مجمع الزوائد ومنبع الفوائد

سیدنا علی بن ابوطالب رضی اللہ عنہ بیان کرتے ہیں : غزوہ بدر کے دن ولید بن عتبہ کے خلاف ، میں نے اور سیدنا حمزہ رضی اللہ عنہ نے سیدنا عبیدہ بن حارث رضی اللہ عنہ کی مدد کی تھی ۔ راوی کہتے ہیں : میرا خیال ہے انہوں نے یہ بھی فرمایا تھا : نبی اکرم صلی اللہ علیہ وسلم نے اس حوالے سے ہم پر کوئی اعتراض نہیں کیا تھا ۔
یہ روایت امام طبرانی نے نقل کی ہے ، اس کی سند میں ایک راوی حسین بن حسین اشقر ہے ، جسے ابن حبان نے ثقہ قرار دیا ہے اور جمہور نے اسے ضعیف کہا: ہے ۔

عامر شعبی بیان کرتے ہیں : سیدنا سعد بن ابی وقاص رضی اللہ عنہ سے دریافت کیا گیا : آپ کو دعا ( یعنی نبی اکرم صلی اللہ علیہ وسلم کی طرف سے ملنے والی دعا ) کب نصیب ہوئی تھی ؟ انہوں نے بتایا : غزوہ بدر کے دن ، میں نبی اکرم صلی اللہ علیہ وسلم کے آگے کھڑا ہو کر تیر اندازی کر رہا تھا ، میں نے تیر کمان میں لگایا اور پھر یہ دعا کی : اے اللہ ! ان کے قدموں کو ہلا دے اور ان کے دلوں میں رعب ڈال دے اور ان کے ساتھ یہ کر اور وہ کر ! تو نبی اکرم صلی اللہ علیہ وسلم نے یہ فرمایا : اے اللہ ! تو سعد کی دعا کو قبول فرما ! ( علامہ ہیثمی فرماتے ہیں : میں یہ کہتا ہوں : امام ترمذی نے اس روایت کا ایک حصہ نقل کیا ہے ۔
یہ روایت امام طبرانی نے نقل کی ہے ۔ اس کی سند میں ایک راوی مجالد بن سعید ہے ، جس کے ضعیف ہونے کے باوجود اس کی توثیق کی گئی ہے ۔

سیدنا عبداللہ بن مسعود رضی اللہ عنہ فرماتے ہیں : غزوہ بدر کے دن سیدنا سعد رضی اللہ عنہ نے ، نبی اکرم صلی اللہ علیہ وسلم کے ساتھ ایک ۔ سوار کے طور پر اور ایک پیادہ کے طور پر ( یعنی دونوں حیثیتوں کے ساتھ ) جنگ میں حصہ لیا تھا ۔
یہ روایت امام بزار نے دو اسناد کے ساتھ نقل کی ہے ، جن میں سے ایک متصل ہے اور دوسری ” مرسل “ ہے اور ان دونوں کے رجال ثقہ ہیں ۔

سیدنا عبداللہ بن عباس رضی اللہ عنہما بیان کرتے ہیں : غزوہ بدر کے دن فرشتوں کی مخصوص نشانی سفید عمامے تھے ، انہوں نے ان کے شملے پیچھے لٹکائے ہوئے تھے ، اور غزوہ حنین کے موقع پر ، ان کی نشانی سرخ عمامے تھے ، لیکن فرشتوں نے جنگ میں حصہ ، صرف غزوہ بدر کے موقع پر لیا تھا ، ویسے وہ تعداد زیادہ ظاہر کرنے کے لئے شریک ہوتے تھے ، لیکن لڑائی میں حصہ نہیں لیتے تھے ۔
یہ روایت امام طبرانی نے نقل کی ہے ۔ اس کی سند میں ایک راوی عمار بن ابومالک جنبی ہے ، جسے ازدی نے ضعیف قرار دیا ہے ۔

سیدنا عبداللہ بن عباس رضی اللہ عنہما بیان کرتے ہیں : فرشتوں نے نبی اکرم صلی اللہ علیہ وسلم کے ساتھ صرف غزوہ بدر کے موقع پر لڑائی میں حصہ لیا تھا ، اس کے علاوہ ، وہ صرف تعداد زیادہ ظاہر کرنے کے لئے حاضر ہوتے تھے ( غزوہ بدر کے موقع پر ) نبی اکرم صلی اللہ علیہ وسلم کے ساتھ صرف دو گھوڑے تھے ، جن میں سے ایک سیدنا مقداد بن اسود رضی اللہ عنہ کا تھا ، اور دوسرا سیدنا ابومرثد غنوی رضی اللہ عنہ کا تھا ۔
یہ روایت امام طبرانی نے معجم کبیر اور معجم اوسط میں نقل کی ہے ۔ اس کی سند میں ایک راوی عبدالعزیز بن عمران ہے ۔ اور وہ ضعیف ہے ۔

بہی بیان کرتے ہیں : غزوہ بدر کے موقع پر نبی اکرم صلی اللہ علیہ وسلم کے ساتھ دو شہسوار تھے ۔ سیدنا زبیر بن عوام رضی اللہ عنہ ایک گھوڑے پر سوار تھے اور وہ میمنہ پر تعینات تھے اور سیدنا مقداد بن اسود رضی اللہ عنہ ایک گھوڑے پر سوار تھے اور وہ میسرہ پر تعینات تھے ۔
یہ روایت امام طبرانی نے نقل کی ہے اور
یہ روایت ” مرسل “ ہے ۔

ابوملیح ، اپنے والد کا یہ بیان نقل کرتے ہیں : غزوہ بدر کے موقع پر جب فرشتے نازل ہوئے تھے ، تو ان کا حلیہ سیدنا زبیر رضی اللہ عنہ کی طرح کا تھا ، اور انہوں نے زرد عمامے باندھے ہوئے تھے ۔
یہ روایت امام بزار نے نقل کی ہے ۔ اس کی سند میں ایک راوی صلت بن دینار ہے اور وہ متروک ہے ۔

سیدنا ابوحازم انصاری رضی اللہ عنہ بیان کرتے ہیں : غزوہ بدر کے دن نبی اکرم صلی اللہ علیہ وسلم سائے میں تھے اور آپ کے اصحاب دھوپ میں لڑائی کر رہے تھے ۔ سیدنا جبرائیل آپ کی خدمت میں حاضر ہوئے انہوں نے عرض کی : آپ سائے میں ہیں اور مسلمان دھوپ میں لڑائی کر رہے ہیں ، تو نبی اکرم صلی اللہ علیہ وسلم اُٹھے اور دھوپ میں آ گئے ۔
یہ روایت امام طبرانی نے معجم اوسط میں نقل کی ہے ۔ اس کی سند میں ایک راوی حسن بن صالح بن ابواسود ہے اور وہ انتہائی ضعیف ہے ۔

سیدنا سہل بن ابوحثمہ رضی اللہ عنہ بیان کرتے ہیں : سیدنا ابوبرزہ حارثی رضی اللہ عنہ غزوہ بدر کے دن تین سر اٹھا کر نبی اکرم صلی اللہ علیہ وسلم کے پاس آئے جب نبی اکرم صلی اللہ علیہ وسلم نے انہیں ملاحظہ فرمایا تو ارشاد فرمایا : تم کامیاب ہو گئے انہوں نے عرض کی : یا رسول اللہ ! جہاں تک دو افراد کا تعلق ہے ، تو ان دونوں کو تو میں نے قتل کیا ہے ، لیکن جہاں تک تیسرے فرد کا تعلق ہے ، تو میں نے ایک خوبصورت سفید رنگ کے شخص کو دیکھا جس کا چہرہ خوبصورت تھا اس نے اس کا سر اڑا دیا ہے ، تو نبی اکرم صلی اللہ علیہ وسلم نے ارشاد فرمایا : وہ فلاں ، ایک فرشتہ تھا ۔
یہ روایت امام طبرانی نے معجم اوسط میں نقل کی ہے ۔ اس کی سند میں ایک راوی عبدالعزیز بن عمران ہے اور وہ ضعیف ہے ۔

سیدنا ابوداؤد مازنی رضی اللہ عنہ جنہیں غزوہ بدر میں شرکت کا شرف حاصل ہے وہ بیان کرتے ہیں : میں مشرکین سے تعلق رکھنے والے ایک شخص کے پیچھے گیا تاکہ اس پر ضرب لگاؤں ، تو میری تلوار اس تک پہنچنے سے پہلے ہی اس کا سر گر گیا تو مجھے اندازہ ہو گیا کہ اسے میرے علاوہ کسی اور نے قتل کیا ہے ۔
یہ روایت امام أحمد نے نقل کی ہے ۔ اس کی سند میں ایک شخص ایسا ہے جس کا نام بیان نہیں کیا گیا ہے ۔

سیدنا جابر رضی اللہ عنہ بیان کرتے ہیں : غزوہ بدر کے موقع پر ہم نبی اکرم صلی اللہ علیہ وسلم کی اقتداء میں نماز ادا کر رہے تھے نبی اکرم صلی اللہ علیہ وسلم نماز کے دوران مسکرا دیے جب آپ نے نماز مکمل کی تو ہم نے عرض کی : یا رسول اللہ ! ہم نے آپ کو دیکھا کہ آپ مسکرا دیے تھے نبی اکرم صلی اللہ علیہ وسلم نے ارشاد فرمایا : میکائیل میرے پاس سے گزرے تھے اور ان کے ” پر “ پر غبار کا نشان تھا ، اور وہ دشمن کا پیچھا کر کے واپس آ رہے تھے ، وہ مجھے دیکھ کر ہنس پڑے ، تو میں نے انہیں دیکھ کر مسکرا دیا ۔
یہ روایت امام ابویعلیٰ نے نقل کی ہے ، اس کی سند میں ایک راوی وازع بن نافع ہے اور وہ متروک ہے ۔

سیدنا ابوامامہ بن سہل بن حنیف رضی اللہ عنہ بیان کرتے ہیں : میرے والد نے یہ بات ارشاد فرمائی : ” اے میرے بیٹے ! غزوہ بدر کے بارے میں ، مجھے اپنے بارے میں یہ بات یاد ہے کہ ہم میں سے کوئی ایک شخص اپنی تلوار کے ذریعے مشرک کے سر کی طرف اشارہ کرتا تھا ، تو اس کا سر جسم سے جدا ہو کے گر جاتا تھا ، اس سے پہلے کہ وہ تلوار ( یا حملہ آور فرد ) اس تک پہنچے “ ۔
یہ روایت امام طبرانی نے نقل کی ہے ۔ اس کی سند میں ایک راوی محمد بن یحیی اسکندرانی ہے ابن یونس کہتے ہیں : اس نے منکر روایات نقل کی ہیں ۔

سیدنا سہل بن سعد رضی اللہ عنہ بیان کرتے ہیں : سیدنا ابواسید رضی اللہ عنہ نے مجھ سے فرمایا : اے میرے بھتیجے ! اگر میں اور تم اس وقت بدر میں ہوتے اور پھر اللہ تعالیٰ میری بینائی کو کھول دیتا ، تو میں تمہیں وہ گھاٹی دکھاتا ، جس میں سے فرشتے نکل کر ہمارے پاس آئے تھے ، اس میں کوئی شک اور کوئی الجھن نہیں ہے ۔
یہ روایت امام طبرانی نے نقل کی ہے ۔ اس کی سند میں ایک راوی سلامہ بن روح ہے جسے ابن حبان نے ثقہ قرار دیا ہے اور دیگر حضرات نے اس میں موجود غفلت کی وجہ سے اسے ضعیف قرار دیا ہے ۔

عروہ بیان کرتے ہیں : غزوہ بدر کے دن سیدنا جبرائیل سیدنا زبیر رضی اللہ عنہ کے حلیہ کے مطابق نازل ہوئے انہوں نے زرد رنگ کا عمامہ باندھا ہوا تھا ۔
یہ روایت امام طبرانی نے نقل کی ہے اور
یہ روایت ” مرسل “ ہے اور سند کے اعتبار سے صحیح ہے ۔ لباس سے متعلق باب میں اس نوعیت کی احادیث پہلے گزر چکی ہیں ۔

سیدنا عبداللہ بن مسعود رضی اللہ عنہ فرماتے ہیں : غزوہ بدر کے موقع پر دشمن ہماری نظروں میں کم نظر آ رہا تھا یہاں تک کہ میں نے اپنے پہلو میں موجود اپنے ساتھی سے دریافت کیا : ان لوگوں کے بارے میں تمہاری کیا رائے ہے کہ یہ کتنے ہیں کیا تم یہ سمجھتے ہو کہ یہ ستر ہوں گے ؟ اس نے کہا: میرا خیال ہے ، یہ سو ہوں گے ، یہاں تک کہ ہم نے ان میں سے ایک شخص کو پکڑا اور اس سے دریافت کیا : تو اس نے بتایا : ہم تو ایک ہزار ہیں ۔
یہ روایت امام طبرانی نے نقل کی ہے ۔

سیدنا حکیم بن حزام رضی اللہ عنہ بیان کرتے ہیں : ” ہم نے ایک آواز سنی ، جو آسمان سے زمین کی طرف آئی تھی ، اور وہ یوں تھی جیسے کسی طشت میں کنکری کو ڈالا جاتا ہے ، نبی اکرم صلی اللہ علیہ وسلم نے وہ کنکریاں پھینکیں ، تو ہم پسپا ہو گئے “ ۔
یہ روایت امام طبرانی نے معجم کبیر اور معجم اوسط میں نقل کی ہے اور اس کی سند حسن ہے ۔

سیدنا حکیم بن حزام رضی اللہ عنہ بیان کرتے ہیں : غزوہ بدر کے موقع پر نبی اکرم صلی اللہ علیہ وسلم نے یہ حکم دیا ، آپ نے مٹھی بھر کنکریاں لیں ، ہم ( یعنی مشرکین مکہ ) آپ کے سامنے آئے ، تو نبی اکرم صلی اللہ علیہ وسلم نے انہیں پھینک دیا اور فرمایا : یہ چہرے قبیح ہو جائیں ، تو ہم پسپا ہو گئے ، اس بارے میں اللہ تعالیٰ نے یہ آیت نازل کی : ” جب تم نے کنکریاں پھینکی تھیں ، تو وہ تم نے نہیں پھینکی تھیں ، بلکہ اللہ تعالیٰ نے پھینکی تھیں “ ۔
یہ روایت امام طبرانی نے نقل کی ہے اور اس کی سند حسن ہے ۔

سیدنا عبداللہ بن عباس رضی اللہ عنہما بیان کرتے ہیں : نبی اکرم صلی اللہ علیہ وسلم نے سیدنا علی رضی اللہ عنہ سے فرمایا : مجھے مٹھی بھر کنکریاں پکڑاؤ ، انہوں نے وہ پکڑائیں ، نبی اکرم صلی اللہ علیہ وسلم نے وہ دشمن کی طرف پھینکیں ، تو دشمن میں سے کوئی فرد ایسا نہیں بچا ، جس کی آنکھیں اس کنکریوں سے بھر نہ گئی ہوں ( یعنی ان کے اثرات سے متاثر نہ ہوئی ہوں ) تو اس بارے میں یہ آیت نازل ہوئی : ” جب تم نے کنکریاں پھینکی تھیں ، تو وہ تم نے نہیں پھینکی تھیں بلکہ اللہ تعالیٰ نے پھینکی تھیں “ ۔
یہ روایت امام طبرانی نے نقل کی ہے اور اس کے رجال صحیح کے رجال ہیں ۔