مجمع الزوائد ومنبع الفوائد

سیدنا معاذ بن جبل رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا ہے : ” مجھے تمہارے حوالے سے تین چیزوں کا اندیشہ ہے ، اور وہ ہو کر رہیں گی ، عالم کی لغزش منافق کا قرآن کی بنیاد پر جدال ( یعنی بحث کرتا ) اور دنیا کو تمہارے لئے کھول دیا جانا ۔ “
یہ روایت امام طبرانی نے تینوں ( معاجم ) میں نقل کی ہے ، اس کی سند میں ایک راوی عبدالحکیم بن منصور ہے اور وہ متروک الحدیث ہے ۔

سیدنا معاذ بن جبل رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” تم لوگ تین چیزوں سے بچ کے رہنا ! عالم کی لغزش ، منافق کا قرآن کی وجہ سے جدال اور دنیا کا تمہاری گردنیں کاٹ دینا ، جہاں تک عالم کی لغزش کا تعلق ہے ، تو اگر وہ ہدایت یافتہ ہو ، تو تم اپنے دین میں اس کی تقلید نہ کرنا ، اور اگر وہ لغزش کا شکار ہو ، تو اپنی امیدیں اُس سے منقطع نہ کرنا ، جہاں تک منافق کے قرآن کے ذریعے جدال کا تعلق ہے ، تو قرآن مینارہ نور ہے ، جس طرح راستہ کے لئے مینارہ نور ہوتا ہے ، جو چیز تمہیں معروف لگے ، وہ تم حاصل کر لینا اور جو منکر محسوس ہو ، اُسے اُس کے عالم کی طرف لوٹا دینا ، جہاں تک اس چیز کا تعلق ہے کہ دنیا تمہاری گردنیں کاٹ دے گی ، تو جس کے دل میں اللہ تعالیٰ خوشحالی ڈال دے گا ، وہ خوشحال ہو گا ۔ “
یہ روایت امام طبرانی نے معجم اوسط میں نقل کی ہے ، عمرو بن مرہ نامی راوی نے سیدنا معاذ رضی اللہ عنہ سے سماع نہیں کیا ہے ، اسی طرح لیث کے کاتب عبداللہ بن صالح کو عبدالملک بن شعیب بن لیث نے ثقہ قرار دیا ہے اور ایک روایت کے مطابق یحیی نے بھی اُسے ثقہ قرار دیا ہے ، امام أحمد اور ایک جماعت نے اسے ضعیف کہا: ہے ۔

سیدنا عمرو بن عوف رضی اللہ عنہ بیان کرتے ہیں : میں نے نبی اکرم صلی اللہ علیہ وسلم کو یہ ارشاد فرماتے ہوئے سنا ہے : ” مجھے اپنی اُمت کے حوالے سے تین چیزوں کا اندیشہ ہے ، عالم کی لغزش ، نفسانی خواہشات کی پیروی اور ظالم کا فیصلہ دینا ( یا حکومت کرنا ) ۔ “
یہ روایت امام بزار نے نقل کی ہے ، اس کی سند میں ایک راوی کثیر بن عبداللہ بن عوف ہے اور وہ متروک ہے ، امام ترمذی نے اُس سے منقول روایت کو حسن قرار دیا ہے ۔

سیدنا علی بن ابوطالب رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا ہے : ” مجھے اپنی اُمت کے حوالے سے نہ تو کسی مومن کے بارے میں اندیشہ ہے ، اور نہ ہی کسی مشرک کے بارے میں اندیشہ ہے ، جہاں تک مؤمن کا تعلق ہے ، تو اس کا ایمان اسے بچا لے گا ، جہاں تک مشرک کا تعلق ہے ، تو اس کا کفر اسے خراب کر دے گا ، مجھے تم لوگوں کے بارے میں منافق کے حوالے سے اندیشہ ہے ، جو گفتگو کا ماہر ہو گا ، وہ ایسی بات کرے گا ، جو تمہیں معروف محسوس ہو گی ، اور ایسا عمل کرے گا ، جو تمہیں منکر محسوس ہو گا ۔ “
یہ روایت امام طبرانی نے معجم اوسط اور معجم صغیر میں نقل کی ہے ، اس روایت کی سند میں ایک راوی حارث اعور نام کا ہے اور وہ انتہائی ضعیف ہے ۔

سیدنا عمران بن حصین رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا ہے : ” اپنے بعد مجھے تم لوگوں کے حوالے سے سب سے زیادہ اندیشہ ایسے منافق کی وجہ سے ہے ، جو گفتگو کا ماہر ہو گا ۔ “
یہ روایت امام طبرانی نے معجم کبیر میں اور امام بزار نے نقل کی ہے ، اس کے رجال صحیح کے رجال ہیں ۔

سیدنا عمر بن خطاب رضی اللہ عنہ بیان کرتے ہیں : نبی اکرم صلی اللہ علیہ وسلم نے ہمیں ہر ایسے منافق سے بچنے کی تلقین کی تھی ، جو گفتگو کا ماہر ہو ۔
یہ روایت امام بزار ، امام أحمد ، امام ابویعلیٰ نے نقل کی ہے ، اس سے رجال کی توثیق کی گئی ہے ۔

سیدنا عقبہ بن عامر رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” مجھے اپنی امت کے بارے میں دو چیزوں کے حوالے سے اندیشہ ہے ، قرآن اور دودھ ، جہاں تک دودھ کا تعلق ہے ، تو وہ اس کی شادابی تلاش کریں گے اور نفسانی خواہشات کی پیروی کریں گے اور نماز کو ترک کر دیں گے ، اور جہاں تک قرآن کا تعلق ہے ( تو اس کے حوالے سے یہ اندیشہ ہے ) منافق اُس کا علم حاصل کریں گے ، اور پھر اُس کے ذریعے ایمان والوں کے ساتھ بحث کریں گے ۔ “
یہ روایت امام أحمد نے ( اپنی مسند میں ) اور امام طبرانی نے معجم کبیر میں نقل کی ہے اور اس کی سند میں ایک راوی دراج ابوسمح ہے ، وہ ثقہ ہے ، لیکن اُس سے استدلال کرنے کے بارے میں اختلاف پایا جاتا ہے ۔

سیدنا عمر بن خطاب رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا ہے : ” مجھے اپنے بعد اپنی امت کے بارے میں سب سے زیادہ اندیشہ ایسے شخص کے حوالے سے ہے ، جو قرآن کی تاویل کرے گا اور اُس کا مفہوم تبدیل کر دے گا ، اور اس شخص کے بارے میں ہے ، جو یہ سمجھے گا کہ وہ دوسروں کے مقابلے میں حکومت کا زیادہ حقدار ہے ۔ “
یہ روایت امام طبرانی نے معجم اوسط میں نقل کی ہے ، اس کی سند میں ایک راوی اسماعیل بن قیس انصاری ہے اور وہ متروک الحدیث ہے ۔

سیدنا ابوہریرہ رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” عنقریب میری امت پر ایسا زمانہ آئے گا ، جس میں قرآن پڑھنے والے زیادہ ہوں گے ، اور دین کی سمجھ بوجھ رکھنے والے کم ہوں گے ( اس زمانے میں ) علم قبض کر لیا جائے گا ، اور ” ہرج “ زیادہ ہو جائے گا ، لوگوں نے دریافت کیا : ” ہرج “ سے مراد کیا ہے ؟ نبی اکرم صلی اللہ علیہ وسلم نے ارشاد فرمایا : تمہارے درمیان قتل و غارت گری ، پھر اُس کے بعد ایسا زمانہ آئے گا ، جس میں لوگ قرآن پڑھیں گے لیکن وہ ان کے حلق سے آگے نہیں جائے گا ، پھر ایسا زمانہ آئے گا ، جس میں منافق اور مشرک ، مؤمن کے ساتھ بحث کریں گے ۔ “ ( علامہ ہیثمی فرماتے ہیں : ) میں یہ کہتا ہوں : صحیح میں اس روایت کا کچھ حصہ منقول ہے ۔
یہ روایت امام طبرانی نے معجم اوسط میں نقل کی ہے ، اس کی سند میں ایک راوی ابن لہیعہ ہے اور وہ ضعیف ہے ۔