مجمع الزوائد ومنبع الفوائد

سیدنا معاذ بن جبل رضی اللہ عنہ بیان کرتے ہیں : نبی اکرم صلی اللہ علیہ وسلم اپنے اصحاب میں سے ایک صاحب کی شادی میں شریک ہوئے تو آپ نے دعا دی : بھلائی برکت الفت ہو خوش نصیبی آئے رزق میں گنجائش نصیب ہو اللہ تعالیٰ تم لوگوں کو برکت نصیب کرے ! ( پھر آپ نے فرمایا : ) تم لوگ اس کے سرہانے دف بجاؤ پھر ایک دف لائی گئی اور اس کے سرہانے بجائی گئی اسی دوران تھال آئے جس میں پھل اور مٹھائی موجود تھے وہ آپ کے سامنے رکھے گئے لوگوں نے اپنے ہاتھ ان کی طرف بڑھائے تو نبی اکرم صلی اللہ علیہ وسلم نے فرمایا : کیا وجہ تم لوٹتے کیوں نہیں ہو ؟ لوگوں نے عرض کی : کیا آپ نے لوٹنے سے منع نہیں کیا ہے ؟ نبی اکرم صلی اللہ علیہ وسلم نے ارشاد فرمایا : میں نے تمہیں لشکروں میں لوٹنے سے منع فرمایا ہے جہاں تک شادی کا تعلق ہے ، تو وہ ( ممنوع ) نہیں ہے ، تو نبی اکرم صلی اللہ علیہ وسلم نے لوگوں کے ساتھ اور لوگوں نے نبی اکرم صلی اللہ علیہ وسلم کے ساتھ چھینا جھپٹی شروع کر دی ۔
یہ روایت امام طبرانی نے معجم کبیر میں نقل کی ہے اس کی سند میں یہ بات مذکور ہے بنو ہاشم کے غلام حازم نے اسے لمازہ سے نقل کیا ہے وہ ابن زبار نہیں ہے یہ بعد کے زمانے کا ہے میں نے کسی کو ان دونوں کے حالات بیان کرتے ہوئے نہیں پایا ہے اس روایت کے بقیہ رجال ثقہ ہیں ۔
یہ روایت امام طبرانی نے معجم اوسط میں اس سے زیادہ مکمل طور پر ایسی سند کے ساتھ نقل کی ہے ، جس میں ایک راوی بشر بن ابراہیم ہے اور وہ حدیث ایجاد کرنے والا شخص ہے اور وہ سند اس سند کے علاوہ ہے ۔

سیدنا ابومسعود رضی اللہ عنہ کے بارے میں یہ بات منقول ہے وہ شادی کے موقع پر لوٹنے سے منع کرتے تھے ۔
یہ روایت امام طبرانی نے معجم کبیر میں نقل کی ہے اس کی سند میں ایک راوی اسحاق بن عبداللہ بن حمران ہے میں نے کسی کو اس کے حالات بیان کرتے ہوئے نہیں پایا ہے اس روایت کے بقیہ رجال ثقہ ہیں ۔