واپس کر دو ۔
یہ روایت امام بزار نے اور امام طبرانی نے معجم اوسط میں نقل کی ہے ، تاہم انہوں نے یہ الفاظ نقل کیے ہیں : ” تم یہ اس کے مالک کو واپس کر دو ، پھر اس کو ( یعنی اپنی کھجوروں کو ) عین ( یعنی سونا یا چاندی ) کے عوض میں فروخت کرو اور پھر ( اس سونا یا چاندی کے عوض میں ) یہ کھجوریں خرید لو “ ۔ اس روایت کی سند حسن ہے ۔

سیدنا بریدہ رضی اللہ عنہ بیان کرتے ہیں : نبی اکرم صلی اللہ علیہ وسلم نے کھجور کی خواہش کا اظہار کیا ، تو آپ کے پاس عجوہ کھجوروں کا ایک صاع لایا گیا جب وہ آپ کے پاس آیا ، تو آپ کو اس پر حیرانگی ہوئی آپ نے دریافت کیا : یہ تمہارے پاس کہاں سے آئی ہیں ؟ لوگوں نے عرض کی : ہم نے دو صاع کھجوریں فروخت کیں تو پھر ( ان کا ) ایک صاع لے کر آئے ہیں ، نبی اکرم صلی اللہ علیہ وسلم نے فرمایا : اسے واپس کر دو ! اسے واپس کر دو ، ہمیں اس کی حاجت نہیں ہے ۔
یہ روایت امام طبرانی نے معجم اوسط میں نقل کی ہے اس کی سند میں ایک راوی حبان بن عبداللہ ہے اور وہ ضعیف ہے ۔

سیدنا عبداللہ بن عمر رضی اللہ عنہما روایت کرتے ہیں : نبی اکرم صلی اللہ علیہ وسلم نے ارشاد فرمایا : دو دینار کے عوض میں ، ایک دینار فروخت نہ کرو ، دو درہم کے عوض میں ایک درہم فروخت نہ کرو ، دو صاع کے عوض میں ایک صاع فروخت نہ کرو ، مجھے تمہارے بارے میں رماء کا اندیشہ ہے ( راوی بیان کرتے ہیں : ) ” رماء “ سے مراد سود ہے ، ایک شخص نبی اکرم صلی اللہ علیہ وسلم کے سامنے کھڑا ہوا ، اس نے عرض کی : یا رسول اللہ ! ایسے شخص کے بارے میں آپ کی کیا رائے ہے ؟ جو کچھ گھوڑوں کے عوض میں ایک گھوڑا فروخت کرتا ہے یا اونٹ کے عوض میں اونٹنی فروخت کر دیتا ہے ؟ نبی اکرم صلی اللہ علیہ وسلم نے فرمایا : اس میں کوئی حرج نہیں ہے جبکہ دست بدست لین دین ہو ۔
یہ روایت امام أحمد نے نقل کی ہے امام طبرانی نے معجم کبیر میں اس کی مانند روایت کی نقل کی ہے اس کی سند میں ایک راوی ابوجناد ہے لیکن وہ تدلیس کرنے والا ہے ۔

سیدنا عبداللہ بن عمر رضی اللہ عنہما اور سیدنا ابوسعید خدری رضی اللہ عنہ اور سیدنا ابوہریرہ رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” سونے کے عوض میں سونے کا لین دین برابر برابر ہو گا ، چاندی کے عوض میں چاندی کا لین دین برابر برابر ہو گا اور نقد ہو گا جو شخص زیادہ دے ، یا زیادہ کا مطالبہ کرے ، تو وہ سود کا کام کرے گا“ ۔ ( علامہ ہیثمی فرماتے ہیں : ) میں یہ کہتا ہوں : سیدنا ابوسعید خدری رضی اللہ عنہ اور سیدنا ابوہریرہ رضی اللہ عنہ سے منقول حدیث ” صحیح “ میں مذکور ہے ۔
یہ روایت امام أحمد نے نقل کی ہے اس کی سند میں ایک راوی شرحبیل بن سعد ہے ، جسے ابن حبان نے ثقہ قرار دیا ہے جمہور نے اسے ضعیف قرار دیا ہے ۔

سیدنا عبداللہ بن عمر رضی اللہ عنہما روایت کرتے ہیں : نبی اکرم صلی اللہ علیہ وسلم نے ارشاد فرمایا : ” سونے کے عوض میں سونے کا لین دین ، چاندی کے عوض میں چاندی کا لین دین ، گندم کے عوض میں گندم کا لین دین ، جو کے عوض میں جو کا لین دین ، نمک کے عوض میں نمک کا لین دین اور کھجور کے عوض میں کھجور کا لین دین برابر ، برابر ماپ کے مطابق ہو گا ، جو شخص زیادہ دے ، یا زیادتی کا طلبگار ہو ، وہ سود کا مرتکب ہو گا“ ۔
یہ روایت امام ابویعلیٰ نے عبدالمؤمن کی سیدنا عبداللہ بن عمر رضی اللہ عنہما سے نقل کردہ روایت کے طور پر نقل کی ہے اور عبدالمؤمن نامی راوی سے میں واقف نہیں ہوں ، اس روایت کے بقیہ رجال ثقہ ہیں ۔

ابوزبیر مکی بیان کرتے ہیں : میں نے سیدنا جابر بن عبداللہ رضی اللہ عنہ سے کھجور کے عوض میں گندم کے نقد ، اضافی لین دین کے بارے میں دریافت کیا ، تو انہوں نے فرمایا : نبی اکرم صلی اللہ علیہ وسلم کے زمانہ اقدس میں ، ہم گندم کا ایک صاع ، کھجور کے چھ صاع کے عوض میں نقد لین دین میں فروخت کرتے تھے ، لیکن اگر دونوں طرف ( اناج کی ) ایک ہی قسم ہو ، تو پھر اس میں کوئی بھلائی نہیں ہے البته اگر دونوں طرف برابر ہو ، تو حکم مختلف ہے “ ۔
یہ روایت امام ابویعلیٰ نے نقل کی ہے اور اس کے رجال صحیح کے رجال ہیں ۔

سیدنا ابوسعید خدری رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : سونے کے عوض میں سونے کا لین دین ، چاندی کے عوض میں چاندی کا لین دین ، گندم کے عوض میں گندم کا لین دین ، جو کے عوض میں جو کا لین دین ، نمک کے عوض میں نمک کا لین دین برابر ، برابر ہو گا ، جو شخص اضافی ادائیگی کرے ، یا اضافی ادائیگی کا طلبگار ہو تو وہ سود کا کام کرے گا ، عرض کی گئی : یا رسول اللہ ! آپ کی کھجوروں کے نگران صاحب تو دو صاع کے عوض میں ، ایک صاع فروخت کرتے ہیں ، نبی اکرم صلی اللہ علیہ وسلم نے ان صاحب کو پیغام بھیج کر بلایا انہوں نے عرض کی : یا رسول اللہ ! میری کھجوریں ایسی ، ایسی ہیں ، لوگ صرف اس وقت ہی انہیں لیتے ہیں ، جب میں انہیں اضافی ادائیگی کروں ، تو نبی اکرم صلی اللہ علیہ وسلم نے فرمایا : تم ایسا نہ کرو ۔ ( علامہ ہیثمی فرماتے ہیں : ) میں یہ کہتا ہوں : یہ روایت ” صحیح “ میں اختصار کے ساتھ منقول ہے ۔
یہ روایت امام طبرانی نے معجم اوسط میں نقل کی ہے اور اس کے رجال ثقہ ہیں ۔

ابوزبیر مکی بیان کرتے ہیں : میں نے سیدنا ابواسید ساعدی رضی اللہ عنہ اور سیدنا عبداللہ بن عباس رضی اللہ عنہما کو سنا ، سیدنا ابن عباس رضی اللہ عنہما دو دینار کے عوض میں ایک دینار کے ( کے لین دین جائز ہونے کا ) فتویٰ دیتے تھے ، سیدنا ابواسید رضی اللہ عنہ نے اس بارے میں سخت کلمات استعمال کیے ، تو سیدنا عبداللہ بن عباس رضی اللہ عنہما نے فرمایا : اے ابواسید ! میں یہ گمان نہیں کرتا تھا کہ کوئی شخص نبی اکرم صلی اللہ علیہ وسلم کے ساتھ میرے رشتے کو جانتے ہوئے میرے بارے میں اس طرح کے کلمات کہے گا ، تو سیدنا ابواسید رضی اللہ عنہ نے فرمایا : میں اس بات کی گواہی دیتا ہوں کہ میں نے نبی اکرم صلی اللہ علیہ وسلم کو یہ ارشاد فرماتے ہوئے سنا ہے : ” دینار کے عوض میں دینار کا لین دین ، درہم کے عوض میں درہم کا لین دین ، گندم کے ایک صاع کے عوض میں گندم کا ایک صاع ، جو کے ایک صاع کے عوض میں جو کا ایک صاع ، نمک کے ایک صاع کے عوض میں نمک کا ایک صاع ( لین دین کیا جائے گا ) ان دونوں کے درمیان کوئی اضافی ادائیگی نہیں ہو گی “ ۔ تو سیدنا عبداللہ بن عباس رضی اللہ عنہما نے فرمایا : یہ فتوی میں اپنی رائے کے حوالے سے دیا کرتا تھا ، میں نے اس بارے میں کوئی روایت نہیں سنی تھی ۔
یہ روایت امام طبرانی نے معجم کبیر میں نقل کی ہے اور اس کی سند حسن ہے ۔