مجمع الزوائد ومنبع الفوائد

سیدنا عبداللہ بن مسعود رضی اللہ عنہ فرماتے ہیں : اگر مجھے جنابت لاحق ہو جائے اور ایک ماہ تک پانی نہ ملے ، تو میں نماز ادا نہیں کروں گا ۔
یہ روایت امام طبرانی نے معجم کبیر میں نقل کی ہے ، ابوعبیدہ نے سیدنا عبداللہ بن مسعود رضی اللہ عنہ سے سماع نہیں کیا ہے ، ابن سفیان کہتے ہیں : اس کے مطابق فتوی نہیں دیا جائے گا ۔

علقمہ بیان کرتے ہیں : ایک شخص کو جدری ( جلد خراب ہونے ) کی بیماری تھی ، سیدنا عبداللہ بن مسعود رضی اللہ عنہ کے حکم کے تحت طشت یا برتن میں مٹی اس کے بعد لائی جاتی اور وہ مٹی کے ذریعے مسح کر لیتا تھا ۔
اس روایت کی سند میں ایک راوی ابان بن ابوعیاش ہے اور وہ ضعیف ہے ۔

سیدنا علی بن ابوطالب رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا ہے : ” مجھے وہ چیز عطا کی گئی ہے ، جو انبیاء میں سے کسی کو نہیں دی گئی ، میں نے عرض کی : یا رسول اللہ ! وہ کیا ہے ؟ آپ نے فرمایا : رعب کے ذریعے میری مدد کی گئی ہے ، زمین کی کنجیاں مجھے عطا کی گئی ہیں ، میرا نام أحمد رکھا گیا ، میرے لیے مٹی کو طہارت کے حصول کا ذریعہ بنایا گیا اور میری امت کو سب سے بہتر امت قرار دیا گیا “ ۔
یہ روایت امام أحمد نے نقل کی ہے ، اس کی سند میں ایک راوی عبداللہ بن محمد بن عقیل ہے اور وہ خراب حافظے کا مالک ہے ، امام ترمذی فرماتے ہیں : یہ صدوق ہے ، بعض اہل علم نے اس کے حافظے کے حوالے سے ، اس کے بارے میں کلام کیا ہے ، میں نے محمد بن اسماعیل ، یعنی امام بخاری رحمہ اللہ کو یہ فرماتے ہوئے سنا ہے : أحمد بن حنبل ، اسحاق بن ابراہیم ، اور حمیدی نے ابن عقیل کی نقل کردہ حدیث سے استدلال کیا ہے ۔ علامہ ہیثمی فرماتے ہیں : ) میں یہ کہتا ہوں : تو یہ حدیث حسن ہو گی ، باقی اللہ بہتر جانتا ہے ۔

سیدنا ابوہریرہ رضی اللہ عنہ بیان کرتے ہیں : ایک دیہاتی نبی اکرم صلی اللہ علیہ وسلم کی خدمت میں حاضر ہوا ، اُس نے عرض کی : یا رسول اللہ ! میں چار ، یا پانچ ماہ تک ریگستان میں رہتا ہوں ، ہمارے درمیان نفاس والی عورتیں ، حیض والی عورتیں ، اور جنبی لوگ ہوتے ہیں ، تو اس بارے میں آپ کی کیا رائے ہے ؟ نبی اکرم صلی اللہ علیہ وسلم نے ارشاد فرمایا : تم پر مٹی استعمال کرنا لازم ہے ۔
یہ روایت امام أحمد اور امام ابویعلیٰ نے نقل کی ہے ، انہوں نے اس میں یہ الفاظ نقل کئے ہیں : تم پر زمین لازم ہے ۔
یہ روایت امام طبرانی نے معجم اوسط میں نقل کی ہے ، اس کی سند میں ایک راوی مثنی بن صباح ہے ، اکثر حضرات نے اسے ” ضعیف“ قرار دیا ہے ، عیاش نے یحیی بن معین کے حوالے سے اس کی توثیق نقل کی ہے ، معاویہ بن صالح نے یحیی بن معین کے حوالے سے
یہ روایت نقل کی ہے : یہ ضعیف ہے ، لیکن اس کی حدیث کو نوٹ کیا جائے گا ، اسے ترک نہیں کیا جائے گا ۔

سیدنا ابوہریرہ رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا ہے : ” مٹی مسلمان کے وضو کا ذریعہ ہے ، خواہ اُسے کئی سال تک پانی نہ ملے ، جب اُسے پانی مل جائے ، تو وہ اللہ تعالیٰ سے ڈرے اور اس کو اپنے جسم پر استعمال کر لے ، یہ زیادہ بہتر ہو گا “ ۔
یہ روایت امام بزار نے نقل کی ہے ، وہ فرماتے ہیں : اس روایت کے بارے میں ہمارے علم کے مطابق ،
یہ روایت سیدنا ابوہریرہ رضی اللہ عنہ کے حوالے سے ، صرف اسی سند کے ساتھ منقول ہے ۔ علامہ ہیثمی فرماتے ہیں میں یہ کہتا ہوں : اس کے رجال ” صحیح “ کے رجال ہیں ۔

سیدنا عبداللہ بن عمر رضی اللہ عنہما روایت کرتے ہیں : نبی اکرم صلی اللہ علیہ وسلم نے ارشاد فرمایا : ” مجھے پانچ چیزیں عطا کی گئی ہیں ، جو مجھ سے پہلے کسی نبی کو نہیں دی گئی ہیں ، مجھے تمام بنی نوع انسان ہر سرخ فام ( یعنی سفید فام ) اور سیاہ فام کی طرف مبعوث کیا گیا ، اور رعب کے ذریعے میری مدد کی گئی ، ایک ماہ کی مسافت سے ، میرا دشمن مجھ سے مرعوب ہو جاتا ہے ، میرے لیے مال غنیمت کو حلال قرار دیا گیا ، میرے لیے تمام روئے زمین کو نماز کی جگہ اور طہارت کے حصول کا ذریعہ قرار دیا گیا ، مجھے شفاعت عطا کی گئی ، تو میں نے قیامت کے دن اپنی امت کے لئے اُسے مؤخر کر دیا ( یعنی سنبھال کر رکھ لیا ) ۔
یہ روایت امام بزار اور امام طبرانی نے نقل کی ہے ، انہوں نے یہ الفاظ زائد نقل کیے ہیں : ” ہر نبی کو اُس کی بستی کی طرف مبعوث کیا گیا “ ۔ ۔ ۔ ۔ ۔ ۔ ۔ اس روایت کی سند میں ایک راوی ابراہیم بن اسماعیل بن یحیی بن کہیل ہے اور وہ ضعیف ہے ، ابن حبان نے اس کا تذکرہ کتاب ” الثقات “ میں کیا ہے ، وہ فرماتے ہیں : اس نے اپنے باپ سے جو روایات نقل کی ہیں ، ان میں کچھ منکر ہیں ۔

سیدنا ابوہریرہ رضی اللہ عنہ بیان کرتے ہیں : سیدنا ابوذر غفاری رضی اللہ عنہ مدینہ منورہ میں اپنی بکریوں میں تھے ، جب وہ آئے ، تو نبی اکرم صلی اللہ علیہ وسلم نے ان سے فرمایا : اے ابوذر ! وہ خاموش رہے ، نبی اکرم صلی اللہ علیہ وسلم نے دوبارہ بلایا ، تو وہ خاموش رہے ، نبی اکرم صلی اللہ علیہ وسلم نے فرمایا : اے ابوذر ! تمہاری ماں تمہیں روئے ، انہوں نے عرض کی : میں جنبی ہوں ، تو نبی اکرم صلی اللہ علیہ وسلم نے کنیز کو ان کے لیے پانی لانے کا حکم دیا ، وہ پانی لے کر آئی ، سیدنا ابوذر غفاری رضی اللہ عنہ نے اپنی سواری کی اوٹ میں غسل کیا ، پھر وہ نبی اکرم صلی اللہ علیہ وسلم کی خدمت میں حاضر ہوئے ، تو نبی اکرم صلی اللہ علیہ وسلم نے اُن سے فرمایا : مٹی تمہارے لیے کفایت کر جائے گی ، خواہ تمہیں بیس سال تک پانی نہ ملے اور جب تمہیں پانی مل جائے ، تو اسے اپنی جلد سے مس کر لینا ( یعنی اس کے ساتھ غسل کر لینا ) ۔
یہ روایت امام طبرانی نے معجم اوسط میں نقل کی ہے اور اس کے رجال ” صحیح “ کے رجال ہیں ۔

سیدنا اسلع بن شریک رضی اللہ عنہ بیان کرتے ہیں : میں نبی اکرم صلی اللہ علیہ وسلم کی اونٹنی پر رکھنے کے لیے پالان تیار کیا کرتا تھا ، ایک سرد رات میں مجھے جنابت لاحق ہو گئی ، نبی اکرم صلی اللہ علیہ وسلم نے روانگی کا ارادہ کیا ، تو مجھے یہ اچھا نہیں لگا کہ میں آپ کی اونٹنی کا پالان تیار کروں ، جبکہ میں جنابت کی حالت میں ہوؤں ، مجھے یہ بھی اندیشہ ہوا ، کہ اگر میں ٹھنڈے پانی کے ساتھ غسل کر لیتا ہوں ، تو میں مر جاؤں گا ، یا بیمار ہو جاؤں گا ، میں نے انصار سے تعلق رکھنے والے ، ایک شخص کو یہ ہدایت کی ، تو اُس نے نبی اکرم صلی اللہ علیہ وسلم کے لیے پالان تیار کر دیا ، میں نے پتھر رکھے ، اُن کے ذریعے پانی گرم کیا ، غسل کیا اور پھر نبی اکرم صلی اللہ علیہ وسلم اور آپ کے اصحاب کے ساتھ آ کر مل گیا ، نبی اکرم صلی اللہ علیہ وسلم نے ارشاد فرمایا : اے اسلع کیا وجہ ہے ؟ مجھے تمہارا تیار کیا ہوا پالان کچھ مختلف لگ رہا ہے ؟ میں نے عرض کی : یا رسول اللہ ! میں نے اسے تیار نہیں کیا ہے ، انصار سے تعلق رکھنے والے ، ایک شخص نے اسے تیار کیا ہے ، نبی اکرم صلی اللہ علیہ وسلم نے دریافت کیا : وہ کیوں ؟ میں نے عرض کی : مجھے جنابت لاحق ہو گئی تھی ، مجھے اپنی ذات کے بارے میں اندیشہ ہوا ، تو میں نے اس شخص کو یہ ہدایت کی کہ وہ پالان تیار کر دے ، پھر میں نے پتھر رکھ کر پانی گرم کیا اور اس کے ذریعہ غسل کیا ۔ راوی بیان کرتے ہیں : تو اللہ تعالیٰ نے یہ آیت نازل کر دی : ” اے ایمان والو ! جب تم نشے کی حالت میں ہو ، تو نماز کے قریب نہ جاؤ ! “ ۔ ۔ ۔ ۔ ۔ ۔ ۔ یہ آیت یہاں تک ہے : ” بے شک اللہ تعالیٰ معاف کرنے والا اور مغفرت کرنے والا ہے “
یہ روایت امام طبرانی نے معجم کبیر میں نقل کی ہے ، اس کی سند میں ایک راوی ہیثم بن ذریق ہے ، بعض حضرات نے یہ کہا: ہے : اس کی نقل کردہ حدیث کی متابعت نہیں کی جاتی ہے ۔

سیدنا اسلع بن کعب رضی اللہ عنہ ، جن کا تعلق بنو اعرج سے ہے ، وہ بیان کرتے ہیں : میں نبی اکرم صلی اللہ علیہ وسلم کی خدمت کیا کرتا تھا ، آپ نے مجھ سے ارشاد فرمایا : اسے اسلع ! تم اُٹھ کر مجھے دکھاؤ کہ فلاں ، فلاں چیز کیسی ہے ؟ میں نے عرض کی : یا رسول اللہ ! مجھے جنابت لاحق ہو گئی ہے ، تو نبی اکرم صلی اللہ علیہ وسلم کچھ دیر خاموش رہے ، پھر سیدنا جبرائیل علیہ السلام آپ کے پاس مٹی کے ذریعے تیمم کرنے کا حکم لے کر نازل ہوئے ، تو آپ نے فرمایا : اے اسلع ! تم اٹھو اور تیمم کر لو ! راوی بیان کرتے ہیں : پھر سیدنا اسلع رضی اللہ عنہ نے مجھے کر کے دکھایا کہ نبی اکرم صلی اللہ علیہ وسلم نے انہیں کیسے تیمم کرنے کی تعلیم دی تھی ، وہ بیان کرتے ہیں : نبی اکرم صلی اللہ علیہ وسلم نے اپنی ہتھیلیاں زمین پر ماریں ، پھر انہیں ایک دوسرے کے ذریعے جھاڑا ، پھر ان پر پھونک ماری اور پھر ان کے ذریعے اپنی کلائیوں کے اوپری اور نیچے والے حصے کا مسح کیا ۔
یہ روایت امام طبرانی نے معجم کبیر میں نقل کی ہے ، اس کی سند میں ایک راوی ربیع بن بدر ہے ، اس کے ضعیف ہونے پر محدثین کا اتفاق ہے ۔

سیدنا اسلع رضی اللہ عنہ بیان کرتے ہیں : میں نبی اکرم صلی اللہ علیہ وسلم کی خدمت کیا کرتا تھا ، اور آپ کے لیے پالان تیار کرتا تھا ، ایک رات آپ نے مجھ سے فرمایا : اے اسلع ! اٹھو اور پالان تیار کر دو ! میں نے عرض کی : یا رسول اللہ ! مجھے جنابت لاحق ہو گئی ہے ، راوی بیان کرتے ہیں : نبی اکرم صلی اللہ علیہ وسلم کچھ دیر خاموش رہے ، پھر سیدنا جبرائیل علیہ السلام تیمم کے حکم سے متعلق آیت لے کر آپ صلی اللہ علیہ وسلم کے پاس آئے ، تو نبی اکرم صلی اللہ علیہ وسلم نے ارشاد فرمایا : اے اسلع ! اٹھو اور تیمم کر لو ! راوی بیان کرتے ہیں : میں اُٹھا ، میں نے تیمم کیا ، پھر میں نے آپ صلی اللہ علیہ وسلم کے لیے پلان تیار کیا ، آپ روانہ ہو گئے ، آپ کا گزر پانی کے پاس سے ہوا ، تو آپ صلی اللہ علیہ وسلم نے مجھ سے ارشاد فرمایا : اے اسلع ! اپنی جلد پر یہ لگا لو ! ( یعنی غسل کر لو ) یہاں ایک لفظ کے بارے میں راوی کو شک ہے ۔ راوی بیان کرتے ہیں : میرے والد نے مجھے تیمم کر کے دکھایا ، جس طرح اُن کے والد نے انہیں کر کے دکھایا تھا ، ایک ضرب چہرے کے لیے ہو گی اور ایک ضرب کہنیوں تک ، دونوں بازؤں کے لیے ہو گی ۔
یہ روایت امام طبرانی نے معجم کبیر میں نقل کی ہے ، اس کی سند میں ایک راوی ربیع بن بدر ہے ، جس کے ضعیف ہونے پر محدثین کا اتفاق ہے ۔

سیدنا ابوامامہ رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” تیمم میں ایک ضرب چہرے کے لیے ہو گی ، اور ایک ضرب کہنیوں تک ، دونوں بازؤں کے لیے ہو گی “ ۔
یہ روایت امام طبرانی نے معجم کبیر میں نقل کی ہے ، اس کی سند میں ایک راوی جعفر بن زبیر ہے ، شعبہ نے اُس کے بارے میں یہ کہا: ہے : اس نے چار سو احادیث ایجاد کی ہیں ۔

سیدنا معاذ بن جبل رضی اللہ عنہ بیان کرتے ہیں : میں نے نبی اکرم صلی اللہ علیہ وسلم کو مٹی کے ذریعے تیمم کرتے ہوئے دیکھا ہے ، لیکن میں نے آپ کو دونوں بازؤں اور چہرے پر مسح کرتے ہوئے صرف ایک مرتبہ دیکھا ہے ۔
یہ روایت امام طبرانی نے معجم کبیر میں نقل کی ہے ، اس کی سند میں ایک راوی محمد بن سعید مصلوب ہے ، اس کے بارے میں یہ کہا: گیا ہے : یہ کذاب ہے اور حدیث ایجاد کرتا ہے ۔

سیدنا عبداللہ بن عمر رضی اللہ عنہما روایت کرتے ہیں : نبی اکرم صلی اللہ علیہ وسلم نے ارشاد فرمایا ہے : ” تیمم میں دو ضربیں ہوں گی ، ایک ضرب چہرے کے لیے ہو گی اور ایک ضرب کہنیوں تک ، دونوں بازؤں کے لیے ہو گی “ ۔
یہ روایت امام طبرانی نے معجم کبیر میں نقل کی ہے اس کی سند میں ایک راوی علی بن ظبیان ہے ، جسے یحیی بن معین نے ” ضعیف“ قرار دیا ہے اور یہ کہا: ہے : یہ کذاب خبیث ہے ، ایک جماعت نے بھی اسے ” ضعیف“ قرار دیا ہے ، ابوعلی نیشا پوری کہتے ہیں : اس میں کوئی حرج نہیں ہے ۔

سیدنا عبداللہ بن عمر رضی اللہ عنہما کے حوالے سے ہی ، نبی اکرم صلی اللہ علیہ وسلم کے بارے میں یہ بات منقول ہے : مٹی کے ذریعے تیمم کرنے کے بارے میں آپ صلی اللہ علیہ وسلم نے یہ فرمایا ہے : کہ آدمی اپنی ہتھیلیاں زمین پر مارے گا اور پھر ان دونوں کے ذریعے اپنے چہرے پر مسح کر لے گا ، پھر وہ ایک اور ضرب مارے گا اور ان دونوں کے ذریعے کہنیوں تک دونوں بازؤں کا مسح کر لے گا ۔
یہ روایت امام بزار نے نقل کی ہے ، اس کی سند میں ایک راوی سلیمان بن داؤد جزری ہے ، امام ابوزرعہ فرماتے ہیں : یہ متروک ہے ۔

سیدہ عائشہ صدیقہ رضی اللہ عنہا نبی اکرم صلی اللہ علیہ وسلم کے حوالے سے ، تیمم کے بارے میں یہ نقل کرتی ہیں : ” دو ضربیں ہوں گی ، ایک ضرب چہرے کے لیے ہو گی اور ایک ضرب کہنیوں تک ، دونوں بازؤں کے لیے ہو گی “ ۔
یہ روایت امام بزار نے نقل کی ہے ، اس کی سند میں ایک راوی حریش بن خریت ہے ، اسے ابوحاتم ، ابوزرعہ اور امام بخاری رحمہ اللہ نے ” ضعیف “ قرار دیا ہے ۔

سیدنا عبداللہ بن عمر رضی اللہ عنہما بیان کرتے ہیں : نبی اکرم صلی اللہ علیہ وسلم سفر کر رہے تھے ، جب نماز کا وقت ہوا ، تو لوگوں نے پڑاؤ کر لیا ، ایک چرواہے نے ان دونوں کو دیکھا ، تو وہ سواری سے نیچے اتر آیا ، اس نے اپنا ہاتھ زمین پر مار کر تیمم کیا ، اور پھر اذان دیتے ہوئے کہا: «الله اكبر، الله اكبر» ، نبی اکرم صلی اللہ علیہ وسلم نے فرمایا : یہ فطرت پر ہے ، اس نے کہا: «اشهد ان لا اله الا الله» ، نبی اکرم صلی اللہ علیہ وسلم نے فرمایا : یہ جہنم سے نکل گیا ۔
یہ روایت امام ابویعلیٰ نے نقل کی ہے ، اس کی سند میں ایک راوی سعید بن راشد مازنی ہے اور وہ متروک ہے ۔

سیدنا عبداللہ بن عمرو رضی اللہ عنہ بیان کرتے ہیں : ایک شخص نبی اکرم صلی اللہ علیہ وسلم کی خدمت میں حاضر ہوا ، اُس نے عرض کی : یا رسول اللہ ! ایک شخص جو آبادی سے دور ہوتا ہے اور وہ پانی پر قدرت نہیں رکھتا ، کیا وہ اپنی بیوی کے ساتھ صحبت کر سکتا ہے ؟ نبی اکرم صلی اللہ علیہ وسلم نے ارشاد فرمایا : جی ہاں !
یہ روایت امام أحمد نے نقل کی ہے ، اس کی سند میں ایک راوی حجاج بن ارطاۃ ہے ، جس میں ضعف پایا جاتا ہے ، لیکن وہ جان بوجھ کر جھوٹ بیان نہیں کرتا ہے ۔

حکیم بن معاویہ نے ، اپنے چچا کا یہ بیان نقل کیا ہے : میں نے عرض کی : یا رسول اللہ ! میں ایک ، ایک ماہ تک پانی سے دور رہتا ہوں ، میرے ساتھ میری بیوی ہوتی ہے ، کیا میں اس کے ساتھ صحبت کر سکتا ہوں ؟ نبی اکرم صلی اللہ علیہ وسلم نے ارشاد فرمایا : جی ہاں ! میں نے عرض کی : یا رسول اللہ ! اگر میں کئی ماہ تک پانی سے دور رہوں ؟ نبی اکرم صلی اللہ علیہ وسلم نے ارشاد فرمایا : اگر تم تین سال تک دور رہو ( تو بھی یہی حکم ہو گا ) ۔
یہ روایت امام طبرانی نے معجم کبیر میں نقل کی ہے اور اس کی سند حسن ہے ۔