مجمع الزوائد ومنبع الفوائد

سیدنا عبدالرحمن بن حسنہ رضی اللہ عنہ بیان کرتے ہیں : ہم نبی اکرم صلی اللہ علیہ وسلم کے ساتھ سفر کر رہے تھے راوی بیان کرتے ہیں : ہم نے ایک ایسی جگہ پر پڑاؤ کیا جہاں گوہ بہت زیادہ تھیں راوی کہتے ہیں : ہم نے انہیں پکڑا اور انہیں ذبح کر لیا راوی کہتے ہیں : ابھی وہ ہنڈیاؤں میں پکائی جا رہی تھیں کہ اس دوران نبی اکرم صلی اللہ علیہ وسلم ہمارے پاس تشریف لائے آپ نے ارشاد فرمایا : بنی اسرائیل کی ایک امت گم ہو گئی تھی مجھے یہ اندیشہ ہے کہ یہ وہی نہ ہوں تو تم ان ہنڈیاؤں کو انڈیل دو ! ( راوی کہتے ہیں : ) تو ہم نے انہیں انڈیل دیا حالانکہ ہم بھوکے تھے ۔
یہ روایت امام أحمد نے اور امام طبرانی نے معجم کبیر میں امام ابویعلیٰ اور امام بزار نے نقل کی ہے ان تمام روایات کے رجال صحیح کے رجال ہیں ۔

سیدنا عبدالرحمن بن غنم رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” بنی اسرائیل کا ایک گروہ ہلاکت کا شکار ہو گیا یہ پتہ نہیں چلا کہ وہ کہاں ہلاکت کا شکار ہوا ؟ مجھے یہ اندیشہ ہے کہ وہ یہی گوہ ہوں گی “ ۔
یہ روایت امام أحمد نے نقل کی ہے ۔ انہوں نے عبدالرحمن بن غنم کے حوالے سے حالات میں یہ بات ذکر کی ہے کہ یہ روایت ” مرسل “ ہے اور سند کے اعتبار سے حسن ہے جبکہ امام أحمد کی رائے کے مطابق یہ روایت متصل ہے ۔

سیدنا سمرہ بن جندب رضی اللہ عنہ بیان کرتے ہیں : ایک دیہاتی شخص جس کا تعلق بنو فزارہ سے تھا وہ نبی اکرم صلی اللہ علیہ وسلم کے پاس آیا نبی اکرم صلی اللہ علیہ وسلم اس وقت خطبہ دے رہے تھے اس نے نبی اکرم صلی اللہ علیہ وسلم کے خطبے کے درمیان میں بات کاٹتے ہوئے عرض کی : یا رسول اللہ ! گوہ کے بارے میں آپ کیا کہتے ہیں ؟ آپ نے ارشاد فرمایا : بنی اسرئیل کے ایک گروہ کو مسخ کر دیا گیا تھا مجھے نہیں معلوم کہ کون سے جانور کی شکل میں انہیں مسخ کیا گیا ۔
یہ روایت امام أحمد نے حسین بن قبیصہ کے حوالے سے ایک شخص کے حوالے سے سیدنا سمرہ ر ضی اللہ عنہ سے نقل کی ہے ۔ انہوں نے اسے مختلف طرق کے ساتھ حصین نامی راوی کے حوالے سے سیدنا سمرہ رضی اللہ عنہ سے نقل کیا ہے امام بزار نے اور امام طبرانی نے معجم کبیر میں اسے اسی طرح نقل کیا ہے اور اس کے رجال ثقہ ہیں ۔

سیدہ عائشہ صدیقہ رضی اللہ عنہا بیان کرتی ہیں نبی اکرم صلی اللہ علیہ وسلم کی خدمت میں گوہ تحفے کے طور پر پیش کی گئی تو آپ نے اسے نہیں کھایا سیدہ عائشہ رضی اللہ عنہا بیان کرتی ہیں میں نے آپ کی خدمت میں عرض کی : یا رسول اللہ ! کیا ہم اسے غریبوں کو نہ کھلا دیں ؟ نبی اکرم صلی اللہ علیہ وسلم نے ارشاد فرمایا : تم انہیں وہ چیز نہ کھلاو جو تم خود نہیں کھاتے ہو ۔
یہ روایت امام أحمد اور امام ابویعلیٰ نے نقل کی ہے اور ان دونوں کے رجال صحیح کے رجال ہیں ۔

سیدنا حذیفہ رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” گوہ ایک امت تھی جو مسخ ہو کر زمین کے جانوروں کی شکل میں تبدیل ہو گئی “ ۔
یہ روایت امام بزار نے نقل کی ہے امام أحمد نے اس کی مانند نقل کی ہے اس روایت کی بنیاد ثابت بن ودیعہ کی نقل کردہ روایت پر ہے اور اس کے رجال صحیح کے رجال ہیں ۔

سیدنا سمرہ رضی اللہ عنہ بیان کرتے ہیں : ایک شخص نے نبی اکرم صلی اللہ علیہ وسلم سے سوال کیا کہ گوہ کے بارے میں آپ کی کیا رائے ہے ؟ تو آپ نے ارشاد فرمایا : ایک امت مسخ ہو گئی تھی باقی اللہ بہتر جانتا ہے ۔ راوی بیان کرتے ہیں : عیینہ بن بدر اندر آیا اس نے ایک پچھنے والے کو دیکھا کہ وہ نبی اکرم صلی اللہ علیہ وسلم کو سینگ کے ذریعے پچھنے لگا رہا تھا اس نے دریافت کیا : کیا آپ اسے اپنے گوشت کے ساتھ ایسا کرنے دے رہے ہیں ؟ نبی اکرم صلی اللہ علیہ وسلم نے ارشاد فرمایا : پچھنے لگوانا ان سب میں بہتر ہے ، جن طریقوں سے تم علاج کرتے ہو ۔
یہ روایت امام بزار نے اور امام طبرانی نے معجم کبیر میں اور معجم اوسط میں نقل کی ہے امام بزار کے رجال ثقہ ہیں ۔

سیدنا سمرہ رضی اللہ عنہ بیان کرتے ہیں : نبی اکرم صلی اللہ علیہ وسلم کے پاس ایک شخص آیا اس نے آپ سے گوہ کے بارے میں حکم دریافت کیا ، تو نبی اکرم صلی اللہ علیہ وسلم نے ارشاد فرمایا میں نہ تو اس کے بارے میں حکم دیتا ہوں اور نہ ہی کسی کو اس سے منع کرتا ہوں لیکن ہم یعنی سیدنا محمد صلی اللہ علیہ وسلم کے گھر والے اسے نہیں کھائیں گے ۔
یہ روایت امام طبرانی نے معجم کبیر میں اور امام بزار نے نقل کی ہے اس کی سند میں ایک راوی محمد بن ابراہیم بن حبیب ہے اور میں اس سے واقف نہیں ہوں ۔

سیدنا عبداللہ بن عمر رضی اللہ عنہما کے بارے میں یہ بات منقول ہے ان سے گوہ کے بارے میں دریافت کیا گیا تو انہوں نے فرمایا : جب سے نبی اکرم صلی اللہ علیہ وسلم نے اس کے بارے میں ایک بات ارشاد فرمائی ہے میرا یہ عالم ہے کہ ہم اس کو کھانے سے باز آ گئے ہیں ۔
یہ روایت امام طبرانی نے معجم کبیر میں نقل کی ہے اور اس کی نقل کردہ سند حسن ہے ۔

سیدنا ابومریم رضی اللہ عنہ بیان کرتے ہیں : نبی اکرم صلی اللہ علیہ وسلم نے گوہ کھانے سے منع کیا ہے ۔
یہ روایت امام طبرانی نے معجم کبیر میں نقل کی ہے اس کی سند میں ایک راوی اسماعیل بن عیاش ہے اور اہل حجاز کے بارے میں وہ ضعیف ہے ۔

سیدنا عبداللہ بن عمر رضی اللہ عنہما بیان کرتے ہیں : نبی اکرم صلی اللہ علیہ وسلم کی موجودگی میں گوہ کھائی گئی ہے ۔ نبی اکرم صلی اللہ علیہ وسلم نے اسے ناپسند کیا تھا اور جس چیز کو نبی اکرم صلی اللہ علیہ وسلم نے ناپسند کیا تھا ہم بھی اسے ناپسند کرتے ہیں ۔
یہ روایت امام طبرانی نے معجم کبیر میں نقل کی ہے اس کی سند میں ایک راوی محمد بن اسحاق ہے اور وہ ثقہ ہے ، لیکن وہ تدلیس کرنے والا ہے ۔

نبی اکرم صلی اللہ علیہ وسلم کی زوجہ محترمہ سیدہ میمونہ رضی اللہ عنہا بیان کرتی ہیں میری بہن ام حفیدہ نے کچھ گوہ تحفے کے طور پر دیں نبی اکرم صلی اللہ علیہ وسلم عشاء کی نماز کے بعد واپس آئے تو آپ کے ساتھ سیدنا خالد رضی اللہ عنہ بھی تھے جو سیدہ میمونہ رضی اللہ عنہا کے بھانجے تھے میں نے نبی اکرم صلی اللہ علیہ وسلم کی خدمت میں گوہ کا گوشت پیش کیا آپ نے اپنا ہاتھ بڑھایا آپ یہ گمان کر رہے تھے کہ شاید یہ مرغی کا گوشت ہے میں نے عرض کی : یا رسول اللہ ! کیا آپ جانتے ہیں کہ یہ کیا ہے ؟ نبی اکرم صلی اللہ علیہ وسلم نے فرمایا : جی نہیں ! پھر آپ نے اپنا ہاتھ روک لیا میں نے عرض کی : یہ گوہ ہے ۔ نبی اکرم صلی اللہ علیہ وسلم نے فرمایا : یہ دیہاتیوں کا کھانا ہے سیدنا خالد رضی اللہ عنہ نے دریافت کیا : کیا یہ حرام ہے ؟ نبی اکرم صلی اللہ علیہ وسلم نے ارشاد فرمایا : جی نہیں ! تو سیدنا خالد رضی اللہ عنہ نے نبی اکرم صلی اللہ علیہ وسلم کے سامنے اس کا گوشت کھایا اور نبی اکرم صلی اللہ علیہ وسلم دیکھ رہے تھے ۔
یہ روایت امام طبرانی نے معجم کبیر میں نقل کی ہے اس کی سند میں ایک راوی محمد بن اسحاق ہے اور وہ ثقہ ہے لیکن تدلیس کرنے والا ہے اس روایت کے بقیہ رجال ثقہ ہیں ۔

سیدہ میمونہ رضی اللہ عنہا بیان کرتی ہیں : انہیں گوہ تحفے کے طور پر دی گئی ان کی قوم کے دو افراد ان کے پاس آئے سیدہ میمونہ رضی اللہ عنہا کے حکم کے تحت اس کا گوشت تیار کیا گیا پھر سیدہ میمونہ رضی اللہ عنہا نے ان دونوں صاحبان کے سامنے وہ گوشت رکھا اسی دوران نبی اکرم صلی اللہ علیہ وسلم تشریف لے آئے یہ دونوں صاحبان کھانا کھا رہے تھے نبی اکرم صلی اللہ علیہ وسلم نے ان دونوں کو خوش آمدید کہا: پھر آپ بھی کھانے میں شریک ہونے لگے جب آپ لقمہ اپنے منہ کی طرف لے کے گئے تو آپ نے دریافت کیا : یہ کیا ہے ؟ سیدہ میمونہ رضی اللہ عنہا نے عرض کی : یہ گوہ ہے ، جو ہمیں تحفے کے طور پر دی گئی ہے سیدہ میمونہ رضی اللہ عنہا بیان کرتی ہیں تو نبی اکرم صلی اللہ علیہ وسلم نے لقمہ رکھ دیا ان دونوں افراد نے یہ ارادہ کیا کہ منہ میں جو چیز موجود ہے وہ بھی نکال دیتے ہیں تو نبی اکرم صلی اللہ علیہ وسلم نے ارشاد فرمایا : تم ایسا نہ کرو تم لوگ اہل نجد اسے کھا لیتے ہو اور ہم لوگ اہل تہامہ اسے نہیں کھاتے ہیں ۔
یہ روایت امام طبرانی نے معجم کبیر میں نقل کی ہے اس کی سند میں ایک راوی یزید بن ابوزیاد ہے اور وہ ان افراد میں سے ایک ہے جن کے ضعیف ہونے کے باوجود ان کی حدیث کو نوٹ کیا جائے گا ۔

امام شعبی بیان کرتے ہیں : میں دو سال ( راوی کو شک ہے شاید یہ الفاظ ہیں : ) ڈیڑھ سال سیدنا عبداللہ بن عمر رضی اللہ عنہما کے ساتھ بیٹھتا رہا ہوں میں نے انہیں کبھی نبی اکرم صلی اللہ علیہ وسلم کے حوالے سے کوئی حدیث بیان کرتے ہوئے نہیں سنا البتہ ایک مرتبہ انہوں نے یہ حدیث بیان کی جو نبی اکرم صلی اللہ علیہ وسلم کی ایک زوجہ محترمہ کے حوالے سے تھی کہ نبی اکرم صلی اللہ علیہ وسلم کے پاس گوہ لائی گئی تو نبی اکرم صلی اللہ علیہ وسلم نے فرمایا : تم لوگ اسے کھا لو اس میں کوئی حرج نہیں ہے لیکن یہ میری قوم کا کھانا نہیں ہے ۔
یہ روایت امام طبرانی نے معجم کبیر میں نقل کی ہے اور اس کے رجال صحیح کے رجال ہیں ۔

سیدنا ابوہریرہ رضی اللہ عنہ بیان کرتے ہیں : نبی اکرم صلی اللہ علیہ وسلم کے پاس سات گوہ لائی گئیں ان کے ساتھ کھجوریں تھیں اور گھی تھا نبی اکرم صلی اللہ علیہ وسلم نے فرمایا : تم اسے کھا لو میں اس سے بچ کے رہتا ہوں ۔
یہ روایت امام أحمد نے نقل کی ہے اس کی سند میں ایک راوی ابومھزم ہے اور وہ ضعیف ہے امام أحمد کہتے ہیں یہ کتنا مقارب الحدیث ہے ۔

ابواسحاق بیان کرتے ہیں : میں عبدالرحمن بن عبداللہ کے پاس بیٹھا ہوا تھا ایک شخص ان کے پاس آیا اور ان سے ان کے صاحبزادے قاسم کے بارے میں دریافت کیا ، تو انہوں نے بتایا وہ کل کناسہ گیا تھا تاکہ گوہ لے کے آئے اس شخص نے کہا: کیا آپ اسے کھا لیتے ہیں ؟ تو عبدالرحمن نے کہا: اسے حرام کس نے قرار دیا ہے ؟ میں نے سیدنا عبداللہ بن مسعود رضی اللہ عنہ کو یہ فرماتے ہوئے سنا ہے : حلال چیز کو حرام قرار دینے والا حرام چیز کو حلال قرار دینے والے کی مانند ہے ۔
یہ روایت امام طبرانی نے معجم کبیر میں نقل کی ہے اور اس کے رجال صحیح کے رجال ہیں ۔