مجمع الزوائد ومنبع الفوائد

سیدنا عبداللہ بن عباس رضی اللہ عنہما نبی اکرم صلی اللہ علیہ وسلم کا یہ فرمان نقل کرتے ہیں : ” شادی کے موقع پر ایک دن کھانا کھلانا سنت ہے دو دن کھلانا فضیلت رکھتا ہے اور تین دن کھلانا ریاکاری اور شہرت کا حصول ہے “ ۔
یہ روایت امام طبرانی نے معجم کبیر میں نقل کی ہے اس کی سند میں ایک راوی محمد بن عبداللہ عرزمی ہے اور وہ متروک ہے ۔

سیدنا عبداللہ بن مسعود رضی اللہ عنہ فرماتے ہیں : پہلے دن ولیمہ حق ہے دوسرے دن فضیلت ہے ( یا اضافی ہے ) اور تیسرے دن ریاء کاری اور شہرت ہے اور جو شخص شہرت چاہتا ہے اللہ تعالیٰ اس کی شہرت کو ظاہر کر دیتا ہے “ ۔
یہ روایت امام طبرانی نے معجم کبیر میں نقل کی ہے اس کی سند میں ایک راوی عطاء بن سائب ہے ، جو اختلاط کا شکار ہو گیا تھا ۔

سیدنا ابورافع رضی اللہ عنہ ، جو نبی اکرم صلی اللہ علیہ وسلم کے غلام ہیں ، وہ بیان کرتے ہیں : سیدنا امام حسن بن علی رضی اللہ عنہما جب پیدا ہوئے تو سیدہ فاطمہ رضی اللہ عنہا نے ان کے عقیقے میں دونبے قربان کرنے کا ارادہ کیا ، تو نبی اکرم صلی اللہ علیہ وسلم نے فرمایا : تم اس کا عقیقہ نہ کرو بلکہ تم اس کا سر مونڈ کر اس کے بالوں کے وزن جتنی چاندی اللہ کی راہ میں صدقہ کرو ، پھر جب ان کے بعد سیدنا امام حسین رضی اللہ عنہ پیدا ہوئے تو پھر سیدہ فاطمہ رضی اللہ عنہا نے ایسا ہی کیا ۔

سیدنا ابورافع رضی اللہ عنہ کے حوالے سے ایک روایت مذکور ہے وہ بیان کرتے ہیں : جب سیدہ فاطمہ رضی اللہ عنہا نے سیدنا امام حسن رضی اللہ عنہ کو جنم دیا تھا تو انہوں نے عرض کی : کیا میں اپنے بیٹے کی طرف سے ایک جانور کی قربانی کے ذریعے عقیقہ نہ کروں ؟ نبی اکرم صلی اللہ علیہ وسلم نے فرمایا : جی نہیں ! بلکہ تم اس کا سر مونڈ کر اس کے بالوں کے وزن جتنی چاندی غریبوں اور اوقاص کو صدقہ کر دو ( راوی بیان کرتے ہیں : ) اوقاص سے مراد نبی اکرم صلی اللہ علیہ وسلم سے تعلق رکھنے والے وہ لوگ تھے جو محتاج تھے اور وہ صفہ کے چبوترے یا مسجد میں رہا کرتے تھے ۔ ۔ ۔ ۔ ۔ ۔ ۔ ۔ ۔ ۔ ۔ اس کے بعد راوی نے حسب سابق روایت ذکر کی ہے ۔
یہ روایت امام أحمد نے اور امام طبرانی نے معجم کبیر میں نقل کی ہے اور یہ حدیث حسن ہے ۔

سیدنا انس بن مالک رضی اللہ عنہ بیان کرتے ہیں : سیدنا حسن رضی اللہ عنہ اور سیدنا حسین رضی اللہ عنہ ( کی پیدائش پر ) نبی اکرم صلی اللہ علیہ وسلم کے حکم کے تحت ان کا سر مونڈ دیا گیا اور پھر ان کے ( بالوں ) کے وزن جتنی چاندی صدقہ کر دی گئی نبی اکرم صلی اللہ علیہ وسلم کو ذبح کرنے کے لئے ( کوئی جانور ) نہیں ملا تھا ۔
یہ روایت امام طبرانی نے معجم کبیر اور معجم اوسط میں اور امام بزار نے نقل کی ہے امام طبرانی کی معجم کبیر کی سند میں ایک راوی ابن لہیعہ ہے اور اس کی سند حسن ہے اس روایت کے بقیہ رجال صحیح کے رجال ہیں ۔

بنوضمرہ سے تعلق رکھنے والے ایک صاحب نے اپنے والد کے حوالے سے یہ بات نقل کی ہے ۔ نبی اکرم صلی اللہ علیہ وسلم سے عقیقہ کے بارے میں دریافت کیا گیا تو آپ نے ارشاد فرمایا : میں عقوق ( نافرمانی ) کو پسند نہیں کرتا ہوں ۔ ( راوی کہتے ہیں : ) گویا کہ نبی اکرم صلی اللہ علیہ وسلم نے اس لفظ کو ناپسند کیا آپ نے ارشاد فرمایا : جس کا بچہ پیدا ہو اگر وہ اپنے بچے کی طرف سے قربانی کرنے کو پسند کرے تو وہ کر لے ۔

ایک روایت میں راوی نے اپنے والد یا شاید اپنے چچا کے حوالے سے یہ بات نقل کی ہے ۔ یہ تمام روایات امام أحمد نے نقل کی ہیں ان میں ایک راوی ایسا ہے ، جس کا نام بیان نہیں کیا گیا ہے اس کے بقیہ رجال صحیح کے رجال ہیں ۔

سیدہ ام سلمہ رضی اللہ عنہا نبی اکرم صلی اللہ علیہ وسلم کے حوالے سے عقیقہ کے بارے میں یہ بات نقل کرتی ہیں آپ صلی اللہ علیہ وسلم نے فرمایا : ” جس شخص کا بچہ پیدا ہو وہ اگر اس کی طرف سے قربانی کرنے کو پسند کرتا ہو ، تو ایسا کر لے “ ۔
یہ روایت امام طبرانی نے معجم اوسط میں نقل کی ہے اس کی سند میں ایک راوی اسماعیل بن مسلم مکی ہے اور وہ ضعیف ہے ۔

سیدہ اسماء بنت یزید رضی اللہ عنہا نبی اکرم صلی اللہ علیہ وسلم کا یہ فرمان نقل کرتی ہیں : ” عقیقہ حق ہے ، جس میں لڑکے کی طرف سے دو برابر کی بکریاں اور لڑکی کی طرف سے ایک بکری ذبح کی جائے گی “ ۔
یہ روایت امام أحمد نے اور امام طبرانی نے معجم کبیر میں نقل کی ہے اور اس کے راویوں سے استدلال کیا گیا ہے ۔

سیدنا جابر بن عبداللہ رضی اللہ عنہ بیان کرتے ہیں : نبی اکرم صلی اللہ علیہ وسلم نے سیدنا امام حسن رضی اللہ عنہ اور سیدنا امام حسین رضی اللہ عنہ کا عقیقہ کروایا تھا ۔
یہ روایت امام ابویعلیٰ نے نقل کی ہے اور اس کے رجال ثقہ ہیں ۔

سیدنا انس رضی اللہ عنہ بیان کرتے ہیں : نبی اکرم صلی اللہ علیہ وسلم نے سیدنا امام حسن رضی اللہ عنہ اور سیدنا امام حسین رضی اللہ عنہ ( دونوں میں سے ہر ایک ) کے عقیقہ میں دو دنبے ذبح کروائے تھے ۔
یہ روایت امام ابویعلیٰ اور امام بزار نے اختصار کے ساتھ نقل کی ہے اور اس کے رجال ثقہ ہیں ۔

سیدہ عائشہ صدیقہ رضی اللہ عنہا بیان کرتی ہیں لڑکے کے عقیقے میں دو برابر کی بکریاں اور لڑکی کے عقیقے میں ایک بکری ذبح کی جائے گی ۔ سیدہ عائشہ رضی اللہ عنہا فرماتی ہیں نبی اکرم صلی اللہ علیہ وسلم نے سیدنا حسن رضی اللہ عنہ اور سیدنا حسین رضی اللہ عنہ کے عقیقے میں ( ان کے پیدائش کے ) ساتویں دن دو ، دو بکریاں قربان کروائی تھیں آپ نے یہ حکم دیا تھا ان کے سر سے بالوں کو صاف کر دیا گیا تھا آپ نے فرمایا : اس کے نام پر ذبح کرو اور یہ کہو : اللہ تعالیٰ کے نام سے برکت حاصل کرتے ہوئے اللہ تعالیٰ سب سے بڑا ہے : اے اللہ ! یہ تیری طرف سے ( ملا ) ہے اور تیرے لئے ہے اور یہ فلاں کا عقیقہ ہے ۔ راوی بیان کرتے ہیں : زمانہ جاہلیت میں لوگ روئی کا ٹکڑا لے کر اسے عقیقہ ( کے جانور ) کے خون میں ڈال کر پھر بچے کے سر پر رکھ دیتے تھے نبی اکرم صلی اللہ علیہ وسلم نے حکم دیا خون کی جگہ خلوق ( نام کی خوشبو لگا دی جائے ۔
یہ روایت امام ابویعلیٰ نے نقل کی ہے امام بزار نے اختصار کے ساتھ نقل کی ہے اس کے رجال صحیح کے رجال ہیں ، صرف امام ابویعلیٰ کے استاد اسحاق کا معاملہ مختلف ہے میں ان سے واقف نہیں ہوں ۔

سیدنا ابوہریرہ رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” یہودی ، لڑکے کے عقیقے میں ایک دنبہ قربان کرتے ہیں اور لڑکی کے عقیقے میں کچھ بھی قربان نہیں کرتے ہیں ۔ ( یہاں ایک لفظ کے بارے راوی کو ہے یا یہ شک راوی کو ہے یا اس کے والد کو ہے ، نبی اکرم صلی اللہ علیہ وسلم نے فرمایا : ) تم تو لوگ لڑکے کی طرف سے دو دنبے ذبح کرو اور لڑکی کی طرف سے ایک دنبہ ذبح کرو “ ۔
یہ روایت امام بزار نے ابوحفص شاعر کی اپنے والد سے نقل کردہ روایت کے طور پر نقل کی ہے اور میں نے کسی کو ان دونوں کے حالات بیان کرتے ہوئے نہیں پایا ہے ۔

سیدنا ابوہریرہ رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” بچے کا عقیقہ ہو گا تم اس کی طرف سے خون بہاؤ اور اس سے گندگی ( یعنی بالوں کو ) دور کر دو “ ۔
یہ روایت امام بزار نے نقل کی ہے اور اس کے رجال صحیح کے رجال ہیں ۔

سیدنا عبداللہ بن عباس رضی اللہ عنہما نبی اکرم صلی اللہ علیہ وسلم کا یہ فرمان نقل کرتے ہیں : ” لڑکے کے دو عقیقے ہوں گے ( یعنی اس کے عقیقے میں دو جانور قربان کیے جائیں گے ) اور لڑکی کا ایک عقیقہ ہو گا “ ۔
یہ روایت امام بزار نے اور امام طبرانی نے معجم کبیر میں نقل کی ہے اس کی سند میں ایک راوی عمران بن عیینہ ہے ، جسے یحیی بن معین اور ابن حبان نے ثقہ قرار دیا ہے اور اس میں ضعف پایا جاتا ہے ۔

سیدنا عبداللہ بن عمر رضی اللہ عنہما نبی اکرم صلی اللہ علیہ وسلم کا یہ فرمان نقل کرتے ہیں : ” جب بچے کی پیدائش کا ساتواں دن ہو ، تو اس کی طرف سے جانور قربان کرو اور اس سے تکلیف دہ چیز ( یعنی سر کے بالوں ) کو دور کر دو اور اس کا نام تجویز کرو “ ۔
یہ روایت امام طبرانی نے معجم اوسط اور معجم کبیر میں نقل کی ہے اور اس کے رجال ثقہ ہیں ۔

سیدنا بریده رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” ہر نیا پیدا ہونے والا بچہ ، اپنے عقیقہ کے عوض میں رہن رکھا گیا ہوتا ہے “ ۔
یہ روایت امام طبرانی نے معجم صغیر میں نقل کی ہے اس کی سند میں ایک راوی صالح بن حیان ہے اور وہ ضعیف ہے ۔

سیدنا انس رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” جس شخص کا بیٹا پیدا ہو وہ اس کے عقیقے میں اونٹ یا گائے یا بکری قربان کرے “ ۔
یہ روایت امام طبرانی نے معجم صغیر میں نقل کی ہے اس کی سند میں ایک راوی مسعدہ بن یسع ہے اور وہ کذاب ہے ۔

یزید بن عبداللہ مزنی اپنے والد کے حوالے سے نبی اکرم صلی اللہ علیہ وسلم کا یہ فرمان نقل کرتے ہیں : ” اونٹ میں فرع ہو گا بکری میں فرع ہو گا لڑکے کی طرف سے عقیقہ کیا جائے گا ، البتہ اس پر خون نہیں لگایا جائے گا “ ۔
یہ روایت امام طبرانی نے معجم کبیر اور معجم اوسط میں اس کی مانند نقل کی ہے اور اس کے رجال ثقہ ہیں ۔
یہ روایت امام ابن ماجہ نے یزید بن عبداللہ مزنی کے حوالے سے نقل کی ہے ۔ انہوں نے یہ نہیں کہا: ان کے والد سے منقول ہے جبکہ یہاں یہ ذکر ہوا ہے کہ عبداللہ کے حوالے سے ان کے والد سے مذکور ہے باقی اللہ بہتر جانتا ہے ۔

سیدنا انس رضی اللہ عنہ بیان کرتے ہیں : نبی اکرم صلی اللہ علیہ وسلم نے سیدنا حسن رضی اللہ عنہ اور سیدنا حسین رضی اللہ عنہ کے عقیقے میں دو دو دنبے ( قربان کیے تھے ) ۔
یہ روایت امام طبرانی نے معجم اوسط میں نقل کی ہے اور اس کے رجال صحیح کے رجال ہیں ۔

سیدنا علی رضی اللہ عنہ بیان کرتے ہیں : نبی اکرم صلی اللہ علیہ وسلم نے حسن اور حسین کا عقیقہ کروایا تھا ۔
یہ روایت امام طبرانی نے معجم کبیر میں نقل کی ہے اور اس کی سند میں ایک راوی ایسا ہے ، جس کا نام بیان نہیں کیا گیا ہے ۔

سیدنا بریدہ رضی اللہ عنہ بیان کرتے ہیں : نبی اکرم صلی اللہ علیہ وسلم نے سیدنا حسن رضی اللہ عنہ اور سیدنا حسین رضی اللہ عنہ کا عقیقہ کروایا تھا ۔
یہ روایت امام طبرانی نے معجم کبیر میں نقل کی ہے اور اس کے رجال صحیح کے رجال ہیں ۔

سیدنا جابر رضی اللہ عنہ بیان کرتے ہیں : نبی اکرم صلی اللہ علیہ وسلم نے سیدنا حسن رضی اللہ عنہ اور سیدنا حسین رضی اللہ عنہ کا عقیقہ کروایا تھا اور ساتویں دن ان کے عقیقے کروائے تھے ۔
یہ روایت امام طبرانی نے معجم صغیر اور معجم کبیر میں اختصار کے ساتھ نقل کی ہے ، جس میں صرف ختنہ کرنے کا ذکر ہے اس کی سند میں ایک راوی محمد بن ابوسری ہے ، جسے ابن حبان اور دیگر حضرات نے ثقہ قرار دیا ہے اور اس میں کمزوری پائی جاتی ہے ۔

قتادہ بیان کرتے ہیں : سیدنا انس رضی اللہ عنہ نے اپنے بیٹوں کا ، اونٹ قربان کر کے ، عقیقہ کیا تھا ۔
یہ روایت امام طبرانی نے معجم کبیر میں نقل کی ہے اور اس کے رجال صحیح کے رجال ہیں ۔