مجمع الزوائد ومنبع الفوائد

عمرو بن میمون اودی بیان کرتے ہیں : میں سیدنا عبداللہ بن عباس رضی اللہ عنہما کے پاس بیٹھا ہوا تھا ، اسی دوران نو افراد ان کے پاس آئے ، انہوں نے سیدنا عبداللہ بن عباس رضی اللہ عنہما سے کہا: اے ابن عباس ! یا تو آپ اٹھ کر ہمارے ساتھ جائیں یا پھر یہ ہے کہ ہمیں خلوت کا موقع دیں ، تو سیدنا عبداللہ بن عباس رضی اللہ عنہما نے فرمایا : بلکہ میں اٹھ کر تمہارے ساتھ جاتا ہوں ، راوی کہتے ہیں : وہ ان دنوں تندرست تھے اور ان کی بینائی ابھی رخصت نہیں ہوئی تھی ، راوی کہتے ہیں : وہ لوگ الگ چلے گئے اور آپس میں بات چیت کرتے رہے ، مجھے پتہ نہیں چلا کہ ان لوگوں نے کیا بات کی ہے ، راوی کہتے ہیں : لیکن کچھ دیر بعد سیدنا عبداللہ بن عباس رضی اللہ عنہما اپنا کپڑا جھاڑتے ہوئے آئے اور بولے : آف ہے ، وہ مسلسل یہی کہتے ہوئے جا رہے تھے کہ آف ہے ، وہ لوگ ایک ایسے شخص پر تنقید کر رہے تھے ، جس میں دس خصوصیات ہیں ۔ وہ لوگ ایک ایسے شخص پر تنقید کر رہے تھے جس کے بارے میں نبی اکرم صلی اللہ علیہ وسلم نے یہ ارشاد فرمایا تھا : میں ایک ایسے شخص کو ضرور بھیجوں گا ، جسے اللہ تعالیٰ کبھی رسوا نہیں کرے گا ، وہ شخص اللہ اور اس کے رسول سے محبت رکھتا ہے ، تو اس دن ہر شخص اس بات کا منتظر رہا کہ شاید اسے یہ موقع ملے ، نبی اکرم صلی اللہ علیہ وسلم نے دریافت کیا : علی کہاں ہے ؟ لوگوں نے عرض کی : وہ اپنی رہائشی جگہ پر آٹا پیس رہے ہیں ! نبی اکرم صلی اللہ علیہ وسلم نے فرمایا : کیا تم میں سے کوئی ایک آٹا نہیں پیس سکتا ، راوی کہتے ہیں : پھر سیدنا علی رضی اللہ عنہ تشریف لائے ، تو انہیں آشوب چشم کی شکایت تھی ، اور وہ ٹھیک طرح سے دیکھ نہیں سکتے تھے ، نبی اکرم صلی اللہ علیہ وسلم نے ان کی آنکھوں پر لعاب دہن لگایا ، پھر تین مرتبہ جھنڈا لہرا کر وہ جھنڈا انہیں دے دیا ۔ سیدنا عبداللہ بن عباس رضی اللہ عنہما نے فرمایا : سیدہ صفیہ بنت حیی رضی اللہ عنہا آئیں ، تو نبی اکرم صلی اللہ علیہ وسلم نے فلاں صاحب کو سورت توبہ کے ہمراہ بھیجا تھا ، پھر آپ نے سیدنا علی رضی اللہ عنہ کو ان کے پیچھے بھیجا ، انہوں نے سورت توبہ والا حکم ان سے حاصل کر لیا ، نبی اکرم صلی اللہ علیہ وسلم نے ارشاد فرمایا : اس حکم کو لے کر صرف وہ فرد جا سکتا ہے ، جس کا مجھ سے تعلق ہو ، اور میرا اس سے تعلق ہو ( یعنی خاندانی تعلق ہو ) ۔ نبی اکرم صلی اللہ علیہ وسلم نے اپنے چچازاد افراد سے فرمایا : تم میں سے کون دنیا اور آخرت میں میرا ولی بنے گا ؟ تو ان لوگوں نے اس بات کو نہیں مانا ، راوی کہتے ہیں : تو سیدنا علی رضی اللہ عنہ نے عرض کی : میں دنیا اور آخرت میں آپ کا ولی بنوں گا ، تو نبی اکرم صلی اللہ علیہ وسلم نے ارشاد فرمایا : تم دنیا اور آخرت میں میرے ولی ہو ۔ راوی بیان کرتے ہیں : وہ سیدہ خدیجہ رضی اللہ عنہا کے بعد لوگوں میں اسلام قبول کرنے والے سب سے پہلے فرد ہیں ۔ سیدنا عبداللہ بن عباس رضی اللہ عنہما نے فرمایا : نبی اکرم صلی اللہ علیہ وسلم نے اپنا کپڑا لیا اور وہ کپڑا سیدنا علی رضی اللہ عنہ ، سیدہ فاطمہ رضی اللہ عنہا ، سیدنا حسن رضی اللہ عنہ اور سیدنا حسین رضی اللہ عنہ پر رکھا اور ارشاد فرمایا : ارشاد باری تعالیٰ ہے : ” اے اہل بیت اللہ تعالیٰ یہ ارادہ کرتا ہے کہ تم سے گندگی کو دور کر دے ، اور تمہیں اچھی طرح سے پاک کر دے ۔ “ سیدنا عبداللہ بن عباس رضی اللہ عنہ نے بتایا : سیدنا علی رضی اللہ عنہ نے اپنی ذات کا سودا کر لیا تھا ، انہوں نے نبی اکرم صلی اللہ علیہ وسلم کا لباس پہنا اور پھر آپ کی جگہ سو گئے تھے ، مشرکین نبی اکرم صلی اللہ علیہ وسلم کو پتھر مارا کرتے تھے ، جب سیدنا ابوبکر رضی اللہ عنہ آئے ، تو سیدنا علی رضی اللہ عنہ سو رہے تھے ۔ سیدنا عبداللہ بن عباس رضی اللہ عنہما نے بتایا : سیدنا ابوبکر رضی اللہ عنہ یہ سمجھے کہ شاید یہ اللہ کے نبی ہیں ، تو انہوں نے کہا: اے اللہ کے نبی ! تو سیدنا علی رضی اللہ عنہ نے ان سے کہا: اللہ کے نبی تشریف لے جا چکے ہیں ، آپ بئر میمونہ کی طرف تشریف لے گئے ہیں ، اور آپ وہاں پہنچ جائیں تو سیدنا ابوبکر رضی اللہ عنہ چلے گئے اور نبی اکرم صلی اللہ علیہ وسلم کے ساتھ غار میں داخل ہو گئے ، سیدنا عبداللہ بن عباس رضی اللہ عنہما نے بتایا : سیدنا علی رضی اللہ عنہ کو اسی طرح پتھر مارے جاتے رہے ، جس طرح نبی اکرم صلی اللہ علیہ وسلم کو مارے جاتے تھے ، لیکن وہ کروٹیں بدلتے رہے ۔ انہوں نے اپنا سر لحاف میں چھپایا ہوا تھا اور صبح ہونے تک وہ لحاف سے باہر نہیں نکلے ، پھر انہوں نے اپنے سر سے کپڑا ہٹایا ، تو لوگوں نے کہا: یہ تو دوسرے فرد ہیں ، تمہارے آقا کو جو ہم کنکریاں مارتے تھے ، تو وہ پہلو نہیں بدلتے تھے ، جبکہ تم پہلو بدل رہے تھے ۔ ہمیں اسی سے اندازہ ہو گیا تھا کہ صورت حال مختلف ہے ۔ سیدنا عبداللہ بن عباس رضی اللہ عنہما نے بتایا : نبی اکرم صلی اللہ علیہ وسلم لوگوں کو ساتھ لے کر غزوہ تبوک کے لئے تشریف لے گئے ، تو سیدنا علی رضی اللہ عنہ نے آپ کی خدمت میں عرض کی : میں بھی آپ کے ساتھ جاتا ہوں ۔ نبی اکرم صلی اللہ علیہ وسلم نے ان سے فرمایا : جی نہیں ، سیدنا علی رضی اللہ عنہ رونے لگے ۔ نبی اکرم صلی اللہ علیہ وسلم نے ان سے فرمایا : کیا تم اس بات سے راضی نہیں ہو کہ تمہاری مجھ سے وہی نسبت ہو ، جو سیدنا بارون علیہ السلام کی سیدنا موسیٰ علیہ السلام کے ساتھ تھی ، البتہ یہ ہے کہ تم میرے بعد نبی نہیں ہو گے ، کسی کے لئے بھی یہ بات مناسب نہیں ہے کہ جب میں جاؤں ( تو وہ میرا نائب بن جائے ) البتہ تم میرے نائب ہو گے ۔ نبی اکرم صلی اللہ علیہ وسلم نے سیدنا علی رضی اللہ عنہ سے یہ بھی فرمایا تھا : ” تم میرے بعد ہر مومن کے ولی ہو ۔ “ سیدنا عبداللہ بن عباس رضی اللہ عنہما نے بتایا : نبی اکرم صلی اللہ علیہ وسلم نے سیدنا علی رضی اللہ عنہ کے مخصوص دروازے کے علاوہ مسجد کے تمام دروازوں کو بند کروا دیا تھا ۔ سیدنا عبداللہ بن عباس رضی اللہ عنہما نے یہ بھی بتایا : سیدنا علی رضی اللہ عنہ جنابت کی حالت میں مسجد میں داخل ہو سکتے تھے ، کیونکہ وہ ان کا راستہ تھا ، ان کا اس کے علاوہ اور کوئی راستہ نہیں تھا ۔ سیدنا عبداللہ بن عباس رضی اللہ عنہما نے بتایا نبی اکرم صلی اللہ علیہ وسلم نے ارشاد فرمایا ہے : ” میں جس کا مولیٰ ہوں ، تو علی بھی اس کا مولیٰ ہے ۔ “ سیدنا عبداللہ بن عباس رضی اللہ عنہما نے بتایا : اللہ تعالیٰ نے قرآن میں یہ بات بتائی ہے کہ وہ ان صحابہ کرام سے راضی ہے ، جنہوں نے درخت کے نیچے بیعت کی تھی اور اللہ تعالیٰ یہ بات جانتا ہے ، جو ان کے دلوں میں ہے ، تو کیا اللہ تعالیٰ نے ہمیں یہ بات بتائی ہے کہ وہ اس کے بعد بھی ان لوگوں پر ناراض ہوا ہو ؟ سیدنا عبداللہ بن عباس رضی اللہ عنہما نے یہ بات بھی بتائی کہ نبی اکرم صلی اللہ علیہ وسلم نے سیدنا عمر رضی اللہ عنہ سے یہ کہا: تھا ، جس وقت انہوں نے یہ اجازت مانگی تھی کہ آپ مجھے اجازت دیں ، تو میں اس کی گردن اڑا دیتا ہوں ، تو نبی اکرم صلی اللہ علیہ وسلم نے فرمایا : کیا تم ایسا کرو گے ؟ تمہیں کیا پتہ ؟ شاید اللہ تعالیٰ نے اہل بدر کی طرف جھانک کر دیکھا ہو اور یہ فرما دیا ہو : تم جو چاہو عمل کر لو ۔ “ ( سیدنا عبداللہ بن عباس رضی اللہ عنہما کے کہنے کا مطلب یہ تھا : بیعت رضوان اور غزوہ بدر میں شرکت کرنے کا شرف سیدنا علی رضی اللہ عنہ کو بھی حاصل ہے ، تو وہ بھی اس فضیلت میں شامل ہوں گے ) ۔
یہ روایت امام أحمد نے اور امام طبرانی نے معجم کبیر میں اور معجم اوسط میں اختصار کے ساتھ نقل کی ہے ، امام أحمد کے رجال ” صحیح “ کے رجال ہیں صرف ابوبلج فزاری کا معاملہ مختلف ہے ، اور وہ ثقہ ہے ، اور اس میں کمزور ہونا پایا جاتا ہے ۔

سیدنا عبداللہ بن عباس رضی اللہ عنہما بیان کرتے ہیں : سیدنا علی رضی اللہ عنہ میں اٹھارہ ایسی خصوصیات ہیں جو اس امت کے کسی بھی فرد میں نہیں ہیں ۔
یہ روایت امام طبرانی نے معجم اوسط میں نقل کی ہے ۔ اس کی سند میں ایک راوی حکیم بن جبیر ہے ، اور وہ ضعیف ہے ۔

سیدنا عبداللہ بن عمر رضی اللہ عنہما بیان کرتے ہیں : نبی اکرم صلی اللہ علیہ وسلم کے زمانہ اقدس میں ہم یہ کہتے تھے کہ اللہ کے رسول سب لوگوں میں سب سے بہتر ہیں ، پھر سیدنا ابوبکر رضی اللہ عنہ ہیں ، پھر سیدنا عمر رضی اللہ عنہ ہیں ۔ پھر سیدنا علی بن ابوطالب رضی اللہ عنہ کو تین خصوصیات عطا کی گئیں ، ان میں سے کوئی ایک خصوصیت بھی میرے اندر ہوتی تو یہ میرے لئے سرخ اونٹوں سے زیادہ پسندیدہ تھا ۔ نبی اکرم صلی اللہ علیہ وسلم نے ان کی شادی اپنی صاحبزادی کے ساتھ کی تھی اور ان کی صاحبزادی نے ان کی اولاد کو جنم دیا ، نبی اکرم صلی اللہ علیہ وسلم نے ان کے مخصوص دروازے کے علاوہ مسجد کے تمام دروازوں کو بند کروا دیا اور نبی اکرم صلی اللہ علیہ وسلم نے غزوہ خیبر کے موقع پر جھنڈا انہیں عطا کیا تھا ۔
یہ روایت امام أحمد اور امام ابویعلیٰ نے نقل کی ہے ، اور ان دونوں کے رجال ” صحیح “ کے رجال ہیں ۔

سیدنا ابوہریرہ رضی اللہ عنہ بیان کرتے ہیں : سیدنا عمر رضی اللہ عنہ نے ارشاد فرمایا : ” علی بن ابوطالب کو تین ایسی خصوصیات عطا کی گئی ہیں کہ اگر ان میں سے کوئی ایک خصوصیت میرے لئے ہوتی تو یہ چیز میرے نزدیک اس سے زیادہ پسندیدہ تھی کہ مجھے سرخ اونٹ دے دیتے جاتے ، پوچھا: گیا : اے امیر المؤمنین ! وہ چیزیں کیا ہیں ؟ تو سیدنا عمر رضی اللہ عنہ نے فرمایا : ان کی شادی نبی اکرم صلی اللہ علیہ وسلم کی صاحبزادی سیدہ فاطمہ رضی اللہ عنہا سے ہوئی ، وہ دونوں مسجد میں نبی اکرم صلی اللہ علیہ وسلم کے ساتھ ایسی حالت میں رہ سکتے تھے کہ اور کسی کے لئے اس حالت میں مسجد میں آنا جائز نہیں ہے ، اور غزوہ خیبر کے موقع پر جھنڈا انہیں دیا گیا ۔ “
یہ روایت امام ابویعلیٰ نے کبیر میں نقل کی ہے ۔ اس کی سند میں ایک راوی عبداللہ بن جعفر بن نجیح ہے ، اور وہ متروک ہے ۔

سیدنا عبداللہ بن حکیم رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” بے شک اللہ تعالیٰ نے علی کے بارے میں میری طرف تین چیزیں اس رات وحی کی تھیں ، جس رات مجھے معراج کروائی گئی تھی ( وہ تین باتیں یہ ہیں : ) وہ اہل ایمان کا سردار ہے ، وہ پرہیزگاروں کا امام ہے ، اور وہ چمک دار روشن پیشانی والوں کا قائد ہے ۔ “
یہ روایت امام طبرانی نے معجم صغیر میں نقل کی ہے ۔ اس کی سند میں ایک راوی عیسیٰ بن سوادہ نخعی ہے ، اور وہ کذاب ہے ۔ ( علامہ ہیثمی فرماتے ہیں : ) میں یہ کہتا ہوں ۔ اس بارے میں کچھ احادیث اس باب میں آئیں گی جو اس شخص کے بارے میں ہے ، جو سیدنا علی رضی اللہ عنہ سے محبت رکھتا ہے ، اور دوسری جگہ پر آئیں گی ۔

سیدنا ابوحمراء رضی اللہ عنہ بیان کرتے ہیں : میں نے نبی اکرم صلی اللہ علیہ وسلم کو دیکھا کہ آپ چھ ماہ تک سیدنا علی رضی اللہ عنہ اور سیدہ فاطمہ رضی اللہ عنہا کے دروازے پر آتے رہے ، اور آپ یہ پڑھتے تھے : ” اے اہل بیت اللہ تعالیٰ نے یہ ارادہ کیا ہے کہ وہ تم سے گندگی کو دور کر دے ، اور تمہیں اچھی طرح سے پاک کر دے ۔ “
یہ روایت امام طبرانی نے نقل کی ہے ۔ اس کی سند میں ایک راوی ابوداؤد نابینا ہے ، اور وہ کذاب ہے ۔

نبی اکرم صلی اللہ علیہ وسلم کے خادم سیدنا ابوحمراء رضی اللہ عنہ بیان کرتے ہیں : میں نے نبی اکرم صلی اللہ علیہ وسلم کو یہ ارشاد فرماتے ہوئے سنا ہے : ” جس رات مجھے آسمان کی طرف معراج کروائی گئی ، میں جنت میں داخل ہوا تو میں نے عرش کے پائے پر یہ لکھا ہوا دیکھا : اللہ تعالیٰ کے علاوہ اور کوئی معبود نہیں ہے ، سیدنا محمد اللہ کے رسول ہیں ، میں نے علی کے ذریعے ان کی تائید کی ہے ، اور ان کی مدد کی ہے ۔ “
یہ روایت امام طبرانی نے نقل کی ہے ۔ اس کی سند میں ایک راوی عمرو بن ثابت ہے ، اور وہ متروک ہے ۔

سیدنا عمار بن یاسر رضی اللہ عنہ بیان کرتے ہیں : میں نے نبی اکرم صلی اللہ علیہ وسلم کو سیدنا علی رضی اللہ عنہ سے یہ ارشاد فرماتے ہوئے سنا : ” اللہ تعالیٰ نے تمہیں ایسی زینت کے ذریعے آراستہ کیا ہے کہ اس نے اپنے بندوں کو ایسی زینت کے ذریعے آراستہ نہیں کیا ، جو اللہ تعالیٰ کے نزدیک اس زینت سے زیادہ پسندیدہ ہو ( جس زینت سے اس نے تمہیں آراستہ کیا ہے ) اور وہ نیک لوگوں کی زینت ہے ، اور وہ چیز دنیا سے بے رغبتی اختیار کرنا ہے ، اس نے تمہیں ایسا بنایا ہے کہ تم دنیا میں سے کسی چیز کے مالک نہیں ہو گے ، اور اس نے دنیا کو ایسا بنایا ہے کہ وہ تم سے کوئی چیز نہیں پا سکے گی اور اس نے تمہیں غریبوں کے ساتھ محبت رکھنا ہبہ کیا ہے ۔ “
یہ روایت امام طبرانی نے نقل کی ہے ۔ اس کی سند میں ایک راوی عمرو بن جمیع ہے اور وہ متروک ہے ۔

سیدنا عبداللہ بن عمر رضی اللہ عنہما بیان کرتے ہیں : ایک مرتبہ میں نبی اکرم صلی اللہ علیہ وسلم کے ساتھ مدینہ منورہ میں ایک سائے میں تھا ، ہم سیدنا علی رضی اللہ عنہ کو تلاش کر رہے تھے اسی دوارن ہم ایک باغ تک پہنچے ، ہم نے سیدنا علی رضی اللہ عنہ کو دیکھا کہ وہ زمین پر سوئے ہوئے تھے اور غبار آلود ہو چکے تھے ، نبی اکرم صلی اللہ علیہ وسلم نے ارشاد فرمایا : میں لوگوں کو اس بات پر ملامت نہیں کروں گا کہ اگر وہ تمہاری کنیت ابوتراب رکھ دیں ، راوی کہتے ہیں : میں نے سیدنا علی رضی اللہ عنہ کو دیکھا ان کا چہرہ متغیر ہو چکا تھا ، یہ بات نبی اکرم صلی اللہ علیہ وسلم کو گراں گزری ، نبی اکرم صلی اللہ علیہ وسلم نے ارشاد فرمایا : اے علی ! کیا میں تمہیں راضی نہ کر دوں ، انہوں نے عرض کی : جی ہاں ، نبی اکرم صلی اللہ علیہ وسلم نے فرمایا : تم میرے بھائی اور میرے وزیر ہو ، تم میرا قرض ادا کرو گے ، میرے وعدے پورے کرو گے ، میرے ذمہ کو پورا کرو گے ، جو شخص میری زندگی میں تم سے محبت رکھے گا ، وہ اپنا فرض پورا کر دے گا ، اور جو شخص میرے بعد تمہاری زندگی میں تم سے محبت رکھے گا یا ( جو شخص میرے بعد زندگی بھر تم سے محبت رکھے گا ) اللہ تعالیٰ اس کے لئے امن اور ایمان کی مہر لگا دے گا ، اور اسے گھبراہٹ والے دن امان میں رکھے گا ، اور جو شخص ایسی حالت میں مرے گا کہ وہ تم سے بغض رکھتا ہو اے علی ! تو وہ زمانہ جاہلیت کی موت مرے گا ، اور اللہ تعالیٰ اس سے اس کام کا محاسبہ کرے گا جو اس نے اسلام میں عمل کیا تھا ۔ “
یہ روایت امام طبرانی نے نقل کی ہے ، اور اس کی سند میں ایسا راوی ہے ، جس سے میں واقف نہیں ہوں ۔

سیدنا علی رضی اللہ عنہ بیان کرتے ہیں : نبی اکرم صلی اللہ علیہ وسلم نے مجھے تلاش کیا ، تو آپ نے مجھے ایک جگہ پر سوئے ہوئے پایا ، آپ نے فرمایا : تم اٹھو میں لوگوں کو اس بات پر ملامت نہیں کروں گا کہ اگر وہ تمہیں ابوتراب کا نام دے دیں ، راوی کہتے ہیں : نبی اکرم صلی اللہ علیہ وسلم نے مجھے ملاحظہ فرمایا کہ جیسے اس حوالے سے مجھے الجھن ہوئی ہے ، تو نبی اکرم صلی اللہ علیہ وسلم نے ارشاد فرمایا : تم اٹھو ! اللہ کی قسم ! میں تمہیں راضی کر دوں گا ، تم میرے بھائی ہو اور میرے بچوں کے باپ ہو ، تم میری سنت کی خاطر جنگ کرو گے ، میرے ذمہ کو ادا کرو گے ، جو شخص میرے عہد میں مرے گا ، تو وہ اللہ تعالیٰ کا خزانہ ہو گا ، اور جو شخص تمہارے عہد میں مرے گا ، تو وہ اپنے فرض کو پورا کر دے گا ، اور جو شخص ایسی حالت میں مرے گا کہ تمہارے مرنے کے بعد بھی وہ تم سے محبت رکھتا ہو ، تو اللہ تعالیٰ اس کے لئے امن اور ایمان کی مہر لگا دے گا ، ایسا اس وقت تک ہوتا رہے گا جب تک سورج طلوع ہوتا رہے گا ، یا غروب ہوتا رہے گا ، اور جو شخص ایسی حالت میں مرے گا کہ وہ تم سے بغض رکھتا ہو ، تو وہ زمانہ جاہلیت کی موت مرے گا ، اور اس نے جو زمانہ اسلام میں عمل کیا ہو گا اس کا حساب کر لیا جائے گا ۔ “
یہ روایت امام ابویعلیٰ نے نقل کی ہے ، اور اس کی سند میں ایک راوی زکریا اصبہانی ہے ، اور وہ ضعیف ہے ۔