مجمع الزوائد ومنبع الفوائد

سیدنا ابوزہیر نمیری رضی اللہ عنہ بیان کرتے ہیں : نبی اکرم صلی اللہ علیہ وسلم نے ارشاد فرمایا : ” تم ٹڈی دل کو قتل نہ کرو کیونکہ یہ اللہ تعالیٰ کا بڑا لشکر ہے “ ۔
یہ روایت امام طبرانی نے معجم کبیر اور معجم اوسط میں نقل کی ہے اس کی سند میں ایک راوی محمد بن اسماعیل بن عیاش ہے اور وہ ضعیف ہے ۔

سیدنا جابر بن عبداللہ رضی اللہ عنہ بیان کرتے ہیں : ہم نے نبی اکرم صلی اللہ علیہ وسلم کے ساتھ ایک جنگ میں حصہ لیا ہمیں ٹڈی دل ملا تو ہم نے اسے کھا لیا ۔
یہ روایت امام أحمد نے نقل کی ہے اس کی سند میں ایک راوی جابر جعفی ہے ، جسے جمہور نے ضعیف قرار دیا ہے ۔

سیدنا ابوامامہ رضی اللہ عنہ نبی اکرم صلی اللہ علیہ وسلم کے حوالے سے یہ بات نقل کرتے ہیں : سیدہ مریم نے اپنے پروردگار سے ایسا گوشت مانگا جس میں خون نہ ہو ، تو پروردگار نے انہیں ٹڈی دل کھانے کے لئے دیا سیدہ مریم رضی اللہ عنہا نے کہا: اے اللہ ! اسے رضاعت کے بغیر زندہ رکھنا اور صحبت کے بغیر ان کی نسل کا سلسلہ جاری رکھنا ۔
یہ روایت امام طبرانی نے معجم کبیر میں نقل کی ہے اس کی سند میں ایک راوی بقیہ ہے وہ ثقہ ہے لیکن وہ تدلیس کرنے والا ہے اور ایک راوی یزید عینی ہے میں اس سے واقف نہیں ہوں اس روایت کے بقیہ رجال ثقہ ہیں ۔

علی بن عبداللہ بارقی بیان کرتے ہیں : مکہ میں ایک خاتون نے مجھ سے مسئلہ دریافت کیا ، تو میں نے کہا: یہ سیدنا عبداللہ بن عمر رضی اللہ عنہما موجود ہیں تم ان کے پاس جاؤ اور ان سے مسئلہ دریافت کرو وہ ان کی طرف چلی گئی میں اس خاتون کے پیچھے گیا تاکہ میں سنوں وہ کیا کہتی ہے ؟ اس خاتون نے کہا: اے سیدنا عبداللہ رضی اللہ عنہ ! آپ مجھے ٹڈی دل کے بارے میں حکم بیان کیجے تو سیدنا عبداللہ بن عمرو رضی اللہ عنہ نے فرمایا : مکمل طور پر ذبح شدہ ہوتا ہے ۔
یہ روایت امام طبرانی نے معجم کبیر میں نقل کی ہے اور اس کے رجال صحیح کے رجال ہیں ۔