مجمع الزوائد ومنبع الفوائد

عبداللہ بن مولہ بیان کرتے ہیں : ایک مرتبہ میں ” اہواز “ میں سفر کر رہا تھا ، ایک شخص میرے آگے جا رہا تھا ، وہ ایک خچر پر سوار تھا وہ یہ کہہ رہا تھا : اے اللہ ! اس امت میں سے میرا قرن رخصت ہونے لگا ہے ، تو مجھے ان لوگوں کے ساتھ ملا دے ، میں نے کہا: میں بھی آپ کی دعا میں شامل ہونا چاہتا ہوں ، تو اس نے کہا: میرا یہ ساتھی بھی اگر یہ ارادہ رکھتا ہے تو ایسا کر دے ، پھر انہوں نے بتایا کہ نبی اکرم صلی اللہ علیہ وسلم نے ارشاد فرمایا ہے : ” میری امت میں سب سے بہتر ، میرے زمانے کے لوگ ہیں ، پھر اس کے بعد والے ہیں ، راوی کہتے ہیں : مجھے نہیں معلوم کہ انہوں نے تیسری مرتبہ کا ذکر کیا تھا ، یا نہیں کیا تھا ؟ ( نبی اکرم صلی اللہ علیہ وسلم نے فرمایا : ) پھر وہ لوگ آئیں گے ، جن میں موٹاپا ظاہر ہو گا ، وہ گواہیاں دیں گے ، حالانکہ ان سے گواہیاں نہیں مانگی گئی ہوں گی ۔ “ راوی کہتے ہیں : وہ صاحب سیدنا بریدہ اسلمی رضی اللہ عنہ تھے ۔

ایک روایت میں یہ الفاظ ہیں : میں نے نبی اکرم صلی اللہ علیہ وسلم کو یہ ارشاد فرماتے ہوئے سنا ہے : ” اس امت میں سب سے بہتر وہ زمانہ ہے جس میں مجھے مبعوث کیا گیا ، جس میں ، میں موجود ہوں ، پھر اس کے بعد والوں کا زمانہ ہو گا ، پھر اس کے بعد والوں کا زمانہ ہو گا ، پھر اس کے بعد والوں کا زمانہ ہو گا ، پھر ایسے لوگ آئیں گے کہ جن کی گواہی ان کی قسم سے سبقت لے جائے گی اور ان کی قسم ان کی گواہی سے سبقت لے جائے گی ۔ “

ایک روایت میں یہ الفاظ ہیں : ” وہ زمانہ جس میں مجھے مبعوث کیا گیا ، پھر ان کے بعد والوں کا زمانہ ، پھر ان کے بعد والوں کا زمانہ ، پھر ان کے بعد والوں کا ، پھر اُن کے بعد والوں کا زمانہ ۔ “ یہ تمام روایات امام أحمد نے نقل کی ہیں اور امام ابویعلیٰ نے اختصار کے ساتھ نقل کی ہیں اور ان کے رجال صحیح کے رجال ہیں ۔

سیدنا نعمان بن بشیر رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” لوگوں میں سب سے بہتر میرا زمانہ ہے ، پھر ان کے بعد والوں کا ہے ، پھر ان کے بعد والوں کا ہے ، پھر ان کے بعد والوں کا ہے ، پھر ایسے لوگ آئیں گے کہ جن کی قسمیں ، ان کی گواہی پر سبقت لے جائیں گی اور ان کی گواہی ، ان کی قسموں پر سبقت لے جائے گی ۔ “
یہ روایت امام أحمد اور امام بزار نے ، اور امام طبرانی نے معجم کبیر اور معجم اوسط میں نقل کی ہے ، ان کے طرق میں ایک راوی عاصم بن بہدلہ ہے اور وہ حسن الحدیث ہے ، امام أحمد کے بقیہ رجال صحیح کے رجال ہیں ۔

سیدنا عمر بن خطاب رضی اللہ عنہ بیان کرتے ہیں : میں نے نبی اکرم صلی اللہ علیہ وسلم کو یہ ارشاد فرماتے ہوئے سنا ہے : ” لوگوں میں سب سے بہتر میرا زمانہ ہے ، جس میں ، میں موجود ہوں ، پھر ان کے بعد والوں کا ہے ، پھر ایسے لوگ آئیں گے کہ جن کے درمیان موٹاپا پھیل جائے گا ، وہ گواہی دیں گے حالانکہ ان سے گواہی نہیں مانگی گئی ہو گی ، اور بازاروں میں ان کی آوازیں بلند ہوں گی ۔ “
یہ روایت امام بزار نے نقل کی ہے اور یہ الفاظ ان کے نقل کردہ ہیں ۔

اُن ( صحابی ) کے حوالے سے امام طبرانی نے معجم اوسط میں یہ الفاظ نقل کئے ہیں : ” سب سے بہترین زمانہ وہ ہے جس میں ، میں موجود ہوں ، پھر دوسرا ہے ، پھر تیسرا ہے ، پھر چوتھے زمانے کے لوگوں کے بارے میں ، اللہ تعالیٰ کو کسی چیز کی پرواہ نہیں ہو گی ۔ “ ( علامہ ہیثمی فرماتے ہیں : ) میں یہ کہتا ہوں : امام ابن ماجہ نے اس روایت کا ایک حصہ نقل کیا ہے اور امام بزار کے رجال ثقہ ہیں اور امام طبرانی کے رجال میں ، ایک راوی اسحاق بن ابراہیم ہے اور میں اس سے واقف نہیں ہوں ، اس روایت کے بقیہ رجال ثقہ ہیں ۔

سیدنا انس رضی اللہ عنہ ، نبی اکرم صلی اللہ علیہ وسلم کا یہ فرمان نقل کرتے ہیں : ” لوگوں میں سب سے بہتر میرا زمانہ ہے ، پھر ان کے بعد والوں کا ہے ، پھر ان کے بعد والوں کا ہے ۔ “
یہ روایت امام بزار نے نقل کی ہے ، اس کی سند میں ایک راوی یوسف بن عطیہ ہے اور وہ متروک ہے ۔

سیدنا سعید بن تمیم رضی اللہ عنہ بیان کرتے ہیں : میں نے عرض کی : یا رسول اللہ ! آپ کی امت میں کون سب سے بہتر ہیں ؟ نبی اکرم صلی اللہ علیہ وسلم نے فرمایا : میں اور میرے زمانے کے لوگ ، میں نے عرض کی : یا رسول اللہ ! پھر کون ہیں ؟ آپ نے فرمایا : پھر دوسرے زمانے کے لوگ ، میں نے عرض کی : پھر کون ہیں ؟ یا رسول اللہ ! نبی اکرم صلی اللہ علیہ وسلم نے فرمایا : پھر تیسرے زمانے کے لوگ ، میں نے عرض کی : پھر کون ، یا رسول اللہ ! نبی اکرم صلی اللہ علیہ وسلم نے فرمایا : پھر ایسے لوگ آئیں گے جو حلف اٹھائیں گے ، حالانکہ ان سے حلف نہیں مانگا گیا ہو گا ، وہ گواہی دیں گے ، حالانکہ ان سے گواہی نہیں مانگی گئی ہو گی ، ان کے پاس امانت رکھوائی جائے گی تو وہ واپس نہیں کریں گے ۔ “
یہ روایت امام طبرانی نے نقل کی ہے اور اس کے رجال ثقہ ہیں ۔

سیدنا سمرہ بن جندب رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” میری امت میں سب سے بہترین زمانہ وہ ہے جس میں مجھے مبعوث کیا گیا ہے ، پھر اس کے بعد والوں کا ہے ، پھر ان کے بعد والوں کا ہے ۔ “
یہ روایت امام طبرانی نے معجم صغیر میں نقل کی ہے ، اس کی سند میں ایک راوی عبداللہ بن محمد بن عیشون ہے اور میں اس سے واقف نہیں ہوں ، اس روایت کے بقیہ رجال ثقہ ہیں ۔

سیدنا ابوہریرہ رضی اللہ عنہ بیان کرتے ہیں : میں نے نبی اکرم صلی اللہ علیہ وسلم کو یہ ارشاد فرماتے ہوئے سنا ہے :
” لوگوں میں سب سے بہتر میرا زمانہ ہے ، پھر ان کے بعد والوں کا ہے ، پھر ان کے بعد والوں کا ہے ، پھر چوتھے زمانے میں وہ لوگ ہوں گے ، جو گھٹیا ترین ہوں گے اور قیامت تک ایسا ہی رہے گا ۔ “
( علامہ ہیثمی فرماتے ہیں : ) میں یہ کہتا ہوں :
یہ روایت ” صحیح “ میں مذکور ہے ، تاہم اس میں یہ الفاظ نہیں ہیں : ” پھر چوتھے زمانے سے لے کر قیامت تک گھٹیا لوگ ہوں گے ۔ “
یہ روایت امام طبرانی نے معجم اوسط میں نقل کی ہے ، اس کی سند میں ایک راوی داؤد بن یزید اؤدی ہے اور وہ ضعیف ہے ۔

سیدنا ابوبرزہ اسلمی رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” لوگوں میں سب سے بہتر میرا زمانہ ہے ، پھر اس کے بعد والوں کا ہے ، پھر اس کے بعد والوں کا ہے ۔ “
یہ روایت امام بزار نے نقل کی ہے اور اس کی سند حسن ہے ،
یہ روایت امام طبرانی نے بھی نقل کی ہے اور اس کی سند میں ایسا راوی ہے جس سے میں واقف نہیں ہوں ۔

سیدنا جعدہ بن ہبیرہ رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” لوگوں میں سب سے بہتر میرا زمانہ ہے ، پھر ان کے بعد والوں کا ہے ، پھر ان کے بعد والوں کا ہے ، پھر ان کے بعد والوں کا ہے ، پھر اس کے بعد والے لوگ گھٹیا ترین ہوں گے ۔ “
یہ روایت امام طبرانی نے نقل کی ہے اور اس کے رجال صحیح کے رجال ہیں ، البتہ ادریس بن یزید اؤدی نامی راوی نے سیدنا جعدہ رضی اللہ عنہ سے سماع نہیں کیا ہے ، باقی اللہ بہتر جانتا ہے ۔

ابولہب کی صاحبزادی بیان کرتی ہیں : ایک مرتبہ نبی اکرم صلی اللہ علیہ وسلم ہمارے پاس سے گزرے ، آپ نے پینے کے لئے کچھ طلب کیا ، میں پیالے کی طرف گئی اور میں نے آپ کو پینے کے لئے پیش کیا ، ایک شخص جس کے جسم پر دو سبز کپڑے تھے ، اس نے آپ سے سوال کیا ، تو نبی اکرم صلی اللہ علیہ وسلم نے فرمایا : تم اللہ تعالیٰ کی عبادت کرو ، تم اس کے ساتھ کسی کو شریک قرار نہ دو ، تم نماز قائم کرو اور تم زکوۃ ادا کرو ، پھر نبی اکرم صلی اللہ علیہ وسلم نے فرمایا : ” میری امت میں سب سے بہتر میرا زمانہ ہے اور پھر ان کے بعد والوں کا ہے ۔ “
یہ روایت امام طبرانی نے نقل کی ہے اور اس کی سند میں ایسا راوی ہے ، جس کا نام بیان نہیں گیا ہے ۔

ابوجہل کی صاحبزادی بیان کرتی ہیں : نبی اکرم صلی اللہ علیہ وسلم نے ارشاد فرمایا : ” لوگوں میں سب سے بہتر میرا زمانہ ہے ۔ “
یہ روایت امام طبرانی نے نقل کی ہے ، انہوں نے اس خاتون کا نام سیدہ جمیلہ کا ذکر کیا ہے ، اس روایت کے رجال صحیح کے رجال ہیں ، البتہ اس خاتون کے شوہر کے بارے میں مجھے علم نہیں ہے ۔

یزید بن خمیر بیان کرتے ہیں : میں نے سیدنا عبداللہ بن بسر رضی اللہ عنہ سے دریافت کیا : پہلے والے لوگوں کے مقابلے میں ہماری حالت کیا ہے ؟ تو انہوں نے فرمایا : سبحان اللہ اگر ان لوگوں کو قبروں سے اُٹھا دیا جائے ، تو وہ تمہیں اسی چیز سے پہچانیں گے کہ وہ تمہیں قیام کی حالت میں پائیں گے کہ تم نماز پڑھ رہے ہو ۔