مجمع الزوائد ومنبع الفوائد

سیدنا علی رضی اللہ عنہ بیان کرتے ہیں : جب خیبر کے دن نبی اکرم صلی اللہ علیہ وسلم نے مجھے جھنڈا عطا کیا اس وقت جب نبی اکرم صلی اللہ علیہ وسلم نے میرے چہرے پر ہاتھ پھیرا اور میری آنکھوں میں لعاب دہن ڈالا ، اس کے بعد مجھے کبھی آشوب چشم کی یا سر درد کی شکایت نہیں ہوئی ۔
یہ روایت امام ابویعلیٰ نے نقل کی ہے ، اور امام أحمد نے اختصار کے ساتھ نقل کی ہے ، اور ان دونوں کے رجال ” صحیح “ کے رجال ہیں ، صرف اُم موسیٰ کا معاملہ مختلف ہے ، اور اس کی نقل کردہ حدیث مستقیم ہے ۔

عبدالرحمن بن ابولیلی بیان کرتے ہیں : ایک شدید گرمی کے دن سیدنا علی بن ابوطالب رضی اللہ عنہ ہمارے پاس تشریف لائے ، اس وقت انہوں نے سردی کے کپڑے پہنے ہوئے تھے اور ایک مرتبہ سردی کے موسم میں وہ ہمارے پاس تشریف لائے ، تو انہوں نے گرمی کے کپڑے پہنے ہوئے تھے ، پھر ایک مرتبہ وہ اپنے بالاخانے سے پانی لے کے آئے ، پھر انہوں نے اپنی پیشانی سے پسینہ پونچھا ، پھر وہ اپنے گھر واپس چلے گئے ، میں نے اپنے والد سے کہا: اے ابا جان کیا آپ نے دیکھا جو امیر المؤمنین نے کیا ہے ؟ وہ ہمارے پاس سردی میں تشریف لائے تھے ، تو انہوں نے گرمی کے کپڑے پہنے ہوئے تھے ، اور وہ ہمارے پاس گرمی میں تشریف لائے تھے ، تو انہوں نے سردی کے کپڑے پہنے ہوئے تھے ، تو سیدنا ابولیلی رضی اللہ عنہ نے فرمایا : تم نے ٹھیک نوٹ کیا ہے ، پھر انہوں نے اپنے صاحبزادے کا ہاتھ پکڑا اور سیدنا علی رضی اللہ عنہ کے پاس چلے گئے اور سیدنا علی رضی اللہ عنہ سے ان کے طرز عمل کے بارے میں دریافت کیا ، تو سیدنا علی رضی اللہ عنہ نے انہیں بتایا : نبی اکرم صلی اللہ علیہ وسلم نے مجھے بھیجا ۔ اس وقت مجھے آشوب چشم کی شکایت تھی ، تو نبی اکرم صلی اللہ علیہ وسلم نے میری آنکھوں میں اپنا لعاب دہن ڈالا ، پھر آپ نے فرمایا : اپنی دونوں آنکھوں کو کھولو ، تو میں نے اپنی آنکھوں کو کھولا تو اس وقت سے لے کر آج تک مجھے آنکھوں میں کبھی شکایت نہیں ہوئی ، پھر نبی اکرم صلی اللہ علیہ وسلم نے مجھے دعا دیتے ہوئے ارشاد فرمایا : اے اللہ ! اس سے گرمی اور سردی کو دور کر دے ! اس کے بعد آج کے دن تک مجھے کبھی گرمی یا سردی محسوس نہیں ہوئی ۔
یہ روایت امام طبرانی نے معجم اوسط میں نقل کی ہے ، اور اس کی سند حسن ہے ۔

ان کی نقل کردہ ایک اور روایت میں یہ الفاظ ہیں : سوید بن غفلہ بیان کرتے ہیں : ہماری ملاقات سیدنا علی رضی اللہ عنہ سے ہوئی ، ان کے جسم پر دو کپڑے تھے ، یہ سردی کے موسم کی بات ہے ، ہم نے کہا: جناب آپ ہمارے اس علاقے کے حوالے سے غلط فہمی کا شکار نہ ہوں ، کیونکہ ہمارا یہ علاقہ آپ کے علاقے کی طرح نہیں ہے ، تو سیدنا علی رضی اللہ عنہ نے فرمایا : میں ایسا شخص تھا جسے سردی لگی ہوئی تھی ( یا سردی زیادہ لگتی تھی ) جب نبی اکرم صلی اللہ علیہ وسلم نے مجھے خیبر بھیجا تھا ، تو میں نے عرض کی : مجھے آشوب چشم کی شکایت ہے ، تو نبی اکرم صلی اللہ علیہ وسلم نے میری آنکھوں میں لعاب دہن ڈالا ، اس کے بعد مجھے نہ کبھی گرمی محسوس ہوئی ، نہ سردی محسوس ہوئی اور نہ ہی کبھی آشوب چشم کی شکایت ہوئی ۔

سیدنا عبداللہ بن مسعود رضی اللہ عنہ بیان کرتے ہیں : میں نے نبی اکرم صلی اللہ علیہ وسلم کو دیکھا کہ آپ نے سیدنا علی رضی اللہ عنہ کی آنکھ میں اپنا لعاب دہن سرمے کے طور پر لگایا تھا ۔
یہ روایت امام طبرانی نے نقل کی ہے ۔ اس کی سند میں ایک راوی معلیٰ بن عرفان ہے ، اور وہ متروک ہے ۔