مجمع الزوائد ومنبع الفوائد

سیدنا عبداللہ بن عمر رضی اللہ عنہ روایت کرتے ہیں : نبی اکرم صلی اللہ علیہ وسلم نے موزوں پر مسح کے بارے میں یہ ارشاد فرمایا ہے : ” مقیم کے لئے اس کی مدت ایک دن اور ایک رات ہو گی اور مسافر کے لئے تین دن اور تین راتیں ہو گی “ ۔
یہ روایت قطیعی نے ” مسند أحمد “ پر اپنی ” زیادات “ میں نقل کی ہے ، اسے امام ابویعلیٰ ، امام بزار نے اور امام طبرانی نے معجم کبیر اور معجم اوسط میں نقل کیا ہے ، امام بزار اور امام ابویعلیٰ کے رجال ثقہ ہیں ۔

عطاء بن یسار بیان کرتے ہیں : میں نے نبی اکرم صلی اللہ علیہ وسلم کی زوجہ محترمہ سیدہ میمونہ رضی اللہ عنہا سے موزوں پر مسح کرنے کے بارے میں دریافت کیا : تو انہوں نے فرمایا : میں نے عرض کی : یا رسول اللہ ! کیا انسان ہر وقت موزوں پر مسح کر سکتا ہے ؟ یوں کہ وہ انہیں نہ اتارے ؟ نبی اکرم صلی اللہ علیہ وسلم نے ارشاد فرمایا : جی ہاں !
یہ روایت امام أحمد نے نقل کی ہے ۔

سیدہ میمونہ رضی اللہ عنہا کے حوالے سے ، امام ابویعلیٰ نے یہ روایت نقل کی ہے : انہوں نے عرض کی : یا رسول اللہ ! کیا آدمی موزہ ، ہر گھڑی میں اتار سکتا ہے ؟ نبی اکرم صلی اللہ علیہ وسلم نے ارشاد فرمایا : جی نہیں ! جب تک اُسے مناسب لگے وہ اُن پر مسح کرتا رہے ۔
اس روایت کی سند میں ایک راوی عمر بن اسحاق بن یسار ہے ، امام دارقطنی رحمہ اللہ فرماتے ہیں : وہ قومی نہیں ہے ، ابن حبان نے اس کا تذکرہ کتاب ” الثقات “ میں کیا ہے ۔

سیدنا عبداللہ بن مسعود رضی اللہ عنہ نبی اکرم صلی اللہ علیہ وسلم کے حوالے سے ، موزوں پر مسح کرنے کے بارے میں یہ بات نقل کرتے ہیں : مسافر کے لیے اس کی مدت تین دن ، اور مقیم کے لیے ایک دن اور ایک رات ہے ۔
یہ روایت امام بزار نے نقل کی ہے ، امام طبرانی نے معجم کبیر میں اسے ” موقوف “ روایت کے طور پر نقل کیا ہے ، اس کی سند میں ایک راوی یوسف بن عطیہ کوفی ہے ، جس کی نسبت جھوٹ بولنے کی طرف کی گئی ہے ۔

امام بزار نے ، سیدنا عبداللہ بن مسعود رضی اللہ عنہ کے حوالے سے یہ بات نقل کی ہے : ہم لوگ نبی اکرم صلی اللہ علیہ وسلم کے ساتھ موزوں پر مسح کیا کرتے تھے ، مسافر کے لیے اس کی مدت تین دن اور تین راتیں تھی ، اور مقیم کے لیے ایک دن اور ایک رات تھی ۔ اس روایت کی سند میں ایک راوی سلیمان بن بشیر ہے اور وہ ضعیف ہے ۔

ابوعبیدہ بن عبداللہ بیان کرتے ہیں : سیدنا عبداللہ بن مسعود رضی اللہ عنہ فرماتے ہیں : نبی اکرم صلی اللہ علیہ وسلم ہمیں یہ حکم دیا کرتے تھے ، جب ہم آپ کے ساتھ ہوتے تھے کہ ہم تین دن اور تین راتوں تک موزے نہ اتاریں ، البتہ جنابت کا معاملہ مختلف ہے ، پیشاب کرنے یا سونے ( کی وجہ سے وضو ختم ہونے کی صورت میں ہم انہیں نہ اُتاریں ) ۔
یہ روایت امام طبرانی نے معجم اوسط میں نقل کی ہے ، اس کی سند میں ایک راوی ایوب بن سوید ہے اور وہ ضعیف ہے ، تاہم ابن حبان نے اس کا تذکرہ کتاب ” الثقات “ میں کیا ہے ، وہ کہتے ہیں : یہ خراب حافظے کا مالک ہے اور غلطی کرتا ہے ۔

سیدنا عوف بن مالک رضی اللہ عنہ بیان کرتے ہیں : غزوہ تبوک کے موقع پر ، نبی اکرم صلی اللہ علیہ وسلم نے ہمیں موزوں پر مسح کرنے کے بارے میں یہ حکم دیا تھا کہ مسافر شخص تین دن اور تین راتوں تک ، اور مقیم ایک دن اور ایک رات تک موزوں پر مسح کر سکتا ہے ۔
یہ روایت امام بزار نے ، اور امام طبرانی نے معجم اوسط میں نقل کی ہے اور اس کے رجال ” صحیح “ کے رجال ہیں ۔

سیدنا جریر رضی اللہ عنہ بیان کرتے ہیں : میں نے نبی اکرم صلی اللہ علیہ وسلم سے موزوں پر مسح کے بارے میں سوال کیا ، تو آپ صلی اللہ علیہ وسلم نے ارشاد فرمایا : ( اس کی مخصوص مدت ) مسافر کے لئے تین دن اور مقیم کے لیے ، ایک دن اور ایک رات ہے ۔
یہ روایت امام طبرانی نے معجم اوسط اور معجم کبیر میں نقل کی ہے ، ایوب بن خریم نامی راوی کا ذکر کرتے ہوئے ، میں نے ابن ابوحاتم کے علاوہ اور کسی کو نہیں پایا ، لیکن اُنہوں نے نہ اس پر جرح کی ہے اور نہ توثیق کی ہے ۔

سیدنا مغیرہ بن شعبہ رضی اللہ عنہ بیان کرتے ہیں : میں نبی اکرم صلی اللہ علیہ وسلم کے ساتھ تھا ، آپ قضائے حاجت کے لیے تشریف لے گئے ، آپ نے میری طرف اشارہ کیا ، تو میں آگے ہوا ، میں پانی لے کر آپ کے پاس آیا ، آپ صلی اللہ علیہ وسلم نے شامی جبہ پہنا ہوا تھا ، جس کے بازو نہیں تھے ، آپ نے گردن کی طرف سے اسے اتارا اور ارشاد فرمایا : مجھ پر پانی ڈالو ، میں نے آپ پر پانی انڈیلا ، تو آپ نے وضو کرتے ہوئے ، موزوں پر مسح کیا ، مسافر کے لیے سنت تین دن اور تین راتیں ہے ، جبکہ مقیم کے لیے ایک دن اور ایک رات ہے ۔
یہ روایت امام طبرانی نے معجم اوسط میں نقل کی ہے ” صحیح “ میں اس کا ایک حصہ منقول ہے ، اس کی سند میں ایک راوی داؤد بن یزید اودی ہے محدثین نے اسے ” ضعیف“ قرار دیا ہے ، صرف ابن عدی کا معاملہ مختلف ہے ، وہ یہ کہتے ہیں : میں نے اس کے حوالے سے کوئی منکر حدیث نہیں دیکھی ہے ، جب کوئی ثقہ شخص اس سے روایت نقل کرے ، تو یہ حد سے آگے چلا جاتا ہے اگرچہ یہ حدیث میں قوی نہیں ہے ، لیکن اس کی حدیث کو نوٹ کیا جائے گا ، اور جب کسی ثقہ شخص نے اس سے روایت نقل کی ہو ، تو اسے قبول کیا جائے گا ۔ مکی بن ابراہیم نے اس سے روایت نقل کی ہے ، اور وہ ” صحیح “ کے رجال میں سے ایک ہیں ، تو ابن عدی کے قول کے مطابق یہ راوی مقبول شمار ہو گا ، باقی اللہ بہتر جانتا ہے ۔

سیدنا براء رضی اللہ عنہ بیان کرتے ہیں : نبی اکرم صلی اللہ علیہ وسلم نے ارشاد فرمایا : ” موزوں پر مسح کرنے کے بارے میں مسافر کے لئے تین دن اور تین راتیں اور مقیم کے لیے ایک دن اور ایک رات ہیں “ ۔
یہ روایت امام طبرانی نے معجم کبیر اور معجم اوسط میں نقل کی ہے اس کی سند میں ایک راوی ضبی بن اشعث ہے ، جس سے منکر روایات منقول ہیں ۔

سیدنا انس بن مالک رضی اللہ عنہ نے نبی اکرم صلی اللہ علیہ وسلم کے حوالے سے موزوں پر مسح کے بارے میں مسافر کے لئے تین دن اور مقیم کے لیے ایک دن اور ایک رات ( کی مدت کا متعین ہونا ) نقل کیا ہے ۔
یہ روایت امام طبرانی نے معجم اوسط میں نقل کی ہے ، اس کی سند میں ایک راوی قاسم بن عثمان بصری ہے ، امام بخاری رحمہ اللہ فرماتے ہیں اس سے ایسی احادیث منقول ہیں ، جن کی متابعت نہیں کی گئی ہے ۔

سیدنا ابوبردہ رضی اللہ عنہ بیان کرتے ہیں : وہ آخری غزوہ ، جس میں ہم نے نبی اکرم صلی اللہ علیہ وسلم کے ساتھ حصہ لیا ، اس میں آپ صلی اللہ علیہ وسلم نے ہمیں یہ حکم دیا کہ ہم اپنے موزوں پر مسح کریں ، مسافر کے لیے اس کی مدت تین دن اور تین راتیں ، اور مقیم کے لیے ایک دن اور ایک رات تھی ، جب تک وہ اسے ( یعنی پاؤں کو موزے سے ) نکالتا نہیں ہے ۔
یہ روایت امام طبرانی نے معجم کبیر میں نقل کی ہے ، اس کی سند میں ایک راوی عمر بن رویح ہے ، جس کو ابوحاتم نے ” ضعیف“ قرار دیا ہے ، یحیی بن معین کہتے ہیں : یہ صالح الحدیث ہے ۔

سیدنا عبداللہ بن عباس رضی اللہ عنہما روایت کرتے ہیں : نبی اکرم صلی اللہ علیہ وسلم نے ارشاد فرمایا : ” موزوں پر مسح کرنے ( کی مدت ) مقیم کے لیے ایک دن اور ایک رات اور مسافر کے لئے تین دن اور تین راتیں ہیں “ ۔
یہ روایت امام طبرانی نے معجم کبیر میں نقل کی ہے ، اس کی سند میں ایک راوی مسلم ملائی ہے اور وہ ضعیف ہے ۔

سیدنا ابوامامہ رضی اللہ عنہ بیان کرتے ہیں : نبی اکرم صلی اللہ علیہ وسلم سفر کے دوران موزوں اور عمامہ پر تین دن مسح کرتے تھے اور حضر کے دوران ایک دن اور ایک رات کرتے تھے ۔
یہ روایت امام طبرانی نے معجم کبیر میں نقل کی ہے ، اس کی سند میں ایک راوی مروان ابوسلمہ ہے ، امام ذہبی کہتے ہیں : یہ مجہول ہے ۔

سیدنا اسامہ بن شریک رضی اللہ عنہ بیان کرتے ہیں : موزوں پر مسح کے بارے میں ، نبی اکرم صلی اللہ علیہ وسلم نے ارشاد فرمایا ہے : ” مسافر کے لیے ( اس کی مدت ) تین دن اور مقیم کے لیے ایک دن اور ایک رات ہے “ ۔
یہ روایت امام طبرانی نے معجم کبیر میں نقل کی ہے اس کی سند میں ایک راوی عمر بن عبداللہ بن یعلی ہے ، جس کے ضعیف ہونے پر اتفاق پایا جاتا ہے ۔

سیدنا براء بن عازب رضی اللہ عنہ بیان کرتے ہیں : نبی اکرم صلی اللہ علیہ وسلم نے ارشاد فرمایا : ” موزوں پر مسح کے بارے میں ، ( مخصوص مدت ) مسافر کے لئے تین دن اور تین راتیں اور مقیم کے لیے ایک دن اور ایک رات ہے “
یہ روایت امام طبرانی نے معجم کبیر میں نقل کی ہے اس کی سند میں ایک راوی ضبی بن اشعث ہے اور وہ ضعیف ہے ۔

سیدنا خزیمہ بن ثابت رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” مسافر کے لئے مدت تین دن اور تین راتیں ہو گی اور مقیم کے لیے ایک دن اور ایک رات ہو گی ، وہ اپنے موزوں پر مسح کرتا رہے گا ، جبکہ اس نے پاؤں اس ( موزے ) میں اس وقت داخل کیے ہوں ، جب وہ دونوں باوضو ہوں “ ۔ ( علامہ ہیثمی فرماتے ہیں : ) میں یہ کہتا ہوں :
یہ روایت امام ابوداؤد نے نقل کی ہے ، تاہم انہوں نے یہ الفاظ نقل نہیں کیے ہیں : ” جب اس نے ان دونوں کو باوضو حالت میں داخل کیا ہو “
یہ روایت امام طبرانی نے معجم کبیر میں نقل کی ہے ، اس کی سند میں ایک راوی ابن ابولیلی محمد ہے اور وہ خراب حافظے کا مالک ہے ۔

یعلی بن مرہ بیان کرتے ہیں : ہم لوگ جب نبی اکرم صلی اللہ علیہ وسلم کے ساتھ سفر کرتے تھے ، تو تین دن تک موزے نہیں اتارتے تھے اور جب ہم مقیم ہوتے تھے ، تو ایک دن اور ایک رات تک ( موزے نہیں اتارتے تھے ) ۔
یہ روایت امام طبرانی نے معجم کبیر میں نقل کی ہے ، اس کی سند میں ایک راوی عمر بن عبداللہ بن یعلیٰ ہے اور اس کے ضعیف ہونے پر اتفاق ہے ۔

سیدنا عبداللہ بن مسعود رضی اللہ عنہ فرماتے ہیں : مسافر کے لئے تین دن اور تین راتیں ، اور مقیم کے لیے ایک دن اور ایک رات ہے ۔ راوی بیان کرتے ہیں : میں نے سیدنا عبداللہ بن مسعود کے ساتھ سفر کیا ، تو وہ تین دن تک موزوں پر مسح کرتے رہے ،
یہ روایت امام طبرانی نے معجم کبیر میں نقل کی ہے اور یہ ” موقوف “ ہے ، جیسا کہ آپ ملاحظہ فرما رہے ہیں ، اُن کی نقل کردہ ” مرفوع “ حدیث پہلے گزر چکی ہے اور وہ ایسی اسانید کے ساتھ منقول ہے ، ان میں سے بعض کے رجال ” صحیح“ کے رجال ہیں ۔

حکم بن عتیبہ نے ، سیدنا علی رضی اللہ عنہ اور سیدنا عبداللہ بن مسعود رضی اللہ عنہ کے حوالے سے یہ بات نقل کی ہے : ” مسافر کے لیے اس کی مدت تین دن اور تین راتیں اور مقیم کے لیے ایک دن اور ایک رات ہے “ حکم نامی راوی نے سیدنا علی رضی اللہ عنہ سے سماع نہیں کیا ہے اور سیدنا عبداللہ بن مسعود رضی اللہ عنہ سے بھی سماع نہیں کیا ہے ، اس کے ہمراہ اس روایت کی سند میں ایک راوی حجاج بن ارطاۃ ہے ۔